Oliy taʼlimdan keyingi taʼlim tizimini yanada takomillashtirish chora-tadbirlari toʻgʻrisida (304-son)

22.05.2017

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oliy oʻquv yurtidan keyingi taʼlim tizimini yanada takomillashtirish toʻgʻrisida” 2017-yil 16-fevraldagi PF-4958-son Farmoni ijrosini taʼminlash maqsadida Vazirlar Mahkamasi qaror qiladi:

1. Quyidagilar:

Oliy taʼlimdan keyingi taʼlim toʻgʻrisidagi Nizom 2-ilovaga muvofiq;

Oliy taʼlimdan keyingi taʼlim toʻgʻrisidagi hujjatlarning — falsafa doktori (Doctor of Philosophy), fan doktori (Doctor of Science) diplomlari, shuningdek dotsent, katta ilmiy xodim va professor attestatlarining davlat namunalari 3 — 7-ilovalarga muvofiq tasdiqlansin.

2. Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi manfaatdor vazirlik va idoralar bilan birgalikda 2017-yil 1-iyuldan boshlab ushbu qaror bilan tasdiqlanadigan talablarga muvofiq attestatsiya ishlarini qabul qilish, koʻrib chiqish va izlanuvchilarga falsafa doktori (Doctor of Philosophy) va fan doktori (Doctor of Science) ilmiy darajalarini berishni taʼminlasin.

3. Oʻzbekiston Respublikasi Fan va texnologiyalar agentligi va Vazirlar Mahkamasi huzuridagi Oliy attestatsiya komissiyasi manfaatdor vazirlik va idoralar bilan birgalikda ular tomonidan qabul qilingan meʼyoriy-huquqiy hujjatlarni bir oy muddatda ushbu qarorga muvofiqlashtirsin.

4. Vazirlar Mahkamasining “Oliy taʼlimdan keyingi taʼlim va oliy malakali ilmiy va ilmiy-pedagog kadrlarni attestatsiyadan oʻtkazish tizimini yanada takomillashtirish chora-tadbirlari toʻgʻrisida” 2012-yil 28-dekabrdagi 365-son qaroriga (Oʻzbekiston Respublikasi SP, 2012-yil, 12-son, 90-modda) 8-ilovaga muvofiq oʻzgartirishlar kiritilsin.

5. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining IT-texnologiyalar, telekommunikatsiyalar va innovatsion faoliyatni rivojlantirish masalalari departamentiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 22-may,

304-son

Vazirlar Mahkamasining 2017-yil 22-maydagi 304-son qaroriga 2-ILOVA

Oliy taʼlimdan keyingi taʼlim toʻgʻrisida

Nizom

1-bob. Umumiy qoidalar

1. Ushbu Nizom oliy taʼlimdan keyingi taʼlim institutida tahsil olishni tashkil etish va oʻqish tartibini belgilaydi.

Ushbu Nizom Al-Xorazmiy universitetiga nisbatan tatbiq etilmaydi.

2. Mazkur Nizomda quyidagi asosiy tushunchalar qoʻllaniladi:

oliy taʼlimdan keyingi taʼlim — doktorlik dissertatsiyasini tayyorlash va himoya qilish maqsadida mutaxassislikni chuqur oʻrganishni va ilmiy izlanishlar olib borishni nazarda tutadigan tayanch doktorantura, doktorantura va mustaqil izlanuvchanlik asosida ilmiy darajaga ega ilmiy va ilmiy-pedagogik kadrlar tayyorlashni taʼminlaydigan taʼlim turi;

oliy taʼlimdan keyingi taʼlim instituti — ilmiy tashkilot yoki taʼlim muassasalarida tayanch doktorantura, doktorantura yoki mustaqil izlanuvchilik shakllaridagi oliy taʼlimdan keyingi taʼlimni amalga oshirish tizimi;

stajyor-tadqiqotchilik — ishlab chiqarishdan ajralgan holda tegishli ixtisoslik boʻyicha ilmiy va ilmiy-ijodiy izlanishlarni olib borish va falsafa doktori (PhD) ilmiy darajasini olish uchun izlanuvchini tayyorlash shakli;

tayanch doktorantura — falsafa doktori (Doctor of Philosophy (PhD) ilmiy darajasiga daʼvogar izlanuvchilar uchun ishlab chiqarishdan ajralgan holda tashkil etiladigan oliy malakali ilmiy va ilmiy-pedagog kadrlar ixtisosligi boʻyicha oliy taʼlimdan keyingi taʼlim shakli;

doktorantura — fan doktori (Doctor of Science (DSc) ilmiy darajasiga daʼvogar izlanuvchilar uchun ishlab chiqarishdan ajralgan holda tashkil etiladigan oliy malakali ilmiy va ilmiy-pedagog kadrlar ixtisosligi boