Oʻzbekiston Badiiy akademiyasi faoliyatini rivojlantirish va yanada takomillashtirishga doir qoʻshimcha chora-tadbirlar toʻgʻrisida (PQ-3219-son)

16.08.2017

Oʻzbekiston Respublikasi Prezidentining

Qarori

Mamlakatimiz oʻzining boy badiiy merosi bilan jahon sanʼati va madaniyati rivojiga katta hissa qoʻshgan qadimiy sivilizatsiya oʻchogʻi sifatida milliy badiiy anʼanalarning oʻziga xosligini saqlab kelayotgani dunyoning yetakchi sanʼat mutaxassislari tomonidan eʼtirof etilgan.

Bugungi kunda zamonaviy oʻzbek tasviriy sanʼatiga koʻplab yosh isteʼdod egalari kirib kelayotgani, turli yoʻnalishlarda faoliyat koʻrsatayotgan ijodkorlar, xususan, rassom va haykaltaroshlar, xalq ustalari ijodida yangicha mazmun va shakl, jahon sanʼat maydonida munosib oʻrin egallashga intilish tendensiyalari koʻzga tashlanayotganini ijobiy baholash lozim.

Shu bilan birga, taʼkidlash lozimki, hozirgi vaqtda tasviriy va amaliy sanʼat hamda dizayn sohasini rivojlantirish boʻyicha amalga oshirilayotgan ishlar talab darajasida emasligi, sohaga doir normativ-huquqiy hamda moddiy-texnik bazaning mukammal emasligi, malakali kadrlar yetishmasligi bu boradagi ishlarning samarasiga salbiy taʼsir etmoqda.

Oʻzbek tasviriy va amaliy sanʼati hamda dizayn yoʻnalishlarini yanada rivojlantirish, xalqimizning ushbu nafis sanʼatlarga boʻlgan estetik ehtiyojini qondirish, keng yoʻnalishda faoliyat olib borayotgan mutaxassislarning ijodiy imkoniyatlaridan unumli foydalanish, ularga shart-sharoit yaratish, badiiy salohiyatini oshirish, zamon talablariga mos badiiy taʼlim tizimini keng yoʻlga qoʻyish hamda Oʻzbekiston Badiiy akademiyasining faoliyatini rivojlantirish va takomillashtirish maqsadida:

1. Quyidagilar:

Oʻzbekiston Badiiy akademiyasining tashkiliy tuzilmasi 1-ilovaga muvofiq;

Oʻzbekiston Badiiy akademiyasi markaziy apparatining boshqaruv xodimlari umumiy cheklangan soni 33 kishidan iborat tuzilmasi 2-ilovaga muvofiq;

Oʻzbekiston Badiiy akademiyasining Qoraqalpogʻiston Respublikasi boʻlimi tuzilmasi 3-ilovaga muvofiq;

Oʻzbekiston Badiiy akademiyasi faoliyatini rivojlantirish va yanada takomillashtirish boʻyicha 2017 — 2021-yillarga moʻljallangan chora-tadbirlar dasturi 4-ilovaga muvofiq tasdiqlansin.

Oʻzbekiston Badiiy akademiyasi Badiiy ijodkorlar uyushmasining tuzilmasi 5-ilovaga muvofiq maʼqullansin.

Oʻzbekiston Badiiy akademiyasi faoliyatini rivojlantirish va yanada takomillashtirishga doir qoʻshimcha chora-tadbirlar dasturini amalga oshirish boʻyicha Respublika komissiyasi tarkibi 6-ilovaga muvofiq tasdiqlansin.

Oʻzbekiston Badiiy akademiyasi raisiga zarur hollarda, markaziy apparat hamda Oʻzbekiston Badiiy akademiyasining Qoraqalpogʻiston Respublikasi boʻlimi tuzilmasiga xodimlarning cheklangan umumiy soni doirasida oʻzgartirishlar kiritish huquqi berilsin.

2. Oʻzbekiston Badiiy akademiyasining asosiy vazifalari etib quyidagilar belgilansin:

Oʻzbekiston tasviriy va amaliy sanʼatini yanada rivojlantirish, shaxsiy va ijodiy koʻrgazmalar uchun keng imkoniyatlar yaratib berish hamda ijodkorlarning badiiy salohiyatini oshirish boʻyicha chora-tadbirlarni amalga oshirish;

jahondagi yetakchi badiiy akademiyalar, ushbu yoʻnalishdagi taʼlim muassasalari, tashkilotlar, atoqli madaniyat va sanʼat arboblari bilan ilgʻor tajribalar almashish maqsadida har tomonlama ijodiy hamkorlik aloqalarini rivojlantirish;

ijodkorlar va isteʼdodli yoshlarni ijtimoiy-iqtisodiy muhofaza qilish hamda Oʻzbekiston Badiiy akademiyasi tizimidagi tashkilotlarning moddiy-texnik bazasini mustahkamlash;

xalqimizning boy madaniy merosini, tasviriy va amaliy sanʼat hamda dizayn anʼanalarini rivojlantirish maqsadida Oʻzbekiston Badiiy akademiyasi Badiiy ijodkorlar uyushmasining (keyingi oʻrinlarda — Badiiy ijodkorlar uyushmasi deb yuritiladi) faoliyatini muvofiqlashtirish;

tasviriy va amaliy sanʼat hamda dizayn yoʻnalishidagi ijodkorlarni, milliy oʻzligimizni anglash gʻoyalarini tarannum etuvchi yuksak darajadagi yorqin sanʼat asarlarini yaratishdagi faoliyatini ragʻbatlantirish va bolalar sanʼatini rivojlantirish bilan bogʻliq chora-tadbirlarni amalga oshirish;

Oʻzbekiston Badiiy akademiyasi tizimidagi taʼlim muassasalarining faoliyatida badiiy taʼlim uzviyligi hamda uzluksizligini taʼminlashga erishish maqsadida ixtisoslashtirilgan sanʼat maktab-internatlari va oʻrta maxsus taʼlim muassasalari uchun boshlangʻich badiiy taʼlimni yoʻlga qoʻyish;

Oʻzbekiston madaniyati va sanʼatining taraqqiyoti yoʻlida tasviriy va amaliy sanʼat, dizayn va xalq hunarmandchiligi sohalari boʻyicha yuqori malakali mutaxassislar tayyorlash maqsadida Oʻzbekiston Badiiy akademiyasi tizimidagi taʼlim muassasalarining faoliyatini xorijiy tajribalar asosida takomillashtirish;

tasviriy va amaliy sanʼat hamda dizayn yoʻnalishida yetuk mutaxassislarni tayyorlash tizimini takomillashtirish, Oʻzbekiston Badiiy akademiyasi markaziy apparati va uning hududiy boʻlimlari faoliyatini kuchaytirish, bu boradagi vazifalarni amalga oshirishning zamonaviy, taʼsirchan usul va shakllarini tizimli asosda rivojlantirib borish;

Oʻzbekistonda va xorijda keng koʻlamdagi koʻrgazmalar tashkil etish orqali milliy sanʼatimiz yutuqlarini dunyo jamoatchiligiga tanitish, konferensiya, biyennalelar va boshqa anjumanlar oʻtkazish.

3. Oʻzbekiston Badiiy akademiyasi, Oʻzbekiston Respublikasi Madaniyat vazirligi va Fanlar akademiyasining mamlakatimiz muzeylari fondlarini mustaqillik yillarida yaratilgan yuksak badiiy qiymatga ega boʻlgan tasviriy va amaliy sanʼat asarlari bilan muntazam boyitib borish va asarlar bahosini ularning ijodiy va moddiy qiymatidan kelib chiqqan holda belgilash maqsadida:

Oʻzbekiston Respublikasi Madaniyat vazirligi qoshida Badiiy ekspertlar kengashini tashkil etish;

Oʻzbekiston Respublikasi Turizm va madaniy meros vazirligi huzuridagi Madaniy meros agentligiga mustaqillik yillarida yaratilgan, yuksak badiiy qiymatga ega boʻlgan tasviriy va amaliy sanʼat asarlarini sotib olish uchun har yili Oʻzbekiston Respublikasi Davlat budjeti mablagʻlari hisobidan 2 milliard soʻm mablagʻ ajratish toʻgʻrisidagi taklif maʼqullansin.

4. Belgilab qoʻyilsinki:

Oʻzbekiston Badiiy akademiyasining raisi maqomi, moddiy, maishiy, transport va tibbiy xizmat koʻrsatish shart-sharoitlari boʻyicha — vazirga, uning oʻrinbosari va bosh ilmiy kotib — vazir oʻrinbosarlariga tenglashtiriladi;

Oʻzbekiston Respublikasi Madaniyat vazirligi qoshidagi Badiiy ekspertlar kengashining tarkibi va Nizomi Oʻzbekiston Respublikasi Vazirlar Mahkamasi tomonidan tasdiqlanadi;

mustaqillik yillarida yaratilgan yuksak badiiy qiymatga ega boʻlgan tasviriy va amaliy sanʼat asarlari Oʻzbekiston Respublikasi Madaniyat vazirligi qoshidagi Badiiy ekspertlar kengashining qaroriga asosan sotib olinadi;

2018-yil 1-yanvardan boshlab Oʻzbekiston Badiiy akademiyasining haqiqiy aʼzolari uchun mehnatga haq toʻlashning eng kam miqdori 1,41 barobarida oylik gonorar toʻlash tizimi joriy qilinadi hamda ushbu gonorarlar jismoniy shaxslardan olinadigan daromad soligʻidan ozod qilinadi;

Oʻzbekiston Badiiy akademiyasining haqiqiy aʼzolari Oʻzbekiston Fanlar akademiyasining haqiqiy aʼzolariga belgilangan imtiyozlardan foydalanadi.

5. Oʻzbekiston Respublikasi Davlat budjetining mablagʻlari va qonunchilikda taqiqlanmagan boshqa manbalar Oʻzbekiston Badiiy akademiyasi faoliyatini moliyalashtirish manbalari etib belgilansin.

6. Badiiy ijodkorlar uyushmasi va uning hududiy boʻlimlari galereyalarini saqlash xarajatlari, shuningdek, ularning moddiy-texnik bazasini rivojlantirish xarajatlarini moliyalashtirish manbasi etib Oʻzbekiston ijodkorlarini qoʻllab-quvvatlash “Ilhom” jamoat fondi (keyingi oʻrinlarda — Fond deb yuritiladi) mablagʻlari va qonunchilikda taqiqlanmagan boshqa manbalar belgilansin.

Bunda Badiiy ijodkorlar uyushmasi hamda uning hududiy boʻlimlari xodimlari mehnatiga haq toʻlash xarajatlari Oʻzbekiston Respublikasi Davlat budjetidan Fondga ajratiladigan budjet mablagʻlari (subsidiya) hisobidan qoplanishi nazarda tutilsin.

7. Qoraqalpogʻiston Respublikasi Vazirlar Kengashi va viloyatlar hokimliklari Badiiy ijodkorlar uyushmasi hududiy boʻlimlarining hududiy galereyalarda joylashtirilishini hamda ularning moddiy-texnik bazasi mustahkamlanishini taʼminlasin.

8. Oʻzbekiston Respublikasi Moliya vazirligi Oʻzbekiston Badiiy akademiyasi markaziy apparatiga 2 ta shaxsan biriktirilgan va 1 ta navbatchi xizmat avtotransporti saqlash uchun limit ajratsin.

9. Oʻzbekiston Respublikasi Vazirlar Mahkamasi 1 oy muddatda:

Oʻzbekiston Badiiy akademiyasi faoliyatini takomillashtirish toʻgʻrisidagi Hukumat qarorini qabul qilsin;

Kamoliddin Behzod nomidagi Milliy rassomlik va dizayn instituti hududida Oʻzbekiston Badiiy akademiyasi binosini qurish ishlarini tashkillashtirsin va ushbu binoda rassomlar uchun tajriba ustaxonasini tashkil etish koʻzda tutilsin.

