Arxiv ishi boʻyicha meʼyoriy hujjatlarni tasdiqlash toʻgʻrisida (482-son)

30.10.1999

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Oliy Majlisining “Arxivlar toʻgʻrisida”gi Oʻzbekiston Respublikasi Qonunini amalga kiritish haqida” 1999-yil 15-apreldagi 769-I-son qarorini bajarish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Milliy arxiv fondi toʻgʻrisida Nizom 1-ilovaga muvofiq;

Oʻzbekiston Respublikasi Milliy arxiv fondi hujjatlarini davlat roʻyxatidan oʻtkazish Tartibi 2-ilovaga muvofiq;

Oʻzbekiston Respublikasi davlat hokimiyati va boshqaruvi organlari, korxonalar, muassasalar va tashkilotlardagi idoraviy arxiv toʻgʻrisida Namunaviy nizom 4-ilovaga muvofiq tasdiqlansin.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar, davlat qoʻmitalari, korporatsiyalar, konsernlar, uyushmalar, kompaniyalar oʻz meʼyoriy hujjatlarini “Arxiv toʻgʻrisida”gi Oʻzbekiston Respublikasi Qonuniga va mazkur qaror bilan tasdiqlangan arxiv ishi boʻyicha meʼyoriy hujjatlarga muvofiqlashtirsinlar.

3. Quyidagilar:

Oʻzbekiston SSR Ministrlar Sovetining “Respublikada arxiv ishini boshqarish sxemasi toʻgʻrisida” 1988-yil 31-oktabrdagi 389-son qarorining 1-bandi;

Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasi huzuridagi Bosh arxiv boshqarmasi (“Oʻzbosharxiv”) toʻgʻrisidagi Nizom va respublika markaziy davlat arxivlari tarmogʻini tasdiqlash haqida” 1992-yil 19-iyundagi 296-son qarori oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H.S. Karomatov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1999-yil 30-oktabr,

482-son

Vazirlar Mahkamasining 1999-yil 30-oktabrdagi 482-son qaroriga 1-ILOVA

Oʻzbekiston Respublikasi Milliy arxiv fondi toʻgʻrisida

NIZOM

1. Mazkur Nizom “Arxiv ishi toʻgʻrisida”gi Oʻzbekiston Respublikasi Qonuniga muvofiq Oʻzbekiston hududida mavjud boʻlgan barcha arxiv hujjatlarining toʻliq qamrab olinishini taʼminlashga, Oʻzbekiston Respublikasi Milliy arxiv fondining yaxlitligini saqlab qolishga va fuqarolar, jamiyat va davlatning ijtimoiy, madaniy, ilmiy va boshqa ehtiyojlarini qondirish maqsadida arxiv hujjatlarini roʻyxatdan oʻtkazish, jamlash, ekspertizadan oʻtkazish, hisobga olish, saqlash hamda ulardan foydalanishning yagona tartibini belgilashga qaratilgandir.

Oʻzbekiston Respublikasi Milliy arxiv fondi — Oʻzbekiston xalqining moddiy va maʼnaviy hayotini aks ettirgan, tarixiy, ilmiy, ijtimoiy, iqtisodiy, siyosiy va madaniy ahamiyatga ega boʻlgan arxiv hujjatlarining tarixan tarkib topgan va doimo boyitib boriladigan majmui.

Milliy arxiv fondi Milliy arxiv fondining davlatga tegishli qismi va davlatga tegishli boʻlmagan qismidan iborat.

MILLIY ARXIV FONDINING DAVLATGA TEGISHLI QISMI

2. Milliy arxiv fondining davlatga tegishli qismini quyidagilar tashkil etadi:

2.1 Oʻzbekiston Respublikasi tarkibiga kiruvchi hududdagi mavjud va oʻzining barcha tarixi davomida mavjud boʻlgan davlat yuridik shaxslari:

— davlat hokimiyati va boshqaruvining oliy, respublika va mahalliy, fuqarolarning oʻzini oʻzi boshqarish organlari, prokuraturalar, sudlar, banklarning;

— sanoat, transport, aloqa, kapital qurilish, qishloq xoʻjaligi va xalq xoʻjaligining boshqa tarmoqlari, fan, xalq taʼlimi, madaniyat sohasidagi davlat korxonalari, muassasalari, tashkilotlar va birlashmalarning;

— ustav kapitalida davlat mulki boʻlgan aralash mulkchilik shakllaridagi korxonalar, tashkilotlar va birlashmalarning;

— vatanimizning chet elda boʻlgan va (yoki) chet eldagi davlat korxonalari, muassasalari, tashkilotlari va birlashmalarining faoliyatida paydo boʻlgan arxiv hujjatlari;

2.2. Kasaba uyushmalari, siyosiy tashkilotlar, ijodiy va boshqa jamoat tashkilotlari, birlashmalarning Oʻzbekiston Respublikasi qonunchiligiga muvofiq roʻyxatdan oʻtgunga qadar oʻz faoliyatlarida paydo boʻlgan hujjatlari, din davlatdan ajratilgungacha boʻlgan davrga tegishli diniy muassasalarning arxiv hujjatlari;

2.3 Oʻzbekiston Respublikasi hududida harakatda boʻlgan barcha darajadagi harbiy qismlar boshqarmalari va shtablari, qoʻshilmalar va birlashmalar, oʻquv muassasalari va boshqa milliy muhofaza qilish va xavfsizlik muassasalari, tashkilotlari, armiya, chegara va ichki qoʻshinlarning arxiv hujjatlari;

2.4. Qonuniy asosda davlat mulkiga, shu jumladan, chet ellardan kelib tushgan yoki ularga berilgan yuridik va jismoniy shaxslarning arxiv hujjatlari;

2.5. Arxiv hujjatlarining asl nusxasi, shuningdek, davlat mulkiga chet ellardan qonuniy asosda kelib tushgan arxiv hujjatlari nusxalari.

3. Milliy arxiv fondining davlatga tegishli qismi tarkibiga qonun hujjatlari, boshqaruv, loyiha, konstruktorlik, maxsus hujjatlar, shuningdek ularning boshqa moddiy jismlardagi yozuvlari, dasturlar, algoritmlar va mashina yoʻnaltirilgan (mexanografik) hujjatlar, kinofotofono hujjatlar, videofonogrammalar, ilmiy, adabiy, badiiy, musiqiy qoʻlyozmalar va boshqa qoʻlyozmalar, rasmlar, kundaliklar, xotiranomalar, yozishmalar hamda fuqarolar, jamiyat va davlat uchun ahamiyatli boʻlganligi uchun saqlanishi kerak boʻlgan, kimning tasarrufida ekanligidan qatʼi nazar, davlat mulki boʻlgan hujjatlarning boshqa toifalari kiradi.

4. Davlat korxonalari, muassasalari va tashkilotlarining hujjatlari Vazirlar Mahkamasi tomonidan belgilanadigan tartibda Oʻzbekiston Respublikasi Adliya vazirligi huzuridagi “Oʻzarxiv” agentligi va uning Qoraqalpogʻiston Respublikasi, viloyatlar va Toshkent shahridagi arxiv ishi boʻyicha hududiy boshqarmalari, shuningdek ularga idoraviy mansub davlat arxivlari tomonidan Milliy arxiv fondining davlatga tegishli qismi tarkibiga kiritiladi. Oʻzbekiston Respublikasi Adliya vazirligi huzuridagi “Oʻzarxiv” agentligi davlat tomonidan saqlanishi kerak boʻlgan hujjatlarning namunaviy roʻyxatlarini, shu jumladan saqlash muddatlarini koʻrsatgan holda tasdiqlaydi.

