Oʻzbekiston Respublikasi Xalq taʼlimi vazirligi faoliyatini takomillashtirish toʻgʻrisida (PQ-3180-son)
08.08.2017
Oʻzbekiston Respublikasi Prezidentining
Qarori
Xalq taʼlimi tizimini tubdan takomillashtirish, uning barcha boʻgʻinlari faoliyati samaradorligini hamda masʼuliyatini oshirish, xalq taʼlimi muassasalaridagi oʻquv-tarbiya jarayoniga ilgʻor pedagogik va axborot-kommunikatsiya texnologiyalarini samarali joriy etish orqali taʼlim sifatini taʼminlash, maktab oʻquvchilarini vatanparvarlik, milliy anʼanalar va qadriyatlarni hurmat qilish ruhida tarbiyalash, maʼnaviy va jismoniy sogʻlom avlodni kamol toptirish maqsadida:
1. Quyidagilar Oʻzbekiston Respublikasi Xalq taʼlimi vazirligining asosiy vazifalari va faoliyati yoʻnalishlari etib belgilansin:
birinchi, maktabgacha, umumiy oʻrta va maktabdan tashqari taʼlimni har tomonlama rivojlantirish, oʻquvchilarning maʼnaviy-axloqiy va intellektual rivojlanish darajasini yanada yuksaltirishga yoʻnaltirilgan taʼlim sohasida yagona davlat siyosatini amalga oshirish;
ikkinchi, umumiy oʻrta taʼlim maktablari 10-11-sinf oʻquvchilariga kasb-hunar oʻrgatishni taʼminlash borasidagi faoliyatni muvofiqlashtirish hamda umumiy oʻrta taʼlimning davlat taʼlim standartlariga, maktabgacha va maktabdan tashqari taʼlimga qoʻyiladigan talablarga muvofiq xalq taʼlimi muassasalariga, shuningdek, iqtidorli bolalar uchun ixtisoslashtirilgan taʼlim muassasalariga metodik rahbarlikni amalga oshirish;
uchinchi, oʻquv-tarbiya jarayoniga oʻqitishning zamonaviy ilgʻor shakllarini, yangi pedagogik va axborot texnologiyalarini, oʻquvchilarning oʻquv, psixologik va jismoniy yuklamasini optimallashtirishni hisobga olgan holda taʼlim-tarbiyaning samarali shakllari va usullarini joriy etish;
toʻrtinchi, umumiy oʻrta taʼlim muassasalarida chet tillarni oʻqitish samaradorligini taʼminlash, oʻquvchilarni kasb-hunarga yoʻnaltirish va mehnat taʼlimini yaxshilash boʻyicha kompleks chora-tadbirlarni amalga oshirish;
beshinchi, taʼlim maktablari hamda oʻrta maxsus, kasb-hunar taʼlimi muassasalari oʻrtasida oʻzaro integratsiyani taʼminlash orqali 11 yillik oʻrta taʼlimni joriy etish boʻyicha tashkiliy-metodik tadbirlar tizimini amalga oshirish;
oltinchi, oʻquv-tarbiya jarayoniga oʻqitishning zamonaviy ilgʻor shakllarini, yangi pedagogik va axborot texnologiyalarini, kasbga yoʻnaltirish, taʼlim va tarbiyaning samarali shakllari hamda usullarini joriy etish;
yettinchi, xalq taʼlimi muassasalarida Oʻzbekiston Yoshlar ittifoqi boʻlimlari faoliyatini samarali yoʻlga qoʻyish orqali oʻquvchilarni umuminsoniy qadriyatlar, yuksak maʼnaviyat, insonparvarlik ruhida tarbiyalash, ularning qalbi va ongiga mustaqillik gʻoyalarini yanada chuqur singdirish, “ommaviy madaniyat” koʻrinishidagi yot gʻoyalarga qarshi immunitetni mustahkamlash;
