Oʻzbekiston Respublikasi Prezidenti huzuridagi Davlat mukofotlari va geraldika boʻyicha Komissiya faoliyatini tashkil etish toʻgʻrisida (PQ-3119-son)

10.07.2017

Oʻzbekiston Respublikasi Prezidentining

Qarori

Oʻzbekiston Respublikasi Prezidentining 2017-yil 1-martdagi “Oʻzbekiston Respublikasi Prezidenti devoni faoliyatini yanada takomillashtirish toʻgʻrisida”gi PF-4974-sonli Farmoniga muvofiq hamda Oʻzbekiston Respublikasi Prezidentining Oʻzbekiston Respublikasi davlat mukofotlari bilan taqdirlash va Oʻzbekiston Respublikasi faxriy unvonlarini berish masalalari boʻyicha konstitutsiyaviy vakolatlari amalga oshirilishini taʼminlash, geraldika sohasida yagona davlat siyosatini yuritish maqsadida:

1. Oʻzbekiston Respublikasi Prezidenti huzuridagi Oʻzbekiston Respublikasi davlat mukofotlari va geraldika boʻyicha Komissiya (keyingi oʻrinlarda — Komissiya deb yuritiladi) 1-ilovaga muvofiq tarkibda tashkil etilsin.

2. Quyidagilar:

Komissiya faoliyatini tashkil etish toʻgʻrisidagi nizom 2-ilovaga muvofiq;

Komissiya Ijro apparatining tashkiliy tuzilmasi hamda shtatlar jadvali 3, 4-ilovalarga muvofiq tasdiqlansin.

3. Komissiya Oʻzbekiston Respublikasi Adliya vazirligi, boshqa manfaatdor vazirlik va idoralar bilan birgalikda:

uch oy muddatda Oʻzbekiston Respublikasining yangi tahrirdagi “Davlat mukofotlari toʻgʻrisida”gi Qonuni loyihasini ishlab chiqsin, unda Komissiyaning huquqiy maqomini hamda idoraviy mukofotlarni taʼsis etish masalalari boʻyicha yagona talablarni belgilash, davlat mukofotlarini topshirish, taqib yurish va saqlash, ularning tasvirlaridan foydalanish, shuningdek, davlat mukofotlariga taqdimnoma kiritish tartibi nazarda tutilsin;

bir oy muddatda qonun hujjatlariga ushbu Qarordan kelib chiqadigan oʻzgartish va qoʻshimchalar toʻgʻrisida takliflar kiritsin.

4. Komissiya Ijro apparati xodimlariga Oʻzbekiston Respublikasi Prezidenti Administratsiyasi xodimlari uchun belgilangan kafolatlar, mehnatga haq toʻlash shartlari va imtiyozlar joriy etilsin.

5. Komissiya Ijro apparati Oʻzbekiston Respublikasi Prezidenti Administratsiyasi binolari majmuining 1-korpusiga, Toshkent shahri, Islom Karimov koʻchasi, 43-uy manzili boʻyicha joylashtirilsin.

6. Oʻzbekiston Respublikasi Prezidenti Administratsiyasi Moliya-xoʻjalik departamenti belgilangan tartibda Komissiya Ijro apparatining joylashuvini, uning mebel, kompyuter texnikasi va boshqa moddiy-texnika vositalari bilan jihozlanishini, shuningdek, belgilangan limitlarga muvofiq transport vositalari ajratilishini taʼminlasin.

7. Mazkur qarorning ijrosini nazorat qilish Oʻzbekiston Respublikasi Prezidentining Davlat maslahatchisi U. Ismailov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 10-iyul,

PQ-3119-son

Oʻzbekiston Respublikasi Prezidentining 2017-yil 10-iyuldagi PQ-3119-sonli qaroriga 1-ILOVA

Oʻzbekiston Respublikasi Prezidenti huzuridagi Davlat mukofotlari va geraldika boʻyicha komissiya