5. Quyidagilar Milliy arxiv fondining davlatga tegishli qismi hujjatlarini doimiy saqlaydilar:

5.1 Oʻzbekiston Respublikasining davlat arxivlari — tegishli yoʻnalishdagi hujjatlar bilan ishlash boʻyicha respublika ilmiy-uslubiy markazlar, jumladan: Oʻzbekiston Milliy arxivi, Oʻzbekiston Ilmiy-texnika va tibbiyot hujjatlari milliy arxivi va Oʻzbekiston Kinofotofono hujjatlari milliy arxivi — davlat hokimiyati va boshqaruvi respublika organlari, Oʻzbekiston Respublikasi Prokuraturasi, sudlari, Markaziy banki va respublikaning boshqa banklari, korxonalari, muassasalari, tashkilotlari va birlashmalarining hujjatlari, shuningdek, saqlash uchun ilgari qabul qilingan arxiv fondlari va arxiv hujjatlari;

5.2 Qoraqalpogʻiston Respublikasi va Toshkent shahar markaziy davlat arxivlari, viloyatlar, shaharlar, tumanlar davlat arxivlari va ularning filiallari — mahalliy davlat hokimiyati va boshqaruvi organlari, Qoraqalpogʻiston Respublikasi, viloyatlar, shaharlar, tumanlar prokuraturalari va sudlari, ularning hududlaridagi korxonalar, muassasalar, tashkilotlar va birlashmalarning arxiv hujjatlari, shuningdek, saqlash uchun ilgari qabul qilingan arxiv fondlari va arxiv hujjatlari;

5.3. Milliy arxiv fondining davlatga tegishli qismi tarkibiga kiritilgan arxiv hujjatlarini doimiy (muddatsiz) saqlashni amalga oshiradigan vazirliklar va idoralarning (ilovaga muvofiq) — tegishli ixtisosdagi arxiv fondlari va arxiv hujjatlari;

5.4. Davlat muzeylari va kutubxonalari — qonuniy asosda davlat mulkiga kiruvchi yuridik va jismoniy shaxslarning arxiv hujjatlari, shuningdek davlat tomonidan saqlash uchun ilgari qabul qilingan arxiv fondlari va arxiv hujjatlari.

6. Oʻzbekiston milliy arxivlari Oʻzbekiston Respublikasi Prezidenti tomonidan, markaziy davlat arxivlari tegishli ravishda Oʻzbekiston Respublikasi Vazirlar Mahkamasi va Qoraqalpogʻiston Respublikasi Vazirlar Kengashi tomonidan tuziladi.

Viloyatlar, shaharlar, tumanlar davlat arxivlari va ularning filiallari tegishli ravishda Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlarining qarori bilan tuziladi.

7. Qoraqalpogʻiston Respublikasi, viloyatlar va Toshkent shahar arxiv ishi hududiy boshqarmalari toʻgʻrisidagi nizomlar Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari bilan kelishgan holda, Oʻzbekiston Respublikasi Adliya vazirligi huzuridagi “Oʻzarxiv” agentligi direktori tomonidan tasdiqlanadi. Oʻzbekiston milliy arxivlari toʻgʻrisidagi nizomlar Adliya vazirligi huzuridagi “Oʻzarxiv” agentligi direktori tomonidan tasdiqlanadi.

Qoraqalpogʻiston Respublikasi Markaziy davlat arxivi, Toshkent shahar markaziy davlat arxivi hamda viloyatlar, shaharlar, tumanlar davlat arxivlari va ularning filiallari, shuningdek, shaxsiy tarkib hujjatlari davlat arxivlari toʻgʻrisidagi nizomlar Adliya vazirligi huzuridagi “Oʻzarxiv” agentligi tomonidan tasdiqlanadigan namunaviy nizom asosida ishlab chiqiladi hamda tegishli mahalliy ijro etuvchi hokimiyat organlari bilan kelishgan holda, Qoraqalpogʻiston Respublikasi, viloyatlar va Toshkent shahar arxiv ishi hududiy boshqarmalari tomonidan tasdiqlanadi.

Milliy arxiv fondining davlatga tegishli qismi tarkibiga kiritilgan arxiv hujjatlarini doimiy (muddatsiz) saqlashni amalga oshiradigan vazirliklar va idoralarning arxivlari toʻgʻrisidagi nizomlar Oʻzbekiston Respublikasi Vazirlar Mahkamasi tomonidan tasdiqlangan Idoraviy arxiv toʻgʻrisidagi Namunaviy nizomga asosan ishlab chiqiladi va Oʻzbekiston Respublikasi Adliya vazirligi huzuridagi “Oʻzarxiv” agentligi bilan kelishilgan holda ularning rahbarlari tomonidan tasdiqlanadi.

8. Milliy arxiv fondining davlatga tegishli qismi hujjatlarini vaqtincha saqlashni davlat hokimiyati va boshqaruvi organlari, fuqarolarning oʻzini oʻzi boshqarish organlari, qoʻshma (davlat ishtirokidagi) korxonalar, davlat korxonalari, muassasalari, tashkilotlari va birlashmalari, ular tomonidan tashkil etiladigan idoraviy, birlashgan idoraviy, idoralararo arxivlar quyidagi muddatlarda amalga oshiradilar:

— davlat hokimiyati va boshqaruv organlari, Oʻzbekiston Respublikasi Hukumati tomonidan tashkil etiladigan xoʻjalik boshqaruvi organlari, Oʻzbekiston Respublikasi prokuraturasi, sudlari, banklari, respublikaga boʻysunuvchi davlat korxonalari, muassasalari, tashkilotlari va birlashmalarining arxiv hujjatlari — 15 yil mobaynida;

— mahalliy davlat hokimiyati organlari va Qoraqalpogʻiston Respublikasi, viloyatlar, shaharlar va tumanlar davlat boshqaruvi organlari, prokuraturasi, sudlari, banklarining tegishli hududiy boʻlinmalari va viloyatga boʻysunuvchi korxonalar, muassasalar, tashkilotlar va birlashmalarning arxiv hujjatlari — 10 yil mobaynida;

— tuman va shaharga boʻysunuvchi davlat korxonalari, muassasalari va tashkilotlarining arxiv hujjatlari — 5 yil mobaynida;

— fuqarolik holati dalolatnomalari yozuvlari, shaxsiy tarkib boʻyicha hujjatlar, notarial harakatlar yozuvlari, sud ishlari, xoʻjalik kitoblari — 75 yil mobaynida, agar qonunchilikda oʻzgacha hol nazarda tutilmagan boʻlsa;

— qoʻshma (davlat ishtirokidagi) korxonalar, tashkilotlar va mulkchilikning aralash shakllaridagi birlashmalar faoliyatini amalga oshirishda paydo boʻlgan arxiv hujjatlari — 10 yil mobaynida;

— ilmiy, texnologik, konstruktorlik va patent hujjatlari — 20 yil mobaynida;

— kapital qurilish boʻyicha loyiha hujjatlari — 25 yil mobaynida;

— telemetrik hujjatlar — 5 yil mobaynida;

— ovozli yozuvlar, videoyozuvlar, kinolentalar, fotosuratlar, fotografiya plyonkalari tayyorlangan vaqtdan boshlab — koʻpi bilan 3 yil;

— mashinada oʻqiladigan hujjatlar — 5 yil mobaynida;

— maxfiy hujjatlar — 30 yil mobaynida.

Idoraviy saqlov muddati tugagan maxfiy hujjatlar maxfiylikdan chiqarish nuqtai nazaridan koʻrib chiqilgandan soʻng davlat arxivi saqloviga belgilangan tartibda topshiriladi.

Boshqaruv hujjati tarkibiga kiruvchi fotosuratlar, ovoz yozilgan lentalar ushbu hujjatlarni saqlash uchun nazarda tutilgan muddatlar mobaynida saqlanadi.

Ilmiy-texnika hujjatlari tarkibiga kiradigan kino va suratovozli hujjatlar, ovozli va video yozuvlar, mashina omilidagi hujjatlar ilmiy-texnika hujjatlarini saqlash uchun nazarda tutilgan muddatlar mobaynida saqlanadi.

