Kitob mahsulotlarini nashr etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targʻib qilish boʻyicha kompleks chora-tadbirlar dasturi toʻgʻrisida (PQ-3271-son)

13.09.2017

Oʻzbekiston Respublikasi Prezidentining

Qarori

Bugungi kunda mamlakatimizda 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi asosida barcha soha va tarmoqlarda ulkan oʻzgarishlar amalga oshirilmoqda. Bu borada jamiyat hayotida ezgu qadriyat va anʼanalarni chuqur qaror toptirishga, xususan, xalqimiz, ayniqsa, yosh avlodning maʼnaviy-intellektual salohiyati, ongu tafakkuri va dunyoqarashini yuksaltirishda, ona Vatani va xalqiga muhabbat va sadoqat tuygʻusi bilan yashaydigan barkamol shaxsni tarbiyalashda beqiyos ahamiyatga ega boʻlgan kitobxonlik madaniyatini oshirishga alohida eʼtibor qaratilmoqda.

Ushbu yoʻnalishda tegishli huquqiy-meʼyoriy bazani mustahkamlash, tashkiliy-amaliy ishlarni zamon talablari asosida olib borish, bu masalaga keng jamoatchilikni jalb etish boʻyicha keyingi paytda birmuncha ishlar amalga oshirilayotganini taʼkidlash lozim.

Ayni vaqtda oʻtkazilgan kuzatish va tahlillar bu sohada oʻz yechimini kutayotgan bir qator dolzarb muammolar borligi va ularni keng koʻlamda hal etish zarurligini koʻrsatmoqda. Xususan, xalqimiz, avvalo, yoshlarning maʼnaviy-maʼrifiy, badiiy-estetik talablariga javob beradigan kitoblarni yuksak sifat bilan chop etish, joylarga, taʼlim muassasalariga vaqtida va maqbul narxlarda yetkazish, milliy va jahon adabiyotining eng sara namunalarini tarjima qilish, farzandlarimizda bolalikdan boshlab kitob, jumladan, elektron kitob oʻqish koʻnikmasini shakllantirish, jamiyatimizda mutolaa madaniyatini yuksaltirish bilan bogʻliq muhim masalalarni hal etish dolzarb vazifa boʻlib qolmoqda.

Ayniqsa, noshirlik faoliyatini qoʻllab-quvvatlash va yanada rivojlantirish, yurtimizda sogʻlom raqobatga asoslangan bosma va elektron kitoblar bozorini shakllantirishni bugun hayotning oʻzi taqozo etmoqda.

Maʼnaviy hayotimizni yuksaltirishda ulkan ahamiyatga ega boʻlgan ana shunday muhim vazifalarni kompleks hal qilish, kitob mahsulotlarini nashr etish va tarqatish tizimini takomillashtirish, oʻzbek va dunyo adabiyotining eng yaxshi namunalarini internet tarmoqlariga joylashtirish va ularni targʻib qilish hamda keng kitobxonlar ommasiga yetkazish ishlarini samarali tashkil etish maqsadida:

1. Kitob mahsulotlarini nashr etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targʻib qilish boʻyicha kompleks chora-tadbirlar dasturi ilovaga muvofiq tasdiqlansin.

Dasturda koʻzda tutilgan quyidagi asosiy vazifalarni amalga oshirishga alohida eʼtibor qaratilsin:

kitob mahsulotlarini chop etish va tarqatish, noshirlik va matbaa sohalarini yanada rivojlantirishga oid normativ-huquqiy bazani takomillashtirish, ijtimoiy ahamiyatga ega boʻlgan kitoblarni, ayniqsa, bolalarga moʻljallangan adabiyotlarni chop etishni davlat tomonidan qoʻllab-quvvatlash;

kitob mahsulotlari boʻyicha davlat buyurtmasining asosiy yoʻnalishlarini shakllantirish, adabiy-badiiy, oʻquv-uslubiy, ilmiy-nazariy, ilmiy-ommabop va koʻrgazmali adabiyotlarni chop etish va tarqatish tizimini takomillashtirish, ixtisoslashtirilgan kitob doʻkonlari faoliyatini rivojlantirish;

jahon adabiyotining eng sara namunalarini oʻzbek tiliga tarjima qilish boʻyicha davlat buyurtmalari berish, ularni zarur nusxalarda yuksak sifat bilan nashr etish va moliyalashtirish tizimini yoʻlga qoʻyish, kitob tarqatish tizimini yanada rivojlantirish va kitob mahsulotlarining narxini shakllantirish va sotish boʻyicha aniq mexanizmlarni ishlab chiqish choralarini belgilash;

axborot-kutubxona faoliyatini kuchaytirish, taʼlim muassasalari axborot-resurs markazlarining kutubxona fondlari, kutubxonalar, tashkilot va muassasalarning “Maʼnaviyat xonalari”ni oʻquv-uslubiy, texnik adabiyotlar, adabiy-badiiy, maʼrifiy va ilmiy-ommabop kitoblar bilan boyitish, ularning moddiy-texnika bazasini mustahkamlash;

nashriyotlar va matbaa sohasi mutaxassislarini, badiiy va texnik muharrirlar, grafikachi rassomlar, axborot-kutubxona xodimlarini tayyorlash, malakasini oshirish va ragʻbatlantirish tizimini takomillashtirish;

lotin yozuviga asoslangan yangi oʻzbek alifbosidagi ilmiy-texnik, adabiy-badiiy va ensiklopedik adabiyotlarni yanada koʻpaytirish boʻyicha aniq chora-tadbirlar ishlab chiqish;

