Sirdaryo viloyatida zamonaviy paxtachilik-toʻqimachilik klasterini barpo etish chora-tadbirlari toʻgʻrisida (PQ-3279-son)

15.09.2017

Oʻzbekiston Respublikasi Prezidentining

Qarori

Qishloq xoʻjaligi ishlab chiqarishida tarkibiy islohotlarni yanada chuqurlashtirish va bunda davlatning rolini qisqartirish, toʻgʻridan-toʻgʻri investitsiyalar jalb etilishini ragʻbatlantirish, paxta va boshqa turdagi qishloq xoʻjaligi mahsulotlari yetishtirishning samarali usullarini joriy etish, ularni chuqur qayta ishlashni tashkil qilish, shuningdek, agrar sektorda mehnat unumdorligini va unga haq toʻlashni oshirish maqsadida:

1. Oʻzbekiston Respublikasi Qishloq va suv xoʻjaligi vazirligi, Iqtisodiyot vazirligi, Moliya vazirligi, Oʻzbekiston Fermerlar kengashi, Sirdaryo viloyati hokimligi, “Oʻzpaxtasanoateksport” XK, “Oʻzbekyengilsanoat” AJ, “Mirza obod universal trade cluster” xususiy korxonasining “TRONTEX LP” (Buyuk Britaniya) va “GRATUM TRADING LP” (Buyuk Britaniya) xorijiy kompaniyalari ishtirokida masʼuliyati cheklangan jamiyat shaklidagi “Bek cluster” qoʻshma korxonasini (keyingi oʻrinlarda — “Bek cluster” MCHJ QK deb yuritiladi) barpo etishni nazarda tutuvchi tajriba loyihasini amalga oshirish toʻgʻrisidagi taklifiga rozilik berilsin, bunda:

paxta va boshqa turdagi qishloq xoʻjaligi mahsulotlari yetishtirish boʻyicha;

faoliyat yuritayotgan tashkilotlarni hamda toʻgʻridan-toʻgʻri xorijiy investitsiyalar, kreditlarni va tijorat banklarining bevosita investitsiyalarini jalb etish hisobiga raqobatdosh mahsulotlar ishlab chiqarishni yoʻlga qoʻygan holda ularni chuqur qayta ishlash boʻyicha zamonaviy klasterni tashkil etish koʻzda tutilmoqda.

2. Quyidagilar:

Sirdaryo viloyati hokimligining “Bek cluster” MCHJ QK tarkibiga kiruvchi qishloq xoʻjaligi tashkiloti (keyingi oʻrinlarda — qishloq xoʻjaligi tashkiloti) tomonidan paxta va boshqa qishloq xoʻjaligi ekinlari yetishtirish uchun 18,0 ming gektar (shulardan 13,0 ming gektari Mirzaobod tumanida va 5,0 ming gektari — Xovos tumanida) sugʻoriladigan yerlarni ajratib berish toʻgʻrisidagi taklifi;

“Bek cluster” MCHJ QK tarkibiga kiruvchi tashkilotlar roʻyxati 1-ilovaga muvofiq;

2017 — 2021-yillarda davrida “Bek cluster” MCHJ QK va uning tarkibiga kiruvchi tashkilotlar tomonidan amalga oshiriladigan investitsiya loyihalari hamda faoliyat yuritayotgan tashkilotlarning prognoz parametrlari 2-ilovaga muvofiq maʼqullansin.

3. Sirdaryo viloyati hokimligi (Gʻ.Gʻ. Mirzayev) Oʻzbekiston Respublikasi Qishloq va suv xoʻjaligi vazirligi (A. Vahobov), Iqtisodiyot vazirligi (G. Saidova), Vazirlar Mahkamasi huzuridagi Sugʻoriladigan yerlarning meliorativ holatini yaxshilash jamgʻarmasi (O. Sobirov), Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi (A. Abdullayev) bilan birgalikda:

2017-yilning 1-noyabriga qadar ushbu qarorning 2-ilovasiga kiritilgan investitsiya loyihalarini amalga oshirish uchun “Bek cluster” MCHJ QK va uning tarkibiga kiruvchi tashkilotlarga belgilangan tartibda yer maydonlari ajratilishini;

tuproqning shoʻrini yoʻqotish maqsadida irrigatsiya va melioratsiya tizimlarining muntazam tozalab turilishini, yerlarni kapital-tekislash ishlari tashkil etilishi hamda qattiq gips qatlami chuqur yumshatilishini, shuningdek, qishloq xoʻjaligi tashkilotini ishlab chiqarish ehtiyojlari uchun suv bilan uzluksiz taʼminlasin.