TARKIBI

A. Aripov — Oʻzbekiston Respublikasining Bosh vaziri, Komissiya raisi N. Yoʻldoshev — Oʻzbekiston Respublikasi Oliy Majlisi Senatining raisi N. Ismoilov — Oʻzbekiston Respublikasi Oliy Majlisi Qonunchilik palatasining Spikeri Z. Nizomiddinov — Oʻzbekiston Respublikasi Prezidenti Administratsiyasi rahbari, Komissiya raisining oʻrinbosari U. Ismailov — Oʻzbekiston Respublikasi Prezidenti maslahatchisi, Komissiya raisining oʻrinbosari X. Sultonov — Oʻzbekiston Respublikasi Prezidenti maslahatchisi — Spichrayteri, Komissiya raisining oʻrinbosari V. Maxmudov — Oʻzbekiston Respublikasi Prezidenti huzuridagi Xavfsizlik kengashi kotibi R. Inoyatov — Oʻzbekiston Respublikasi Prezidenti maslahatchisi T. Xudaybergenov — Oʻzbekiston Respublikasi Prezidenti maslahatchisi A. Abduvoxitov — Oʻzbekiston Respublikasi Prezidenti maslahatchisi R. Kasimov — Oʻzbekiston Respublikasi Prezidenti maslahatchisi lavozimiga koʻra — Oʻzbekiston Respublikasi Prezidenti maslahatchisi lavozimiga koʻra — Oʻzbekiston Respublikasi Prezidenti maslahatchisi Z. Xaydarov — Oʻzbekiston Respublikasi Prezidenti Administratsiyasi Moliya-xoʻjalik departamenti rahbari Q. Quranbayev — Oʻzbekiston Respublikasi Prezidenti maslahatchisining birinchi oʻrinbosari — Oʻzbekiston yoshlar ittifoqi Markaziy Kengashi raisi A. Ramatov — Oʻzbekiston Respublikasi Bosh vazirining birinchi oʻrinbosari — Oʻzbekiston Respublikasi transport vaziri Dj. Kuchkarov — Oʻzbekiston Respublikasi Bosh vazirining oʻrinbosari — moliya vaziri E. Ganiyev — Oʻzbekiston Respublikasi Bosh vazirining oʻrinbosari A. Abduhakimov — Oʻzbekiston Respublikasi Bosh vazirining oʻrinbosari R. Mamatov — Oʻzbekiston Respublikasi mahalla va oilani qoʻllab-quvvatlash vaziri O. Murodov — Oʻzbekiston Respublikasi Bosh prokurori I. Abdullayev — Oʻzbekiston Respublikasi Davlat xavfsizlik xizmati raisi A. Kamilov — Oʻzbekiston Respublikasi tashqi ishlar vaziri R. Davletov — Oʻzbekiston Respublikasi adliya vaziri B. Xodjayev — Oʻzbekiston Respublikasi iqtisodiyot va sanoat vaziri B. Sayfullayev — Oʻzbekiston Respublikasi madaniyat vaziri U. Aʼlamov — “Oʻzarxiv” agentligi bosh direktori Sh. Javlonov — Oʻzbekiston “Mahalla” xayriya jamoat fondi Respublika boshqaruvi raisi Sh. Djalilov — Oʻzbekiston faxriylarining ijtimoiy faoliyatini qoʻllab-quvvatlash “Nuroniy” jamgʻarmasi Respublika boshqaruvi raisi K. Rafikov — Oʻzbekiston Kasaba uyushmalari Federatsiyasi Kengashi raisi S. Saidov — Oʻzbekiston Yozuvchilar uyushmasi raisi A. Xadjayev — Oʻzbekiston Milliy teleradiokompaniyasi raisi A. Nuriddinov — Oʻzbekiston Badiiy akademiyasi raisi R. Abdullayev — Oʻzbekiston kompozitorlari va bastakorlari uyushmasi raisi B. Yuldashev — Oʻzbekiston Respublikasi Fanlar akademiyasi prezidenti B. Djumayev — Oʻzbekiston Respublikasi Markaziy banki huzuridagi “Davlat belgisi” davlat ishlab chiqarish birlashmasi bosh direktori M. Ashurov — “Fonon” davlat ilmiy-ishlab chiqarish korxonasi bosh direktori E. Azimbayev — Oʻzbekiston Respublikasi Prezidenti Administratsiyasi shuʼba mudiri lavozimiga koʻra — Komissiya ijro apparati rahbari, Komissiya kotibi.