Oʻzbekiston Milliy kutubxonasi va axborot-kutubxona markazlaridagi barcha turdagi axborot-kutubxona resurslarining yagona bazasini shakllantirish va undan boshqa axborot-kutubxona muassasalarida turib foydalanishni taʼminlash;

qishloq aholisiga kutubxona xizmati koʻrsatish tizimini tashkil etish choralari toʻgʻrisida tadbirlar rejasi loyihasini tayyorlash va amalga oshirish;

mamlakatimizda internet orqali zarur adabiyotlarni topish va xarid qilish imkonini beradigan eReader elektron oʻquv qurilmalarini ishlab chiqarishni tashkil etish, ularning axborot bazasiga umumtaʼlim maktablari, akademik litsey va kasb-hunar kollejlari, oliy oʻquv yurtlari uchun darsliklar, oʻquv qoʻllanmalari, oʻquv-uslubiy, ilmiy-nazariy manbalarni joylashtirish, bunday mahsulotlarni arzon narxlarda sotib olish mexanizmlarini yoʻlga qoʻyish boʻyicha takliflar tayyorlash;

mazmunan sayoz, milliy maʼnaviyat va qadriyatlarimizga, axloq meʼyorlariga mos kelmaydigan, yoshlar tarbiyasiga salbiy taʼsir koʻrsatishi mumkin boʻlgan adabiyotlarni tayyorlash, bosib chiqarish va tarqatishning oldini olish choralarini koʻrish;

kitob mutolaasi va kitobxonlik madaniyatini oshirishga doir targʻibot ishlarini tizimli va samarali tashkil etish, bu borada kitobxonlar, kutubxonachi va targʻibotchilar oʻrtasida “Eng kitobxon maktab”, “Eng kitobxon mahalla”, “Eng kitobxon oila”, “Eng faol kutubxonachi” kabi koʻrik-tanlovlarning saralash va respublika bosqichlarini yuqori saviyada oʻtkazishni yoʻlga qoʻyish.

2. Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi kitob mahsulotlarini chop etish va tarqatish tizimini takomillashtirish hamda axborot-kutubxona faoliyati sohasidagi maxsus vakolatli davlat organi etib belgilansin.

3. Belgilab qoʻyilsinki:

dasturda koʻrsatilgan chora-tadbirlarni oʻz vaqtida va sifatli amalga oshirish tegishli vazirlik va idoralar, mahalliy davlat hokimiyati organlari hamda ularning mansabdor shaxslarining ustuvor vazifalaridan biri hisoblanadi;

Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari har bir shahar va tumanda kitob savdosiga ixtisoslashtirilgan doʻkonlarni tashkil etish, ularni qoʻllab-quvvatlash maqsadida yuridik shaxs maqomidagi tadbirkorlik subyektlariga foydalanilmayotgan davlat mulki obyektlarining tekin foydalanish uchun berilishini taʼminlaydi;

savdo aylanmasida kitob sotish ulushining hajmi 70 foizdan koʻp boʻlgan yuridik shaxs maqomidagi tadbirkorlik subyektlarining alohida statistik hisobi yuritiladi va ular 2020-yil 1-yanvarga qadar yagona soliq toʻlovini toʻlashdan ozod etiladi;

Oʻzbekiston Milliy teleradiokompaniyasi, Oʻzbekiston Milliy axborot agentligi va boshqa ommaviy axborot vositalariga shu yoʻnalishda muntazam ravishda maxsus koʻrsatuv va eshittirishlar, maqolalar tayyorlash va eʼlon qilish tavsiya etiladi.

5. Oʻzbekiston Matbuot va axborot agentligi Adliya vazirligi va boshqa manfaatdor vazirlik va idoralar bilan birgalikda ikki oy muddatda:

qonun hujjatlariga ushbu qarordan kelib chiqadigan oʻzgartirish va qoʻshimchalar kiritish toʻgʻrisida Vazirlar Mahkamasiga takliflar kiritsin;

idoraviy normativ-huquqiy hujjatlarni ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Bosh vaziri A. Aripov va Oʻzbekiston Respublikasi Prezidentining Davlat maslahatchisi X. Sultonov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 13-sentabr,

PQ-3271-son

Oʻzbekiston Respublikasi Prezidentining 2017-yil 13-sentabrdagi PQ-3271-sonli qaroriga ILOVA

Kitob mahsulotlarini nashr etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targʻib qilish boʻyicha kompleks chora-tadbirlar

