Oʻzbekiston Respublikasi parvozlar xavfsizligini nazorat qilish davlat inspeksiyasi faoliyatini takomillashtirish chora-tadbirlari toʻgʻrisida (PQ-3136-son)

17.07.2017

Oʻzbekiston Respublikasi Prezidentining

Qarori

Taʼkidlash lozimki, havo transportidan foydalanishning zamonaviy sharoitida respublika havo kengliklaridan xavfsiz foydalanishni taʼminlash, insonlarning hayoti va sogʻligʻiga, atrof-muhitga va davlat manfaatlariga xavf solmaydigan parvozlarni amalga oshirish Oʻzbekiston fuqaro aviatsiyasini yanada rivojlantirishning birinchi navbatdagi vazifasi hisoblanadi.

Mustaqillik yillarida yaratilgan, xalqaro standartlar va talablarning asosiy qoidalarini oʻzida jamlagan qonunchilik bazasi fuqaro aviatsiyasi faoliyatini huquqiy tartibga solishni taʼminlamoqda, respublikada tashkil etilgan fuqaro aviatsiyasi tuzilmasi esa parvozlar xavfsizligining yuqori darajasini taʼminlash imkonini bermoqda.

Shu bilan birga, mamlakatimizda fuqaro aviatsiyasining jadal rivojlanishi, uchuvchisiz uchish apparatlarining ommaviy olib kirilishi va foydalanilishi, juda yengil havo kemalarini ekspluatatsiya qilish, respublikamiz aeroportlarida xorijiy aviakompaniyalarning xalqaro parvozlari sonining oshishi parvozlar va aviatsiya xavfsizligini taʼminlashga qaratilgan qoʻshimcha chora-tadbirlar qabul qilishni talab etadi.

Fuqaro aviatsiyasida parvozlar xavfsizligini taʼminlashning amaldagi tizimi tahlili davomida hal etilmagan bir qator muammolar aniqlandi:

birinchidan — Oʻzbekiston Respublikasi havo kengliklarida uchuvchisiz uchish apparatlaridan foydalanishni davlat tomonidan tartibga solish va nazorat qilishning samarali tizimi mavjud emas;

ikkinchidan — Oʻzbekiston Respublikasi fuqaro aviatsiyasi aerodromlarida muntazam va bir martalik parvozlarni amalga oshiradigan xorijiy aviakompaniyalar faoliyati ustidan davlat nazoratini amalga oshirishning samarali tizimi mavjud emas;

uchinchidan — Oʻzbekiston Respublikasi Parvozlar xavfsizligini nazorat qilish davlat inspeksiyasining havo transporti sohasida qonun buzilishlarga yoʻl qoʻygan shaxslarni maʼmuriy javobgarlikka tortish boʻyicha vakolatlarining yetarli emasligi, amaldagi qonunchilik normalari sanksiyalarining haddan tashqari yengilligi;

toʻrtinchidan — Oʻzbekiston Respublikasi Parvozlar xavfsizligini nazorat qilish davlat inspeksiyasining amaldagi tashkiliy tuzilmasi va shtat birliklari aviatsiya xodimlarini litsenziyalash va havo kemalari, shu jumladan xorijiy aviakompaniyalar havo kemalarining ekspluatatsiya tekshiruvini oʻtkazish boʻyicha ayrim funksiyalarni toʻliq hajmda amalga oshirish imkonini bermaydi.

Havo kemalari faoliyatini davlat tomonidan tartibga solishni yanada takomillashtirish, havo harakatlarini boshqarish, Oʻzbekiston Respublikasi fuqaro aviatsiyasida parvozlar xavfsizligini taʼminlash tizimi samaradorligini oshirish maqsadida:

1. Quyidagilar Oʻzbekiston Respublikasi Parvozlar xavfsizligini nazorat qilish davlat inspeksiyasining (keyingi oʻrinlarda — Davavianazorat) asosiy vazifalari etib belgilansin:

fuqaro va eksperimental aviatsiya faoliyati sohasida yagona davlat siyosatini amalga oshirish;

Oʻzbekiston Respublikasi havo kengliklaridan foydalanuvchilar uchun xavfsiz foydalanishni, insonlarning hayoti va sogʻligʻiga, atrof-muhitga, davlat manfaatlariga xavf solmaydigan parvozlarni amalga oshirishni taʼminlash, havo harakatlariga xizmat koʻrsatishni tashkil etish va Oʻzbekiston Respublikasi havo kengliklaridan foydalanish ustidan oʻz vakolati doirasida nazoratni amalga oshirish;

