Turkmanistonning avtotransport vositalari Oʻzbekiston Respublikasi hududiga kirganligi va tranzit harakatlanganligi uchun yoʻl yigʻimlari joriy etish toʻgʻrisida (447-son)

28.09.1999

Oʻzbekiston Respublikasi Vazirlar Mahkamasining

qarori

Turkmaniston avtotransport vositalarining Oʻzbekiston Respublikasi hududi orqali oʻtishi uchun yoʻl yigʻimlari stavkalarining teng amal qiluvchi miqdorlarini oʻzaro tartibga solishni taʼminlash maqsadida Vazirlar Mahkamasi qaror qiladi:

1. 1999-yil 1-oktabrdan boshlab Turkmaniston avtotransport vositalarining Oʻzbekiston Respublikasiga kirib kelishi va uning hududi orqali tranzit boʻyicha oʻtishi uchun yigʻimlar miqdorlari ilovaga muvofiq belgilansin.

2. Belgilab qoʻyilsinki, Turkmanistonning avtotransport vositalaridan yigʻimlar undirish milliy valyuta “soʻm”da naqd pulsiz shaklda yoki tijorat banklari tomonidan bevosita bojxona postlarida Oʻzbekiston Respublikasi Markaziy bankining toʻlov kunidagi kursi boʻyicha naqd pul shaklida amalga oshiriladi, olingan mablagʻlar Oʻzbekiston Respublikasi tijorat banklari boʻlimlari orqali Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasi hisob raqamlariga oʻtkaziladi.

3. Bojxona organlari tomonidan avtotransport vositasi haydovchisiga beriladigan, boʻlish muddatlari va harakatlanish yoʻnalishi koʻrsatilgan, belgilangan namunadagi yoʻnalish varaqasi Oʻzbekiston Respublikasiga kirib kelish yoki uning hududi orqali tranzit boʻyicha oʻtish huquqiga ruxsatnoma hisoblanadi.

Harakatlanish yoʻnalishini va boʻlish muddatlarini oʻzgartirishga faqat Oʻzbekiston Respublikasi Davlat bojxona qoʻmitasining joylardagi organlari ruxsati bilan yoʻl qoʻyiladi.

4. Avtotransport vositalari Oʻzbekiston Respublikasining bojxona chegarasi orqali oʻtganda, bojxona nazoratidan tashqari, bojxona organlari tomonidan qonun hujjatlariga muvofiq chora-tadbirlar koʻriladi.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari L.A. Axmetov va R.R. Yunusov zimmasiga yuklansin.

Oʻzbekiston Respublikasining Bosh vaziri Oʻ. Sultonov

Toshkent sh.,

1999-yil 28-sentabr,

447-son

Vazirlar Mahkamasining 1999-yil 28-sentabrdagi 447-son qaroriga ILOVA

Turkmanistonning avtotransport vositalaridan undiriladigan yigʻimlari

stavkalari

Izoh: uchinchi mamlakatlardan yuklarni Oʻzbekiston Respublikasiga tashishda va Oʻzbekiston Respublikasi hududidan yuklarni olib chiqishda Turkmaniston yuk avtotransport vositalaridan 175,0 AQSh dollari miqdorida qoʻshimcha yigʻim undiriladi.