DASTURI

T/r Chora-tadbirlar Ijro muddati Ijro uchun masʼullar Amalga oshirish mexanizmi, kutilayotgan natija I. Kitob mahsulotlarini chop etish va tarqatish, noshirlik va matbaa sohalarini yanada rivojlantirishga yoʻnaltirilgan normativ-huquqiy bazani takomillashtirish hamda ijtimoiy ahamiyatga molik kitoblarni, ayniqsa bolalar adabiyotlarini chop etishni davlat tomonidan qoʻllab-quvvatlash 1. Yangi tahrirdagi “Noshirlik faoliyati toʻgʻrisida”gi Oʻzbekiston Respublikasi qonuni loyihasini ishlab chiqish. 2018-yil mart Matbuot va axborot agentligi, Iqtisodiyot vazirligi, Moliya vazirligi, Adliya vazirligi, Oliy va oʻrta maxsus taʼlim vazirligi, Xalq taʼlimi vazirligi Yangi tahrirdagi “Noshirlik faoliyati toʻgʻrisida”gi Oʻzbekiston Respublikasining qonuni loyihasi. Loyihada nashriyotlar faoliyatini qoʻllab-quvvatlash va rivojlantirish borasidagi normativ-huquqiy bazani takomillashtirish; kitob mahsulotlari chop etishni davlat tomonidan qoʻllab-quvvatlashning aniq shakl va mexanizmlarini belgilash; ijtimoiy ahamiyatga molik adabiyotlarga grantlar ajratish, noshirlar va adiblarni moliyaviy ragʻbatlantirish; bolalar adabiyotiga ixtisoslashtirilgan nashriyotlarga moliyaviy imtiyozlarni kafolatlash nazarda tutiladi. 2. Bolalar adabiyotiga ixtisoslashgan nashriyotlarga moliyaviy imtiyozlar berish, moddiy qoʻllab-quvvatlash va rivojlantirish tizimini takomillashtirish boʻyicha aniq takliflar ishlab chiqish. 2018-yil mart Matbuot va axborot agentligi, Iqtisodiyot vazirligi, Moliya vazirligi, Oliy va oʻrta maxsus taʼlim vazirligi, Xalq taʼlimi vazirligi, Oʻrta maxsus, kasb-hunar taʼlimi markazi, Davlat soliq qoʻmitasi, Davlat bojxona qoʻmitasi Oʻzbekiston Respublikasi Prezidenti qarori loyihasi. Bolalar adabiyotiga ixtisoslashtirilgan nashriyotlarni qoʻllab-quvvatlash va rivojlantirish toʻgʻrisidagi chora-tadbirlar dasturi ishlab chiqiladi. Bolalar adabiyotini nashr qilishga ixtisoslashtirilgan nashriyotlarni aniqlash mezonlari belgilanadi va ularni moddiy qoʻllab-quvvatlash yoʻlga qoʻyiladi. II. Kitob mahsulotlari umumiy buyurtmasini shakllantirish, chop etish va tarqatish tizimini takomillashtirish, ixtisoslashtirilgan kitob doʻkonlari faoliyatini rivojlantirish 3. Aholining ilmiy-maʼrifiy, badiiy, ensiklopedik va bolalar adabiyotlariga boʻlgan talabini qondirish maqsadida mamlakatimiz nashriyotlarida mavjud kitoblarning elektron katalogini yaratish va tizimli ravishda yangilab borish. 2017-yil sentabr Matbuot va axborot agentligi, “Sharq” NMAK, “Oʻzbekiston pochtasi” AJ, nashriyotlar Ijrochilarning qoʻshma qarori. Aholining kitob mahsulotlariga boʻlgan ehtiyojini qondirishda qulaylik yaratiladi va chop etiladigan kitoblarni nashriyotlardan hududlarga arzon narxlarda yetkazish, onlayn buyurtma berish va ularni pochta orqali kitobxonlarga yetkazib berish tizimi joriy etiladi. 4. Aholi, ayniqsa yoshlar dunyoqarashini kengaytirish, intellektual saviyasini oʻstirish, maʼnaviy olamini boyitishga oid ilmiy-maʼrifiy, badiiy adabiyotlar (jumladan, elektron shaklda) boʻyicha umumiy buyurtmalar roʻyxatini shakllantiruvchi ekspertlar guruhini tuzish. 2017-yil oktabr Matbuot va axborot agentligi, Oliy va oʻrta maxsus taʼlim vazirligi, Xalq taʼlimi vazirligi, Oʻrta maxsus, kasb-hunar taʼlimi markazi, Yozuvchilar uyushmasi, “Ijtimoiy fikr” jamoatchilik markazi, Intellektual mulk agentligi, Oʻzbekiston yoshlar ittifoqi Ijrochilarning qoʻshma qarori. Ekspertlar guruhi nizomi tasdiqlanadi. Unda ijtimoiy soʻrovlar yordamida yoshlarning dunyoqarashini kengaytirish, intellektual saviyasini oʻstirishga oid adabiyotlar boʻyicha umumiy buyurtmalar roʻyxatini shakllantirish, nashriyotlarning mavzu rejalariga tegishli takliflar tayyorlash, tashkilot va muassasalarning “Maʼnaviyat xonalari”, kutubxona va taʼlim muassasalarini yoshlar maʼnaviyatini yuksaltirishga xizmat qiladigan adabiyotlar bilan boyitish borasida xulosalar tayyorlanadi. 5. Jahon adabiyotining eng sara namunalarini oʻzbek tiliga tarjima qilish boʻyicha davlat buyurtmalari berish, ularni koʻp nusxada yuksak sifat bilan nashr etish va moliyalashtirish tizimini yoʻlga qoʻyish, kitob tarqatish tizimini yanada rivojlantirish va kitob mahsulotlarining narxini shakllan-tirish va sotish boʻyicha aniq mexanizmlarni ishlab chiqish choralarini belgilash. 