Oʻzbekiston Respublikasi Prezidenti devonining reglamentini tasdiqlash toʻgʻrisida (PQ-3161-son)

28.07.2017

Oʻzbekiston Respublikasi Prezidentining

Qarori

Oʻzbekiston Respublikasi Prezidentining 2017-yil 1-martdagi PF-4974-son “Oʻzbekiston Respublikasi Prezidenti devoni faoliyatini yanada takomillashtirish toʻgʻrisida”gi Farmoniga muvofiq, shuningdek Oʻzbekiston Respublikasi Prezidenti devonining tarkibiy tuzilmalari faoliyatini samarali tashkil qilish, ular rahbarlari va xodimlarining Davlat rahbarining hujjatlari va topshiriqlarini soʻzsiz ijro qilish boʻyicha shaxsiy masʼuliyatini belgilash, 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini amalga oshirish boʻyicha ijobiy natijalarga erishish maqsadida:

1. Oʻzbekiston Respublikasi Prezidenti devonining reglamenti (bundan buyon matnda Reglament deb yuritiladi) ilovaga muvofiq tasdiqlansin.

2. Oʻzbekiston Respublikasi Prezidenti devoni tarkibiy tuzilmalari rahbarlari:

birinchidan — Oʻzbekiston Respublikasi Konstitutsiyasiga koʻra Oʻzbekiston Respublikasi Prezidenti fuqarolarning huquqlari va erkinliklariga, Oʻzbekiston Respublikasining Konstitutsiyasi va qonunlariga rioya etilishining kafili ekanligi, davlat hokimiyati organlarining kelishilgan holda faoliyat yuritishini hamda hamkorligini taʼminlashini eʼtiborga olgan holda, Oʻzbekiston Respublikasi Prezidentining konstitutsiyaviy vakolatlarini samarali roʻyobga chiqarilishini soʻzsiz taʼminlash boʻyicha kompleks chora-tadbirlarni amalga oshirishni;

ikkinchidan — tegishli tarkibiy boʻlinmalarda, davlat va xoʻjalik boshqaruvi organlarida, shuningdek barcha darajadagi hokimliklarda ishni Oʻzbekiston Respublikasi Prezidenti tomonidan ishlab chiqilgan va Oʻzbekiston Respublikasi qonunlarida, Oʻzbekiston Respublikasi Prezidentining farmonlari, qarorlari, farmoyishlari va topshiriqlarida nazarda tutilgan siyosatni samarali amalga oshirish zaruratini hisobga olib tashkil qilishni;

uchinchidan — Oʻzbekiston Respublikasi Prezidenti devoni tarkibiy tuzilmalariga yuklatilgan vazifalar va funksiyalarni soʻzsiz bajarishni;

toʻrtinchidan — Oʻzbekiston Respublikasi Prezidenti tashabbusi bilan ishlab chiqilgan hamda davlat va jamiyat hayotining barcha tarmoqlarida olib borilayotgan islohotlarni amalga oshirilishi holatini, shuningdek ularning samarali amalga oshirilishiga toʻsqinlik qilayotgan kamchiliklar va muammolarni tanqidiy hamda tizimli tahlil qilish, ularni hal qilish boʻyicha chuqur ishlangan va har tomonlama asoslangan takliflar kiritish, shuningdek boshqaruv organlari mansabdor shaxslarining iqtisodiyot tarmoqlarida, ijtimoiy va maʼnaviy-axloqiy sohalarda ishning yakuniy natijalari uchun hamda respublika aholisining barcha toifalari hayotining munosib darajasi va sifatini oshirishda shaxsiy javobgarligi choralarini belgilashni;

beshinchidan — oʻzlari rahbarlik qilayotgan tarkibiy boʻlinmalarda shaxsiy ijro intizomini mustahkamlash, Oʻzbekiston Respublikasi Prezidentiga koʻrib chiqishga kiritiladigan hujjat loyihalari va masalalarni oʻz vaqtida va sifatli tayyorlash boʻyicha xodimlarning shaxsiy masʼuliyatini oshirish boʻyicha taʼsirchan chora-tadbirlar koʻrilishini taʼminlasin.

3. Oʻzbekiston Respublikasi Prezidenti devoni Ishlar boshqarmasi bir oylik muddatda Oʻzbekiston Respublikasi Prezidenti devonida hujjatlar bilan ishlash qoidalarini va Oʻzbekiston Respublikasi Prezidenti devonining boshqa hujjatlarini mazkur Reglament talablariga muvofiq qayta koʻrib chiqsin.

4. Davlat hokimiyati va boshqaruvi organlari, mahalliy davlat hokimiyati organlari rahbarlari Reglament talablariga soʻzsiz rioya qilinishini taʼminlasin, bunda qabul qilingan Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlarini, Oʻzbekiston Respublikasi Prezidentining nutqlarida va yigʻilishlarda, shu jumladan mintaqalarga qilgan tashriflarida bergan topshiriqlarini qatʼiy bajarishga alohida eʼtibor qaratsin.

Koʻrsatilgan organlar rahbarlari Oʻzbekiston Respublikasi Prezidentining hujjatlari va topshiriqlarini oʻz vaqtida va sifatli ijro qilinishi, shuningdek Oʻzbekiston Respublikasi Prezidenti devoniga kiritiladigan normativ-huquqiy hujjatlar loyihalari va takliflarni puxta iqtisodiy, moliyaviy va huquqiy ekspertizadan oʻtkazilishini taʼminlash yuzasidan shaxsan javobgar ekanligi toʻgʻrisida qatʼiy ogohlantirilsin, bunda hisob-kitoblarning har tomonlama asoslantirilgani, moliya manbalarining va prognoz natijalarga erishishning haqqoniyligi nazarda tutilsin.

5. Oʻzbekiston Respublikasi Adliya vazirligi ikki oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar kiritish yuzasidan takliflar kiritsin.

6. Oʻzbekiston Respublikasi Prezidentining 2005-yil 4-fevraldagi F-2118-son “Oʻzbekiston Respublikasi Vazirlar Mahkamasining qarorlari va farmoyishlarini ishlab chiqish, koʻrib chiqish va imzolash tartibi toʻgʻrisida”gi farmoyishi oʻz kuchini yoʻqotgan deb topilsin.

7. Mazkur qarorning ijrosini nazorat qilish Oʻzbekiston Respublikasi Prezidenti devonining tarkibiy tuzilmalari rahbarlari zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 28-iyul,

PQ-3161-son

Oʻzbekiston Respublikasi Prezidentining 2017-yil 28-iyuldagi PQ-3161-son qaroriga ILOVA

Oʻzbekiston Respublikasi Prezidenti devonining

REGLAMENTI

1-bob. Umumiy qoidalar

1. Mazkur Reglament Oʻzbekiston Respublikasi Prezidenti devoni toʻgʻrisidagi nizomga muvofiq Oʻzbekiston Respublikasi Prezidenti devoni va uning tarkibiy tuzilmalari faoliyatini tashkil etish tartibini belgilaydi.

2. Oʻzbekiston Respublikasi Prezidenti Devoni (bundan buyon matnda Devon deb yuritiladi) oʻz faoliyatini Oʻzbekiston Respublikasi Prezidenti rahbarligi ostida amalga oshiradi.

3. Devon Oʻzbekiston Respublikasi Prezidentining axborot-tahlil va tashkiliy-nazorat organi hisoblanadi.

4. Devon oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Devon toʻgʻrisidagi nizomga, shuningdek mazkur Reglamentga amal qiladi.

5. Devonga yuklatilgan vazifa va funksiyalarni amalga oshirishni tarkibiy tuzilmalar — Oʻzbekiston Respublikasi Prezidentining Ijro etuvchi apparati, Oʻzbekiston Respublikasi Prezidenti devonining xizmatlari, Oʻzbekiston Respublikasi Prezidenti huzuridagi Xavfsizlik kengashi apparati, Oʻzbekiston Respublikasi Prezidenti devonining Ishlar boshqarmasi (bundan buyon matnda Devonning tarkibiy tuzilmalari deb yuritiladi) taʼminlaydi.

Devon va uning tarkibiy tuzilmalarining tuzilmalari, ular toʻgʻrisidagi nizomlar Oʻzbekiston Respublikasi Prezidenti tomonidan tasdiqlanadi.

2-bob. Devon ishini tashkil etish

6. Devon ishi Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari, farmoyishlari va topshiriqlari talablarini soʻzsiz taʼminlashga qaratilgan Devonning tarkibiy tuzilmalari toʻgʻrisidagi nizomlar, ularning ish rejalari, Oʻzbekiston Respublikasi Prezidenti devonida hujjatlar bilan ishlash qoidalariga muvofiq tashkil etiladi.

Ish rejalar tarkibiy tuzilmalarning rahbarlari tomonidan tasdiqlanadi. Ish rejalarga qabul qilingan qonun hujjatlari va boshqa normativ-huquqiy hujjatlari, shuningdek Oʻzbekiston Respublikasi Prezidentining joriy topshiriqlari inobatga olingan holda tizimli va doimiy ravishda oʻzgartirish va qoʻshimchalar kiritiladi.

Ish rejalarning toʻliq, oʻz vaqtida va natijador ijro etilishi uchun tarkibiy tuzilmalar rahbarlari shaxsan masʼul hisoblanadi.

7. Devonda ish yuritish Ishlar boshqaruvchisi tomonidan tasdiqlanadigan hujjatlar bilan ishlash boʻyicha qoidalarga asosan yuritiladi.

Devonda maxfiy ish yuritish davlat sirlarini saqlash toʻgʻrisidagi qonunchilikka muvofiq amalga oshiriladi.

Barcha ijro etilgan hujjatlar belgilangan tartibda Oʻzbekiston Respublikasi Prezidenti bilan kelishilgan holda yoki tarkibiy tuzilmalar rahbarlarining qarori boʻyicha nazoratdan olinadi va arxivga topshiriladi.

3-bob. Devonga kiritiladigan asosiy hujjatlar va masalalar roʻyxati

8. Devonga koʻrib chiqish uchun:

Oʻzbekiston Respublikasi qonunlari loyihalari — kelishish, qonunchilik tashabbusi tartibida kiritish uchun;

Oʻzbekiston Respublikasi qonunlari — imzolash va eʼlon qilish uchun;

Oʻzbekiston Respublikasi Prezidentining farmonlari, qarorlari, farmoyishlari loyihalari — imzolash uchun;

Oʻzbekiston Respublikasi Vazirlar Mahkamasining (bundan buyon matnda Vazirlar Mahkamasi deb yuritiladi) alohida qarorlari loyihalari –kelishish uchun;

Oʻzbekiston Respublikasi Prezidenti va Devon nomenklaturasiga kiruvchi lavozimga tayinlash, tasdiqlash, taqdim etish, kelishish va lavozimidan ozod etish uchun nomzodlar boʻyicha takliflar;

Oʻzbekiston Respublikasining davlat mukofotlari bilan taqdirlash, oliy harbiy va maxsus unvonlarni berish, ulardan mahrum etish, shuningdek Davlat mukofotlarini berish toʻgʻrisida taqdimnomalar;

Oʻzbekiston Respublikasi fuqaroligi va siyosiy boshpana berish masalalari boʻyicha murojaatlar;

Oʻzbekiston Respublikasi sudlari tomonidan hukm qilingan shaxslarni afv etishga oid murojaatlar;

chet elga chiqishi uchun maxsus kelishuv talab qilinadigan alohida toifadagi mansabdor shaxslarning xizmat safarlariga chiqishi toʻgʻrisida takliflar;

Oʻzbekiston Respublikasining jismoniy va yuridik shaxslarining murojaatlari kiritiladi.

Devonga koʻrib chiqish uchun Oʻzbekiston Respublikasining qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari, farmoyishlari va topshiriqlari ijrosi yuzasidan, shuningdek uning tarkibiy tuzilmalari vakolatlariga tegishli boʻlgan boshqa masalalar ham kiritilishi mumkin.

9. Devonga kelib tushgan xat-xabarlar Devon Ishlar boshqarmasining Umumiy boʻlimida (bundan buyon matnda Umumiy boʻlim deb yuritiladi), davlat sirlarini tashkil qiluvchi maʼlumotlarni oʻz ichiga olganlari esa Devon Ishlar boshqarmasining Rejim boʻyicha xizmatida (bundan buyon matnda Rejim boʻyicha xizmat deb yuritiladi) roʻyxatga olinadi.

Xat-xabarlarni roʻyxatga olmasdan turib qabul qilishga yoʻl qoʻyilmaydi.

10. Devonga kiritilgan, hal etilishi Oʻzbekiston Respublikasi Prezidenti vakolatlariga kiradigan masalalar boʻyicha Devon tarkibiy tuzilmalari rahbarlari tomonidan Oʻzbekiston Respublikasi Prezidentiga axborot beriladi.

4-bob. Qonun loyihalarini kelishish, ularni qonunchilik tashabbusi tartibida Devonga kiritish tartibi

11. Devonga kelishish uchun, Oʻzbekiston Respublikasi Oliy Majlisi Qonunchilik palatasiga (bundan buyon matnda Qonunchilik palatasi deb yuritiladi) Oʻzbekiston Respublikasi Prezidentining qonunchilik tashabbusi tartibida kiritish uchun kiritilgan qonun loyihalari 2006-yil 11-oktabrdagi OʻRQ-60-sonli “Qonunlar loyihalarini tayyorlash va Oʻzbekiston Respublikasi Oliy Majlisining Qonunchilik palatasiga kiritish tartibi toʻgʻrisida”gi Qonuni talablari inobatga olingan holda Oʻzbekiston Respublikasi Prezidentining farmonlari, qarorlari hamda farmoyishlari loyihalarini koʻrib chiqish uchun belgilangan tartibda koʻrib chiqiladi.

12. Qonun loyihalarini Oʻzbekiston Respublikasi Prezidentining qonunchilik tashabbusi tartibida Qonunchilik palatasiga kiritish 2006-yil 11-oktabrdagi OʻRQ-60-sonli “Qonunlar loyihalarini tayyorlash va Oʻzbekiston Respublikasi Oliy Majlisining Qonunchilik palatasiga kiritish tartibi toʻgʻrisida”gi hamda 2003-yil 29-avgustdagi 522-II-sonli “Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida”gi Oʻzbekiston Respublikasi qonunlarida belgilangan tartibda amalga oshiriladi.

13. Devonga kiritilgan qonun loyihalarini koʻrib chiqish, qayta ishlash va ekspertiza qilish Devonning tegishli tarkibiy tuzilmalari tomonidan ularga yuklatilgan vazifalar, funksiyalar va vakolatlarga muvofiq amalga oshiriladi.

Tegishli tarkibiy tuzilma Oʻzbekiston Respublikasi Prezidentining qonunchilik tashabbusi tartibida kiritilgan qonun loyihasini Qonunchilik palatasi va Oʻzbekiston Respublikasi Oliy Majlisi Senatida (bundan buyon matnda Senat deb yuritiladi) koʻrib chiqilishida ishtirok etish uchun vakil yoki mutaxassislar guruhini belgilaydi.

Devonning Siyosiy-huquqiy masalalar xizmati Devon tarkibiy tuzilmalarining Oʻzbekiston Respublikasi Prezidentining qonunchilik tashabbusini amalga oshirish bilan bogʻliq masalalarni koʻrib chiqish borasidagi faoliyatini muvofiqlashtiradi.

5-bob. Oʻzbekiston Respublikasi qonunlarini imzolash va eʼlon qilish tartibi

14. Qonunlarni imzolash va eʼlon qilish mazkur Reglamentning 1-ilovasidagi sxemaga muvofiq amalga oshiriladi.

15. Oʻzbekiston Respublikasi Konstitutsiyasining 84-moddasiga muvofiq Qonunchilik palatasi tomonidan qabul qilingan hamda Senat tomonidan maʼqullangan qonun imzolanishi va eʼlon qilinishi uchun Oʻzbekiston Respublikasi Prezidentiga oʻn kun ichida yuboriladi.

