Avtomototransport vositalarini davlat roʻyxatidan oʻtkazish va ularga roʻyxatdan oʻtkazish davlat raqami belgilarini berish tartibini takomillashtirish toʻgʻrisida (683-son)

31.08.2017

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Yoʻl harakati xavfsizligini taʼminlash tizimini yanada takomillashtirish chora-tadbirlari toʻgʻrisida” 2017-yil 11-iyuldagi PQ-3127-son qarorini bajarish yuzasidan, Oʻzbekiston Respublikasida avtomototransport vositalarini davlat roʻyxatidan oʻtkazish tartibini takomillashtirish maqsadida Vazirlar Mahkamasi qaror qiladi:

2. Quyidagilar:

Avtomototransport vositalarini davlat roʻyxatidan oʻtkazish tartibi toʻgʻrisidagi nizom 1-ilovaga muvofiq;

Jismoniy va yuridik shaxslarga avtomototransport vositalari uchun istalgan harf va raqamlar kombinatsiyasiga ega boʻlgan roʻyxatdan oʻtkazish davlat raqami belgilarini yagona oshirilgan toʻlov evaziga berish tartibi toʻgʻrisidagi nizom 3-ilovaga muvofiq tasdiqlansin.

3. Quyidagi tartib oʻrnatilsin, unga muvofiq:

Fuqarolarning yashash joyiga borib, avtomototransport vositalarini davlat roʻyxatidan oʻtkazish va roʻyxatdan oʻtkazish davlat raqami belgilarini berish boʻyicha davlat xizmatlari qoʻshimcha toʻlov asosida koʻrsatiladi.

Bunda ushbu xizmatlar Vazirlar Mahkamasining 2023-yil 31-iyuldagi 321-son qarori bilan tasdiqlangan Fuqarolarning yashash joyiga borib, avtomototransport vositalarini davlat roʻyxatidan oʻtkazish va roʻyxatdan oʻtkazish davlat raqami belgilarini berish boʻyicha davlat xizmatlarini koʻrsatishning maʼmuriy reglamentiga asosan koʻrsatiladi.

4. Oʻzbekiston Respublikasi Ichki ishlar vazirligi:

Oʻzbekiston Respublikasi Iqtisodiyot va moliya vazirligi bilan birgalikda bir oy muddatda Oʻzbekiston Respublikasi Ichki ishlar vazirligining moddiy-texnik bazasini rivojlantirish, xodimlarini moddiy ragʻbatlantirish va boshqa xarajatlar Maxsus jamgʻarmasi toʻgʻrisidagi nizomni qayta koʻrib chiqsin va yangi tahrirda tasdiqlasin;

Oʻzbekiston Respublikasi Raqamli texnologiyalar vazirligi bilan birgalikda, “Elektron hukumat” tizimining maʼlumotlar tizimi hamda markaziy maʼlumotlar bazasi bilan, maʼlumotlardan foydalanish imkoniyati toifalarini saqlagan holda, avtomototransport vositalarining roʻyxatdan oʻtganlik guvohnomalarini hisobga olish reyestrini yuritish boʻyicha dasturiy taʼminotni bosqichma-bosqich integratsiyalashtirishning yanada oshirilishini taʼminlasin;

YHXX va hududiy boshqarmalarni ikki oy muddatda, avtotransport vositalari uchun oshirilgan toʻlov stavkalari boʻyicha auksionga qoʻyilgan roʻyxatdan oʻtkazish davlat raqami belgilari toʻgʻrisidagi maʼlumotlarni yoritish uchun katta formatdagi interaktiv ekranlar bilan jihozlasin;

ushbu qarorni bajarish bilan bogʻliq boʻlgan xarajatlarni Oʻzbekiston Respublikasi Ichki ishlar vazirligining moddiy-texnik bazasini rivojlantirish, xodimlarini moddiy ragʻbatlantirish va boshqa xarajatlar Maxsus jamgʻarmasi hisobidan amalga oshirsin;

Oʻzbekiston milliy teleradiokompaniyasi bilan birgalikda, mazkur qarorning talablarini avtomototransport vositalari egalari va aholiga, ular oʻrtasida tushuntirish ishlari olib borgan holda, shu jumladan teleradiokanallarda videorolik hamda harakatlanuvchi satrlarni tashkil etish yoʻli bilan yetkazsin.

5. Oʻzbekiston Respublikasi Ichki ishlar vazirligi Iqtisodiyot va moliya vazirligi bilan birgalikda, ushbu qarorga muvofiq avtotransport vositalari uchun roʻyxatdan oʻtkazish davlat raqami belgilarini berish monitoringining muntazam olib borilishini taʼminlasin, zarurat boʻlganda, tegishli oʻzgartirishlar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

8. “Oʻzbektelekom” AK oʻz mablagʻlari hisobidan, hududiy boshqarmalarning roʻyxatdan oʻtkazish va imtihon olish boʻlinmalari va birjaning hududiy filiallari oʻrtasida optik tolali tarmoq liniyalar aloqasi oʻtkazishni taʼminlasin.

9. Oʻzbekiston Respublikasi Ichki ishlar vazirligi manfaatdor vazirliklar va idoralar bilan birgalikda uch oy muddatda avtotransport vositasi konstruksiyasining va (yoki) uning qismining yoʻl harakati xavfsizligi va avtotransport vositasini qayta jihozlash talablariga muvofiqligi toʻgʻrisida guvohnomalar berish tartibini ishlab chiqsin va tasdiqlash uchun kiritsin.

10. Oʻzbekiston Respublikasi Vazirlar Mahkamasining 4-ilovaga muvofiq ayrim qarorlari oʻz kuchini yoʻqotgan deb hisoblansin.

11. Oʻzbekiston Respublikasi Ichki ishlar vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov, Oʻzbekiston Respublikasi moliya vaziri B.A. Xoʻjayev va Oʻzbekiston Respublikasi ichki ishlar vaziri A.A. Azizov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 31-avgust,

683-son

Vazirlar Mahkamasining 2017-yil 31-avgustdagi 683-son qaroriga 1-ILOVA

Avtomototransport vositalarini davlat roʻyxatidan oʻtkazish tartibi toʻgʻrisida

NIZOM

1-bob. Umumiy qoidalar

1. Ushbu Nizom transport vositalarining Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining (keyingi oʻrinlarda — YHXX) Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari, viloyatlar ichki ishlar boshqarmalari jamoat xavfsizligi xizmati yoʻl harakati xavfsizligi boshqarmalarida (keyingi oʻrinlarda — hududiy boshqarmalar) transport vositalarini davlat roʻyxatidan oʻtkazish tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

transport vositasining egasi — avtomototransport vositasiga mulk huquqi yoki boshqa ashyoviy huquqlar asosida egalik qiluvchi yuridik yoki jismoniy shaxs;

avtomototransport vositalarini vaqtinchalik roʻyxatdan oʻtkazish — avtomototransport vositasini vaqtinchalik hisobga qoʻyish, roʻyxatdan oʻtkazish haqida vaqtinchalik guvohnoma va roʻyxatdan oʻtkazish davlat raqami belgilarini berish;

roʻyxatdan oʻtkazish davlat raqami belgisi (keyingi oʻrinlarda — ROʻDRB deb ataladi) — Oʻzbekiston Respublikasi Vazirlar Mahkamasining “Avtomototransport vositalari uchun roʻyxatdan oʻtkazish davlat raqami belgilarining yangi namunalarini joriy etish chora-tadbirlari toʻgʻrisida” 2007-yil 27-iyundagi 131-son qarori bilan tasdiqlangan avtomototransport vositasiga uni davlat roʻyxatidan oʻtkazishni hisobga olish uchun hududiy kodlar va davlat raqamlari belgilarining tiplariga muvofiq beriladigan maxsus raqamli belgi;

yagona oshirilgan toʻlov evaziga avtomototransport vositalari uchun ROʻDRB — istalgan harf va raqamlar kombinatsiyasidan iborat boʻlgan, ixtiyoriy tanlovga koʻra yagona oshirilgan toʻlov evaziga beriladigan ROʻDRB

avtomototransport vositalarini davlat roʻyxatidan oʻtkazish — avtomototransport vositasini doimiy hisobga qoʻyish, avtomototransport vositasini roʻyxatdan oʻtkazish haqidagi guvohnoma va ROʻDRBni berish;

roʻyxatga olish joyi — avtomototransport vositalarini davlat roʻyxatidan oʻtkazishni amalga oshiruvchi YHXX va uning hududiy boshqarmalarining joylashgan joyi;

avtomototransport vositalarini qayta roʻyxatdan oʻtkazish — tegishli huquqiy asoslar mavjud boʻlganda avtomototransport vositasining roʻyxatdan oʻtkazish hujjatlariga oʻzgartirish va qoʻshimchalar kiritish;

avtomototransport vositasini qayta jihozlash — boshqa model va modifikatsiyalar agregat va uzellari, ehtiyot qismlar va butlovchi detallardan foydalangan holda avtomototransport vositasi tarkibiy qismlari elementlari va tuzilishiga oʻzgartirishlar kiritish;

roʻyxatdan oʻtkazish harakatlari — qonunchilikka muvofiq YHXX va uning hududiy boshqarmalari tomonidan avtomototransport vositalarini vaqtinchalik roʻyxatdan oʻtkazish, qayta roʻyxatdan oʻtkazish va ularni hisobdan chiqarish, shuningdek avtomototransport vositalarini roʻyxatga olish haqida guvohnoma va ROʻDRBni berishdan iborat davlat roʻyxatidan oʻtkazish boʻyicha harakatlar kompleksi;

roʻyxatdan oʻtkazish hujjati — uning yoʻl harakatida ishtirok etishiga huquq berilganligini tasdiqlovchi avtomototransport vositasini roʻyxatdan oʻtkazish haqida guvohnoma, shuningdek avtomototransport vositasining roʻyxatdan oʻtkazish kartasi;

transport vositasi — yoʻlovchilarning, bagajning, yuk bagajining, yuklarning, pochta va kuryerlik joʻnatmalarining yoki maxsus ishlarni amalga oshirish uchun uskunalarning yoʻllarda harakatlanishi yoki tashilishi uchun moʻljallangan qurilma. Mazkur Nizom maqsadlaridan kelib chiqib, transport vositalari avtotransport vositalari (avtomobillar, elektromobillar), mototransport vositalari (mototsikl, elektromototsikl, moped va skuterlar) hamda tirkama va yarim tirkamalarga boʻlinadi;

“TRADE-IN” — ilgari foydalanishda boʻlgan avtomototransport vositasini yangi avtomototransport vositasiga narxlaridagi farqni toʻlagan (narxlaridagi farqni olgan) holda almashtirish;

distribyutor tashkiloti — Oʻzbekiston Respublikasi hududida yangi avtomototransport vositalarini realizatsiya qilish boʻyicha ishlab chiqaruvchi bilan tegishli distribyutorlik kelishuviga ega yuridik shaxs;

yaroqsiz avtomototransport vositasi — transport vositasining asosiy qismlaridan biri, yaʼni dvigatel, shassi (yurish qismi, transmissiya, boshqaruv qismi) va kuzovi mavjud boʻlmagan transport vositalari;

diler tashkiloti — Oʻzbekiston Respublikasi hududida yangi avtomototransport vositalarini realizatsiya qilish boʻyicha distribyutor tashkiloti yoki ishlab chiqaruvchi bilan tegishli dilerlik kelishuviga ega yuridik shaxs;

“TRADE-UP” — ilgari foydalanishda boʻlgan avtomototransport vositasini ilgari foydalanishda boʻlgan avtomototransport vositasiga narxlaridagi farqni toʻlagan (narxlaridagi farqni olgan) holda almashtirish.

antikvar” avtomototransport vositalari — ishlab chiqarilganiga 50 yil va undan ortiq boʻlgan, asl holati (tashqi koʻrinishi), tuzilishi va asosiy agregatlari saqlanib qolgan avtomototransport vositalari;

“Oq yoʻl” platformasi — YHXXning Yagona avtomatlashtirilgan axborot tizimidagi Oʻzbekiston hududidagi avtomototransport vositalarini ishlab chiqaruvchi (keyingi oʻrinlarda — ishlab chiqaruvchi), distribyutor yoki diler tashkiloti va YHXX oʻrtasida maʼlumotlar almashinuvini taʼminlovchi axborot tizimi;

“Hisob-maʼlumotnomalari” moduli — “Oq yoʻl” platformasi orqali berilgan elektron hisob-maʼlumotnomalari toʻgʻrisidagi maʼlumotlar jamlangan axborot tizimi;

elektron hisob-maʼlumotnoma — avtomototransport vositasi qonuniy sotib olinganligini tasdiqlovchi, uni davlat roʻyxatidan oʻtkazish uchun asos boʻlib xizmat qiluvchi qatʼiy hisobda turuvchi, ishlab chiqaruvchi, distribyutor yoki diler tashkiloti tomonidan beriladigan elektron rasmiy hujjat;

login-parol — elektron hisob-maʼlumotnomani berish uchun “Oq yoʻl” platformasida avtomototransport vositalarini sotish faoliyati bilan shugʻullanuvchi yuridik shaxslar nomiga rasmiylashtirilgan va kelgusida ushbu distribyutor yoki diler tashkilotini aniqlashda foydalaniladigan maxsus jumlalar, kod yoki raqamlar kombinatsiyalari.

3. Roʻyxatdan oʻtkazish harakatlari Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari jamoat xavfsizligi xizmati yoʻl harakati xavfsizligi boshqarmalarining roʻyxatdan oʻtkazish va imtihon olish boʻlinmalari (keyingi oʻrinlarda — YHXX va uning hududiy boshqarmalari) tomonidan amalga oshiriladi.

Avtomototransport vositalarini davlat roʻyxatidan oʻtkazish, qayta roʻyxatdan oʻtkazish va ularga davlat raqami belgilarini berish Toshkent, Nukus shaharlarida va viloyatlar markazlarida bittadan roʻyxatdan oʻtkazish va imtihon olish boʻlinmalarida eksterritoriallik tamoyili asosida amalga oshiriladi.

Bunda avtomototransport vositasi fuqaroning yashash joyi boʻyicha manzili yoki yuridik shaxsning roʻyxatga olingan manzili boʻyicha roʻyxatdan oʻtkaziladi.

4. YHXX va uning hududiy boshqarmalarida quyidagi transport vositalari davlat roʻyxatidan oʻtkaziladi:

dvigatelining ish hajmi 50 sm3 va undan oshadigan, konstruktiv tezligi soatiga 50 kilometr va undan oshadigan avtotransport vositalari, shuningdek, elektrodvigatelining quvvati 4 kilovatt va undan oshadigan, konstruktiv tezligi soatiga 50 kilometr va undan oshadigan transport vositalari — avtomobil, elektromobillar va gibrid avtomobillar sifatida;

dvigatelining ish hajmi 50 sm3 va undan oshadigan, konstruktiv tezligi soatiga 50 kilometr va undan oshadigan yon tirkamasiz yoki yon tirkamali (kajavali) ikki yoki uch (toʻrt) gʻildirakli mototsikllar va ularga tenglashtirilgan transport vositalari — mototsikl sifatida;

elektrodvigatelining quvvati 4 kilovatt va undan oshadigan, konstruktiv tezligi soatiga 50 kilometr va undan oshadigan yon tirkamasiz yoki yon tirkamali (kajavali) ikki yoxud uch (toʻrt) gʻildirakli elektromototsikllar va ularga tenglashtirilgan transport vositalari — elektromototsikl sifatida;

dvigatelining ish hajmi 25 sm3 va undan ortiq, lekin 50 sm3dan oshmaydigan, konstruktiv tezligi soatiga 25 kilometr va undan ortiq, 50 kilometrdan oshmaydigan ikki yoki uch (toʻrt) gʻildirakli mopedlar va ularga tenglashtirilgan transport vositalari — moped sifatida;

elektrodvigatelining quvvati 0,25 kilovatt va undan ortiq, lekin 4 kilovattdan oshmaydigan, konstruktiv tezligi soatiga 25 kilometrdan ortiq, biroq 50 kilometrdan oshmaydigan ikki yoki uch (toʻrt) gʻildirakli skuterlar va ularga tenglashtirilgan transport vositalari — skuter sifatida;

konlarda, shaxta va karyerlarda qoʻllaniladigan maxsus transport vositalari;

tirkama va yarim tirkamalar.

“antikvar” transport vositalari.

Avtomototransport vositalarining tuzilmasi texnik tartibga solish sohasidagi normativ hujjatlar, shuningdek yoʻl harakati xavfsizligini taʼminlash sohasidagi meʼyor talablariga mos kelishi kerak.

