Maʼmuriy qamoqqa olingan shaxslarni qabul qilish va saqlash uchun moʻljallangan maxsus qabulxonalar toʻgʻrisidagi nizomni tasdiqlash haqida (734-son)

18.09.2017

Oʻzbekiston Respublikasi Vazirlar Mahkamasining

qarori

Oʻzbekiston Respublikasining “Maʼmuriy qamoqni oʻtash tartibi toʻgʻrisida”gi va “Ichki ishlar organlari toʻgʻrisida”gi qonunlariga muvofiq maʼmuriy qamoqqa olingan shaxslarni saqlash uchun moʻljallangan maxsus qabulxonalarning huquqiy maqomini belgilash maqsadida Vazirlar Mahkamasi qaror qiladi:

1. Maʼmuriy qamoqqa olingan shaxslarni qabul qilish va saqlash uchun moʻljallangan maxsus qabulxonalar toʻgʻrisida nizom ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklatilsin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 18-sentabr,

734-son

Vazirlar Mahkamasining 2017-yil 18-sentabrdagi 734-son qaroriga ILOVA

Maʼmuriy qamoqqa olingan shaxslarni qabul qilish va saqlash uchun moʻljallangan maxsus qabulxonalar toʻgʻrisida

NIZOM

1-bob. Umumiy qoidalar

1. Mazkur Nizom Oʻzbekiston Respublikasining “Maʼmuriy qamoqni oʻtash tartibi toʻgʻrisida”gi Qonuniga (keyingi oʻrinlarda Qonun deb ataladi) muvofiq, maʼmuriy qamoqqa olingan shaxslarni qabul qilish va saqlash uchun moʻljallangan maxsus qabulxonalar (keyingi oʻrinlarda maxsus qabulxona deb ataladi) faoliyatini tartibga soladi.

2. Maxsus qabulxona ichki ishlar organlari tizimiga kiruvchi, jinoyat ishlari boʻyicha tuman (shahar) sudi tergov sudyasining qarori, favqulodda holat rejimi sharoitlarida esa, shuningdek harbiy komendantning yoki ichki ishlar organi boshligʻining qarori asosida maʼmuriy qamoqqa olingan shaxslarni qabul qilish va saqlash uchun moʻljallangan maxsus muassasa hisoblanadi.

3. Maxsus qabulxona Oʻzbekiston Respublikasi Vazirlar Mahkamasi tomonidan tashkil etiladi, qayta tashkil etiladi va tugatiladi.

4. Maxsus qabulxonalar Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari huzurida tashkil etiladi.

5. Maxsus qabulxonalarning shtat birliklari Oʻzbekiston Respublikasi Ichki ishlar vaziri tomonidan oʻrnatilgan tartibda tasdiqlanadi.

6. Maxsus qabulxona oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Ichki ishlar vazirining buyruqlari va farmoyishlariga, shuningdek ushbu Nizomga amal qiladi.

7. Maxsus qabulxona davlat muassasasi shaklidagi yuridik shaxs hisoblanib, Oʻzbekiston Respublikasi Davlat gerbining tasviri tushirilgan va oʻz nomi yozilgan muhrga ega boʻladi.

2-bob. Maxsus qabulxonaning asosiy vazifalari va funksiyalari

8. Quyidagilar maxsus qabulxonaning asosiy vazifalari hisoblanadi:

maʼmuriy qamoqqa olingan shaxslarni qabul qilish va saqlashni tashkil etish;

maʼmuriy qamoqqa olingan shaxslarning huquqlari, erkinliklari va qonuniy manfaatlarini muhofaza qilish, shuningdek ularga yuklatilgan majburiyatlarni bajarishlarini tashkil etish;

maʼmuriy qamoqqa olingan shaxslarni ijtimoiy himoya qilishga yoʻnaltirilgan tadbirlarni amalga oshirish;

maʼmuriy qamoqqa olingan shaxslardan saqlash xarajatlarini undirish va ularni mehnatga jalb etish boʻyicha davlat organlari va tashkilotlari hamda fuqarolik jamiyati institutlari bilan oʻzaro hamkorlikni tashkil etish.