sakkizinchi, mazmun va sifat jihatidan xalqaro talablarga javob beradigan, ilgʻor pedagogik va axborot-kommunikatsiya texnologiyalarini qoʻllagan holda yangilangan oʻquv rejalari va dasturlariga muvofiq ishlab chiqilgan oʻquv va oʻquv-metodik adabiyotlarning yangi avlodi yaratilishi va nashr etilishini tashkil qilish;
toʻqqizinchi, maktabgacha, umumiy oʻrta va maktabdan tashqari taʼlim muassasalari tomonidan davlat taʼlim standartlari va talablari bajarilishining tizimli monitoringini olib borish;
oʻninchi, maktabgacha, umumiy oʻrta va maktabdan tashqari taʼlim muassasalarining moddiy-texnika bazasini belgilangan norma va standartlarga muvofiq yanada rivojlantirish va mustahkamlash, ular faoliyatining samaradorligi oshirilishini taʼminlash boʻyicha tizimli asosda kompleks chora-tadbirlarni amalga oshirish;
oʻn birinchi, yangi pedagogik va axborot texnologiyalarini, xalqaro ilgʻor tajribani qoʻllagan holda pedagog kadrlarni tayyorlash, qayta tayyorlash va malakasini oshirish tizimining samarali faoliyatini tashkil etish, taʼlim muassasalarini zamonaviy bilimlarga ega boʻlgan yuqori malakali kadrlar bilan taʼminlash;
oʻn ikkinchi, xalqaro aloqalarni kengaytirish va mustahkamlash, mamlakatimizning xalq taʼlimi sohasida erishgan yutuqlarini konferensiyalar, koʻrgazmalar va boshqa tadbirlarni oʻtkazish yoʻli bilan xalqaro darajada keng yoritish, xalq taʼlimi tizimiga xorijiy investitsiyalar va grantlarni jalb etish.
Oʻzbekiston Respublikasi xalq taʼlimi vaziri U.I. Inoyatov zimmasiga vazirlikka yuklatilgan vazifalar va faoliyat yoʻnalishlari sifatli hamda toʻliq hajmda amalga oshirilishi yuzasidan shaxsiy masʼuliyat yuklansin
2. Quyidagilar:
Oʻzbekiston Respublikasi Xalq taʼlimi vazirligining tashkiliy tuzilmasi 1-ilovaga muvofiq;
Oʻzbekiston Respublikasi Xalq taʼlimi vazirligi markaziy apparatining boshqaruv xodimlari cheklangan soni 64 nafardan iborat boʻlgan tuzilmasi 2-ilovaga muvofiq;
Qoraqalpogʻiston Respublikasi Xalq taʼlimi vazirligining tuzilmasi 3-ilovaga muvofiq;
viloyatlar Xalq taʼlimi boshqarmalarining namunaviy tuzilmasi 4-ilovaga muvofiq;
Toshkent shahar Xalq taʼlimi bosh boshqarmasining tuzilmasi 5-ilovaga muvofiq;
Oʻzbekiston Respublikasi Xalq taʼlimi vazirligi Respublika taʼlim markazining tuzilmasi 6-ilovaga muvofiq;
Oʻzbekiston Respublikasi Xalq taʼlimi vazirligining Oʻquvchilarni kasb-hunarga yoʻnaltirish va psixologik-pedagogik respublika tashxis markazining tuzilmasi 7-ilovaga muvofiq tasdiqlansin.
3. Xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlari tuman (shahar) xalq taʼlimi boʻlimlari etib qayta tashkil qilinsin.
Tuman (shahar) xalq taʼlimi boʻlimlarining namunaviy tuzilmasi 8-ilovaga muvofiq tasdiqlansin.
4. Oʻzbekiston Respublikasi xalq taʼlimi vaziriga Oʻzbekiston Respublikasi Xalq taʼlimi vazirligi markaziy apparati va hududiy xalq taʼlimi organlari tuzilmasiga xodimlarning tasdiqlangan umumiy soni doirasida oʻzgartirishlar kiritish huquqi berilsin.