5. YHXX va uning hududiy boshqarmalarida quyidagi transport vositalari davlat roʻyxatidan oʻtkazilmaydi:

yopiq joylarda va qishloq xoʻjaligida qoʻllaniladigan umumiy yoʻllarda foydalanishga moʻljallanmagan texnologik transport vositalari (traktor, traktor tirkamalari, qurilish-yoʻl va meliorativ texnikasi, oʻziyurar va qishloq xoʻjaligi mashinalari);

tramvay va trolleybuslar;

Oʻzbekiston Respublikasi Mudofaa vazirligi, Oʻzbekiston Respublikasi Davlat xavfsizlik xizmati, Oʻzbekiston Respublikasi Ichki ishlar vazirligi, Oʻzbekiston Respublikasi Milliy gvardiyasiga tegishli boʻlgan harbiy transport vositalari;

ishlab chiqarilganiga 50 yil va undan ortiq boʻlgan transport vositalari (“antikvar” avtomototransport vositalari bundan mustasno);

eng yuqori konstruktiv tezligi soatiga 25 kilometrdan oshmaydigan, ish hajmi 25 sm3 gacha boʻlgan ichki yonuv dvigateliga ega yoki nominal (belgilangan) quvvati 0,25 kilovattgacha boʻlgan kichik hajmdagi mototransport vositalari.

Ikkinchi, uchinchi va toʻrtinchi xatboshilarda koʻrsatilgan transport vositalari tegishli vazirliklar va idoralar tomonidan belgilangan tartibda davlat roʻyxatidan oʻtkaziladi.

6. Avtomototransport vositasining egasi yoki uning vakili avtomototransport vositasiga mulk huquqi yoki boshqa ashyoviy huquqlar paydo boʻladigan, oʻtadigan, cheklanadigan va tugatiladigan kundan yoki transport vositasining huquqiy holati oʻzgarishidan boshlab oʻn kalendar kun ichida mazkur Nizomning 14 va 15-bandlariga muvofiq tegishli YHXX va uning hududiy boshqarmalariga texnik koʻrikdan oʻtkazish uchun avtomototransport vositasini (konlarda, shaxta va karyerlarda qoʻllaniladigan maxsus transport vositalari bundan mustasno), uning texnik holatidan qatʼi nazar va mazkur Nizomda nazarda tutilgan hujjatlarni taqdim etgan holda murojaat qilishi zarur. Agar YHXX va uning hududiy boshqarmalariga murojaat qilish muddatining oxirgi kuni dam olish, bayram (ish kuni boʻlmagan) kunlarga toʻgʻri kelsa, undan keyingi birinchi ish kuni muddatning tugagan kuni hisoblanadi.

Avtomototransport vositasining nosozligi, egasi sogʻligʻining holati, haydovchilik guvohnomasining mavjud emasligi yoki boshqarish huquqidan mahrum boʻlganligi yoki avtomototransport vositasining boshqa hududda turganligi bilan bogʻliq holatlarda texnik koʻrikdan oʻtkazish ishlari avtomototransport vositasi turgan joydagi roʻyxatdan oʻtkazish va imtihon olish boʻlinmalari xodimlari tomonidan bevosita joyiga chiqqan holda eksterritoriallik tamoyili asosida amalga oshiriladi.

Bunda avtomototransport vositasining nosozligi Yoʻl harakati qoidalarida belgilangan transport vositalaridan foydalanishni taqiqlovchi shartlariga javob bermasligi bilan belgilanadi.

Avtomototransport vositasi uni qayta roʻyxatdan oʻtkazishga sabab boʻladigan barcha holatlarda, YHXX va uning hududiy boshqarmalari tomonidan belgilangan tartibda texnik koʻrikdan oʻtkaziladi.

Avtomototransport vositasi YHXX va uning hududiy boshqarmalari tomonidan tip, marka, model va modifikatsiya, ROʻDRB, identifikatsiyalovchi shassi (rama), kuzov va dvigatellar raqamlarining, shuningdek, avtomototransport vositasining toʻliq vazni, yuksiz vazni, oʻrindiqlar soni toʻgʻrisidagi maʼlumotlarni roʻyxatdan oʻtkazish hujjatlarida koʻrsatilgan maʼlumotlarga mos kelishi predmeti yuzasidan texnik koʻrikdan oʻtkaziladi.

Auksion savdolari natijalari toʻgʻrisidagi bayonnoma asosida davlat roʻyxatidan oʻtkazilayotgan avtomototransport vositasining Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining Yagona avtomatlashtirilgan axborot tizimi (keyingi oʻrinlarda — YAAAT) “Avtomototransport hisobi” moduli orqali ilgari roʻyxatdan oʻtkazilganligi (yoki oʻtkazilmaganligi) tekshiriladi.

Bunda avtomototransport vositasi muqaddam DYHXX roʻyxatidan oʻtkazilmagan boʻlsa (sud qarori asosida davlat foydasiga oʻtkazilgan yoki harbiy tuzilmalarga tegishli harbiy transport vositalari bundan mustasno), masʼul xodim tomonidan holatga aniqlik kiritiladi.

Noqonuniy holatlar aniqlangan taqdirda, belgilangan tartibda hujjatlar rasmiylashtirilib, tergov organlariga yuboriladi.

61. Konlarda, shaxta va karyerlarda qoʻllaniladigan maxsus transport vositalari egasi yoki vakilining murojaatiga asosan hududiy roʻyxatdan oʻtkazish va imtihon olish boʻlinmalari xodimlari tomonidan joyiga chiqib, texnik koʻrikdan oʻtkazish natijalariga koʻra rasmiylashtiriladi.

7. Avtomototransport vositasining boshqa shaxsga oʻtkazilishi haqidagi bitimlar notarius tomonidan tasdiqlanishi davomida avtomototransport vositasining raqam agregatlari va boshqa texnik parametrlarning roʻyxatdan oʻtkazish maʼlumotlariga mos kelishi yuzasidan murojaat qiluvchilar tomonidan tekshiriladi va bu haqida shartnomada aks ettiriladi.

Distribyutor va diler tashkilotlari tomonidan ilgari foydalanishda boʻlgan avtomototransport vositalarining oldi-sotdi shartnomasini, shu jumladan, ular tomonidan “TRADE-IN” va “TRADE-UP” dasturlari boʻyicha oldi-sotdi shartnomasini rasmiylashtirishdan oldin:

Oʻzbekiston Respublikasining Oila kodeksi 24-moddasi toʻrtinchi qismi talablariga rioya etgan holda xotin (er)ning notarial tartibda tasdiqlangan roziligi olinishi;

avtomototransport vositasi raqam agregatlari va boshqa texnik parametrlarining roʻyxatdan oʻtkazish maʼlumotlariga mos kelishi yuzasidan tekshirilishi uchun sotib oluvchining tanloviga koʻra xohlagan hududiy DYHXX organlariga taqdim etilishi zarur.

Bunda avtomototransport vositasini koʻrikdan oʻtkazish natijalari boʻyicha koʻrikdan oʻtkazish maʼlumotlari YHXX va uning hududiy boshqarmalari xodimlari tomonidan beriladigan maʼlumotnomaga koʻrikdan oʻtkazgan mansabdor shaxsning familiyasi, ismi va otasining ismi, koʻrikdan oʻtkazish sanasi koʻrsatilgan holda va mansabdor shaxsning imzosi bilan belgilangan namunadagi shtamp bosilishi yoʻli bilan qayd qilinadi. Shtamp oʻn kalendar kun mobaynida haqiqiy hisoblanadi.

8. Roʻyxatdan oʻtkazish harakatlarini amalga oshirishda, shuningdek notarius tomonidan bitimlarning tasdiqlanishidan oldin koʻrikdan oʻtkazilishida avtomototransport vositasini roʻyxatdan oʻtkazish hujjatlaridagi maʼlumotlar YHXX va uning hududiy boshqarmalari tomonidan olib qochilgan va oʻgʻirlangan avtomototransport vositalari boʻyicha maʼlumotlar bazasi bilan taqqoslanadi, shuningdek Oʻzbekiston Respublikasi qonunchilikka muvofiq avtomototransport vositasi boshqa shaxsga oʻtkazilishiga taqiq yoki xatlovning mavjudligi yuzasidan tekshiriladi.

Bunda avtomototransport vositasini boshqa shaxsga berish toʻgʻrisidagi shartnomani “yagona darcha” tamoyili asosida rasmiylashtirish maqsadida notariuslar tomonidan avtomototransport vositasini boshqa shaxsga berish toʻgʻrisidagi bitimlar tasdiqlanishida avtomototransport vositasini roʻyxatdan oʻtkazish hujjatlaridagi maʼlumotlar YHXX va uning hududiy boshqarmalarining olib qochilgan va oʻgʻirlangan avtomototransport vositalari boʻyicha maʼlumotlar bazasi bilan integratsiya qilish orqali taqqoslanadi.

Avtotransport vositalariga nisbatan taqiq mavjud yoki mavjud emasligi toʻgʻrisidagi maʼlumotlar “Raqamli hukumat” tizimining idoralararo integratsiyalashuv platformasi orqali aniqlanadi.

9. Yuk tashuvchi avtotransport vositalari, avtobus va mikroavtobuslarga nisbatan roʻyxatdan oʻtkazish harakatlari amalga oshirilganda YHXX va uning hududiy boshqarmalari mudofaa ishlari boʻyicha boʻlimlarni belgilangan tartibda hisobga qoʻyish yoki hisobdan chiqarish uchun xabardor qilishadi.

Koʻtaruvchi mexanizmlar bilan jihozlangan avtotransportlarga (avtokran) nisbatan roʻyxatdan oʻtkazish harakatlari, ular Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi tomonidan hisobga qoʻyilgandan (hisobdan chiqarilgandan) soʻng amalga oshiriladi.

10. Davlat roʻyxatidan oʻtgan transport vositalari va ularning egalari toʻgʻrisidagi maʼlumotlar qonunda belgilangan tartibda tergovga qadar tekshiruv, surishtiruv, dastlabki tergov, sud hamda qonunchilik bilan vakolat berilgan boshqa organlarga taqdim etilishi mumkin.

11. YHXX va uning hududiy boshqarmalari roʻyxatdan oʻtkazish va imtihon olish boʻlinmalarining roʻyxatdan oʻtkazishni amalga oshirish, avtomototransport vositalarining texnik holati va tuzilishining xavfsizlik talablariga javob berishini baholash boʻyicha ishlarini tashkil etishi, shuningdek ish yuritishni olib borishi Oʻzbekiston Respublikasi Ichki ishlar vazirligi tomonidan tasdiqlangan tartibga muvofiq amalga oshiriladi.

11-bob. Avtomototransport vositalarini davlat roʻyxatidan oʻtkazish uchun murojaat qilish tartibi

111. Avtomototransport vositasining egasi yoki vakili avtomototransport vositasini davlat roʻyxatidan oʻtkazish uchun YHXXning mobil ilovasi, rasmiy veb-sayti, “Call” markazi yoki Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali murojaat etganda, ushbu Nizomning 2 — 7-boblarida koʻrsatilgan avtomototransport vositalarini davlat roʻyxatidan oʻtkazish turini tanlaydi.

112. YHXXning mobil ilovasi, rasmiy veb-sayti, “Call” markazi yoki YIDXP orqali ushbu Nizomning 17 — 20-bandlarida nazarda tutilgan hujjatlar toʻgʻrisidagi maʼlumotlarni kiritadi, zarur hollarda ularning nusxalarini yuklaydi (notarial tasdiqlangan hujjatlar bundan mustasno), shuningdek, telefon raqamini kiritib ushbu maʼlumotlarni tasdiqlaydi.

113. Maʼlumotlar tasdiqlangandan soʻng avtomototransport vositasining egasi yoki vakilining telefon raqamiga toʻlov rekvizitlari va miqdori toʻgʻrisida SMS-xabar yuboriladi.

114. Avtomototransport vositasini davlat roʻyxatidan oʻtkazish uchun yigʻim va toʻlovlar onlayn toʻlov tizimlar orqali belgilangan tartibda toʻlanadi hamda axborot tizimlari bilan tasdiqlanadi.

115. Avtomototransport vositasini davlat roʻyxatidan oʻtkazish uchun toʻlovlar toʻlangandan keyin YHXXning dasturiy taʼminoti (mobil ilova) yoki YIDXP orqali shakllantirilgan murojaat YHXX va uning hududiy boshqarmalariga onlayn rejimida yuboriladi.

116. Murojaat yuborilgandan soʻng avtomototransport vositasining egasi yoki vakili avtomototransport vositasini texnik koʻrikdan oʻtkazish uchun ushbu Nizomning 6-bandida belgilangan muddatdan kechiktirmasdan hamda ushbu Nizomning 17 — 20-bandlarida nazarda tutilgan hujjatlarni taqdim etgan holda, YHXX va uning hududiy boshqarmalariga olib borishi shart.

117. YHXX va uning hududiy boshqarmalarining masʼul xodimlari avtomototransport vositasining egasi yoki vakili tomonidan taqdim etilgan hujjatlardagi maʼlumotlarni YIDXP orqali yuborilgan murojaatdagi maʼlumotlar bilan solishtiradi, shuningdek, avtomototransport vositasini, uning tipi, markasi, model va modifikatsiyasi, ROʻDRB, identifikatsiyalovchi shassi (rama), kuzov va dvigatellar raqamlari, toʻliq vazni, yuksiz vazni, oʻrindiqlar soni toʻgʻrisidagi maʼlumotlari asosida texnik koʻrikdan oʻtkazadi.

Bunda avtomototransport vositalarini davlat roʻyxatidan oʻtkazishda avtomototransport vositasining oldi-sotdi shartnomalari va boshqa notarial tasdiqlangan bitimlar talab qilinmaydi va ushbu hujjatlar “Raqamli hukumat” tizimining idoralararo integratsiyalashuv platformasi orqali “Notarius” avtomatlashtirilgan axborot tizimidan yuklab olinadi.

118. Avtomototransport vositasining maʼlumotlari taqdim etilgan hujjatlar bilan mos kelgan taqdirda, avtomototransport vositasi davlat roʻyxatidan oʻtkaziladi va roʻyxatdan oʻtkazilganlik toʻgʻrisida guvohnoma besh yil muddatga rasmiylashtirilib, ROʻDRB bilan birga avtomototransport vositasi egasi yoki vakiliga taqdim etiladi.

Bunda avtomototransport vositasini roʻyxatdan oʻtkazish toʻgʻrisidagi guvohnomaning 6-bandiga berilgan sanasi hamda amal qilish muddati kiritiladi.

119. Avtomototransport vositasi egasi yoki vakili avtomototransport vositasi roʻyxatdan oʻtkazilganligi toʻgʻrisidagi guvohnoma va ROʻDRBni olganligi, ularning shaxsini identifikatsiya qilish (elektron raqamli imzo, barmoq izlarini identifikatsiya (verifikatsiya) qilish va boshqalar) orqali tasdiqlanadi.

1110. Avtomototransport vositasining egasi yoki vakili avtomototransport vositasini davlat roʻyxatidan oʻtkazish uchun bevosita YHXX va uning hududiy boshqarmalariga murojaat etganda, ularning murojaatlari YHXX va uning hududiy boshqarmalarining masʼul xodimlari tomonidan maxsus texnik qurilmalar (planshet) orqali koʻrib chiqadi.

Bunda avtomototransport vositasining egasi yoki vakili hamda masʼul xodim tomonidan ushbu Nizomning 111 — 119-bandlarida nazarda tutilgan harakatlar amalga oshiriladi.

12-bob. Avtomototransport vositalarini sotish faoliyati bilan shugʻullanuvchi yuridik shaxslarga login-parollarni rasmiylashtirish, shuningdek, avtomototransport vositalarini davlat roʻyxatidan oʻtkazish uchun elektron shakldagi hisob-maʼlumotnomalarini berish tartibi

1111. Sotilayotgan avtomototransport vositalariga elektron hisob-maʼlumotnomalarni berish uchun ishlab chiqaruvchi, distribyutor va diler tashkilotlariga YHXX tomonidan login-parollar rasmiylashtiriladi.

Bunda ishlab chiqaruvchi, distribyutor va diler tashkilotlari login-parollarni rasmiylashtirish uchun YHXXga murojaat qiladi.

