Toshkent shahrida bolalar buyumlari va oʻyinchoqlarini ishlab chiqaruvchi zamonaviy korxonani tashkil etish chora-tadbirlari toʻgʻrisida (PQ-3115-son)

06.07.2017

Oʻzbekiston Respublikasi Prezidentining

Qarori

Aholining bolalar buyumlari va oʻyinchoqlariga boʻlgan talab-ehtiyojini qondirish, boʻsh turgan davlat mulki obyektlaridan samarali foydalanish hamda talab yuqori boʻlayotgan sifatli, zamonaviy mahalliy bolalar buyumlari va oʻyinchoqlari, boshqa raqobatdosh, import oʻrnini bosuvchi mahsulotlar ishlab chiqarishni taʼminlash maqsadida:

1. Maʼlumot uchun qabul qilinsinki:

Toshkent shahri, Olmazor tumani, Qorasaroy koʻchasi, 336-uyda joylashgan sobiq “Toshoʻyinchoq” zavodining maydoni 12 ming kv. metrli asosiy binolari va inshootlari hamda umumiy yer maydoni hududi 2,8 ga boʻlgan boshqa binolar va inshoot (keyingi oʻrinlarda — obyekt)lari uzoq muddat davomida boʻsh boʻlib, ishlab chiqarish liniyalari yaroqsiz holga kelib qolgan va faoliyat yuritmaydi;

hozirgi vaqtda zavodning barcha binolari va inshootlari tutash hududlari bilan birga davlat mulkiga oʻtkazilgan.

2. Toshkent shahar hokimligi, Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Iqtisodiyot vazirligi, Tashqi iqtisodiy faoliyat milliy bankining:

obyektni balans qiymatida xoʻjalik yuritish huquqi bilan Oʻzbekiston Respublikasi Tashqi iqtisodiy faoliyat milliy bankiga bepul topshirish:

keyinchalik obyektni baholash kompaniyasi tomonidan belgilangan qiymat boʻyicha, sifatli, zamonaviy mahalliy bolalar buyumlari va oʻyinchoqlarini ishlab chiqarishni tashkillashtirish hamda investitsiyalarni jalb etish sharti bilan bankning boshqaruv kompaniyasi — “NBU INVESTMENT” MChJ mulkiga (ustav fondiga) oʻtkazish toʻgʻrisidagi takliflariga rozilik berilsin.

3. Toshkent shahar hokimligi, Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Tashqi iqtisodiy faoliyat milliy banki bir oy muddatda obyektni qabul qilish-topshirishni belgilangan tartibda taʼminlasin.

Belgilansinki, obyektni Oʻzbekiston Respublikasi Tashqi iqtisodiy faoliyat milliy bankiga qabul qilish-topshirish hamda uni keyinchalik “NBU INVESTMENT” MChJning mulkiga (ustav fondiga) topshirish soliqqa tortilmaydi.

4. Oʻzbekiston Respublikasi Tashqi iqtisodiy faoliyat milliy banki “NBU INVESTMENT” MChJ bilan birgalikda:

2018-yilning 1-martigacha boʻlgan muddatda investitsiyalarni jalb etishni va ichki bozor kabi tashqi bozorlarda ham sotishga moʻljallangan zamonaviy mahalliy bolalar buyumlari va oʻyinchoqlari ishlab chiqarilishi (keyingi oʻrinlarda — investitsiya loyihalari)ni tashkillashtirishni;

obyektning but saqlanishi va oqilona foydalanilishi, obyekt negizida yaratiladigan korxonalar yangi investorlarga sotilgunga qadar ishlab chiqarish quvvatlarining yuklanishini, barqaror moliya-xoʻjalik faoliyati barqarorligini taʼminlasin.

5. Oʻzbekiston Respublikasi Tashqi iqtisodiy faoliyat milliy banki va “NBU INVESTMENT” MChJga loyihani amalga oshirish doirasida:

obyekt negizida 100 foizgacha ulush bilan qatnashgan holda, shu jumladan, boshqa investorlar ishtirokida korxonalar tashkil etish;

barpo etilayotgan korxonalarni yoki ularning ustav fondidagi ulushlarni korxonalar tiklanib borishiga qarab, yangi investorlarga mablagʻ qanday valyutada sarflangan boʻlsa shunday valyuta bilan bozor qiymatida sotish huquqi berilsin.

7. Oʻzbekiston Respublikasi Prezidentining “Iqtisodiy nochor korxonalarni qoʻllab-quvvatlash mexanizmlarini yanada kengaytirish hamda tijorat banklarining koʻchmas mulk obyektlari negizida yangi ishlab chiqarish quvvatlarini tashkil etishni ragʻbatlantirish chora-tadbirlari toʻgʻrisida” 2017-yil 20-apreldagi PF-5022-sonli Farmonining 8-bandi obyekt hududida amalga oshirilayotgan investitsiya loyihalari doirasida “NBU INVESTMENT” MChJ ishtirokida tashkil etilayotgan korxonalarga joriy etilsin.

8. Investitsiya loyihalarini amalga oshirish doirasida Oʻzbekiston Respublikasi Tashqi iqtisodiy faoliyat milliy banki va “NBU INVESTMENT” MChJga;

2018-yil 1-martgacha obyekt hududida, belgilangan shaharsozlik normalari va qoidalariga rioya qilgan holda, qurilish va rekonstruksiya qilish ishlarini amalga oshirishda parallel tarzda loyihalash va moliyalashtirishga;

loyiha va pudrat tashkilotlarini, shuningdek, keyinchalik uskuna, butlovchi buyumlar, texnika va texnologiyalar, ehtiyot qismlar, xomashyo va materiallarni sotib olish boʻyicha belgilangan tartibda import shartnomalari ekspertizasini oʻtkazgan holda, eng yaxshi takliflarni tanlab olish asosida tender (tanlov) savdolari oʻtkazmasdan uskunalar, butlovchi buyumlar, texnika va texnologiyalar, ehtiyot qismlar, xomashyo va materiallar yetkazib beruvchilarni aniqlashga, istisno tariqasida ruxsat berilsin.

9. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 6-iyul,

PQ-3115-son