2018-yil mart Matbuot va axborot agentligi, Oliy va oʻrta maxsus taʼlim vazirligi, Xalq taʼlimi vazirligi, Moliya vazirligi, Matbuot va axborot agentligi, Fanlar akademiyasi, Yozuvchilar uyushmasi, Oʻzbekiston yoshlar ittifoqi, Respublika Maʼnaviyat va maʼrifat markazi, Intellektual mulk agentligi Vazirlar Mahkamasi qarori loyihasi. Loyihada jahon adabiyotining eng sara namunalarini oʻzbek tiliga tarjima qilishga davlat buyurtmalari berish tizimini yoʻlga qoʻyish, mamlakatda kitob tarqatish tizimini yanada rivojlantirish va aholining keng qatlamini qamrab olish, kitob mahsulotlarining narxini shakllantirish va sotish boʻyicha aniq mexanizmlari ishlab chiqiladi. 6. Noshirlik-matbaa, axborot-kutubxona sohalariga oid davlat standartlarini yanada takomillashtirish boʻyicha choralar koʻrish. Har yili reja asosida “Oʻzstandart” agentligi, Matbuot va axborot agentligi Sohada tegishli standartlarni takomillashtirish boʻyicha yillik ish rejalari. Noshirlik-matbaa va axborot-kutubxona sohalariga oid davlat standartlarini xalqaro standart normalari asosida takomillashtirish orqali sifatli kitob mahsulotlarini tayyorlashga hamda ularni xorijiy mamlakatlarga eksport qilishga erishiladi. 7. Mazmunan sayoz, axloq meʼyorlari, milliy maʼnaviyat va qadriyatlarimizga mos kelmaydigan, yoshlar tarbiyasiga salbiy taʼsir koʻrsatishi mumkin boʻlgan adabiyotlarni tayyorlash, bosib chiqarish va tarqatishning oldini olish choralarini koʻrish. Yil davomida Matbuot va axborot agentligi, Axborot texnologiyalari va kommunikatsiyalarini rivojlantirish vazirligi, Davlat soliq qoʻmitasi, Davlat bojxona qoʻmitasi, Ichki ishlar vazirligi, Yozuvchilar uyushmasi, Respublika Maʼnaviyat va maʼrifat markazi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari Ijrochilarning qoʻshma qarori. Nashriyotlar faoliyati boʻyicha monitoring ishlari olib boriladi hamda ularni xatlovdan oʻtkazish, noqonuniy matbaa va noshirlik faoliyati bilan shugʻullanuvchi xoʻjalik subyektlarini aniqlash orqali ularga nisbatan qonun doirasida tegishli choralar koʻriladi. 8. Respublika kitob doʻkonlari faoliyatini ragʻbatlantirish choralarini amalga oshirish. 2017-yil oktabr — dekabrdan boshlab har yili Matbuot va axborot agentligi, Yozuvchilar uyushmasi, “Mahalla” fondi, Oʻzbekiston yoshlar ittifoqi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari Ijrochilarning qoʻshma qarori. “Har bir shahar va qishloqda — zamonaviy kitob doʻkoni” aksiyasi doirasida “Namunali kitob doʻkoni” respublika tanlovini tashkil etish va oʻtkazish. Kitob doʻkonlari faoliyatini qoʻllab-quvvatlash orqali aholiga namunali xizmat koʻrsatish sifati oshiriladi hamda jamiyatda kitobning oʻrni va ahamiyati keng targʻib etiladi. III. Axborot-kutubxona faoliyatini rivojlantirish, axborot-resurs markazlari hamda taʼlim muassasalarini oʻquv adabiyotlari, badiiy, maʼrifiy, dunyoqarashni kengaytiradigan ilmiy-ommabop kitoblar bilan boyitish, ularning moddiy-texnik bazasini mustahkamlash 9. Taʼlim muassasalari, axborot- resurs markazlarining kutubxona fondi, kutubxonalar uchun badiiy, maʼrifiy, ilmiy-ommabop, tarbiyaviy, yoshlarning intellektual salohiyatini oshirishga yoʻnaltirilgan adabiyotlarni xarid qilish boʻyicha zarur boʻlgan moliyaviy manbalarni aniqlash va ular hisobidan ushbu muassasalarni kitoblar bilan taʼminlash choralarini koʻrish. 2017-yil sentabr Oliy va oʻrta maxsus taʼlim vazirligi, Xalq taʼlimi vazirligi, Iqtisodiyot vazirligi, Moliya vazirligi, Madaniyat vazirligi, Oʻzbekiston yoshlar ittifoqi, Respublika Maʼnaviyat va maʼrifat markazi Taʼlim muassasalari, axborot-resurs markazlarining kutubxona fondi, kutubxonalarni badiiy, maʼrifiy, ilmiy-ommabop, tarbiyaviy, yoshlarning intellektual salohiyatini oshirishga xizmat qiladigan adabiyotlar bilan taʼminlash tartibi va meʼyorlari toʻgʻrisida nizom loyihasini hamda adabiyotlarni bosqichma-bosqich yetkazib berish jadvali ishlab chiqiladi. Taʼlim va madaniyat muassasalari uchun adabiyotlar xarid qilish tizimini takomillashtirishga erishiladi. 10. Oʻzbek mumtoz va zamonaviy adabiyoti hamda jahon adabiyotining buyuk badiiy namunalarining audio variantlarini yaratish, sotuvga chiqarish hamda Internet tarmogʻiga joylashtirish, eng sara asarlarning Internet tarmogʻidagi yagona elektron bazasini yaratish hamda ularni ijtimoiy tarmoqlarga joylashtirish masalalarini oʻrganish va aniq amaliy takliflar tayyorlash. 