1112. Login-parollarni rasmiylashtirish uchun ishlab chiqaruvchi, distribyutor va diler tashkilotlari oʻz murojaatlariga quyidagi hujjatlarni ilova qiladi:

a) ishlab chiqaruvchilar uchun:

taʼsis hujjatlari (ustav, guvohnoma va boshqalar);

avtomototransport vositalarini Oʻzbekistonda ishlab chiqarish faoliyati amalga oshirilishini tasdiqlovchi hujjatlar;

avtomototransport vositalarining muvofiqlik sertifikatlari (har bir rusumi boʻyicha);

soliq toʻlovchining identifikatsiya raqami (STIR);

b) ishlab chiqaruvchilarning vakillari yoki vositachilari (diler, distribyutor) uchun:

taʼsis hujjatlari (ustav, guvohnoma va boshqalar);

ishlab chiqaruvchi bilan tuzilgan tegishli dilerlik (distribyutorlik) kelishuv hujjatlari (shartnomalar);

davlat bojxona xizmati organi tomonidan berilgan yuk bojxona deklaratsiyalari (erkin muomalaga olib kirgan chet elda ishlab chiqarilgan avtomototransport vositalari uchun);

avtomototransport vositalarining muvofiqlik sertifikatlari (har bir rusumi boʻyicha);

soliq toʻlovchining identifikatsiya raqami (STIR);

v) “TRADE-IN” dasturi asosida avtomototransport vositalarini sotuvchi yuridik shaxslar uchun:

taʼsis hujjatlari (ustav, guvohnoma va boshqalar);

“TRADE-IN” dasturi asosida avtomototransport vositalarini sotishni tasdiqlovchi hujjatlar;

soliq toʻlovchining identifikatsiya raqami (STIR);

Oʻzbekiston Respublikasi hududidagi avtomototransport vositalarini ishlab chiqaruvchisi bilan tuzilgan tegishli dilerlik (distribyutorlik) kelishuv hujjatlari (shartnomalar).

1113. YHXXning masʼul xodimi ishlab chiqaruvchi, distribyutor yoki diler tashkiloti tomonidan kelib tushgan murojaatni besh ish kuni ichida taqdim etilgan hujjatlar asosida oʻrganib chiqadi.

1114. Oʻrganish natijalariga koʻra, masʼul xodim ishlab chiqaruvchi, distribyutor yoki diler tashkilotiga login-parolni rasmiylashtirish yoki rad etish toʻgʻrisida asoslantirilgan javob xati beradi.

1115. Ishlab chiqaruvchi, distribyutor yoki diler tashkilotiga login-parol quyidagi hollarda taqdim etilmaydi:

mazkur Nizomning 1112-bandida nazarda tutilgan murojaatga ilova qilingan hujjatlar toʻliq taqdim etilmaganda;

taqdim etilgan hujjatlardagi maʼlumotlarning haqiqatga toʻgʻri kelmasligi aniqlanganda;

transport vositasining muvofiqlik sertifikati mavjud boʻlmagan hollarda.

1116. Ushbu Nizomning 1112-bandidagi “a”, “b” va “v” kichik bandlarida koʻrsatilgan holatlar boʻyicha alohida elektron login-parollar beriladi.

1117. Murojaatni oʻrganib chiqish natijalari boʻyicha kamchiliklar aniqlanmagan taqdirda, masʼul xodim tomonidan ishlab chiqaruvchi, distribyutor yoki diler tashkilotiga login-parol rasmiylashtiriladi.

Bunda masʼul xodim tomonidan ishlab chiqaruvchi, distribyutor yoki diler tashkilotining masʼul rahbar va xodimlariga login-paroldan foydalanish tartibi tushuntiriladi va undan noqonuniy foydalangan taqdirda, qonunchilik hujjatlariga asosan javobgarlikka tortilishi toʻgʻrisida ogohlantirib, ulardan tilxat oladi.

1118. Ishlab chiqaruvchi, distribyutor yoki diler tashkiloti “Oq yoʻl” platformasiga YHXX tomonidan berilgan login-parol orqali kiradi.

1119. “Oq yoʻl” platformasidagi “Hisob maʼlumotnomalari” moduliga oʻtib, avtomototransport vositasi va xaridor toʻgʻrisidagi quyidagi maʼlumotlarni kiritadi:

a) xaridor toʻgʻrisidagi maʼlumotlar:

yuridik shaxslar uchun:

yuridik shaxsning nomi, STIR, manzili;

jismoniy shaxslar uchun:

xaridorning F.I.O., pasport (ID karta) seriyasi va raqami, JSHSHIR raqami hamda manzili;

b) avtomototransport vositasining sotilgan sanasi;

v) avtomototransport vositasi toʻgʻrisidagi maʼlumotlar:

rusumi;

modeli;

turi;

kuzov turi;

VIN-kodi;

dvigatel raqami;

dvigatel quvvati (ot kuchi, vatt);

kuzov raqami;

shassi raqami;

rangi;

yonilgʻi turi;

toʻla vazni;

yuksiz vazni;

g) ekologik sinfi;

d) ishlab chiqaruvchi, distribyutor yoki diler tashkiloti toʻgʻrisidagi maʼlumotlar:

nomi;

STIR;

faoliyat turi;

manzili;

rahbarining F.I.O.;

telefon raqami;

e) bojxona organlari tomonidan berilgan yuk bojxona deklaratsiyalari tartib raqamini (chet elda ishlab chiqarilgan avtomototransport vositalari uchun).

1120. Ushbu Nizomning 1119-bandida koʻrsatilgan maʼlumotlar “Hisob maʼlumotnomalari” moduliga kiritilgandan soʻng, elektron hisob-maʼlumotnoma real vaqt rejimida, ushbu Nizomga ilovaga muvofiq namunada avtomatik tarzda shakllantiriladi va xaridorlarga taqdim etiladi.

Shakllantirilgan elektron hisob-maʼlumotnomaning haqiqiyligini tekshirish uchun “QR-kod” bilan taʼminlanadi.

1121. Ushbu Nizomning 1119-bandida koʻrsatilgan maʼlumotlar “Hisob maʼlumotnomalari” moduliga notoʻgʻri kiritilganda, elektron hisob-maʼlumotnomaning shakllantirilishi avtomatik tarzda toʻxtatiladi.

1122. Ishlab chiqaruvchi, distribyutor yoki diler tashkiloti tomonidan notoʻgʻri kiritilgan maʼlumotlar 24 soat ichida “Hisob maʼlumotnomalari” modulida toʻgʻirlangan taqdirda, elektron hisob-maʼlumotnoma qayta shakllantiriladi va xaridorlarga taqdim etiladi.

1123. Notoʻgʻri kiritilgan maʼlumotlar 24 soat ichida ishlab chiqaruvchi, distribyutor yoki diler tashkiloti tomonidan toʻgʻirlanmagan taqdirda, shakllantirilayotgan elektron hisob-maʼlumotnoma avtomatik tarzda bekor qilinadi.

1124. Elektron hisob-maʼlumotnomalarning sarflanishi toʻgʻrisida hisobotlar elektron tarzda “Hisob maʼlumotnomalari” modulida yuritiladi va YHXX tomonidan nazorat qilinadi.

1125. Hisob-maʼlumotnomalardagi maʼlumotlarning boshqa shaxslarga ochiqlanishiga yoʻl qoʻyilmaydi.

2-bob. Avtomototransport vositalarini davlat roʻyxatidan oʻtkazish

12. Avtomototransport vositalarini davlat roʻyxatidan oʻtkazish hududiy DYHXX organlari tomondan quyidagi holatlarda amalga oshiriladi:

a) YHXX va uning hududiy boshqarmalarida roʻyxatdan oʻtkazilmagan yangi avtomototransport vositasi olinganda;

b) Oʻzbekiston Respublikasi bojxona hududiga kiritilgan avtomototransport vositalari va ular tirkamalari va yarim tirkamalarining erkin muomalaga chiqarish (import) bojxona rejimida bojxona roʻyxatidan oʻtkazishda;

v) ilgari YHXX va uning hududiy boshqarmalarida roʻyxatdan oʻtgan avtomototransport vositasining egasi oʻzgarganda;

g) avtomototransport vositasining roʻyxatdan oʻtgan joyini oʻzgartirishni talab qiluvchi, avtomototransport vositasi egasining yashash (turar) joyi yoki joylashgan joyi (pochta manzili) oʻzgargan holatlarda.

13. Avtomototransport vositasi uning egasining — jismoniy yoki yuridik shaxsning nomiga davlat roʻyxatidan oʻtkaziladi.

Yuridik shaxs tuzmasdan faoliyatini amalga oshiruvchi yakka tartibdagi tadbirkorlar, dehqon xoʻjaliklari, oilaviy tadbirkorlik subyektlariga tegishli boʻlgan avtomototransport vositalarini davlat roʻyxatidan oʻtkazish ushbu Nizomda jismoniy shaxslarning avtomototransport vositalarini davlat roʻyxatidan oʻtkazish uchun belgilangan tartibga muvofiq amalga oshiriladi.

14. Jismoniy shaxslarning avtomototransport vositalari ularning yashash joyi boʻyicha roʻyxatdan oʻtgan joyi boʻyicha, yashash joyi boʻyicha roʻyxatdan oʻtgan joyi boʻlmasa — turgan joyi boʻyicha davlat roʻyxatidan oʻtkaziladi.

Bunda roʻyxatdan oʻtkazish avtomototransport vositasi egasining yashash joyi boʻyicha roʻyxatdan oʻtgan hududidan qatʼi nazar, har bir hududda avtomototransport vositalarini davlat roʻyxatidan oʻtkazish, qayta roʻyxatdan oʻtkazish va ularga davlat raqami belgilarini berish uchun masʼul etib belgilangan hududiy YHXX organlarida ham amalga oshirilishi mumkin.

Avtotransport vositasini 18 yoshga toʻlmagan jismoniy shaxs nomiga, mototransport vositasini esa 16 yoshga toʻlmagan jismoniy shaxs nomiga davlat roʻyxatidan oʻtkazishda, ularning nomidan qonuniy vakillari (ota-onalari, farzandlikka oluvchilari, vasiy yoki homiylari) ishtirok etadi.

Muomalaga layoqatsiz jismoniy shaxs nomiga avtomototransport vositasini davlat roʻyxatidan oʻtkazish, agar muomalaga layoqatsiz shaxsda avtomototransport vositasiga boʻlgan mulk huquqi belgilangan tartibda meros yoki hadya natijasida paydo boʻlgan boʻlsa amalga oshiriladi.

Agar hadya shartnomasi, sud qarori yoki meros toʻgʻrisidagi guvohnomada bir avtomototransport vositasining egasi sifatida bir necha shaxslar koʻrsatilgan boʻlsa, avtomototransport vositasi ularning kelishuviga koʻra ulardan birining nomiga davlat roʻyxatidan oʻtkaziladi. Avtomototransport vositalari egalarining, avtomototransport vositasini ulardan birining nomiga davlat roʻyxatidan oʻtkazish toʻgʻrisidagi kelishuvi notarius tomonidan tasdiqlanadi.

15. Yuridik shaxslarning avtomototransport vositalarini davlat roʻyxatidan oʻtkazish yuridik shaxslarni davlat roʻyxatidan oʻtkazish guvohnomasida koʻrsatilgan joylashgan joy, yuridik shaxs nomi, STIR raqami boʻyicha amalga oshiriladi.

Akkreditatsiyadan oʻtgan yoki qonunchilikda belgilangan tartibda Oʻzbekiston Respublikasida roʻyxatdan oʻtgan diplomatik vakolatxonalar yoki konsullik muassasalariga; xalqaro tashkilotlarga, ularning vakolatxonalariga va filiallariga (xalqaro hukumatlararo va nohukumat tashkilotlarni kiritgan holda); chet davlatlarning hukumat va nohukumat tashkilotlariga, ularning vakolatxonalari va filiallariga; muxbirlar va muxbirlik punktlariga (byuro, ofis); savdo vakolatxonalariga, chet el banklari va tijorat tashkilotlari vakolatxonalariga, shuningdek doimiy muassasalarga tegishli boʻlgan avtomototransport vositalari Oʻzbekiston Respublikasi Tashqi ishlar vazirligi huzuridagi “Diplomatik servis xizmati” davlat muassasasi yordamida davlat roʻyxatidan oʻtkaziladi.

16. Avtomototransport vositasini davlat roʻyxatidan oʻtkazish uchun uning egasi yoki vakili YHXX va uning hududiy boshqarmalariga quyidagi hujjatlarni taqdim etgan holda murojaat etadi:

avtomototransport vositasi egasining yoki uning vakili shaxsini tasdiqlovchi hujjat;

avtomototransport vositasining avvalgi egasiga berilgan avtomototransport vositasini roʻyxatdan oʻtkazish toʻgʻrisidagi guvohnoma;

avtomototransport vositasiga boʻlgan mulk huquqi va boshqa ashyoviy huquqlarni tasdiqlovchi hujjat (notarial tasdiqlangan hujjatlar bundan mustasno);

Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasining gaz ballonlarini sinovdan oʻtkazish huquqini beruvchi ruxsatnomasi mavjud boʻlgan tashkilot tomonidan transport vositalariga oʻrnatilgan gaz ballonlari sinovdan oʻtkazilganligi toʻgʻrisidagi dalolatnoma (gaz balloni oʻrnatilmagan transport vositalari mustasno);

YHXX va uning hududiy boshqarmalarining roʻyxatga olish bilan bogʻliq xizmatlari uchun toʻlov toʻlaganligi haqidagi bank toʻlov hujjati (yigʻimlar va toʻlovlardan ozod etilgan shaxslar hamda elektron toʻlov tizimlar orqali toʻlov amalga oshirilgan hollar bundan mustasno);

Avtomototransport vositasini avval berilgan (avval qoʻllanilgan) ROʻDRBni qayta berish bilan davlat roʻyxatidan oʻtkazish uchun mazkur Nizomning 31-bandiga muvofiq avtomototransport vositasining yangi egasi yoki uning vakili tomonidan hududiy boshqarmalariga quyidagi qoʻshimcha hujjatlar taqdim etiladi:

jismoniy shaxslar uchun — yaqin qarindoshlikni tasdiqlovchi hujjat yoki umumiy mulkka boʻlgan egalik huquqi toʻgʻrisida guvohnoma yoki merosga boʻlgan egalik huquqi toʻgʻrisidagi guvohnoma;

yuridik shaxslar uchun — arizachining avtomototransport vositasi avvalgi egasi oldida huquqiy vorislikni tasdiqlovchi hujjat yoki arizachi avtomototransport avvalgi egasining ishtirokchisi (taʼsischi, aʼzosi) boʻlganligini tasdiqlovchi hujjat yoki avtomototransport avvalgi egasi arizachining ishtirokchisi (taʼsischi, aʼzosi) boʻlganligini tasdiqlovchi hujjat.

Bunda avtomototransport vositasini davlat roʻyxatidan oʻtkazishda quyidagi hujjatlar vakolatli organlardan idoralararo elektron hamkorlik orqali olinadi:

avtomototransport vositasining oldi-sotdi shartnomasi va boshqa notarial tasdiqlangan bitimlar;

“Elektron onlayn auksionlarni tashkil etish” AJ tomonidan berilgan auksion bayonnomalari;

davlat ulushi mavjud korxonalar tomonidan ishlab chiqarilgan avtomototransport vositalariga beriladigan elektron hisob-maʼlumotnomalar;

avtomototransport vositasi mulkdorining maʼlumotlari (jismoniy shaxs F.I.O., yuridik shaxs nomi, tashkiliy-huquqiy shakli, manzili) oʻzgarganini tasdiqlovchi maʼlumotlar.

17. Avtomototransport vositasi egasining yoki uning vakilining shaxsini tasdiqlovchi hujjatlarga quyidagilar kiradi:

a) jismoniy shaxslar uchun — jismoniy shaxsning shaxsini tasdiqlovchi hujjat:

Oʻzbekiston Respublikasi fuqarolari uchun — fuqarolik pasporti yoki identifikatsiyalovchi ID-kartasi yoki yangi namunadagi milliy haydovchilik guvohnomasi;

16 yoshga toʻlmagan Oʻzbekiston Respublikasi fuqarolari uchun — tugʻilganlik haqida guvohnoma;

Oʻzbekiston Respublikasi harbiy xizmatchilari uchun — ichki ishlar organlarining propiska toʻgʻrisidagi yoki harbiy qismlarning uy ajratish toʻgʻrisidagi maʼlumotnomasini ilova qilgan holda harbiy qism yoki harbiy muassasalar qoʻmondonligi tomonidan beriladigan shaxsni tasdiqlovchi hujjat yoki harbiy bilet (harbiy xizmatga majbur fuqarolarning harbiy biletlari bundan mustasno);

chet el fuqarolari uchun — chet el fuqarosining identifikatsiyalovchi ID-kartasi, harakatlanish hujjati yoxud diplomatik pasporti yoki Oʻzbekiston Respublikasida akkreditatsiyani oʻtayotganlikni tasdiqlovchi akkreditatsiya kartochkasi;

fuqaroligi boʻlmagan shaxslar uchun — fuqaroligi boʻlmagan shaxsning identifikatsiyalovchi ID-kartasi yoki yangi namunadagi milliy haydovchilik guvohnomasi yoki harakatlanish hujjati;

b) jismoniy shaxslarning vakillari uchun:

notarius tomonidan tasdiqlangan jismoniy shaxslarning vakili vakolatlarini tasdiqlovchi ishonchnoma yoki jismoniy shaxs qonuniy vakili vakolatlarini tasdiqlovchi hujjat;

vakilning shaxsini tasdiqlovchi hujjat (mazkur bandning “a” kichik bandida koʻrsatilgan hujjatlar);

v) yuridik shaxslar uchun:

yuridik shaxsning davlat roʻyxatidan oʻtkazilganligi toʻgʻrisidagi guvohnomaning nusxasi;

yuridik shaxsning rahbari (direktor, rais) tomonidan imzolangan va uning muhri bilan tasdiqlangan (tadbirkorlik subyektlaridan muhr bilan tasdiqlash talab qilinmaydi) yuridik shaxs vakili vakolatlarini tasdiqlovchi ishonchnoma. Yuridik shaxsning erkinliklari ifodalagan holatlarda, ishonchnomaning oʻrniga uning rahbari tomonidan uni ushbu lavozimga tayinlash toʻgʻrisidagi qarorning nusxasi yuridik shaxsning muhri bilan tasdiqlangan holda (tadbirkorlik subyektlaridan muhr bilan tasdiqlash talab qilinmaydi) taqdim etiladi.

vakilning shaxsini tasdiqlovchi hujjat (mazkur bandning “a” kichik bandida koʻrsatilgan hujjatlar).

