Oʻrta maxsus, kasb-hunar taʼlimi tuzilmasini takomillashtirish chora-tadbirlari toʻgʻrisida (253-son)

12.06.2001

Oʻzbekiston Respublikasi Vazirlar Mahkamasining

qarori

[Koʻchirma]

Oʻrta maxsus, kasb-hunar taʼlimi tuzilmasini va uni tashkil etish tizimini Kadrlar tayyorlash milliy dasturi talablariga qatʼiy muvofiq ravishda takomillashtirish, mutaxassislar tayyorlash sifati oshirilishini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi, Makroiqtisodiyot va statistika vazirligi, vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining:

2001—2003-yillarda 1 va 2-ilovalarga* muvofiq oʻrta maxsus oʻquv yurtlari (texnikumlar) va hunar-texnika bilim yurtlarini kasb-hunar kollejlari va akademik litseylarga aylantirish;

* 1-2-ilovalar berilmaydi.

2001/2002 oʻquv yilidan boshlab faoliyat koʻrsatayotgan texnikumlar va hunar-texnika bilim yurtlarining 1-kurslariga qabulni akademik litseylar va kasb-hunar kollejlari uchun yangidan tasdiqlangan oʻquv dasturlari boʻyicha, mazkur taʼlim muassasalariga har yilgi qabul soni doirasida tashkil etish toʻgʻrisidagi takliflari qabul qilinsin.

2. Oʻzbekiston Respublikasi Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi Oʻzbekiston Respublikasi Makroiqtisodiyot va statistika vazirligi, Moliya vazirligi, Mehnat va aholini ijtimoiy muhofaza qilish vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda:

qayta tashkil etilayotgan texnikumlar va hunar-texnika bilim yurtlari negizida barpo etilayotgan kasb-hunar kollejlari va akademik litseylarning ixtisoslashuvi boʻyicha bir oy muddatda Vazirlar Mahkamasiga takliflar kiritsinlar;

2001/2002 oʻquv yili boshlangungacha qayta tashkil etilayotgan oʻrta maxsus va kasb-hunar oʻquv yurtlarining binolari va inshootlarida zarur taʼmirlash ishlarini amalga oshirsinlar, 1-kurslarda taʼlimni kasb-hunar kollejlari va akademik litseylar uchun moʻljallangan taʼlim dasturlari boʻyicha boshlash uchun zarur asbob-uskunalar, taʼlim vositalari, davlat taʼlim standartlari, yangi oʻquv dasturlari, darsliklar va oʻquv-metodik adabiyotlar bilan taʼminlasinlar;

texnikumlar va hunar-texnika bilim yurtlari 2 va 3-kurs talabalarining oʻqishini, belgilangan tartibda, butun oʻquv davrida amaldagi oʻqitish shartlari va oʻquv dasturlari boʻyicha tugatishlarini taʼminlasinlar.

3. Vazirlar Mahkamasi huzuridagi Davlat test markazi Oʻzbekiston Respublikasi Oliy va oʻrta maxsus taʼlim vazirligining Oʻrta maxsus kasb-hunar taʼlimi markazi bilan birgalikda qayta tashkil etilayotgan texnikumlar va hunar-texnika bilim yurtlari negizida barpo etilayotgan kasb-hunar kollejlari va akademik litseylarga jalb etilayotgan pedagog va muhandis-pedagog kadrlarni, boshqa mutaxassislarni 2001-yil 15-avgustgacha attestatsiyadan oʻtkazsin.

4. Oʻzbekiston Respublikasi Iqtisodiyot vazirligi, Moliya vazirligi 2001-yilda va 2002-yilga hamda kelgusi yillarga investitsiya dasturlarini ishlab chiqishda kasb-hunar kollejlari va akademik litseylarga aylantirilayotgan texnikumlar va hunar-texnika bilim yurtlarini bosqichma-bosqich belgilangan standartlar darajasiga yetkazish maqsadida rekonstruksiya qilish va kapital taʼmirlash uchun kapital qoʻyilmalarning zarur limitlarini ustuvor tartibda nazarda tutsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H.S. Karomatov zimmasiga yuklansin.

Oʻzbekiston Respublikasining Bosh vaziri Oʻ. SULTONOV

Toshkent sh.,

2001-yil 12-iyun,

253-son