Izoh: Komissiya aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi.

Oʻzbekiston Respublikasi Prezidentining 2017-yil 10-iyuldagi PQ-3119-sonli qaroriga 2-ILOVA

Oʻzbekiston Respublikasi Prezidenti huzuridagi Davlat mukofotlari va geraldika boʻyicha Komissiya faoliyatini tashkil etish toʻgʻrisidagi

NIZOM

Mazkur Nizom Oʻzbekiston Respublikasi Prezidenti huzuridagi Davlat mukofotlari va geraldika boʻyicha Komissiyaning (keyingi oʻrinlarda — Komissiya deb yuritiladi) asosiy vazifalari, funksiyalari, vakolatlari, tarkibi va ishni tashkil etish tartibini belgilaydi.

I. Umumiy qoidalar

1. Komissiya Oʻzbekiston Respublikasi Prezidenti huzurida doimiy ishlaydigan maslahat va kengash organi hisoblanib, Oʻzbekiston Respublikasi Prezidentining Oʻzbekiston Respublikasi davlat mukofotlari bilan taqdirlash va Oʻzbekiston Respublikasi faxriy unvonlarini (keyingi oʻrinlarda — davlat mukofotlari deb yuritiladi) berish masalalari boʻyicha konstitutsiyaviy vakolatlari amalga oshirilishini, shuningdek, geraldika sohasida yagona davlat siyosati yuritilishini taʼminlaydi.

2. Komissiya oʻz faoliyatida Oʻzbekiston Respublikasining Konstitutsiyasi va qonunlari, Oʻzbekiston Respublikasi Prezidentining farmonlari, qarorlari, farmoyishlariga, shuningdek, boshqa qonun hujjatlariga va mazkur Nizomga amal qiladi.

3. Komissiya tuzilmasida uning ishchi organi hisoblangan Ijro apparati faoliyat yuritadi.

II. Komissiyaning asosiy vazifalari

4. Komissiyaning asosiy vazifalari quyidagilardan iborat:

Oʻzbekiston Respublikasi Prezidentining davlat mukofotlari bilan taqdirlash masalalari boʻyicha konstitutsiyaviy vakolatlari amalga oshirilishiga va geraldika sohasida yagona davlat siyosati yuritilishiga koʻmaklashish;

davlat mukofotlariga munosib nomzodlarni tanlashni taʼminlash va Oʻzbekiston Respublikasi Prezidentiga mukofotlash boʻyicha takliflarni tayyorlash;

davlat mukofotlari tizimini takomillashtirishga oid takliflarni tayyorlash;

davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlarda davlat mukofotlari boʻyicha ish amaliyotini oʻrganish, umumlashtirish va takomillashtirish;

Oʻzbekiston Respublikasi davlat mukofotlari komplektlarini shakllantirish, yangi davlat va idoraviy mukofotlarning nizomlari, eskizlari va tavsiflari loyihalarini ishlab chiqish boʻyicha takliflarni tayyorlash;

rasmiy ramzlar va farqlovchi belgilarni yaratish hamda ulardan foydalanish ishlarini geraldik jihatdan taʼminlash;

davlat va idoraviy mukofotlar, shuningdek, ularga tenglashtirilgan boshqa mukofotlarning geraldik tavsiflarini takomillashtirish boʻyicha takliflarni tayyorlash;

davlat mukofotlari va geraldika masalalariga oid Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari, farmoyishlari va topshiriqlari ijrosini nazorat qilish;

davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlarning idoraviy mukofotlarni taʼsis etish masalalariga doir faoliyatlarini muvofiqlashtirish va yoʻnaltirish.