10. Oʻzbekiston Badiiy akademiyasi manfaatdor vazirliklar va idoralar bilan birgalikda ikki oy muddatda qonun hujjatlariga mazkur qarordan kelib chiqadigan oʻzgartish va qoʻshimchalar kiritish toʻgʻrisida Vazirlar Mahkamasiga takliflar kiritsin.

11. Ushbu qarorning ijrosini nazorat qilish Oʻzbekiston Respublikasining Bosh vaziri A. Aripov va Oʻzbekiston Respublikasi Prezidentining Davlat maslahatchisi X. Sultonov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 16-avgust,

PQ-3219-son

Oʻzbekiston Respublikasi Prezidentining 2017-yil 16-avgustdagi PQ-3219-son qaroriga 1-ILOVA

Oʻzbekiston Badiiy akademiyasining

TASHKILIY TUZILMASI

Oʻzbekiston Respublikasi Prezidentining 2017-yil 16-avgustdagi PQ-3219-son qaroriga 2-ILOVA

Oʻzbekiston Badiiy akademiyasi markaziy apparatining

TUZILMASI

Xodimlarning umumiy cheklangan soni (texnik va xizmat koʻrsatuvchi xodimlar bundan mustasno) 33 kishi.

Texnik va xizmat koʻrsatuvchi xodimlar soni qonunchilikda belgilangan meʼyorlar asosida aniqlanadi

Oʻzbekiston Respublikasi Prezidentining 2017-yil 16-avgustdagi PQ-3219-son qaroriga 3-ILOVA

Oʻzbekiston Badiiy akademiyasi Qoraqalpogʻiston boʻlimining

TUZILMASI

Xodimlarning umumiy cheklangan soni (texnik va xizmat koʻrsatuvchi xodimlar bundan mustasno) — 8 ta.

Texnik va xizmat koʻrsatuvchi xodimlar soni qonunchilikda davlat va xoʻjalik boshqaruvi organlari uchun belgilangan meʼyorlar asosida aniqlanadi.

Oʻzbekiston Respublikasi Prezidentining 2017-yil 16-avgustdagi PQ-3219-son qaroriga 4-ILOVA

Oʻzbekiston Badiiy akademiyasi faoliyatini rivojlantirish va yanada takomillashtirish boʻyicha 2017 — 2021-yillarga moʻljallangan chora-tadbirlar