Fuqarolar va jamiyat (davlat) oʻrtasida xizmat, mehnat va ijtimoiy-huquqiy munosabatlar toʻgʻrisidagi shaxsiy tarkib boʻyicha hujjatlar saqlanishini taʼminlash maqsadida tegishli hokimliklar tomonidan shaxsiy tarkib hujjatlari davlat arxivlari tuziladi.

Idoraviy arxivlarda vaqtincha saqlanayotgan Oʻzbekiston Respublikasi Milliy arxiv fondi hujjatlarini roʻyxatdan oʻtkazishni Oʻzbekiston Respublikasi Vazirlar Mahkamasi tomonidan tasdiqlangan tartibga muvofiq davlat arxivlari amalga oshiradilar.

9. Milliy arxiv fondining davlatga tegishli qismi tarkibiga kiritilgan arxiv hujjatlarini doimiy (muddatsiz) saqlashni amalga oshiradigan vazirliklar va idoralar (ilovaga muvofiq) Oʻzbekiston Respublikasi Milliy arxiv fondi hujjatlarini Oʻzbekiston Respublikasi Adliya vazirligi huzuridagi “Oʻzarxiv” agentligida roʻyxatdan oʻtkazadilar, Oʻzbekiston Respublikasi Adliya vazirligi huzuridagi “Oʻzarxiv” agentligi bilan kelishib olingan idoraviy meʼyoriy hujjatlar asosida arxiv hujjatlarini jamlash, hisobga olish, saqlash va ulardan foydalanishni amalga oshiradilar.

10. Oʻzbekiston Respublikasi, Qoraqalpogʻiston Respublikasi, viloyatlar, shaharlar, tumanlar davlat hokimiyati va boshqaruvi, prokuraturalar, sudlar, banklar, fuqarolarning oʻzini oʻzi boshqarish organlari, davlat, qoʻshma (davlat ishtirokidagi) korxonalar, muassasalar, tashkilotlar va birlashmalar Oʻzbekiston Respublikasi Adliya vazirligi huzuridagi “Oʻzarxiv” agentligi arxiv ishi hududiy boshqarmalari, Oʻzbekiston milliy arxivlari va davlat arxivlari qoidalari va yoʻriqnomalariga muvofiq doimiy saqlashga berish uchun Milliy arxiv fondining davlatga tegishli qismi hujjatlari jamlanishini, hisobga olinishini, saqlanishini, tanlanishini va tayyorlanishini taʼminlaydilar, Oʻzbekiston Respublikasi Adliya vazirligi huzuridagi “Oʻzarxiv” agentligi arxiv ishi hududiy boshqarmalari, Oʻzbekiston milliy arxivlari va davlat arxivlari bilan kelishgan holda ish yuritish xizmatlari va idoraviy arxivlar ishini belgilovchi meʼyoriy-uslubiy hujjatlarni ishlab chiqadilar va tasdiqlaydilar; arxiv hujjatlari saqlanishi uchun javob beradilar.

11. Vaqtincha saqlashning oxirgi muddatlari tugashi bilan Milliy arxiv fondining davlatga tegishli qismi hujjatlari tartibga solingan va ishlov berilgan holda tegishli ilmiy-maʼlumot apparati va elektron nusxalari, alohida qimmatli va noyob hujjatlarga sugʻurta nusxalari bilan doimiy saqlash uchun tegishli davlat arxivlariga beriladi.

Hujjatlarni tayyorlash va doimiy saqlashga berish, shuningdek, sugʻurta nusxalarini tartibga keltirish va doimiy saqlashga topshirish, shuningdek, elektron hamda sugʻurta nusxalarini tayyorlash, hujjatlarni tashish bilan bogʻliq barcha ishlar topshiruvchi va Oʻzbekiston Respublikasi, Qoraqalpogʻiston Respublikasi, viloyatlar, shaharlar va tumanlar davlat hokimiyati va boshqaruvi, prokuraturalar, sudlar, banklar, fuqarolarning oʻzini oʻzi boshqarish organlari, davlat, qoʻshma (davlat ishtirokidagi) korxonalar, muassasalar, tashkilotlar va birlashmalar mablagʻlari hisobiga bajariladi.

Tegishli hududiy boshqarma yoki davlat arxivi tomonidan doimiy saqlanadigan yigʻmajildlar uchun roʻyxatlar tasdiqlangandan va shaxsiy tarkib boʻyicha yigʻmajildlar uchun roʻyxatlar kelishib olingandan soʻng saqlash muddati tugagan hujjatlar ularning elektron shakllari davlat arxiviga qabul qilingach, Adliya vazirligi huzuridagi “Oʻzarxiv” agentligi tomonidan belgilangan tartibda yoʻq qilinadi.

12. Oʻzbekiston Respublikasi, Qoraqalpogʻiston Respublikasi, viloyatlar, shaharlar va tumanlar davlat hokimiyati va boshqaruvi organlari, prokuraturalar, sudlar, banklar, fuqarolarning oʻzini oʻzi boshqarish organlari, davlat, qoʻshma (davlat ishtirokidagi) korxonalar, muassasalar va tashkilotlar qayta tashkil etilganda, shuningdek ularning mulkchilik shakllari oʻzgargan hollarda ular oʻz faoliyatlarini amalga oshirishda paydo boʻlgan arxiv hujjatlari tartibga keltirilgan holatda tegishli davlat arxivlari bilan kelishgan holda koʻrsatib oʻtilgan hujjatlarga davlat mulk egaligi saqlangan holda huquqiy vorislarga beriladi.

Korxonalar, muassasalar va tashkilotlar tugatilgan taqdirda ularning arxiv hujjatlari qonunchilikda belgilangan tartibda tegishli davlat arxivlariga beriladi.

Hujjatlarning saqlanishini taʼminlash maqsadida va ularning bundan buyon saqlash joyi toʻgʻrisidagi masalani hal etish uchun yigʻmajildlar va mulklarni berish uchun tuzilgan komissiyalar tarkibiga Oʻzbekiston Respublikasi Adliya vazirligi huzuridagi “Oʻzarxiv” agentligi hududiy boshqarmalari va davlat arxivlarining vakillari kiritiladi.

13. Milliy arxiv fondining davlatga tegishli qismi hujjatlari davlat tasarrufidan chiqarish, xususiylashtirish, oldi-sotdi yoki boshqa xil bitishuvlar obyekti boʻlolmaydi.

Davlat korxonalari, muassasalari va tashkilotlari davlat tasarrufidan chiqarilgan va xususiylashtirilgan taqdirda ularning arxiv hujjatlari, shu jumladan shaxsiy tarkib boʻyicha hujjatlar davlat mulk egaligida qoladi va belgilangan tartibda davlat arxivlariga beriladi.

14. Milliy arxiv fondining davlatga tegishli qismi hujjatlari, saqlanish joyi, manba turi, axborotni mustahkamlash texnikasi va usulidan qatʼi nazar, davlat hisobida turishi shart. Ushbu hujjatlarni davlat hisobiga olish tartibi Oʻzbekiston Respublikasi Vazirlar Mahkamasi tomonidan belgilanadi.

Oʻzbekiston Respublikasi, Qoraqalpogʻiston Respublikasi, viloyatlar, shaharlar va tumanlar davlat hokimiyati va boshqaruvi, prokuraturalar, sudlar, banklar, fuqarolarning oʻzini oʻzi boshqarish organlari, davlat, qoʻshma (davlat ishtirokidagi) korxonalar, muassasalar, tashkilotlar va birlashmalar Oʻzbekiston Respublikasi Milliy arxiv fondi hujjatlarining toʻliqligi, ishonchliligi va hisob boʻyicha maʼlumotlarni taqdim etish muddatlariga rioya qilinishi uchun belgilangan tartibda javob beradilar.

15. Milliy arxiv fondining davlatga tegishli qismi hujjatlari Oʻzbekiston Respublikasi Adliya vazirligi huzuridagi “Oʻzarxiv” agentligi davlat arxivlarida, davlat muzeylarida, kutubxonalarida, idoraviy arxivlarda fondlar, kolleksiyalar, saqlash birliklari (yigʻmajildlar) boʻyicha saqlanadi va hisobga olinadi.

16. Milliy arxiv fondining davlatga tegishli qismi hujjatlari foydalanish uchun barcha yuridik va jismoniy shaxslarga beriladi.

Davlat va idoraviy arxivlar yuridik va jismoniy shaxslarga quyidagi xizmat turlarini koʻrsatadilar: saqlanayotgan arxiv fondlari va arxiv hujjatlari toʻgʻrisida axborot berish, arxivlar oʻquv zallarida ishlayotgan tadqiqotchilarga xizmat koʻrsatish, hujjatlardan belgilangan tartibda tasdiqlangan nusxalar va koʻchirmalar tayyorlash, ijtimoiy-huquqiy tusdagi maʼlumotnomalarni belgilangan tartibda berish, koʻrgazmalar, ekskursiyalar tashkil etish, hujjatlarning roʻyxatini tuzish, arxiv yigʻmajildlarni vaqtinchalik foydalanish uchun yuridik shaxslarga berish.

Xizmatlar koʻrsatish yuridik yoki jismoniy shaxslarning yozma soʻrovlari asosida amalga oshiriladi va ish yuritish yoʻriqnomasiga muvofiq jurnallarda roʻyxatdan oʻtkaziladi.

Arxiv yigʻmajildlari va hujjatlar faqat arxiv rahbarining yozma ruxsatnomasiga asosan koʻrsatiladi. Sud tomonidan muomala layoqati cheklangan yoki muomalaga layoqatsiz deb topilgan shaxslarga arxiv hujjatlaridan foydalanishga ruxsat berilmaydi. Shaxsning sud tomonidan muomala layoqati cheklangan yoki muomalaga layoqatsiz deb topilganligi davlat arxivlari tomonidan idoralararo elektron tizimlar orqali aniqlanadi. Voyaga yetmaganlar davlat arxivlari oʻquv zallariga ota-onalari yoki tartibga rioya etishga masʼul boshqa qonuniy vakillari bilan kiritiladi.

Arxivlar tomonidan pulli xizmatlar ham koʻrsatiladi. Pulli xizmatlar koʻrsatish tartibi Oʻzbekiston Respublikasi Vazirlar Mahkamasi tomonidan tasdiqlanadi.

Pulli xizmatlar shartnomalarga muvofiq koʻrsatiladi, ularda xizmatlarning hajmi va turi, bajarish muddati va toʻlov tartibi kelishib olinadi.

Xizmatlar preyskurantlari belgilangan tartibda tegishli vazirliklar va idoralar bilan kelishilgan holda Adliya vazirligi huzuridagi “Oʻzarxiv” agentligi tomonidan ishlab chiqiladi va tasdiqlanadi.

17. Davlat siri va qonun bilan muhofaza qilinadigan boshqa sirlarni, shuningdek, fuqarolarning huquqlari va qonuniy manfaatlarini himoya qilish bilan bogʻliq Milliy arxiv fondining davlatga tegishli qismi hujjatlaridan foydalanishni cheklash Oʻzbekiston Respublikasining amaldagi qonunchiligi bilan belgilanadi.

Alohida qimmatli va noyob hujjatlardan, shuningdek, jismoniy holati qoniqarsiz boʻlgan hujjatlardan foydalanishni cheklashga yoʻl qoʻyiladi. Bunday hollarda Oʻzbekiston Respublikasi Adliya vazirligi huzuridagi “Oʻzarxiv” agentligi muassasalari, davlat muzeylari va kutubxonalari, idoraviy arxivlar koʻrsatib oʻtilgan hujjatlardan foydalanish fondini tuzadilar.

18. Sir saqlash muddati tugashi munosabati bilan yoki Oʻzbekiston Respublikasining qonun hujjatlariga muvofiq sirli xususiyatini yoʻqotgan Milliy arxiv fondining davlatga tegishli qismi hujjatlarini oshkor qilish Oʻzbekiston Respublikasi Adliya vazirligi huzuridagi “Oʻzarxiv” agentligi muassasalari, davlat muzeylari va kutubxonalari, idoraviy arxivlar tomonidan fond tashkil etuvchi muassasalar mutaxassislari yoki ularning merosxoʻrlari bilan birgalikda amalga oshiriladi.

MILLIY ARXIV FONDINING DAVLATGA TEGISHLI BOʻLMAGAN QISMI

19. Milliy arxiv fondining davlatga tegishli boʻlmagan qismini nodavlat korxonalar, muassasalar va tashkilotlar faoliyati natijasida tashkil etilgan arxiv hujjatlari, shuningdek jismoniy shaxslarning shaxsiy arxiv hujjatlari tashkil etadi.

Oʻzbekiston Respublikasining jamoat tashkilotlari toʻgʻrisidagi qonunchiligiga muvofiq roʻyxatdan oʻtkazilgan paytdan boshlab jamoat birlashmalari va tashkilotlaridagi yuridik va jismoniy shaxslarning, shu jumladan, kasaba uyushmalari, xayriya jamgʻarmalari va boshqa jamgʻarmalar, siyosiy partiyalar va harakatlar, diniy birlashmalar va tashkilotlarning;

nodavlat birlashmalari (kompaniyalar, korporatsiyalar, konsernlar, uyushmalar, aksiyadorlik jamiyatlari)dagi sanoat korxonalari, muassasalari va tashkilotlari, qishloq xoʻjaligi va iqtisodiyotning boshqa tarmoqlari, fan, madaniyat, taʼlim, ijtimoiy soha, ommaviy axborot vositalarining;

jismoniy shaxslardagi (shaxsiy hujjatlar, oilaviy arxivlar, hujjatlar kolleksiyasi va boshqalar) nodavlat yuridik va jismoniy shaxslarning arxiv fondlari va arxiv hujjatlaridan tashkil topadi.

20. Hujjatlarni Oʻzbekiston Respublikasi Milliy arxiv fondining davlatga tegishli boʻlmagan qismi tarkibiga oʻtkazish yoki hujjatlarni undan chiqarish Oʻzbekiston Respublikasi Adliya vazirligi huzuridagi “Oʻzarxiv” agentligi organlari va muassasalari tomonidan nodavlat yuridik va jismoniy shaxslar bilan birgalikda ularning hujjatlari qimmati ekspertiza qilingandan soʻng amalga oshiriladi.

Ekspert-tekshirish komissiyasining hujjatlarni Oʻzbekiston Respublikasi Milliy arxiv fondining davlatga tegishli boʻlmagan qismiga oʻtkazish toʻgʻrisidagi qarori tasdiqlangandan soʻng koʻrsatilgan qarorni tasdiqlagan Oʻzbekiston Respublikasi Adliya vazirligi huzuridagi “Oʻzarxiv” agentligi organi yoki muassasasi Oʻzbekiston Respublikasi Milliy arxiv fondi hujjatlarini davlat roʻyxatidan oʻtkazish toʻgʻrisidagi tartibga muvofiq roʻyxatdan oʻtkazish guvohnomasini rasmiylashtiradi.

21. Oʻzbekiston Respublikasi Milliy arxiv fondining davlatga tegishli boʻlmagan qismi hujjatlarini saqlovchi nodavlat yuridik va jismoniy shaxslar Oʻzbekiston Respublikasi Adliya vazirligi huzuridagi “Oʻzarxiv” agentligi organlari va muassasalari soʻrovlariga koʻra ularni davlat hisobiga qoʻyish maqsadida oʻzlarining arxiv fondlari va arxiv hujjatlari toʻgʻrisidagi maʼlumotlarni taqdim etadilar.