III. Komissiyaning funksiyalari

5. Komissiya oʻziga yuklatilgan vazifalardan kelib chiqqan holda quyidagi funksiyalarni amalga oshiradi:

davlat mukofotlari bilan taqdirlash boʻyicha Oʻzbekiston Respublikasi Prezidentiga kiritilgan taqdimnomalarni koʻrib chiqish;

davlat mukofotlariga tavsiya etilgan nomzodlarni tavsiflovchi maʼlumotlarni hamda ularning faoliyat koʻrsatayotgan sohada erishgan yutuqlarini oʻrganish;

Oʻzbekiston Respublikasi Prezidentiga davlat mukofotlari bilan taqdirlash boʻyicha takliflarni taqdim etish;

Oʻzbekiston Respublikasi davlat mukofotlarini taʼsis etish va bekor qilish toʻgʻrisidagi masalalarni hamda davlat mukofotlari va geraldika sohasiga doir qonun loyihalari va boshqa meʼyoriy-huquqiy hujjatlarni koʻrib chiqish;

Oʻzbekiston Respublikasining yangi davlat va idoraviy mukofotlarining nizomlari, eskizlari va tavsiflari loyihalarini ishlab chiqish;

davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlarda davlat mukofotlari boʻyicha ish amaliyotini oʻrganish va umumlashtirish ishlarini tashkil etish, shuningdek, ularning mazkur yoʻnalishdagi faoliyatini yaxshilash yuzasidan takliflarni ishlab chiqish;

Oʻzbekiston Respublikasi Prezidentiga davlat mukofotlari va geraldikaga oid masalalar yuzasidan axborot-tahliliy maʼlumotlarni tayyorlash;

davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlarning idoraviy mukofotlarini taʼsis etish toʻgʻrisidagi takliflarni koʻrib chiqish;

rasmiy ramzlar va farqlovchi belgilarni taʼsis etish hamda ulardan foydalanishga oid geraldik ekspertiza xulosalarini koʻrib chiqish;

geraldika masalalari boʻyicha xulosalarni tayyorlash va vakolat doirasida tegishli meʼyoriy-huquqiy hujjatlarga izoh berish;

davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlar uchun rasmiy ramzlar va farqlovchi belgilarni taʼsis etish hamda ulardan foydalanish masalalari boʻyicha tavsiyalarni ishlab chiqish;

geraldik ramzlar va idoraviy mukofotlarni ishlab chiqish, taʼsis etish, tayyorlash va hisobga olishga oid nazariy, amaliy va texnik meʼyorlarni oʻrganish;

davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlarga davlat va idoraviy mukofotlar, shuningdek, geraldikaga oid masalalar yuzasidan uslubiy va amaliy yordam koʻrsatish;

davlat mukofotlari va geraldika masalalari boʻyicha xalqaro tajribani oʻrganish, shuningdek, mukofotlash tizimini takomillashtirish boʻyicha takliflarni ishlab chiqish;

geraldika nazariyasi va tarixi boʻyicha ilmiy-tadqiqot ishlarini tashkil etish;

Oʻzbekiston Respublikasi Prezidentining davlat mukofotlari bilan taqdirlash va geraldika masalalariga doir alohida topshiriqlarini bajarish.

IV. Komissiya vakolatlari

6. Komissiya oʻziga yuklatilgan vazifa va funksiyalarni bajarish uchun quyidagi vakolatlarga ega:

davlat mukofotlariga munosib nomzodlarni aniqlaydi va ularni mukofotlash yuzasidan Oʻzbekiston Respublikasi Prezidentiga takliflarni kiritadi;

Oʻzbekiston Respublikasining davlat mukofotlari va geraldika masalalariga oid qonunlari va boshqa meʼyoriy-huquqiy hujjatlar loyihalarini tayyorlashda ishtirok etadi;

davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlardan davlat mukofotlari va geraldika masalalari bilan bogʻliq zaruriy material va maʼlumotlarni oʻrnatilgan tartibda oladi;

davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlar rahbarlariga ular tomonidan chiqarilgan idoraviy mukofotlar va geraldika masalalariga oid meʼyoriy-huquqiy hujjatlar Oʻzbekiston Respublikasining qonunlari va boshqa qonunosti hujjatlariga zid kelgan hollarda ularni bekor qilish toʻgʻrisida rasmiy murojaatnomalarni kiritadi;