DASTURI

T/r Tadbirlar nomi Bajarish muddati Masʼul ijrochilar I. Oʻzbekiston Badiiy akademiyasi faoliyati sohasidagi qonun hujjatlarini takomillashtirish va mustahkamlash 1. Toshkent shahrida zamon talablariga mos boʻlgan “Zamonaviy sanʼat galereyasi”ni tashkil etish boʻyicha takliflar ishlab chiqish. 2017-yil IV chorak Oʻzbekiston Badiiy akademiyasi, Moliya vazirligi, Iqtisodiyot vazirligi, Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Toshkent shahri hokimligi 2. Oʻzbekiston Badiiy akademiyasi tizimidagi madaniy-maʼrifiy muassasalarning namunaviy shtatlarini ishlab chiqish va tasdiqlash. 2017-yil IV chorak Oʻzbekiston Badiiy akademiyasi, Moliya vazirligi, Bandlik va mehnat munosabatlari vazirligi 3. Haykaltaroshlik monumental asarlarini yaratish uchun mos, kerakli sharoitga ega boʻlgan bino masalasini hal etish maqsadida Toshkent shahar hokimligi bilan birgalikda haykaltaroshlik monumental asarlarini yaratish uchun mos, boʻsh binoni Badiiy akademiya balansiga oʻtkazish boʻyicha Vazirlar Mahkamasiga taklif kiritish. 2018-yil I chorak Oʻzbekiston Badiiy akademiyasi, Madaniyat vazirligi, Moliya vazirligi, Iqtisodiyot vazirligi, Toshkent shahri hokimligi 4. Tasviriy va amaliy sanʼat, dizayn sohasida samarali faoliyat olib borayotgan, milliy madaniyatni avaylab asrash va targʻib qilish, maʼnaviy boy, jismonan baquvvat, har tomonlama barkamol avlodni tarbiyalashga munosib hissalarini qoʻshayotgan ijodkorlarni Oʻzbekiston Badiiy akademiyasining “Oltin”, “Kumush” medallari, diplomlari bilan taqdirlash boʻyicha nizom ishlab chiqish va Vazirlar Mahkamasiga kiritish. 2017-yil IV chorak Oʻzbekiston Badiiy akademiyasi 5. Badiiy ijodkorlar uyushmasi aʼzolarini ijtimoiy-iqtisodiy muhofaza qilish yuzasidan ularning ijodiy faoliyatini mehnat stajiga kiritish bilan bogʻliq tegishli taklif tayyorlash va Vazirlar Mahkamasiga kiritish. 2018-yil I-yarim yillik Oʻzbekiston Badiiy akademiyasi, Madaniyat vazirligi, Moliya vazirligi, Iqtisodiyot vazirligi, Bandlik va mehnat munosabatlari vazirligi, Adliya vazirligi 6. Koʻp yillar davomida Oʻzbekiston Badiiy akademiyasining barcha yoʻnalishlarida samarali mehnat qilib, uning samaradorligini oshirishga hissa qoʻshib kelayotgan fidoiy mutaxassislarni mehnatlarini munosib ragʻbatlantirish maqsadida ularning lavozim maoshlariga uzoq muddat xizmat qilganligi uchun toʻlanadigan qoʻshimcha toʻlovlar masalasini koʻrib chiqish boʻyicha loyiha tayyorlash va kiritish. 2018-yil III chorak Oʻzbekiston Badiiy akademiyasi, Oliy va oʻrta maxsus taʼlim vazirligi, Xalq taʼlimi vazirligi, Madaniyat vazirligi, Bandlik va mehnat munosabatlari vazirligi, Adliya vazirligi, Moliya vazirligi II. Badiiy akademiya tizimidagi muassasalarining moddiy-texnik bazasini mustahkamlash, zamonaviy jihozlash va samarali ijodiy faoliyat olib borish uchun qulay shart-sharoitlar yaratish, tasviriy va amaliy sanʼat, dizayn sohasida samarali faoliyat olib borayotgan ijodkorlarni qoʻllab-quvvatlash 7. Toshkent shahar, Chilonzor tumani, Lutfiy koʻchasi, 10a-uyda joylashgan Badiiy koʻrgazmalar direksiyasi fondida saqlanayotgan 17 mingdan ortiq badiiy qiymatga ega tasviriy va xalq amaliy sanʼati durdonalarini saqlash uchun barcha zarur shart-sharoitlarni yaratish maqsadida fond binosini mukammal rekonstruksiya qilish ishlarini Investitsiya dasturiga kiritish, mavjud kamchiliklarni bartaraf etish yuzasidan takliflarni va tegishli hujjatlar loyihalarini tayyorlash. 2018-yil I chorak Oʻzbekiston Badiiy akademiyasi, Madaniyat vazirligi, Moliya vazirligi, Iqtisodiyot vazirligi. 8. Badiiy ijodkorlar uyushmasi aʼzolarini muntazam ravishda sogʻlomlashtirish va dam olish maskanlariga imtiyozli narxlarda yoʻllanmalar bilan taʼminlash masalasi yuzasidan Oʻzbekiston Badiiy akademiyasining yillik rejasini ishlab chiqish va tasdiqlash 2018-yil I chorak Oʻzbekiston Kasaba uyushmalari Federatsiyasi Kengashi, Oʻzbekiston Badiiy akademiyasi 9. Respublika rassomlik kolleji (P. Benkov) respublikamizning chekka hududlaridan kelib tahsil olayotgan oʻquvchilarga qulay shart-sharoitlar yaratish maqsadida 400 oʻrinli oʻquvchilar turar joyi uchun yangi bino qurilishi boʻyicha; Respublika dizayn kollejining oʻquvchilar turar joyi tipida qurilgan binosini kapital rekonstruksiya qilish va zamonaviy tipdagi 200 oʻrinli oʻquvchilar turar joyiga qayta moslashtirish boʻyicha; Qoʻqon tasviriy va amaliy sanʼat kollej binosini kollejning umumiy kontingenti va binoning hozirgi quvvatini hisobga olgan holda qoʻshimcha yangi oʻquv bino qurish masalalari boʻyicha keyingi yillarda Investitsiya dasturiga kiritilishini taʼminlash maqsadida tegishli vazirlik va idoralar bilan loyiha tayyorlash va Vazirlar Mahkamasiga kiritish. 