Favqulodda vaziyatlarning oldini olish va ularni bartaraf etish boʻyicha Hukumat komissiyasi va hududiy komissiyalar toʻgʻrisidagi nizomlarni tasdiqlash haqida (525-son)

19.07.2017

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Favqulodda vaziyatlarning oldini olish va ularni bartaraf etish tizimi samaradorligini tubdan oshirish chora-tadbirlari toʻgʻrisida” 2017-yil 1-iyundagi PF–5066-son Farmonini bajarish yuzasidan, shuningdek favqulodda vaziyatlarning oldini olish va ularni bartaraf etish ishlariga samarali rahbarlikni taʼminlash maqsadida Vazirlar Mahkamasi qaror qiladi:

1. Quyidagilar:

Favqulodda vaziyatlarning oldini olish va ularni bartaraf etish boʻyicha Hukumat komissiyasi toʻgʻrisidagi nizom 1-ilovaga muvofiq;

Favqulodda vaziyatlarning oldini olish va ularni bartaraf etish boʻyicha hududiy komissiyalar toʻgʻrisidagi nizom 2-ilovaga muvofiq tasdiqlansin

2. Qoraqalpogʻiston Respublikasi Vazirlar Kengashi, viloyatlar va Toshkent shahri hokimlari:

ikki oy muddatda komissiyalar yigʻilishlarini oʻtkazsinlar va ularning 2017-yil oxirigacha boʻlgan ish rejalarini tasdiqlasinlar;

har oyda keyingi oyning 10-kunigacha Hukumat komissiyasining ishchi organiga uning qarorlari bajarilishi holati toʻgʻrisida axborot taqdim etsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 19-iyul,

525-son

Vazirlar Mahkamasining 2017-yil 19-iyuldagi 525-son qaroriga 1-ILOVA

Favqulodda vaziyatlarning oldini olish va ularni bartaraf etish boʻyicha Hukumat komissiyasi toʻgʻrisida

NIZOM

1-bob. Umumiy qoidalar

1. Ushbu Nizom Favqulodda vaziyatlarning oldini olish va ularni bartaraf etish boʻyicha Hukumat komissiyasining (keyingi oʻrinlarda Komissiya deb ataladi) vazifalari, funksiyalari, huquqlari va majburiyatlarini belgilaydi.

2. Komissiya shaxsiy tarkibi Oʻzbekiston Respublikasi Prezidentining Farmoni bilan tasdiqlanadigan kollegial organ hisoblanadi.

3. Komissiya oʻz faoliyatini Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga va boshqa qonun hujjatlariga muvofiq amalga oshiradi.

4. Komissiyaning oʻz vakolatlari doirasida qabul qilingan qarorlari davlat va xoʻjalik boshqaruv organlari, mahalliy davlat hokimiyati organlari va boshqa tashkilotlar, shuningdek fuqarolar tomonidan bajarilishi majburiy hisoblanadi.

5. Komissiya oʻz faoliyatida favqulodda vaziyatlarning oldini olish va ularni bartaraf etish boʻyicha Qoraqalpogʻiston Respublikasi, viloyatlar, Toshkent shahri va ularning tarkibiga kiruvchi tumanlar va shaharlarning favqulodda vaziyatlarning oldini olish va ularni bartaraf etish boʻyicha hududiy komissiyalarining faoliyatini nazorat qiladi va muvofiqlashtiradi.

2-bob. Komissiyaning vazifalari

6. Quyidagilar Komissiyaning vazifalari hisoblanadi:

Favqulodda vaziyatlarning oldini olish va harakat qilish davlat tizimini (keyingi oʻrinlarda FVDT deb ataladi) takomillashtirish va yanada rivojlantirishning asosiy yoʻnalishlarini belgilash;

aholi va hududlarni favqulodda vaziyatlardan muhofaza qilish boʻyicha eng muhim masalalarni koʻrib chiqish, ularni hal etish boʻyicha takliflar tayyorlash, vazirliklar, idoralar, Qoraqalpogʻiston Respublikasi Vazirlar Kengashi, viloyatlar, Toshkent shahri, shuningdek shaharlar va tumanlar hokimliklarining vazifalarini belgilash;

favqulodda vaziyatlarning oldini olish samaradorligini oshirishga qaratilgan fuqaro muhofazasi (bahor mavsumida) hamda aholi va hududlarni favqulodda vaziyatlardan muhofaza qilish (kuz mavsumida) oyligini tashkil etish va har yili oʻtkazish;

avariyalar, halokatlar, tabiiy va boshqa ofatlar oqibatida jabrlangan fuqarolarni, shuningdek favqulodda vaziyatlarni bartaraf etishda ishtirok etgan shaxslarni ijtimoiy-iqtisodiy va huquqiy muhofaza qilish, tibbiy reabilitatsiya qilish masalalari boʻyicha davlat va xoʻjalik boshqaruvi organlari, mahalliy ijro etuvchi hokimiyat organlari, fuqarolarning oʻzini oʻzi boshqarish organlari faoliyatini muvofiqlashtirish;

moliyaviy va moddiy resurslar davlat zaxiralari tashkil etilishini taʼminlash, shuningdek ulardan favqulodda vaziyatlarning oldini olish va ularni bartaraf etish maqsadida foydalanish boʻyicha takliflar ishlab chiqish;

favqulodda vaziyatlarning oldini olish va ularni bartaraf etish borasida xalqaro hamkorlikning asosiy yoʻnalishlarini belgilash.

Komissiya va uning aʼzolari ularga yuklangan vazifalar bajarilishi uchun belgilangan tartibda javob beradilar.

3-bob. Komissiyaning funksiyalari

7. Komissiya yuklangan vazifalarni bajarish maqsadida quyidagi funksiyalarni amalga oshiradi:

FVDT faoliyatini yanada takomillashtirish borasida takliflarni hamda favqulodda vaziyatlarning oldini olish va ularni bartaraf etish sohasidagi normativ-huquqiy hujjatlarni ishlab chiqadi;

favqulodda vaziyatlar sodir boʻlishi prognozlarini koʻrib chiqadi, favqulodda vaziyatlarning oldini olish va ularni bartaraf etish choralari ishlab chiqilishi va amalga oshirilishini tashkil etadi;

favqulodda vaziyatlarning oldini olish va ularni bartaraf etish sohasidagi maqsadli va ilmiy-texnik dasturlar loyihalarini koʻrib chiqadi va ularni amalga oshirish boʻyicha takliflar tayyorlaydi;

fuqaro muhofazasi, shuningdek aholi va hududlarni favqulodda vaziyatlardan muhofaza etish boʻyicha har yili oʻtkaziladigan oylik tadbirlar doirasida aholi va hududlarni tabiiy va texnogen tusdagi favqulodda vaziyatlardan muhofaza qilishga qaratilgan kompleks tadbirlarni ishlab chiqadi va amalga oshiradi;

davlat va xoʻjalik boshqaruvi organlari, mahalliy davlat hokimiyati organlarining va FVDTga kiritilgan boshqa tashkilotlarning favqulodda vaziyatlarning oldini olish va ularni bartaraf etish sohasidagi asosiy tadbirlar bajarilishi toʻgʻrisida hisobotlarini eshitadi;

Respublika fuqaro muhofazasi boshligʻiga belgilangan tartibda kiritish maqsadida aholi va hududlarni tabiiy va texnogen tusdagi favqulodda vaziyatlardan muhofaza etish borasida FVDTning asosiy tadbirlari rejasi loyihalarini, tahliliy materiallarni koʻrib chiqadi;

favqulodda vaziyatlarning oldini olish va ularni bartaraf etish borasida tadbirlarni tashkil etish va oʻtkazish boʻyicha FVDTning kuch va vositalarini belgilangan tartibda jalb etish masalalarini koʻrib chiqadi;

takliflarni koʻrib chiqadi va Oʻzbekiston Respublikasi Vazirlar Mahkamasiga kiritadi, avariyalar, halokatlar, tabiiy va boshqa ofatlar oqibatida jabrlangan fuqarolarni, shuningdek favqulodda vaziyatlarni bartaraf etishda ishtirok etgan shaxslarni ijtimoiy-iqtisodiy va huquqiy muhofaza qilish, tibbiy reabilitatsiya qilish choralari vazirliklar, idoralar, Qoraqalpogʻiston Respublikasi Vazirlar Kengashi, viloyatlar, Toshkent shahri, shaharlar va tumanlar hokimliklari va tashkilotlar tomonidan bajarilishini muvofiqlashtiradi;

favqulodda vaziyatlarning oldini olish va ularni bartaraf etish maqsadida moliyaviy va moddiy resurslarning davlat zaxiralarini tashkil etish boʻyicha takliflarni ishlab chiqadi va ulardan maqsadli foydalanilishini taʼminlaydi;

muruvvat yordamini shakllantirish va yetkazib berish boʻyicha takliflarni ishlab chiqadi va ularni tasdiqlash uchun Oʻzbekiston Respublikasi Vazirlar Mahkamasiga kiritadi;

favqulodda vaziyatlarning oldini olish va ularni bartaraf etish sohasida xalqaro hamkorlikni tashkil etish boʻyicha takliflarni ishlab chiqadi.

4-bob. Komissiyaning huquq va majburiyatlari

8. Komissiya:

belgilangan tartibda davlat va xoʻjalik boshqaruvi organlariga, mahalliy davlat hokimiyati organlariga va boshqa tashkilotlarga favqulodda vaziyatlarning oldini olish va ularni bartaraf etish masalalari boʻyicha topshiriqlar berish, oʻz vakolatiga kiradigan masalalar boʻyicha zarur axborotni soʻrash;

Komissiya yigʻilishlarida favqulodda vaziyatlarning oldini olish va ularni bartaraf etish sohasida Komissiya tomonidan qabul qilingan qarorlarning bajarilishi toʻgʻrisida bajaruvchilarning hisobotlarini eshitish;

Komissiya tomonidan qabul qilinadigan qarorlar oʻz vaqtida va sifatli bajarilishi ustidan nazorat qilish huquqiga ega.

9. Komissiya unga yuklangan vazifalarni bajarish maqsadida:

oʻz vakolatiga kiradigan masalalar boʻyicha huquqni qoʻllash amaliyotining tizimli monitoringi olib borilishini taʼminlashga;

aholi va hududlarni favqulodda vaziyatlardan muhofaza qilishning eng muhim masalalarini hal etish chora-tadbirlarini rejalashtirishga va ularning amalga oshirilishini taʼminlashga;

avariyalar, halokatlar, tabiiy va boshqa ofatlar oqibatida jabrlangan fuqarolarni, shuningdek favqulodda vaziyatlarni bartaraf etishda ishtirok etgan shaxslarni ijtimoiy-iqtisodiy va huquqiy muhofaza qilish, tibbiy reabilitatsiya qilish masalalari boʻyicha davlat va xoʻjalik boshqaruvi organlariga, mahalliy ijro etuvchi hokimiyat organlariga, fuqarolarning oʻzini oʻzi boshqarish organlariga metodik va amaliy yordam berishga;

moliyaviy va moddiy resurslarning davlat zaxiralarini barpo etish ishini tashkil etishga majburdir.

5-bob. Komissiya faoliyatini tashkil etish

10. Komissiyaga Rais boshchilik qiladi, uning vakolatiga quyidagilar kiradi:

Komissiya yigʻilishlari kun tartibini belgilash va chaqirish;

Komissiya tomonidan qabul qilingan qarorlarning bajarilishi ustidan nazoratni tashkil etish;

Komissiya aʼzolarining ularga yuklangan vazifalar bajarilishi boʻyicha ishini muvofiqlashtirish;

Komissiyaning samarali ishlashi samaradorligini taʼminlash boʻyicha boshqa harakatlarni amalga oshirish.

11. Komissiya oʻz faoliyatini doimiy asosda Komissiya yigʻilishida koʻrib chiqilgan va Rais tomonidan tasdiqlangan yillik rejaga muvofiq amalga oshiradi.

12. Komissiya yigʻilishlari zaruratga koʻra, biroq bir yilda kamida bir marta oʻtkaziladi va yigʻilish qarorlari bayonnoma bilan rasmiylashtiriladi.

13. Zarurat boʻlganda Komissiyaning sayyor yigʻilishlari tashkil etilishi mumkin.

14. Komissiya har yili boʻlajak yilda Aholi va hududlarni favqulodda vaziyatlardan muhofaza etish boʻyicha asosiy tadbirlar rejasi ishlab chiqilishini tashkil etadi, oʻz yigʻilishida koʻrib chiqadi va tasdiqlash uchun Oʻzbekiston Respublikasi fuqaro muhofazasi boshligʻiga kiritadi.

15. Favqulodda vaziyatlar sodir boʻlishining real xavfi tugʻilganda Komissiya Raisi tomonidan navbatdan tashqari yigʻilishlar chaqirilishi mumkin.

16. Aholi va hududlarni favqulodda vaziyatlardan muhofaza etish sohasidagi tadbirlar bajarilishi holatini nazorat qilish uchun zarurat boʻlganda Komissiya tomonidan ishchi guruhlar tashkil etilishi mumkin.

17. Komissiya yigʻilishini Rais olib boradi, u yoʻqligida yigʻilishni uning oʻrinbosari olib boradi. Komissiya yigʻilishi, agar unda aʼzolarning kamida uchdan ikki qismi qatnashsa vakolatli hisoblanadi.

18. Komissiya Raisi bilan kelishilgan holda yigʻilishda xolisona sabablarga koʻra qatnasha olmaydigan aʼzolar oʻrniga ularning vakolatli vakillari qatnashishi mumkin.

6-bob. Komissiyaning ishchi organi va kotibi

19. Oʻzbekiston Respublikasi Favqulodda vaziyatlar vazirligi Komissiyaning ishchi organi hisoblanadi.

20. Komissiyaning ishchi organi:

kelgusi yilga Komissiyaning ish rejasi loyihasini tayyorlaydi;

Komissiyaning navbatdagi yigʻilishiga barcha hujjatlar oʻz vaqtida tayyorlanishini taʼminlaydi;

Komissiyaning qarorlariga muvofiq zarur axborot, tahliliy va boshqa materiallarni Komissiyaning koʻrib chiqishi uchun taqdim etadi;

joylarga chiqib Komissiya qarorlari bajarilishi monitoringini olib boradi;

Komissiyaning qarorlarini ijro etish holati toʻgʻrisida axborot yigʻadi va muntazam ravishda (bir oyda kamida bir marta) Komissiya Raisiga axborot beradi.

21. Oʻzbekiston Respublikasi Vazirlar Mahkamasining Harbiylashtirilgan tuzilmalar faoliyatini moliyaviy va moddiy-texnik taʼminlash boʻlimining bosh mutaxassisi Komissiya kotibi hisoblanadi.

22. Komissiya kotibi:

Komissiya yigʻilishlari kun tartibi masalalari boʻyicha oʻtkazilishini tashkil etadi;

barcha zarur hujjatlar navbatdagi yigʻilishga toʻplanishi, umumlashtirilishi va Komissiya Raisiga taqdim etilishini taʼminlaydi;

Komissiya yigʻilishiga materiallarni tayyorlash yuzasidan ishchi organga koʻmaklashadi;

Komissiya Raisi bilan yigʻilishning muddati va joyini hamda taklif etiladigan shaxslar roʻyxatini kelishadi;

Komissiya aʼzolari va taklif etilgan shaxslarga yigʻilish oʻtkaziladigan sana, vaqti, joyi toʻgʻrisida xabar beradi;

Komissiya qarorlari bajarilishi monitoringini olib boradi va uning natijalarini Komissiya yigʻilishida koʻrib chiqish uchun taqdim etadi;

Komissiya bayonnomalarini rasmiylashtiradi va tasdiqlangan bayonnomalarni Komissiya aʼzolariga, manfaatdor vazirliklar, idoralar, mahalliy ijro etuvchi hokimiyat organlariga yuboradi.

7-bob. Komissiya yigʻilishiga materiallarni tayyorlash tartibi

23. Kun tartibi masalalari boʻyicha Komissiya yigʻilishi materiallari yigʻilish oʻtkazilishidan kamida 20 kun oldin tayyorlanadi hamda koʻrib chiqiladigan masalalarning mohiyatini, mavjud muammolarni ochib beruvchi axborot-tahliliy materiallarni va bajarishning aniq muddatlari, bajaruvchilar, moliyalashtirish manbalari va moddiy-texnik taʼminlash, vaziyatning salbiy rivojlanishi prognozi koʻrsatilgan holda ularni hal etish boʻyicha takliflarni; muammoning holatini va zarur moddiy-texnik va moliyaviy resurslarni yorqin namoyish qiluvchi taqdimotni; kun tartibi masalalari boʻyicha Komissiya qarorlari loyihasini oʻz ichiga oladi.