16. Qonunchilik palatasi tomonidan qabul qilingan va Senat tomonidan maʼqullangan Oʻzbekiston Respublikasi qonuni (bundan buyon matnda qonun deb yuritiladi) Senat tomonidan, qonunda belgilangan hollarda esa Qonunchilik palatasi tomonidan Devonga tegishli kuzatuv xati bilan yuboriladi. Xatga:

Qonunchilik palatasi va Senatning tegishli qarorlari;

qogʻoz va elektron shakldagi axborot-tahliliy maʼlumotlar (qonunning qabul qilinishi asoslantirilgan va konsepsiyasi bayon qilingan tushuntirish xati, oʻzgartirish va qoʻshimchalar tushuntirilgan holdagi taqqoslash jadvali, moliyaviy-iqtisodiy va boshqa hisob-kitoblar, boshqa maʼlumot va tahliliy materiallar) ilova qilinadi.

17. Devonga taqdim etilgan qonunga Qonunchilik palatasi Spikeri va Senat raisi tomonidan qonunda belgilangan hollarda esa — Qonunchilik palatasi Spikeri tomonidan imzolangan boʻlishi kerak.

18. Devonga kelib tushgan qonun Devonning Siyosiy-huquqiy masalalar xizmatiga yuboriladi.

Devonning Siyosiy-huquqiy masalalar xizmati qonun bilan tartibga solinadigan masalalarning mazmunidan kelib chiqqan holda, uni ekspert jihatdan oʻrganib chiqish yoki Oʻzbekiston Respublikasi Prezidentiga imzolashga kiritish uchun boshqa tarkibiy tuzilmalarga yuborishi mumkin.

19. Devonning Siyosiy-huquqiy masalalar xizmati qonunning huquqiy ekspertizadan oʻtkazilishini taʼminlaydi. Huquqiy ekspertiza natijasida qonunni imzolash mumkinligi yoki Oʻzbekiston Respublikasi Prezidentining eʼtirozlari bilan qaytarish maqsadga muvofiqligi toʻgʻrisida xulosa tayyorlanadi.

Qonun Devonning Siyosiy-huquqiy masalalar xizmatining xulosasi bilan birgalikda Oʻzbekiston Respublikasi Prezidentiga koʻrib chiqish uchun kiritiladi.

20. Oʻzbekiston Respublikasi Konstitutsiyasining 84-moddasiga muvofiq Oʻzbekiston Respublikasi Prezidenti qonun kiritilgan kundan boshlab oʻttiz kun ichida uni imzolaydi va eʼlon qiladi.

Oʻzbekiston Respublikasi Prezidenti tomonidan imzolangan qonunga raqam, sana va imzolash joyi beriladi. Qonunning tarqatiladigan nusxalari Umumiy boʻlim muhri bilan tasdiqlanadi. Imzolangan qonunning asl nusxasi barcha imzolar, kuzatuv xati va axborot-tahlil materiallari bilan birga Umumiy boʻlimda saqlanadi.

21. Oʻzbekiston Respublikasining qonuni u imzolangan kunda Umumiy boʻlim tomonidan qonunni imzolashga kiritgan tarkibiy tuzilmaning masʼul xodimi tomonidan imzolanadigan 2-ilovaga muvofiq shakldagi tarqatish reyestriga asosan davlat organlari va boshqa tashkilotlarga yuboriladi.

22. Oʻzbekiston Respublikasining qonunlari ular imzolangan kunda tarqatmaga asosan Umumiy boʻlim tomonidan:

Devonning Siyosiy-huquqiy masalalar xizmatiga — normativ-huquqiy hujjatlar eʼlon qilinadigan rasmiy manbalarda eʼlon qilinishini va ularning tizimlashtirilgan hisobi va nazorat nusxalari yuritilishini tashkil etish uchun;

Oʻzbekiston Respublikasi Oliy Majlisi palatalariga — “Oʻzbekiston Respublikasi Oliy Majlisi palatalarining Axborotnomasi”da eʼlon qilish uchun;

“Xalq soʻzi” va “Narodnoye slovo” gazetalari tahririyatiga — eʼlon qilish uchun;

Oʻzbekiston Respublikasi Adliya vazirligiga — “Oʻzbekiston Respublikasi qonun hujjatlarining toʻplami”da, “Oʻzbekiston Respublikasi qonun hujjatlari maʼlumotlari milliy bazasi”da eʼlon qilish, ularning tizimlashtirilgan hisobi va nazorat nusxalarini yuritish, davlat organlari va boshqa tashkilotlarga yetkazish uchun;

Devonning Ommaviy axborot vositalari, maʼnaviyat va maʼrifat, madaniyat, sanʼat va ijodiy tashkilotlarni rivojlantirish masalalari xizmatiga — ommaviy axborot vositalarida qonun imzolangani haqidagi axborotni eʼlon qilish uchun, Oʻzbekiston Respublikasi Prezidentining Matbuot xizmatiga — Oʻzbekiston Respublikasi Prezidentining rasmiy veb-resursida eʼlon qilish uchun yuboriladi.

23. Qonun imzolangandan soʻng Devonning Siyosiy-huquqiy masalalar xizmati uni:

Oʻzbekiston Respublikasi Adliya vazirligiga — ijrochilarga qonunni yetkazish choralarini koʻrish uchun axborot-tahliliy materiallar (qonunning konsepsiyasi bayon etilgan tushuntirish xati, oʻzgartirish va qoʻshimchalar tushuntirilgan taqqoslash jadvali) elektron shaklda;

tegishli tashkilotlarga — normativ-huquqiy hujjatlarning eʼlon qilinadigan rasmiy manbalarida eʼlon qilish uchun qonun matnining elektron shakli;

Oʻzbekiston Respublikasi Prezidentining Matbuot xizmatiga — Oʻzbekiston Respublikasi Prezidentining rasmiy veb-resursida eʼlon qilish uchun qonun matnining elektron shakli yuborilishini taʼminlaydi.

24. Qonunlarning ijrosini tashkil etish va taʼminlash, agar Oʻzbekiston Respublikasi Prezidentining topshirigʻida boshqacha muddat koʻrsatilmagan boʻlsa, qonun imzolangan kundan eʼtiboran ikki hafta muddatda tasdiqlanadigan chora-tadbirlar nazorat rejasiga muvofiq amalga oshiriladi.

25. Qonun bilan tartibga solinadigan masalalarning mohiyatidan hamda tegishli davlat organlarining vakolatlaridan kelib chiqib, chora-tadbirlar nazorat rejasi Oʻzbekiston Respublikasi Vazirlar Mahkamasi, Konstitutsiyaviy sudi, Oliy sudi, Bosh prokuraturasi tomonidan tasdiqlanadi. Zarur hollarda, chora-tadbirlar nazorat rejasi Devonning tegishli tarkibiy tuzilmalari bilan kelishiladi.

26. Davlat hokimiyati organlari, davlat va xoʻjalik boshqaruvi organlari, mahalliy davlat hokimiyati organlari, boshqa davlat organlari va tashkilotlarining mansabdor shaxslari qabul qilingan qonunlarning samarali amalga oshirilishini tashkil qilishga masʼul hisoblanadi.

27. Oʻzbekiston Respublikasi Konstitutsiyasining 84-moddasiga asosan Oʻzbekiston Respublikasi Prezidenti qonunni oʻz eʼtirozlari bilan Oʻzbekiston Respublikasi Oliy Majlisiga qaytarishga haqli.

Agar qonun avvalgi qabul qilingan tahririda tegishincha Qonunchilik palatasi deputatlari va Senati aʼzolari umumiy sonining kamida uchdan ikki qismidan iborat koʻpchilik ovozi bilan maʼqullansa, qonun Oʻzbekiston Respublikasi Prezidenti tomonidan oʻn toʻrt kun ichida imzolanishi va eʼlon qilinishi kerak.

6-bob. Oʻzbekiston Respublikasi Prezidentining farmonlari, qarorlari va farmoyishlari loyihalarini tayyorlash, koʻrib chiqish, imzolash va eʼlon qilish, shuningdek Vazirlar Mahkamasining alohida qarorlari loyihalarini kelishish tartibi

1-§. Oʻzbekiston Respublikasi Prezidentining farmonlari, qarorlari va farmoyishlari loyihalarini tayyorlashning umumiy masalalari

28. Oʻzbekiston Respublikasi Prezidenti tomonidan qarorlar qabul qilinadigan eng muhim yoʻnalishlar va masalalar roʻyxati mazkur Reglamentning 3-ilovasida keltiriladi.

29. Oʻzbekiston Respublikasi Konstitutsiyasining 94-moddasiga asosan Oʻzbekiston Respublikasining Prezidenti Konstitutsiyaga va qonunlarga asoslanib hamda ularni ijro etish yuzasidan respublikaning butun hududida majburiy kuchga ega boʻlgan farmonlar, qarorlar va farmoyishlar chiqaradi.

30. Oʻzbekiston Respublikasi Prezidentining umum majburiy davlat koʻrsatmalari sifatida huquqiy normalarni belgilashga, oʻzgartirishga yoki bekor qilishga qaratilgan hujjatlari normativ-huquqiy hujjat hisoblanadi hamda farmonlar va qarorlar shaklida qabul qilinadi.

Oʻzbekiston Respublikasi Prezidentining jamiyat hayotining alohida sohalarini isloh qilishga yoki davlat ijtimoiy-iqtisodiy siyosatining ustuvor yoʻnalishlarini belgilashga, davlat organlarini tashkil etishga (tugatishga) qaratilgan muhim ijtimoiy ahamiyatga ega boʻlgan hujjatlari farmonlar shaklida, Oʻzbekiston Respublikasi Prezidentining boshqa hujjatlari — qarorlar shaklida qabul qilinadi, bundan mazkur bandning uchinchi xatboshisida nazarda tutilgan hollar mustasno.

Oʻzbekiston Respublikasi Prezidentining tezkor va boshqa joriy masalalar boʻyicha hujjatlari farmoyishlar shaklida qabul qilinadi.

Oʻzbekiston Respublikasi Prezidentining normativ-huquqiy boʻlmagan hujjatlari (kadr masalalari, fuqarolik, afv etish, siyosiy boshpana berish, davlat mukofotlari bilan taqdirlash hamda harbiy va maxsus unvonlarni berish masalalar boʻyicha, boshqa individual tusdagi masalalar va h.k.) ham Oʻzbekiston Respublikasi Prezidentining farmonlari, qarorlari va farmoyishlari shaklida qabul qilinishi mumkin.

31. Oʻzbekiston Respublikasi Prezidentining farmonlari, qarorlari va farmoyishlari loyihalari qonun hujjatlarining ijrosi asosida, Oʻzbekiston Respublikasi Prezidentining yoki Devonning tarkibiy tuzilma rahbarlari topshiriqlari boʻyicha, shuningdek davlat va xoʻjalik boshqaruvchi organlari, mahalliy davlat hokimiyati organlari, boshqa davlat organlari tashkilotlar tashabbusi boʻyicha ularga yuklatilgan vazifalarning ijrosi asosida ishlab chiqiladi.

32. Devonning tarkibiy tuzilmalari Oʻzbekiston Respublikasi Prezidentining farmonlari, qarorlari va farmoyishlari loyihalarini mustaqil ishlab chiqishga haqli. Bunda loyihani tegishli davlat va xoʻjalik boshqaruvi organlari, mahalliy davlat hokimiyati organlari, boshqa davlat organlari va tashkilotlar bilan kelishish, shuningdek Oʻzbekiston Respublikasi Adliya vazirligida huquqiy ekspertizadan oʻtkazish loyihani ishlab chiqqan Devonning tarkibiy tuzilmasi tomonidan taʼminlanadi.

33. Oʻzbekiston Respublikasi Prezidentining farmonlari, qarorlari va farmoyishlari loyihalari Oʻzbekiston Respublikasi Prezidentining topshirigʻiga koʻra ishlab chiqilganda loyihani koʻrib chiqish uchun Oʻzbekiston Respublikasi Prezidentiga kiritish muddati oʻn besh kunni tashkil qiladi (agarda boshqa muddat belgilanmagan boʻlsa), shu jumladan:

loyihani ishlab chiqish — uch kun;

manfaatdor vazirlik va idoralar bilan kelishish — ikki kun;

Adliya vazirligida huquqiy ekspertizadan oʻtkazish — ikki kun;

loyihani Vazirlar Mahkamasida oʻrganib chiqish — besh kun;

loyihani Devonda oʻrganib chiqish — uch kundan iborat.

34. Oʻzbekiston Respublikasi Prezidentining farmonlari, qarorlari va farmoyishlari loyihalarini tayyorlash, koʻrib chiqish, imzolash va eʼlon qilish mazkur Reglamentning 4 va 4a-ilovalaridagi sxemalarga muvofiq amalga oshiriladi.

35. Oʻzbekiston Respublikasi Prezidentining farmonlari, qarorlari va farmoyishlari loyihalari Oʻzbekiston Respublikasi Konstitutsiyasi va qonunlariga, shuningdek qonunchilik texnikasi qoidalariga muvofiq boʻlishi kerak.

36. Oʻzbekiston Respublikasi Prezidentining farmonlari, qarorlari va farmoyishlari loyihalari mazkur Reglamentning 5-ilovasiga muvofiq texnik talablarga muvofiq rasmiylashtiriladi.

2-§. Oʻzbekiston Respublikasi Prezidentining farmonlari, qarorlari va farmoyishlari loyihalarini kelishish tartibi

37. Asosiy ishlab chiquvchi tomonidan tayyorlangan Oʻzbekiston Respublikasi Prezidentining farmonlari, qarorlari va farmoyishlari loyihalari manfaatdor davlat organlari va boshqa tashkilotlar bilan kelishilishi lozim.

Oʻzbekiston Respublikasi Prezidentining barcha farmon va qarorlari loyihalari loyihani ishlab chiquvchi tashkilotlar tomonidan belgilangan tartibda Oʻzbekiston Respublikasi Yagona interaktiv davlat xizmatlari portaliga jamoatchilik muhokamasi oʻtkazilishi uchun joylashtiriladi.

Kelishish uchun yuborilgan Oʻzbekiston Respublikasi Prezidentining farmonlari, qarorlari va farmoyishlari loyihalari, agar boshqa muddat belgilangan boʻlmasa, uch kun ichida koʻrib chiqiladi.

Kelishish va ekspertiza uchun yuborilgan Oʻzbekiston Respublikasi Prezidentining farmonlari, qarorlari va farmoyishlari loyihalari tegishli organlar rahbarlari (istisno hollarda ularning birinchi oʻrinbosarlari) tomonidan imzolanadi.

Oʻzbekiston Respublikasi Prezidentining farmonlari, qarorlari va farmoyishlari loyihalari kelishilgandan soʻng Oʻzbekiston Respublikasi Adliya vazirligiga huquqiy ekspertizadan oʻtkazish uchun yuboriladi. Huquqiy ekspertiza Oʻzbekiston Respublikasi Adliya vazirligi tomonidan agar boshqa muddat belgilanmagan boʻlsa, oʻn kun muddat ichida amalga oshiriladi.

Oʻzbekiston Respublikasi Adliya vazirligi huquqiy ekspertiza natijasiga koʻra vazir (istisno hollarda uning birinchi oʻrinbosari) imzolaydigan tegishli xulosa tayyorlaydi.

371. Oʻzbekiston Respublikasi Prezidentining farmon va qarorlari loyihalari Devonga huquqiy ekspertiza yakuni boʻyicha ularni qabul qilishning maqsadga muvofiqligi haqidagi Oʻzbekiston Respublikasi Adliya vazirligining xulosasi mavjud boʻlgandagina kiritiladi.

38. Kelishmovchiliklar mavjud boʻlgan taqdirda Oʻzbekiston Respublikasi Prezidentining farmonlari, qarorlari va farmoyishlari loyihalari eʼtirozlar boʻyicha asoslantirishlarni oʻz ichiga olgan kelishmovchiliklar jadvali bilan birga Devonga kiritiladi.

39. Tadbirkorlik faoliyatini amalga oshirishni tartibga soluvchi loyiha belgilangan tartibda tadbirkorlik faoliyatiga taʼsiri jihatdan baholanishi va muhokama qilinishi shart.

40. Agar loyiha Oʻzbekiston Respublikasi Prezidentining boshqa hujjatlariga oʻzgartirish va qoʻshimchalar kiritish yoxud ularni oʻz kuchini yoʻqotgan deb hisoblashga olib kelsa, ushbu oʻzgartirish va qoʻshimchalar, shuningdek hujjatlarni oʻz kuchini yoʻqotgan deb hisoblash toʻgʻrisidagi takliflar, qoida tariqasida, tayyorlanayotgan hujjat loyihasiga kiritiladi yoki u bilan ayni bir vaqtda alohida hujjat loyihasi koʻrinishida kiritiladi. Hujjat alohida loyiha koʻrinishida taqdim etilgan taqdirda mazkur hujjat ham belgilangan tartibda manfaatdor davlat organlari va boshqa tashkilotlar bilan kelishilishi va belgilangan muddatlarda huquqiy ekspertizadan oʻtkazilishi lozim.

