Davlatga tegishli obyektlarni va aktivlarni xususiy mulk qilib sotishga doir qoʻshimcha chora-tadbirlar toʻgʻrisida (295-son)

19.05.2017

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Tadbirkorlik maqsadlarida foydalanish uchun davlat mulki obyektlarini sotishni jadallashtirish va uning tartib-taomillarini yanada soddalashtirish chora-tadbirlari toʻgʻrisida” 2017-yil 17-yanvardagi PF-4933-son Farmonini bajarish yuzasidan Vazirlar Mahkamasi qaror qiladi:

1. Quyidagilar:

investitsiya majburiyatlari qabul qilish sharti bilan “nul” xarid qiymati boʻyicha tanlov asosida sotiladigan davlat mulki obyektlari roʻyxati 1-ilovaga* muvofiq;

xususiylashtiriladigan foydalanilmayotgan koʻchmas davlat mulki obyektlari, shuningdek davlat korxonalari va xoʻjalik jamiyatlarining ustav kapitalidagi ulushlar roʻyxati 2-ilovaga* muvofiq;

foydalanilmayotgan va qurilishi tugallanmagan, vakolatli organlar va tuman (shahar) hokimliklarining qaroriga koʻra buzib tashlanadigan davlat mulki obyektlari roʻyxati 3-ilovaga* muvofiq;

ulardan samarali foydalanish chora-tadbirlari koʻrilayotgan koʻchmas davlat mulki obyektlari, shuningdek davlat korxonalari va xoʻjalik jamiyatlarining ustav kapitalidagi ulushlar roʻyxati 4-ilovaga* muvofiq tasdiqlansin.

* 1 — 4-ilovalar rus tilidagi matnda berilgan.

2. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, har bir hududning ehtiyojlaridan kelib chiqqan holda, 3-ilovada koʻrsatilgan davlat mulki obyektlarini buzib tashlash natijasida boʻshaydigan yer uchastkalaridan, shu jumladan ularni tadbirkorlik faoliyatini amalga oshirish uchun tadbirkorlik subyektlariga tanlov asosida berish yoʻli bilan ulardan samarali foydalanilishini taʼminlasinlar.

3. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi manfaatdor vazirliklar, idoralar, kompaniyalar, uyushmalar va boshqa xoʻjalik birlashmalari, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda bir oy muddatda:

ushbu qarorga 1-ilovaga kiritilgan davlat mulki obyektlarini investitsiya majburiyatlari qabul qilish sharti bilan “nol” xarid qiymati boʻyicha sotish yuzasidan tanlovlar oʻtkazish;

ushbu qarorga 2-ilovaga kiritilgan davlat mulki obyektlarini, shuningdek davlat korxonalari va xoʻjalik jamiyatlarining ustav kapitalidagi ulushlarni baholash va sotuvga qoʻyish jadvallarini tasdiqlasin hamda ularning bajarilishini taʼminlasin.

4. Quyidagilar 3-ilovada koʻrsatilgan obyektlarni buzib tashlash bilan bogʻliq xarajatlarni qoplash manbalari etib belgilansin:

obyektlarni buzishda boʻshaydigan foydalanish uchun yaroqli boʻlgan qurilish materiallarini sotishdan tushadigan mablagʻlar;

balansda saqlovchilarning budjetdan tashqari mablagʻlari, shuningdek tasdiqlangan xarajatlar smetasi doirasidagi budjet mablagʻlari.

5. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi Adliya vazirligi va boshqa manfaatdor tuzilmalar bilan birgalikda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida bir oy muddatda Vazirlar Mahkamasiga takliflar kiritsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 19-may,

295-son