Oʻzbekiston Respublikasi Prezidenti huzuridagi Davlat boshqaruvi akademiyasida boshqaruv kadrlarini tayyorlash, qayta tayyorlash va malakasini oshirish tizimini yanada rivojlantirish chora-tadbirlari toʻgʻrisida (PF-5139-son)

08.08.2017

Oʻzbekiston Respublikasi Prezidentining

Farmoni

2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasida belgilangan vazifalarni hisobga olgan holda boshqaruv kadrlarini tayyorlash, qayta tayyorlash va ularning malakasini oshirishni tashkil etish samaradorligini oshirish, shuningdek davlat va jamiyat boshqaruvini takomillashtirish uchun kadrlar salohiyatini yaratish maqsadida:

1. Oʻzbekiston Respublikasi Prezidenti huzuridagi Davlat boshqaruvi akademiyasining (bundan buyon matnda Akademiya deb yuritiladi) asosiy vazifalari va faoliyatining yoʻnalishlari etib quyidagilar belgilansin:

hozirgi zamon ijtimoiy-iqtisodiy sharoitlarida ishlash uchun boshqaruv kadrlarining kasbiy tayyorgarligiga nisbatan qoʻyiladigan talablarga javob beradigan oliy kasb taʼlimi dasturlari boʻyicha davlat, xoʻjalik va jamiyat boshqaruvi sohasida boshqaruv kadrlarini tayyorlash, qayta tayyorlash va ularning malakasini oshirish;

tinglovchilarda davlat, xoʻjalik va jamiyat boshqaruvi, psixologiya, axborot-kommunikatsiya texnologiyalari va “elektron hukumat” tizimlari sohasida mustahkam bilimlarni, boshqaruvning huquqiy asoslari va zamonaviy usullarini, tashabbuskorlik va yetakchilik xislatlarini shakllantirish, shuningdek, tizimli tahlil qilish va strategik rejalashtirish, noodatiy sharoitlarda qarorlar qabul qilish koʻnikmalarini shakllantirish;

davlat hokimiyati organlari, davlat va xoʻjalik boshqaruvi organlari va nodavlat notijorat tashkilotlarining boshqaruv kadrlariga boʻlgan joriy hamda istiqboldagi ehtiyojlarini muntazam oʻrganish va tahlil qilish, shuningdek, ushbu asosda Akademiyaga biriktirilgan mutaxassisliklar boʻyicha kadrlar tayyorlash uchun buyurtmalarning yillik aniq maqsadli portfelini shakllantirish;

boshqaruv kadrlarini tayyorlash, qayta tayyorlash va ularning malakasini oshirish uchun potensial nomzodlarning maʼlumotlar bazasini shakllantirish, shuningdek, bitiruvchilarning kasbiy oʻsishini muntazam monitoring qilib borish;

yoshlar muammolarining muntazam oʻrganilishini, oʻquv, oʻquv-metodik materiallar ishlab chiqilishini taʼminlash va yoshlarning dolzarb muammolari yuzasidan ilmiy tadqiqotlar oʻtkazish;

xalq deputatlari viloyat, tuman va shahar Kengashlari deputatlarining, siyosiy partiyalar aʼzolarining oʻqitilishini tashkil etishga koʻmaklashish va uslubiy rahbarlik qilish, shuningdek, Oʻzbekiston Respublikasi Oliy Majlisi Qonunchilik palatasi deputatlari va Senat aʼzolarini oʻqitish kurslarini tashkil etish;

davlat hokimiyati organlarida, davlat va xoʻjalik boshqaruvi organlarida hamda jamoat tashkilotlarida kadrlar bilan taʼminlanganlik holati va sifati boʻyicha axborot-tahliliy materiallar tayyorlash, ularning kadrlar zaxirasini shakllantirish, rahbar kadrlarni tanlash, joy-joyiga qoʻyish va tayinlash, davlat va jamiyat boshqaruvining kadrlar salohiyati monitoringini tashkil etish uslubiyatlarini ishlab chiqish;

qonun hujjatlariga muvofiq oliy malakali ilmiy va ilmiy-pedagogik kadrlarni tayyorlash;

davlat va jamiyat boshqaruvining dolzarb masalalari yuzasidan har tomonlama ilmiy tadqiqotlar olib borish, kadrlar siyosati samaradorligini oshirish, davlat xizmatini isloh qilish sohasidagi xalqaro tajribani oʻrganish va shu asosda respublikada boshqaruv tizimini yanada takomillashtirish yuzasidan takliflar ishlab chiqish;

oʻquv va ilmiy-metodik ishlarga chet ellik yuqori malakali mutaxassislarni jalb qilish, kontrakt asosida maslahatlashuvlar oʻtkazish, shuningdek boshqaruv kadrlarini tayyorlash, qayta tayyorlash va ularning malakasini oshirish sohasida xorijiy taʼlim, ilmiy-tadqiqot tashkilotlari bilan shartnomalar tuzish va hamkorlik qilish.

2. Quyidagilar:

Oʻzbekiston Respublikasi Prezidenti huzuridagi Davlat boshqaruvi akademiyasining tashkiliy tuzilmasi 1-ilovaga* muvofiq;

*1-ilova rus tilidagi matnda berilgan.

Oʻzbekiston Respublikasi Prezidenti huzuridagi Davlat boshqaruvi akademiyasining Ustavi 2-ilovaga muvofiq tasdiqlansin.

Akademiya rektoratiga xodimlarning belgilangan umumiy soni doirasida uning tashkiliy tuzilmasiga oʻzgartishlar kiritish huquqi berilsin.

3. Belgilab qoʻyilsinki:

Akademiyada boshqaruv kadrlarini tayyorlash grant va toʻlov-kontrakt asosida magistraturaning ikki yillik taʼlim dasturi boʻyicha amalga oshiriladi va davlat namunasidagi diplom beriladi;

davlat, xoʻjalik va jamiyat boshqaruvi sohasida boshqaruv kadrlarini qayta tayyorlash grant va toʻlov-kontrakt asosida bir yilgacha davom etadigan dasturlar boʻyicha, shu jumladan ishlab chiqarishdan ajratmagan holda amalga oshiriladi va belgilangan namunadagi diplom beriladi;

davlat, xoʻjalik va jamiyat boshqaruvi sohasida boshqaruv kadrlari malakasini oshirish Akademiyada grant va toʻlov-kontrakt asosida bir oygacha davom etadigan qisqa muddatli dasturlar boʻyicha uch yilda bir marta, shu jumladan ishlab chiqarishdan ajratmagan holda amalga oshiriladi va belgilangan namunada sertifikat beriladi;

magistraturaning, qayta tayyorlash va malaka oshirish kurslarining oʻquv dasturlari joylarda mavjud boʻlgan ijtimoiy-iqtisodiy rivojlanish bilan bogʻliq muammolarni muntazam oʻrganish asosida muayyan hududlar va iqtisodiyot tarmoqlarining oʻziga xosligini inobatga olgan holda shakllantiriladi;

tinglovchilarni qayta tayyorlash va ularning malakasini oshirish uchun Akademiya tomonidan oʻquv rejasining muayyan faniga qarab mehnatiga soatbay haq toʻlash asosida oʻqituvchilar jalb qilinishi mumkin;