24. Komissiya qarorlarini bajarish boʻyicha taqdim etilgan materiallar ishchi organ tomonidan koʻrib chiqiladi, u ularni navbatdagi yigʻilishda koʻrib chiqish uchun rasmiylashtiradi, Komissiya yigʻilishi kun tartibini tayyorlaydi va hujjatlar toʻplamini Komissiya kotibiga taqdim etadi.

25. Komissiya yigʻilishi kun tartibining har bir masalasi boʻyicha hujjatlar toʻplamida barcha zarur hujjatlar va Komissiya qarorining loyihasi boʻlishi lozim.

26. Komissiya kotibi taqdim etilgan materiallar haqida Komissiya Raisiga axborot beradi, Komissiya raisi kun tartibi va taqdim etilgan materiallar maʼqullangan taqdirda 7 kun oldin Komissiya yigʻilishi oʻtkaziladigan sanani, vaqtini hamda yigʻilishga taklif etiladigan shaxslarni belgilaydi.

27. Komissiya kotibi ishchi organ bilan yigʻilish hujjatlari bayonnoma loyihasi bilan birga Komissiya aʼzolariga hamda, zarurat boʻlganda, yigʻilishga taklif etilgan boshqa shaxslarga yuborilishini taʼminlaydi.

28. Komissiyaning navbatdan tashqari yigʻilishlari Komissiya yoki hududiy komissiyalar ishchi organining maxsus xabarnomasi asosida Komissiya Raisi tomonidan chaqiriladi.

Navbatdan tashqari yigʻilishlarni oʻtkazish muddatlari Komissiya Raisi tomonidan belgilanadi va uning aʼzolariga Komissiya kotibi tomonidan shoshilinch tartibda yetkaziladi.

Navbatdan tashqari yigʻilishlarda yigʻilishlar oʻtkazilayotgan paytda favqulodda vaziyat xavfi yoki yuzaga kelishi toʻgʻrisidagi mavjud tezkor maʼlumotlar, shuningdek oldin rasmiylashtirilgan tegishli axborot-tahliliy materiallar koʻrib chiqiladi.

8-bob. Komissiya tomonidan qarorlar qabul qilinishi va ularning bajarilishini tashkil etish

29. Komissiya qarori uning aʼzolarining fikrlari va qarorlari umumlashtirilishi yoʻli bilan kollegial qabul qilinadi.

Komissiyaning har bir aʼzosi qabul qilinadigan qarorlar boʻyicha oʻzining alohida fikri va taklifini yozma ravishda ifodalashga haqlidir.

Komissiya aʼzolarining fikrlari va takliflari teng boʻlganda Raisning fikri hal qiluvchi hisoblanadi.

30. Komissiya Raisi qarorlarni tezkor qabul qilish maqsadida ayrim masalalar boʻyicha Komissiya aʼzolari bilan soʻrov yoʻli bilan kelishilgan Komissiyaning qarorlarini tasdiqlashi mumkin.

31. Komissiyaning qarorlari Komissiya yigʻilishining bayonnomasi bilan rasmiylashtiriladi. Komissiya yigʻilishi bayonnomasiga uning barcha aʼzolari tomonidan viza qoʻyiladi, kotib tomonidan imzolanadi, Komissiya Raisi tomonidan tasdiqlanadi va bir hafta muddatda Komissiya aʼzolariga va manfaatdor tashkilotlarga yuboriladi.

32. Komissiya yigʻilishlari bayonnomalarining asl nusxalari va unga materiallar Oʻzbekiston Respublikasi Vazirlar Mahkamasining Harbiylashtirilgan tuzilmalar faoliyatini moliyaviy va moddiy-texnik taʼminlash boʻlimida saqlanadi.

33. Komissiya qarorlari bajarilishini nazorat qilish ishchi organ tomonidan amalga oshiriladi.

Vazirlar Mahkamasining 2017-yil 19-iyuldagi 525-son qaroriga 2-ILOVA

Favqulodda vaziyatlarning oldini olish va ularni bartaraf etish boʻyicha hududiy komissiyalar toʻgʻrisida

NIZOM

1-bob. Umumiy qoidalar

1. Ushbu Nizom Qoraqalpogʻiston Respublikasi, viloyatlar va Toshkent shahri, shuningdek ularning tarkibiga kiradigan shaharlar va tumanlarning favqulodda vaziyatlarning oldini olish va ularni bartaraf etish boʻyicha hududiy komissiyalarining (keyingi oʻrinlarda hududiy komissiyalar deb ataladi) vazifalari, funksiyalari, huquqlari va majburiyatlarini belgilaydi.

2. Hududiy komissiyalar shaxsiy tarkibi Qoraqalpogʻiston Respublikasi Vazirlar Kengashi Raisining, viloyatlar, Toshkent shahri, shuningdek ularning tarkibiga kiradigan shaharlar va tumanlar hokimlarining qarorlari bilan tasdiqlanadigan kollegial organlar hisoblanadi.

3. Hududiy komissiyalar oʻz faoliyatini Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Favqulodda vaziyatlarni oldini olish va ularni bartaraf etish boʻyicha Hukumat komissiyasining qarorlariga, ushbu Nizomga va boshqa qonun hujjatlariga muvofiq amalga oshiradi.

4. Hududiy komissiyalarning oʻz vakolatlari doirasida qabul qilingan qarorlari tegishli maʼmuriy hududda joylashgan davlat va xoʻjalik boshqaruv organlari, mahalliy davlat hokimiyati organlari va boshqa tashkilotlar, shuningdek fuqarolar tomonidan bajarilishi majburiy hisoblanadi.

5. Qoraqalpogʻiston Respublikasi, viloyatlar, Toshkent shahri hududiy komissiyalari ularning tarkibiga kiruvchi shaharlar va tumanlarning hududiy komissiyalari faoliyatini nazorat qiladi va muvofiqlashtiradi.