18. Avtomototransport vositasiga boʻlgan mulk huquqi yoki boshqa ashyoviy huquqlarni tasdiqlovchi hujjatlarga quyidagilar kiradi:

merosga boʻlgan huquq yoki mulkiy huquqlar toʻgʻrisida notarius tomonidan berilgan guvohnoma;

sudning qonuniy kuchga kirgan qarori;

notarius tomonidan tasdiqlangan avtomototransport vositasini boshqa shaxsga berish toʻgʻrisida shartnoma (oldi-sotdi, ayirboshlash, hadya, renta va boshqalar);

distribyutor yoki diler tashkiloti tomonidan realizatsiya qilingan yangi va ilgari foydalanishda boʻlgan avtomototransport vositalariga, shu jumladan, “TRADE-IN” va “TRADE-UP” dasturlari boʻyicha avtomototransport vositalariga beriladigan elektron hisob-maʼlumotnoma;

distribyutor yoki diler tashkiloti bilan tuzilgan ilgari foydalanishda boʻlgan avtomototransport vositasi oldi-sotdi shartnomasi, shu jumladan, “TRADE-IN” va “TRADE-UP” dasturlari boʻyicha tuzilgan ilgari foydalanishda boʻlgan avtomototransport vositasi oldi-sotdi shartnomasi;

Oʻzbekiston Respublikasi Davlat aktivlarini boshqarish agentligi huzuridagi “Elektron onlayn auksionlarni tashkil etish markazi” davlat unitar korxonasi tomonidan tashkil etilgan auksionlarda avtomototransport vositalariga ega boʻlishni tasdiqlovchi auksion natijalari toʻgʻrisidagi bayonnoma;

yuqori turuvchi davlat organining avtomototransport vositasini bir tizim ichida tekinga berish toʻgʻrisidagi qarori (buyrugʻi, farmoyishi);

yuridik shaxsning yuqori turuvchi boshqaruv organining yuridik shaxsning ustav jamgʻarmasiga (ustav kapitaliga) avtomototransport vositasini kiritish toʻgʻrisida yoki shu yuridik shaxsning ishtirokchisiga (taʼsischi, aʼzo) yuridik shaxsning avtomototransport vositasini dividend sifatida toʻlash toʻgʻrisidagi qarori (ishtirokchilar (taʼsischilar, aʼzolar) umumiy yigʻilishining bayonnomasi, yoki yagona ishtirokchining qarori);

davlat bojxona xizmati organi tomonidan berilgan yuk bojxona deklaratsiyasi;

shaxsning avtomototransport vositasini ommaviy oʻyinda (lotereyada) yutganligini tasdiqlovchi hujjat;

davlat organining transport vositasini mukofot (hadya) sifatida taqdim etganligi toʻgʻrisidagi qarorining nusxasi;

ishlab chiqaruvchi va distribyutor yoki diler tashkiloti, shuningdek, distribyutor va diler tashkilotlari oʻrtasida avtomototransport vositasining oldi-sotdi shartnomasi va topshirish-qabul qilish dalolatnomasi;

qonunchilikda nazarda tutilgan boshqa hujjat.

19. Yaqin qarindoshlikni tasdiqlovchi hujjatga tugʻilganlik haqidagi guvohnoma yoki nikoh tuzilganligi toʻgʻrisidagi guvohnoma yoki yaqin qarindoshlikni tasdiqlovchi vakolatli organ tomonidan berilgan boshqa hujjat kiradi.

Arizachining avtomototransport vositasining avvalgi egasi oldida huquqiy vorisligini tasdiqlovchi hujjatga arizachi-yuridik shaxsning ustavi yoki taʼsis shartnomasi kiradi.

Arizachi-yuridik shaxs avtomototransport vositasining avvalgi egasi-yuridik shaxs ishtirokchisi (taʼsischisi, aʼzosi, aksioneri) ekanligini tasdiqlovchi hujjatga oxirgisining ustav taʼsis shartnomasi yoki aksiyadorlar reyestri kiradi.

Avtomototransport vositasining avvalgi egasi-yuridik shaxs arizachi-yuridik shaxsning ishtirokchisi (taʼsischi, aʼzo, aksiyador) ekanligini tasdiqlovchi hujjatga oxirgisining ustavi yoki taʼsis shartnomasi yoxud aksiyadorlar reyestri kiradi.

20. YHXX va uning hududiy boshqarmalarida ilgari roʻyxatga qoʻyilmagan yangi avtomototransport vositasini yoki Oʻzbekiston Respublikasi hududiga kiritilgan va davlat bojxona xizmati organi tomonidan yuk bojxona deklaratsiyasi berilgan avtomototransport vositasini davlat roʻyxatidan oʻtkazishda mazkur Nizomning 16-bandi toʻrtinchi xatboshida koʻrsatilgan avtomototransport vositasini roʻyxatdan oʻtkazish toʻgʻrisidagi guvohnomani taqdim etish talab etilmaydi.

Avtomototransport vositasi sud qarori asosida davlat mulkiga qaratilganda, davlat foydasiga rad etish bojxona rejimiga rasmiylashtirilganda yoki egasi yoʻq deb topilib joylardagi ijro hokimiyati organining qaroriga koʻra davlat foydasiga oʻtganda, basharti auksionda sotish mobaynida uning roʻyxatga olish toʻgʻrisidagi guvohnomasi mavjud boʻlmasa yoki yoʻqotilgan boʻlsa, uning roʻyxatga olinishi auksionda avtomototransport vositasini sotib olganlikni tasdiqlovchi auksion natijalari toʻgʻrisidagi bayonnoma asosida amalga oshiriladi.

Avtomototransport vositasining roʻyxatda turish joyini oʻzgartirishga olib keladigan avtomototransport vositasi egasining yashash (turar) joyi yoki joylashgan joyi (pochta manzili) oʻzgarishi munosabati bilan transport vositasini davlat roʻyxatidan oʻtkazishda, mazkur Nizomning 16-bandi beshinchi xatboshida keltirilgan avtomototransport vositasiga boʻlgan mulk huquqi yoki boshqa ashyoviy huquqlarni tasdiqlovchi hujjatlarni taqdim etish talab etilmaydi.

21. Avtomototransport vositalarini roʻyxatga olish yoki uni roʻyxatga olishni asosli rad etish YHXX va uning hududiy boshqarmalarida murojaat qilgan kunning oʻzida amalga oshiriladi.

22. YHXX va uning hududiy boshqarmalari tomonidan avtomototransport vositasini davlat roʻyxatiga qoʻyish yozma shaklda quyidagi holatlarda rad etilishi mumkin:

a) mazkur Nizomda belgilangan tegishli hujjatlar taqdim etilmaganda;

b) avtomototransport vositasini rul boshqaruvi oʻng tomonda joylashgan holda taqdim etganda;

v) YHXX va uning hududiy boshqarmalarida foydalanuvga yaroqsizligi tufayli hisobdan chiqarilgan avtomototransport vositasini taqdim etganda;

v1) ishlab chiqarilganiga 50 yil va undan ortiq boʻlgan transport vositalari taqdim etilganda (“antikvar” avtomototransport vositalari bundan mustasno);

g) konstruksiyasi yoki konstruksiyasiga kiritilgan oʻzgartirishlar texnik tartibga solish sohasidagi normativ hujjatlar talablariga, shuningdek yoʻl harakati xavfsizligini taʼminlash sohasida belgilangan tartibda normalarga javob bermaydigan holatlarda avtomototransport vositasini taqdim etganda;

d) YHXX tomonidan beriladigan ruxsatsiz mustaqil ravishda ehtiyot qismlar va agregatlardan tayyorlangan va yigʻilgan avtomototransport vositasini taqdim etganda;

e) avtomototransport vositasiga tashkilot — ishlab chiqaruvchilar tomonidan qoʻyilgan identifikatsiya tamgʻasini yashirish, soxtalashtirish, oʻzgartirish, yoʻq qilish alomatlari yoxud taqdim etilgan hujjatlarning soxtalashtirilishi, taqdim etilgan hujjatlarda yoki roʻyxatga doir hujjatlarda koʻrsatib oʻtilgan maʼlumotlarga avtomototransport vositasi va raqam agregatlarining nomuvofiqligi aniqlanganda;

j) avtomototransport vositasining, raqam agregatlarining qidiruvda ekanligi yoki taqdim etilgan hujjatlarning yoʻqolganligi (oʻgʻirlanganligi) toʻgʻrisida maʼlumotlar mavjud boʻlganda;

z) Oʻzbekiston Respublikasi qonunchiligiga muvofiq avtomototransport vositasining tasarruf etilishiga taqiq yoki uning xatlab qoʻyilishi mavjud boʻlganda.

Avtomototransport vositasi egasi yoki uning vakili avtomototransport vositasini davlat roʻyxatidan oʻtkazishga rad etish asoslarini bartaraf etgan taqdirda, avtomototransport vositasini davlat roʻyxatiga qoʻyish toʻgʻrisida ariza bilan qaytadan murojaat qilishga haqli.

23. Avtomototransport vositalari davlat roʻyxatidan oʻtkazilganda uning egalariga hududiy boshqarmalari tomonidan ROʻDRB va avtomototransport vositasini davlat roʻyxatidan oʻtkazganlik toʻgʻrisida guvohnoma besh yil muddatga beriladi. Ilgari berilgan avtomototransport vositasini roʻyxatdan oʻtkazganlik toʻgʻrisidagi guvohnoma va ROʻDRB, shuningdek chet el hujjatlari va roʻyxatdan oʻtish raqamli belgilari olib qoʻyiladi (ular mavjud boʻlganda).

Bunda avtomototransport vositasini roʻyxatdan oʻtkazish toʻgʻrisidagi guvohnomaning 5-bandi (manzili) toʻldirilmaydi, shuningdek 6-bandiga berilgan sanasi hamda amal qilish muddati kiritiladi.

Davlat roʻyxatidan oʻtkazilgan avtomototransport vositalarining ROʻDRB va avtomototransport vositasini davlat roʻyxatidan oʻtkazganlik toʻgʻrisidagi guvohnomalar egalariga ularning shaxsini identifikatsiya qilish (barmoq izlarini skaner qilish va boshqalar) yoʻli bilan topshiriladi va elektron qayd etiladi.

Avtomototransport vositasi egasining yashash (turar) joyi oʻzgarganligi munosabati bilan avtomototransport vositasining davlat roʻyxatini amalga oshirgan YHXX va uning hududiy boshqarmalari mustaqil ravishda ushbu avtomototransport vositasini hisobdan chiqarishni bu haqdagi tegishli maʼlumotni roʻyxatdan oʻtgan avtomototransport vositalarining Yagona maʼlumotlar bazasiga kiritish yoʻli bilan amalga oshiradi.

24. Avtomototransport vositasini davlat roʻyxatidan oʻtkazish mobaynida YHXX va uning hududiy boshqarmalari avtomototransport vositasining roʻyxatdan oʻtkazish elektron kartasini ochadi, unga agregat raqamlari, avtomototransport vositasining boshqa texnik parametrlari, avtomototransport vositasi egasi toʻgʻrisida maʼlumotlar, uning yashash (turar) joyi va boshqa zarur maʼlumotlar kiritiladi.

Transport vositasining roʻyxatdan oʻtkazish elektron kartasiga roʻyxatdan oʻtkazishda quyidagi maʼlumotlar ham kiritiladi:

avtotransport vositasini 18 yoshga toʻlmagan jismoniy shaxs nomiga, mototransport vositasini esa 16 yoshga toʻlmagan shaxs yoki muomalaga layoqatsiz shaxs nomiga roʻyxatdan oʻtkazishda — avtomototransport vositasining egasi qonuniy vakillari: ota onasi, farzandlikka oluvchilar, vasiy va homiylar toʻgʻrisida;

hadya shartnomasida yoki meros guvohnomasida avtomototransport egasi sifatida koʻrsatilgan shaxslardan birining nomiga avtomototransportni roʻyxatdan oʻtkazishda — avtomototransport vositasining boshqa egalari toʻgʻrisidagi maʼlumotlar;

25. Ushbu boʻlim qoidalari transport vositalarini vaqtinchalik roʻyxatga qoʻyish, qayta roʻyxatga olish va boshqa shaxsning ixtiyoriga berish bilan bogʻliq boʻlmagan holatlarda transport vositalari bilan bitimlarni hisobga olish tartibiga, mazkur Nizomning tegishli boʻlimlarida koʻrsatilgan holatlarni hisobga olgan holda, qoʻllaniladi.

3-bob. Avtomototransport vositalarini davlat roʻyxatidan oʻtkazishda roʻyxatdan oʻtkazish davlat raqami belgilarini berish

26. ROʻDRB:

avtotransport vositalarining old va orqa qismlarida mustahkamlash uchun bir juft ROʻDRB;

mototransport vositalari hamda tirkama va yarim tirkamalarning orqa qismiga joylashtirish uchun bir dona ROʻDRB beriladi.

ROʻDRB YAAAT “Davlat raqami belgilari” modulida avtomatik tarzda tasodifiy tanlash orqali beriladi, yagona oshirilgan toʻlov evaziga beriladigan ROʻDRB bundan mustasno;

yagona oshirilgan toʻlov evaziga beriladigan avtomototransport vositalari uchun ROʻDRB jismoniy va yuridik shaxslarning toʻgʻridan-toʻgʻri elektron murojaatiga asosan taqdim etiladi;

yuridik shaxslarga, davlat tashkilotlari va ustav fondida 50 foizdan ortiq davlat ulushi boʻlgan yuridik shaxslardan tashqari — I, IA yoki IE, IAE tipli ROʻDRB;

jismoniy shaxslarga — III, IIIA yoki IIIE, IIIAYE tipli ROʻDRB.

Bunda:

umumiy vazni (yuki bilan) 44 tonnadan ortiq boʻlgan, yuridik shaxslarga tegishli yuk avtomobillariga I, IA yoki IE, IAE tipli, jismoniy shaxslarga tegishli yuk avtomobillariga III, IIIA yoki IIIE, IIIAE tipli “YUK” seriyali ROʻDRB;

konlarda, shaxta va karyerlarda qoʻllaniladigan yuridik shaxslarga tegishli maxsus transport vositalariga I, IA yoki IE, IAE tipli, jismoniy shaxslarga tegishli maxsus transport vositalariga III, IIIA yoki IIIE, IIIAE tipli, “KON” seriyali ROʻDRB;

yuridik shaxslarga tegishli “antikvar” avtomobillarga I, IA yoki IE, IAE tipli, jismoniy shaxslarga tegishli “antikvar” avtomobillarga III, IIIA yoki IIIE, IIIAE tipli, “ANT” seriyali ROʻDRB;

yuridik shaxslarga tegishli yoʻnalishsiz taksilarga I, IA yoki IE, IAE tipli, “TTT” seriyali ROʻDRB beriladi.

Avtotransport vositalarining sonidan kelib chiqqan holda yuqoridagi seriyali ROʻDRBlarining oxirgi harflari oʻrniga boshqa harflar qoʻllanilishi mumkin;

Ilgari foydalanishda boʻlgan barcha toifalardagi roʻyxatdan oʻtkazish davlat raqami belgilari avtomototransport vositasi qayta davlat roʻyxatidan oʻtkazilganda, ushbu transport vositasi egasining xohishiga koʻra hamda yagona oshirilgan toʻlovning 50 foizi miqdorida toʻlov amalga oshirilgan taqdirda uning egasining nomida qoldirilishi yoki qonunchilik hujjatlarida belgilangan tartibda boshqa shaxs nomiga oʻtkazilishi mumkin.