Akademiyaning magistraturasiga qabul qilish davlat hokimiyati organlari, davlat va xoʻjalik boshqaruvi organlari, shuningdek Oʻzbekiston Respublikasi jamoat tashkilotlari va tadbirkorlik subyektlari tomonidan tavsiya etilgan, 40 yoshga toʻlmagan, umumiy oliy maʼlumotga va boshqaruv ishlarida kamida 2 yillik tajribaga eta boʻlgan shaxslar orasidangina tanlov asosida joylarda nomzodlarni dastlabki tarzda saralashni tashkil etish va keyinchalik ular uchun Akademiyada test sinovi va suhbatlashish oʻtkazish orqali amalga oshiriladi;

Akademiyada ishlab chiqarishdan ajralgan holda taʼlim olayotgan tinglovchilarning asosiy ish joyi boʻyicha lavozimi va oʻrtacha oylik ish haqi butun oʻqish davri mobaynida saqlanib qoladi;

Akademiya magistraturasining tinglovchilari oʻqish davrida bir yilgacha boʻlgan muddatda ularning doimiy yashash hududida joylashmagan mahalliy davlat hokimiyati organlarida, davlat va xoʻjalik boshqaruvi organlarining tarkibiy boʻlinmalarida, shuningdek davlat va nodavlat notijorat tashkilotlarida malaka amaliyotini va stajirovkani oʻtaydilar.

4. Belgilab qoʻyilsinki, Qoraqalpogʻiston Respublikasi Vazirlar Kengashi raisi, viloyatlar va Toshkent shahri hokimlari, shuningdek davlat va xoʻjalik boshqaruvi organlari rahbarlari:

nomzodlarni saralash va Akademiyaga taʼlim olish uchun yuborish sifati, shuningdek, Akademiya bitiruvchilarining mansablarga xolisona tayinlanishi uchun shaxsan javob beradilar;

Akademiyaga yuborilgan tinglovchilarning oʻzlashtirish darajasi ustidan har oyda monitoring olib boradi.

5. Belgilansinki, Akademiyada oʻquv jarayoni xalqaro taʼlim standartlarini va boshqaruv kadrlarini oʻqitishning zamonaviy usullarini joriy etgan holda tashkil etiladi va bu, shu jumladan, quyidagilarni nazarda tutadi:

boshqaruv kadrlarini qayta tayyorlash va ularning malakasini oshirish kurslarida zamonaviy taʼlim texnologiyalari va shakllaridan foydalanish, shu jumladan Akademiya oʻqituvchilarining mintaqalarga safar qilishini tashkil etish;

davlat va jamiyat boshqaruvining koʻzga koʻringan arboblarini, vazirliklar va idoralar hamda boshqa tashkilotlar rahbarlarini jalb qilgan holda muntazam ravishda interaktiv mashgʻulotlar, davra suhbatlari oʻtkazish;

mutaxassislik fanlari bilan bir qatorda tinglovchilar Oʻzbekiston tarixi va milliy qadriyatlarini, mamlakatimiz shoirlari va yozuvchilari ijodini, chet tili hamda axborot-kommunikatsiya texnologiyalarini chuqur oʻrganishini tashkil etish;

Akademiya magistraturasi tinglovchilarini boshqaruv kadrlarini tayyorlash boʻyicha xorijning yetakchi ilmiy-taʼlim muassasalari va markazlariga, shuningdek chet mamlakatlarning davlat hokimiyati organlari, davlat va xoʻjalik boshqaruvi organlari, jamoat tashkilotlariga bir oygacha boʻlgan muddatga albatta yuborish.

6. Akademiyaga:

mutaxassisliklar boʻyicha oʻquv rejalarini va Akademiya fanlari boʻyicha oʻquv dasturlarini ishlab chiqish hamda tasdiqlash;

professor-oʻqituvchilar tarkibining faoliyat turlari boʻyicha vaqt normalarini, shuningdek ularning zimmasiga tushadigan cheklangan oʻquv yukini belgilash;

yetakchi oliy taʼlim va ilmiy muassasalar, tadqiqot markazlarining, shu jumladan chet mamlakatlar oliy taʼlim va ilmiy muassasalari hamda tadqiqot markazlarining yuqori malakali mutaxassislari va ekspertlarini kontrakt asosida Akademiya va dars berishga jalb qilish huquqi berilsin.

7. Oʻzbekiston Respublikasi Vazirlar Mahkamasi bir oy muddatda:

boshqaruv kadrlarini tayyorlash sohasida magistratura mutaxassisliklari boʻyicha Oliy taʼlim davlat taʼlim standartini (Asosiy qoidalar), shuningdek davlat hokimiyati organlari, davlat va xoʻjalik boshqaruvi organlari va jamoat tashkilotlari uchun boshqaruv kadrlarini qayta tayyorlash va ularning malakasini oshirishga qoʻyilgan Davlat talablarini tasdiqlasin.

Akademiya magistraturasi tinglovchilari tomonidan malaka amaliyoti va stajirovkani oʻtash toʻgʻrisidagi nizomni tasdiqlasin. Malaka amaliyotini va stajirovkani oʻtash vaqtida Akademiya tinglovchilarining safari va yashashi bilan bogʻliq xarajatlar tegishli ravishda Akademiyaning budjet mablagʻlari hisobidan amalga oshiriladi.

8. Belgilab qoʻyilsinki:

tinglovchilarni magistraturaga qabul qilish kvotalari davlat hokimiyati organlari, davlat va xoʻjalik boshqaruvi organlari hamda jamoat tashkilotlarining boshqaruv kadrlariga boʻlgan joriy va istiqboldagi ehtiyojlarini hisobga olgan holda Akademiya tomonidan shakllantiriladi va Oʻzbekiston Respublikasi Prezidentining qarori bilan tasdiqlanadi;

Akademiyaning magistraturasida davlat granti asosida oʻqishga shaxslar faqat davlat hokimiyati organlari, davlat boshqaruvi organlari, davlat muassasalari va tashkilotlari xodimlari orasidan qabul qilinadi;

Akademiyaning magistraturasida oʻqishni muvaffaqiyatli tamomlagan, davlat hokimiyati organlari, davlat boshqaruvi organlari, davlat va nodavlat notijorat tashkilotlarining boshqaruv lavozimlarida oʻz mehnat faoliyatini amalga oshirayotgan shaxslarga 5 yil mobaynida lavozim maoshining 20 foizigachaboʻlgan miqdorda (boshqa nazarda tutilgan qoʻshimcha haq va ustamalardan qatʼi nazar) har oylik ustama belgilanadi;

Akademiyaning magistraturasida oʻqishni muvaffaqiyatli tamomlagan shaxslarni tegishli lavozimlarga va ish joylariga taqsimlash Oʻzbekiston Respublikasi Prezidenti tomonidan tasdiqlanadi;

Akademiyaning magistrlik dasturini bajarmagan tinglovchilar oʻqish davrida olgan barcha toʻlovlar miqdorining 50 foizini asosiy ish joyi boʻyicha qoplashi shart.