2018-yil II chorak Oʻzbekiston Badiiy akademiyasi, Moliya vazirligi, Iqtisodiyot vazirligi, Oliy va oʻrta maxsus kasb-hunar taʼlim vazirligi, Toshkent shahar hokimiyati, Fargʻona viloyat hokimiyati. 10. Oʻzbekiston Badiiy akademiyasi Badiiy ijodkorlar uyushmasi boʻlimlarining ijodiy ustaxonalari faoliyatini takomillashtirish, usta-shogird anʼanalarini yanada rivojlantirish hamda ularni moddiy-maʼnaviy qoʻllab-quvvatlash yuzasidan maxsus dastur ishlab chiqish va tasdiqlash. 2018-yil I chorak Oʻzbekiston Badiiy akademiyasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, manfaatdor vazirlik va idoralar 11. Ichki va tashqi turizmni rivojlantirishda muhim ahamiyat kasb etuvchi shaharsozlik doirasida barcha qurilish obyektlarini smetasiga badiiy ishlarni kiritish boʻyicha (haykaltaroshlik, monumental haykaltaroshlik, dastgohli rangtasvir, grafiga, keramika, landshaftlar) tayyorlanadigan loyihalarda Oʻzbekiston Badiiy akademiyasi ishtirokini taʼminlash. doimiy Davlat raqobat qoʻmitasi, Oʻzbekiston Badiiy akademiyasi, Moliya vazirligi, Iqtisodiyot vazirligi, Qoraqalpogʻiston Respublikasi, viloyatlar va Toshkent shahri hokimliklari 12. Oʻzbek tasviriy va amaliy sanʼatimiz yutuqlarini dunyo jamoatchiligiga tanitish maqsadida xalqaro miqyosdagi koʻchma koʻrgazmalarni tashkil etish, xalqaro miqyosdagi madaniy aloqalarni toʻgʻri yoʻlga qoʻyish, jahon hamjamiyatiga oʻz ijodiy ishlarini tanishtirish maqsadida mualliflarning oʻz asarlarini mamlakatimiz hududidan olib chiqish bilan bogʻliq toʻlovlardan Oʻzbekiston Badiiy akademiyasi Badiiy ijodkorlar uyushmasi aʼzolarini ozod qilish masalasini koʻrib chiqishga moʻljallangan takliflarni tayyorlash va Vazirlar Mahkamasiga kiritish. 2018-yil III chorak Oʻzbekiston Badiiy akademiyasi, Madaniyat vazirligi III. Maʼnaviy-maʼrifiy ishlar, tadbirlar hamda koʻrgazmalar faoliyati, Oʻzbekiston tasviriy va amaliy sanʼatini chuqur gʻoyaviy mazmun bilan boyitilishini taʼminlash, koʻrgazmalar faoliyatini yanada rivojlantirish, ularning badiiy va maʼnaviy saviyasini oshirish 13. Oʻzbekistonda keng koʻrgazma faoliyati orqali mamlakatimizning boy tarixi, bugungi yutuqlarini xalqimizga va dunyo jamoatchiligiga tanitish, oʻtkazilayotgan koʻrgazmalarga xorijiy mehmonlar, sayyohlarning hamda mahalliy aholi, oʻquvchi va talabalarning tashrifini koʻpaytirish maqsadida tizimdagi mavjud koʻrgazma zallarini hozirgi zamon talablariga mos ravishda taʼmirlash va koʻrgazma zallarini jahon standartlariga javob beruvchi koʻrgazma (vitrina, vitraj, stendlar va boshqa), orgtexnika (monitor, videoproyektor va boshqa), mebel jihozlari, yoritish tizimlari bilan toʻliq taʼminlash boʻyicha taklif tayyorlash va Moliya vazirligiga kiritish. 2018-yil I chorak Oʻzbekiston Badiiy akademiyasi, Moliya vazirligi 14. Ijodkorlarning Milliy istiqlol gʻoyasini tasviriy va amaliy sanʼatimiz orqali targʻib qilish yoʻlidagi harakatlarini sifat jihatdan yangi bosqichga koʻtarishda katta ahamiyat kasb etuvchi anʼanaviy “Tasviriy va amaliy sanʼat festivali”ni yuqori darajada tashkil etish. 2018-yil I chorak Oʻzbekiston Badiiy akademiyasi, Madaniyat vazirligi, Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, manfaatdor vazirlik va idoralar 15. Tarixiy va zamonaviy oʻzbek amaliy sanʼatini respublikada hamda xorijda keng targʻib qilish, jamoatchilikni milliy va chet el madaniyati va sanʼati bilan yaqindan tanishtirish va targʻib qilish ishlarini yuksak pogʻonaga koʻtarish maqsadida “I-Toshkent Xalqaro amaliy sanʼat Biyennalesi” va “Zamonaviy sanʼat Biyennalesi”ni har ikki yilda bir marta oʻtkazish. Har ikki yilda Oʻzbekiston Badiiy akademiyasi, Madaniyat vazirligi, Moliya vazirligi, Toshkent shahar hokimiyati va manfaatdor vazirlik va idoralar IV. Tasviriy va amaliy sanʼati hamda dizayn sohalarda kadrlar tayyorlash va ularning malakasini oshirish, bu borada zamonaviy pedagogik va xalqaro tajribalardan foydalanish, taʼlim tizimini isloh qilish. 16. Kamoliddin Behzod nomidagi Milliy rassomlik va dizayn institutining taʼlim tizimini isloh qilish yuzasidan mavjud masalalarni “2017 — 2021-yillarda Respublika Oliy taʼlim tizimini kompleks rivojlantirish Dasturi”ga kiritish boʻyicha kompleks chora-tadbirlarni amalga oshirish. 