5. Oʻzbekiston Respublikasi Vazirlar Mahkamasi bir oy muddatda:
Oʻzbekiston Respublikasi Xalq taʼlimi vazirligi toʻgʻrisida nizomni;
Oʻzbekiston Respublikasi Xalq taʼlimi vazirligi Respublika taʼlim markazining Ustavini;
Oʻzbekiston Respublikasi Xalq taʼlimi vazirligi Oʻquvchilarni kasb-hunarga yoʻnaltirish va psixologik-pedagogik respublika tashxis markazining ustavini tasdiqlasin.
6. Belgilansinki, Respublika taʼlim markazi hamda Oʻquvchilarni kasb-hunarga yoʻnaltirish va psixologik-pedagogik respublika tashxis markazi metodistlarining mehnatiga haq toʻlash Toshkent shahri Xalq taʼlimi bosh boshqarmasi metodistlari uchun belgilangan mehnatga haq toʻlash shartlari asosida amalga oshiriladi.
7. Oʻzbekiston Respublikasi Xalq taʼlimi vazirligi bir oy muddatda:
Toshkent shahar Xalq taʼlimi bosh boshqarmasi va viloyatlar xalq taʼlimi boshqarmalari toʻgʻrisidagi nizomlarni;
tuman (shahar) xalq taʼlimi boʻlimlari toʻgʻrisidagi nizomlarni tasdiqlasin.
8. Qoraqalpogʻiston Respublikasi Vazirlar Kengashi bir oy muddatda Qoraqalpogʻiston Respublikasi Xalq taʼlimi vazirligi toʻgʻrisidagi Nizomni tasdiqlasin.
9. Oʻzbekiston Respublikasi Hukumatining 9-ilovaga muvofiq ayrim qarorlari oʻz kuchini yoʻqotgan deb hisoblansin.
10. Oʻzbekiston Respublikasi Xalq taʼlimi vazirligi Adliya vazirligi hamda boshqa manfaatdor vazirliklar va idoralar bilan birgalikda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida bir oy muddatda Vazirlar Mahkamasiga takliflar kiritsin.
11. Mazkur qarorning bajarilishini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidentining Davlat maslahatchisi A.N. Yunusxodjayev, Oʻzbekiston Respublikasi xalq taʼlimi vaziri U.I. Inoyatov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2017-yil 8-avgust,
PQ-3180-son
Oʻzbekiston Respublikasi Prezidentining 2017-yil 8-avgustdagi PQ-3180-son qaroriga 1-ILOVA
Oʻzbekiston Respublikasi Xalq taʼlimi vazirligining
TAShKILIY TUZILMASI
Oʻzbekiston Respublikasi Prezidentining 2017-yil 8-avgustdagi PQ-3180-son qaroriga 2-ILOVA
Oʻzbekiston Respublikasi Xalq taʼlimi vazirligi markaziy apparatining
TUZILMASI
Boshqaruv xodimlarining cheklangan soni — 64 nafar.
Oʻzbekiston Respublikasi Prezidentining 2017-yil 8-avgustdagi PQ-3180-son qaroriga 3-ILOVA
Qoraqalpogʻiston Respublikasi Xalq taʼlimi vazirligining
TUZILMASI
* Ushbu lavozimlar Oʻzbekiston Respublikasi Xalq taʼlimi vazirligi nomenklaturasiga kiradi.
Xodimlarning cheklangan umumiy soni — 32 nafar, shundan boshqaruv xodimlari — 11 nafar, metodistlar — 21 nafar.
Oʻzbekiston Respublikasi Prezidentining 2017-yil 8-avgustdagi PQ-3180-son qaroriga 4-ILOVA
Viloyatlar xalq taʼlimi boshqarmalarining
NAMUNAVIY TUZILMASI
* Jizzax, Navoiy, Sirdaryo va Xorazm viloyatlarida maktabdan tashqari taʼlim muassasalari boʻyicha metodist vazifasi boʻlim boshligʻiga yuklatiladi.