Komissiya oʻzining yigʻilishlarida vakolat doirasiga kiruvchi masalalar yuzasidan davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlarning mansabdor shaxslarini eshitadi;

oʻz vakolatlari doirasida davlat mukofotlari va geraldikaga oid Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari, farmoyishlari va topshiriqlari ijrosi nazoratini amalga oshiradi;

davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlar tomonidan davlat mukofotlari va geraldika masalalari boʻyicha kamchilik va nuqsonlarga yoʻl qoʻyilganligi aniqlangan taqdirda ularni bartaraf etish choralarini koʻradi;

Komissiya vakolat doirasiga kiruvchi masalalar yuzasidan davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlar vakillarini, shuningdek, ijodiy, ilmiy, taʼlim va boshqa muassasalarning olim va mutaxassislarini jalb qiladi;

7. Komissiya oʻz vakolatlari doirasida faoliyat yoʻnalishlari boʻyicha ekspert kengashlari va ishchi guruhlarni tuzishi mumkin.

V. Komissiya tarkibi

8. Komissiya tarkibiga Komissiya raisi, uning ikkita oʻrinbosari, kotibi va Komissiya aʼzolari kiradi.

Komissiya raisi, uning ikkita oʻrinbosari va Komissiya aʼzolari Komissiya faoliyatini amalga oshirishda jamoatchilik asosida ishtirok etadilar.

Komissiya kotibi Komissiya Ijro apparatining rahbari hisoblanadi va oʻz faoliyatini doimiy asosda olib boradi.

9. Komissiya aʼzolari uning yigʻilishlarida almashuv huquqisiz ishtirok etadilar.

Komissiya aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan shaxslar kiritiladi.

VI. Komissiya ishini tashkil etish

10. Komissiya oʻz ishini yigʻilish shaklida tashkil etib, unga rais rahbarlik qiladi.

11. Komissiya yigʻilishlari navbatdagi va navbatdan tashqari boʻlishi mumkin.

Navbatdagi yigʻilishlar tegishli materiallarning toʻplanishiga qarab, har chorakda kamida bir marta chaqiriladi.

Navbatdan tashqari yigʻilishlar alohida hollarda Komissiya vakolatlari doirasiga kiradigan, zudlik bilan hal qilinishi zarur boʻlgan masalalar yuzasidan chaqiriladi.

12. Yigʻilishlarning kun tartibi, shuningdek, ularni oʻtkazish joyi va vaqti Komissiya raisi tomonidan belgilanadi.

13. Yigʻilishlar Komissiya aʼzolarining umumiy sonidan kamida uchdan ikki qismi qatnashgan taqdirda vakolatli hisoblanadi.

14. Komissiya yigʻilishlarini Komissiya raisi olib boradi, Komissiya raisi qatnashmagan hollarda — uning topshirigʻiga koʻra yigʻilishni rais oʻrinbosarlaridan biri olib boradi.

15. Komissiya qarorlari yigʻilishda qatnashayotgan Komissiya aʼzolarining koʻpchilik qismi ovoz bergan holda qabul qilinadi. Ovozlar teng boʻlgan hollarda, yigʻilishga raislik qiluvchining ovozi hal qiluvchi ovoz hisoblanadi.

16. Komissiya qarorlari bayonnoma bilan rasmiylashtiriladi, uni Komissiya raisi yoki yigʻilishga raislik qilgan uning oʻrinbosari va Komissiya kotibi imzolaydi.

17. Komissiya ishi bilan bogʻliq axborotlar oshkor qilinmaydigan maʼlumot hisoblanadi va eʼlon qilinishi taqiqlanadi.

Yigʻilishlarda ishtirok etgan Komissiya aʼzolari Komissiya ishi bilan bogʻliq axborotlarni tarqatgan holatlarda oʻrnatilgan tartibda javob beradi.

18. Foydalanish huquqi cheklangan axborotlarni oʻzida mujassam etgan materiallar Komissiyaning yopiq yigʻilishlarida Komissiyaning vakolatli aʼzolari ishtirokida koʻrib chiqiladi. Ushbu yigʻilishlarda qabul qilingan qarorlar oʻrnatilgan tartibda rasmiylashtiriladi.

VII. Komissiya Ijro apparati

19. Ijro apparatini rahbar — Komissiya kotibi boshqaradi va uning maqomi Oʻzbekiston Respublikasi Prezidenti Administratsiyasining bosh inspektoriga tenglashtiriladi.