2017-yil noyabr Axborot texnologiyalari va kommunikatsiyalarini rivojlantirish vazirligi, Moliya vazirligi, Matbuot va axborot agentligi, Intellektual mulk agentligi, Yozuvchilar uyushmasi, nashriyotlar Ijrochilarning qoʻshma qarori. Oʻzbek mumtoz va zamonaviy adabiyoti hamda jahon adabiyotining eng sara namunalarini kitob tarzida chop etish va ularning elektron variantlarini keng kitobxonlarga taqdim etish, global Internet tarmogʻi, jumladan, ijtimoiy tarmoqlarda tarqatish orqali yosh avlodni adabiyotga mehr-muhabbat, milliy gʻoya va vatanparvarlik ruhida tarbiyalashda kitobning ahamiyatini oshirishga erishiladi. 11. Lotin yozuviga asoslangan yangi oʻzbek alifbosidagi ilmiy-texnik, badiiy va ensiklopedik adabiyotlarni yanada koʻpaytirish choralarini koʻrish boʻyicha aniq takliflar tayyorlash. 2018-yil fevral Oliy va oʻrta maxsus taʼlim vazirligi, Xalq taʼlimi vazirligi, Matbuot va axborot agentligi, Iqtisodiyot vazirligi, Moliya vazirligi, Fanlar akademiyasi Vazirlar Mahkamasi yigʻilishi bayoni. Lotin alifbosida oliy va oʻrta maxsus taʼlim muassasalari uchun ilmiy-texnik adabiyotlar, shuningdek, 12 jilddan iborat “Oʻzbekiston milliy ensiklopediyasi”ning toʻldirilgan nashrini, har yili qoʻshimcha ravishda “Ensiklopediya yilnoma”sini chop etish yoʻlga qoʻyiladi. 12. Oʻzbekistonda elektron oʻquv qurilmalari (eReader)ni ishlab chiqarishni tashkil etish, ularga umumtaʼlim maktablari darsliklari va kasb-hunar kollejlari, akademik litseylar uchun oʻquv adabiyotlarini joylashtirish, ularni imtiyozli narxlarda sotib olish mexanizmini tashkil qilish boʻyicha takliflar tayyorlash. 2018-yil may Axborot texnologiyalari va kommunikatsiyalarini rivojlantirish vazirligi, Xalq taʼlimi vazirligi, Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi, Iqtisodiyot vazirligi, Matbuot va axborot agentligi, “Oʻzstandart” agentligi Vazirlar Mahkamasi yigʻilishi bayoni. Elektron oʻquv qurilmalari (eReader)ni ishlab chiqarishni tashkil etish va amaliyotga joriy etish masalalari aks etadi. Elektron oʻquv qurilmalarini amaliyotga joriy etish orqali umumtaʼlim maktablarida darsliklarning yetishmasligi muammosi hal etiladi hamda qogʻozni tejash va uni import qilish hajmini kamaytirishga erishiladi. 13. Qoʻlyozma va kitoblarni taqriz qilish, nashriyotlarning mavzu rejalarini ishlab chiqishda Yozuvchilar uyushmasi qoshidagi badiiy kengashlar bilan nashriyotlarning yaqin hamkorligini tashkil etish. 2017-yil sentabr Yozuvchilar uyushmasi, Matbuot va axborot agentligi, Respublika Maʼnaviyat va maʼrifat markazi Ijrochilarning qoʻshma qarori. Sermazmun va badiiy jihatdan yuqori saviyadagi adabiyotlar nashr etilishiga koʻmaklashish, barcha janrlardagi adabiy-badiiy hamda publitsistik asarlarning badiiy yetukligini taʼminlash, umuminsoniy qadriyatlarga, ijtimoiy mezonlarga toʻgʻri kelmaydigan kitoblar nashr etilishining oldini olishga erishiladi. 14. Mamlakatimizdagi axborot-kutubxona muassasalariga yoshlarni faol jalb etish borasidagi tadbirlar rejasini ishlab chiqish. Axborot-kutubxona muassasalarida “Kitobxonlar klubi”ni tashkil etish. 2017-yil sentabr Matbuot va axborot agentligi, Oliy va oʻrta maxsus taʼlim vazirligi, Xalq taʼlimi vazirligi, Madaniyat vazirligi, Oʻrta maxsus, kasb-hunar taʼlimi markazi, Yozuvchilar uyushmasi, Respublika Maʼnaviyat va maʼrifat markazi Ijrochilarning qoʻshma qarori. Muntazam ravishda faoliyat koʻrsatadigan kitob koʻrgazmalari, yoshlar bilan suhbatlar, yangi nashrlar taqdimotlarini tashkil etish orqali aholini jahon adabiyotining tarjima qilingan eng yaxshi namunalari bilan tanishtirish, axborot madaniyati va zamonaviy mutolaa madaniyatini va fikrlash saviyasini yanada oshirish maqsadida ijtimoiy faol yoshlarni koʻngillilar harakatiga jalb etish, kutubxonachi va targʻibotchilar orasida turli tanlovlar oʻtkazish masalalari qamrab olinadi. 15. Axborot-kutubxona muassasalarini Respublika, mahalliy vaqtli nashrlari, badiiy adabiyotlar bilan doimiy toʻldirib borish borasida respublika nashriyotlari hamkorligini takomillashtirish. 2017-yil sentabr Matbuot va axborot agentligi, Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi Ijrochilarning qoʻshma qarori. Axborot-kutubxona muassasalari fondlarini taʼminlashning markazlashtirilgan tizimini tashkil etish borasida kutubxona kollektori bilan ishlash boʻyicha markazlashtirilgan axborot tizimi takomillashadi va nashriyotlar bilan hamkorlik yoʻlga qoʻyiladi. 16. Oʻzbekiston Milliy kutubxonasi va axborot-kutubxona markazlaridagi barcha turdagi axborot-kutubxona resurslarining yagona bazasini shakllantirish va undan boshqa axborot-kutubxona muassasalarida turib foydalanishni taʼminlash. 