2-bob. Hududiy komissiyalarning vazifalari

6. Quyidagilar Qoraqalpogʻiston Respublikasi, viloyatlar va Toshkent shahri hududiy komissiyalarining asosiy vazifalari hisoblanadi:

favqulodda vaziyatlarning oldini olish boʻyicha tashkiliy va muhandislik-texnik tadbirlar ishlab chiqilishi va amalga oshirilishiga, potensial xavfli obyektlarning ishonchliligini oshirishga, favqulodda vaziyatlarda iqtisodiyot tarmoqlarining barqaror faoliyat koʻrsatishini taʼminlashga rahbarlik qilish;

idoraviy boshqaruv organlari, kuchlar va vositalar favqulodda vaziyatlarda harakat qilishga tayyorligini taʼminlashda qatnashish, obyektlarda favqulodda vaziyatlarni bartaraf etishda, shu jumladan obyekt xodimlarini evakuatsiya qilishda harakatlarni muvofiqlashtirish;

favqulodda vaziyatlarni bartaraf etish uchun idoraviy moliyaviy va moddiy resurslar zaxiralari barpo etilishiga, ulardan foydalanishga rahbarlik qilish;

favqulodda vaziyatlarda jabrlangan aholini, shu jumladan favqulodda vaziyatlarni bartaraf etishda bevosita ishtirok etgan shaxslarni ijtimoiy muhofaza qilish tadbirlarini amalga oshirish;

favqulodda vaziyatlarning oldini olish va ularni bartaraf etish boʻyicha joylarda amalga oshirilayotgan ishlarning samaradorligini nazorat qilish va tekshirish.

Qoraqalpogʻiston Respublikasi, viloyatlar va Toshkent shahri hududiy komissiyalari va ularning aʼzolari ularga yuklangan vazifalar bajarilishi uchun belgilangan tartibda javob beradilar.

7. Shaharlar va tumanlar hududiy komissiyalarining asosiy vazifalari:

favqulodda vaziyatlarning oldini olish, avariyalar, halokatlar va tabiiy ofatlarning zarari va oqibatlarini kamaytirish tadbirlarini amalga oshirish;

boshqaruv organlari, kuchlar va vositalarning favqulodda vaziyatlarda harakat qilishga tayyorligini taʼminlashda ishtirok etish;

oldini olish tadbirlariga, qutqaruv tuzilmalarini saqlab turish va taʼminlashga, favqulodda vaziyatlarni bartaraf etishga va jabrlanganlarga yordam berishga xarajatlarni qoplash uchun foydalaniladigan moliyaviy va moddiy-texnik resurslarning zaxira fondlarini tashkil etish.

Shaharlar va tumanlar hududiy komissiyalari va ularning aʼzolari ularga yuklangan vazifalar bajarilishi uchun belgilangan tartibda javob beradilar.

3-bob. Hududiy komissiyalarning funksiyalari

8. Qoraqalpogʻiston Respublikasi, viloyatlar va Toshkent shahri hududiy komissiyalari ularga yuklangan vazifalar bajarilishi maqsadida quyidagi funksiyalarni amalga oshiradilar:

Favqulodda vaziyatlarning oldini olish va ularni bartaraf etish boʻyicha Hukumat komissiyasining qarorlari bajarilishini tashkil etadilar;

favqulodda vaziyatlar yuzaga kelishi tahdidi va xavfi omillari oldindan aniqlanishini, ularning rivojlanishi kuzatilishini, shuningdek aholi xavfsizligi taʼminlanishi choralarini tashkil etadilar;

favqulodda vaziyatlarning oldini olish, ular yuzaga kelishining mavjud xavflarini toʻliq bartaraf etish boʻyicha tashkiliy va muhandislik-texnik tadbirlar komplekslarini ishlab chiqadilar va amalga oshiradilar;

iqtisodiyotning potensial xavfli va boshqa obyektlari barqarorligini taʼminlash masalalarini koʻrib chiqadilar va ularning ishonchliligini oshirish yuzasidan vazifalarni belgilaydilar;

aholi va hududlarni favqulodda vaziyatlardan himoya qilish boʻyicha tadbirlar bajarilishining holati, boshqaruv organlari, kuch va vositalarning favqulodda vaziyatlar yuzaga kelganda harakat qilishga tayyorligi toʻgʻrisidagi hisobotlarni eshitadilar;

Qoraqalpogʻiston Respublikasi, viloyatlar va Toshkent shahri fuqaro muhofazasi boshliqlarining qarorlari loyihalarini ishlab chiqadilar va obyektlarda favqulodda vaziyatlarni bartaraf etishda harakatlar muvofiqlashtirilishini taʼminlaydilar;

favqulodda vaziyatlarni bartaraf etish uchun moliyaviy va moddiy resurslarning idoraviy zaxiralari roʻyxati va hajmlarini aniqlaydilar;

tabiiy ofatlar oqibatida jabrlangan shaxslarga yetkazilgan zararni qoplash boʻyicha belgilangan tartibda Vazirlar Mahkamasiga taqdimnomalar kiritadilar;

favqulodda vaziyatlarda jabrlangan aholini, shu jumladan favqulodda vaziyatlarni bartaraf etishda bevosita ishtirok etgan shaxslarni ijtimoiy muhofaza qilish tadbirlari rejalarini ishlab chiqadilar va amalga oshiradilar;

favqulodda vaziyatlarning oldini olish va ularni bartaraf etish boʻyicha joylarda ishlarni tashkil etadilar hamda amalga oshiriladigan ishlarning samaradorligini nazorat qiladilar va tekshiradilar;

Favqulodda vaziyatlarning oldini olish va ularni bartaraf etish boʻyicha Hukumat komissiyasi qarorlari bajarilishi toʻgʻrisidagi axborotni, shuningdek uning yigʻilishini tayyorlash uchun axborot-tahliliy materiallarni Favqulodda vaziyatlarning oldini olish va ularni bartaraf etish boʻyicha Hukumat komissiyasining ishchi organiga belgilangan muddatlarda taqdim etadilar;

hududiy xususiyatlarni hisobga olgan holda yuklangan vazifalarni bajarish boʻyicha boshqa funksiyalarni amalga oshiradilar.