41. Oʻzbekiston Respublikasi Prezidentining farmonlari, qarorlari va farmoyishlari loyihalari Oʻzbekiston Respublikasi Vazirlar Mahkamasida agar boshqa muddat belgilanmagan boʻlsa, ular kelib tushgan kundan oʻn kun ichida koʻrib chiqiladi.

3-§. Oʻzbekiston Respublikasi Prezidentining farmonlari, qarorlari va farmoyishlari loyihalarini Devonga koʻrib chiqish uchun kiritish

42. Devonga Oʻzbekiston Respublikasi Prezidentining farmonlari, qarorlari va farmoyishlari loyihalari koʻrib chiqish uchun:

Vazirlar Mahkamasi tomonidan — iqtisodiyot, ijtimoiy va maʼnaviy soha samaradorligini oshirish, hududlarni kompleks rivojlantirish, davlat va xoʻjalik boshqaruvi organlari, mahalliy davlat hokimiyati organlari faoliyatini takomillashtirish masalalari boʻyicha;

Oʻzbekiston Respublikasi Sudyalar oliy kengashi, Konstitutsiyaviy sudi, Oliy sudi, Bosh prokuraturasi, Adliya vazirligi, Ichki ishlar vazirligi tomonidan — sud-huquq sohasini isloh qilish, tegishlicha sud, prokuratura, adliya va ichki ishlar organlari faoliyatini takomillashtirish masalalari boʻyicha;

Oʻzbekiston Respublikasi Davlat xavfsizlik xizmati, Mudofaa vazirligi tomonidan — milliy xavfsizlik, Oʻzbekiston Respublikasi davlat chegaralarini qoʻriqlash, mamlakatning mudofaa qobiliyatini taʼminlash masalalari boʻyicha;

Oʻzbekiston Respublikasi Tashqi ishlar vazirligi tomonidan — tashqi siyosat masalalari boʻyicha;

Oʻzbekiston Respublikasi Prezidenti huzuridagi Loyiha boshqaruvi milliy agentligi tomonidan — loyiha boshqaruvi, davlat organlari va boshqa tashkilotlarda zamonaviy texnologiyalarni joriy etish konsepsiyasini ishlab chiqish hamda tahlil qilish, shuningdek davlat xaridlarini amalga oshirish masalalari boʻyicha;

Oʻzbekiston Respublikasi Investitsiyalar boʻyicha davlat qoʻmitasi — Oʻzbekiston Respublikasining rivojlantirish konsepsiyalarini, loyihalar portfellari va davlat dasturlarini tasdiqlash masalalari boʻyicha;

Oʻzbekiston Respublikasi Hisob palatasi tomonidan — Oʻzbekiston Respublikasi Davlat budjeti va davlat maqsadli jamgʻarmalarni ijrosi samaradorligini oshirish masalalari boʻyicha.

Mazkur bandda koʻrsatib oʻtilgan davlat organlari ularning vakolatlariga kiradigan boshqa masalalar boʻyicha ham Devonga Oʻzbekiston Respublikasi Prezidentining farmonlari, qarorlari va farmoyishlari loyihalarini koʻrib chiqish uchun kiritishlari mumkin.

43. Devonga Oʻzbekiston Respublikasi Prezidentining farmonlari, qarorlari va farmoyishlari loyihalari Oʻzbekiston Respublikasi Prezidentining yoki Devonning tarkibiy tuzilmalari rahbarlarining bevosita ularga bergan topshiriqlariga asosan boshqa davlat boshqaruvi organlari, xoʻjalik boshqaruvi organlari, mahalliy davlat hokimiyati organlari hamda boshqa davlat organlari va tashkilotlari tomonidan ham kiritilishi mumkin.

44. Oʻzbekiston Respublikasi Prezidentining farmonlari, qarorlari va farmoyishlari loyihalari Devonga qogʻoz va elektron koʻrinishda loyihani kiritgan organning rahbari (istisno hollarda uning birinchi oʻrinbosari) tasdiqlagan kuzatuv xati bilan Devonning tegishli xizmatini koʻrsatgan holda kiritiladi.

45. Xatga qogʻoz va elektron koʻrinishda quyidagilar ilova qilinadi:

loyihani kiritgan organ rahbari (istisno hollarda uning birinchi oʻrinbosari) tomonidan imzolangan va manfaatdor davlat organlari va boshqa tashkilotlar bilan kelishilgan loyiha;

loyiha kelishilganligi toʻgʻrisida maʼlumotnoma;

loyihaning qabul qilinishi asoslangan va amalga oshirish oqibatlari baholangan asosiy ishlab chiquvchi organ rahbari (istisno hollarda uning birinchi oʻrinbosari) tomonidan imzolangan tushuntirish xati;

Adliya vazirligining huquqiy ekspertiza natijasi boʻyicha loyihani qabul qilishning maqsadga muvofiqligi haqidagi xulosasi (faqat qogʻoz koʻrinishida taqdim qilinadi);

koʻrilayotgan masala har tomonlama chuqur tahlil qilingan va obyektiv baholangan zarur moliyaviy-iqtisodiy va boshqa hisob-kitoblar, boshqa maʼlumotnomalar va tahliliy materiallar;

kiritilgan loyiha qabul qilinishi munosabati bilan normativ-huquqiy hujjatlarga oʻzgartirish va qoʻshimchalar kiritish toʻgʻrisidagi loyihalar, shuningdek asosiy ishlab chiquvchi organ rahbari tomonidan imzolanadigan normativ-huquqiy hujjatlarning amaldagi va taklif etilayotgan tahrirlarining asoslantirilgan taqqoslama jadvallari;

loyihaga sharhlar (Oʻzbekiston Respublikasi Prezidentining eng muhim hujjatlarini qabul qilish maqsadlarini, shuningdek uning asosiy qoidalarini jamoatchilikka qulay shaklda, oddiy va loʻnda tilda tushuntirib berish zarur boʻlgan hollarda).

46. Oʻzbekiston Respublikasi Prezidentining farmonlari, qarorlari va farmoyishlari loyihalari Devonga davlat tilida, zarur hollarda — uning boshqa tillarga tarjimasi bilan kiritiladi.

47. Oʻzbekiston Respublikasi Prezidentining farmonlari, qarorlari va farmoyishlari loyihalarini Devonga kiritayotgan organlarning birinchi rahbarlari loyihalarning puxta, oʻz vaqtida ishlab chiqilishiga, asoslantirilganligi va sifatiga, hisob-kitoblarning haqiqiyligiga, kafolatlangan moliyalashtirish manbalariga va erishiladigan prognoz natijalariga, keltirilgan maʼlumotlar va boshqa materiallarning toʻliqligi va ishonchliligiga, shuningdek ularning manfaatdor davlat organlari va boshqa tashkilotlar bilan lozim darajada kelishilishi uchun shaxsan javobgardir.

4-§. Oʻzbekiston Respublikasi Prezidentining farmonlari, qarorlari va farmoyishlari loyihalarini Devonda oʻrganib chiqish

48. Loyiha Devonda, agar boshqa muddat belgilanmagan boʻlsa, kelib tushgan kundan oʻn kun ichida oʻrganib chiqiladi.

49. Devonga kiritilgan Oʻzbekiston Respublikasi Prezidentining farmonlari, qarorlari va farmoyishlari loyihalari Umumiy boʻlimda roʻyxatdan oʻtkaziladi va shu kunning oʻzida koʻrib chiqish uchun:

Tashkiliy-kadrlar xizmatiga — kadrlarga oid davlat siyosatining asosiy yoʻnalishlarni shakllantirish, davlat xizmati institutini takomillashtirish, boshqaruv kadrlarini tayyorlash va qayta tayyorlash tizimi, davlat mukofotlari va geraldika masalalari boʻyicha;

Siyosiy-huquqiy masalalar xizmatiga — norma ijodkorligi faoliyatini takomillashtirish, parlamentarizm, saylov va siyosiy tizim, sud-huquq sohasini isloh qilish, sudlar, adliya, prokuratura va ichki ishlar organlari faoliyatini takomillashtirish, shuningdek fuqarolik, siyosiy boshpana berish, amnistiya va afv etish masalalari boʻyicha;

Oʻzbekiston Respublikasi Prezidenti huzuridagi Xavfsizlik kengashi apparatiga — milliy xavfsizlikni taʼminlash, Oʻzbekiston Respublikasi Davlat chegarasini qoʻriqlash, davlatning mudofaa qobiliyatini kuchaytirish, aholi va hududlarni favqulodda vaziyatlardan himoyalash, tashqi siyosat masalalari boʻyicha;

Fuqarolar huquqlarini himoya qilish, jismoniy va yuridik shaxslarning murojaatlari bilan ishlashni nazorat qilish va muvofiqlashtirish xizmatiga — fuqarolar huquqlarini himoya qilish tizimini, jismoniy va yuridik shaxslarning murojaatlari bilan ishlashni takomillashtirish masalalari boʻyicha;

Ijtimoiy-iqtisodiy siyosatni muvofiqlashtirish xizmatiga — iqtisodiyot, ijtimoiy sohani isloh qilish va rivojlantirish, aholi bandligini taʼminlash, investitsiya loyihalarni ishlab chiqish va amalga oshirish, investitsiyaviy muhitni tubdan yaxshilash, xorijiy investitsiyalarni jalb etish, tashqi iqtisodiy aloqalarni mustahkamlash, hududlarni kompleks ijtimoiy-iqtisodiy rivojlantirish, moliya-bank, budjet-soliq va bojxona siyosatini takomillashtirish masalalari boʻyicha;

Ommaviy axborot vositalari, maʼnaviyat va maʼrifat, madaniyat, sanʼat va ijodiy tashkilotlarni rivojlantirish masalalari xizmatiga — milliy gʻoya va mafkurani mustahkamlash, nashriyot ishi, ommaviy axborot vositalari, madaniyat va sanʼat, ijodiy va maʼnaviy-maʼrifiy tashkilotlar masalalari boʻyicha;

Jamoat va diniy tashkilotlar bilan hamkorlik qilish xizmatiga — millatlararo munosabatlar, nodavlat notijorat tashkilotlari, shu jumladan diniy tashkilotlar, fuqarolarning oʻzini oʻzi boshqarish organlari faoliyatini takomillashtirish masalalari boʻyicha;

Yoshlar siyosati masalalari xizmati — yoshlarga oid davlat siyosatini amalga oshirish masalalari boʻyicha;

Fan, taʼlim, sogʻliqni saqlash va sportni rivojlantirish masalalari xizmatiga — fanni va innovatsiya jarayonlarini, taʼlim va kadrlar tayyorlash, sogʻliqni saqlash va sport tizimini rivojlantirish masalalari boʻyicha kiritiladi.

50. Devonning tarkibiy tuzilmasi rahbari loyihani ishlab chiqilishi uchun masʼul ijrochini belgilaydi. Loyiha ijrochisi loyihani milliy va davlat manfaatlarini taʼminlash, iqtisodiy samaradorligi va undagi masalalarning bogʻliqligi nuqtai nazaridan ekspertizadan oʻtkazadi. Zarurat boʻlganda, loyiha ijrochisi loyihani qayta ishlaydi, shuningdek oʻzining rahbariga idoraviy ziddiyatlarni yechish uchun takliflar kiritadi.

Apparatning tarkibiy tuzilmalari qoʻshimcha materiallar va maʼlumotlar soʻrash, zarur moliyaviy-iqtisodiy va boshqa hisob-kitoblar, maʼlumotlar va tahliliy materiallar tayyorlash, shu jumladan loyihani qabul qilishdan kutilayotgan oqibatlarni baholash uchun davlat organlari va boshqa tashkilotlarning rahbarlari va mutaxassislarini jalb etish huquqiga ega.

51. Agar loyihada Devonning boshqa tarkibiy tuzilmalari yurituviga kiruvchi normalar mavjud boʻlsa, loyiha ularga xat bilan yoki bevosita kelishish uchun yuboriladi, ular, agar boshqa muddat belgilanmagan boʻlsa, uch kun ichida loyihani koʻrib chiqadi va imzolaydi yoki u boʻyicha oʻz taklif va eʼtirozlarini taqdim qiladi.

52. Uzil-kesil qayta ishlangan loyiha Devonning tegishli tarkibiy tuzilmasi rahbarining imzosi bilan xat orqali yoki bevosita Devonning Siyosiy-huquqiy masalalar xizmatiga quyidagi hujjatlar ilova qilingan holda taqdim etiladi:

loyihani kelishgan manfaatdor davlat organlari va boshqa tashkilotlarning, shuningdek Devonning tegishli tarkibiy tuzilmalari rahbarlarining (mavjud boʻlsa) imzolari;

manfaatdor davlat organlari va boshqa tashkilotlarning eʼtirozlari boʻyicha asoslantirilgan kelishmovchiliklar jadvali;

zarur moliyaviy-iqtisodiy va boshqa hisob-kitoblar, axborot va tahliliy materiallar.

53. Devonning Siyosiy-huquqiy masalalar xizmati loyihani uch kun davomida, agar boshqa muddat belgilanmagan boʻlsa, huquqiy ekspertizadan oʻtkazadi, natijasi boʻyicha Devonning Siyosiy-huquqiy masalalar xizmati rahbari tomonidan imzolanishini taʼminlaydi yoxud u boʻyicha eʼtiroz va takliflarni taqdim etadi.

Zarur hollarda, Oʻzbekiston Respublikasi Prezidentining loyihani tayyorlash haqidagi topshirigʻining shoshilinchligiga qarab, loyihani ishlab chiqish, kelishish va huquqiy ekspertizadan oʻtkazish muddatlari qisqartirilishi mumkin.

54. Devonning tarkibiy tuzilmalarining eʼtiroz va takliflari ishchi tartibida bartaraf etilishi mumkin. Agar bartaraf etib boʻlmaydigan eʼtiroz va takliflar boʻyicha kelishmovchiliklar mavjud boʻlsa, ular tegishli xulosada bayon qilinadi.

541. Devonning tarkibiy tuzilmalarida normativ-huquqiy hujjatlar loyihalarining konseptual qoidalari oʻzgartirilganida, Adliya vazirligi ularning huquqiy ekspertizasini belgilangan tartibda takroran oʻtkazadi.

5-§. Oʻzbekiston Respublikasi Prezidentining farmonlari, qarorlari va farmoyishlari loyihalarini Oʻzbekiston Respublikasi Prezidentiga koʻrib chiqish uchun kiritish

56. Loyiha huquqiy ekspertizadan oʻtqazilgandan keyin Devonning tegishli tarkibiy tuzilmasi rahbari tomonidan koʻrib chiqish uchun Oʻzbekiston Respublikasi Prezidentiga kiritiladi.

Oʻzbekiston Respublikasi Prezidentining topshirigʻiga koʻra Oʻzbekiston Respublikasi Prezidentining farmonlari, qarorlari hamda farmoyishlari loyihalari Oʻzbekiston Respublikasi Bosh vaziri, uning oʻrinbosarlari, Oʻzbekiston Respublikasi Vazirlar Mahkamasi apparatining boshqaruvchisi, shuningdek boshqa mansabdor shaxslar tomonidan Oʻzbekiston Respublikasi Prezidentiga koʻrib chiqish uchun kiritilishi mumkin.

57. Agar loyiha puxta qayta ishlashni talab etsa yoki uni qabul qilish maqsadga muvofiq boʻlmasa, loyiha Devonning tegishli xizmati tomonidan qayta ishlanadi, yoki Devonning tegishli tarkibiy tuzilmasi rahbari imzolaydigan xulosa bilan loyihani kiritgan organga qaytariladi.

58. Oʻzbekiston Respublikasi Prezidentining eʼtirozlari mavjud boʻlsa, agarda boshqa muddat belgilanmagan boʻlsa, Devonning tarkibiy tuzilmalari oʻn kun muddat ichida loyihani qayta ishlab chiqadi hamda takroran koʻrib chiqish uchun Oʻzbekiston Respublikasi Prezidentiga kiritadi.