2018-yil noyabr Matbuot va axborot agentligi, Axborot-kutubxona markazlari, Axborot texnologiyalari va kommunikatsiyalarini rivojlantirish vazirligi, Madaniyat vazirligi Ijrochilarning qoʻshma qarori. Loyihani amalga oshir�sh orqali aholi va kitobxonlar uchun barcha turdagi axborot-kutubxona resurslari, ularning joylashgan oʻrni toʻgʻrisidagi maʼlumotlarni taqdim etish, shu bilan birga, elektron axborot-kutubxona resurslaridan istalgan joyda turib foydalanish uchun sharoitlar yaratiladi. 17. Qishloq aholisiga kutubxona xizmati koʻrsatish tizimini tashkil etish choralari toʻgʻrisida tadbirlar rejasi loyihasini tayyorlash. 2017-yil noyabr Matbuot va axborot agentligi, Axborot-kutubxona markazlari, Moliya vazirligi, Madaniyat vazirligi, Qoraqalpogʻiston Respublikasi Vazirlar Kengashi va viloyatlar hokimliklari Vazirlar Mahkamasi yigʻilishi bayoni. Tuman markazlaridan uzoqda joylashgan aholining kitobga boʻlgan talabini qondirish maqsadida badiiy, ilmiy, maʼrifiy kitoblar bilan taʼminlangan va zamonaviy elektron uskunalar bilan jihozlangan “Bibliobus”lar tashkil etgan holda xizmat koʻrsatish yoʻlga qoʻyiladi. 18. Toshkent shahridagi “Bilim”, Toshkent viloyatidagi “Turon” axborot-kutubxona markazlari uchun yangi bino ajratish hamda Samarqand, Andijon, Xorazm axborot-kutubxona muassasalari binolarini kapital taʼmirlash va jihozlash boʻyicha takliflar tayyorlash. 2018-yil fevral Iqtisodiyot vazirligi, Moliya vazirligi, Madaniyat vazirligi, Toshkent shahri, Toshkent, Samarqand, Andijon, Xorazm viloyatlari hokimliklari Vazirlar Mahkamasining qarori loyihasi. Aholiga kutubxona xizmatini koʻrsatish sifatini oshirishga erishiladi hamda fondlardagi resurslarni tegishli tarzda saqlash uchun sharoitlar yaratiladi. 19. Jamoat joylarida QR-kodlar yordamida Oʻzbekiston Milliy kutubxonasi elektron kitoblari toʻgʻrisidagi maʼlumotlarni maxsus tablolarda joylashtirish va ularni mobil qurilmalarga yuklab olish va oʻqish imkoniyatini yaratish. 2018-yil noyabr Matbuot va axborot agentligi, “Oʻzbekiston temir yoʻllari” AJ, “Oʻzbekiston havo yoʻllari” AK, Oʻzbekiston yoshlar ittifoqi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari Ijrochilarning qoʻshma qarori. Jamoat joylarida, vokzallar va aeroportlarning kutish zallarida, avtobus bekatlarida QR-kodlar (shtrix kodlar) yopishtirilgan kutubxona tablolarini joylashtirish orqali yoshlarning kitoblarni zamonaviy mobil qurilmalarida oʻqishi va elektron nusxalarini yuklab olishi uchun imkon yaratiladi. 20. Elektron turdagi axborot-kutubxona resurslarini koʻpaytirish va ulardan Internet tarmogʻi orqali foydalanish dasturini ishlab chiqish. 2018-yil iyul Matbuot va axborot agentligi,Axborot texnologiyalari va kommunikatsiyalarini rivojlantirish vazirligi, Oliy va oʻrta maxsus taʼlim vazirligi, Xalq taʼlimi vazirligi, Madaniyat vazirligi Ijrochilarning qoʻshma qarori. “Milliy umumtaʼlim elektron kutubxona” loyihasi boʻyicha yaratiladigan elektron nusxalar hamda multimedia mahsulotlaridan masofadan turib foydalanish uchun sharoitlar yaratiladi. 21. “Infolib Uzbekistan” milliy axborot-kutubxona haftaligini tashkil etish va oʻtkazish. 2017-yil noyabr-dekabr Matbuot va axborot agentligi, Oliy va oʻrta maxsus taʼlim vazirligi, Xalq taʼlimi vazirligi Ijrochilarning qoʻshma qarori. Haftalik doirasida turli mavzularda onlayn konferensiyalar tashkil etish orqali aholi, ayniqsa, yosh avlodning kutubxona xizmatlaridan foydalanish koʻnikmalari shakllantiriladi. 22. Taʼlim muassasalarida sinfdan tashqari oʻqish uchun tavsiya etilgan oʻzbek va chet el adiblarining mumtoz va zamonaviy asarlarini tanlab, xrestomatiya adabiyotlari roʻyxatlarini qayta koʻrib chiqish. 2017-yil avgust-sentabr Xalq taʼlimi vazirligi,Oʻrta maxsus, kasb-hunar taʼlimi markazi, “Oila” ilmiy-amaliy markazi, Respublika Maʼnaviyat va maʼrifat markazi, Oʻzbekiston yoshlar ittifoqi Ijrochilar vakillaridan iborat komissiyaning ish rejasi. Taʼlim muassasalari oʻquvchilariga tavsiya etilgan adabiyotlar qayta xatlovdan oʻtkaziladi. Oʻquvchilarning yosh xususiyatidan kelib chiqib, sinfdan tashqari oʻqishi uchun adabiyotlarning yangilangan roʻyxati boʻyicha tavsiyalar ishlab chiqiladi. IV. Noshirlar, matbaachilar, axborot-kutubxona xodimlarini tayyorlash, malakasini oshirish va ragʻbatlantirish tizimini takomillashtirish 23. Axborot-kutubxona kadrlari faoliyatini qoʻllab-quvvatlash tadbirlarini ishlab chiqish. 