9. Akademiyada budjet muassasalari va tashkilotlari xodimlarini moddiy ragʻbatlantirish maxsus fondi bilan bir qatorda budjet va budjetdan tashqari mablagʻlar hisobiga, shu jumladan toʻlov-kontrakt mablagʻlari hisobiga ularning mehnatiga haq toʻlash fondining 50 foizigacha boʻlgan miqdorda Boshqaruv, professor-oʻqituvchilar, ilmiy, oʻquv-yordamchi, texnik va xizmat koʻrsatuvchi xodimlar uchun maxsus fond (bundan buyon matnda Maxsus fond deb yuritiladi) tashkil etilsin.

Belgilab qoʻyilsinki:

Maxsus fondning mablagʻlari Akademiya rektorining qaroriga binoan shtatdagi boshqaruv, professor-oʻqituvchilar, ilmiy, oʻquv-yordamchi, texnik va xizmat koʻrsatuvchi xodimlarga tarif stavkasining 100 foizigacha boʻlgan miqdorda har oylik ustamalar belgilash uchun yoʻnaltiriladi;

Maxsus fond mablagʻlarini shakllantirish va ulardan foydalanish tartibi, shuningdek Akademiya xodimlariga har oylik ustamalar belgilash mezonlari Akademiya Kengashi tomonidan belgilanadi;

boshqaruv kadrlarini va mutaxassislarni qayta tayyorlash va ularning malakasini oshirish boʻyicha pulli kurslarni oʻtkazishdan kelib tushadigan mablagʻlar kurslarni tashkil etish bilan bogʻliq xarajatlar qoplangandan soʻng Akademiya xodimlarini moddiy jihatdan ragʻbatlantirishga yoʻnaltirilishi mumkin.

10. Akademiyaga:

chet ellik olimlar, oʻqituvchilar va mutaxassislar mehnatiga mehnat shartnomasida belgilangan miqdorlarda xorijiy valyutada haq toʻlash;

chet ellik olimlar, oʻqituvchilar va mutaxassislar uchun borish-kelish aviachiptalarini (uzoq muddatli mehnat shartnomalari tuzilganda bir yilda koʻpi bilan ikki marta) milliy valyutada xarid qilish boʻyicha xarajatlarni toʻlash;

chet ellik olimlar, oʻqituvchilar va mutaxassislarning respublika mehmonxonalarida yashashi boʻyicha xarajatlarni milliy valyutada toʻlash;

sutkalik pullarni milliy valyutada har kunlik norma boʻyicha 80 ming soʻm miqdorda toʻlashga ruxsat etilsin.

11. Moliya vazirligi Oʻzbekiston Respublikasi Davlat budjetining xarajatlari parametrlarida Akademiyaga uni ushbu Farmon talablariga muvofiq taʼminlash uchun zarur mablagʻlar ajratilishini nazarda tutsin.

13. Oʻzbekiston Respublikasi Tashqi ishlar vazirligi Akademiya buyurtmanomalari boʻyicha Akademiyaning oʻquv va ilmiy jarayonida ishtirok etuvchi xorijlik mutaxassislar, professor-oʻqituvchilar va ilmiy xodimlar uchun kirish vizalarini konsullik va boshqa yigʻimlarni undirmagan holda belgilangan tartibda rasmiylashtirilishini taʼminlasin.

14. Oʻzbekiston Respublikasi Ichki ishlar vazirligi Akademiyaning buyurtmanomalari boʻyicha Akademiyaning oʻquv va ilmiy jarayonida ishtirok etuvchi xorijlik mutaxassislar, professor-oʻqituvchilar va ilmiy xodimlar uchun koʻp martalik kirish vizalari rasmiylashtirilishini va muddati uzaytirilishini, shuningdek vaqtinchalik propiskani va uning muddati uzaytirilishini davlat boji undirmagan holda belgilangan tartibda taʼminlasin.

16. Akademiya Adliya vazirligi, manfaatdor vazirliklar va idoralar bilan hamkorlikda bir oy muddatda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

17. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidentining Davlat maslahatchisi U.S. Ismoilov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 8-avgust,

PF-5139-son

Oʻzbekiston Respublikasi Prezidentining 2017-yil 8-avgustdagi PF-5139-sonli Farmoniga 2-ILOVA

Oʻzbekiston Respublikasi Prezidenti huzuridagi Davlat boshqaruvi akademiyasining

USTAVI

1-bob. Umumiy qoidalar

1. Oʻzbekiston Respublikasi Prezidenti huzuridagi Davlat boshqaruvi akademiyasi (bundan buyon matnda Akademiya deb yuritiladi) boshqaruv kadrlarini tayyorlash, qayta tayyorlash va ularning malakasini oshirish, shuningdek davlat va jamiyat boshqaruvi sohasida fundamental va amaliy ilmiy tadqiqotlar oʻtkazish boʻyicha davlatning oliy taʼlim muassasasi hisoblanadi.

2. Akademiya oʻz faoliyatida Respublikasining Konstitutsiyasi va qonunlariga, Respublikasi Oliy Majlisi palatalarining qarorlariga, Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, ushbu Ustavga hamda boshqa normativ- huquqiy hujjatlarga amal qiladi.

3. Akademiya yuridik shaxs hisoblanadi, oʻz mustaqil balansiga, Respublikasi Moliya vazirligining Gʻaznachiligida shaxsiy gʻazna hisobvaraqlariga, Oʻzbekiston Respublikasining tijorat banklarida xorijiy valyutada talab qilib olinadigan depozit hisobvaragʻiga, Respublikasi Davlat gerbi tasviri tushirilgan davlat tilida oʻz nomi yozilgan muhrga, blankka, shtampga, oʻz faoliyati uchun zarur boʻlgan boshqa belgi va rekvizitlarga ega boʻladi.

Akademiyaning toʻliq rasmiy nomi:

davlat tilida — “Oʻzbekiston Respublikasi Prezidenti huzuridagi Davlat boshqaruvi akademiyasi”;

ingliz tilida — “Academy of Public Administration under the President of the Republic of Uzbekistan”;

rus tilida — “Akademiya gosudarstvennogo upravleniya pri Prezidente Respubliki Uzbekistan”.