6-§. Oʻzbekiston Respublikasi Prezidentining farmonlari, qarorlari va farmoyishlarini roʻyxatdan oʻtkazish, tarqatish, eʼlon qilinishi va ijrochilarga yetkazilishini tashkil qilish

59. Oʻzbekiston Respublikasi Prezidenti tomonidan imzolangan farmon, qaror va farmoyishga raqam, sana va imzolash joyi beriladi.

Farmon, qaror va farmoyishlarning tarqatiladigan nusxalari Umumiy boʻlimning muhri bilan, davlat sirini tashkil etuvchi maʼlumotlarni oʻz ichiga olgan nusxalar esa — Rejim boʻyicha xizmatning muhri bilan tasdiqlanadi.

Imzolangan farmon, qaror va farmoyishning asl nusxasi, loyihaning imzolangan nusxalari, loyihaga tegishli barcha materiallar, shu jumladan bildirgi va tushuntirish xati, axborot, tahliliy va boshqa materiallar roʻyxat asosida tegishincha Umumiy boʻlim yoki Rejim boʻyicha xizmatga saqlash uchun topshiriladi. Bunda Oʻzbekiston Respublikasi Vazirlar Mahkamasi tomonidan kiritilgan farmon, qaror va farmoyish loyihalari boʻyicha materiallar saqlash uchun Vazirlar Mahkamasining apparatiga yuboriladi.

60. Oʻzbekiston Respublikasi Prezidentining farmoni, qarori va farmoyishi imzolangandan soʻng, loyihani ishlab chiqishga masʼul boʻlgan ijrochi tegishli xizmat rahbari bilan kelishgan holda hujjatni, shuningdek unga sharhni matbuotda eʼlon qilish zaruriyatini belgilaydi.

Oʻzbekiston Respublikasi Prezidentining normativ-huquqiy hisoblanadigan (umum majburiy davlat koʻrsatmalari sifatida huquqiy normalarni belgilashga, oʻzgartirishga yoki bekor qilishga qaratilgan), shu jumladan fuqarolarning huquq hamda manfaatlariga daxldor boʻlgan hujjatlari normativ-huquqiy hujjatlar eʼlon qilinadigan rasmiy manbalarda eʼlon qilinishi shart.

Oʻzbekiston Respublikasi Prezidentining normativ-huquqiy boʻlmagan, shuningdek, operativ va boshqa joriy masalalar boʻyicha qabul qilingan hujjatlari majburiy eʼlon qilinishi shart emas. Bunday hujjatlar aholini keng va tezkor xabardor qilish maqsadida, shuningdek Oʻzbekiston Respublikasi Prezidentining topshirigʻiga koʻra normativ-huquqiy hujjatlar eʼlon qilinadigan rasmiy manbalarda eʼlon qilinishi mumkin.

61. Oʻzbekiston Respublikasi Prezidentining hujjatiga uning eʼlon qilinishi boʻyicha cheklov toʻgʻrisida grif qoʻyilishi loyihani ishlab chiqishga masʼul boʻlgan ijrochi hamda Umumiy boʻlim zimmasiga yuklatiladi.

62. Oʻzbekiston Respublikasi Prezidenti tomonidan imzolangan farmon, qaror va farmoyishning boshqa tilda eʼlon qilinishi zarur boʻlganda loyihani imzoga kiritgan Devonning tarkibiy tuzilmasi Umumiy boʻlim bilan birgalikda imzolangan hujjat tarjimasining uning matniga muvofiqligi va bir xilligini taʼminlaydi hamda masʼul boʻladi.

63. Oʻzbekiston Respublikasi Prezidentining farmon, qaror va farmoyishi imzolangan kunda Umumiy boʻlim tomonidan davlat organlari va boshqa tashkilotlarga loyihani imzoga kiritgan Devonning tarkibiy tuzilmasi masʼul xodimi tomonidan imzolanadigan 2-ilovaga muvofiq shakldagi tarqatish reyestriga asosan yuboriladi.

Oʻzbekiston Respublikasi Prezidentining davlat sirini tashkil etadigan farmon, qaror va farmoyishlari hamda ulardan koʻchirmalarni tarqatish belgilangan tartibda amalga oshiriladi.

64. Farmon, qaror va farmoyishlar nusxalari, bundan davlat sirlariga tegishli hujjatlar mustasno, ular imzolangan kunda Umumiy boʻlim tomonidan quyidagilarga yuboriladi:

Siyosiy-huquqiy masalalar xizmatiga — normativ-huquqiy hujjatlar eʼlon qilinadigan rasmiy manbalarda eʼlon qilishni tashkil etish (zarurat boʻlganda) hamda ularning tizimli hisobini va nazorat nusxalarini yuritish uchun;

Oʻzbekiston Respublikasi Oliy Majlisi palatalariga — “Oʻzbekiston Respublikasi Oliy Majlisi palatalarining Axborotnomasi”da eʼlon qilish uchun (zarurat boʻlganda);

Oʻzbekiston Respublikasi Adliya vazirligiga — “Oʻzbekiston Respublikasi qonun hujjatlarining toʻplami” va “Oʻzbekiston Respublikasi qonun hujjatlari maʼlumotlari milliy bazasi”da eʼlon qilish uchun (zarurat boʻlganda), shuningdek ularning tizimli hisobini va nazorat nusxalarini yuritish, davlat organlari va boshqa tashkilotlar eʼtiboriga yetkazish uchun;

Oʻzbekiston Respublikasi Prezidentining Matbuot xizmatiga — Oʻzbekiston Respublikasi Prezidentining rasmiy veb-resursida eʼlon qilish uchun (zarurat boʻlganda).

Oʻzbekiston Respublikasi Prezidentining muhim ahamiyatga ega boʻlgan farmon, qaror va farmoyishlari imzolangan kunda Oʻzbekiston Respublikasi Prezidentining topshirigʻiga muvofiq Devonning tarkibiy tuzilmasi rahbarining yozma koʻrsatmasi boʻyicha Umumiy boʻlim tomonidan eʼlon qilish uchun “Xalq soʻzi” va “Narodnoye slovo” gazetalari tahririyatiga, aholini Oʻzbekiston Respublikasi Prezidentining farmon, qaror va farmoyishlari bilan keng koʻlamda va tezkor tanishtirish zarur boʻlganda esa — Oʻzbekiston Milliy axborot agentligiga, shuningdek Oʻzbekiston Milliy teleradiokompaniyasiga televideniye orqali yetkazish uchun yuboriladi.

65. Loyihani imzolashga kiritgan Devonning tarkibiy tuzilmasi loyiha imzolangandan keyingi kundan kechiktirmay uni quyidagilarga yuborilishini taʼminlaydi:

Devonning Siyosiy-huquqiy masalalar xizmatiga — Oʻzbekiston Respublikasi Prezidenti farmonlari, qarorlari va farmoyishlarining, shuningdek axborot-tahlil materiallarning (hujjatning konsepsiyasi bayon etilgan tushuntirish xati, oʻzgartirish va qoʻshimchalar tushuntirilgan taqqoslash jadvali) elektron shakllarini;

tegishli tashkilotlarga — Oʻzbekiston Respublikasi Prezidenti farmonlari, qarorlari va farmoyishlarining elektron shakllarini rasmiy eʼlon qilish uchun (zarurat boʻlganda);

Oʻzbekiston Respublikasi Prezidentining Matbuot xizmatiga — Oʻzbekiston Respublikasi Prezidentining farmonlari, qarorlari va farmoyishlarining elektron shakllarini Oʻzbekiston Respublikasi Prezidentining rasmiy veb-resursida eʼlon qilish uchun (zarurat boʻlganda).

66. Devonning Siyosiy-huquqiy masalalar xizmati Oʻzbekiston Respublikasi Prezidenti farmonlari, qarorlari va farmoyishlarining elektron shakllarini, shuningdek ularga axborot-tahlil materiallarni hujjatni ijrochilar va aholiga yetkazish boʻyicha chora-tadbirlar amalga oshirish uchun Oʻzbekiston Respublikasi Adliya vazirligiga yuboradi.

67. Oʻzbekiston Respublikasi Prezidentining normativ-huquqiy hujjatlar hisoblanadigan farmonlari, qarorlari va farmoyishlari, agar hujjatlarning oʻzida kechroq muddat koʻrsatilmagan boʻlsa, ular rasmiy eʼlon qilingan kundan eʼtiboran kuchga kiradi.

Oʻzbekiston Respublikasi Prezidentining normativ-huquqiy hujjatlar boʻlmagan farmonlari, qarorlari va farmoyishlari, ular imzolangan kundan eʼtiboran kuchga kiradi.

Oʻzbekiston Respublikasi Prezidentining normativ-huquqiy hujjat boʻlgan farmonlari, qarorlari va farmoyishlari normativ-huquqiy hujjatlarning eʼlon qilinadigan rasmiy manbalarida — “Oʻzbekiston Respublikasi Oliy Majlisi palatalarining Axborotnomasi”, “Oʻzbekiston Respublikasi qonun hujjatlarining toʻplami” va “Oʻzbekiston qonun hujjatlari maʼlumotlari milliy bazasi”da eʼlon qilinadi.

68. Oʻzbekiston Respublikasi Prezidentining farmonlari, qarorlari va farmoyishlarining ijrochilari — davlat va xoʻjalik boshqaruvi organlari, mahalliy davlat hokimiyati organlari, boshqa davlat organlari va tashkilotlari:

faoliyatiga qabul qilingan hujjat daxldor boʻlgan oʻzining tarkibiy va hududiy tuzilmalariga oʻz vaqtida yetkazilishini tashkil etadi;

oʻz xodimlari va aholi oʻrtasida Oʻzbekiston Respublikasi Prezidentining qabul qilingan hujjatlari mazmuni va ahamiyatini tushuntirishni taʼminlaydi.

7-§. Oʻzbekiston Respublikasi Prezidentining alohida hujjatlarini koʻrib chiqishning oʻziga xos jihatlari

69. Oʻzbekiston Respublikasi Prezidentining vazirliklar, davlat qoʻmitalari va boshqa davlat boshqaruvi organlarini tashkil etish va tugatish haqidagi farmonlarini Oʻzbekiston Respublikasi Oliy Majlis palatalariga tasdiqlash uchun kiritish Devonning farmonni imzolashga kiritgan tarkibiy tuzilmasi tomonidan Devonning Siyosiy-huquqiy masalalar xizmati bilan birgalikda taʼminlanadi.

Oʻzbekiston Respublikasi Prezidentining Oʻzbekiston Respublikasiga hujum qilinganda yoki tajovuzdan bir-birini mudofaa qilish yuzasidan tuzilgan shartnoma majburiyatlarini bajarish zaruriyati tugʻilganda urush holati eʼlon qilish, umumiy yoki qisman safarbarlik eʼlon qilish, favqulodda holat joriy etish, uning amal qilishini uzaytirish yoki tugatish toʻgʻrisidagi farmonlari uch sutka ichida tasdiqlash uchun Oʻzbekiston Respublikasi Prezidenti huzuridagi Xavfsizlik kengashi apparati tomonidan Oʻzbekiston Respublikasi Oliy Majlisiga kiritiladi.

70. Oʻzbekiston Respublikasi Prezidentining kadrlar masalalari, fuqarolik, afv etish, siyosiy boshpana berish, davlat mukofotlari bilan taqdirlash hamda oliy harbiy va maxsus unvonlar berish masalalari boʻyicha farmon, qaror va farmoyishlarining tayyorlanishi, koʻrib chiqilishi, imzolanishi va eʼlon qilinishi mazkur Reglamentning 10 — 13-boblariga muvofiq amalga oshiriladi.

8-§. Vazirlar Mahkamasining alohida qarorlari loyihalarini kelishish tartibi

71. Oʻzbekiston Respublikasi Prezidenti bilan majburiy tartibda kelishilgan holda Vazirlar Mahkamasining qarorlari va farmoyishlari qabul qilinadigan masalalar roʻyxati mazkur Reglamentning 3-ilovasida keltirilgan.

Vazirlar Mahkamasi tomonidan zarurat boʻlganda, Oʻzbekiston Respublikasi Prezidenti yoki Devonning tarkibiy tuzilmalari rahbarlari bilan kelishish uchun boshqa masalalar boʻyicha ham Vazirlar Mahkamasining qarorlari va farmoyishlari loyihalari kiritilishi mumkin.

72. Oʻzbekiston Respublikasi Prezidenti bilan kelishiladigan Vazirlar Mahkamasining qarorlari va farmoyishlari Devonga Bosh vazir tomonidan yoki uning topshirigʻiga koʻra Bosh vazir oʻrinbosarlari yoki Vazirlar Mahkamasi apparatining boshqaruvchisi tomonidan kiritiladi.

73. Vazirlar Mahkamasining qarorlari va farmoyishlari loyihalarini tayyorlash va Devonga koʻrib chiqish uchun kiritish Oʻzbekiston Respublikasi Vazirlar Mahkamasining Reglamenti va boshqa qonun hujjatlariga muvofiq amalga oshiriladi.

74. Vazirlar Mahkamasining qarorlari va farmoyishlari loyihalarini koʻrib chiqish Oʻzbekiston Respublikasi Prezidentining farmonlari, qarorlari va farmoyishlarini koʻrib chiqish uchun belgilangan tartibda amalga oshiriladi.

75. Oʻzbekiston Respublikasi Prezidenti bilan kelishilgan Vazirlar Mahkamasining qarorlari va farmoyishlari loyihalari Vazirlar Mahkamasiga imzolash uchun Oʻzbekiston Respublikasi Prezidentining rezolyutsiyasi yoki Devonning tegishli tarkibiy tuzilmasi rahbari xatida bayon etilgan topshirigʻi bilan qaytariladi.

Devonga kiritilgan, Oʻzbekiston Respublikasi Prezidenti bilan kelishilmaydigan Vazirlar Mahkamasining qarorlari va farmoyishlari loyihalari Devonning tegishli tarkibiy tuzilmasi xulosasi bilan imzolash uchun Vazirlar Mahkamasiga qaytariladi.

7-bob. Oʻzbekiston Respublikasi Prezidenti ishtirokidagi yigʻilishlarni tayyorlash va oʻtkazish, yigʻilish yakunlari boʻyicha Oʻzbekiston Respublikasi Prezidentining topshiriqlari bayonnomasini tayyorlash va imzolash tartibi

76. Oʻzbekiston Respublikasi Prezidenti oʻz vakolat doirasiga kiradigan masalalarni koʻrib chiqish va muhokama qilish uchun yigʻilishlar, shu jumladan selektor va sayyor yigʻilishlar chaqirishi mumkin.

77. Yigʻilish uning tarkibiy qismini tayyorlash yuklatilgan Devonning tegishli tarkibiy tuzilmasi tomonidan Ijro etuvchi apparat bilan birgalikda hamda davlat va xoʻjalik boshqaruv organlari, mahalliy davlat hokimiyati organlari, boshqa davlat organlari va tashkilotlarini jalb qilgan holda tashkillashtiriladi.

78. Devonning tegishli tarkibiy tuzilmasi Ijro etuvchi apparat bilan birgalikda yigʻilish kun tartibini, qatnashuvchilar va soʻzga chiquvchilar roʻyxatini, oʻtkazish joyini, shuningdek, zarurat boʻlganda, yakuniy hujjat loyihasini tayyorlaydi.

Manfaatdor davlat va xoʻjalik boshqaruv organlari, mahalliy davlat hokimiyati organlari, boshqa davlat organlari va tashkilotlari yigʻilish oʻtkazilishiga besh ish kunidan kech boʻlmagan muddatda, agarda boshqa muddat belgilanmagan boʻlsa, tegishli axborot-tahliliy materiallarni qogʻoz va elektron shaklda Devonning tegishli tarkibiy tuzilmasiga tayyorgarlik tadbirlarini oʻtkazish uchun taqdim etadi.

79. Devonning tegishli tarkibiy tuzilmasi Ijro etuvchi apparat bilan birgalikda qabul qilingan materiallarning yakuniy rasmiylashtirishini amalga oshiradi va ularni Oʻzbekiston Respublikasi Prezidentiga koʻrib chiqishi uchun yigʻilish oʻtkazilishiga ikki ish kunidan kech boʻlmagan muddatda, agarda boshqa muddat belgilanmagan boʻlsa, kiritadi.