Milliy arxiv fondining davlatga tegishli boʻlmagan qismi hujjatlari egalari va (yoki) saqlash joyi almashganda nodavlat yuridik va jismoniy shaxslar Oʻzbekiston Respublikasi Adliya vazirligi huzuridagi “Oʻzarxiv” agentligi organi va muassasasini ushbu hujjatlarning yangi egasi va ularning bundan keyingi saqlanish joyi toʻgʻrisida xabardor qiladilar.

22. Milliy arxiv fondining davlatga tegishli boʻlmagan qismiga tegishli deb topilgan hujjatlarning egalari boʻlgan nodavlat yuridik va jismoniy shaxslar ushbu hujjatlar shu maqsadlarda tashkil etiladigan arxivlar yoki idoraviy arxivlarda, shuningdek jismoniy shaxslarning shaxsiy arxiv hujjatlari tarkibida doimiy saqlanishini taʼminlaydilar.

Doimiy muddatda saqlanadigan hujjatlar yoʻq qilinmaydi. Shaxsiy tarkib boʻyicha hujjatlar (ish staji, ish haqi, oʻqish, mukofotlash toʻgʻrisidagi hujjatlar va boshqa hujjatlar) Oʻzbekiston Respublikasi Adliya vazirligi huzuridagi “Oʻzarxiv” agentligi organlari va muassasalari bilan kelishilmasdan nodavlat yuridik va jismoniy shaxslar tomonidan yoʻq qilinishi mumkin emas.

23. Nodavlat yuridik va jismoniy shaxslar oʻz hujjatlarini davlat mulki qilib-davlat arxivlari, muzeylar va kutubxonalarda saqlashga berishlari mumkin. Bunday ishlar bitim (shartnoma) bilan, zarur hollarda hujjatlarni saqlash va ulardan foydalanish shartlari aniqlangan holda, rasmiylashtiriladi.

Nodavlat korxonalar, muassasalar, tashkilotlar va birlashmalar tugatilganda yoki shaxsiy arxiv hujjatlari egasi vafot etganda, vorislar va qonuniy merosxoʻrlar boʻlmaganda ularning hujjatlari davlat mulkiga oʻtkazilib, doimiy saqlash uchun davlat arxivlariga topshiriladi.

Nodavlat yuridik shaxslarni davlat roʻyxatidan oʻtkazuvchi organlar qonunchilikka muvofiq talab qilinadigan boshqa hujjatlarga qoʻshimcha ravishda ularning arxiv fondi Oʻzbekiston Respublikasi Adliya vazirligi huzuridagi “Oʻzarxiv” agentligi muassasalariga oʻtkazilganligini tasdiqlovchi hujjat mavjud boʻlgan taqdirda ularni davlat roʻyxatidan chiqarish toʻgʻrisida qaror qabul qiladilar.

24. Nodavlat yuridik va jismoniy shaxslar Milliy arxiv fondining davlatga tegishli boʻlmagan qismi hujjatlarini vaqtinchalik, shu jumladan, depozitar saqlashga davlat arxivlariga, muzeylarga va kutubxonalarga berishlari mumkin.

Milliy arxiv fondining davlatga tegishli boʻlmagan qismi hujjatlarini vaqtincha, shu jumladan, depozitar saqlashga berish shartlari va tartibi hujjat egalari bilan davlat arxivlari, muzeylar va kutubxonalar oʻrtasida tuzilgan bitimlar (shartnomalar)da belgilanadi.

25. Milliy arxiv fondining davlatga tegishli boʻlmagan qismi sotiladigan hollarda davlat arxivlari ularni sotib olish uchun imtiyozli huquqqa ega boʻladi. Hujjat egalari, kimoshdi savdosi tashkilotchilari, savdo-vositachilik tashkilotlari boʻlajak sotishgacha kechi bilan bir oy oldin u toʻgʻrisida aniq sotish vaqti va joyi koʻrsatilgan holda Oʻzbekiston Respublikasi Adliya vazirligi huzuridagi “Oʻzarxiv” agentligi organlari va muassasalariga xabar berishlari zarur.

26. Oʻzbekiston Respublikasi Adliya vazirligi huzuridagi “Oʻzarxiv” agentligi organlari va muassasalari nodavlat yuridik va jismoniy shaxslarning iltimosiga koʻra ularning arxiv hujjatlarini jamlashda, hisobga olishda, saqlashda va ulardan foydalanishda uslubiy yordam koʻrsatadilar. Nodavlat yuridik va jismoniy shaxslar bilan kelishilganiga koʻra Oʻzbekiston Respublikasi Adliya vazirligi huzuridagi “Oʻzarxiv” agentligi muassasalari ularning arxivlariga hujjatlarni ilmiy-texnik ishlov berish, ish yuritish boʻyicha meʼyoriy hujjatlarni ishlab chiqish, yigʻmajildlarni taʼmirlash va muqovalash, arxiv hujjatlaridan foydalanish yuzasidan pulli xizmatlar koʻrsatishlari, shuningdek, nodavlat arxivlariga boshqacha koʻmaklashishlari mumkin.

27. Oʻzbekiston Respublikasi Milliy arxiv fondi toʻgʻrisida Nizom talablarini buzgan nodavlat yuridik va jismoniy shaxslar qonun hujjatlarida belgilangan tartibda javob beradilar.

Oʻzbekiston Respublikasi Milliy arxiv fondi toʻgʻrisidagi Nizomga ILOVA

Oʻzbekiston Respublikasi Milliy arxiv fondi hujjatlarini doimiy saqlovchi vazirliklar, idoralar, tarmoq davlat fondlari va tashkilotlari

ROʻYXATI

Oʻzbekiston Respublikasi Prezidenti Administratsiyasi;

Oʻzbekiston Respublikasi Milliy gvardiyasi;

Oʻzbekiston Respublikasi Mudofaa vazirligi;

Oʻzbekiston Respublikasi Favqulodda vaziyatlar vazirligi;

Oʻzbekiston Respublikasi Ichki ishlar vazirligi;

Oʻzbekiston Respublikasi Tashqi ishlar vazirligi;

Oʻzbekiston Respublikasi Investitsiyalar va tashqi savdo vazirligi;

Oʻzbekiston Respublikasi Prezidentining Davlat xavfsizligi xizmati;

Oʻzbekiston Respublikasi Davlat xavfsizlik xizmati;

Oʻzbekiston Respublikasi Mudofaa vazirligi huzuridagi Mudofaa sanoati agentligi;

Oʻzbekiston Respublikasi Davlat bojxona qoʻmitasi;

Oʻzbekiston Respublikasi Davlat geologiya va mineral resurslar qoʻmitasining Davlat geologiya fondi;

Oʻzbekiston Respublikasi Gidrometeorologiya xizmati markazi;

Oʻzbekiston standartlashtirish, metrologiya va sertifikatlashtirish agentligining davlat standartlari tarmoq fondi;

Oʻzbekiston Respublikasi Davlat soliq qoʻmitasi huzuridagi Kadastr agentligining kartografiya-geodeziya fondi;

Oʻzbekiston Respublikasi Fanlar akademiyasi;

Oʻzbekiston Respublikasi Madaniyat vazirligi muzeylari va kutubxonalari;

Vazirlar Mahkamasining 1999-yil 30-oktabrdagi 482-son qaroriga 2-ILOVA

Oʻzbekiston Respublikasi Milliy arxiv fondi hujjatlarini davlat roʻyxatidan oʻtkazish

TARTIBI

UMUMIY QOIDALAR

1. Oʻzbekiston Respublikasi Milliy arxiv fondi hujjatlarini davlat roʻyxatidan oʻtkazish ularni davlat tomonidan hisobga olish va saqlashni nazorat qilishni taʼminlash maqsadida amalga oshiriladi.