4. Sirdaryo viloyatida zamonaviy paxtachilik-toʻqimachilik klasterini rivojlantirishni davlat yoʻli bilan qoʻllab-quvvatlash uchun Oʻzbekiston Respublikasida ishlab chiqarilmaydigan, ushbu qarorga muvofiq, investitsiya loyihalarini amalga oshirish doirasida “Bek cluster” MCHJ QK tomonidan oʻzining ishlab chiqarish ehtiyojlari uchun Vazirlar Mahkamasi tomonidan tasdiqlanadigan roʻyxatlar boʻyicha olib kelinadigan uskunalar, maxsus transport vositalari va texnika, hayvonlar va oʻsimliklar, veterinariya preparatlari, jumladan, butlovchi buyumlar, xom ashyo va materiallar, qurilish mollari, issiqxona komplekslari 2022-yilning 1-yanvariga qadar muddatda bojxona toʻlovlari (qoʻshilgan qiymat soligʻi va bojxona yigʻimlaridan tashqari) toʻlashdan ozod qilinsin.

5. “Bek cluster” MCHJ QKga hudud sharoitlarini hisobga olgan xolda, gʻoʻzaning seleksiya navlarini mustaqil ravishda joylashtirish, ekinlarni ilmiy asoslangan tarzda almashlab ekish, suv va resurslarni tejaydigan texnologiyalarni joriy etish huquqi berilsin.

6. Shunday tartib oʻrnatilsinki, unga muvofiq:

qishloq xoʻjaligi texnikasini lizing boʻyicha xarid qilish, mineral oʻgʻitlar, urugʻliklar, yoqilgʻi moylash materiallari, oʻsimliklarni kimyoviy himoya qilish vositalari hamda boshqa moddiy resurslarni yetkazib berishda fermer xoʻjaliklari uchun nazarda tutilgan shartlar va tartiblar “Bek cluster” MCHJ QKga nisbatan joriy etiladi;

“Bek cluster” MCHJ QK qishloq xoʻjaligi tashkilotining qishloq xoʻjaligi texnikasi uchun qisilgan tabiiy gazni tabiiy gaz ishlab chiqarish va taqsimlashning moddiy balanslari doirasida ajratiladigan hajmlar boʻyicha xarid qiladi.

Oʻzbekiston Respublikasi Iqtisodiyot vazirligi har yili moddiy balanslarni shakllantirishda “Bek cluster” MCHJ QK va uning tarkibiga kiruvchi tashkilotlar tomonidan ishlab chiqarilgan moddiy resurslarning hajmlarini, shuningdek paxta tolasi, lint va texnik urugʻlik hajmlarini alohida satrda hisobga olsin.

7. Belgilab qoʻyilsinki, qishloq xoʻjaligi tashkiloti tomonidan yetishtirilayotgan paxta xom ashyosi keyinchalik faqat “Bek cluster” MCHJ QK va uning tarkibiga kiruvchi tashkilotlar tomonidan chuqur qayta ishlash uchun foydalaniladi.

8. Quyidagilar belgilansin:

“Bek cluster” MCHJ QK oʻz tarkibiga kiruvchi tashkilotlarning soʻmdagi mablagʻlarini jamlashi va bu mablagʻlarni moliya-xoʻjalik faoliyatini amalga oshirish va ishlab chiqarishni rivojlantirish uchun ular oʻrtasida taqsimlashi mumkin;

“Bek cluster” MCHJ QK va tashkilotlari hamda tashkilotlarning oʻzlari oʻrtasidagi, oʻzlari ishlab chiqargan mahsulotni sotish boʻyicha aylanmalar bilan bogʻliq boʻlmagan, olinadigan va beriladigan pul mablagʻlari va mol-mulk, shuningdek, sof foydani taqsimlash soliqqa tortish obyekti (qoʻshilgan qiymat soligʻidan tashqari) hisoblanmaydi.

Paxta-toʻqimachilik ishlab chiqarishi tashkilotchilariga 2018-yil 1-oktabrdan keyin fermer xoʻjaliklariga berilgan mol-mulkni tovarlar (ishlar, xizmatlar) boʻyicha qoʻshilgan qiymat soligʻi bilan oʻtkazishni amalga oshirish huquqi berilsin.