9. Oʻz zimmasiga yuklatilgan vazifalardan kelib chiqqan holda maxsus qabulxona quyidagi funksiyalarni amalga oshiradi:

a) maʼmuriy qamoqqa olingan shaxslarni qabul qilish va saqlashni tashkil etish boʻyicha:

jinoyat ishlari boʻyicha tuman (shahar) sudi tergov sudyasining qarori, favqulodda holat rejimi sharoitlarida esa, shuningdek, harbiy komendantning yoki ichki ishlar organi boshligʻining qarori asosida maʼmuriy qamoqqa olingan shaxslarni kechayu kunduz qabul qilish;

maʼmuriy qamoqqa olingan shaxsning shaxsiy koʻrikdan oʻtkazilishi, barmoq izlarining roʻyxatga olinishi, ushbu shaxsning fotosuratga olinishi, undagi mavjud ashyolarning koʻzdan kechirilishini tashkil etish;

maʼmuriy qamoqqa olingan shaxsni qabul qilish paytidan boshlab unga telefon orqali advokatga, qarindoshlariga yoxud boshqa shaxslarga qoʻngʻiroq qilish yoki xabar qilish huquqini berish, shuningdek qabul qilinayotgan chet el fuqarosi toʻgʻrisida Oʻzbekiston Respublikasi Tashqi ishlar vazirligini xabardor qilish;

maʼmuriy qamoqqa olingan shaxslarning shaxsi va psixologik jihatdan mosligi hisobga olingan holda saqlanishini tashkil etish;

maxsus qabulxona hududiga shaxslarning kirish-chiqish rejimiga rioya etilishi, shuningdek maxsus qabulxonaning ichki tartib qoidalariga amal qilinishini tashkil etish;

b) maʼmuriy qamoqqa olingan shaxslarning huquqlari, erkinliklari va qonuniy manfaatlarini muhofaza qilish, shuningdek ularga yuklatilgan majburiyatlarni bajarishlarini tashkil etish boʻyicha:

maʼmuriy qamoqqa olingan shaxslarning shaxsiy xavfsizligini taʼminlash, ularning hayoti va sogʻligʻiga tahdidlarning oldini olish hamda bartaraf etish choralarini koʻrish;

maʼmuriy qamoqqa olingan shaxslarning advokati, qarindoshlari va boshqa shaxslar bilan uchrashuv huquqi amalga oshirilishini tashkil etish;

maʼmuriy qamoqqa olingan shaxslarning ogʻzaki yoki yozma shaklda bergan arizalari, takliflari va shikoyatlari boʻyicha tegishli choralar koʻrilishini tashkil etish;

maʼmuriy qamoqqa olingan shaxslar tomonidan pochta joʻnatmalarini va yoʻqlovlarni olish hamda joʻnatishlari uchun zarur sharoitlar yaratish;

maʼmuriy qamoqqa olingan shaxslarning maxsus qabulxona hududidan chetga chiqish huquqidan foydalanishlarini tashkil etish;

maʼmuriy qamoqqa olingan shaxslarning maxsus qabulxona mol-mulkiga ehtiyotkorlik bilan munosabatda boʻlishlarini tashkil etish;

maʼmuriy qamoqqa olingan shaxslar tomonidan boshqa shaxslarning shaʼni va qadr-qimmatini kamsituvchi, shuningdek oʻz hayoti va sogʻligʻiga yoxud boshqa shaxslarning hayoti va sogʻligʻiga tahdid soluvchi xatti-harakatlarni sodir etishlarining oldini olish choralarini koʻrish;

v) maʼmuriy qamoqqa olingan shaxslarni ijtimoiy himoya qilishga yoʻnaltirilgan tadbirlarni amalga oshirish boʻyicha:

maʼmuriy qamoqqa olingan shaxslarga sanitariya qoidalari, normalari va gigiyena normativlari talablariga va yongʻin xavfsizligi qoidalariga javob beradigan moddiy-maishiy sharoitlar yaratish;

muntazam ravishda dezinfeksiya va boshqa sanitariya-gigiyena tadbirlari oʻtkazilishini taʼminlash;

maʼmuriy qamoqqa olingan shaxslarni belgilangan normalar boʻyicha oziq-ovqat mahsulotlari bilan taʼminlash;

maʼmuriy qamoqqa olingan shaxslarni qabul qilish vaqtida ularning orasida bemorlar va tibbiy yordamga muhtoj boʻlgan shaxslarni aniqlash maqsadida birlamchi tibbiy koʻrikni amalga oshirish;

maʼmuriy qamoqqa olingan shaxslarga tibbiy xizmat koʻrsatish hamda tibbiy davolanishga muhtoj boʻlgan shaxslarni sogʻliqni saqlash organlari bilan hamkorlikda oʻrnatilgan tartibda tibbiy muassasalarga joylashtirish;

g) maʼmuriy qamoqqa olingan shaxslarni saqlash xarajatlarini undirish va ularni mehnatga jalb etish yuzasidan mahalliy davlat hokimiyati organlari bilan oʻzaro hamkorlikni tashkil etish boʻyicha:

tegishli davlat organlari va tashkilotlari bilan hamkorlikda maʼmuriy qamoqqa olingan shaxslardan maxsus qabulxonada saqlash bilan bogʻliq xarajatlarni undirish choralarini koʻrish;

tuman (shahar) hokimliklari bilan hamkorlikda maʼmuriy qamoqqa olingan shaxslarni foydali ijtimoiy mehnatga jalb etish choralarini koʻrish;

mehnatga jalb qilingan maʼmuriy qamoqqa olingan shaxslarning haq olishlari va mehnatining muhofaza qilinishini taʼminlash;

mehnatga jalb etilgan maʼmuriy qamoqqa olingan shaxslarning doimiy nazoratda boʻlishini tashkil etish.

3-bob. Maxsus qabulxonaning huquqlari, majburiyatlari va javobgarligi

10. Maxsus qabulxona oʻziga yuklatilgan vazifa va funksiyalarni bajarishda quyidagi huquqlarga ega:

maxsus qabulxonada jinoyatlar va boshqa huquqbuzarliklar sodir etilishining, ichki tartib qoidalari buzilishining oldini olish hamda maʼmuriy qamoqqa olingan shaxslarning xulq-atvori toʻgʻrisida zarur axborot olish uchun nazorat va tekshiruvning audiovizual, elektron vositalari va boshqa texnik vositalarini qoʻllash;

maʼmuriy qamoqqa olingan shaxslardan saqlash, tarqatish, isteʼmol qilish va foydalanish taqiqlangan hujjatlarni, pul mablagʻlarini, qimmatbaho buyumlarni, narsalarni hamda boshqa ashyolarni olib qoʻyish;

maxsus qabulxonaning ichki tartib qoidalariga rioya etayotgan va mehnatga vijdonan munosabatda boʻlayotgan maʼmuriy qamoqqa olingan shaxslarga nisbatan ragʻbatlantirish (tashakkur eʼlon qilish, Oʻzbekiston Respublikasi hududi boʻyicha telefon orqali limitlangan bir martalik qoʻshimcha soʻzlashuv huquqini berish, har kungi sayr vaqtini uch soatgacha uzaytirish) hamda Qonun talablari va ichki tartib qoidalarining buzilishiga yoʻl qoʻygan shaxslarga nisbatan intizomiy jazo (ogohlantirish, telefon orqali navbatdagi soʻzlashuv huquqidan mahrum qilish, haq toʻlanmaydigan jismoniy ishlarga navbatdan tashqari jalb etish) choralarini qoʻllash;