2. Oʻzbekiston Respublikasi Milliy arxiv fondiga belgilangan tartibda oʻtkazilgan barcha hujjatlar, ular saqlanish joyi va mulkchilik shakllaridan qatʼi nazar, davlat roʻyxatidan oʻtkazilishi kerak.

3. Oʻzbekiston Respublikasi Milliy arxiv fondi hujjatlarini davlat roʻyxatidan oʻtkazishni Oʻzbekiston Respublikasi Adliya vazirligi huzuridagi “Oʻzarxiv” agentligi (keyingi oʻrinlarda — “Oʻzarxiv” agentligi deb ataladi) va u vakolat bergan arxiv muassasalari amalga oshiradi.

4. Oʻzbekiston Respublikasi Milliy arxiv fondi hujjatlari egasiga (keyingi oʻrinlarda — egasiga deyiladi) hujjatlar davlat roʻyxatidan oʻtkazilgandan soʻng yagona namunadagi Oʻzbekiston Respublikasi Milliy arxiv fondi hujjatlarini davlat roʻyxatidan oʻtkazish guvohnomasi beriladi (1-ilova). Roʻyxatdan oʻtkazish guvohnomalari blanklarini hisobga olish, saqlash va ulardan foydalanganlik toʻgʻrisida hisobot berish tartibi “Oʻzarxiv” agentligi tomonidan belgilanadi.

Roʻyxatdan oʻtkazish guvohnomasi ham alohida hujjatga, ham hujjatlar majmuiga (saqlash birligiga (yigʻmajild), kolleksiya, fond, fondlar guruhi, arxiv va boshqalar)ga rasmiylashtirilishi mumkin.

Roʻyxatdan oʻtkazish guvohnomasi berilganligi toʻgʻrisida Oʻzbekiston Respublikasi Milliy arxiv fondi hujjatlarini davlat roʻyxatidan oʻtkazish daftariga yozib qoʻyiladi (2-ilova). Ushbu daftarni yuritish tartibi “Oʻzarxiv” agentligi tomonidan belgilanadi.

5. Quyidagilar roʻyxatdan oʻtkazish guvohnomasi berish uchun asos hisoblanadi:

Oʻzbekiston Respublikasining 1999-yil 15-aprelda qabul qilingan “Arxivlar toʻgʻrisida”gi 768-I-sonli Qonuni amalga kiritilishi vaqtida hujjatlarning Oʻzbekiston Respublikasi Adliya vazirligi huzuridagi “Oʻzarxiv” agentligining Milliy arxiv fondi Davlat katalogida davlat hisobida turishi;

— qonunchilikka muvofiq tashkil etilgan ekspert-tekshirish komissiyasi qarori;

— hujjatlarni idoraviy saqlashni tashkil etish toʻgʻrisidagi roʻyxatdan oʻtkazish yilining 1-yanvarigacha boʻlgan statistika hisobotining mavjudligi;

— hujjatlarga mulkka egalik huquqining boshqa shaxslarga oʻtkazilishida ularning sobiq egasida roʻyxatdan oʻtkazish guvohnomasi mavjudligi.

6. Quyidagi hollarda roʻyxatdan oʻtkazish guvohnomasi bekor qilinadi yoki qayta rasmiylashtiriladi:

— roʻyxatdan oʻtkazilgan hujjatlarning egasi ularga berilgan mulkka egalik huquqini boshqa shaxsga bersa yoki sud qaroriga koʻra ushbu hujjatlarga mulkka egalik huquqidan mahrum etilsa;

— “Oʻzarxiv” agentligi organlari va muassasalari ekspert-tekshirish komissiyalari qaroriga koʻra fuqaroning mulki hisoblanadigan hujjatlar yoki roʻyxatdan oʻtkazilgan hujjatlarning bir qismi Oʻzbekiston Respublikasi Milliy arxiv fondidan chiqarilsa va davlat hisobidan olib tashlansa.

DAVLAT HISOBIDA TURGAN HUJJATLARNI DAVLAT ROʻYXATIDAN OʻTKAZISH

7. Oʻzbekiston Respublikasining 1999-yil 15-aprelda qabul qilingan “Arxivlar toʻgʻrisida”gi 768-I-sonli Qonuni amalga kiritilishi vaqtida Oʻzbekiston Respublikasi Milliy arxiv fondining hujjatlari davlat hisobida va arxiv hujjatlarini doimiy saqlash huquqi berilgan respublika davlat arxivlarida, vazirliklar, idoralar, tarmoq davlat fondlari va tashkilotlar boshqa davlat saqlash joylarida boʻlgan boʻlsa, ularni davlat roʻyxatidan oʻtkazish har bir arxiv boʻyicha Milliy arxiv fondining Davlat katalogi davlat hisobi maʼlumotlari asosida “Oʻzarxiv” agentligi tomonidan amalga oshiriladi. Bunda roʻyxatdan oʻtkazish guvohnomasida davlatga tegishli hujjatlarning umumiy soni koʻrsatib qoʻyiladi.

8. Oʻzbekiston Respublikasi, Qoraqalpogʻiston Respublikasi, viloyatlar, shaharlar, tumanlarning ishlab turgan davlat hokimiyati va boshqaruvi, fuqarolarning oʻzini oʻzi boshqarish organlari, korxonalar, muassasalar, tashkilotlarning arxiv hujjatlari Oʻzbekiston Respublikasining 1999-yil 15-aprelda qabul qilingan “Arxivlar toʻgʻrisida”gi 768-I-sonli Qonuni amalga kiritilishi vaqtida davlat hisobida turgan boʻlsa, ularni davlat roʻyxatidan oʻtkazish, ushbu hujjatlar saqlanayotgan har bir arxiv (arxiv filiallari) boʻyicha umumiy belgilangan hisobga olish maʼlumotlari (idoraviy saqlashni tashkil etish toʻgʻrisidagi statistika hisobotlari) asosida “Oʻzarxiv” agentligi organlari va muassasalari tomonidan amalga oshiriladi.

9. Agar Oʻzbekiston Respublikasining 1999-yil 15-aprelda qabul qilingan “Arxivlar toʻgʻrisida”gi 768-I-sonli Qonuni amalga kiritilishi vaqtida davlatga tegishli boʻlmagan hujjatlar davlat hisobida turgan boʻlsa, ularga roʻyxatdan oʻtkazish guvohnomasi, hujjatlarning turgan joyidan qatʼi nazar, ushbu hujjatlar egasiga yoki uning qonuniy vakiliga beriladi.

10. Arxiv muassasalarida saqlanayotgan hujjatlarga rasmiylashtirilgan roʻyxatdan oʻtkazish guvohnomasi (hujjatlarni saqlashga rejali ravishda har yili kelib tushishi, hujjatlar qimmatini ekspertiza qilish xulosasi asosida Oʻzbekiston Respublikasi Milliy arxiv fondidan hujjatlarning bir qismi chiqarib tashlanishi, ular yigʻmajildlarining bir qismi boshqa arxiv muassasalariga berilishi natijasida) koʻrsatib oʻtilgan hujjatlar soni oʻzgarganda qayta rasmiylashtirilmaydi. Roʻyxatdan oʻtkazish guvohnomasining amalda boʻlishi arxiv muassasasida saqlanayotgan va davlat hisobida turgan barcha hujjatlarga joriy etiladi.

OʻZBEKISTON RESPUBLIKASI MILLIY ARXIV FONDIGA KIRITILISHI KERAK BOʻLGAN HUJJATLARNI DAVLAT ROʻYXATIDAN OʻTKAZISH

11. Ekspert-tekshirish komissiyasining hujjatlarni Oʻzbekiston Respublikasi Milliy arxiv fondiga oʻtkazish toʻgʻrisidagi qarori tasdiqlangandan soʻng “Oʻzarxiv” agentligining koʻrsatib oʻtilgan qarorni tasdiqlagan organi yoki muassasasi ushbu hujjatlarga roʻyxatdan oʻtkazish guvohnomasini rasmiylashtiradi. Guvohnoma hujjat egasiga yoki uning qonuniy vakiliga doimiy saqlanadigan tasdiqlangan hujjatlar roʻyxatining nusxasi bilan birga beriladi.

Oʻzarxiv hujjatlarini doimiy (muddatsiz) saqlaydigan vazirliklar va idoralar roʻyxatiga kiritilgan davlat boshqaruv organlari Oʻzbekiston Respublikasi Milliy arxiv fondi hujjatlarini bir vaqtning oʻzida fond kartochkalarini “Oʻzarxiv” agentligining Milliy arxiv fondi Davlat katalogi va hujjatlar roʻyxatdan oʻtkazish yilining 1-yanvariga idoraviy saqlanishini tashkil etish toʻgʻrisidagi statistika hisoboti uchun taqdim etgan holda roʻyxatdan oʻtkazadilar.

12. Roʻyxatdan oʻtkazib boʻlingan hujjatlarni saqlayotgan davlat arxiviga, muzeyga, kutubxonaga saqlash uchun tushayotgan Oʻzbekiston Respublikasi Milliy arxiv fondi hujjatlariga takroriy guvohnoma berilmaydi. Bunday hollarda ularga hujjatlar davlat hisobiga qabul qilingan paytdan boshlab ilgari berilgan roʻyxatdan oʻtkazish guvohnomasining amal qilishi tatbiq etiladi.

ROʻYXATDAN OʻTKAZISH GUVOHNOMASIGA OʻZGARTIRISHLAR KIRITISH

13. Oʻzbekiston Respublikasi Milliy arxiv fondiga kiruvchi hujjatlarning egasi roʻyxatdan oʻtkazish guvohnomasini ushbu guvohnomani rasmiylashtirgan arxiv muassasasiga:

— hujjatlarga egalik huquqining boshqa shaxslarga oʻtkazilishida yoki egalik huquqidan mahrum qilinganda;

— hujjatlarni saqlash joyi va sharoitlari oʻzgarganda;

— hujjatlar noyob hujjat yodgorliklariga oʻtkazilganda;

— foydalanish fondi nusxalari tayyorlanganda, hujjatlardan foydalanishga cheklashlar belgilanganda va hujjatlardan foydalanish shartlariga boshqacha oʻzgartirishlar boʻlganda;

— takomillashtirilgan va ularga ilmiy-maʼlumotnoma apparati yaratilganda;

— roʻyxatdan oʻtkazilgan hujjatlarning nusxalari xorijga olib chiqilganda;

— oʻz mulkidagi hujjatlar Oʻzbekiston Respublikasi Milliy arxiv fondidan chiqarib tashlanganda;

— guvohnomalarni rasmiylashtirishda xatolar aniqlanganda yoki ular foydalanish uchun yaroqsiz boʻlib qolgan hollarda taqdim etishi kerak.

14. Roʻyxatdan oʻtkazilgan guvohnomalar:

— yoʻqotib qoʻyilganda;

— unga qoʻshimcha yozuvlar, tuzatishlar kiritilganda yoki yaroqsiz boʻlib qolganda haqiqiy emas deb hisoblanadi.

15. Arxiv muassasasi egasi murojaat qilganda murojaat qilingan kunda, maʼlumotlarni tekshirish yoki aniqlash zarur boʻlganda esa — uch kun muddatda roʻyxatdan oʻtkazish guvohnomasiga oʻzgartirish kiritilishi, qayta rasmiylashtirilishi yoki u bekor qilinishi kerak.

Zarurat boʻlganda arxiv muassasasi hujjat egasidan uning shaxsini yoki vakilning vakolatini tasdiqlovchi hujjatlarni, shuningdek, roʻyxatdan oʻtkazish guvohnomasiga oʻzgartirishlar kiritish uchun asos boʻlib hisoblanadigan boshqa hujjatlarni talab qilishga haqlidir.

16. Roʻyxatdan oʻtkazish guvohnomasi yoʻqotib qoʻyilgan yoki u tuzatib boʻlmaydigan darajada yaroqsiz boʻlib qolgan hollarda tegishli arxiv muassasasi uning egasi arizasiga koʻra yoki oʻz tashabbusi bilan mazkur qoidaga muvofiq takroriy guvohnoma (dublikat) beradi.

17. Oʻzbekiston Respublikasi Milliy arxiv fondi hujjatlarini davlat roʻyxatidan oʻtkazish masalalariga doir arxiv muassasalari va hujjatlar egalari orasidagi nizolar “Oʻzarxiv” agentligi tomonidan koʻrib chiqiladi. “Oʻzarxiv” agentligining ushbu masalalar boʻyicha qarori ustidan sudga arz qilinishi mumkin.

Oʻzbekiston Respublikasi Milliy arxiv fondi hujjatlarini davlat roʻyxatidan oʻtkazish Tartibiga 1-ILOVA

Oʻzbekiston Respublikasi Milliy arxiv fondi hujjatlarini davlat roʻyxatidan oʻtkazish

GUVOHNOMASI

Oʻzbekiston Respublikasi Milliy arxiv fondi hujjatlarini davlat roʻyxatidan oʻtkazish Tartibiga 2-ILOVA

Oʻzbekiston Respublikasi Milliy arxiv fondi hujjatlarini davlat roʻyxatidan oʻtkazish

DAFTARI

* agar alohida hujjat roʻyxatdan oʻtkazilayotgan boʻlsa.

Vazirlar Mahkamasining 1999-yil 30-oktabrdagi 482-son qaroriga 4-ILOVA

Oʻzbekiston Respublikasi davlat hokimiyati va boshqaruvi organlari, korxonalar, muassasalar va tashkilotlardagi idoraviy arxiv toʻgʻrisida

NAMUNAVIY NIZOM

UMUMIY QOIDALAR

1. “Arxiv ishi toʻgʻrisida”gi Oʻzbekiston Respublikasi Qonuniga muvofiq hujjatlar saqlanishini taʼminlash, hisobini olish, ulardan ilmiy va amaliy maqsadlarda foydalanish uchun respublika davlat hokimiyati va boshqaruvi organlari, korxonalar, muassasalar va tashkilotlarda* idoraviy arxivlar tuziladi.

* keyingi oʻrinlarda “davlat hokimiyati va boshqaruvi organlari, korxonalar, muassasalar va tashkilotlar” soʻzlari oʻrniga “tashkilot” soʻzi ishlatiladi.

2. Idoraviy arxiv yetakchi (bosh) boʻlgan tashkilot qoshida tarkibiy boʻlinma sifatida tashkil etiladi, u tashkilot rahbari yoki tashkilot toʻgʻrisidagi nizomga muvofiq hujjatlar bilan ishlashni yoʻlga qoʻyish uchun javobgar boʻlgan tarkibiy boʻlinma rahbariga boʻysunadi.

3. Idoraviy arxiv oʻz faoliyatida Oʻzbekiston Respublikasi Konstitutsiyasiga, qonunlariga, Oʻzbekiston Respublikasi Oliy Majlisining qarorlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, yetakchi (bosh) va oʻz tashkilotining buyruqlari va koʻrsatmalariga, Oʻzbekiston Respublikasi Adliya vazirligi huzuridagi “Oʻzarxiv” agentligining qoidalari va yoʻriqnomalariga va mazkur Namunaviy nizomga amal qiladi.

4. Idoraviy arxiv mudiri (yoki arxiv uchun javobgar shaxs) va arxivning shtatdagi boshqa xodimlari tashkilot rahbari tomonidan ishga tayinlanadi va ishdan boʻshatiladi.