2017-yil sentabr Madaniyat vazirligi, Matbuot va axborot agentligi, Mehnat vazirligi, Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi Ijrochilarning tadbirlar rejasi. “Axborot-kutubxona muassasasining eng yaxshi mutaxassisi” nominatsiyasi uchun milliy kasbiy tanlovni tashkil etish, axborot-kutubxona muassasalari mutaxassislariga metodik yordam koʻrsatish maqsadida sayyor oʻquv seminarlarini tashkil qilish, yetakchi milliy, jumladan, chet el kutubxonalarida malaka oshirishni tashkil etish tadbirlari nazarda tutiladi. 24. Noshirlar va matbaa xodimlari malakasini oshirish va ragʻbatlantirish chora-tadbirlarini ishlab chiqish. 2017-yil sentabr Matbuot va axborot agentligi, Oliy va oʻrta maxsus taʼlim vazirligi, Yozuvchilar uyushmasi, Respublika Maʼnaviyat va maʼrifat markazi Ijrochilarning qoʻshma qarori va dasturi. Kasbiy malaka va koʻnikmalarni oshirishning qisqa oʻquv kurslarini tashkil etish, milliy va xorijiy tajribadan kelib chiqqan holda davra suhbatlari, seminar va konferensiyalar oʻtkazish, oʻquv qoʻllanmalari yaratish orqali noshir va matbaa xodimlarining malakasi oshiriladi. Chop etilayotgan kitob mahsulotlari sifati yaxshilanadi. 25. Noshirlar va matbaachilarni ragʻbatlantirish choralarini belgilash. Har yili Matbuot va axborot agentligi, Respublika Maʼnaviyat va maʼrifat markazi, Oʻzbekiston yoshlar ittifoqi “Yoshlarning eng sevimli kitobi”, “Yilning eng yaxshi kitobi” kabi respublika koʻrik-tanlovlarini tashkil etish va oʻtkazish yuzasidan ijrochilarning qoʻshma qarori. V. Kitob mutolaasi va kitobxonlik madaniyatini oshirish borasida targʻibot-tashviqot ishlarini samarali va tizimli tashkil etish 26. Aholi, ayniqsa, oʻsib kelayotgan yosh avlod oʻrtasida kitobxonlik madaniyatini rivojlantirish va adabiy merosni keng targʻib qilish, muallif va noshirlarni maʼnaviy ragʻbatlantirishga qaratilgan choralarni belgilash. Har yili may, sentabr Matbuot va axborot agentligi, Oliy va oʻrta maxsus taʼlim vazirligi, Xalq taʼlimi vazirligi, Madaniyat vazirligi, Xotin-qizlar qoʻmitasi, Respublika Maʼnaviyat va maʼrifat markazi, Oʻzbekiston yoshlar ittifoqi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari Vazirlar Mahkamasi yigʻilishi bayoni. “Yoshlarning maʼnaviy olamini shakllantirishda kutubxonalar oʻrni”, “Oʻzbek milliy-madaniy merosini targʻib etishda kutubxonalarning oʻrni” mavzularida ilmiy-amaliy anjumanlar, “Kitob bayrami”, “Bolalar kitobi” respublika festivali, “Yoshlarning eng sevimli kitobi”, “Yilning eng yaxshi kitobi” respublika koʻrik-tanlovlarini oʻtkazish hamda Zulfiya nomidagi davlat mukofotining adabiyot yoʻnalishi boʻyicha sovrindorlarining ijod namunalarini targʻib qilish. 27. Mamlakatimizdagi yetakchi adabiy-badiiy, ijtimoiy-maʼrifiy davriy bosma nashrlarda milliy mumtoz va zamonaviy adabiyotimiz namunalarini keng targʻib qilishni tizimli amalga oshirish. Doimiy Matbuot va axborot agentligi, Yozuvchilar uyushmasi, Oʻzbekiston yoshlar ittifoqi, “Oʻzbekiston adabiyoti va sanʼati”, “Kitob dunyosi”, “Sharq ziyosi”, “Oila davrasida” gazetalari, “Sharq yulduzi”, “Tafakkur”, “Maʼnaviy hayot”, “Yoshlik” jurnallari Markaziy nashriyotlarda chop etilgan yangi nashrlar bilan tanishtirish, ular haqida yozuvchilar, adabiy tanqidchilar va kitobxonlarning fikr-mulohazalarini yoritib borish orqali aholida kitob mutolaasi va kitobxonlik madaniyatini rivojlantirishga hissa qoʻshiladi. “Maʼnaviyat va milliy qadriyatlar targʻibotida adib va noshir masʼuliyati hamda kitobning oʻrni” mavzusida turkum maqolalar eʼlon qilib boriladi. 28. “Madaniyat va maʼrifat” telekanalida kitobxonlik, kitob oʻqish va kitob mutolaasi madaniyatini oshirish hamda yangi nashrdan chiqqan badiiy adabiyotlar muhokamasiga yoʻnaltirilgan tok-shou tashkil etish. Muntazam Milliy teleradiokompaniya, Yozuvchilar uyushmasi, Matbuot va axborot agentligi, Oʻzbekiston yoshlar ittifoqi, Respublika Maʼnaviyat va maʼrifat markazi, “Sharq” NMAK Ijrochilarning qoʻshma media-rejasi. Tok-shoularda aholining kitobxonlik, kitob oʻqish madaniyatini oshirish, shuningdek badiiy, maʼrifiy, ilmiy-ommabop, tarbiyaviy hamda tarixiy kitoblar va maʼnaviy-badiiy jihatdan yuksak saviyadagi adabiyotlarning aholi oʻrtasida keng targʻiboti yoʻlga qoʻyiladi. 29. Elektron ommaviy axborot vositalarida kitob mutolaasi va kitobxonlik madaniyatini rivojlantirish hamda bu kitoblarning targʻibot-tashviqotini olib borishni izchil yoʻlga qoʻyish. Doimiy Elektron ommaviy vositalari milliy assotsiatsiyasi, Milliy teleradiokompaniya, Yozuvchilar uyushmasi, Matbuot va axborot agentligi, Oʻzbekiston yoshlar ittifoqi, “Sharq” NMAK Ijrochilarning qoʻshma media-rejasi. Turli mavzularga oid sovrinli intellektual televiktorinalar orqali yoshlarning intellektual salohiyatini yuksaltirishga qaratilgan adabiyotlar targʻiboti tizimli yoʻlga qoʻyiladi va qadriyatlarimizni asrab-avaylash va ulugʻlashga berilayotgan eʼtibor jamoatchilikka yetkaziladi. 