9. Shaharlar va tumanlarning hududiy komissiyalari ularga yuklangan vazifalarni bajarish maqsadida quyidagi funksiyalarni amalga oshiradilar:

Favqulodda vaziyatlarning oldini olish va ularni bartaraf etish boʻyicha Hukumat komissiyasining, shuningdek Qoraqalpogʻiston Respublikasi, viloyatlar va Toshkent shahri tegishli hududiy komissiyalarining qarorlari bajarilishini tashkil etadilar;

favqulodda vaziyatlar yuzaga kelishi tahdidi va xavfi omillarini oldindan aniqlaydilar, ularning rivojlanishini kuzatadilar, shuningdek favqulodda vaziyatlarning oldini olish, avariyalar, halokatlar va tabiiy ofatlarning zarari va oqibatlarini kamaytirish chora-tadbirlarini amalga oshiradilar;

shaharlar va tumanlar fuqaro muhofazasi boshliqlarining qarorlari loyihalarini ishlab chiqadilar hamda obyektlarda favqulodda vaziyatlarni bartaraf etish, shu jumladan aholini va obyekt xodimlarini evakuatsiya qilishda harakatlar muvofiqlashtirilishini taʼminlaydilar;

boshqaruv organlari, kuchlar va vositalarning favqulodda vaziyatlarda harakat qilishga tayyorligini taʼminlashga amaliy koʻmaklashadilar;

favqulodda vaziyatlarning oldini olish va ularni bartaraf etish maqsadlarida moliyaviy va moddiy-texnik resurslarning zaxira fondlari barpo etilishi choralarini koʻradilar;

tabiiy ofatlar oqibatida jabrlangan shaxslarga yetkazilgan zararni qoplash boʻyicha belgilangan tartibda tegishliligi boʻyicha Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga taqdimnomalar kiritadilar;

Hukumat komissiyasi, shuningdek tegishli hududiy komissiyalar qarorlari bajarilishi toʻgʻrisidagi axborotni hamda ularning yigʻilishlari uchun axborot-tahliliy materiallarni boʻysunuv boʻyicha Qoraqalpogʻiston Respublikasi, viloyatlar va Toshkent shahri komissiyalarining ishchi organiga belgilangan muddatlarda taqdim etadilar;

hududiy xususiyatlarni hisobga olgan holda yuklangan vazifalarni bajarish boʻyicha boshqa funksiyalarni amalga oshiradilar.

4-bob. Hududiy komissiyalarning huquq va majburiyatlari

10. Qoraqalpogʻiston Respublikasi, viloyatlar va Toshkent shahri hududiy komissiyalari:

belgilangan tartibda topshiriqlar berish, oʻz vakolatiga kiradigan masalalar boʻyicha zarur axborotni soʻrash;

yigʻilishlarda favqulodda vaziyatlarning oldini olish va ularni bartaraf etish sohasida qabul qilingan qarorlarning bajarilishi toʻgʻrisidagi hisobotlarni eshitish;

oldinga qoʻyilgan vazifalar oʻz vaqtida va sifatli bajarilishi ustidan nazorat qilish, shuningdek topshirilgan tadbirlar oʻz vaqtida bajarilmaganligi va sifatsiz bajarilganligi uchun intizomiy choralarni qoʻllash huquqiga ega.

11. Qoraqalpogʻiston Respublikasi, viloyatlar va Toshkent shahri hududiy komissiyalari ularga yuklangan vazifalarni bajarish maqsadida:

aholi va hududlarni favqulodda vaziyatlardan muhofaza qilishning eng muhim va muammoli masalalarini aniqlashga, shuningdek ularni hal etish boʻyicha tadbirlarni taʼminlashga;

favqulodda vaziyatlarning oldini olish boʻyicha tashkiliy va muhandislik-texnik tadbirlar ishlab chiqarilishi va amalga oshirilishiga, potensial xavfli obyektlarning ishonchliligini oshirishga, iqtisodiyot tarmoqlarining favqulodda vaziyatlarda faoliyat koʻrsatishi barqarorligini taʼminlashga rahbarlik qilishga;

favqulodda vaziyatlarda jabrlangan aholini, shu jumladan favqulodda vaziyatlarni bartaraf etishda bevosita ishtirok etgan shaxslarni ijtimoiy muhofaza qilish tadbirlarini amalga oshirishga;

idoraviy boshqaruv organlari, kuch va vositalarning favqulodda vaziyatlarda harakat qilishga tayyorligini taʼminlash, obyektlarda favqulodda vaziyatlarni bartaraf qilishda harakatlarni muvofiqlashtirish choralarini koʻrishga;

moliyaviy va moddiy resurslarning davlat zaxiralarini barpo etish ishini tashkil etishga majburdir.

12. Shaharlar va tumanlarning hududiy komissiyalari ularga yuklangan vazifalarni bajarish maqsadida:

favqulodda vaziyatlarning oldini olish tadbirlari amalga oshirilishini, avariyalar, halokatlar va tabiiy ofatlarning zarari va oqibatlari kamaytirilishini taʼminlashga;

boshqaruv organlari, kuchlar va vositalar favqulodda vaziyatlarda harakat qilishga tayyorligini oshirishga amaliy yordam berishga;

favqulodda vaziyatlarning oldini olish va ularni bartaraf etish tadbirlarini amalga oshirish va jabrlanganlarga yordam berish uchun foydalaniladigan moliyaviy va moddiy-texnik resurslar zaxiralarini barpo etishga va belgilangan normalarda (turda va miqdorda) saqlashga majburdir.