5. Idoraviy arxiv tashkilot rahbariyati tomonidan tasdiqlanadigan rejaga muvofiq ishlaydi va oʻz faoliyati haqida unga hisobot berib turadi.

6. Arxiv xodimlarining xizmat doirasidagi vazifalari tashkilot rahbarlari tomonidan tasdiqlanadigan lavozim yoʻriqnomasi bilan belgilanadi.

7. Ushbu Namunaviy nizomga muvofiq tashkilot oʻzining idoraviy arxivi toʻgʻrisidagi nizomini ishlab chiqadi va u Oʻzbekiston Respublikasi Adliya vazirligi huzuridagi “Oʻzarxiv” agentligining tegishli organi yoki muassasasi bilan kelishgan holda tashkilot rahbari tomonidan tasdiqlanadi.

IDORAVIY ARXIV HUJJATLARINING TARKIBI

8. Idoraviy arxiv hujjatlari tarkibiga quyidagilar kiradi:

8.1. Tashkilot tarkibiy boʻlinmalari hamda unga bevosita boʻysunadigan boʻlinmalarning (agar ularda amaliy jihatdan arxiv tashkil etishga ehtiyoj boʻlmasa) ish faoliyati jarayonida vujudga kelgan va ish yuritish davomida tugallangan hujjatlari;

8.3. Mazkur tashkilotda yoki unga qarashli boʻlgan tashkilotda ishlagan fan, texnika, madaniyat arboblari va ishlab chiqarish novatorlarining shaxsiy fondlari;

8.4. Matbaa hujjatlari, shu jumladan, arxiv hujjatlarini toʻldiruvchi idoraviy nashrlar hamda arxivning ilmiy-tadqiqot, axborot-maʼlumotnoma va boshqa ishlari uchun zarur boʻlgan materiallar;

8.5. Arxiv hujjatlari tarkibi va mazmunini ochib beruvchi ilmiy-maʼlumot apparati (hujjatlar roʻyxati, tarixiy maʼlumotnomalar, kataloglar, koʻrsatkichlar, sharxlar va hokazo).

IDORAVIY ARXIVNING ASOSIY VAZIFALARI VA FUNKSIYALARI

10. Idoraviy arxivning asosiy vazifalari: tashkilot hujjatlarini jamlash, hisobga olish, saqlash, ulardan foydalanish va davlat tomonidan saqlashga topshirish uchun tegishli arxivlarga topshirishdan iborat boʻladi.

11. Idoraviy arxiv oʻziga yuklangan vazifalarga muvofiq:

11.1. Oʻzbekiston Respublikasi Adliya vazirligi huzuridagi “Oʻzarxiv” agentligi organlari va muassasalari bilan kelishilgan meʼyoriy-uslubiy hujjatlarga muvofiq tashkilotning tarkibiy boʻlinmalari hamda arxivni butlash manbalari hisoblangan boshqa tashkilotlarning ish yuritish jarayonida tugallangan hamda shaxsiy tarkib hujjatlarini jamlaydi, hisobga oladi va saqlaydi;

11.2. Arxivga qabul qilingan yigʻmajildlar va hujjatlarga fond tartib raqamlarini beradi;

11.3. Arxivda saqlanayotgan hujjatlarga ilgari saqlashga topshirilgan hujjatlarning ilmiy-maʼlumot apparati bilan izchilligini hisobga olgan holda ilmiy-maʼlumot apparatini tashkil qiladi va toʻldirib boradi;

11.4. Arxivda saqlanayotgan hujjatlarning ilmiy va amaliy qimmatini aniqlash uchun ekspertiza qilishni tashkil etadi, ish yuritish jarayonida hujjatlar qimmatini ekspertiza qilishda uslubiy yordam koʻrsatadi;

11.5. Hujjatlarni topshirish uchun tayyorlaydi va “Arxiv ishi toʻgʻrisida”gi Oʻzbekiston Respublikasi Qonunida belgilangan muddatlarda topshiradi (Oʻzbekiston Respublikasi Vazirlar Mahkamasi tomonidan Milliy arxiv fondining davlatga tegishli qismi tarkibiga kiritilgan arxiv hujjatlarini doimiy (muddatsiz) saqlash huquqi berilgan idoraviy arxivlar bundan mustasno);

11.6.Oʻzbekiston Respublikasi Milliy arxiv fondi hujjatlarini roʻyxatdan oʻtkazish va ularning davlat hisobini yuritishni tashkil etish uchun zarur boʻlgan hujjatlarni tegishliligi boʻyicha Oʻzbekiston Respublikasi Adliya vazirligi huzuridagi “Oʻzarxiv” agentligi organlari va muassasalariga taqdim etadi hamda arxivda saqlanayotgan hujjatlarning idoraviy saqlanishi toʻgʻrisida tasdiqlangan statistik shakllar boʻyicha maʼlumotlar beradi;

Idoraviy arxivlar saqlovidagi Milliy arxiv fondi hujjatlari toʻgʻrisidagi maʼlumotlarni Davlat katalogiga belgilangan shaklga muvofiq taqdim etadi

11.7. Tashkilotning ish yuritish xizmati bilan birgalikda tarkibiy boʻlinmalar yigʻmajildlarining toʻgʻri shakllantirilishini va rasmiylashtirilishini nazorat qiladi, yigʻmajildlar roʻyxatini tuzishda ishtirok etadi;

11.8. Quyi tarkibiy boʻlinmalarda idoraviy arxivlarning ahvolini va ish yuritish qanday yoʻlga qoʻyilganligini tekshirishda ishtirok etadi;

11.9. Quyi tashkilotlarda saqlanayotgan hujjatlar hisobini olib boradi;

11.10. Hujjatlardan foydalanishni tashkil qiladi va belgilangan tartibda ham manfaatdor tashkilotlarga, ham fuqarolarga maʼlumotnomalar, hujjatlardan koʻchirmalar va nusxalar beradi;

11.11. Tizim tashkilotlari idoraviy arxivlarining ish tajribasini oʻrganadi va umumlashtiradi;

11.12. Tashkilotning oʻziga xosligini hisobga olgan holda arxiv ishi va ish yuritishda hujjatlar bilan ishlash boʻyicha meʼyoriy-uslubiy hujjatlar (yoʻriqnoma, tavsiya, nizom, saqlash muddatlari koʻrsatilgan hujjatlar roʻyxati va boshqalar)ni ishlab chiqishda ishtirok etadi, ularni Adliya vazirligi huzuridagi “Oʻzarxiv” agentligi organlari va muassasalari bilan kelishib oladi;

11.13. Quyi tashkilotlar xodimlariga hujjatlar bilan ishlashni tashkil qilish va arxiv ishi masalalariga doir maslahatlar beradi;

11.14. Quyi tashkilotlarning ish yuritish xizmati va arxiv xodimlari malakasini oshirish boʻyicha tadbirlar oʻtkazishda ishtirok etadi.

IDORAVIY ARXIVNING HUQUQLARI

12. Idoraviy arxivga oʻziga yuklangan vazifalarni va funksiyalarni bajarish uchun quyidagi huquqlar beriladi:

12.1. Tashkilotning tarkibiy boʻlinmalari va quyi tashkilot arxivlariga oʻz vakolatlariga kiruvchi masalalar boʻyicha belgilangan tartibda koʻrsatmalar berish;

12.2. Tashkilotning tarkibiy boʻlinmalari va quyi tashkilot arxivlaridan arxiv ishi uchun zarur boʻlgan maʼlumotlarni soʻrab olish;

12.3. Zarur hollarda ekspertlar va maslahatchilar sifatida tashkilotning malakali mutaxassislarini jalb etish;

12.4. Idoraviy arxiv huzurida arxiv ishiga koʻmaklashuvchi kengashlar va komissiyalar tashkil etish.