Oʻzbekiston Respublikasida fuqaro aviatsiyasi va uning obyektlarining xavfsiz faoliyat yuritishini, shuningdek, aviatsiyani noqonuniy aralashish holatlaridan himoya qilish boʻyicha chora-tadbirlarni amalga oshirish orqali havo kemasi yoʻlovchilari hamda ekipaj aʼzolari hayoti va sogʻligʻining xavfsizligini taʼminlash;

fuqaro aviatsiyasining parvozlar xavfsizligini taʼminlash boʻyicha faoliyati sohasidagi ishlarni tashkil etish va sertifikatlashni taʼminlash;

fuqaro va eksperimental aviatsiya faoliyati sohasida davlat kontroli va nazoratini amalga oshirish, fuqaro va eksperimental havo kemalari ishtirokidagi aviatsiya hodisalari va noxush holatlarni tekshirish;

xalqaro tashkilotlarda Oʻzbekiston Respublikasi fuqaro aviatsiyasi manfaatlarini ifodalash.

2. Davavianazorat apparati tuzilmasida quyidagilar tashkil etilsin:

3 nafar shtat birligidan iborat uchuvchisiz uchish apparatlarini hisobga olish va foydalanishni nazorat qilish boʻlimi;

3 nafar shtat birligidan iborat xorijiy ekspluatantlar ekspluatatsiya tekshiruvi boʻlimi.

3. Boshqaruv xodimlarining umumiy cheklangan soni 53 nafardan iborat Davavianazorat apparati tuzilmasi ilovaga muvofiq tasdiqlansin.

4. Davavianazorat boshligʻiga, zarur boʻlganda, belgilangan umumiy shtat birliklari doirasida Davavianazorat tuzilmasiga oʻzgartirish kiritish huquqi berilsin.

Belgilansinki, Davavianazorat boshligʻi maqomi boʻyicha vazirning birinchi oʻrinbosariga tenglashtiriladi.

5. Oʻzbekiston Respublikasi Vazirlar Mahkamasi bir oy muddatda Oʻzbekiston Respublikasi Parvozlar xavfsizligini nazorat qilish davlat inspeksiyasi toʻgʻrisidagi nizomni tasdiqlasin.

6. Davavianazorat Oʻzbekiston Respublikasi Adliya vazirligi hamda boshqa manfaatdor vazirlik va idoralar bilan birgalikda ikki oy muddatda Oʻzbekiston Respublikasining Maʼmuriy javobgarlik toʻgʻrisidagi Kodeksiga Davavianazoratga parvozlar va aviatsiya xavfsizligini taʼminlash boʻyicha talablarga rioya qilinmasligi bilan bogʻliq maʼmuriy qonun buzilishlar toʻgʻrisidagi ishlarni oʻz vakolat doirasida koʻrib chiqish huquqini berish, ushbu turdagi qonun buzilishlar uchun javobgarlikni kuchaytirishni nazarda tutuvchi oʻzgartirish va qoʻshimchalar kiritish toʻgʻrisidagi takliflarni Oʻzbekiston Respublikasi Vazirlar Mahkamasiga kiritsin.

7. Oʻzbekiston Respublikasi Vazirlar Mahkamasining 2004-yil 26-fevraldagi “Oʻzbekiston Respublikasi Parvozlar xavfsizligini nazorat qilish davlat inspeksiyasi faoliyatini takomillashtirish chora-tadbirlari toʻgʻrisida”gi 90-son qarorida:

a) 1-band oʻz kuchini yoʻqotgan deb hisoblansin;

b) 2-bandning ikkinchi xatboshisi chiqarib tashlansin;

v) 1-ilova oʻz kuchini yoʻqotgan deb hisoblansin;

8. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 17-iyul,

PQ-3136-son

Oʻzbekiston Respublikasi Prezidentining 2017-yil 17-iyuldagi PQ-3136-son qaroriga ILOVA

Oʻzbekiston Respublikasi Parvozlar xavfsizligini nazorat qilish davlat inspeksiyasi apparatining

TUZILMASI

Boshqaruv xodimlarining cheklangan soni – 53 nafar.