9. “Bek cluster” MCHJ QKga va uning tarkibiga kiruvchi tashkilotlarga, istisno tariqasida, oʻzlari yetishtirgan mahsulotni erkin tasarruf qilishga, narx belgilash siyosatini va mahsulot sotish hajmlarini mustaqil ravishda belgilashga ruxsat berilsin.

10. Maʼlumot uchun qabul qilinsinki, paxta mahsulotini yetishtirish va uning chiqitlarini qayta ishlash bilan bogʻliq barcha sarf-xarajatlar “Bek cluster” MCHJ QK va uning tarkibiga kiruvchi tashkilotlarning shaxsiy mablagʻlari, tijorat banklarining kreditlari hisobidan amalga oshiriladi.

Bunda “Bek cluster” MCHJ QK:

unga ajratilgan yer maydonlaridagi fermer xoʻjaliklarining xodimlari bilan oʻzaro hisob-kitoblarni mehnat uchun adolatli haq toʻlash va ijtimoiy madad tamoyili boʻyicha mehnat shartnomalari asosida amalga oshiradi;

muassislar — “TRONTEX LP” (Buyuk Britaniya) va “GRATUM TRADING LP” (Buyuk Britaniya) xorijiy kompaniyalari bilan birgalikda oʻtkaziladigan marketing tahlili asosida sotish bozorlarida shakllantiriladigan narxlar boʻyicha yuqori qoʻshilgan qiymatli tayyor mahsulotni eksport qiladi.

11. “Asaka” ATB va boshqa tijorat banklariga “Bek cluster” MCHJ QK va uning tarkibiga kiruvchi tashkilotlar tomonidan amalga oshirilayotgan investitsiya loyihalarini birgalikda moliyalashtirish uchun belgilangan tartibda imtiyozli kredit liniyalari ajratish tavsiya qilinsin.

Belgilab qoʻyilsinki, “Bek cluster” MCHJ QK va uning tarkibiga kiruvchi tashkilotlar qarz oluvchilar hamda investitsiya loyihalarining amalga oshirilishi, ajratilayotgan kreditlardan maqsadli va samarali foydalanilishi uchun, shuningdek, ularning oʻz vaqtida qaytarilishi uchun masʼul boʻlgan ijro etuvchi organlar hisoblanadi.

12. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari — qishloq va suv xoʻjaligi vaziri Z.T. Mirzayev va Sirdaryo viloyati hokimi Gʻ.Gʻ. Mirzayev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 15-sentabr,

PQ-3279-son

Oʻzbekiston Respublikasi Prezidentining 2017-yil 15-sentabrdagi PQ-3279-son qaroriga 1-ILOVA

“Vek cluster”* MCHJ QK tarkibiga kiruvchi tashkilotlar

ROʻYXATI

1. Paxta va boshqa qishloq xoʻjaligi ekinlarini yetishtiruvchi qishloq xoʻjaligi tashkiloti.

2. Paxtani qayta ishlash tashkiloti.

3. Yogʻ-moy mahsulotini ishlab chiqarish tashkiloti.

4. Toʻqimachilik buyumlari ishlab chiqarish tashkiloti.

5. Sut, goʻsht va tuxum yetishtirish va qayta ishlash tashkiloti (chorvachilik va parrandachilik kompleksi).

6. Sabzavot va koʻkatlar yetishtirish tashkiloti (zamonaviy issiqxona kompleksi).

7. Qishloq xoʻjaligi mahsulotini saqlash va qayta ishlash tashkiloti.

* “Vek cluster” MCHJ QK taʼsischilari qaroriga koʻra uning tarkibiga kiruvchi tashkilotlar roʻyxatiga oʻzgartirishlar kiritilishi mumkin.

Oʻzbekiston Respublikasi Prezidentining 2017-yil 15-sentabrdagi PQ-3279-son qaroriga 2-ILOVA

2017 — 2021-yillarda “Bek cluster” MCHJ QK va uning tarkibiga kiruvchi tashkilotlar tomonidan amalga oshirilayotgan investitsiya loyihalari va amaldagi tashkilotlar

PROGNOZ PARAMETRLARI

* Prognoz parametrlariga investitsiya loyihalarini amalga oshirish yakunlariga koʻra erishiladi.

Izohlar:

1. Investitsiya loyihalarining yakuniy parametrlari TIA yoki biznes-rejalarni ishlab chiqish natijalariga koʻra aniqlanadi.

2. “Bek cluster” MCHJ QK taʼsischilarining qaroriga koʻra investitsiya loyihalari soni koʻpaytirilishi, ayrim ishlab chiqarishlar esa birlashtirilishi mumkin.