2017-yil IV chorak Oʻzbekiston Badiiy akademiyasi, Moliya vazirligi, Iqtisodiyot vazirligi, Oliy va oʻrta maxsus kasb-hunar taʼlim vazirligi, Toshkent shahar hokimiyati. 17. Kamoliddin Behzod nomidagi Milliy rassomlik va dizayn institutining mutaxassislik yoʻnalishida kasbiy (ijodiy) kirish imtihonlarini tashkil etishni tubdan oʻzgartirish boʻyicha takliflarni ishlab chiqib, Davlat qabul komissiyasiga kiritish 2018-yildan muntazam Oʻzbekiston Badiiy akademiyasi, Oliy va oʻrta maxsus taʼlim vazirligi, Taʼlim sifatini nazorat qilish davlat inspeksiyasi, Bandlik va mehnat munosabatlari vazirligi, Oʻzbekiston davlat konservatoriyasi 18. Badiiy taʼlim yoʻnalishlari boʻyicha oʻrta maxsus, kasb-hunar taʼlimi tizimida malaka oshirish va qayta tayyorlash tizimini tubdan isloh qilish va mazkur tizimda vertikal boshqaruvga asoslangan malaka oshirish va qayta tayyorlash muassasasini tashkil etish boʻyicha Vazirlar Mahkamasiga takliflar kiritish. 2018-yil I chorak Oʻzbekiston Badiiy akademiyasi, Madaniyat vazirligi, Oliy va oʻrta maxsus kasb-hunar taʼlim vazirligi, Moliya vazirligi 19. Tasviriy va amaliy sanʼat, dizayn yoʻnalishida ustoz-shogird tizimini rivojlantirish maqsadida Oʻzbekiston Badiiy akademiyasi Akademiklari, Oʻzbekiston Xalq rassomlari, Xalq ustalari, Oʻzbekistonda xizmat koʻrsatgan sanʼat arboblari unvonlariga ega boʻlgan mutaxassislarni darajada deb belgilashda, Badiiy taʼlimning mutaxassislarini darajasini belgilashda ularni Oliy Attestatsiya Komissiyasi bilan birgalikda ilmiy unvonlarga tenglashtirish mezonlarini qayta ishlab chiqish. 2018-yil I chorak Oʻzbekiston Badiiy Akademiyasi, Madaniyat vazirligi, Oliy va oʻrta maxsus kasb-hunar taʼlim vazirligi 20. Tizimdagi taʼlim muassasalarida yangi avlod oʻquv adabiyotlarini yaratish va ularni taʼlim jarayoniga keng tatbiq etish, zamonaviy oʻquv, oʻquv-metodik va ilmiy adabiyotlar bilan taʼminlash, shu jumladan, eng yangi xorijiy adabiyotlar sotib olish va tarjima qilish, axborot-resurs markazlari fondlarini muntazam yangilab borish. 2018-yil I chorak Oʻzbekiston Badiiy akademiyasi, Madaniyat vazirligi, Oliy va oʻrta maxsus kasb-hunar taʼlim vazirligi, Moliya vazirligi 21. Oʻzbekiston Badiiy akademiyasi taʼlim tizimida badiiy va ilmiy salohiyatni toʻgʻri yoʻlga qoʻyish, jahon standartlari talablariga muvofiq akademik badiiy taʼlimni oʻziga xosligini inobatga olib Kamoliddin Behzod nomidagi Milliy rassomlik va dizayn instituti salohiyatini belgilashda ilmiy salohiyatga boʻlgan talabni inkor etmagan holda, badiiy salohiyatni birlamchi etib olish bilan bogʻliq Oliy taʼlimdan keyingi taʼlimni tashkil etishga doir takliflarni ishlab chiqish va kiritish. 2018-yil I chorak Oʻzbekiston Fanlar akademiyasi, Oʻzbekiston Badiiy akademiyasi, Oliy va oʻrta maxsus kasb-hunar taʼlim vazirligi, Madaniyat vazirligi, Moliya vazirligi, Iqtisodiyot vazirligi, manfaatdor vazirlik va idoralar 22. Bolalar sanʼatini rivojlantirish, isteʼdodli yoshlarni qoʻllab-quvvatlash, Badiiy akademiya tasarrufidagi ixtisoslashtirilgan sanʼat maktab-internatlaridagi akademik badiiy taʼlim jarayonini isloh qilish, taʼlim sifatiga salbiy taʼsir etayotgan mavjud muammolarni hal qilish, taʼlimning uzviyligi va uzluksizligini taʼminlash maqsadida taʼlimni 1 — 11-sinflarda tashkil etish hamda musiqa yoʻnalishini saqlab qolish boʻyicha “Oʻzbekiston Respublikasi Vazirlar Mahkamasining 2008-yil 7-avgustdagi “Ayrim fanlar chuqur oʻrganiladigan davlat ixtisoslashtirilgan umumtaʼlim muassasalari faoliyatini takomillashtirish toʻgʻrisida”gi 173-son qaroriga qoʻshimcha va oʻzgartirishlar kiritish toʻgʻrisida” Vazirlar Mahkamasi qarori loyihasini tayyorlash va tasdiqlash. 2018-yil I chorak Oʻzbekiston Badiiy akademiyasi, Madaniyat vazirligi, Xalq taʼlimi vazirligi, Moliya vazirligi, Iqtisodiyot vazirligi, manfaatdor vazirlik va idoralar 23. Badiiy taʼlim yoʻnalishidagi muassasalarda oʻqitishning sifat darajasini oshirish va oʻquvchi-talabalar plastik anotomiyani mukammal oʻzlashtirishini taʼminlash maqsadida badiiy (tasviriy va amaliy sanʼat) taʼlimga ixtisoslashtirilgan oliy taʼlim muassasalari va oʻrta maxsus kasb-hunar kollejlari, ixtisoslashtirilgan sanʼat maktab-internatlari uchun jonli natura mehnati va ularning mehnatiga haq toʻlash tizimini ishlab chiqish. 2018-yil I chorak Oʻzbekiston Badiiy akademiyasi, Madaniyat vazirligi, Moliya vazirligi, Bandlik va mehnat munosabatlari vazirligi.