Akademiyaning yuridik manzili: Toshkent shahri, Islom Karimov koʻchasi, 45-uy.

Akademiya huzurida Yoshlar muammolarini oʻrganish va istiqbolli kadrlar tayyorlash instituti (bundan buyon matnda Institut deb yuritiladi) faoliyat koʻrsatadi.

4. Akademiya:

grant va toʻlov-kontrakt asosida ikki yillik taʼlim dasturlari boʻyicha boshqaruv kadrlarini tayyorlaydi, Akademiyaga yillik qabul kvotalarini tasdiqlashda Respublikasi Prezidentining tegishli qarori bilan belgilab beriladigan mutaxassisliklar boʻyicha magistr darajasi va davlat namunasidagi diplom beradi;

grant va toʻlov-kontrakt asosida bir yilgacha davom etadigan dasturlar boʻyicha davlat, xoʻjalik va jamiyat boshqaruvi sohasida, shu jumladan ishlab chiqarishdan ajratmagan holda, boshqaruv kadrlarini qayta tayyorlaydi, belgilangan namunadagi diplom beradi;

grant va toʻlov-kontrakt asosida bir oygacha davom etadigan qisqa muddatli dasturlar boʻyicha davlat, xoʻjalik va jamiyat boshqaruvi sohasida, shu jumladan ishlab chiqarishdan ajratmagan holda, boshqaruv kadrlarining malakasini oshiradi, belgilangan namunadagi sertifikat beradi;

qonun hujjatlariga muvofiq yuqori malakali ilmiy va ilmiy- pedagogik kadrlar tayyorlaydi;

oʻquv, metodik, ilmiy-tadqiqot, axborot-tahlil faoliyatining barcha turlarini amalga oshiradi;

oʻquv va ilmiy-metodik ishlar uchun chet ellik yuqori malakali mutaxassislarni jalb qiladi, kontrakt asosida maslahatlashuvlar oʻtkazadi, shuningdek boshqaruv kadrlarini tayyorlash, qayta tayyorlash va ularning malakasini oshirish sohasida xorijning taʼlim, ilmiy-tadqiqot tashkilotlari bilan shartnomalar tuzadi va hamkorlik qiladi;

professor-oʻqituvchilar tarkibini, xodimlar hamda tinglovchilarni stajirovka oʻtash uchun davlat hokimiyati organlariga, davlat va xoʻjalik boshqaruvi organlariga, jamoat tashkilotlariga, shuningdek oliy taʼlim va ilmiy-tadqiqot muassasalariga, shu jumladan chet mamlakatlarning oliy taʼlim va ilmiy-tadqiqot muassasalariga yuboradi;

noshirlik faoliyatini olib boradi.

5. Akademiyada boshqaruv kadrlarini tayyorlash, qayta tayyorlash va ularning malakasini oshirish belgilangan tartibda grant va toʻlov-kontrakt asosida amalga oshiriladi.

2-bob. Akademiyaning asosiy maqsad va vazifalari

6. Akademiyaning asosiy maqsadi boshqaruv kadrlarini tayyorlash, qayta tayyorlash va ularning malakasini oshirishning samarali tizimini tashkil etishdan, shuningdek davlat va jamiyat boshqaruvi sohasida fundamental va amaliy ilmiy tadqiqotlar olib borishdan iborat.

7. Akademiyaning asosiy vazifalari va faoliyati yoʻnalishlari quyidagilardan iborat:

hozirgi zamon ijtimoiy-iqtisodiy sharoitlarida ishlash uchun boshqaruv kadrlarini kasbga tayyorlashga nisbatan qoʻyilgan talablarga javob beradigan oliy kasb taʼlimi dasturlari boʻyicha davlat va jamiyat boshqaruvi sohasida boshqaruv kadrlarini tayyorlash, qayta tayyorlash va ularning malakasini oshirish;

tinglovchilarda davlat va jamiyat boshqaruvi, psixologiya, axborot-kommunikatsiya texnologiyalari va “elektron hukumat” tizimlari sohasida mustahkam bilimlarni, boshqaruvning huquqiy asoslari va zamonaviy usullarini, tashabbuskorlik va yetakchilik xislatlarini shakllantirish, shuningdek tizimli tahlil qilish va strategik rejalashtirish, noodatiy sharoitlarda qarorlar qabul qilish boʻyicha koʻnikmalar ishlab chiqish;

davlat hokimiyati organlari, davlat va xoʻjalik boshqaruvi organlari va nodavlat notijorat tashkilotlarining boshqaruv kadrlariga boʻlgan ehtiyojlarini muntazam oʻrganish va tahlil qilish, shuningdek, ushbu asosda Akademiyaga biriktirilgan mutaxassisliklar boʻyicha kadrlar tayyorlash uchun buyurtmalarning yillik aniq maqsadli portfelini shakllantirish;

boshqaruv kadrlarini tayyorlash, qayta tayyorlash va ularning malakasini oshirish uchun potensial nomzodlarning maʼlumotlar bazasini shakllantirish, shuningdek bitiruvchilarning kasbiy oʻsishi ustidan muntazam monitoring qilib borish;

yoshlar muammolarining muntazam oʻrganilishini, oʻquv, oʻquv-metodik materiallar ishlab chiqilishini taʼminlash va yoshlarning dolzarb muammolari yuzasidan ilmiy tadqiqotlar oʻtkazish;

xalq deputatlari viloyat, tuman va shahar Kengashlari deputatlarining, siyosiy partiyalar aʼzolarining oʻqitilishini tashkil etishga koʻmaklashish va uslubiy rahbarlik qilish, shuningdek Oʻzbekiston Respublikasi Oliy Majlisi Qonunchilik palatasi deputatlari va Senati aʼzolarini oʻqitish kurslarini tashkil etish;

davlat hokimiyati organlarida, davlat va xoʻjalik boshqaruvi organlarida hamda jamoat tashkilotlarida kadrlar bilan taʼminlanganlik holati va sifati boʻyicha axborot-tahliliy materiallar tayyorlash, ularning kadrlar zaxirasini shakllantirish, rahbar kadrlarni tanlash, joy-joyiga qoʻyish va tayinlash, davlat va jamiyat boshqaruvining kadrlar salohiyati monitoringini tashkil etish uslubiyatlarini ishlab chiqish;

qonun hujjatlariga muvofiq oliy malakali ilmiy va ilmiy- pedagogik kadrlarni tayyorlash;

davlat va jamiyat boshqaruvining dolzarb masalalari yuzasidan har tomonlama ilmiy tadqiqotlar olib borish, kadrlar siyosati samaradorligini oshirish, davlat xizmatini isloh qilish sohasidagi xalqaro tajribani oʻrganish va shu asosda respublikada boshqaruv tizimini yanada takomillashtirish yuzasidan takliflar ishlab chiqish;

oʻquv va ilmiy-metodik ishlar uchun chet ellik yuqori malakali mutaxassislarni jalb qilish, kontrakt asosida maslahatlashuvlar oʻtkazish, shuningdek boshqaruv kadrlarini tayyorlash, qayta tayyorlash va ularning malakasini oshirish sohasida xorijning taʼlim, ilmiy-tadqiqot tashkilotlari bilan shartnomalar tuzish va hamkorlik qilish.