** Ushbu lavozimlar Oʻzbekiston Respublikasi Xalq taʼlimi vazirligi nomenklaturasiga kiradi.
Xodimlarning cheklangan umumiy soni (yordamchi xodimlarsiz) — 356 nafar, shundan boshqaruv xodimlari — 120 nafar, metodistlar — 236 nafar.
Oʻzbekiston Respublikasi Prezidentining 2017-yil 8-avgustdagi PQ-3180-son qaroriga 5-ILOVA
Toshkent shahar xalq taʼlimi bosh boshqarmasining
TUZILMASI
* Ushbu lavozimlar Oʻzbekiston Respublikasi Xalq taʼlimi vazirligi nomenklaturasiga kiradi.
Xodimlarning cheklangan umumiy soni — 32 nafar, shundan boshqaruv xodimlari — 12 nafar, metodistlar — 20 nafar.
Oʻzbekiston Respublikasi Prezidentining 2017-yil 8-avgustdagi PQ-3180-son qaroriga 6-ILOVA
Oʻzbekiston Respublikasi Xalq taʼlimi vazirligining Respublika taʼlim markazining
TUZILMASI
Boshqaruv xodimlarining cheklangan umumiy soni — 23 nafar.
Oʻzbekiston Respublikasi Prezidentining 2017-yil 8-avgustdagi PQ-3180-son qaroriga 7-ILOVA
Oʻzbekiston Respublikasi Xalq taʼlimi vazirligining Oʻquvchilarni kasb-hunarga yoʻnaltirish va psixologik-pedagogik respublika tashxis markazining
TUZILMASI
Boshqaruv xodimlarining cheklangan umumiy soni — 16 nafar.
Oʻzbekiston Respublikasi Prezidentining 2017-yil 8-avgustdagi PQ-3180-son qaroriga 8-ILOVA
Tuman (shahar) xalq taʼlimi boʻlimlarining
NAMUNAVIY TUZILMASI
* Ushbu lavozimlar Qoraqalpogʻiston Respublikasi Xalq taʼlimi vazirligi, Toshkent shahar va viloyatlar xalq taʼlimi boshqarmalari nomenklaturasiga kiradi.
Xodimlarning cheklangan umumiy soni (yordamchi xodimlarsiz) — 5 321 nafar, shundan boshqaruv xodimlari — 1980 nafar, metodistlar — 3 341 nafar.
Oʻzbekiston Respublikasi Prezidentining 2017-yil 8-avgustdagi PQ-3180-son qaroriga 9-ILOVA
Oʻzbekiston Respublikasi Hukumatining oʻz kuchini yoʻqotgan ayrim hujjatlari
ROʻYXATI
1. Vazirlar Mahkamasining “Oʻzbekiston Respublikasi Xalq taʼlimi vazirligi faoliyatini takomillashtirish toʻgʻrisida” 2004-yil 5-avgustdagi 372-sonli qarori (Oʻzbekiston Respublikasi QT, 2004-y., 8-son, 76-modda).
2. Vazirlar Mahkamasining “Xalq taʼlimi hududiy organlari tuzilmasini takomillashtirish toʻgʻrisida” 2011-yil 1-martdagi 52-sonli qarorining 1-ilovasi (Oʻzbekiston Respublikasi QHT, 2011-y., 9-son, 91-modda).
3. Vazirlar Mahkamasining “Oʻzbekiston Respublikasi Xalq taʼlimi vazirligi faoliyatini tashkil etishni yanada takomillashtirish toʻgʻrisida” 2016-yil 27-iyundagi 214-sonli qarori (Oʻzbekiston Respublikasi QHT, 2016-y., 26-son, 316-modda).