80. Yigʻilishlarning tashkiliy taʼminoti, shu jumladan yigʻilish ishtirokchilarini xabardor qilish Devonning tegishli tarkibiy tuzilmasi tomonidan, Ijro etuvchi apparat bilan birgalikda, yigʻilishning moddiy-texnik taʼminoti (stenogrammalash, audio-videoyozuv, ovoz kuchaytirish va sh.k.) esa — Ishlar boshqarmasi tomonidan amalga oshiriladi.

Oʻzbekiston Respublikasi Prezidentining topshirigʻiga muvofiq Oʻzbekiston Respublikasi Prezidentining Matbuot xizmati yigʻilishni ommaviy axborot vositalarida yoritishni taʼminlaydi.

81. Yigʻilishlarda qabul qilingan qarorlar, qoida tariqasida, bayonnoma bilan rasmiylashtiriladi.

82. Yigʻilishning stenogrammasi va audioyozuvi Ijro etuvchi apparat va Devonning tegishli tarkibiy tuzilmasiga yigʻilish oʻtkazilgan kundan bir ish kuni davomida, agarda boshqa muddat belgilanmagan boʻlsa, topshiriladi.

Yigʻilish davomida amalga oshirilgan stenogramma va audioyozuv rasshifrovkasi, taqdim etilgan tezislar, maʼruza va chiqishlar, maʼlumotnomalar, qaror loyihalari va boshqa materiallar asosida Devonning tegishli tarkibiy tuzilmasi Ijro etuvchi apparat bilan birgalikda yigʻilish oʻtkazilgan kundan boshlab ikki ish kuni davomida bayonnoma loyihasini tayyorlaydi. Zarurat boʻlganda, bayonnoma loyihasi unda nazarda tutilgan topshiriqlarning asosiy ijrochilari bilan kelishiladi.

Bayonnoma, agarda Oʻzbekiston Respublikasi Prezidentining topshirigʻida boshqacha belgilanmagan boʻlsa, Oʻzbekiston Respublikasi Prezidenti tomonidan tasdiqlanadi.

83. Oʻzbekiston Respublikasi Prezidenti tomonidan tasdiqlangan yigʻilish bayonnomasiga raqam, sana va imzo chekish joyi qoʻyiladi. Bayonnomaning tarqatiladigan nusxalari Umumiy boʻlim muhri bilan tasdiqlanadi. Yigʻilish bayonnomasining imzolangan nusxasi Umumiy boʻlimda saqlanadi.

84. Yigʻilish bayonnomasi u imzolangan kuni Umumiy boʻlim tomonidan Devonning tegishli tarkibiy tuzilmasi masʼul xodimi imzolaydigan roʻyxat asosida davlat va xoʻjalik boshqaruvi organlariga, mahalliy davlat hokimiyati organlariga, boshqa davlat organlari va tashkilotlarga yuboriladi.

85. Yigʻilishlar davomida, shu jumladan respublikaning hududlariga qilingan tashriflarda Oʻzbekiston Respublikasi Prezidenti tomonidan berilgan topshiriqlar ijrosini nazorat qilish Oʻzbekiston Respublikasi Prezidentining ijro etuvchi apparati, shuningdek Devonning Fuqarolar huquqlarini himoya qilish, jismoniy va yuridik shaxslarning murojaatlari bilan ishlashni nazorat qilish va muvofiqlashtirish xizmati tomonidan Devonning tegishli tarkibiy tuzilmalari bilan birgalikda amalga oshiriladi.

8-bob. Oʻzbekiston Respublikasi Prezidentining farmonlari, qarorlari, farmoyishlari, topshiriqlarini hamda Devon tarkibiy tuzilmalari rahbarlarining topshiriqlari ijrosini tashkillashtirish va nazorat qilish

86. Oʻzbekiston Respublikasi Prezidentining farmonlari, qarorlari, farmoyishlari, topshiriqlari ijrosini tashkil qilish va nazorat qilish mazkur Reglamentning 6-ilovasida keltirilgan sxemaga muvofiq amalga oshiriladi.

87. Oʻzbekiston Respublikasi Prezidentining farmon, qaror, farmoyish, topshiriqlari, shuningdek Devon tarkibiy tuzilmalari rahbarlarining topshiriqlari (bundan buyon matnda topshiriqlar deb yuritiladi) ijrosi davlat va xoʻjalik boshqaruvi organlarida, mahalliy davlat hokimiyati organlarida, boshqa davlat organlari va tashkilotlarida majburiy nazorat qilinishi lozim.

88. Topshiriqlar ijrosini tashkillashtirish Oʻzbekiston Respublikasi Prezidentining 2017-yil 11-apreldagi PQ-2881-sonli “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari hamda barcha darajalardagi hokimliklar rahbarlarining shaxsiy javobgarligi toʻgʻrisida”gi qaroriga muvofiq amalga oshiriladi.

Oʻzbekiston Respublikasi Prezidentining farmonlari, qarorlari, farmoyishlari, topshiriqlarining davlat va xoʻjalik boshqaruvi organlari, mahalliy davlat hokimiyati organlari, boshqa davlat organlari va tashkilotlari tomonidan amalga oshirilishining ijrosi va nazoratini tashkil qilish Oʻzbekiston Respublikasi Vazirlar Mahkamasining 1999-yil 12-yanvardagi 12-sonli “Ijro intizomini mustahkamlash chora-tadbirlari toʻgʻrisida”gi qaroriga muvofiq amalga oshiriladi.

Vazirlar Mahkamasi mansabdor shaxslari, davlat va xoʻjalik boshqaruvi organlari, davlat va xoʻjalik boshqaruvi organalari, Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari rahbarlariga nisbatan intizomiy jazo choralarini qoʻllash Oʻzbekiston Respublikasi Vazirlar Mahkamasining 2017-yil 10-maydagi 264-sonli qaroriga muvofiq amalga oshiriladi.

89. Topshiriqlarni ijrochilarga yetkazish va ularning ijrosini nazorat qilish Devonning tegishli tarkibiy tuzilmalari tomonidan bir kunlik muddatda, shoshilinch topshiriqlarni esa — zudlik bilan taʼminlanadi.

90. Topshiriqlar belgilangan muddatda, muddat koʻrsatilmagan hollarda esa — topshiriq imzolangan kundan eʼtiboran bir oy muddatda bajarilishi lozim.

91. Agar topshiriq bir necha davlat organlari va tashkilotlarga berilgan boʻlsa, topshiriqda birinchi koʻrsatilgan yoki “chaqiriq” soʻzi bilan belgilangan tegishli organ va tashkilot rahbari topshiriqning asosiy ijrochisi hisoblanadi, ishlarni tashkil etadi va uni oʻz vaqtida tegishli tarzda bajarilishi uchun shaxsan javobgar boʻladi.

Hamijrochilar asosiy ijrochiga tegishli organ va tashkilotning rahbari yoki uning oʻrinbosari tomonidan imzolangan takliflarni taqdim qiladi. Asosiy ijrochi hujjatning yakuniy loyihasini kelishish va tayyorlash tartibini belgilaydi. Shoshilinch topshiriqlarni ijro etish zarur boʻlganda asosiy ijrochi topshiriq ijrosini tezkor tartibda, shu jumladan ishchi guruhlarni tashkil qilish orqali ijrosini tashkil etadi.

92. Topshiriq belgilangan muddatda bajarilmagan taqdirda u bajarilmagan hisoblanadi va nazoratda qoldiriladi. Uni bajarish majburiyati ijrochida (asosiy ijrochida) saqlanadi.

Topshiriq ijrochisi (asosiy ijrochisi) topshiriqni bajarish uchun berilgan muddat tugaganidan keyin uch kun ichida Devonning tegishli tarkibiy tuzilmasiga topshiriqni bajarish holati, belgilangan muddatda bajarmaganlik sabablari yuzasidan tushuntirish beradi.

93. Devonning tarkibiy tuzilmalari nazorati Devonning tegishli tarkibiy tuzilmasi rahbari zimmasiga yuklatilgan Oʻzbekiston Respublikasi Prezidentining farmonlari, qarorlari, farmoyishlari va topshiriqlari ijrosini tashkil etadi va bajarilishi ustidan nazoratni amalga oshiradi.

Topshiriqlar ijrosini tashkil qilish va ijro nazorati:

Oʻzbekiston Respublikasi Prezidentining eng muhim farmonlari, qarorlari, farmoyishlari va topshiriqlari boʻyicha chora-tadbirlar (nazorat) rejasini ishlab chiqish va amalga oshirish;

tegishli tarkibiy tuzilma, mansabdor shaxslar va xodimlar tomonidan amaliy chora-tadbirlarni tasdiqlangan muddatlarda amalga oshirish;

ularning bajarilishini davlat va xoʻjalik boshqaruvi organlarida, mahalliy davlat hokimiyati organlarida, boshqa davlat organlari va tashkilotlarida maqsadli oʻrganish;

topshiriqlarda qoʻyilgan vazifalarning oʻz vaqtida va toʻliq bajarilishini taʼminlamagan rahbarlar, mansabdor shaxslar va xodimlarga nisbatan shaxsiy javobgarlik choralarini koʻrish bilan taʼminlanadi.

94. Oʻzbekiston Respublikasi Prezidentining farmonlari, qarorlari, farmoyishlari va topshiriqlarini bajarish boʻyicha ijro intizomi holatini tizimli va tanqidiy tahlil qilish:

har kuni — davlat va xoʻjalik boshqaruvi organlarida, mahalliy davlat hokimiyati organlarida, boshqa davlat organlari va tashkilotlarining nazorat boʻlinmalari tegishli chora qoʻrishlari uchun rahbarlarga xabar berishni taʼminlaydilar;

har hafta, dushanba-seshanbada — barcha davlat va xoʻjalik boshqaruvi organlari, mahalliy davlat hokimiyati organlari, boshqa davlat organlari va tashkilotlarining birinchi rahbarlari tomonidan ijro intizomining holatini tahlil qilinishi taʼminlanadi. Vazirlar Mahkamasi Rayosati majlisida tanqidiy muhokama va taʼsirli choralar qabul qilish taʼminlanadi.

har hafta, chorshanbada — Vazirlar Mahkamasining umumlashtirilgan tahlili Devon tarkibiy tuzilmalari bilan birgalikda qoʻshimcha ishlash uchun Devonning Fuqarolar huquqlarini himoya qilish, jismoniy va yuridik shaxslarning murojaatlari bilan ishlashni nazorat qilish va muvofiqlashtirish xizmatiga taqdim qilinadi;

har oyda, oxirgi jumada — aybdor mansabdor shaxslarning shaxsiy masʼuliyati choralari boʻyicha aniq takliflarni qamrab olgan batafsil tahlil Oʻzbekiston Respublikasi Prezidentiga maʼlum qilinadi.

95. Devon tarkibiy tuzilmalari rahbarlari oʻz tuzilmalarida ijro intizomini mustahkamlash, Oʻzbekiston Respublikasi Prezidentining farmonlari, qarorlari va farmoyishlarini oʻz vaqtida, aniq va toʻliq bajarilishida xodimlarning shaxsiy masʼuliyatini oshirish boʻyicha kompleks chora-tadbirlar amalga oshirilishini taʼminlaydi.

96. Oʻzbekiston Respublikasi Prezidentining farmonlari, qarorlari, farmoyishlari va topshiriqlarining ijrosi ustidan nazorat Devonning Fuqarolar huquqlarini himoya qilish, jismoniy va yuridik shaxslarning murojaatlari bilan ishlashni nazorat qilish va muvofiqlashtirish xizmati tomonidan amalga oshiriladi.

Oʻzbekiston Respublikasi Prezidentining farmon, qaror, farmoyish va topshiriqlarini sifatli va oʻz vaqtida bajarilishi ustidan samarali nazoratni amalga oshirish maqsadida Ijro intizomining yagona idoralararo elektron tizimi yaratiladi.

9-bob. Jismoniy va yuridik shaxslarning murojaatlari bilan ishlash

97. Devon oʻz vakolatlari doirasida jismoniy va yuridik shaxslarning murojaatlarini “Jismoniy va yuridik shaxslarning murojaatlari toʻgʻrisida”gi Qonunga asosan koʻrib chiqilishini taʼminlaydi

98. Devonga kelib tushgan jismoniy va yuridik shaxslarning murojaatlari Fuqarolar huquqlarini himoya qilish, jismoniy va yuridik shaxslarning murojaatlari bilan ishlashni nazorat qilish va muvofiqlashtirish xizmati tomonidan koʻrib chiqiladi.

99. Devonda jismoniy va yuridik shaxslarning murojaatlari bilan ishlash Oʻzbekiston Respublikasi Prezidentining 2017-yil 6-yanvardagi PQ-2721-sonli “Oʻzbekiston Respublikasi Prezidenti Devonining Fuqarolar huquqlarini himoya qilish, jismoniy va yuridik shaxslarning murojaatlari bilan ishlashni nazorat qilish va muvofiqlashtirish xizmati faoliyatini tashkil etish toʻgʻrisida”gi qarorga asosan amalga oshiriladi.

10-bob. Kadrlar masalalarini koʻrib chiqish tartibi

100. Oʻzbekiston Respublikasining Konstitutsiyasiga muvofiq Oʻzbekiston Respublikasi Prezidenti alohida mansabdor shaxslarni lavozimga tayinlaydi va tasdiqlaydi, lavozimga tayinlash, saylash yoki tasdiqlash uchun taqdim etadi va kelishadi, shuningdek, lavozimidan ozod etadi.

Oʻzbekiston Respublikasi Prezidenti tomonidan tasdiqlangan roʻyxatga muvofiq alohida mansabdor shaxslarni lavozimga tasdiqlash, tayinlash va lavozimdan ozod etish Devonning tegishli tarkibiy tuzilmalari rahbarlari bilan kelishiladi.

101. Oʻzbekiston Respublikasi Prezidenti va Devon nomenklaturasiga kiradigan aniq lavozimlarning Devonning tarkibiy tuzilmalari oʻrtasidagi taqsimoti Oʻzbekiston Respublikasi Prezidenti tomonidan tasdiqlanadi.

102. Tashkiliy-kadrlar xizmati kadrlar masalasi boʻyicha Devonning boshqa tarkibiy tuzilmalari faoliyatini umumiy muvofiqlashtirilishini amalga oshiradi.

Oʻzbekiston Respublikasi Prezidenti nomenklaturasiga kiradigan kadrlar boʻyicha masalalar taqsimotga muvofiq Devonning tegishli tarkibiy tuzilmalari rahbarlari tomonidan Oʻzbekiston Respublikasi Prezidentiga axborot beriladi.

Devonning nomenklaturasiga kiradigan kadrlar boʻyicha masalalar taqsimotga muvofiq Devonning tegishli tarkibiy tuzilmalarining bevosita rahbarlari tomonidan hal etiladi.

103. Kadrlar masalalarini ishlab chiqishga masʼul boʻlgan Devonning tarkibiy tuzilmalari ularning vakolatiga kiradigan kadrlarni tanlash, joy-joyiga qoʻyish, tayinlash va lavozimidan ozod etish boʻyicha kompleks chora-tadbirlarni amalga oshiradi, ularning zaxirasini shakllantiradi, ular faoliyatining samaradorligi monitoringini oʻtkazadi.

Davlat va xoʻjalik boshqaruvi organlari, mahalliy davlat hokimiyati organlari, boshqa davlat organlari va tashkilotlari rahbarlari Devonning tegishli tarkibiy tuzilmalari tomonidan belgilangan muddatlarda Oʻzbekiston Respublikasi Prezidenti va Devon nomenklaturasiga kiradigan kadrlar zaxirasini shakllantirish uchun nomzodlar haqida maʼlumotlarni taqdim etadi.

Kadrlar zaxirasini shakllantirish uchun nomzodlarni tanlab olishda ularning kasbiy darajasi, amaliy tajribasi, ishchanlik va maʼnaviy-axloqiy fazilatlari, iqtisodiyotning tegishli tarmoqlarini va ijtimoiy sohani barqaror va jadal rivojlantirish, shuningdek respublika hududlarini kompleks rivojlantirish boʻyicha qoʻyiladigan vazifalarni samarali taʼminlay olish boʻyicha potensial qobiliyati hisobga olinadi.