5-bob. Hududiy komissiyalar faoliyatini tashkil etish

13. Hududiy komissiyalarga raislar boshchilik qiladilar, ularning vakolatiga quyidagilar kiradi:

hududiy komissiyalar yigʻilishlari kun tartibini belgilash va chaqirish;

qabul qilingan qarorlarning bajarilishi ustidan nazoratni tashkil etish;

hududiy komissiyalar aʼzolarining ularga yuklangan vazifalar bajarilishi boʻyicha ishini muvofiqlashtirish;

hududiy komissiyalarning samarali ishlashi samaradorligini taʼminlash boʻyicha boshqa harakatlarni amalga oshirish.

14. Hududiy komissiyalar oʻz faoliyatini doimiy asosda hududiy komissiyalar yigʻilishida koʻrib chiqiladigan va ularning raislari tomonidan tasdiqlanadigan yillik rejalarga muvofiq amalga oshiradilar.

15. Hududiy komissiyalar yigʻilishlari zaruratga koʻra, biroq bir yilda kamida bir marta oʻtkaziladi va yigʻilishlar qarorlari bayonnomalar bilan rasmiylashtiriladi.

16. Zarurat boʻlganda hududiy komissiyalarning sayyor yigʻilishlari tashkil etilishi mumkin.

17. Hududiy komissiyalar har yili boʻlajak yilda aholi va hududlarni favqulodda vaziyatlardan muhofaza etish boʻyicha asosiy tadbirlar rejalari ishlab chiqilishini tashkil etadilar, oʻz yigʻilishida koʻrib chiqadilar va tasdiqlash uchun tegishli maʼmuriy hududlar fuqaro muhofazasi boshliqlariga kiritadilar.

18. Favqulodda vaziyatlar sodir boʻlishining real xavfi tugʻilganda hududiy komissiyalar raislari tomonidan navbatdan tashqari yigʻilishlar chaqirilishi mumkin.

19. Aholi va hududlarni favqulodda vaziyatlardan muhofaza etish sohasidagi tadbirlar bajarilishi holatini nazorat qilish uchun zarurat boʻlganda hududiy komissiyalar tomonidan ishchi guruhlar tashkil etilishi, shuningdek ushbu sohada hududiy xizmatlar faoliyati samaradorligini oshirish yuzasidan takliflar kiritilishi mumkin.

20. Hududiy komissiyalar yigʻilishini raislar olib boradilar, ular yoʻqligida yigʻilishni ularning oʻrinbosarlari olib boradilar. Hududiy komissiyalar yigʻilishi, agar ularda ular aʼzolarining kamida uchdan ikki qismi qatnashsa vakolatli hisoblanadi.

21. Hududiy komissiyalar raislari bilan kelishilgan holda yigʻilishda xolisona sabablarga koʻra qatnasha olmaydigan komissiyalar aʼzolari oʻrniga ularning vakolatli vakillari qatnashishi mumkin.

6-bob. Hududiy komissiyalarning ishchi organlari va kotiblari

22. Favqulodda vaziyatlar boʻyicha boshqarmalar (shahar va tuman boʻlimlari) hududiy komissiyalarning ishchi organlari hisoblanadi.

23. Hududiy komissiyalarning ishchi organlari:

kelgusi yilga hududiy komissiyalarning ish rejasi loyihalarini tayyorlaydilar;

hududiy komissiyalarning navbatdagi yigʻilishiga barcha hujjatlar oʻz vaqtida tayyorlanishini taʼminlaydilar;

hududiy komissiyalarning qarorlariga muvofiq zarur axborot, tahliliy va boshqa materiallarni hududiy komissiyalarning koʻrib chiqishi uchun taqdim etadilar;

joylarga chiqib hududiy komissiyalar tomonidan qabul qilingan qarorlar bajarilishi monitoringini olib boradilar;

hududiy komissiyalarning qarorlarini ijro etish holati toʻgʻrisida axborot yigʻadilar va muntazam ravishda (bir oyda kamida bir marta) hududiy komissiyalar raislariga axborot beradilar.

24. Quyidagilar tegishli ravishda hududiy komissiyalarning kotiblari hisoblanadilar:

Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining favqulodda vaziyatlar masalalari boʻyicha bosh mutaxassislari;

shaharlar va tumanlar hokimlarining sanoatni rivojlantirish, kapital qurilish, kommunikatsiyalar va kommunal xoʻjaligi masalalari boʻyicha oʻrinbosarlari kotibiyatlarining bosh mutaxassislari.

25. Hududiy komissiyalar kotiblari:

hududiy komissiyalar yigʻilishlari kun tartibi masalalari boʻyicha oʻtkazilishini tashkil etadilar;

barcha zarur hujjatlar navbatdagi yigʻilishga toʻplanishi, umumlashtirilishi va hududiy komissiyalar raislariga taqdim etilishini taʼminlaydilar;

hududiy komissiyalar yigʻilishiga materiallarni tayyorlash yuzasidan ishchi organga koʻmaklashadilar;

hududiy komissiyalar raislari bilan yigʻilishning muddati va joyini hamda taklif etiladigan shaxslar roʻyxatini kelishadilar;

hududiy komissiyalar aʼzolari va taklif etilgan shaxslarga yigʻilish oʻtkaziladigan sana, vaqti, joyi toʻgʻrisida xabar beradilar;

hududiy komissiyalar qarorlari bajarilishi monitoringini olib boradilar va uning natijalarini hududiy komissiyalar yigʻilishida koʻrib chiqish uchun taqdim etadilar;

hududiy komissiyalar bayonnomalarini rasmiylashtiradilar va tasdiqlangan bayonnomalarni hududiy komissiyalar aʼzolariga, manfaatdor vazirliklar, idoralar, mahalliy ijro etuvchi hokimiyat organlariga yuboradilar.