8. Akademiya oʻz zimmasiga yuklatilgan vazifalarni bajarish uchun:

nazariy jihatdan tayyorgarlik koʻrish va boshqaruv faoliyati amaliyoti oʻrtasidagi uzviy aloqani, Akademiya tinglovchilarida davlat va jamiyat boshqaruvi sohasida zarur bilim va koʻnikmalarni hosil qilish maqsadida ular davlat hokimiyati organlari, davlat va xoʻjalik boshqaruvi organlari, shuningdek jamoat tashkilotlarida malaka amaliyoti va stajirovkadan oʻtishini tashkil etishni;

umumeʼtirof etilgan xalqaro taʼlim standartlari va talablarini hisobga olgan holda tayyorlangan taʼlim dasturlari, shuningdek oʻqitishning zamonaviy shakllari va usullaridan, ilgʻor pedagogik, axborot-kommunikatsiya va innovatsiya texnologiyalaridan foydalanish asosida oʻquv jarayonini tashkil etishni;

oʻzlashtirish qobiliyati yuqori darajada boʻlgan tinglovchilarni rahbar kadrlar tayyorlovchi chet elning yetakchi ilmiy-taʼlim muassasalari va markazlariga, shuningdek chet mamlakatlarning davlat hokimiyati organlariga, davlat va xoʻjalik boshqaruvi organlariga, jamoat tashkilotlariga yuborishni;

davlat va jamiyat boshqaruvining koʻzga koʻringan arboblarini, vazirliklar va idoralar hamda boshqa tashkilotlarning rahbarlarini jalb qilgan holda interaktiv mashgʻulotlar, davra suhbatlarini muntazam ravishda oʻtkazishni taʼminlaydi.

3-bob. Akademiyaning rahbar organlari

9. Akademiya faoliyatining asosiy masalalarini koʻrib chiqish uchun Akademiya rektori tomonidan boshqariladigan Kengash tuziladi. Kengash tarkibiga prorektorlar, ilmiy kotib, fakultetlar dekanlari, kafedra mudirlari, markazlar, boshqa boʻlinmalar rahbarlari, Akademiya xodimlari, shuningdek boshqa taʼlim va ilmiy muassasalarning yetuk olimlari hamda mutaxassislari kiradi.

Kengash vakolatlari quyidagilardan iborat:

boshqaruv kadrlarini tayyorlash, qayta tayyorlash va ularning malakasini oshirish, oʻquv, metodik, ilmiy-tadqiqot, axborot-tahlil va nashriy faoliyat, Akademiya tasarrufidagi boʻlinmalar faoliyatini tashkil etish bilan bogʻliq masalalarni hal qilish;

boshqaruv kadrlarini tayyorlash, qayta tayyorlash va ularning malakasini oshirish boʻyicha oʻquv rejalari va dasturlarini tasdiqlash;

boshqaruv kadrlarini tayyorlash ixtisosliklari boʻyicha malaka talablarini tasdiqlash;

professor-oʻqituvchilar tarkibining faoliyat turlari boʻyicha vaqt normalarini, shuningdek ularning zimmasiga tushadigan cheklangan oʻquv yukini belgilash;

tinglovchilarning malaka amaliyotini va stajirovkasini oʻtkazish tartibini tasdiqlash;

magistrlik dissertatsiyalarini tayyorlash va himoya qilishga nisbatan qoʻyilgan talablarni tasdiqlash;

Akademiya va uning boʻlinmalari rahbarlarining hisobotlarini eshitish;

“Oʻzbekiston Respublikasi Prezidenti huzuridagi Davlat boshqaruvi akademiyasining faxriy doktori” va “Oʻzbekiston Respublikasi Prezidenti huzuridagi Davlat boshqaruvi akademiyasining faxriy professori” unvonlarini berish toʻgʻrisida qaror qabul qilish;

boshqaruv, professor-oʻqituvchilar, ilmiy, oʻquv-yordamchi, texnik va xizmat koʻrsatuvchi xodimlarni moddiy ragʻbatlantirish uchun Maxsus fond mablagʻlarini shakllantirish va ulardan foydalanish tartibini, shuningdek Akademiya xodimlariga oylik ustamalar belgilash mezonlarini tasdiqlash.

10. Kengashning qarori Akademiya rektori tomonidan tasdiqlanadi.

11. Akademiyaning rahbarlar tarkibiga rektor, prorektorlar va dekanlar lavozimlari kiradi.

12. Akademiyaga Oʻzbekiston Respublikasi Prezidenti Davlat maslahatchisining birinchi oʻrinbosari — Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan rektor rahbarlik qiladi.

13. Akademiya rektori:

Akademiya faoliyatiga umumiy rahbarlik qiladi;

davlat hokimiyati organlarida, davlat va xoʻjalik boshqaruvi organlarida, muassasalar va boshqa tashkilotlarda Akademiya nomidan ish yuritadi;

Oʻzbekiston Respublikasi Prezidenti devoni bilan kelishilgan holda Akademiya Kengashi tarkibini, Akademiya tasarrufidagi muassasalar va tashkilotlar toʻgʻrisidagi nizomlarni tasdiqlaydi;

qonun hujjatlariga muvofiq xodimlarni va professor-oʻqituvchilar tarkibini lavozimga tayinlaydi va lavozimdan ozod etadi;

Akademiya kafedralarini, oʻquv-metodik, ilmiy-tadqiqot, axborot-tahlil va boshqa boʻlinmalarini tashkil etish, qayta tashkil etish va tugatish toʻgʻrisida qarorlar qabul qiladi;

Akademiyaning tashkiliy va moliyaviy faoliyati bilan bogʻliq masalalarni hal qiladi;

Akademiya mulki va mablagʻlarini belgilangan tartibda boshqarish hamda tasarruf etish yuzasidan qarorlar qabul qiladi, moliyaviy, toʻlov-hisob va boshqa hujjatlarni imzolaydi;

Akademiyaning barcha xodimlari va tinglovchilari tomonidan bajarilishi shart boʻlgan buyruqlar hamda farmoyishlar chiqaradi;

Akademiya xodimlari bilan mehnat shartnomalarini tuzadi va bekor qiladi, ishga yollash boʻyicha kontraktlar tuzadi;

Akademiyani taʼminlash uchun shtatlar jadvalini va xarajatlar smetasini tasdiqlaydi;

Akademiyaning professor-oʻqituvchilar tarkibiga tushadigan oʻquv yukini tasdiqlaydi;

Akademiya xodimlarini qonun hujjatlariga muvofiq moddiy ragʻbatlantiradi, shu jumladan mukofotlaydi;

Akademiyaning prorektorlari va boshqa mansabdor shaxslari oʻrtasida oʻzining ayrim vakolatlarini taqsimlaydi.