27. Berilgan ROʻDRB, shu jumladan, yagona oshirilgan toʻlov evaziga beriladigan avtomototransport vositalari uchun ROʻDRB transport vositasi egasining mulki hisoblanmasdan, ulardan qatʼiyan maqsadli foydalanilishi uchun unga taqdim etiladi.

28. YHXXning onlayn rejimida uzluksiz ravishda yangilanib turadigan yagona ochiq maʼlumotlar bazasida boʻsh turgan yagona oshirilgan toʻlov evaziga beriladigan avtomototransport vositalari uchun ROʻDRB haqida toʻliq maʼlumot boʻlishi lozim.

29. Avtomototransport vositasini boshqa shaxsga oʻtkazishda oldin berilgan (ilgari foydalanishda boʻlgan) barcha toifalardagi roʻyxatdan oʻtkazish davlat raqami belgilari transport vositasining avvalgi egasining arizasiga koʻra hududiy boshqarmalarga oʻn ikki oy muddatga saqlash uchun topshirilishi mumkin. ROʻDRBni oʻn ikki oy muddatga saqlaganlik uchun toʻlov undirilmaydi.

Ushbu muddat tugagandan soʻng, qoʻshimcha ravishda bir marotaba oʻn ikki oydan oshmagan muddatga bazaviy hisoblash miqdorining bir baravari miqdorida toʻlov toʻlagan holda ROʻDRB saqlash muddatini uzaytirish mumkin.

Saqlash uchun undirilgan toʻlov summasi YHXXning Davlat yoʻl harakati xavfsizligi xizmati moddiy-texnika bazasini rivojlantirish, xodimlarini ragʻbatlantirish va mukofotlash jamgʻarmasiga oʻtkaziladi.

Jismoniy va yuridik shaxslar saqlash uchun topshirilgan ROʻDRBlarning holatini tekshirish uchun mazkur Nizomning 11-bobida belgilangan tartib asosida YHXXning mobil ilovasi, rasmiy veb-sayti yoki YIDXP orqali murojaat etishlari mumkin.

30. Avtomototransport vositasini davlat roʻyxatidan oʻtkazishda oldin berilgan (ilgari foydalanishda boʻlgan) barcha toifalardagi ROʻDRB almashtirishiga olib kelsa, transport vositasining avvalgi egasining xohishiga koʻra ushbu ROʻDRB saqlab qolinadi va yagona oshirilgan toʻlovning 50 foizi miqdorida toʻlov amalga oshirilgan taqdirda takroran beriladi:

a) jismoniy shaxslar uchun — ushbu shaxsga yoxud uning yaqin qarindoshiga (ota-ona, tugʻishgan va oʻgay aka-uka va opa-singillar, er-xotin, farzandlar, shu jumladan farzandlikka olinganlar, bobosi, buvisi, nevaralar, shuningdek er-xotinning ota-onasi, tugʻishgan va oʻgay aka-ukalari va opa-singillariga), shuningdek umumiy mulkka egalik qilish huquqiga ega boʻlgan shaxslarga va merosxoʻrlarga tegishli boʻlgan boshqa avtotransport vositasiga;

b) yuridik shaxslar uchun — roʻyxatdan oʻtkazib berilayotgan boshqa avtotransport vositasiga oʻsha yuridik shaxsga — avtotransport vositasining avvalgi egasi yoki uning huquqiy vorisi (yuridik shaxs nomi qayta oʻzgarganda, birlashganda, qoʻshilganda, boʻlinganda, ajralib chiqqanda yoki qayta tashkil etilganda) yoki yuridik shaxs tomonidan — uning ishtirokchisiga (taʼsischisiga, aʼzosiga) yoxud yuridik shaxsning ishtirokchisi (taʼsischisi, aʼzosi) hisoblangan yuridik shaxsga — avtotransport vositasining avvalgi egasi.

301. Avtomototransport vositasi qayta davlat roʻyxatidan oʻtkazilganda, egasining xohishiga koʻra uning nomida qoldiriladigan yoki qonunchilik hujjatlarida belgilangan tartibda boshqa shaxs nomiga oʻtkaziladigan davlat raqami belgilarini DYHXXda qayta rasmiylashtirib berishdan kelib tushadigan mablagʻlarning:

35 foizi — Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining “Xavfsiz yoʻl va xavfsiz piyoda” respublika jamgʻarmasiga;

15 foizi — Oʻzbekiston Respublikasi Ichki ishlar vazirligining moddiy-texnika bazasini rivojlantirish, xodimlarini moddiy ragʻbatlantirish va boshqa xarajatlar maxsus jamgʻarmasiga;

50 foizi — Davlat budjetiga yoʻnaltiriladi.

31. Oldin berilgan (ilgari foydalanishda boʻlgan) barcha toifadagi ROʻDRB transport vositalarining egalari tomonidan saqlanmaganda, belgilangan tartibda hududiy DYHXX organlari tomonidan olib qoʻyiladi va yoʻq qilinadi. Ushbu ROʻDRBning raqam va harflari kombinatsiyalari YHXXning onlayn rejimida uzluksiz ravishda yangilanib turadigan yagona ochiq maʼlumotlar bazasida boʻsh turgan yagona oshirilgan toʻlov evaziga beriladigan avtomototransport vositalari uchun ROʻDRB sifatida qayd etiladi.

Bunday ROʻDRB keyinchalik yagona oshirilgan toʻlov evaziga beriladigan avtomototransport vositalari uchun ROʻDRBni berish tartibi asosida takroran ishlab chiqarilishi va berilishi mumkin.

Olib qoʻyilgan ROʻDRBlarini yoʻq qilish tartibi Oʻzbekiston Respublikasi Ichki ishlar vazirligi tomonidan belgilanadi.

4-bob. Avtomotransport vositalarini vaqtinchalik roʻyxatdan oʻtkazish

33. Avtomototransport vositalarini vaqtinchalik roʻyxatdan oʻtkazish YHXX va uning hududiy boshqarmalari tomonidan quyidagi holatlarda amalga oshiriladi:

a) Oʻzbekiston Respublikasi hududiga vaqtinchalik olib kirish bojxona rejimiga olib kelingan avtomototransport vositalari davlat bojxona xizmati organlari tomonidan rasmiylashtirilganda;

b) avtomototransport vositasi tajriba namunalari sinovlaridan oʻtkazilganda;

v) avtomototransport vositasining lizing (sublizing) shartnomasiga asosan avtomototransport vositasi lizingga (sublizingga) berilganda;

v1) distribyutor yoki diler tashkiloti tomonidan, shu jumladan, “TRADE-IN” va “TRADE-UP” dasturlari boʻyicha ilgari foydalanishda boʻlgan avtomototransport vositasi sotib olinganda;

g) avtomototransport hujjatlarining qonuniyligiga shubha yoki boshqa aniqlik kiritilishi talab etilayotgan holat paydo boʻlganda;

d) avtomototransport vositasi egasining yashash (turgan) joyi yoki joylashgan joyi (pochta manzili) oʻzgarganda, avtomototransport vositasining vaqtinchalik roʻyxatdan oʻtkazish joyini oʻzgartirish talab etilganda;

e) avtomototransport vositasi bilan egasining yashash (turgan) joyi olti oydan koʻp boʻlgan muddatga vaqtinchalik oʻzgarganda, shuningdek notarius tomonidan tasdiqlangan shartnoma, ishonchnoma boʻyicha vaqtinchalik oʻtkazilishi bilan bogʻliq holda avtomototransport vositasi u roʻyxatdan oʻtgan YHXX va uning hududiy boshqarmalari tashqarisiga chiqib ketganda.

34. Oʻzbekiston Respublikasi hududiga olib kelingan avtomototransport vositasini davlat roʻyxatidan oʻtkazish uchun yoki vaqtinchalik olib kirish bojxona rejimiga rasmiylashtirilgan avtomototransport vositasini vaqtinchalik roʻyxatdan oʻtkazish uchun egasi yoki uning vakili hududiy boshqarmalarga quyidagi hujjatlarni taqdim etgan holda murojaat qiladi:

yuk bojxona deklaratsiyasi;

transport vositasi egasining yoki uning vakilining shaxsini tasdiqlovchi hujjati;

YHXX va uning hududiy boshqarmalarining roʻyxatdan oʻtkazish harakatlarini amalga oshirishdagi xizmatlari uchun toʻlovlarning toʻlanganligi haqidagi bank toʻlov hujjati (yigʻim va toʻlovlardan ozod etilgan shaxslar va elektron toʻlov tizimlar orqali toʻlov amalga oshirilgan hollar bundan mustasno).

Oʻzbekiston Respublikasi hududiga olib kelingan va vaqtinchalik olib kirish bojxona rejimiga rasmiylashtirilgan avtomototransport vositasini vaqtinchalik roʻyxatdan oʻtkazish vaqtinchalik olib kirish ruxsatnomasida koʻrsatilgan muddatga amalga oshiriladi.

35. Avtomototransport vositalarining sinovlardan oʻtkazilayotgan tajriba namunalarini vaqtinchalik roʻyxatdan oʻtkazish hududiy boshqarmalar tomonidan quyidagi hujjatlar asosida amalga oshiriladi:

avtomototransport vositasining tajriba namunasi egasining yoki uning vakilining arizasi;

avtomototransport vositasi egasining yoki uning vakilining shaxsini tasdiqlovchi hujjati;

avtomototransport vositasi tajriba namunasining toʻxtash joyi toʻgʻrisida maʼlumotlar.

Avtomototransport vositalarining tajriba namunalarini vaqtinchalik roʻyxatdan oʻtkazish sinovdan oʻtkazish muddatiga amalga oshiriladi.

Vaqtinchalik roʻyxatdan oʻtkazilgan avtomototransport vositasining tajriba namunasiga vaqtinchalik roʻyxatdan oʻtkazish muddatiga avtomototransport vositasining roʻyxatdan oʻtkazilganligi haqida guvohnoma va “TAJRIBA” tipidagi ROʻDRB beriladi.

36. Lizingga (sublizingga) berilayotgan avtomototransport vositasini vaqtinchalik roʻyxatdan oʻtkazish uchun egasi yoki uning vakili YHXX va uning hududiy boshqarmalariga quyidagi hujjatlarni taqdim etadi:

avtomototransport vositasining egasi yoki uning vakilining belgilangan namunadagi arizasi;

avtomototransport vositasi egasining yoki uning vakilining shaxsini tasdiqlovchi hujjati;

avtomototransport vositasini roʻyxatdan oʻtkazish toʻgʻrisidagi guvohnomasi yoki distribyutor yoki diler tashkiloti tomonidan beriladigan elektron hisob-maʼlumotnoma;

avtomototransport vositasining lizing yoki sublizing shartnomasi (qonunchilikda belgilangan holatlarda — notarius tomonidan tasdiqlanganligi);

YHXX va uning hududiy boshqarmalarining roʻyxatdan oʻtkazish harakatlarini amalga oshirishdagi xizmatlari uchun belgilangan miqdordagi toʻlovlarning toʻlanganligi haqida bank toʻlov hujjati (toʻlovlarni toʻlashdan ozod etilgan shaxslar bundan mustasno).

361. Distribyutor yoki diler tashkiloti tomonidan ilgari foydalanishda boʻlgan avtomototransport vositasi sotib olinganda, shu jumladan, “TRADE-IN” va “TRADE-UP” dasturlari boʻyicha vaqtincha roʻyxatdan oʻtkazish uchun distribyutor yoki diler tashkiloti vakili hududiy DYHXX organlariga quyidagi hujjatlarni taqdim etadi:

distribyutor yoki diler tashkilotining arizasi;

distribyutor yoki diler tashkiloti vakilining shaxsini tasdiqlovchi hujjat;

oʻrnatilgan tartibda rasmiylashtirilgan distribyutor yoki diler tashkiloti vakilining ishonchnomasi;

distribyutor yoki diler tashkiloti bilan avtomototransport vositasining egasi oʻrtasida tuzilgan oldi-sotdi shartnomasi;

avtomototransport vositasining ROʻDRB va roʻyxatdan oʻtkazilganligi haqidagi guvohnomasi.

Distribyutor yoki diler tashkiloti tomonidan sotib olingan ilgari foydalanishda boʻlgan avtomototransport vositasini, shu jumladan, “TRADE-IN” va “TRADE-UP” dasturlari boʻyicha distribyutor va diler tashkiloti tomonidan DYHXX organlarida vaqtincha roʻyxatdan oʻtkazishda maʼlumotnoma beriladi (vaqtincha roʻyxatdan oʻtkazilgan avtomototransport vositasiga ROʻDRB va roʻyxatdan oʻtkazilganligi haqidagi guvohnoma berilmaydi).

Mazkur maʼlumotnoma avtomototransport vositasini boshqarish huquqini bermaydi (distribyutor yoki diler tashkilotining joylashgan manziliga yoki avtomototransport vositasini saqlash joyiga yetib olish bundan mustasno).

Distribyutor va diler tashkilotlari tomonidan ilgari foydalanishda boʻlgan avtomototransport vositalarini sotib olganlik uchun, shu jumladan, “TRADE-IN” va “TRADE-UP” dasturlari boʻyicha ularni DYHXX organlarida vaqtincha roʻyxatdan oʻtkazish vaqtida yigʻim toʻlanmaydi.

37. Bir shaxs tomonidan boshqa shaxsga lizing yoki sublizing shartnomasi doirasida vaqtinchalik egalik qilish va foydalanishga berish uchun olingan avtomototransport vositasini vaqtinchalik roʻyxatdan oʻtkazish, tuzilgan avtomototransport vositasining lizing (sublizing) shartnomasi talablaridan kelib chiqib, lizing beruvchi yoki lizing oluvchi nomiga lizing (sublizing) shartnomasida koʻrsatilgan muddatga amalga oshiriladi. Agar lizing shartnomasida lizing oluvchi nomiga avtomototransport vositasini vaqtinchalik roʻyxatdan oʻtkazish haqida bir xildagi qoidalari mavjud boʻlmasa, unda avtomototransport vositasi lizing beruvchi nomiga roʻyxatdan oʻtkaziladi.

Avtomototransport vositasini lizing beruvchiga vaqtinchalik roʻyxatdan oʻtkazish lizing beruvchining yashash (turgan) joyi boʻyicha, lizing oluvchiga esa — lizing oluvchining yashash (turgan) joyi boʻyicha amalga oshiriladi.

38. Lizingga (sublizingga) berilayotgan avtomototransport vositasini vaqtinchalik roʻyxatdan oʻtkazish lizing (sublizing) shartnomasida koʻrsatilgan muddatga avtomototransport vositasini roʻyxatdan oʻtkazish toʻgʻrisidagi guvohnoma berilishi bilan amalga oshiriladi.

39. Lizingga (sublizingga) berilayotgan vaqtinchalik roʻyxatdan oʻtkazilgan transport vositasining roʻyxatdan oʻtkazish elektron kartasiga avtomototransport vositasini vaqtinchalik roʻyxatdan oʻtkazish muddatining tugashi, lizing (sublizing) shartnomasining raqami va sanasini koʻrsatgan holda “Lizing, “___” ________ 20___yildagi “___ -son lizing (sublizing) shartnomasiga asosan vaqtinchalik roʻyxatdan oʻtkazish ____________ gacha” degan yozuv kiritiladi.

40. Lizing oluvchiga avtomototransport vositasi mulk huquqi asosida oʻtishini nazarda tutuvchi lizing (sublizing) shartnomasining amal qilish muddati tugashi bilan avtomototransport vositasi lizing (sublizing) shartnomasi va lizing beruvchining avtomototransport vositasiga boʻlgan mulk huquqining lizing oluvchiga oʻtganligi haqidagi tasdiqlovchi xati asosida lizing oluvchining nomiga davlat roʻyxatidan oʻtkaziladi.

Lizing oluvchiga avtomototransport vositasiga boʻlgan mulk huquqining oʻtishi nazarda tutilmagan lizing shartnomasining amal qilish muddati tugashi bilan lizing oluvchiga avtomototransport vositasi faqat notarius tomonidan tasdiqlangan avtomototransport vositasini boshqa shaxsga oʻtkazish shartnomasi (oldi-sotdi, ayirboshlash, hadya, renta va boshqalar) asosida roʻyxatdan oʻtkazilishi mumkin.

41. Lizing oluvchi nomiga roʻyxatdan oʻtkazilgan avtomototransport vositasining lizing beruvchiga qaytarib berilishini nazarda tutuvchi lizing shartnomasini bekor qilgan holda, koʻrsatilgan avtomototransport vositasi lizing shartnomasining bekor qilinganligi haqida hujjat yoki avtomototransport vositasini lizing beruvchiga qaytarilishini nazarda tutuvchi sud yoki boshqa organlar ijro hujjatining nusxasi ilova qilingan holda lizing beruvchining arizasiga asosan lizing beruvchi nomiga roʻyxatdan oʻtkaziladi.