Oʻzbekiston Respublikasi Prezidentining 2017-yil 16-avgustdagi PQ-3219-son qaroriga 5-ILOVA

Oʻzbekiston Badiiy akademiyasi Badiiy ijodkorlar uyushmasining

tuzilmasi

Xodimlarning umumiy cheklangan soni (texnik va xizmat koʻrsatuvchi xodimlar bundan mustasno) — 26,5 ta.

Texnik va xizmat koʻrsatuvchi xodimlar soni qonun hujjatlarida belgilangan meʼyorlar asosida aniqlanadi.

Oʻzbekiston Badiiy akademiyasi Oʻzbekiston Badiiy ijodkorlar uyushmasining Qoraqalpogʻiston Respublikasi va viloyatlardagi hududiy boʻlimlari xodimlariga bir paytning oʻzida jamoatchilik asosida Badiiy Ijodkorlar uyushmasining Qoraqalpogʻiston Respublikasi va viloyatlardagi galereyalari xodimlari hisoblanadi va mazkur galereyalar faoliyatini belgilangan tartibda samarali tashkil etilishida javobgardir.

Oʻzbekiston Respublikasi Prezidentining 2017-yil 16-avgustdagi PQ-3219-son qaroriga 6-ILOVA

Oʻzbekiston Badiiy akademiyasi faoliyatini rivojlantirish va yanada takomillashtirishga doir qoʻshimcha chora-tadbirlar dasturini amalga oshirish boʻyicha Respublika komissiyasi

tarkibi

A. Aripov — Oʻzbekiston Respublikasining Bosh vaziri, Respublika komissiyasi rahbari lavozimi boʻyicha — Oʻzbekiston Respublikasi Prezidentining maslahatchisi, Respublika komissiyasi rahbari oʻrinbosari A. Nuriddinov — Oʻzbekiston Badiiy akademiyasi raisi, Respublika komissiyasi kotibi R. Usmonov — Toshkent shahri hokimi M. Muratov — Oʻzbekiston Respublikasi madaniyat vaziri A. Kamilov — Oʻzbekiston Respublikasi tashqi ishlar vaziri G. Saidova — Oʻzbekiston Respublikasi iqtisodiyot vaziri B. Xodjayev — Oʻzbekiston Respublikasi moliya vaziri I. Majidov — Oʻzbekiston Respublikasi oliy va oʻrta-maxsus taʼlim vaziri X. Aminov — Komoliddin Behzod nomidagi milliy rassomlik va dizayn instituti rektori B. Zakirov — “Davarxitektqurilish” qoʻmitasi raisi R. Gulyamov — Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisi A. Qodirov — Respublika Maʼnaviyat va maʼrifat markazi rahbari M. Ahmedov — Oʻzbekiston Yozuvchilar uyushmasi raisi A. Xakimov — Oʻzbekiston Fanlar akademiyasi Sanʼatshunoslik ilmiy-tadqiqot instituti boʻlim mudiri, sanʼatshunoslik fanlari doktori, professor Qoraqalpogʻiston Respublikasi Vazirlar Kengashi Raisi va viloyatlar hokimlari

Izoh:

Komissiya aʼzolari boshqa ishga oʻtgan taqdirda uning tarkibiga koʻrsatilgan lavozimlarga yangidan tayinlangan shaxslar yoki tegishli funksiyalarni bajarish zimmasiga yuklangan shaxslar kiritiladi.