Akademiya rektori zimmasida qonun hujjatlariga, shuningdek ushbu Ustavga muvofiq boshqa vakolatlar ham boʻlishi mumkin.

14. Akademiya rektori Akademiyaning tashkiliy tuzilmasiga xodimlarning belgilangan umumiy soni doirasida oʻzgartishlar kiritish huquqiga ega.

15. Akademiya prorektorlari Oʻzbekiston Respublikasi Prezidenti devoni bilan kelishilgan holda Akademiya rektori tomonidan lavozimga tayinlanadi va lavozimdan ozod etiladi.

Prorektorlar oʻz maqomiga koʻra Oʻzbekiston Respublikasi Prezidenti devonining bosh konsultantiga tenglashtiriladi.

4-bob. Akademiyaning taʼlim jarayonini va ilmiy-metodik faoliyatini tashkil etish

16. Akademiya magistraturasining mutaxassisliklari boʻyicha boshqaruv kadrlarini tayyorlash Oliy taʼlim davlat taʼlim standartiga muvofiq ishlab chiqilgan oʻquv rejalari va dasturlari asosida amalga oshiriladi, ularga davlat namunasidagi diplom beriladi.

Boshqaruv kadrlarini qayta tayyorlash boshqaruv kadrlarini qayta tayyorlashga nisbatan davlat tomonidan qoʻyilgan talablar asosida bir yilgacha davom etadigan qayta tayyorlov kurslarining oʻquv rejalari va dasturlari boʻyicha amalga oshiriladi va belgilangan namunadagi diplom beriladi.

Boshqaruv kadrlarining malakasini oshirish boshqaruv kadrlarining malakasini oshirishga nisbatan davlat tomonidan qoʻyilgan talablar asosida bir oygacha davom etadigan malaka oshirish kurslarining oʻquv rejalari va dasturlari boʻyicha uch yilda bir marta amalga oshiriladi va belgilangan namunadagi sertifikat beriladi.

17. Boshqaruv kadrlarini qayta tayyorlash va ularning malakasini oshirish ishlab chiqarishdan ajratmagan holda amalga oshirilishi mumkin.

18. Akademiya davlat hokimiyati organlari, davlat va xoʻjalik boshqaruvi organlari hamda jamoat tashkilotlarining joriy va istiqboldagi ehtiyojlari asosida boshqaruv kadrlarini qayta tayyorlashni va ularning malakasini oshirishni tashkil etadi. Davlat hokimiyati organlari, davlat va xoʻjalik boshqaruvi organlari hamda jamoat tashkilotlari qayta tayyorlanishi yoki malaka oshirishi zarur boʻlgan tinglovchilar kontingentini belgilab beradi.

19. Respublikaning ilmiy-tadqiqot va oliy taʼlim muassasalari, vazirliklari hamda idoralarining yetuk mutaxassislari kontrakt asosida va mehnatiga soatbay haq toʻlanadigan shartlarda oʻqituvchilik ishiga jalb qilinishi mumkin.

Chet mamlakatlarning olimlari, mutaxassislari va ekspertlari oʻquv, metodik va ilmiy faoliyat uchun kontrakt asosida Akademiyaning budjetdan tashqari va budjet mablagʻlari hisobidan haq toʻlangan holda Akademiyaga jalb qilinishi mumkin.

20. Ilmiy-tadqiqot ishlari, qoida tariqasida, grantlar yoki shartnomalar asosida oʻtkaziladi. Shartnoma asosida ilmiy-tadqiqot ishlarini bajarishdan tushgan mablagʻlar tegishli xarajatlar qoplangach, Akademiyaning moddiy bazasini rivojlantirishga, uning xodimlarini ragʻbatlantirishga va Akademiya oldida turgan boshqa vazifalarni hal qilishga yoʻnaltiriladi.

Akademiya magistraturasining mutaxassisliklari boʻyicha boshqaruv kadrlarini tayyorlash taʼlim dasturining oʻzlashtirilishi xar yili turli tashkilotlar vakillaridan iborat mustaqil attestatsiya komissiyasi tomonidan ham tekshirib boriladi.

5-bob. Akademiya tinglovchilari

21. Bazaviy oliy maʼlumotga ega boʻlgan Oʻzbekiston Respublikasi fuqarolari belgilangan tartibda Akademiyada oʻqishga qabul qilinadi.

Tinglovchini qabul qilish Akademiya, tinglovchi va yuboruvchi tashkilot oʻrtasida uch tomonlama shartnoma (bundan buyon matnda uch tomonlama shartnoma deb yuritiladi) qonun hujjatlariga muvofiq tuzilgandan soʻng Akademiya rektorining buyrugʻi bilan amalga oshiriladi. Uch tomonlama shartnomada tinglovchini oʻqitish shartlari, tomonlarning huquqlari va majburiyatlari, shuningdek Akademiyada oʻqitish bilan bogʻliq boshqa qoidalar nazarda tutiladi.

22. Ishlab chiqarishdan ajratilgan holda taʼlim oluvchi Akademiya tinglovchilarining asosiy ish boʻyicha egallab turgan lavozimi va oʻrtacha oylik ish haqi butun oʻqish davri mobaynida saqlanib qoladi.

23. Akademiya tinglovchilari belgilangan muddatlarda oʻquv rejasida nazarda tutilgan vazifalarni bajarishlari, Akademiyaning Ustaviga va ichki tartib qoidalariga rioya etishlari shart.

24. Akademiyaning magistraturasida oʻqish davrida tinglovchi Akademiya Kengashi tomonidan belgilab beriladigan darajada bitta chet tilini (tinglovchi tanlovi boʻyicha) oʻzlashtirib olishi shart.

Akademiyada chet tili boʻyicha belgilangan talablar darajasida imtihon topshirmagan yoki tilni tegishli darajada bilishini tasdiqlovchi malaka sertifikatiga ega boʻlmagan tinglovchilar magistrlik dissertatsiyasini himoya qilishga qoʻyilmaydi.

25. Akademiya magistraturasining tinglovchilari oʻqish davrida mamlakatimiz shoirlari va yozuvchilari (kamida 5 nafar shoir va yozuvchi) ijodini, Oʻzbekiston tarixini va milliy qadriyatlarini mustaqil oʻrganishi shart.

26. Akademiyaning magistrlik dasturini bajarmagan tinglovchilar uch tomonlama shartnomaga muvofiq asosiy ish joyi boʻyicha oʻqish davrida olingan barcha toʻlovlar miqdorining 50 foizini qoplab berishi shart.