30. Taʼlim, axborot kutubxona muassasalari, mahallalarda kitob mualliflari bilan ijodiy uchrashuvlarni tizimli ravishda tashkil etish. Doimiy Oliy va oʻrta maxsus taʼlim vazirligi, Xalq taʼlimi vazirligi, Oʻrta maxsus, kasb-hunar taʼlimi markazi, Yozuvchilar uyushmasi, Matbuot va axborot agentligi, “Mahalla” fondi, Respublika Maʼnaviyat targʻibot markazi, Oʻzbekiston yoshlar ittifoqi Ijrochilarning qoʻshma qarori bilan tasdiqlanadigan amaliy reja. Respublika taʼlim muassasalari va axborot-resurs markazlarida “Yoshlar dunyosida kitobning oʻrni” tadbirlar rejasiga muvofiq xalqimizning maʼnaviy mulkiga aylangan kitoblar targʻiboti, yoshlarning bir-biriga kitob sovgʻa qilishlarini keng ommalashtirish, maʼnaviyatga qarshi qaratilgan xurujlarning real xavfi haqida atroflicha muhokama olib boriladi. 31. Maktabgacha va umumiy oʻrta taʼlim, oʻrta maxsus kasb-hunar taʼlim muassasalari oʻquvchilari, oliy oʻquv yurtlari talabalarining mutolaa madaniyati va kitobxonlik koʻnikmalarini shakllantirishga qaratilgan chora-tadbirlarni belgilash. Doimiy Xalq taʼlimi vazirligi, “Oila” ilmiy-amaliy markazi, Matbuot va axborot agentligi, Respublika Maʼnaviyat va maʼrifat markazi, Oʻzbekiston yoshlar ittifoqi Ijrochilarning qoʻshma qarori va amaliy rejasi. “Kitobim — oftobim” tadbirlar rejasiga muvofiq bolalarning kitob mutolaasi koʻnikmalarini shakllantirish, ota-onalarga farzandlarining kitob oʻqishga mehr qoʻyishga doir tavsiyalar berib boriladi. 32. Maktabgacha va umumiy oʻrta taʼlim, oʻrta maxsus kasb-hunar taʼlim muassasalari oʻquvchilari, oliy oʻquv yurtlari talabalarining mutolaa madaniyati va kitobxonlik koʻnikmalarini shakllantirish boʻyicha metodik tavsiyalar ishlab chiqish. 2017-yil sentabr Xalq taʼlimi vazirligi, Oliy va oʻrta maxsus taʼlim vazirligi, Respublika taʼlim markazi, Respublika bolalar kutubxonasi Ijrochilarning chora-tadbirlar rejasi. Tarbiyachi va oʻqituvchilar uchun metodik tavsiyalar ishlab chiqiladi va seminar-treninglar oʻtkazib boriladi. 33. Mahalla fuqarolar yigʻinlarida kutubxonalar (kitoblar burchagi) tashkil etish chora-tadbirlarini amalga oshirish yuzasidan takliflar kiritish. 2017-yil oktabr “Mahalla” fondi, Matbuot va axborot agentligi, Respublika Maʼnaviyat va maʼrifat markazi Vazirlar Mahkamasi yigʻilishi bayoni. Mahalla fuqarolar yigʻinlarida kutubxonalar (kitoblar burchagi)ni tashkil etish va ular faoliyatini yuritish tartibi boʻyicha tavsiyalar ishlab chiqiladi. 34. Taʼlim muassasalarida oʻquv jarayoniga mutolaa qilingan asarlar asosida insho yozish tizimini joriy etish, adabiyot toʻgaraklarini tashkil etish va faoliyatini moddiy qoʻllab-quvvatlash tizimini qayta koʻrib chiqish. 2017-yil sentabr — 2018-yil may Xalq taʼlimi vazirligi, Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi, Oʻzbekiston yoshlar ittifoqi, Respublika Maʼnaviyat va maʼrifat markazi Vazirlar Mahkamasi yigʻilishi bayoni. Taʼlim muassasalarida har oʻquv yilida “Men sevgan asar”, “Men sevgan adabiy qahramon”, “Men nechun sevaman Oʻzbekistonni” kabi mavzularda insholar tanlovi tashkil etiladi va gʻoliblar moddiy va maʼnaviy ragʻbatlantiriladi. 35. Hududlarda yozuvchilar, shoirlar va olimlar ishtirokida kitob bayrami va yarmarkalarini tashkil etish, aholi oʻrtasida milliy va jahon mumtoz adabiyotining yuksak namunalarini targʻib qilish. Doimiy Yozuvchilar uyushmasi, Xalq taʼlimi vazirligi, Madaniyat vazirligi, Oliy va oʻrta maxsus taʼlim vazirligi, Mudofaa vazirligi, Respublika Maʼnaviyat va maʼrifat markazi, Oʻzbekiston yoshlar ittifoqi, “Oila” ilmiy-amaliy markazi, “Mahalla” fondi, Matbuot va axborot agentligi, Qoraqalpogʻiston Respublikasi Joʻqorgʻi Kengesi, viloyatlar va Toshkent shahri hokimliklari Vazirlar Mahkamasi yigʻilishi bayoni. Hududlarda kitob bayrami va yarmarkalarini tashkil etish, aholi oʻrtasida milliy va jahon mumtoz adabiyotining yuksak namunalarini targʻib qilish, jumladan nashriyotlar, kitobxonlar hamda kutubxonachi va targʻibotchilar orasida “Yilning eng yaxshi kitobi”, “Eng kitobxon maktab”, “Eng kitobxon mahalla” “Eng kitobxon oila”, “Yilning eng yaxshi bolalar kitobi”, “Yilning eng yaxshi audio kitobi”, “Yilning eng yaxshi elektron kitobi” kabi tanlovlar oʻtkazish haqidagi nizom tasdiqlanadi. Noshirlar va muallif adiblarni erishgan yutuqlaridan kelib chiqib, doimiy moliyaviy ragʻbatlantirish tizimi shakllanadi.