42. Davlat roʻyxatidan (vaqtinchalik roʻyxatdan) oʻtkazish uchun taqdim etilgan avtomototransport vositalarining hujjatlari YHXX va uning hududiy boshqarmalarida ularning asli ekanligiga yoki ulardagi maʼlumotlarning haqiqiyligiga shubha tugʻdirsa yoxud boshqa aniqlik kiritilishi lozim boʻlgan holatlar mavjud boʻlsa, lekin shu bilan birga mazkur Nizomning 22-bandida koʻrsatilgan avtomototransport vositasini davlat roʻyxatidan oʻtkazishga rad qilish uchun asoslar mavjud boʻlmasa, olti oydan oshmagan muddatga vaqtinchalik roʻyxatga olinadi.

Koʻrsatilgan avtomototransport vositalarini vaqtinchalik roʻyxatdan oʻtkazish mazkur Nizomning 16, 34 yoki 36-bandlariga muvofiq taqdim etilgan hujjatlar asosida amalga oshiriladi.

Vaqtinchalik roʻyxatdan oʻtkazish muddati davomida YHXX va uning hududiy boshqarmalari boshqa vakolatli organlar bilan oʻzaro hamkorlikda taqdim qilingan hujjatlarni tekshirish boʻyicha tegishli tadbirlarni amalga oshiradi. Shubhalar tasdiqlanganda va roʻyxatdan oʻtkazish uchun asoslar paydo boʻlganda YHXX va uning hududiy boshqarmalari avvalgi egasiga avtomototransport vositasining roʻyxatdan oʻtkazilganligini tiklab berib, avtomototransport vositasining roʻyxatdan oʻtganligini bekor qiladi yoxud qonunchilikda belgilangan boshqa choralarni koʻradi. YHXX va uning hududiy boshqarmalarining shubhalari tasdiqlanmaganda yoki avtomototransport vositasining vaqtinchalik roʻyxatdan oʻtkazish muddati tugaganda, u avtomototransport vositasi egasining YHXX va uning hududiy boshqarmalari tomonidan roʻyxatdan oʻtkazishdagi harakatlari uchun undiriladigan toʻlovisiz umumiy asoslarga koʻra roʻyxatdan oʻtkaziladi.

43. Avtomototransport vositasining vaqtinchalik roʻyxatdan oʻtkazish joyi oʻzgartirilishi talab etilayotgan avtomototransport vositasi egasining yashash (turgan) joyi yoki joylashgan joyi (pochta manzili) oʻzgarganda, avtomototransport vositasini vaqtinchalik roʻyxatdan oʻtkazish uchun egasi yoki uning vakili hududiy boshqarmalarga quyidagi hujjatlarni taqdim etgan holda murojaat qiladi:

avtomototransport vositasi egasining yoki uning vakilining shaxsini tasdiqlovchi hujjati;

avtomototransport vositasi egasining yashash (turgan) joyi yoki joylashgan joyi (pochta manzili) oʻzgarganligini tasdiqlovchi hujjatlar (yashash boʻyicha roʻyxatdan oʻtganligi toʻgʻrisida belgisi bilan pasport yoki identifikatsiyalovchi ID-karta, yuridik shaxsning davlat roʻyxatidan oʻtkazilganligi toʻgʻrisidagi guvohnoma va boshqalar);

YHXX va uning hududiy boshqarmalarining roʻyxatdan oʻtkazish harakatlarini amalga oshirishdagi xizmatlari uchun belgilangan miqdordagi toʻlovlarning toʻlanganligi haqida bank toʻlov hujjati (toʻlovlarni toʻlashdan ozod etilgan shaxslar va elektron toʻlov tizimlar orqali toʻlov amalga oshirilgan hollar bundan mustasno).

Ushbu asos boʻyicha avtomototransport vositasini vaqtinchalik roʻyxatdan oʻtkazish, tegishli asoslarning mavjud holatlaridan tashqari, oldingi vaqtinchalik roʻyxatdan oʻtkazish muddatini oʻzgartirmagan holda amalga oshiriladi.

44. Avtomototransport vositasi bilan egasining yashash (turgan) joyi olti oydan koʻp boʻlgan muddatga vaqtinchalik oʻzgarganda, shuningdek avtomototransport vositasi u roʻyxatdan oʻtgan hududiy boshqarmalardan tashqarisiga vaqtincha chiqib ketganda, avtomototransport vositasi quyidagi hujjatlarni taqdim etgan holda vaqtinchalik roʻyxatdan oʻtkaziladi:

avtomototransport vositasining egasi yoki uning vakilining belgilangan namunadagi arizasi;

avtomototransport vositasi egasining yoki uning vakilining shaxsini tasdiqlovchi hujjati;

avtomototransport vositasi egasining yashash (turgan) joyi vaqtinchalik oʻzgarganligi holatlarini tasdiqlovchi hujjatlar (pasport (yashash joyi boʻyicha roʻyxatdan oʻtganligi toʻgʻrisida maʼlumoti bilan) yoki identifikatsiyalovchi ID-karta, xizmat safari toʻgʻrisidagi guvohnoma va boshqalar).

5-bob. Boshqa shaxslarga oʻtkazish bilan bogʻliq boʻlmagan avtomototransport vositalari bilan kelishuvlarni hisobga qoʻyish

45. Notariuslar, shuningdek, qonunchilikda nazarda tutilgan holatlarda esa konsullar tomonidan ham tasdiqlangan avtomototransport vositalaridan foydalanish va (yoki) tasarruf etish ishonchnomalari, ijara, tekinga foydalanish va avtomototransport vositalarini garovga qoʻyish shartnomalari, avtomototransport vositasining roʻyxatdan oʻtish joyi boʻyicha tegishli hududiy boshqarmalarda avtomototransport vositalarini roʻyxatdan oʻtkazmasdan hisobga qoʻyiladi.

Avtomototransport vositalarini begonalashtirish bilan bogʻliq boʻlmagan bitishuvlarni hisobga olish yuridik shaxslar tomonidan oʻz xodimlariga berilgan avtomototransport vositalaridan foydalanish va (yoki) ularni tasarruf etish huquqiga ishonchnomalarga hamda yengil avtomobillarni va mototransport vositalarini ijaraga berish boʻyicha xizmatlar koʻrsatuvchi yuridik shaxslar hamda jismoniy shaxslar oʻrtasida yengil avtomobillarni va mototransport vositalarini, shuningdek karshering tashkilotlarining yoʻlovchilar avtotransporti va mototransport vositalarini jismoniy va yuridik shaxslarga oʻttiz kungacha muddatga qisqa muddatli ijaraga berish yuzasidan oddiy yozma shaklda tuziladigan ijara shartnomalariga nisbatan qoʻllanilmaydi.

46. Mazkur Nizomning 45-bandida koʻrsatilgan hujjatlarni hisobga qoʻyish uchun notarius va konsullar tomonidan ularning elektron shakllari hududiy boshqarmalariga yuboriladi yoki YHXXning avtomototransport vositalarini hisobga qoʻyishni roʻyxatdan oʻtkazish YAAATga kiritiladi.

2018-yil 1-yanvariga qadar koʻrsatilgan hujjatlarni hisobga qoʻyish uchun hududiy boshqarmalarga:

avtomototransport vositasi egasining yoki uning vakilining shaxsini tasdiqlovchi hujjati;

avtomototransport vositasini roʻyxatdan oʻtkazish toʻgʻrisidagi guvohnoma;

notarius tomonidan tasdiqlangan hisobga qoʻyiladigan hujjatning ikkita nusxasi (ishonchnoma bittadan ortiq ishonchli shaxsga berilgan taqdirda, YHXX va uning hududiy boshqarmalariga ishonchli shaxslar soni boʻyicha ishonchnomalar nusxalari, shuningdek YHXX va uning hududiy boshqarmalariga bitta nusxasi beriladi).

47. Mazkur Nizomning 45-bandida nazarda tutilgan hujjatlarni hisobga qoʻyish hisobga qoʻyiladigan hujjatlar haqidagi maʼlumotlarni avtomototransport vositasining roʻyxatdan oʻtkazish kartasiga kiritish yoʻli bilan amalga oshiriladi, unga hujjatning elektron shakli ilova qilinadi.

48. Mazkur Nizomning 45-bandida koʻrsatilgan hujjatlarni roʻyxatga qoʻyish yuk tashuvchi avtotransport vositalari, avtobuslar va mikroavtobuslarga nisbatan mudofaa ishlari boʻyicha boʻlimni xabardor qilmasdan YHXX va uning hududiy boshqarmalari tomonidan, koʻtarish mexanizmlari bilan jihozlangan avtotransport vositalariga (avtokran) nisbatan esa Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi tomonidan amalga oshiriladi.

49. Mazkur Nizomning 45-bandida koʻrsatilgan hujjatlarni hisobga qoʻyish Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasiga yigʻimlarni va hududiy boshqarmalarining roʻyxatdan oʻtkazish harakatlarini amalga oshirishdagi xizmatlari uchun yigʻimlarni undirmasdan amalga oshiriladi.

6-bob. Avtomototransport vositalarini qayta roʻyxatdan oʻtkazish

50. Avtomototransport vositalarini qayta roʻyxatdan oʻtkazish quyidagi holatlarda amalga oshiriladi:

a) mulkdor — jismoniy shaxsning familiyasi, ismi, otasining ismi oʻzgarganda, shuningdek mulkdor — yuridik shaxs qayta tashkil etilganda yoki nomlanishi oʻzgarganda;

b) avtomototransport vositasining roʻyxatdan oʻtkazish joyini oʻzgartirishni talab qilmagan holatda avtomototransport vositasi egasining yashash (turgan) joyi yoki joylashgan joyi (pochta manzili) oʻzgarganda;

v) yuridik shaxslarga tegishli yuk avtotransport vositalarining, avtobus va mikroavtobuslarining saqlab turiladigan joyi oʻzgarganda;

g) avtomototransport vositalarining rangi va (yoki) raqam agregati oʻzgarganda;

d) avtomototransport vositasi qayta jihozlanganda;

e) avtomototransport vositasini yoki ROʻDRBni roʻyxatdan oʻtkazish guvohnomasi yaroqsiz holga kelganda, shikastlanganda yoki yoʻqolganda.

51. Mulkdor — jismoniy shaxsning familiyasi, ismi, otasining ismi oʻzgarganda, shuningdek, mulkdor — yuridik shaxs qayta tashkil etilganda yoki nomlanishi oʻzgarganda, avtomototransport vositasini qayta roʻyxatdan oʻtkazish uchun mulkdor yoki uning vakili YHXX va uning hududiy boshqarmalariga quyidagi hujjatlarni taqdim etadi:

avtomototransport vositasi egasi yoki uning vakilining belgilangan namunadagi arizasi;

avtomototransport vositasi egasi yoki uning vakilining shaxsini tasdiqlovchi hujjat.

Quyidagi maʼlumotlar “Raqamli hukumat” tizimining idoralararo integratsiyalashuv platformasi orqali aniqlanadi:

mulkdor — jismoniy shaxsning familiyasi, ismi, otasining ismi, shuningdek, mulkdor — yuridik shaxsning qayta tashkil etilishi yoki nomlanishi oʻzgarganligi;

roʻyxat harakatlarini amalga oshirish mobaynidagi YHXX va uning hududiy boshqarmalarining xizmatlari uchun belgilangan miqdordagi toʻlovlarni toʻlaganligi.

Yuridik shaxsning nomi yoki tashkiliy-huquqiy shakli, jismoniy shaxsning, shuningdek, jismoniy shaxs boʻlgan tadbirkorlik subyektining familiyasi, ismi, otasining ismi oʻzgarganligi sababli qayta roʻyxatdan oʻtkazishda, avtomototransport vositasi egasi yoki uning vakilining xohishiga koʻra avtomototransport vositasini qayta roʻyxatdan oʻtkazish boʻyicha arizalar kompozit tarzda yuborilishi mumkin.

Bunda qayta roʻyxatdan oʻtkazish uchun zarur boʻlgan maʼlumotlar mazkur bandning toʻrtinchi xatboshisida belgilangan tartibda aniqlanadi.

Mulkdor — jismoniy shaxsning familiyasi, ismi, otasining ismi oʻzgarganda, shuningdek mulkdor — yuridik shaxs qayta tashkil etilganda yoki nomlanishi oʻzgarganda avtomototransport vositasining roʻyxatga olish kartasiga tegishli oʻzgartirishlar kiritiladi, ilgari berilgan avtomototransport vositasini roʻyxatdan oʻtkazish toʻgʻrisidagi guvohnoma esa avtomototransport vositasi egasi haqida yangi maʼlumotlarni koʻrsatgan holda almashtiriladi.

52. Avtomototransport vositasi egasining roʻyxatdan oʻtgan joyini oʻzgartirishni talab etmaydigan avtomototransport vositasi egasining yashash (turgan) joyi yoki joylashgan joyi (pochta manzili) oʻzgarganda avtomototransport vositasini qayta roʻyxatdan oʻtkazish uchun mulkdor yoki uning vakili YHXX va uning hududiy boshqarmalariga quyidagi hujjatlarni taqdim etadi:

avtomototransport vositasi egasi yoki uning vakilining belgilangan namunadagi arizasi;

avtomototransport vositasi egasi yoki uning vakilining shaxsini tasdiqlovchi hujjat;

avtomototransport vositasi egasining yashash (turgan) joyi yoki joylashgan joyi (pochta manzili) oʻzgarganligini tasdiqlovchi hujjat (yashash joyi boʻyicha propiska toʻgʻrisidagi belgi bilan pasport, yuridik shaxsning davlat roʻyxatidan oʻtkazilganligi toʻgʻrisidagi guvohnoma va boshqalar);

roʻyxatdan oʻtkazish harakatlarini amalga oshirish mobaynidagi YHXX va uning hududiy boshqarmalari tomonidan undiriladigan belgilangan miqdordagi toʻlovlarni toʻlaganlikni tasdiqlovchi bank toʻlov hujjati (toʻlovlardan ozod etilgan shaxslardan tashqari).

Avtomototransport vositasi egasining roʻyxatdan oʻtgan joyini oʻzgartirishni talab etmaydigan avtomototransport vositasi egasining yashash (turgan) joyi yoki joylashgan joyi (pochta manzili) oʻzgarganda, avtomototransport vositasining roʻyxatga olish elektron kartasiga tegishli oʻzgartirishlar kiritiladi, ilgari berilgan avtomototransport vositasini roʻyxatdan oʻtkazish toʻgʻrisidagi guvohnoma esa avtomototransport vositasi egasining yangi yashash (turgan) joyi yoki joylashgan joyini (pochta manzilini) koʻrsatgan holda almashtiriladi.

53. Yuridik shaxslarga tegishli yuk avtotransport vositalarining, avtobus va mikroavtobuslarning saqlab turiladigan joyi oʻzgarganda avtotransport vositasini qayta roʻyxatdan oʻtkazish uchun mulkdor yoki uning vakili YHXX va uning hududiy boshqarmalariga quyidagi hujjatlarni taqdim etadi:

avtotransport vositasi egasi yoki uning vakilining belgilangan namunadagi arizasi;

avtomototransport vositasi egasi yoki uning vakilining shaxsini tasdiqlovchi hujjat;

roʻyxatdan oʻtkazish harakatlarini amalga oshirish mobaynidagi YHXX va uning hududiy boshqarmalari tomonidan undiriladigan belgilangan miqdordagi toʻlovlarni toʻlaganlikni tasdiqlovchi bank toʻlov hujjati (toʻlovlardan ozod etilgan shaxslardan tashqari).

54. Avtomototransport vositalarining rangi va (yoki) nomer agregati oʻzgarganda, avtotransport vositasini qayta roʻyxatdan oʻtkazish uchun mulkdor yoki uning vakili YHXX va uning hududiy boshqarmalariga quyidagi hujjatlarni taqdim etgan holda murojaat qiladi:

avtotransport vositasi egasi yoki uning vakilining shaxsini tasdiqlovchi hujjat;

raqam agregatlarining qonuniy olinganligini tasdiqlovchi hujjat (elektron hisob-maʼlumotnoma, bojxona yuk deklaratsiyasi, bitta yuridik shaxsga tegishli boʻlgan avtotransport vositalari uchun yuk xati (elektron koʻrinishdagi notarius tomonidan tasdiqlangan oldi-sotdi shartnomasi “Notarius” tizimidan olinadi);

avtotransport vositalarini taʼmirlash va texnik xizmat koʻrsatish boʻyicha maxsus korxonada raqam agregatlarining almashtirilganligini va (yoki) rangining oʻzgartirilganligini (rang oʻzgartirilganda) tasdiqlovchi hujjat;

Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasining gaz ballonlarini sinovdan oʻtkazish huquqini beruvchi ruxsatnomasi mavjud boʻlgan tashkilot tomonidan transport vositalariga oʻrnatilgan gaz ballonlari sinovdan oʻtkazilganligi toʻgʻrisidagi dalolatnoma (gaz ballon oʻrnatilmagan transport vositalari mustasno);

roʻyxatdan oʻtkazish harakatlarini amalga oshirish mobaynidagi YHXX va uning hududiy boshqarmalari tomonidan undiriladigan belgilangan miqdordagi toʻlovlar toʻlaganligini tasdiqlovchi bank toʻlov hujjati (toʻlovlardan ozod etilgan shaxslar va elektron toʻlov tizimlar orqali toʻlov amalga oshirilgan hollar bundan mustasno).