104. Kadrlar masalalarini hal etish uchun quyidagilardan iborat boʻlgan hujjatlar toʻplami yigʻiladi:

nomzodning shaxsiy maʼlumotlari, uning faoliyatini tavsiflovchi materiallar;

tegishli davlat va xoʻjalik boshqaruvi organi, mahalliy davlat hokimiyati organi, boshqa davlat organi va tashkiloti rahbarining nomzodning kasbiy va shaxsiy sifatlarini oʻz ichiga olgan taqdimnomasi (tavsiyanomasi) va uning yuklatilgan vazifalarni bajarish qobiliyati haqidagi xulosasi;

pasporti, maʼlumoti, ilmiy darajalar va unvonlar olganligi haqida hujjatlar, mehnat daftarchasi, harbiy bileti nusxalari.

Taqdim etilgan hujjatlarning haqqoniyligi yuzasidan masʼuliyat Devonga hujjatlarni kiritgan tegishli davlat va xoʻjalik boshqaruvi organi, mahalliy davlat hokimiyati organi, boshqa davlat organi va tashkiloti rahbarlari zimmasiga yuklatiladi.

105. Qoʻyilgan maqsadlar va vazifalarga yuqori kasbiy darajada erishishni taʼminlashga qodir boʻlgan munosib nomzodlarni tavsiya qilish boʻyicha shaxsiy masʼuliyat nomzodni tavsiya qilgan Devonning tarkibiy tuzilmalari rahbarlari, Oʻzbekiston Respublikasi Bosh vaziri va uning oʻrinbosarlari, davlat va xoʻjalik boshqaruvi organlari, mahalliy davlat hokimiyati organlari, boshqa davlat organlari va tashkilotlari rahbarlari zimmasiga yuklatiladi.

106. Oʻzbekiston Respublikasi Prezidenti va Devon nomenklaturasiga kiradigan mansabdor shaxslarning shaxsiy yigʻma jildlarining hisobi va yuritilishi Devonning Tashkiliy-kadrlar xizmati rahbari tomonidan tasdiqlangan Nizomga muvofiq amalga oshiriladi.

107. Oʻzbekiston Respublikasi Prezidenti tomonidan tasdiqlangan roʻyxatga muvofiq davlat hokimiyati oliy organlarining, huquqni muhofaza qiluvchi va boshqa davlat organlarining alohida mansabdor shaxslariga Oʻzbekiston Respublikasi Prezidenti tomonidan imzolangan xizmat guvohnomalari beriladi.

Oʻzbekiston Respublikasi Prezidenti tomonidan imzolangan xizmat guvohnomalarining berilishi va topshirilishi boʻyicha ishlarni tashkil qilish Rejim boʻyicha xizmat tomonidan belgilangan tartibda amalga oshiriladi. Xizmat guvohnomalarining egalari ularning saqlanishi uchun shaxsan javobgardirlar.

108. Oʻzbekiston Respublikasi Prezidenti va Devon nomenklaturasiga kiradigan mansabdor shaxslarni lavozimdan ozod qilish, agar qonun hujjatlarida boshqa tartib oʻrnatilgan boʻlmasa, ular tayinlangan va tasdiqlangan tartibda amalga oshiriladi.

11-bob. Oʻzbekiston Respublikasi davlat mukofotlari bilan taqdirlash, oliy harbiy va malakaviy unvonlarini berish, ulardan mahrum qilish, shuningdek Davlat mukofotlarini berish toʻgʻrisidagi taqdimnomalarni koʻrib chiqish

109. Oʻzbekiston Respublikasi Konstitutsiyasining 93-moddasiga muvofiq Oʻzbekiston Respublikasi Prezidenti Oʻzbekiston Respublikasining ordenlari, medallari va yorligʻi bilan mukofotlaydi, Oʻzbekiston Respublikasining oliy harbiy, malakaviy va faxriy unvonlarini beradi.

110. Davlat mukofotlari bilan taqdirlash va ulardan mahrum qilish “Davlat mukofotlari toʻgʻrisida”gi Qonunga, Oʻzbekiston Respublikasi Prezidentining 2017-yil 10-iyuldagi PQ-3119-sonli “Oʻzbekiston Prezidenti huzuridagi Davlat mukofotlari va geraldika boʻyicha Komissiya faoliyatini tashkil qilish toʻgʻrisida”gi qaroriga, shuningdek boshqa normativ-huquqiy hujjatlarga muvofiq amalga oshiriladi.

Devonning Tashkiliy-kadrlar xizmati davlat mukofotlari bilan bogʻliq masalalarni koʻrib chiqish boʻyicha faoliyatni muvofiqlashtiradi.

111. Oliy harbiy unvon berish va oliy harbiy unvondan mahrum qilish, shuningdek oliy harbiy unvonini pasaytirish hamda tiklash Oʻzbekiston Respublikasi Prezidenti tomonidan tasdiqlangan Oʻzbekiston Respublikasi fuqarolari tomonidan harbiy xizmatni oʻtash tartibi toʻgʻrisidagi nizomga muvofiq amalga oshiriladi.

112. Malakaviy unvonlar davlat organlari xodimlariga ularning malakasi, ish staji va egallab turgan lavozimidan kelib chiqib beriladigan maxsus unvonlar (diplomatik darajalar, martaba darajalari, malaka darajalari va boshqalar) hisoblanadi.

Diplomatiya xodimlari uchun diplomatiya daraja va martabalarini belgilash va mahrum qilishning oʻziga xos jihatlari “Oʻzbekiston Respublikasining diplomatiya xodimlari uchun diplomatiya daraja va martabalari belgilash toʻgʻrisida”gi Qonunga koʻra belgilanadi.

Boshqa maxsus unvonlarni berish va mahrum qilishning oʻziga xos jihatlari belgilangan tartibda tasdiqlangan malaka unvonlari, xizmatni oʻtash tartibi toʻgʻrisidagi nizomlarga muvofiq belgilanadi.

113. Oʻzbekiston Respublikasi davlat mukofotlarini berish Oʻzbekiston Respublikasi Prezidenti tomonidan tasdiqlangan davlat mukofotlari toʻgʻrisidagi nizomlarga muvofiq amalga oshiriladi.

12-bob. Fuqarolik va siyosiy boshpana berishga oid masalalarni koʻrib chiqish

114. Oʻzbekiston Respublikasi Konstitutsiyasining 93-moddasiga muvofiq Oʻzbekiston Respublikasi Prezidenti Oʻzbekiston Respublikasining fuqaroligiga va siyosiy boshpana berishga oid masalalarni hal etadi.

115. Oʻzbekiston Respublikasi Prezidenti:

Oʻzbekiston Respublikasi hududida doimiy istiqomat qiladigan chet el fuqarolari va fuqaroligi boʻlmagan shaxslarni Oʻzbekiston Respublikasi fuqaroligiga qabul qilish toʻgʻrisida;

chet elda istiqomat qiladigan hamda Oʻzbekiston Respublikasi Prezidentiga tegishli iltimosnoma bilan murojaat qilgan chet el fuqarolari va fuqaroligi boʻlmagan shaxslarni Oʻzbekiston Respublikasi fuqaroligiga qabul qilish toʻgʻrisida;

Oʻzbekiston Respublikasi fuqaroligiga tiklash toʻgʻrisida;

Oʻzbekiston Respublikasi fuqaroligidan chiqish toʻgʻrisida;

Oʻzbekiston Respublikasi fuqaroligini yoʻqotish toʻgʻrisida.

116. Oʻzbekiston Respublikasida siyosiy boshpana oʻzining fuqaroligi boʻyicha mansub davlatda yoki doimiy yashash joyida ijtimoiy-siyosiy faoliyati, diniy eʼtiqodi, irqiy yoki milliy mansubligi uchun taʼqib qilinayotgan yoki taʼqib qilishning jabrlanuvchisi boʻlishiga real tahdiddan, shuningdek xalqaro huquq normalarida nazarda tutilgan inson huquqlari buzilishining boshqa holatlaridan boshpana va himoya izlayotgan shaxslarga va ularning oila aʼzolariga beriladi.

117. Oʻzbekiston Respublikasining fuqaroligi va siyosiy boshpana berish bilan bogʻliq masalalarni koʻrib chiqish “Oʻzbekiston Respublikasining fuqaroligi toʻgʻrisida”gi Qonuni, shuningdek Oʻzbekiston Respublikasi Prezidentining 1992-yil 20-noyabrdagi PF-500-son Farmoni bilan tasdiqlangan Oʻzbekiston Respublikasining fuqaroligi bilan bogʻliq masalalarni koʻrib chiqish tartibi toʻgʻrisidagi nizom hamda Oʻzbekiston Respublikasi Prezidentining 2017-yil 29-maydagi PF-5060-son Farmoni bilan tasdiqlangan Oʻzbekiston Respublikasida siyosiy boshpana berish tartibi toʻgʻrisidagi nizomga muvofiq amalga oshiriladi.

118. Devonning Siyosiy-huquqiy masalalar xizmati Oʻzbekiston Respublikasining fuqaroligi va siyosiy boshpana berish bilan bogʻliq masalalarni koʻrib chiqish faoliyatini muvofiqlashtiradi.

13-bob. Amnistiya va Oʻzbekiston Respublikasi sudlari tomonidan hukm qilingan shaxslarni afv etishga oid masalalarni kiritish va koʻrib chiqish

119. Oʻzbekiston Respublikasi Konstitutsiyasining 93-moddasiga muvofiq Oʻzbekiston Respublikasi Prezidenti amnistiya toʻgʻrisidagi hujjatlarni qabul qilish haqida Oʻzbekiston Respublikasi Oliy Majlisining Senatiga taqdimnoma kiritadi va Oʻzbekiston Respublikasining sudlari tomonidan hukm qilingan shaxslarni afv etadi.

120. Amnistiya akti jinoyat sodir qilgan maʼlum toifadagi shaxslarga jinoiy-huquqiy taʼsir choralarini qoʻllamaslik orqali ularga tuzalish imkoniyatini berish yoki bu choralar qoʻllanganda ularning ahvolini yaxshilash maqsadida koʻrsatiladigan insonparvarlik ifodasi hisoblanadi.

121. Afv etish mahkumga nisbatan uni jazodan toʻliq yoki qisman ozod etadigan yoki sud tomonidan tayinlangan jazoni boshqa yengilroq jazo bilan almashtiradigan yoxud sudlanganlikni olib tashlaydigan insonparvarlik akti hisoblanadi.

Afv etish aniq hukm qilinganga nisbatan individual tarzda amalga oshiriladi hamda uni oqlaydigan va jinoyat sodir qilinganligi faktini bartaraf qiladigan holat hisoblanmaydi.

Afv etish Oʻzbekiston Respublikasi sudlari tomonidan hukm qilingan Oʻzbekiston Respublikasi fuqarolariga, chet el fuqarolari va fuqaroligi boʻlmagan shaxslarga nisbatan qoʻllaniladi.

122. Oʻzbekiston Respublikasining sudlari tomonidan hukm qilingan shaxslarni afv etish bilan bogʻliq masalalarni koʻrib chiqish Oʻzbekiston Respublikasi Prezidentining 2018-yil 8-maydagi PF-5439-sonli Farmoni bilan tasdiqlangan Oʻzbekiston Respublikasida afv etishni amalga oshirish tartibi toʻgʻrisida nizomga muvofiq amalga oshiriladi.

123. Devonning Siyosiy-huquqiy masalalar xizmati amnistiya va Oʻzbekiston Respublikasi sudlari tomonidan sudlangan shaxslarni afv etishga oid masalalarni koʻrib chiqish faoliyatini muvofiqlashtiradi.

14-bob. Mansabdor shaxslarning chet elga chiqish masalasini kelishish tartibi

124. Chet elga xizmat safariga chiqishi uchun Oʻzbekiston Respublikasi Prezidenti va Devonning tarkibiy tuzilmalari bilan kelishilishi talab qilinadigan mansabdor shaxslar roʻyxati Oʻzbekiston Respublikasi Prezidentining 2014-yil 5-martdagi PQ-2142-sonli qarori bilan tasdiqlangan.

125. Mansabdor shaxslarning chet elga chiqishini kelishish masalasi Devonga Oʻzbekiston Respublikasi Prezidentining 2017-yil 3-avgustdagi PQ-3170-son qarori bilan tasdiqlangan Mansabdor shaxslarning xorijiy mamlakatlarga xizmat safarlarini tashkil etish tartibi toʻgʻrisidagi nizomga muvofiq kiritiladi.

126. Mansabdor shaxslarning chet elga chiqish masalasi Devonning tegishli tarkibiy tuzilmalari tomonidan, agar muddatidan oldin kelishish kerak boʻlmasa, oʻn kunlik muddatda koʻrib chiqiladi.

127. Devon tarkibiy tuzilmasi rahbari belgilagan ijrochi Oʻzbekiston Respublikasi Prezidenti yoki tarkibiy tuzilma rahbariga axborot berish va kelishish uchun materiallarni tayyorlaydi.

Devonning tarkibiy tuzilmalari chet elga chiqishni kelishish masalasini hal qilish uchun qoʻshimcha materiallar va maʼlumotlarni soʻrashga haqli.

128. Chet elga chiqish masalasi kelishilgan taqdirda Oʻzbekiston Respublikasi Tashqi ishlar vazirligi va tegishli davlat organiga Oʻzbekiston Respublikasi Prezidentining rezolyutsiyasi boʻlgan xat yoki Devon tarkibiy tuzilmasi rahbarining xati yuboriladi.

15-bob. Oʻzbekiston Respublikasi Prezidenti ishtirokidagi rasmiy protokol tadbirlarini tayyorlash va oʻtkazish boʻyicha ishni tashkillashtirish

129. Oʻzbekiston Respublikasi Konstitutsiyasining 93-moddasiga muvofiq Oʻzbekiston Respublikasi Prezidenti mamlakat ichkarisida va xalqaro munosabatlarda Oʻzbekiston Respublikasi nomidan ish koʻradi, Oʻzbekiston Respublikasida akkreditatsiyadan oʻtgan diplomatik hamda boshqa vakillarning ishonch va chaqiruv yorliqlarini qabul qiladi.

130. Oʻzbekiston Respublikasi Prezidenti ishtirokidagi rasmiy protokol tadbirlar Oʻzbekiston Respublikasi Prezidentining Ijro etuvchi apparati tomonidan (bundan buyon matnda Ijro etuvchi apparat deb yuritiladi) Ishlar boshqarmasi va Oʻzbekiston Respublikasi Prezidentining Xavfsizlik xizmati bilan hamkorlikda tashkil etiladi.

131. Davlat va xoʻjalik boshqaruvi organlari, mahalliy davlat hokimiyati organlari, boshqa davlat organlari va tashkilotlari rahbarlari Oʻzbekiston Respublikasi Prezidentining xorijiy mamlakatlarga qilgan tashriflari davomida, shuningdek Oʻzbekiston Respublikasida xorijiy delegatsiyalarni qabul qilishda erishilgan kelishuvlarning (bundan buyon matnda erishilgan kelishuvlar deb yuritiladi) amalga oshirilishi uchun shaxsan masʼul hisoblanadi.

Oʻzbekiston Respublikasi Vazirlar Mahkamasi davlat va xoʻjalik boshqaruvi organlari, mahalliy davlat hokimiyati organlari, boshqa davlat organlari va tashkilotlarining erishilgan kelishuvlarni amalga oshirish boʻyicha faoliyatini muvofiqlashtiradi.

Oʻzbekiston Respublikasi Vazirlar Mahkamasi, Vazirlar Mahkamasining komplekslari va Devonning tarkibiy tuzilmalari rahbarlari Oʻzbekiston Respublikasi Prezidenti oldida erishilgan kelishuvlarning amalga oshirilishi yuzasidan davriy ravishda hisobot beradi.

132. Ijro etuvchi apparat Oʻzbekiston Respublikasi Prezidentining xorijiy davlatlarga tashrifi hamda Oʻzbekiston Respublikasi Prezidenti tomonidan xorijiy delegatsiyalarni qabul qilish yakunlari boʻyicha qabul qilingan Oʻzbekiston Respublikasi Prezidentining farmonlari, qarorlari, farmoyishlari va topshiriqlari ijro etilishining monitoringini amalga oshiradi.