Oʻzbekiston Respublikasi Prezidentining “Oʻzbekiston Badiiy akademiyasi faoliyatini rivojlantirish va yanada takomillashtirishga doir qoʻshimcha chora-tadbirlar toʻgʻrisida”gi qaroriga

SHARH

Mamlakatimizda mustaqillik yillarida badiiy ijodning boshqa turlari qatori tasviriy sanʼat sohasi rivojiga ham alohida eʼtibor qaratilmoqda. Bu borada, ayniqsa, Oʻzbekiston Respublikasi Prezidentining 1997-yil 23-yanvarda imzolangan “Oʻzbekiston Badiiy akademiyasini tashkil etish haqida”gi Farmoni, Oʻzbekiston Respublikasi Vazirlar Mahkamasining 1997-yil 11-martda qabul qilingan shu yoʻnalishdagi qarori muhim ahamiyatga ega boʻldi. Mazkur tarixiy hujjatlarda belgilab berilgan vazifalar asosida Badiiy akademiya tomonidan oʻtgan yigirma yil mobaynida tasviriy sanʼat sohasidagi davlat siyosatini amalga oshirish, rassomlar faoliyatini muvofiqlashtirish, ularning huquqlarini himoya qilish, moddiy va maʼnaviy manfaatlarini roʻyobga chiqarish, yosh rassomlarni tarbiyalash borasida koʻp ishlar qilindi. Bu haqda soʻz borganda, Badiiy akademiya tarkibida tasviriy sanʼat sohasi boʻyicha milliy taʼlimning koʻp bosqichli tizimi shakllantirilgani, “Sanʼat” jurnali tashkil etilib, u 1998-yildan buyon uch tilda — oʻzbek, rus, ingliz tillarida chop etilayotgani, boy badiiy merosimiz va zamonaviy tasviriy sanʼatimizning rivojlanish tendensiyalarini oʻrganishga qaratilgan ilmiy tadqiqotlarning moddiy, ilmiy-uslubiy bazasi mustahkamlanganini taʼkidlash lozim. Shu bilan birga, xalqaro hamkorlik doirasida xorijiy madaniyat va sanʼat arboblari bilan uchrashuv va muloqotlar oʻtkazish boʻyicha oʻziga xos tizim shakllangani, mamlakatimizning koʻplab rassomlari xalqaro anjuman va koʻrgazmalar, festival va tanlovlarda qatnashib, nufuzli oʻrinlarni qoʻlga kiritayotgani, oʻnlab ijodkorlar davlatimizning yuksak mukofotlariga sazovor boʻlgani ham Badiiy akademiya faoliyati bilan bevosita bogʻliq. Ayni vaqtda hozirgi jadal surʼatlar bilan rivojlanayotgan davrning oʻzi tasviriy sanʼat sohasini yanada taraqqiy ettirish, uning bugungi kundagi oʻrni va mavqeyini oshirish, Oʻzbekiston Badiiy akademiyasi faoliyatini takomillashtirishni talab etayotganini eʼtirof etish lozim. Ayniqsa, tasviriy sanʼat ijodkorlarining imkoniyat va salohiyatini toʻlaqonli yuzaga chiqarish, rangtasvir va amaliy sanʼat asarlarining yuksak sifatini taʼminlash borasida keyingi paytlarda dolzarb muammolar toʻplanib qolgani, jumladan, sohaga doir normativ-huquqiy hujjatlarning bugungi kun talablariga javob bermasligi, mavjud moddiy-texnik bazaning nochorligi, malakali kadrlar yetishmasligi, xalqaro ijodiy va ilmiy aloqalarni rivojlantirish hamda ijodkorlarni har tomonlama ragʻbatlantirish va isteʼdodli yoshlarning ijodiy imkoniyatlarini kengaytirishda yuzaga kelayotgan sustkashliklar mazkur sohaga davlatimiz tomonidan eʼtiborni kuchaytirishni taqozo etmoqda. Maʼlumki, 2017-yil 3-avgust kuni Oʻzbekiston Respublikasi Prezidenti Shavkat Mirziyoyev ijodkor ziyolilar vakillari bilan uchrashuvda taraqqiyotimizning hozirgi bosqichida madaniyat, adabiyot va sanʼat sohasini, jumladan, tasviriy sanʼat yoʻnalishini rivojlantirish borasidagi dolzarb vazifalarni belgilab, ularni hal etish yoʻllarini koʻrsatib berdi. Oʻtgan qisqa muddatda ana shu taklif va tashabbuslarni amalga oshirish boʻyicha davlatimiz rahbari tomonidan 10 ga yaqin farmon va qarorlar qabul qilindi. Kecha imzolangan “Oʻzbekiston Badiiy akademiyasi faoliyatini rivojlantirish va yanada takomillashtirishga doir qoʻshimcha chora-tadbirlar toʻgʻrisida”gi qaror shu yoʻnalishdagi yana bir muhim hujjat boʻldi. Qarorda xalqimizni tasviriy sanʼat namunalaridan bahramand etish va dizayn yoʻnalishida faoliyat olib borayotgan mutaxassislarning ijodiy imkoniyatlaridan unumli foydalanish, ular uchun zarur shart-sharoitlar yaratish, sanʼat asarlarida milliy va umuminsoniy anʼanalarni yuksak darajada ifoda etishga erishish, yurtimizda oʻtkazilayotgan koʻrgazmalarning badiiy saviyasini oshirish, rassomlik va dizayn sohasiga ixtisoslashgan taʼlim tizimini bugungi kun talablaridan kelib chiqqan holda takomillashtirish borasida muhim vazifalar belgilandi. Shuningdek, jahon miqyosida oʻz oʻrniga ega boʻlgan oʻzbek tasviriy va amaliy sanʼati maktablarining anʼanalarini saqlash va davom ettirish, zamonaviy dizayn yoʻnalishlari boʻyicha faoliyat yuritayotgan isteʼdodli yoshlarni qoʻllab-quvvatlash hamda Oʻzbekiston Badiiy akademiyasining faoliyatini rivojlantirish va takomillashtirish masalalariga alohida eʼtibor qaratilgan. Qarorga muvofiq Oʻzbekiston Badiiy akademiyasi hamda uning Qoraqalpogʻiston Respublikasi boʻlimining yangilangan tashkiliy tuzilmasi tasdiqlandi. Yana bir muhim jihati shundaki, mazkur qaror asosida Oʻzbekiston Badiiy akademiyasi faoliyatini rivojlantirish va yanada takomillashtirish boʻyicha 2017 — 2021-yillarga moʻljallangan chora-tadbirlar dasturi va mazkur dasturni amalga oshirish boʻyicha Respublika komissiyasi tarkibi tasdiqlandi. Qarorda mamlakatimiz madaniy hayoti uchun muhim ahamiyatga ega boʻlgan bir qancha masalalarga alohida eʼtibor berilgan. Jumladan, Oʻzbekiston tasviriy va amaliy sanʼatini yanada rivojlantirish maqsadida jahondagi yetakchi badiiy akademiyalar, ushbu yoʻnalishdagi taʼlim muassasalari, tashkilotlar, madaniyat va sanʼat ustalari oʻrtasida oʻzaro foydali tajribalar almashishni yoʻlga qoʻyish maqsadida har tomonlama ijodiy aloqalarni rivojlantirish belgilangan. Ushbu qarorda Oʻzbekiston Badiiy akademiyasi tizimidagi tashkilotlarning moddiy-texnik bazasini mustahkamlash, xalqimizning boy madaniy merosini, tasviriy va amaliy sanʼat hamda dizayn anʼanalarini rivojlantirish maqsadida Oʻzbekiston Badiiy akademiyasining Badiiy ijodkorlar uyushmasi faoliyatini muvofiqlashtirish boʻyicha chora-tadbirlarni amalga oshirish nazarda tutilgan. Yana shunisi muhimki, qarorda tasviriy va amaliy sanʼat hamda dizayn yoʻnalishidagi ijodkorlarni ragʻbatlantirish, shuningdek, bolalar sanʼatini rivojlantirish, Oʻzbekiston Badiiy akademiyasi tizimidagi taʼlim muassasalari faoliyatida ixtisoslashtirilgan sanʼat maktab-internatlari va oʻrta maxsus taʼlim muassasalari uchun boshlangʻich badiiy taʼlimni yoʻlga qoʻyish rejalashtirilgan. Shuningdek, qarorda tasviriy va amaliy sanʼat, dizayn va xalq hunarmandligi sohalari boʻyicha yuqori malakali mutaxassislar tayyorlash uchun Oʻzbekiston Badiiy akademiyasi tizimidagi taʼlim muassasalarining faoliyatini xorijiy tajribalar asosida takomillashtirish, xalqaro ijodiy va ilmiy aloqalarni mustahkamlash, Oʻzbekistonda va xorijda keng koʻlamda koʻrgazmalar oʻtkazish orqali milliy sanʼatimiz yutuqlarini dunyo jamoatchiligiga tanitish, konferensiya, biyennale va boshqa anjumanlar oʻtkazishga alohida urgʻu berilgan. Toshkent shahri, Mirzo Ulugʻbek tumani, Sodiq Azimov koʻchasi, 35-uyda joylashgan Kamoliddin Behzod nomidagi Milliy rassomlik va dizayn instituti hududida Oʻzbekiston Badiiy akademiyasi binosini qurish ishlarini tashkil etish ham qarorda koʻzda tutilgan. Ayni vaqtda Oʻzbekiston Badiiy akademiyasi, Oʻzbekiston Respublikasi Madaniyat vazirligi va Fanlar akademiyasining mamlakatimiz muzeylari fondlarini mustaqillik yillarida yaratilgan yuksak badiiy qiymatga ega boʻlgan tasviriy va amaliy sanʼat asarlari bilan muntazam boyitib borish va asarlar qiymatini ijodiy va moddiy salohiyatidan kelib chiqqan holda belgilash qayd etilgan. Shu bilan birga, qarorga binoan Oʻzbekiston Respublikasi Madaniyat vazirligi qoshida Badiiy ekspertlar kengashini tashkil etish, mustaqillik yillarida yaratilgan yuksak badiiy qiymatga ega boʻlgan tasviriy va amaliy sanʼat asarlari Oʻzbekiston Respublikasi Madaniyat vazirligi qoshidagi Badiiy ekspertlar kengashining qaroriga asosan sotib olinishi taʼkidlangan. Shuningdek, 2018-yil 1-yanvardan boshlab Oʻzbekiston Badiiy akademiyasining haqiqiy aʼzolari uchun eng kam ish haqining toʻrt barobari miqdorida oylik gonorar toʻlash tizimi joriy etiladi va ushbu gonorar mablagʻlari jismoniy shaxslardan olinadigan daromad soligʻidan ozod qilinadi. Muxtasar aytganda, mazkur qaror Oʻzbekiston Badiiy akademiyasi faoliyatini tubdan takomillashtirish, uning ish samaradorligini oshirishda muhim ahamiyat kasb etadi. Ijodkorlarni har tomonlama moddiy va maʼnaviy ragʻbatlantirish, isteʼdodli yoshlarning ijodiy imkoniyatlarini kengaytirish, rassomlik va dizayn sanʼati sohasida taʼlim tizimini tubdan isloh qilish, xalqimizning tasviriy va amaliy sanʼat sohasidagi badiiy merosini asrash va keyingi avlodlarga yetkazish, yurtdoshlarimizning tasviriy va amaliy sanʼat sohasidagi estetik ehtiyoj va talablarini qanoatlantirishda bu hujjat keng imkoniyatlar yaratib beradi.