20. Ijro apparati Komissiya faoliyatini tashkiliy, moddiy-texnik va axborot-tahliliy jihatdan taʼminlash maqsadida tashkil etiladi va oʻz faoliyati boʻyicha Komissiyaga hisobdor boʻladi.

21. Ijro apparati tarkibiga davlat mukofotlari va geraldika masalalari boʻyicha guruhlar kiradi.

22. Davlat mukofotlari masalalari boʻyicha guruh tarkibiga guruh rahbari, mutaxassis va inspektor-ish yurituvchi kiradi.

23. Davlat mukofotlari masalalari boʻyicha guruh rahbari oʻz maqomiga koʻra, Oʻzbekiston Respublikasi Prezidenti Administratsiyasining yetakchi inspektoriga tenglashtiriladi.

24. Davlat mukofotlari masalalari boʻyicha guruh:

taqdim etilgan materiallarni yigʻish, umumlashtirish va tahlil qilishni amalga oshiradi, nomzodlarning tavsiflovchi maʼlumotlarini va davlat mukofotiga munosibligini oʻrganadi;

statistik va tahliliy hujjatlarni hamda nomzodlarni tavsiflovchi maʼlumotlarni tayyorlaydi;

nomzodlar haqida yagona maʼlumotlar bankini shakllantiradi va ular toʻgʻrisidagi maʼlumotlarni kiritib boradi;

nomzodlar hujjatlari boʻyicha statistik hisob-kitob va arxiv ishini yuritadi;

mukofotlash boʻyicha kelib tushgan materiallarning toʻliqligi va toʻgʻriligini tekshiradi hamda ularni koʻrib chiqish uchun Komissiyaga taqdim etadi;

Komissiyani davlat mukofotlari masalalari boʻyicha zaruriy axborot-tahliliy materiallar bilan taʼminlaydi;

zarur hollarda, nomzodlarning faoliyatini joylarga chiqib oʻrganadi;

davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlardan davlat mukofotlariga tavsiya etilgan nomzodlar toʻgʻrisidagi materiallarni tahlil qiladi;

davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlarning mukofotlash boʻyicha ish amaliyotini joylarga chiqib oʻrganadi va umumlashtiradi, ularning mazkur yoʻnalishdagi faoliyatlarini takomillashtirish yuzasidan tavsiyalar kiritadi;

davlat mukofotlari masalalariga oid Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari, farmoyishlari va topshiriqlarining ijrosi yuzasidan oʻz vakolati doirasida nazoratni amalga oshiradi;

xorijiy mamlakatlarning davlat mukofotlari tizimidagi tajribasini oʻrganadi, tahlil qiladi va ularning ilgʻor tajribalarini amaliyotga tatbiq etish boʻyicha takliflarni kiritadi;

davlat mukofotlari masalalari boʻyicha tegishli davlat organlari va tashkilotlari bilan xizmat doirasida yozishmalarni olib boradi;

mukofotlash tizimini takomillashtirish boʻyicha uslubiy va boshqa materiallarni tayyorlaydi;

davlat mukofotlari boʻyicha Komissiya yigʻilishi kun tartibiga kiritilgan masalalar yuzasidan zarur hujjatlarni, materiallarni va takliflarni tayyorlaydi;

Komissiya faoliyatini taʼminlash uchun zarur boʻlgan boshqa topshiriqlarni bajaradi.

25. Geraldika masalalari boʻyicha guruh tarkibiga guruh rahbari, mutaxassis va inspektor-ish yurituvchi kiradi.

26. Geraldika masalalari boʻyicha guruh rahbari oʻz maqomiga koʻra, Oʻzbekiston Respublikasi Prezidenti Administratsiyasining yetakchi inspektoriga tenglashtiriladi.