27. Uqish davrida boshqa shaharlik tinglovchilar Akademiya imkoniyatlari doirasida yashash joyi bilan taʼminlanadi, ularga oʻqish joyiga borish va u yerdan qaytish uchun bir martalik yoʻl haqi toʻlanadi, ushbu xarajatlar yuboruvchi tomonidan qoplanadi.

28. Akademiya magistraturasining tinglovchilari oʻqish davrida ularning doimiy yashash hududida joylashmagan mahalliy davlat hokimiyati organlarida, davlat va xoʻjalik boshqaruvi organlarining tarkibiy boʻlinmalarida, shuningdek davlat va nodavlat notijorat tashkilotlarida bir yilgacha boʻlgan muddatda malaka amaliyotini va stajirovkani oʻtaydilar;

Joylarga uyushtirilgan amaliy mashgʻulotlar vaqtida, malaka amaliyotini va stajirovkani oʻtash vaqtida Akademiya tinglovchilarining safari va yashashi bilan bogʻliq xarajatlar tegishli ravishda Akademiyaning budjet mablagʻlari hisobidan amalga oshiriladi.

29. Akademiya tinglovchilari quyidagi hollarda Akademiyadan chiqarib yuborilishi mumkin:

a) oʻz xohishiga koʻra;

b) sogʻligʻi holatiga koʻra (tibbiy komissiya maʼlumotnomasi asosida);

v) Akademiyaning oʻquv intizomini va ichki tartib qoidalarini buzganligi uchun;

g) bir semestr mobaynida 74 soatdan ortiq miqdorda mashgʻulotlarni uzrli sabablarsiz qoldirishi tufayli;

d) akademik oʻzlashtirmaganligi (qarzdorligi) uchun;

e) taʼlim olish uchun mablagʻlarni oʻz vaqtida toʻlay olmasligi tufayli (kontrakt asosida taʼlim oluvchilar uchun);

j) sudning qarori asosida ozodlikdan mahrum etilishi tufayli;

z) vafoti munosabati bilan.

6-bob. Akademiyaning professor-oʻqituvchilar tarkibi va boshqa xodimlari

30. Akademiyada professor-oʻqituvchilar tarkibi, boshqaruv, oʻquv-yordamchi va boshqa xodimlar lavozimlari nazarda tutiladi.

31. Professor-oʻqituvchilar tarkibiga kafedra mudiri, professor, dotsent, katta oʻqituvchi va oʻqituvchilar lavozimlari kiradi.

32. Professor-oʻqituvchilar tarkibi sonining Akademiya magistraturasi, qayta tayyorlash va malaka oshirish kurslari tinglovchilarining u mumiy yillik soniga nisbati normativi 1:7 miqdoridan kelib chiqqan holda belgilanadi.

33. Professor-oʻqituvchilar tarkibi:

Kengashda Akademiyaning oʻquv, ilmiy, ijodiy va ishlab chiqarish faoliyatining eng muhim masalalari muhokamasida ishtirok etish;

Akademiyaning xonalaridan, auditoriyalaridan, oʻquv zallaridan, kutubxonalaridan, shuningdek hisoblash markazlari, laboratoriyalar, sport-sogʻlomlashtirish inshootlari xizmatlaridan foydalanish;

tinglovchilarning oʻziga xos xususiyatlariga eng toʻliq javob beradigan hamda oʻquv jarayonining yuksak sifatini taʼminlaydigan oʻqitish usullari va vositalarini tanlash huquqiga ega.

34. Akademiyaning professor-oʻqituvchilar tarkibi:

taʼlim jarayonining yuksak samaradorligini taʼminlashi, tinglovchilarda tashabbuskorlikni, ijodiy qobiliyatlarni, ilmiy izlanishga intilishni rivojlantirishi;

tinglovchilarda yuksak maʼnaviyat va madaniyatni, Vatanga boʻlgan muhabbatni, vatanparvarlikni hamda fuqarolik nuqtai nazarini shakllantirishi;

ilmiy tadqiqotlar olib borishi, shu jumladan oʻqitish mazmun-mohiyatining yuksak saviyasini taʼminlovchi ilmiy tadqiqotlar olib borishi;

Akademiyaning Ustaviga va ichki tartib qoidalariga rioya qilishi shart.

35. Akademiyaning rahbar va professor-oʻqituvchilar tarkibiga Oʻzbekiston Respublikasi Prezidenti devoni xodimlari uchun nazarda tutilgan tibbiy taʼminot shartlari tatbiq etiladi.

36. Boshqaruv, oʻquv-yordamchi, texnik xodimlarning huquqlari va majburiyatlari Akademiyaning ichki tartib qoidalari va lavozim yoʻriqnomalari bilan belgilanadi.

7-bob. Akademiyaning xalqaro faoliyati

37. Akademiya professor-oʻqituvchilar tarkibi, xodimlar va tinglovchilarning chet mamlakatlar davlat hokimiyati organlarida, davlat va xoʻjalik boshqaruvi organlarida, jamoat tashkilotlarida, shuningdek oliy taʼlim va ilmiy-tadqiqot muassasalarida stajirovkasini tashkil etadi.

38. Akademiya magistraturasining har bir tinglovchisi xorijning boshqaruv kadrlarini tayyorlash boʻyicha yetakchi ilmiy-tadqiqot muassasalari va markazlariga, shuningdek chet mamlakatlarning davlat hokimiyati organlari, davlat va xoʻjalik boshqaruvi organlari, jamoat tashkilotlariga bir oygacha boʻlgan muddatga albatta yuboriladi.

39. Akademiya professor-oʻqituvchilar tarkibi, xodimlari va magistratura tinglovchilarining xorijda stajirovka oʻtashi Oʻzbekiston Respublikasi Prezidentining “Isteʼdod” jamgʻarmasi mablagʻlari hisobidan, shuningdek Oʻzbekiston Respublikasining xalqaro shartnomalari, Akademiyaning xorijlik hamkorlar bilan tuzilgan bitimlari va yakka tartibdagi shartnomalari (kontraktlari) asosida amalga oshiriladi.

40. Akademiya oʻquv va ilmiy-metodik ishlar, kontrakt asosida maslahatlashuvlar oʻtkazish uchun chet ellik yuqori malakali mutaxassislarni jalb qiladi, shuningdek boshqaruv kadrlarini tayyorlash, qayta tayyorlash va ularning malakasini oshirish sohasida xorijning taʼlim, ilmiy-tadqiqot tashkilotlari bilan shartnomalar tuzadi va hamkorlik qiladi.