Transport vositasining rangi va (yoki) raqam agregati oʻzgarganda, avtomototransport vositasining roʻyxatga olish elektron kartasiga tegishli oʻzgartirishlar kiritiladi, ilgari berilgan avtomototransport vositasini roʻyxatdan oʻtkazish toʻgʻrisidagi guvohnoma esa transport vositasining yangi rangi va (yoki) raqam agregatini koʻrsatgan holda almashtiriladi.

55. Avtotransport vositasi qayta jihozlaganda uni qayta roʻyxatdan oʻtkazish quyidagi hujjatlar asosida amalga oshiriladi:

avtotransport vositasi egasi yoki uning vakilining shaxsini tasdiqlovchi hujjat;

raqamli agregatlar (elektron hisob-maʼlumotnoma, bojxona yuk deklaratsiyasi, bitta yuridik shaxsga tegishli boʻlgan avtotransport vositalari uchun yuk xati (elektron koʻrinishdagi notarius tomonidan tasdiqlangan oldi-sotdi shartnomasi “Notarius” tizimidan olinadi) va avtotransport vositasi qayta jihozlanganda ishlatilgan boshqa detallarning olinganligining qonuniyligini tasdiqlovchi hujjatlar;

YHXDX tomonidan berilgan avtotransport vositalarini qayta jihozlashga ruxsati boʻlgan avtotransport vositalarini taʼmirlash va texnik xizmat koʻrsatish boʻyicha maxsus korxonada qayta jihozlashni amalga oshirganlikni tasdiqlovchi hujjat;

ushbu avtotransport vositasida qayta jihozlashni amalga oshirish uchun DYHXX tomonidan berilgan ruxsatnomaning nusxasi (tegishli tasdiqnomaga ega boʻlgan avtotransport vositasini taʼmirlash va unga texnik xizmat koʻrsatish boʻyicha ixtisoslashtirilgan korxonalarda avtotransport vositasi qayta jihozlangan holatlar bundan mustasno);

roʻyxatdan oʻtkazish harakatlarini amalga oshirish mobaynidagi YHXX va uning hududiy boshqarmalari tomonidan undiriladigan belgilangan miqdordagi toʻlovlarni toʻlaganlikni tasdiqlovchi bank toʻlov hujjati (toʻlovlardan ozod etilgan shaxslar va elektron toʻlov tizimlar orqali toʻlov amalga oshirilgan hollar bundan mustasno).

Avtotransport vositasi qayta jihozlanganda, jumladan, gaz ballon uskunalari oʻrnatilganda, avtomototransport vositasining roʻyxatga olish elektron kartasiga tegishli oʻzgartirishlar kiritiladi, avtomototransport vositasini roʻyxatdan oʻtkazish toʻgʻrisida ilgari berilgan guvohnoma esa transport vositasining yangi raqam agregati koʻrsatilgan, shuningdek, gaz ballon uskunalari oʻrnatilganligi toʻgʻrisidagi belgi qoʻyilgan holda yangisiga almashtiriladi. Bunda, avtotransport vositasiga gaz ballon uskunalari oʻrnatilganligi toʻgʻrisidagi dalolatnoma va gaz ballonlarining muvofiqlik sertifikatlari nusxalari taqdim etiladi.

56. Avtomototransport vositasini roʻyxatdan oʻtkazish guvohnomasi yaroqsiz holga kelganda, shikastlanganda yoki oʻgʻirlanganda va (yoki) ROʻDRB, yagona oshirilgan toʻlov evaziga beriladigan avtomototransport vositalari uchun ROʻDRB yaroqsiz holga kelganda, shikastlanganda yoki oʻgʻirlanganda, avtotransport vositasi quyidagi hujjatlar asosida qayta roʻyxatdan oʻtkaziladi:

avtomototransport vositasi egasi yoki uning vakilining shaxsini tasdiqlovchi hujjat;

avtomototransport vositasini roʻyxatdan oʻtkazish toʻgʻrisidagi guvohnoma yaroqsiz holga kelganda (u yaroqsiz holga kelganda);

shikastlangan ROʻDRB, yagona oshirilgan toʻlov evaziga beriladigan avtomototransport vositalari uchun ROʻDRB (ular shikastlanganda);

ichki ishlar organlarining avtomototransport vositalarini roʻyxatdan oʻtkazish toʻgʻrisidagi guvohnomaning va (yoki) ROʻDRB, yagona oshirilgan toʻlov evaziga beriladigan avtomototransport vositalari uchun ROʻDRB oʻgʻirlanganligi (yoʻqotilganligi) toʻgʻrisidagi maʼlumotnomasi;

roʻyxatdan oʻtkazish harakatlarini amalga oshirish mobaynidagi YHXX va uning hududiy boshqarmalari tomonidan undiriladigan belgilangan miqdordagi toʻlovlar toʻlaganligini tasdiqlovchi bank toʻlov hujjati (toʻlovlardan ozod etilgan shaxslardan tashqari).

Avtomototransport vositasini roʻyxatdan oʻtkazish guvohnomasi yaroqsiz holga kelganda, shikastlanganda, yoʻqotilganda yoki oʻgʻirlanganda avtomototransport vositasini roʻyxatdan oʻtkazish elektron kartasi maʼlumotlari asosida hududiy boshqarmalari avtomototransport vositasini roʻyxatdan oʻtkazish guvohnomasining dublikatini beradilar.

Oʻzbekiston Respublikasi fuqarosi respublika hududidan tashqarida egaligida boʻlgan avtomototransport vositasi roʻyxatdan oʻtkazilganligi toʻgʻrisidagi guvohnomasini yoʻqotib yoki oʻgʻirlatib qoʻyganda, avtomototransport vositasini roʻyxatdan oʻtkazish elektron kartasi maʼlumotlari asosida avtomototransport vositasini roʻyxatdan oʻtkazish guvohnomasining dublikati belgilangan toʻlovlar asosida bir oygacha boʻlgan muddatga beriladi. Avtomototransport vositasi respublika hududiga qaytib kelgandan soʻng belgilangan tartibda texnik koʻrikdan oʻtkazilib, tegishli toʻlovlarga asosan doimiy roʻyxatdan oʻtkazilganligi toʻgʻrisidagi guvohnoma almashtirib beriladi.

ROʻDRB, yagona oshirilgan toʻlov evaziga beriladigan avtomototransport vositalari uchun ROʻDRB shikastlanganda avtotransport vositasining roʻyxatdan oʻtkazish maʼlumotlari asosida hududiy boshqarmalari ularning dublikatini beradi. ROʻDRB, yagona oshirilgan toʻlov evaziga beriladigan avtomototransport vositalari uchun ROʻDRBlarning dublikati hududiy boshqarmalar talabnomasiga asosan tayyorlanadi.

Jismoniy va yuridik shaxslar shikastlangan ROʻDRBning dublikatlarini olish uchun mazkur Nizomning 11-bobida belgilangan tartib asosida YHXXning mobil ilovasi, rasmiy veb-sayti yoki YIDXP orqali murojaat etishlari mumkin.

ROʻDRB, yagona oshirilgan toʻlov evaziga beriladigan avtomototransport vositalari uchun ROʻDRB yoʻqolganda yoki oʻgʻirlanganda, avtotransport vositasining roʻyxatdan oʻtkazish maʼlumotlari asosida hududiy boshqarmalar yangi ROʻDRB berilishini taʼminlaydi.

ROʻDRB, yagona oshirilgan toʻlov evaziga beriladigan avtomototransport vositalari uchun ROʻDRB dublikatlari yoʻqolgan yoki oʻgʻirlanganlarining oʻrniga berilishiga yoʻl qoʻyilmaydi.

Yagona oshirilgan toʻlov evaziga beriladigan avtomototransport vositalari uchun ROʻDRB topilganda, hududiy boshqarmalari topilgan va yagona oshirilgan toʻlov evaziga beriladigan avtomototransport vositalari uchun ROʻDRB avtotransport vositasi egasining arizasiga asosan belgilangan tartibda berilishini taʼminlaydi.

Amalga oshirilgan roʻyxatga olish toʻgʻrisidagi maʼlumotlar (avtomototransport vositasini roʻyxatga olish toʻgʻrisidagi guvohnomaning dublikatini, dublikat yoki yangi ROʻDRBni berish) avtomototransport vositasining roʻyxatga olish elektron kartasiga kiritiladi, avtomototransport vositasini roʻyxatga olish toʻgʻrisidagi guvohnoma, (yoki) ROʻDRB, yagona oshirilgan toʻlov evaziga beriladigan avtomototransport vositalari uchun ROʻDRB toʻgʻrisidagi maʼlumotlar yoʻqolgan yoki oʻgʻirlangan taqdirda ham Oʻzbekiston Respublikasi Ichki ishlar vazirligining Axborot markaziga yuboriladi.

7-bob. Avtomototransport vositalarini hisobdan chiqarish

57. Avtomototransport vositasi quyidagi holatlarda YHXX va uning hududiy boshqarmalarining hisobidan chiqariladi:

rasmiylashtirilgan yuk bojxona deklaratsiyasiga asosan Oʻzbekiston Respublikasi hududidan avtomototransport vositasi tovar sifatida chetga chiqarilganda;

avtomototransport vositasining roʻyxatdan oʻtkazish joyini oʻzgartirishni talab qilmaydigan holatda avtomototransport vositasi egasining yashash (turgan) joyi yoki joylashgan joyi (pochta manzili) oʻzgarganda;

avtomototransport vositasi yaroqsiz deb hisoblanganda, shu jumladan, ishlab chiqarilganiga 50 yil va undan ortiq boʻlgan transport vositalari (“antikvar” avtomototransport vositalari bundan mustasno).

58. Rasmiylashtirilgan yuk bojxona deklaratsiyasiga asosan Oʻzbekiston Respublikasi hududidan avtomototransport vositasi tovar sifatida chetga chiqarilganda avtomototransport vositasini hisobdan chiqarish quyidagi hujjatlarga asosan amalga oshiriladi;

avtomototransport vositasi egasi yoki uning vakilining belgilangan namunadagi arizasi;

avtomototransport vositasi egasi yoki uning vakilining shaxsini tasdiqlovchi hujjat;

rasmiylashtirilgan yuk bojxona deklaratsiyasi;

avtomototransport vositasini roʻyxatdan oʻtkazish toʻgʻrisida guvohnoma.

Avtomototransport vositasi uning chet davlat hududiga chiqarilganligi munosabati bilan hisobdan chiqarilganda, oldingi ROʻDRB DYHXX organlari tomonidan vaqtinchalik (bir martalik qogʻozli tranzit) yoʻl harakatida ishtirok etish uchun ruxsat etilgan avtomototransport vositalari uchun ROʻDRBga almashtiriladi, avtomototransport vositasini roʻyxatdan oʻtkazish toʻgʻrisidagi guvohnoma bilan birga hisobdan chiqarishning sabablari, belgilangan manzil va hisobdan chiqarish sanasi toʻgʻrisidagi maʼlumotnoma taqdim etiladi.

Oʻzbekiston Respublikasiga vaqtinchalik olib kelingan xalqaro avtotransport vositalarini ularning Oʻzbekiston Respublikasi hududidan chiqarib ketilishi munosabati bilan hisobdan chiqarganda arizachilarga avtomototransport vositasini hisobdan chiqarganlik toʻgʻrisidagi belgi bilan avtomototransport vositasini roʻyxatdan oʻtkazish toʻgʻrisidagi guvohnoma beriladi, shuningdek chet davlatlarning roʻyxatdan oʻtgan avtomototransport vositalarining ROʻDRBlari qaytarib beriladi, ular mavjud boʻlmaganda — vaqtinchalik (bir martalik qogʻozli tranzit) yoʻl harakatida ishtirok etish uchun ruxsat etilgan avtomototransport vositalari uchun ROʻDRBlar beriladi.

59. Avtomototransport vositasining roʻyxatdan oʻtkazish joyini oʻzgartirishni talab qilmaydigan holatda avtomototransport vositasi egasining yashash (turgan) joyi yoki joylashgan joyi (pochta manzili) oʻzgarganda avtomototransport vositasini hisobdan chiqarish YHXX va uning hududiy boshqarmalari tomonidan avtotransport vositasining roʻyxatdan oʻtgan yangi joyi boʻyicha Roʻyxatdan oʻtgan avtomototransport vositalarining yagona maʼlumotlar bazasiga tegishli maʼlumotlarni kiritgan holda amalga oshiriladi.

60. Yaroqsiz avtomototransport vositasini, shu jumladan, ishlab chiqarilganiga 50 yil va undan ortiq boʻlgan transport vositalarini (“antikvar” avtomototransport vositalari bundan mustasno) hisobdan chiqarish quyidagi hujjatlar asosida amalga oshiriladi:

avtomototransport vositasi egasi yoki uning vakilining belgilangan namunadagi arizasi;

avtomototransport vositasi egasi yoki uning vakilining shaxsini tasdiqlovchi hujjat;

avtomototransport vositasini roʻyxatdan oʻtkazish toʻgʻrisidagi guvohnoma;

avtomototransport vositasini yaroqsiz deb topish va uni hisobdan chiqarish toʻgʻrisidagi buyruq (faqat yuridik shaxslar uchun);

Yaroqsiz avtomototransport vositasi hisobdan chiqarilganda avtomototransport vositasini roʻyxatdan oʻtkazish toʻgʻrisidagi guvohnoma va ushbu avtomototransport vositasining ROʻDRBi olib qoʻyiladi, mazkur Nizomning 29 — 31-bandlarida nazarda tutilgan ROʻDRBni saqlab qolish holatlari bundan mustasno.

61. Transport vositasini hisobdan chiqarish yoki uni hisobdan chiqarishni asosli rad etish murojaat etilgan kunda amalga oshiriladi.

62. Transport vositasi quyidagi holatlarda hisobdan chiqarilmaydi:

mazkur Nizomning 58 yoki 60-bandlarida nazarda tutilgan hujjatlar taqdim etilmaganda;

avtomototransport vositasiga tushirilgan identifikatsiya tamgʻasining yashirilishi, soxtalashtirilishi, oʻzgartirilishi, yoʻq qilinishi alomatlari yoxud taqdim etilgan hujjatlarning soxtalashtirilishi, taqdim etilgan hujjatlarda yoki roʻyxatga doir hujjatlarda koʻrsatib oʻtilgan maʼlumotlarga avtomototransport vositasi va raqam agregatlarining nomuvofiqligi aniqlanganda;

avtomototransport vositasi, raqam agregatlarining qidiruvda ekanligi yoki taqdim etilgan hujjatlarning yoʻqolganligi (oʻgʻirlanganligi) toʻgʻrisida maʼlumotlar mavjud boʻlganda;

qonunchilikka muvofiq avtomototransport vositasining tasarruf etilishiga taqiq yoki uning xatlab qoʻyilishi mavjud boʻlganda;

vasiylik va homiylik organining yoki belgilangan yoshga yetmagan yoxud muomalaga layoqatsiz avtomototransport vositasi egasining qonuniy vakillarining ruxsati boʻlmaganda;

tuman (shahar) Aholi bandligiga koʻmaklashish markazi tomonidan ilgari avtomototransport vositasi uchun berilgan ruxsat mavjud boʻlmaganda;

lizing beruvchining roziligi mavjud boʻlmaganda — lizingga taqdim etilgan avtomototransport vositalari uchun.

Avtomototransport vositasi egasi yoki uning vakili avtomototransport vositasini hisobdan chiqarishning rad etish asoslarini bartaraf etgan taqdirda, avtomototransport vositasini hisobdan chiqarish toʻgʻrisida ariza bilan qaytadan murojaat qilishga haqli.

63. Avtomototransport vositasi hisobdan chiqarilganda avtomototransport vositasining roʻyxatga olish elektron kartasiga hisobdan chiqarishning sabablari toʻgʻrisidagi maʼlumotlar kiritiladi.