133. Oʻzbekiston Respublikasi Prezidentining Matbuot xizmati audio va videoyozuvni amalga oshiradi, Ijro etuvchi apparat bilan kelishgan holda akkreditatsiyadan oʻtgan ommaviy axborot vositalari vakillariga ruxsat berish ishlarini oʻtkazadi, tegishli axborotning ommaviy axborot vositalarida tarqalishini tashkillashtiradi.

Ijro etuvchi apparat Oʻzbekiston Respublikasi Prezidentining Matbuot xizmati bilan birgalikda oldindan press-reliz va protokol tadbir haqida qisqacha maʼlumotnoma loyihalarini tayyorlaydi.

16-bob. Oʻzbekiston Respublikasi Prezidenti vakolatlarini amalga oshirishga koʻmaklashuvchi maslahat, kengash va boshqa organlar

134. Oʻzbekiston Respublikasi Prezidenti vakolatlarini amalga oshirishga koʻmaklashish uchun maslahat, kengash va boshqa organlar (bunday buyon matnda maslahat va kengash organlari deb yuritiladi) tashkil etilishi mumkin.

135. Maslahat va kengash organlarining vazifa, funksiya, huquq va majburiyatlari, shuningdek, faoliyatini tashkil etish ular haqidagi tegishli nizomlar bilan belgilanadi.

136. Maslahat va kengash organlari faoliyatini tashkil etish, hamkorlik va muvofiqlashtirish Devonning ularga biriktirilgan tegishli tarkibiy tuzilmalari tomonidan amalga oshiriladi.

17-bob. Oʻzbekiston Respublikasi Prezidentining faoliyati toʻgʻrisidagi axborotdan foydalanishni taʼminlash

137. Oʻzbekiston Respublikasi Prezidentining faoliyati toʻgʻrisidagi axborotdan jismoniy va yuridik shaxslarning foydalanishi Oʻzbekiston Respublikasi Konstitutsiyasining 30-moddasi va “Davlat hokimiyati va boshqaruvi organlari faoliyatining ochiqligi toʻgʻrisida”gi Qonunga muvofiq taʼminlanadi.

138. Oʻzbekiston Respublikasi Prezidentining faoliyati milliy va xorijiy ommaviy axborot vositalarida yoritiladi.

Oʻzbekiston Respublikasi Prezidentining faoliyatini ommaviy axborot vositalarida yoritish, shuningdek matbuot-konferensiyalar, brifinglar, intervyular, Oʻzbekiston Respublikasi Prezidentining ommaviy axborot vositalari vakillari bilan uchrashuvlarini tashkillashtirish Ommaviy axborot vositalari, maʼnaviyat va maʼrifat, madaniyat, sanʼat va ijodiy tashkilotlarni rivojlantirish masalalari xizmati tomonidan amalga oshiriladi.

139. Oʻzbekiston Respublikasi Prezidentining alohida hujjatlari, nutqlari va boshqa hujjatlari Oʻzbekiston Respublikasi Prezidentining “Xabarnoma — Press-byulleten” rasmiy nashrida nashr etiladi.

“Xabarnoma — Press-byulleten”ning nashr etilishini tashkillashtirish Ommaviy axborot vositalari, maʼnaviyat va maʼrifat, madaniyat, sanʼat va ijodiy tashkilotlarni rivojlantirish masalalari xizmati tomonidan amalga oshiriladi.

140. Oʻzbekiston Respublikasi Prezidentining faoliyati shuningdek Oʻzbekiston Respublikasi Prezidentining rasmiy veb-resursida yoritiladi.

Oʻzbekiston Respublikasi Prezidentining rasmiy veb-resursida axborotni joylashtirish va yangilash tartibi Ommaviy axborot vositalari, maʼnaviyat va maʼrifat, madaniyat, sanʼat va ijodiy tashkilotlarni rivojlantirish masalalari xizmati tomonidan Ijro etuvchi apparat bilan kelishilgan holda belgilanadi.

18-bob. Devon tarkibiy tuzilmalari rahbarlari va xodimlarining javobgarligi

141. Devon tarkibiy tuzilmalarining rahbarlari va xodimlari:

mazkur reglament talablariga qatʼiy va soʻzsiz amal qilish;

oʻzlariga yuklatilgan vazifalarni sifatli va oʻz vaqtida bajarish;

Oʻzbekiston Respublikasi Prezidentiga kiritiladigan normativ-huquqiy hujjatlar loyihalarining moliyaviy, iqtisodiy, huquqiy hamda boshqa ekspertizasi kompleks va sifatli boʻlishi;

Oʻzbekiston Respublikasi Prezidentiga takliflar va masalalarni kiritishda ekspert jihatdan sifatli ishlab chiqilishini tashkil qilish, milliy va davlat manfaatlarini taʼminlash;

muvofiqlashtiriladigan tuzilmalar tomonidan ularga yuklatilgan vazifalar va funksiyalarning oʻz vaqtida va sifatli amalga oshirilishi ustidan nazoratni taʼminlash;

ijro intizomini taʼminlash uchun shaxsan javobgar hisoblanadi.

142. Mazkur Reglament talablarini buzishda aybdor boʻlgan Devon tarkibiy tuzilmalarining rahbarlari va xodimlari qonun hujjatlariga muvofiq intizomiy va boshqa javobgarlikka tortiladi.

19-bob. Yakuniy qoidalar

143. Devonga mazkur Reglament talablariga rioya etmasdan kiritilgan hujjatlar Devon tegishli tarkibiy tuzilmalari rahbarlari tomonidan qoʻshimcha ishlash uchun qaytarilishi mumkin.

144. Devon tarkibiy tuzilmalari tomonidan mazkur Reglament bilan tartibga solinmagan masalalarni koʻrib chiqish tartibi shunga oʻxshash munosabatlarni tartibga soladigan Reglament normalariga asosan amalga oshiriladi.

Oʻzbekiston Respublikasi Prezidenti devonining Reglamentiga 1-ILOVA

Oʻzbekiston Respublikasining qonunlarini imzolanish va eʼlon qilish tartibi

SXEMASI

Oʻzbekiston Respublikasi Prezidenti devonining Reglamentiga 2-ILOVA

Oʻzbekiston Respublikasining qonunini, Oʻzbekiston Respublikasi Prezidentining farmoni, qarori va farmoyishini tarqatish

Reyestri

Hujjat turi ________________________________________________________________________________________________________________________ (qonun, OʻzR Prezidentining farmoni, qarori, farmoyishi) Nomi:________________________________________________________________________________________________________________ _________________________________________________________________________________________________________________________ Sana: 20___ y. “___” __________; t/r _____ T/r Hujjatni qabul qiluvchi boʻlinma yoki organ nomi Nus. son. MAJBURIY TARQATISh Prezident Devoni 1. Ijro etuvchi apparat 2 2. Tashkiliy-kadrlar xizmati 1 3. Siyosiy-huquqiy masalalar xizmati 2 4. Fuqarolar huquqlarini himoya qilish, jismoniy va yuridik shaxslarning murojaatlari bilan ishlashni nazorat qilish va muvofiqlashtirish xizmati 1 5. Ijtimoiy-iqtisodiy siyosatni muvofiqlashtirish xizmati 1 6. Ommaviy axborot vositalari, maʼnaviyat va maʼrifat, madaniyat, sanʼat va ijodiy tashkilotlarni rivojlantirish masalalari xizmati 1 7. Jamoat va diniy tashkilotlar bilan hamkorlik qilish xizmati 1 8. Yoshlar siyosati masalalari xizmati 1 9. Fan, taʼlim, sogʻliqni saqlash va sportni rivojlantirish masalalari xizmati 1 10. Ishlar boshqarmasi 1 11. Oʻzbekiston Respublikasi Prezidenti huzuridagi Xavfsizlik kengashi apparati 1 12. Oʻzbekiston Respublikasi Prezidenti huzuridagi Amaldagi qonun hujjatlari monitoringi instituti 1 13. Oʻzbekiston Respublikasi Prezidenti huzuridagi Strategik va mintaqalararo tadqiqotlar instituti 1 14. Oʻzbekiston Respublikasi Pr?zidenti huzuridagi Davlat boshqaruvi akademiyasi 1 141.‎ ‎ Oʻzbekiston Respublikasi Hisob palatasi 1‎ Davlat organlari va tashkilotlari 15. Oliy Majlis Senati 2 16. Oliy Majlis Qonunchilik palatasi 2 17. Vazirlar Mahkamasi 6 18. Konstitutsiyaviy sud 1 19. Oliy sud 1 20. Bosh prokuratura 1 21. Adliya vazirligi 2 22. Iqtisodiyot vazirligi 1 23. Moliya vazirligi 1 24. Davlat statistika qoʻmitasi 1 ASOSIY TARQATISh Markaziy muassasalar 25. Oʻzbekiston Respublikasi Markaziy saylov komissiyasi 26. Oʻzbekiston Respublikasi Markaziy banki 28. Davlat xavfsizlik xizmati Vazirliklar 29. Qishloq xoʻjaligi vazirligi 291. Suv xoʻjaligi vazirligi 30. Bandlik va mehnat munosabatlari vazirligi 31. Oliy va oʻrta maxsus taʼlim vazirligi 32. Xalq taʼlimi vazirligi 33. Sogʻliqni saqlash vazirligi 34. Mudofaa vazirligi 35. Ichki ishlar vazirligi 36. Favqulodda vaziyatlar vazirligi 37. Tashqi ishlar vazirligi 38. Tashqi savdo vazirligi 39. Axborot texnologiyalari va kommunikatsiyalarini rivojlantirish vazirligi 40. Madaniyat vazirligi 41. Uy-joy kommunal xizmat koʻrsatish vazirligi 411. Innovatsion rivojlanish vazirligi 412. Jismoniy tarbiya va sport vazirligi Davlat qoʻmitalari 42. Xususiylashtirilgan korxonalarga koʻmaklashish va raqobatni rivojlantirish davlat qoʻmitasi 43. Davlat soliq qoʻmitasi 44. Davlat bojxona qoʻmitasi 45. Ekologiya va atrof-muhitni muhofaza qilish davlat qoʻmitasi 46. Davlat geologiya va mineral resurslar qoʻmitasi 47. Davlat arxitektura va qurilish qoʻmitasi 48. Yer resurslari, geodeziya, kartografiya va davlat kadastri boʻyicha davlat qoʻmitasi 50. Turizmni rivojlantirish davlat qoʻmitasi 51. Avtomobil yoʻllari davlat qoʻmitasi 52. Investitsiyalar boʻyicha davlat qoʻmitasi 53. Oʻrmon xoʻjaligi davlat qoʻmitasi 54. Davlat veterinariya qoʻmitasi Agentliklar 55. Oʻzbekiston Respublikasi Prezidenti huzuridagi Loyiha boshqaruvi milliy agentligi 56. Oʻzbekiston Matbuot va axborot agentligi 57. Oʻzbekiston standartlashtirish, metrologiya va sertifikatlashtirish agentligi 58. Oʻzbekiston avtomobil va daryo transporti agentligi 59. Intellektual mulk agentligi 60. Markaziy bank huzuridagi Qimmatbaho metallar agentligi 62. “Oʻzarxiv” agentligi 63. “Oʻzbekkino” agentligi Qoʻmitalar 64. Davlat zaxiralarini boshqarish qoʻmitasi 65. Din ishlari boʻyicha qoʻmita 66. Millatlararo munosabatlar va xorijiy mamlakatlar bilan doʻstlik aloqalari qoʻmitasi Markazlar 67. Qimmatli qogʻozlar bozorini muvofiqlashtirish va rivojlantirish markazi 68. Kasb-hunar taʼlimi markazi 69. Davlat test markazi 70. Narkotik moddalarni nazorat qilish milliy axborot-tahlil markazi 72. Gidrometeorologiya xizmati markazi 73. Davlat personallashtirish markazi Davlat inspeksiyalari 74. Parvozlar xavfsizligini nazorat qilish DI 75. Temir yoʻllarda yuk va yoʻlovchilar tashish xavfsizligini nazorat qilish DI 76. Katta va alohida muhim suv xoʻjaligi obyektlarining texnik holatini hamda bexatar ishlashini nazorat qilish DI 77. Oʻzbekiston neft mahsulotlari va gazdan foydalanishni nazorat qilish DI 78. Elektr energetikada nazorat boʻyicha DI 79. “Sanoatgeokontexnazorat” DI 80. Yoʻl-qurilish ishlari sifatini nazorat qilish DI 81. Ichimlik suvidan foydalanishni nazorat qilish DI 82. Taʼlim sifatini nazorat qilish DI 84. Taʼlim sifatini nazorat qilish DI Mahalliy davlat hokimiyati organlari 85. Qoraqalpogʻiston Respublikasi Joʻqorgʻi Kengesi 86. Qoraqalpogʻiston Respublikasi Vazirlar Kengashi 87. Viloyat va Toshkent shahar hokimliklari 88. … Xoʻjalik boshqaruvi organlari 89. “Oʻzbekneftegaz” AJ 90. “Oʻzbekiston temir yoʻllari” AJ 91. “Oʻzbekenergo” AJ 92. …. 93. …. 94. …. 95. …. 96. …. 97. …. 98. …. 99. …. 100. …. 101. …. Nodavlat notijorat tashkilotlari 102. Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashi 103. “Nuroniy” jamgʻarmasi 104. Oʻzbekiston Xotin-qizlar qoʻmitasi 105. Kasaba uyushmalari Federatsiyasi Kengashi 106. Oʻzbekiston yoshlar ittifoqi 107. Fuqarolik jamiyati shakllanishini monitoring qilish mustaqil instituti 108. …. 109. …. 110. …. 111. …. 112. …. 113. …. 114. Boshqa tashkilotlar 115. …. 116. …. 117. …. 118. …. 119. …. 120. …. 121. …. 122. …. 123. …. 124. …. 125. …. 126. …. 127. …. 128. …. 129. …. 130. …. 131. …. 132. …. 133. …. 134. …. 135. …. 136. …. 137. …. 138. …. 139. …. 140. …. 141. …. Rasmiy manbalarda chop etilishi uchun* 142. “Xalq soʻzi” va “Narodnoye slovo” gazetalari 143. “Oʻzbekiston Respublikasi qonun hujjatlarining toʻplami” va “Oʻzbekiston Respublikasi qonun hujjatlari maʼlumotlari milliy bazasi” 144. “Oʻzbekiston Respublikasi Oliy Majlisi palatalarining Axborotnomasi” Tarqatish koʻrsatkichini tuzdi Ijrochining F.I.O. va lavozimi: ________________ ______________________________________________ ______________________________________________ Xizmat: ______________________________________ Ijrochining imzosi: ________________________ Sana: 20___ y. “___” ____________

*Izoh:

Oʻzbekiston Respublikasi Prezidentining normativ-huquqiy hisoblanadigan (umum majburiy davlat koʻrsatmalari sifatida huquqiy normalarni belgilashga, oʻzgartirishga yoki bekor qilishga qaratilgan), shu jumladan fuqarolarning huquq hamda manfaatlariga daxldor boʻlgan hujjatlari normativ-huquqiy hujjatlar eʼlon qilinadigan rasmiy manbalarda eʼlon qilinishi shart.

Mazkur shaklga tegishli boʻlinma va organlarning tuzilishi, qayta tashkil etilishi va tugatilishidan kelib chiqib oʻzgartirishlar kiritiladi.

Oʻzbekiston Respublikasi Prezidenti devonining reglamentiga 3-ILOVA

I. Oʻzbekiston Respublikasi Prezidenti tomonidan qarorlar qabul qilinadigan eng muhim yoʻnalishlar va masalalar roʻyxati

1. Soliq, pul-kredit, bojxona va valyuta siyosatining asosiy yoʻnalish va parametrlari.

2. Tegishli yilga Oʻzbekiston Respublikasi Davlat budjetining asosiy makroiqtisodiy koʻrsatkichlari va parametrlari prognozi.

3. Soliq va bojxona imtiyozlari va preferensiyalari berish, tashqi iqtisodiy faoliyatni bojxona-tarif jihatdan tartibga solish masalalari.

4. Yillik, choraklik va oylik valyuta balanslari, davlatning tashqi qarziga xizmat koʻrsatish masalalari.

5. Qimmatli metallar bilan operatsiyalar.

6. Qimmatli metallarni qazib olishga davlat buyurtmasi.

7. Iqtisodiy islohotlarni chuqurlashtirishning va umuman iqtisodiyotni hamda muhim soha va tarmoqlarni liberallashtirishning strategik masalalari.