maʼmuriy qamoqqa olingan shaxslarning yozma roziligi bilan ularni haq toʻlanadigan mehnatga, shuningdek maxsus qabulxona xonalarida sanitariya-gigiyena, maishiy sharoitlarni yaxshilash, ichki ishlar organi yoki maxsus qabulxona hududini obodonlashtirish bilan bogʻliq boʻlgan haq toʻlanmaydigan jismoniy ishlarga jalb etish;

maxsus qabulxonada jinoyatlarning oldini olish, ularni aniqlash, ularga barham berish va ularni fosh etish, shuningdek, jinoyatlarga tayyorgarlik koʻrishga va ularni sodir etishga daxldor boʻlgan shaxslarni aniqlash, topish hamda qidirish maqsadida, qonunchilikda belgilangan tartibda tezkor-qidiruv faoliyatini amalga oshirish;

Maxsus qabulxona qonunchilikka muvofiq boshqa huquqlarga ham ega boʻlishi mumkin.

11. Maxsus qabulxona quyidagi majburiyatlarga ega:

maʼmuriy qamoqqa olish toʻgʻrisidagi qarorning ijro etilishini tashkil etishi;

maʼmuriy qamoqqa olingan shaxslarning huquqlari, erkinliklari va qonuniy manfaatlarini himoya qilish hamda ularning xavfsizligini taʼminlash boʻyicha oʻz vakolatlari doirasida zarur choralar koʻrish;

maxsus qabulxona ish faoliyati haqida zarur maʼlumotlarni tayyorlash va bevosita Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalariga taqdim etish.

Maxsus qabulxona qonunchilikka muvofiq boshqa majburiyatlarga ham ega boʻlishi mumkin.

12. Maxsus qabulxona oʻz zimmasiga yuklatilgan vazifa va funksiyalarni samarali bajarilishi uchun javobgardir.

4-bob. Maxsus qabulxona faoliyatini tashkil etish

13. Maxsus qabulxonaga rahbarlikni bevosita Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari tomonidan tayinlanadigan boshliq amalga oshiradi.

14. Maxsus qabulxona boshligʻi oʻz vakolatlari doirasida:

maxsus qabulxona vakolati doirasiga kiruvchi masalalar boʻyicha qarorlar qabul qiladi va maxsus qabulxonaga yuklangan vazifalarning bajarilishi uchun shaxsan javob beradi;

maxsus qabulxona faoliyatida qonuniylikni taʼminlash choralarini koʻradi, xodimlarning kasbiy tayyorgarligi va intizomi, xizmat faoliyati yuzasidan nazoratni amalga oshiradi;

maxsus qabulxonaning kun tartibini tasdiqlaydi va xodimlar oʻrtasida vazifalarni taqsimlaydi;

maʼmuriy qamoqqa olingan shaxslarni ragʻbatlantirish, shuningdek intizomiy jazo choralari qoʻllash toʻgʻrisida buyruqlar chiqaradi va ularga eʼlon qiladi;

maxsus qabulxonaning barcha xodimlari uchun majburiy boʻlgan buyruqlar va koʻrsatmalar beradi;

qonunchilikka muvofiq boshqa vakolatlarni amalga oshiradi.

5-bob. Yakuniy qoidalar

15. Maxsus qabulxonalar faoliyati ustidan nazorat bevosita Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalarining Jamoat xavfsizligi xizmati Jamoat tartibini saqlash boshqarmalari tomonidan amalga oshiriladi.

Maxsus qabulxonalarda qonunlarga rioya etilishi ustidan nazorat Oʻzbekiston Respublikasi Bosh prokurori va unga boʻysunuvchi prokurorlar tomonidan amalga oshiriladi.

16. Ushbu Nizom talablari buzilishida aybdor boʻlgan shaxslar qonunchilikda belgilangan tartibda javob beradilar