Hisobdan chiqarilishi lozim boʻlgan avtomototransport vositasini roʻyxatga olish toʻgʻrisidagi guvohnoma va (yoki) avtomototransport vositasining ROʻDRBi yoʻqolganda, ularning YHXX va uning hududiy boshqarmalarida mavjudligi tekshirilgandan soʻng, avtomototransport vositasining roʻyxatga olish elektron kartasiga avtomototransport vositasini roʻyxatga olish toʻgʻrisidagi guvohnoma va (yoki) avtomototransport vositasining ROʻDRBi yoʻqolganligi toʻgʻrisida tegishli yozuv kiritiladi. Bunda hisobdan chiqarilishi lozim boʻlgan avtomototransport vositasini roʻyxatga olish toʻgʻrisidagi guvohnoma va (yoki) avtomototransport vositasining ROʻDRBi toʻgʻrisidagi maʼlumotlar ham Oʻzbekiston Respublikasi Ichki ishlar vazirligining Axborot markaziga yuboriladi.

Zarurat boʻlganda, avtomototransport vositasining egasiga oʻrnatilgan tartibda avtomototransport vositasining raqam agregatlari hisobdan chiqarilganligi toʻgʻrisidagi tegishli maʼlumotnoma beriladi.

8-bob. Yakunlovchi qoidalar

64. YHXDX organlarida roʻyxatga olish harakatlarini amalga oshirish uchun asos boʻladigan hujjatlarning saqlanish muddati 3 yilni tashkil etadi (Avtomototransport vositalarini roʻyxatga olish, ROʻDRBlarni hamda avtomototransport vositasi roʻyxatdan oʻtkazilganligi toʻgʻrisidagi guvohnomalarni taqsimlash kitobidan tashqari).

Avtomototransport vositalarini roʻyxatga olish, ROʻDRBlarni hamda avtomototransport vositasi roʻyxatdan oʻtkazilganligi toʻgʻrisidagi guvohnomalarni taqsimlash kitobining saqlanish muddati 75 yilni tashkil etadi.

65. ROʻDRB elektron jurnalga qayd etgan holda hududiy boshqarmalarga yuboriladi.

66. Amaldagi xaridorgirligiga qarab ilgari ishlab chiqilgan partiyalar orasidan, shu jumladan ishlab chiqarilishi amalga oshirilmagan qoʻshimcha ROʻDRBlar ishlab chiqarilishi mumkin. ROʻDRBning berilishi oʻrnatilgan tartibda hududiy boshqarmalar tomonidan belgilangan namunadagi maxsus elektron jurnalni yuritgan holda amalga oshiriladi.

68. Mazkur Nizom talablari buzilishida aybdor boʻlgan shaxslar qonunchilikka muvofiq javob beradilar.

9-bob. Ish yuritish

69. Ish yuritish Oʻzbekiston Respublikasi Ichki ishlar vazirligi tomonidan tasdiqlangan tartibda amalga oshiriladi.

Avtomototransport vositalarini davlat roʻyxatidan oʻtkazish tartibi toʻgʻrisidagi nizomga ILOVA

Avtomototransport vositalari uchun shakllantirilgan elektron hisob-maʼlumotnomaning

NAMUNASI

Vazirlar Mahkamasining 2017-yil 31-avgustdagi 683-son qaroriga 3-ILOVA

Jismoniy va yuridik shaxslarga avtomototransport vositalari uchun istalgan harf va raqamlar kombinatsiyasiga ega boʻlgan roʻyxatdan oʻtkazish davlat raqami belgilarini yagona oshirilgan toʻlov evaziga berish tartibi toʻgʻrisida

NIZOM

1-bob. Umumiy qoidalar

1. Ushbu Nizom jismoniy va yuridik shaxslarga avtomototransport vositalari uchun istalgan harf va raqamlar kombinatsiyasiga ega boʻlgan roʻyxatdan oʻtkazish davlat raqami belgilarini (keyingi oʻrinlarda — ROʻDRB) yagona oshirilgan toʻlov evaziga berish tartibini belgilaydi.

Istalgan harf va raqamlar kombinatsiyasiga ega boʻlgan ROʻDRB beriladigan transport vositalari Oʻzbekiston Respublikasi Vazirlar Mahkamasi tomonidan belgilangan tartibda davlat roʻyxatidan oʻtkaziladi.

2. Istalgan harf va raqamlar kombinatsiyasiga ega boʻlgan ROʻDRB jismoniy va yuridik shaxslar tomonidan ixtiyoriy ravishda faqat elektron tarzda tanlanadi. Bunda:

Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari jamoat xavfsizligi xizmati yoʻl harakati xavfsizligi boshqarmalarining roʻyxatdan oʻtkazish va imtihon olish boʻlinmalarida (keyingi oʻrinlarda — roʻyxatdan oʻtkazish boʻlinmalari) joylashgan infokiosklar;

Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining (keyingi oʻrinlarda — YHXX) mobil ilovasi;

YHXXning rasmiy veb-sayti;

Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali murojaat qilinishi mumkin.

3. Istalgan harf va raqamlar kombinatsiyasiga ega boʻlgan ROʻDRB avtomatlashtirilgan axborot tizimi orqali tanlanadi va band qilinadi.

Ushbu avtomatlashtirilgan axborot tizimi inson omilini toʻliq istisno etgan holda faoliyat koʻrsatadi hamda ROʻDRBni tanlashda subyektiv aralashuv yoki imtiyoz berish holatlari yuzaga kelishiga yoʻl qoʻyilmaydi.

Har qanday davlat xizmatchisi yoki boshqa shaxs tomonidan ROʻDRBni taqsimlash jarayoniga aralashuv qatʼiyan taqiqlanadi.

4. Istalgan harf va raqamlar kombinatsiyasiga ega boʻlgan ROʻDRBni tanlash uchun YHXX tomonidan avtomatlashtirilgan axborot tizimida ROʻDRBlarning yagona ochiq maʼlumotlar bazasi yuritiladi.

Ochiq maʼlumotlar bazasi orqali fuqarolar uchun ROʻDRBni tanlash jarayonining shaffofligi va xolisligi taʼminlanadi.

5. Istalgan harf va raqamlar kombinatsiyasiga ega boʻlgan ROʻDRB uchun yagona oshirilgan toʻlov miqdori “Uzavtomotobelgi” davlat unitar korxonasi tomonidan belgilanadi.

6. “Uzavtomotobelgi” davlat unitar korxonasi aholining talab va taklifidan kelib chiqqan holda avtomototransport vositalari uchun oltitagacha harf va (yoki) raqamlar kombinatsiyasidan iborat boʻlgan “noyob” ROʻDRBni ochiq kimoshdi elektron savdolarini oʻtkazish orqali berish huquqiga ega.

Bunda “noyob” ROʻDRB amaldagi ROʻDRBni takrorlamasligi, qonunchilikka va axloqiy normalarga xilof maʼnoga ega boʻlmasligi kerak.

“Noyob” ROʻDRBni berish boʻyicha ochiq kimoshdi elektron savdolari oʻtkazish tartibi Oʻzbekiston Respublikasi Ichki ishlar vazirligi tomonidan tasdiqlanadi.

2-bob. Istalgan harf va raqamlar kombinatsiyasiga ega boʻlgan ROʻDRBni tanlash va berish tartibi

7. Ushbu tartib I, IE, III, IIIE, X, XI, XIE, XI1, XIE1, XI2, XI3 tipidagi ROʻDRBga nisbatan qoʻllanadi.

8. Avtomatlashtirilgan axborot tizimida tanlangan raqam kombinatsiyasi dastur tomonidan band qilinmagani tekshirilib, buyurtma beruvchi nomiga yagona oshirilgan toʻlov uchun invoys shakllantiriladi. Toʻlovni amalga oshirish uchun jismoniy shaxslarga har biri 20 daqiqagacha vaqtdan iborat boʻlgan ikkita imkoniyat, yuridik shaxslarga esa 72 soat vaqt beriladi. Ushbu vaqt mobaynida kombinatsiya boshqa shaxslar tomonidan tanlanmasligi uchun tizimda vaqtincha zaxiraga olinadi.

9. Ariza beruvchi tanlangan ROʻDRB kombinatsiyasini olish uchun belgilangan tartibda yagona oshirilgan toʻlovni elektron shaklda toʻlaydi. Toʻlov YIDXP yoki YHXXning mobil ilovasi yoxud rasmiy veb-saytining integratsiyalashgan toʻlov tizimi orqali onlayn amalga oshirilishi lozim.

Toʻlov qabul qilingach, avtomatlashtirilgan tizim tomonidan mazkur raqam kombinatsiyasi uchun ariza beruvchi nomiga rasmiy band qilinganligi tasdiqlanadi va ROʻDRB berish jarayonini yakunlash uchun maxsus tasdiqnoma (elektron shaklda) ariza beruvchiga taqdim etiladi.

10. Ushbu Nizomning 8-bandida nazarda tutilgan vaqt mobaynida tanlangan ROʻDRB kombinatsiya uchun yagona oshirilgan toʻlov amalga oshirilmagan taqdirda, aynan shu buyurtma beruvchiga aynan shu raqam kombinatsiyasini takroran band qilish Avtomatlashtirilgan axborot tizimi tomonidan olti oy muddatga bloklanadi, toʻlov amalga oshirilmagan tanlangan ROʻDRB kombinatsiyasi 12 soat mobaynida ochiq maʼlumotlar bazasiga qaytariladi.

11. ROʻDRB belgilangan tartibda transport vositasiga biriktirish uchun beriladi. Bunda transport vositasini davlat roʻyxatidan oʻtkazish yoki qayta roʻyxatdan oʻtkazish jarayonida tanlangan va yagona oshirilgan toʻlovi toʻlangan ROʻDRB mazkur transport vositasiga biriktiriladi. YHXX hududiy boʻlinmalari ariza beruvchi tomonidan taqdim etilgan tasdiqnoma asosida belgilangan tartibda ROʻDRBni tayyorlab beradi.

12. Tanlangan va yagona oshirilgan toʻlov amalga oshirilgan ROʻDRB quyidagi muddatlarda ishlab chiqariladi va ariza beruvchining transport vositasi rasmiylashtiriladigan YHXX hududiy boʻlinmalariga yetkazib beriladi:

I, IE, III, IIIE tipidagi davlat raqami belgilari — 30 daqiqada;

X, XI, XIE, XI1, XIE1, XI2, XI3 tipidagi davlat raqami belgilari — 14 ish kuni mobaynida.

Bu haqda ariza beruvchiga elektron xabar yuboriladi.

13. Yagona oshirilgan toʻlov evaziga olingan ROʻDRBni ariza beruvchining transport vositasiga biriktirish va rasmiylashtirish qonunchilikda belgilangan umumiy tartibda YHXX hududiy boʻlinmalari tomonidan amalga oshiriladi.

3-bob. Istalgan harf va raqamlar kombinatsiyasiga ega boʻlgan ROʻDRBga egalik qilish va saqlab qolish huquqi

14. Istalgan harf va raqamlar kombinatsiyasiga ega boʻlgan ROʻDRB transport vositasi egasiga muayyan transport vositasiga biriktirish uchun beriladi, lekin mazkur ROʻDRB transport vositasi egasining mulki hisoblanmaydi. ROʻDRB belgilangan tartibda faqat belgilangan transport vositasiga tegishli huquqiy maqsadlarda foydalanish uchun taqdim etiladi.

15. Transport vositasi boshqa shaxsga oʻtkazilganda (sotilganda) yoki belgilangan tartibda qayta roʻyxatdan oʻtkazilganda, transport vositasining avvalgi egasi istalgan harf va raqamlar kombinatsiyasiga ega boʻlgan ROʻDRBni oʻzida saqlab qolish huquqiga ega boʻladi.

Bunda avvalgi egasi transport vositasini begonalashtirish (roʻyxatdan chiqarish) sanasidan eʼtiboran uch oy mobaynida YHXX hududiy boʻlinmasiga murojaat etib, ROʻDRBni saqlab qolish boʻyicha ariza taqdim etadi va yagona oshirilgan toʻlovning 50 foizi miqdorida toʻlovni amalga oshiradi.

16. Avvalgi egasi tomonidan uch oy ichida tegishli tartibda ariza berilmaganda yoki yagona oshirilgan toʻlovning 50 foizi miqdorida toʻlov toʻlanmaganda, ROʻDRBni saqlab qolish huquqi bekor qilinadi. Bunda mazkur raqam kombinatsiyasi qaytadan umumiy ochiq bazaga qaytariladi va boshqa shaxslar tomonidan tanlash uchun mavjud boʻladi.

4-bob. Yakunlovchi qoidalar

17. YHXX oshirilgan toʻlov evaziga beriladigan ROʻDRBni avtomatlashtirilgan axborot tizimi orqali elektron tartibda tanlanishini hamda tizimning uzluksiz va shaffof ishlashini taʼminlaydi, ochiq maʼlumotlar bazasining doimiy yangilanib borishini nazorat qiladi.

18. Ushbu Nizom talablarining buzilishida aybdor boʻlgan shaxslar qonunchilik hujjatlariga muvofiq javob beradilar.

Vazirlar Mahkamasining 2017-yil 31-avgustdagi 683-son qaroriga 4-ILOVA

Oʻzbekiston Respublikasi Vazirlar Mahkamasining oʻz kuchini yoʻqotgan deb eʼtirof etilayotgan ayrim qarorlari

roʻyxati

1. Vazirlar Mahkamasining “Avtomototransport vositalarini roʻyxatdan oʻtkazish, qayta roʻyxatdan oʻtkazish va ularning hisobini olib borish, milliy davlat raqami belgilarini berish va ularni almashtirish ishlarini tartibga solish haqida” 1997-yil 26-maydagi 256-son qarori.

2. Vazirlar Mahkamasining “Lizing xizmatlarini yanada rivojlantirish chora-tadbirlari toʻgʻrisida” 2004-yil 26-apreldagi 199-son qaroriga (Oʻzbekiston Respublikasi QT, 2004-y., 4-son, 42-modda) ilovaning II boʻlimi.

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2004-yil 29-apreldagi 203-son qaroriga (Oʻzbekiston Respublikasi QT, 2004-y., 4-son, 43-modda) ilovaning 5-bandi.

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Vazirlar Mahkamasining “Avtomototransport vositalarini sotib olish, ulardan foydalanish va ularni boshqa shaxsga berishni tartibga solishga doir qoʻshimcha chora-tadbirlar toʻgʻrisida” 2006-yil 7-martdagi 38-son qarori)” 2006-yil 12-maydagi 83-son qaroriga (Oʻzbekiston Respublikasi QT, 2006-y., 5-son, 29-modda) ilovaning 2-bandi.

5. Vazirlar Mahkamasining “Avtomototransport vositalarini roʻyxatdan oʻtkazish, qayta roʻyxatdan oʻtkazish va ularning hisobini olib borish, milliy davlat raqami belgilarini berish va ularni almashtirish qoidalariga oʻzgartirish kiritish haqida (Vazirlar Mahkamasining “Avtomototransport vositalari uchun roʻyxatdan oʻtkazish davlat raqami belgilarining yangi namunalarini joriy etish chora-tadbirlari toʻgʻrisida” 2007-yil 27-iyundagi 131-son qarori)” 2007-yil 18-sentabrdagi 196-son qarori (Oʻzbekiston Respublikasi QHT, 2007-y., 37-38-son, 387-modda).

6. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Fuqarolarning pensiya taʼminoti tizimini yanada takomillashtirish chora-tadbirlari toʻgʻrisida” 2009-yil 30-dekabrdagi PF-4161-son Farmoni, Oʻzbekiston Respublikasi Prezidentining “Oʻzbekiston Respublikasi Mehnat va aholini ijtimoiy muhofaza qilish vazirligi tuzilmasini takomillashtirish chora-tadbirlari toʻgʻrisida” 2009-yil 30-dekabrdagi PQ-1251-son hamda “Oʻzbekiston Respublikasi Moliya vazirligi huzuridagi budjetdan tashqari pensiya jamgʻarmasining tashkiliy tuzilmasini shakllantirish chora-tadbirlari toʻgʻrisida” 2009-yil 30-dekabrdagi PQ-1252-son qarorlari)” 2010-yil 24-martdagi 52-son qaroriga (Oʻzbekiston Respublikasi QT, 2010-y., 3-son, 12-modda) 1-ilovaning 12-bandi.

7. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Vazirlar Mahkamasining “qishloq xoʻjaligi va meliorativ texnikani, asbob-uskunalarni hisobga olish va ularning texnik holatini nazorat qilish tizimini takomillashtirish chora-tadbirlari toʻgʻrisida” 2012-yil 6-dekabrdagi 345-son qarori)” 2013-yil 28-yanvardagi 20-son qaroriga (Oʻzbekiston Respublikasi QT, 2013-y., 1-son, 5-modda) ilovaning 1-bandi.

8. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish hamda baʼzilarini oʻz kuchini yoʻqotgan deb hisoblash toʻgʻrisida (“Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida” Oʻzbekiston Respublikasining 2013-yil 30-apreldagi OʻRQ-352-son Qonuni)” 2014-yil 3-martdagi 45-son qaroriga (Oʻzbekiston Respublikasi QT, 2014-y., 3-son, 16-modda) 1-ilovaning 8-bandi.