7-bob. Hududiy komissiyalar yigʻilishiga materiallarni tayyorlash tartibi

26. Kun tartibi masalalari boʻyicha hududiy komissiyalar yigʻilishlari materiallari yigʻilishlar oʻtkazilishidan kamida 20 kun oldin tayyorlanadi hamda koʻrib chiqiladigan masalalarning mohiyatini, mavjud muammolarni ochib beruvchi axborot-tahliliy materiallarni va bajarishning aniq muddatlari, bajaruvchilar, moliyalashtirish manbalari va moddiy-texnik taʼminlash, vaziyatning salbiy rivojlanishi prognozi koʻrsatilgan holda ularni hal etish boʻyicha takliflarni; muammoning holatini va zarur moddiy-texnik va moliyaviy resurslarni yorqin namoyish qiluvchi taqdimotni; kun tartibi masalalari boʻyicha hududiy komissiyalar qarorlari loyihasini oʻz ichiga oladi.

27. Hududiy komissiyalar qarorlarini bajarish boʻyicha taqdim etilgan materiallar ishchi organlar tomonidan koʻrib chiqiladi, ishchi organlar ularni navbatdagi yigʻilishda koʻrib chiqish uchun rasmiylashtiradilar, hududiy komissiyalar yigʻilishi kun tartibini tayyorlaydilar va hujjatlar toʻplamini hududiy komissiyalar kotiblariga taqdim etadilar.

28. Hududiy komissiyalar yigʻilishlari kun tartibining har bir masalasi boʻyicha hujjatlar toʻplamida barcha zarur hujjatlar va hududiy komissiyalar qarorlarining loyihalari boʻlishi lozim.

29. Hududiy komissiyalar kotiblari taqdim etilgan materiallar haqida raislarga axborot beradilar, raislar kun tartibi va taqdim etilgan materiallar maʼqullangan taqdirda 7 kun oldin hududiy komissiyalar yigʻilishi oʻtkaziladigan sanani, vaqtini hamda yigʻilishga taklif etiladigan shaxslarni belgilaydi.

30. Hududiy komissiyalar kotiblari ishchi organlar bilan yigʻilish hujjatlari bayonnoma loyihasi bilan birga hududiy komissiyalar aʼzolariga hamda, zarurat boʻlganda, yigʻilishga taklif etilgan boshqa shaxslarga yuborilishini taʼminlaydilar.

31. Hududiy komissiyalarning navbatdan tashqari yigʻilishlari Favqulodda vaziyatlarning oldini olish va ularni bartaraf etish boʻyicha Hukumat komissiyasi yoki hududiy komissiyalar ishchi organlarining maxsus xabarlari asosida raislar tomonidan chaqiriladi.

Ularni oʻtkazish muddatlari hududiy komissiyalar raislari tomonidan belgilanadi va ularning aʼzolariga hududiy komissiyalar kotiblari tomonidan shoshilinch tartibda yetkaziladi.

Navbatdan tashqari yigʻilishlarda ular oʻtkazilayotgan paytda favqulodda vaziyat xavfi yoki yuzaga kelishi toʻgʻrisidagi tezkor maʼlumotlar, shuningdek oldin rasmiylashtirilgan tegishli axborot-tahliliy materiallar koʻrib chiqiladi.

8-bob. Hududiy komissiyalar tomonidan qarorlar qabul qilinishi va ularning bajarilishini tashkil etish

32. Hududiy komissiyalar qarorlari ularning aʼzolarining fikrlari va qarorlari umumlashtirilishi yoʻli bilan kollegial qabul qilinadi.

Hududiy komissiyaning har bir aʼzosi qabul qilinadigan qarorlar boʻyicha oʻzining alohida fikri va taklifini yozma ravishda ifodalashga haqlidir.

Hududiy komissiyalar aʼzolarining fikrlari va takliflari teng boʻlganda raislarning fikri hal qiluvchi hisoblanadi.

33. Hududiy komissiyalar raislari qarorlarni tezkor qabul qilish maqsadida ayrim masalalar boʻyicha hududiy komissiyalar aʼzolari bilan soʻrov yoʻli bilan kelishilgan hududiy komissiyalarning qarorlarini tasdiqlashi mumkin.

34. Hududiy komissiyalarning qarorlari hududiy komissiyalar yigʻilishining bayonnomalari bilan rasmiylashtiriladi. Hududiy komissiyalar yigʻilishi bayonnomalariga ularning barcha aʼzolari tomonidan viza qoʻyiladi, kotiblar tomonidan imzolanadi, hududiy komissiyalar raislari tomonidan tasdiqlanadi va bir hafta muddatda hududiy komissiyalar aʼzolariga va manfaatdor tashkilotlarga yuboriladi.

35. Hududiy komissiyalar yigʻilishlari bayonnomalarining asl nusxalari va ularga materiallar tegishli ravishda:

Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining favqulodda vaziyatlar masalalari boʻyicha bosh mutaxassislarida;

shaharlar va tumanlar hokimlarining sanoatni rivojlantirish, kapital qurilish, kommunikatsiyalar va kommunal xoʻjaligi masalalari boʻyicha oʻrinbosarlarining kotibiyatlarida saqlanadi.

36. Hududiy komissiyalar qarorlari bajarilishi ustidan nazorat qilish ishchi organlar tomonidan amalga oshiriladi.