Artemiya sistalarini yigʻib olishga ruxsatnoma berishni tartibga solishga doir qoʻshimcha chora-tadbirlar toʻgʻrisida (614-son)
11.08.2017
Oʻzbekiston Respublikasi Vazirlar Mahkamasining
Qarori
Oʻzbekiston Respublikasi Prezidentining “2017-2018-yillar davrida Qoraqalpogʻiston Respublikasining Moʻynoq tumanini iqtisodiy rivojlantirish va aholi bandligini taʼminlash boʻyicha qoʻshimcha chora-tadbirlar toʻgʻrisida” 2017-yil 28-fevraldagi PQ-2803-son qarori ijrosini taʼminlash hamda tadbirkorlik subyektlari uchun qulay shart-sharoitlar yaratish maqsadida Oʻzbekiston Respublikasi Vazirlar Mahkamasi qaror qiladi:
1. Oʻzbekiston Respublikasi ekologiya va atrof muhitni muhofaza qilish davlat qoʻmitasiga 2017-yilda Oʻzbekiston Respublikasi Fanlar akademiyasining xulosalari asosida 2017-yil uchun artemiya sistalarini yigʻib olishga qoʻshimcha kvotalarni tasdiqlashga istisno tariqasida ruxsat berilsin.
2. Oʻzbekiston Respublikasi Fanlar akademiyasi 5 kun muddatda tabiatdan foydalanuvchilarning buyurtmanomalari asosida Oʻzbekiston Respublikasi ekologiya va atrof muhitni muhofaza qilish davlat qoʻmitasi tomonidan shakllantirilayotgan artemiya tsistlarini yigʻib olishga kvotalar boʻyicha xulosa berilishini taʼminlasin.
3. Oʻzbekiston Respublikasi ekologiya va atrof muhitni muhofaza qilish davlat qoʻmitasi Oʻzbekiston Respublikasi Fanlar akademiyasining xulosalariga muvofiq 2017-yilda artemiya sistalarini yigʻib olishga qoʻshimcha kvota 5 kun muddatda tasdiqlanishini taʼminlasin.
4. Belgilansinki, artemiya sistalarini yigʻib olishga ruxsatnoma Vazirlar Mahkamasining 2014-yil 20-oktabrdagi 290-son qarori bilan tasdiqlangan Hayvonot dunyosi obyektlaridan foydalanish va hayvonot dunyosi obyektlaridan foydalanish sohasida ruxsat berish tartib-taomillaridan oʻtish tartibi toʻgʻrisidagi nizomda belgilangan tartibda Qoraqalpogʻiston Respublikasi ekologiya va atrof muhitni muhofaza qilish qoʻmitasi tomonidan beriladi.
5. Artemiya sistalarini yigʻib olish uchun beriladigan ruxsatnoma blankasining namunaviy shakli ilovaga muvofiq tasdiqlansin.
6. Mazkur qarorning bajarilishini nazorat qilish Oʻzbekiston Respublikasi Ekologiya va atrof muhitni muhofaza qilish davlat qoʻmitasi raisi B.T. Qoʻchqorov, Qoraqalpogʻiston Respublikasi Vazirlar Kengashi Raisi K.R. Sariyev zimmasiga hamda Oʻzbekiston Respublikasi Vazirlar Mahkamasining Sogʻliqni saqlash, ekologiya va atrof muhitni muhofaza qilish, jismoniy tarbiya va sport masalalari axborot-tahlil departamentiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2017-yil 11-avgust,
614-son
Vazirlar Mahkamasining 2017-yil 11-avgustdagi 614-son qaroriga ILOVA