8-bob. Akademiyaning moliya-xoʻjalik faoliyati

41. Akademiyaning faoliyatini moliyalashtirish manbalari quyidagilardan iborat:

Oʻzbekiston Respublikasining Davlat budjetidan Akademiyani joriy taʼminlash, Akademiya zimmasiga yuklatilgan vazifalar va funksiyalarni bajarishga doir tadbirlarni amalga oshirish, shuningdek Akademiyaning moddiy-texnik bazasini mustahkamlash uchun ajratiladigan mablagʻlar;

davlat ilmiy-texnik dasturlari doirasida Oʻzbekiston Respublikasi Innovatsion rivojlanish vazirligi tomonidan oʻtkaziladigan grant tanlovlari natijalari boʻyicha ajratiladigan mablagʻlar;

magistratura, boshqaruv kadrlarini qayta tayyorlash va ularning malakasini oshirish kurslari tinglovchilarini toʻlov-kontrakt asosida tayyorlashdan tushgan mablagʻlar;

oʻquv, metodik va ilmiy-tadqiqot loyihalari, axborot-tahliliy va tahririyat-noshirlik ishlarini, taʼlimga doir ishlarni bajarishdan, vazirliklar, idoralar va boshqa tashkilotlar bilan tuzilgan shartnomalar asosida koʻrsatilgan boshqa xizmat turlaridan tushgan mablagʻlar;

jismoniy va yuridik shaxslarning, loyihalar hamda dasturlarning xayriya mablagʻlari, shuningdek qonun hujjatlarida taqiqlanmagan boshqa manbalar.

42. Akademiya:

Akademiyaga oʻqitish uchun jalb qilinadigan chet ellik olimlar, oʻqituvchilar va mutaxassislar mehnatiga mehnat shartnomalariga muvofiq belgilanadigan miqdorlarda xorijiy valyutada haq toʻlash;

chet ellik olimlar, oʻqituvchilar va mutaxassislar uchun borish-kelish aviachiptalarini (uzoq muddatli mehnat shartnomalari tuzilganda bir yilda koʻpi bilan ikki marta) milliy valyutada xarid qilish boʻyicha xarajatlarni toʻlash;

chet ellik olimlar, oʻqituvchilar va mutaxassislarning respublika mehmonxonalarida yashashi boʻyicha xarajatlarni milliy valyutada toʻlash;

sutkalik pullarni har kunlik norma boʻyicha Oʻzbekiston Respublikasi Markaziy bankining toʻlov kunidagi kursi boʻyicha 20 AQTTT dollariga teng miqdorda milliy valyutada toʻlash;

budjet mablagʻlari hisobidan belgilangan tartibda noshirlik faoliyatini amalga oshirish, davlat boshqaruvining dolzarb masalalari boʻyicha “Jamiyat va boshkaruv” ijtimoiy-siyosiy jurnalini bir yilda 4-marta chop etish;

Akademiyaga ajratilgan mablagʻlar yoki oʻz mablagʻlari hisobidan zarur uskuna va boshqa moddiy resurslarni xarid qilish, ijaraga olish;

oʻziga tegishli mol-mulkka, intellektual va boshqa mulkka, xoʻjalik faoliyati yoki boshqa faoliyat natijasida olingan mahsulotga, daromadlarga, shuningdek qonun hujjatlarida nazarda tutilgan boshqa asoslarda xarid qilingan mol-mulkka egalik qilish, ulardan foydalanish va ularni tasarruf etish;

Akademiya tomonidan bajariladigan ishlar va koʻrsatiladigan xizmatlarga mustaqil ravishda qonun hujjatlariga muvofiq tariflar, narxlar, qiymatlar belgilash;

qonun hujjatlarida taqiqlanmagan boshqa faoliyatni amalga oshirish huquqiga ega.

43. Akademiyaning budjetdan tashqari mablagʻlarini shakllantirish va sarflash qonun hujjatlariga muvofiq amalga oshiriladi.

44. Akademiyaning rahbarlari va professor-oʻqituvchilar tarkibiga lavozim maoshlari birinchi guruh oliy taʼlim muassasalari tegishli xodimlarining bazaviy lavozim maoshlari miqdorida belgilanadi.

Akademiyaning qolgan xodimlariga lavozim maoshlari qonun hujjatlarida davlat boshqaruvi organlari xodimlari uchun nazarda tutilgan toʻlov razryadlariga va mehnatni moddiy ragʻbatlantirish shartlariga muvofiq belgilanadi.

45. Akademiyada budjet muassasalari va tashkilotlari xodimlarini moddiy ragʻbatlantirish maxsus fondi bilan bir qatorda budjet va budjetdan tashqari mablagʻlar hisobiga, shu jumladan toʻlov-kontrakt mablagʻlari hisobiga ularning mehnatiga haq toʻlash fondining 50 foizigacha boʻlgan miqdorda Boshqaruv, professor-oʻqituvchilar, ilmiy, oʻquv-yordamchi, texnik va xizmat koʻrsatuvchi xodimlar uchun maxsus fond (bundan buyon matnda Maxsus fond deb yuritiladi) tashkil etiladi.

Maxsus fondning mablagʻlari Akademiya rektorining qaroriga binoan shtatdagi boshqaruv, professor-oʻqituvchilar, ilmiy, oʻquv-yordamchi, texnik va xizmat koʻrsatuvchi xodimlarga tarif stavkasining 100 foizigacha boʻlgan miqdorda har oylik ustamalar belgilash uchun yoʻnaltiriladi.

Maxsus fond mablagʻlarini shakllantirish va ulardan foydalanish tartibi, shuningdek Akademiya xodimlariga har oylik ustamalar belgilash mezonlari Akademiya Kengashi tomonidan belgilanadi.

Maxsus fond mablagʻlari budjet muassasalari va tashkilotlari xodimlarini moddiy ragʻbatlantirish maxsus fondini hisoblab chiqarishda Akademiyaning mehnatga haq toʻlash fondiga kiritiladi.

Akademiya boshqaruv kadrlarini va mutaxassislarni qayta tayyorlash hamda ularning malakasini oshirish pulli kurslarini oʻtkazishdan tushgan mablagʻlarni, kurslarni tashkil etish bilan bogʻliq boʻlgan xarajatlar qoplangach, Akademiya xodimlarini moddiy ragʻbatlantirishga qoʻshimcha ravishda yoʻnaltirishga haqli.

46. Akademiyaga beshta yengil avtomashina va ikkita mikroavtobusni saqlash uchun limit belgilanadi.

47. Akademiya belgilangan tartibda oʻz faoliyati natijalarining buxgalteriya hisobini amalga oshiradi, statistika hisobotini yuritadi.

9-bob. Yakunlovchi qoidalar

48. Akademiya Ustaviga oʻzgartish va qoʻshimchalar kiritish, Akademiyani qayta tashkil etish va tugatish Oʻzbekiston Respublikasi Prezidentining qaroriga binoan amalga oshiriladi.