Oʻzbekiston Respublikasi Prezidentining ayrim hujjatlarini oʻz kuchini yoʻqotgan deb hisoblash toʻgʻrisida (PF-5206-son)

17.10.2017

Oʻzbekiston Respublikasi Prezidentining

Farmoni

Paxta tozalash va yogʻ-moy sanoati korxonalarini boshqarish tizimini yanada optimallashtirish va takomillashtirish maqsadida:

1. Quyidagilar:

Oʻzbekiston Respublikasi Prezidentining “Oʻzpaxtasanoateksport” xolding kompaniyasini tashkil etish toʻgʻrisida” 2015-yil 27-oktabrdagi PF-4761-son Farmoni;

Oʻzbekiston Respublikasi Prezidentining “Oʻzpaxtasanoateksport” xolding kompaniyasi faoliyatini tashkil etish chora-tadbirlari toʻgʻrisida” 2015-yil 28-oktabrdagi PQ-2422-son hamda “Oʻzpaxtasanoateksport” xolding kompaniyasi va uning tarkibiga kiruvchi aksiyadorlik birlashmalari faoliyatini taʼminlash boʻyicha tashkiliy chora-tadbirlar toʻgʻrisida” 2015-yil 3-noyabrdagi PQ-2427-son qarorlari oʻz kuchini yoʻqotgan deb hisoblansin.

2. “Oʻzpaxtasanoateksport” xolding kompaniyasini tugatish bilan bogʻliq kompleks tashkiliy chora-tadbirlarni ishlab chiqish hamda amalga oshirish, shuningdek paxta tozalash va yogʻ-moy sanoati korxonalarini boshqarishni tashkil etish boʻyicha takliflar tayyorlash maqsadida ilovaga muvofiq tarkibda Komissiya tuzilsin.

Komissiya (Z.T. Mirzayev) 15 kun muddatda tegishli vazirliklar va idoralar bilan birgalikda zarur kompleks chora-tadbirlar va takliflar ishlab chiqsin hamda taqdim etsin.

3. Ushbu Farmonning bajarilishini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 17-oktabr,

PF-5206-son

Oʻzbekiston Respublikasi Prezidentining 2017-yil 17-oktabrdagi PF-5206-son Farmoniga ILOVA

“Oʻzpaxtasanoateksport” xolding kompaniyasini tugatish bilan bogʻliq kompleks chora-tadbirlarni ishlab chiqish va amalga oshirish boʻyicha komissiya

TARKIBI

1. Mirzayev Z.T. — Bosh vazir oʻrinbosari — Qishloq va suv xoʻjaligi vaziri, Komissiya raisi 2. Kamalov A.S. — “Oʻzpaxtasanoateksport” xolding kompaniyasi raisi, Komissiya raisining oʻrinbosari 3. Rasulov M.R. — “Oʻzpaxtasanoat” AJ bosh direktori vazifasini bajaruvchi 4. Kadirov J.D. — “Oʻzpaxtaeksport” AJ bosh direktori 5. Salixov M.M. — “Oʻzpaxtayogʻ” AJ bosh direktori 6. Saidova G.K. — Iqtisodiyot vaziri 7. Gulyamov R.A. — Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisi 8. Gʻaniyev E.M. — Tashqi savdo vaziri 9. Xodjayev B.A. — Moliya vaziri 10. Davletov R.K. — Adliya vaziri 11. Xodjayev S.S. — “Agrobank” ATB boshqaruvi raisi 12. Mirzayev Sh. — Vazirlar Mahkamasi huzuridagi Qishloq xoʻjaligi mahsulotlarining davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasining ijro etuvchi direktori 13. Yusupov B.T. — Oʻzbekiston fermer, dehqon xoʻjaliklari va tomorqa yer egalari kengashi raisi