8. Yoqilgʻi-energetika kompleksini, iqtisodiyotning bazaviy va qayta ishlash tarmoqlarini rivojlantirish va modernizatsiya qilishning uzoq muddatli istiqbollari va dasturlari.

10. Oʻzbekiston Respublikasining rivojlantirish konsepsiyalari, loyihalari portfellari va davlat dasturlari, shuningdek, tarmoq va hududiy rivojlantirish konsepsiyalari.

11. Oylik ish haqlarini oshirish bilan va aholini ijtimoiy himoya qilish, mehnatga haq toʻlashning yagona tarif tizimini takomillashtirish bilan bogʻliq masalalar.

13. Maʼmuriy islohotlarni chuqurlashtirish, boshqaruv tuzilmasini, taʼlimni takomillashtirish, davlat va xoʻjalik boshqaruv organlarini qayta tashkil etish va tugatish masalalari.

14. Xalqaro moliyaviy institutlar va xorijiy davlatlar bilan hamkorlik qilish dasturlari.

16. Davlat safarbarlik va strategik zaxiralarini shakllantirish va foydalanish masalalari.

17. Eksport potensialini rivojlantirish dasturlari parametrlari va tovarlar (ishlar, xizmatlarni) eksport qilish istiqbollari.

18. Davlat va xoʻjalik boshqaruvi organlari, mahalliy davlat hokimiyati organlari boshqaruv xodimlarining cheklangan soni.

19. Alohida mahsulotlar, xomashyo va materiallarning material balanslari (Oʻzbekiston Respublikasi Prezidentining 2017-yil 4-maydagi F-4926-sonli “Mahsulotlar, xomashyo va materiallarning asosiy turlarining ishlab chiqiladigan va tasdiqlanadigan material balanslari roʻyxatini tasdiqlash toʻgʻrisida”gi Farmoyishiga muvofiq).

20. Milliy xavfsizlik va mudofaa qobiliyati, Oʻzbekiston Respublikasi davlat chegarasini muhofaza qilish, davlat manfaatlarini himoya qilish, shuningdek strategik muhim ahamiyatga ega boshqa masalalar.

21. Tashqi ishlar vazirligi va diplomatik xizmatlar faoliyati masalalari.

22. Sudlar, adliya, prokuratura va ichki ishlar organlari faoliyatini isloh qilish masalalari.

23. Fuqarolik jamiyati institutlarini, diniy tashkilotlarni isloh qilish, millatlararo munosabatlarni mustahkamlash masalalari.

24. Oʻzbekiston Respublikasining oliy va oʻrta maxsus, kasb-hunar taʼlim muassasalariga qabul kvotalarini shakllantirish masalalari.

II. Oʻzbekiston Respublikasi Prezidenti bilan majburiy tartibda kelishilgan holda Vazirlar Mahkamasining qarorlari va farmoyishlari qabul qilinadigan masalalar roʻyxati

1. Iqtisodiy islohotlarni chuqurlashtirishning va umuman iqtisodiyotni hamda eng muhim tarmoqlar va sohalarni liberallashtirishning (fermer xoʻjaliklarini rivojlantirish, kadrlar tayyorlash, maktab taʼlimi, sogʻliqni saqlash va boshqalar) joriy masalalari.

2. Davlat maqsadli jamgʻarmalarini shakllantirish va foydalanish.

3. Qoraqalpogʻiston Respublikasini, viloyatlar va Toshkent shahrini rivojlantirishning alohida masalalari boʻyicha dasturlar.

4. Davlat mulki obyektlarini xususiylashtirishning dasturlari.

5. Iqtisodiyot tarmoqlarini modernizatsiya, rekonstruksiya qilish va texnik qayta jihozlash boʻyicha eng muhim dasturlar va investitsiya loyihalarini amalga oshirish.

6. Maʼmuriy islohotlarni amalga oshirishning hamda boshqaruv, taʼlim tuzilmasini takomillashtirish, davlat va xoʻjalik boshqaruvi organlarini qayta tashkil etish va tugatishning joriy masalalari.

7. Xalqaro moliyaviy institutlar va donor-mamlakatlar ishtirokida loyihalarni amalga oshirish.

8. Oʻzbekiston Respublikasining rivojlanish davlat dasturlari, tarmoq va hududiy rivojlantirish konsepsiyalari doirasida amalga oshiriladigan loyihalarning, Oʻzbekiston Respublikasi Prezidenti va Hukumat qarorlari doirasida, Oʻzbekiston Respublikasi Tiklanish va taraqqiyot jamgʻarmasi mablagʻlari hisobiga, shuningdek, davlat korxonalarining, ustav fondida davlat ulushi 50 foiz va undan ortiq boʻlgan xoʻjalik subyektlarining, davlat ulushi 50 foiz va undan ortiq boʻlgan yuridik shaxslarga ustav fondining 50 foizi va undan ortigʻi tegishli xoʻjalik subyektlarining oʻz mablagʻlari hisobiga amalga oshiriladigan boshqa loyihalarning texnik-iqtisodiy asoslari va texnik-iqtisodiy hisob- kitoblarini tasdiqlash.

Oʻzbekiston Respublikasi Prezidenti devonining Reglamentiga 4-ILOVA

Oʻzbekiston Respublikasi Prezidentining farmonlari, qarorlari va farmoyishlari loyihalarini tayyorlash, koʻrib chiqish, imzolash va eʼlon qilish

SXEMASI

Bosqichlar Ijrochilar Tadbirlar Bajarish muddatlari 1. Loyihani PDga koʻrib chiqish uchun kiritish Vazirlar Mahkamasi, Sudyalar oliy kengashi, Konstitutsiyaviy sud, Oliy sud, Adliya vazirligi, IIV, MXX, Bosh prokuratura, Mudofaa vazirligi, FVV, TIV, Hisob palatasi, Oʻzbekiston Respublikasi Prezidenti huzuridagi Loyiha boshqaruvi milliy agentligi, zarur hollarda — boshqa davlat va xoʻjalik boshqaruvi organlari, mahalliy davlat hokimiyati organlari, boshqa davlat organlari va tashkilotlari 1. Loyihalar qonun hujjatlarining ijrosini taʼminlash, Oʻzbekiston Respublikasi Prezidentining yoki PD xizmatlari rahbarlarining topshirigʻiga koʻra, shuningdek, davlat organlari va boshqa tashkilotlarning tashabbusi bilan ishlab chiqiladi. 2. Manfaatdor davlat organlari va boshqa tashkilotlar bilan kelishilgan loyihalar PDga kiritiladi. 3. Kuzatuv xati loyihani kiritayotgan organ rahbari tomonidan PD tegishli xizmatini koʻrsatgan holda imzolanadi. Belgilangan muddatlarda 2. Loyihani koʻrib chiqish uchun masʼul boʻlgan PD xizmatini aniqlash PD Umumiy boʻlimi PD xizmatlari faoliyat yoʻnalishlariga muvofiq loyihani ishlab chiqish uchun masʼul xizmatni aniqlash. Loyiha PDga kiritilgan kunda 3. Loyihani koʻrib chiqish PD masʼul xizmati 1. Loyihani ekspert jihatdan koʻrib chiqish, zarur hollarda uni qayta ishlash. 2. Agar loyihada PD boshqa xizmatlari yurituviga kiruvchi normalar mavjud boʻlsa, loyiha PD koʻrsatilgan xizmatlariga kelishish uchun yuboriladi, ular loyihani koʻrib chiqadi, va imzolaydi, yoki u boʻyicha oʻz eʼtirozlari va takliflarini beradi. 3. Loyihaning huquqiy ekspertizasi PD Siyosiy-huquqiy xizmati tomonidan amalga oshiriladi. Loyiha PDga kiritilgan kundan eʼtiboran oʻn kun ichida (sh.j. kelishish va huquqiy ekspertizadan oʻtkazish — 3 kunlik muddatda) 4. Loyihani Oʻzbekiston Respublikasi Prezidentiga koʻrib chiqish uchun kiritish PD masʼul xizmati 1. Uzil-kesil koʻrib chiqilgan loyiha Oʻzbekiston Respublikasi Prezidentiga koʻrib chiqish uchun kiritiladi. 2. Agar loyihani qabul qilish maqsadga muvofiq boʻlmagan yoki jiddiy qayta ishlash talab etiladigan holatda yoki PD tegishli xizmati tomonidan qayta ishlanadi, yoki tegishli xulosa bilan loyihani kiritgan organga qaytariladi. 5. Hujjatni roʻyxatdan oʻtkazish va tarqatish PD Umumiy boʻlimi 1. Imzolangan hujjatga raqam, sana va imzolash joyi qoʻyiladi. Hujjatning tarqatiladigan nusxalari Umumiy boʻlimning muhri bilan, davlat sirini tashkil etuvchi maʼlumotlarni oʻz ichiga olgan nusxalar esa — Rejim boʻyicha xizmatning muhri bilan tasdiqlanadi. 2. Oʻzbekiston Respublikasi Prezidentining hujjati tarqatish reyestriga kiritilgan davlat organlari va boshqa tashkilotlarga yuboriladi. 1. Imzolangan kun 2. Ijrochilarga yetkazish — bir kunlik muddatda, shoshilinchlarini esa — zudlik bilan 6. Hujjatni eʼlon qilishni tashkil etish PD masʼul xizmati, PD Umumiy boʻlimi 1. Loyihani koʻrib chiqishga masʼul ijrochi PD tegishli xizmati rahbari bilan kelishgan holda hujjatni, shuningdek unga sharhlarni matbuotda eʼlon qilish zaruriyatini belgilaydi. 2. Roʻyxatdan oʻtkazilgan h�jjatning nusxasi Umumiy boʻlim tomonidan quyidagilarga yuboriladi: PD Siyosiy-huquqiy masalalar xizmatiga — normativ-huquqiy hujjatlar eʼlon qilinadigan rasmiy manbalarda chop etishni tashkil etish hamda ularning tizimli hisobini va nazorat nusxalarini yuritish uchun (zarurat boʻlganda); Oliy Majlisi palatalariga — “Oliy Majlisi palatalarining Axborotnomasi”da eʼlon qilish uchun (zarurat boʻlganda); Adliya vazirligiga — “Oʻzbekiston Respublikasi qonun hujjatlarining toʻplami” va Qonun hujjatlari maʼlumotlari milliy bazasida eʼlon qilish uchun (zarurat boʻlganda), shuningdek ularning tizimli hisobini va nazorat nusxalarini yuritish, davlat organlari va boshqa tashkilotlarga yetkazish uchun; Oʻzbekiston Respublikasi Prezidentining Matbuot xizmatiga — Oʻzbekiston Respublikasi Prezidentining rasmiy veb-resursida eʼlon qilish uchun (zarurat boʻlganda). Hujjat imzolangan kun 7. Hujjatni ijrochilarga yetkazishni tashkil etish PD masʼul xizmati 1. Loyihani imzolashga kiritgan xizmat uni quyidagilarga yuborilishini taʼminlaydi: AP Siyosiy-huquqiy masalalar xizmatiga — Oʻzbekiston Respublikasi Prezidenti hujjatining, shuningdek axborot-tahlil materiallarini elektron shakllarini; tegishli tashkilotlarga — Oʻzbekiston Respublikasi Prezidenti hujjatining elektron shaklini rasmiy eʼlon qilish uchun (zarurat boʻlganda); Oʻzbekiston Respublikasi Prezidentining Matbuot xizmatiga — Oʻzbekiston Respublikasi Prezidenti hujjatining elektron shaklini Oʻzbekiston Respublikasi Prezidentining rasmiy veb-resursida eʼlon qilish uchun (zarurat boʻlganda). PD Siyosiy-huquqiy masalalar xizmati Oʻzbekiston Respublikasi Prezidentining hujjati hamda uning axborot-tahlil materiallarining elektron shakllarini hujjatni ijrochilar va aholiga yetkazish boʻyicha chora-tadbirlarni amalga oshirish uchun Adliya vazirligiga yuboradi Hujjat imzolangandan keyingi kundan kechiktirmasdan

Oʻzbekiston Respublikasi Prezidenti devonining Reglamentiga 4a-ILOVA

OʻR Prezidentining topshirigʻiga koʻra ishlab chiqilayotgan OʻR Prezidentining farmoni, qarori va farmoyishi loyihalarini tayyorlash va koʻrib chiqish uchun kiritish

SXEMASI

Oʻzbekiston Respublikasi Prezidenti devonining Reglamentiga 5-ILOVA

Oʻzbekiston Respublikasi Prezidentining farmonlari, qarorlari va farmoyishlari loyihalarini rasmiylashtirishga

TEXNIK TALABLAR

1. Oʻzbekiston Respublikasi Prezidentining farmonlari, qarorlari va farmoyishlari loyihalarini rasmiylashtirishda standart blankalar va qogʻozlar quyidagi tartibda ishlatiladi:

blankning yuqori qismidan nomlanishga qadar masofa kamida 8 sm boʻlishi kerak;

chap tomondan — 3 sm;

oʻng tomondan — 1,5 sm;

past qismidan — kamida 2 sm.

2. Oʻzbekiston Respublikasi Prezidentining farmonlari, qarorlari va farmoyishlari matnlari Word for Windows (2.0 va undan yuqori versiyasi) matn muharriridan foydalangan holda, Times New Roman, Times New Roman UZB shriftida 14 kattalikda, qoida tariqasida, bir satrlararo intervalda chop etiladi. Jadvallarni aks ettirish uchun boshqa kattalikdagi shriftlardan foydalanishga yoʻl qoʻyiladi.

3. Nomlanish 14 kattalikdagi toʻq harflarda, hujjat sanasi va raqami koʻrsatilgan joydan 2 sm quyida beriladi va tagiga chizilmaydi. Nomlanishning oʻlchamidan kelib chiqib, chap tomondan 3 sm dan 4,5 sm gacha xatboshi tashlanadi, oʻng tomondan — 1,5 sm dan 3,5 sm gacha va markazga toʻgʻrilanadi.

4. Ikki va undan ortiq varaqlar chop etilganda ikkinchi va undan keyingi varaqlar raqamlanishi shart. Tartib raqamlari arab raqamlarida yuqori hoshiyaning oʻrtasida nuqta belgisiz qoʻyiladi. Hujjatning va ilovaning birinchi varagʻi raqamlanmaydi.

5. Matn nomlanishdan 2 sm pastdan boshlanadi. Xatboshi matnli maydonning chap chegarasidan 1,25 sm dan boshlanadi. Matnlar, qoida tariqasida, bir satrlararo interval bilan chop etiladi. Qisqa (ikki yoki uch xatboshili) matnlarda interval 1,5 ni tashkil qilishi mumkin. Ikkinchi va keyingi varaqlarga oʻtishda varaqning pastki qismida kamida 2 sm qolishi shart.

6. Matn yakunlangandan keyin 2 sm pastdan toʻq harflarda “Oʻzbekiston Respublikasi Prezidenti” soʻzlari ikki qator qilib bir satrlararo intervalda yoziladi. “Oʻzbekiston Respublikasi” soʻzlari matn hoshiyasining chap chegarasidan yoziladi, “Prezidenti” soʻzi esa mazkur soʻzlarga nisbatan markazda joylashadi. Prezident imzosi uchun kamida 7 sm joy qoldiriladi.

Oʻzbekiston Respublikasi Prezidenti devonining Reglamentiga 6-ILOVA

Oʻzbekiston Respublikasi Prezidentining farmonlari, qarorlari, farmoyishlari, topshiriqlari ijrosini tashkil qilish va nazoratini yuritish

sxemasi

* Hujjatlarni (topshiriqlarni) Yagona tizimda roʻyxatga olishda va ijro qilishda Oʻzbekiston Respublikasi Vazirlar Mahkamasining 1999-yil 12-yanvardagi 12-sonli “Ijro intizomini mustahkamlash chora-tadbirlari toʻgʻrisida”gi qaroriga ilovada koʻrsatilgan 1 va 2-sonli Sxemalarda berilgan muddatlarga qatʼiy amal qilish lozim.

** Bu va keyingi oʻrinlarda Umumiy boʻlim deganda tashkilotning hujjatlarni roʻyxatga olish, hisobga qoʻyish va nazorat qilish uchun masʼul boʻlgan tarkibiy boʻlinmalari nazarda tutilmoqda.