27. Geraldika masalalari boʻyicha guruh:

geraldika masalalariga oid materiallarni yigʻish, qayta ishlash, umumlashtirish va tahlil qilishni amalga oshiradi, shuningdek, davlat ramzlarini qoʻllash amaliyotini oʻrganadi;

davlat va xoʻjalik boshqaruvi, mahalliy davlat hokimiyati organlari, boshqa idora va tashkilotlarning amaldagi idoraviy mukofotlarini oʻrganadi va koʻrib chiqadi, kamchilik va nuqsonlar aniqlangan taqdirda ularni bartaraf etish choralarini koʻradi;

yangi idoraviy mukofotlarni taʼsis etishda davlat ramzlari va farqlovchi belgilardan foydalanishga oid masalalarni koʻrib chiqadi;

idoraviy mukofotlar boʻyicha yagona maʼlumotlar bankini shakllantiradi;

geraldika va idoraviy mukofotlarga oid hujjatlar boʻyicha hisob-kitob va arxiv ishini yuritadi;

geraldika va idoraviy mukofotlar boʻyicha kelib tushgan materiallarning toʻliqligi va toʻgʻriligini tekshiradi hamda ularni koʻrib chiqish uchun Komissiyaga taqdim etadi;

Komissiyani geraldika masalalari boʻyicha zaruriy axborot-tahliliy materiallar bilan taʼminlaydi;

geraldika va idoraviy mukofotlar masalalari boʻyicha tegishli davlat organlari va tashkilotlari bilan xizmat doirasida yozishmalarni olib boradi;

geraldika nazariyasi va tarixi boʻyicha ilmiy-tadqiqot ishlarini olib boradi;

geraldikaga oid masalalar boʻyicha xalqaro tajribani oʻrganadi, tahlil qiladi va umumlashtiradi;

geraldika va idoraviy mukofotlar boʻyicha Komissiya yigʻilishlari kun tartibiga kiritilgan masalalar yuzasidan zaruriy hujjatlarni, materiallarni va takliflarni tayyorlaydi;

Komissiya faoliyatini taʼminlash uchun zarur boʻlgan boshqa topshiriqlarni bajaradi.

28. Komissiya Ijro apparati xodimlari Oʻzbekiston Respublikasi Prezidenti Administratsiyasi rahbarining farmoyishi bilan lavozimga tayinlanadi va lavozimidan ozod etiladi.

30. Komissiya faoliyati Oʻzbekiston Respublikasi Prezidentining Kadrlar boʻyicha maslahatchisi boʻlinmalari Davlat mukofotlari va geraldika shoʻbasi tomonidan muvofiqlashtiriladi va yoʻnaltiriladi.

31. Komissiya faoliyatini moliyaviy va moddiy-texnik jihatdan taʼminlash Oʻzbekiston Respublikasi Prezidenti Administratsiyasi Moliya-xoʻjalik departamenti tomonidan amalga oshiriladi.

Oʻzbekiston Respublikasi Prezidentining 2017-yil 10-iyuldagi PQ-3119-sonli qaroriga 3-ILOVA

Oʻzbekiston Respublikasi Prezidenti huzuridagi Davlat mukofotlari va geraldika boʻyicha Komissiya Ijro apparatining

TASHKILIY TUZILMASI

Oʻzbekiston Respublikasi Prezidentining 2017-yil 10-iyuldagi PQ-3119-sonli qaroriga 4-ILOVA

Oʻzbekiston Respublikasi Prezidenti huzuridagi Davlat mukofotlari va geraldika boʻyicha Komissiyaning

SHTATLAR JADVALI

Davlat mukofotlari va geraldika boʻyicha Komissiya Komissiya raisi (jamoatchilik asosida) 1 Komissiya raisining oʻrinbosari (jamoatchilik asosida) 2 Komissiya kotibi — Ijro apparati rahbari (doimiy asosda) 1 Komissiya aʼzolari (jamoatchilik asosida) 31 Jami Komissiya aʼzolari 35 Ijro apparati I. Komissiya kotibi — Ijro apparati rahbari 1 II. Davlat mukofotlari masalalari boʻyicha guruh 3 Guruh rahbari 1 Mutaxassis 1 Inspektor — ish yurituvchi 1 III. Geraldika masalalari boʻyicha guruh 3 Guruh rahbari 1 Mutaxassis 1 Inspektor — ish yurituvchi 1 Ijro apparati boʻyicha jami 7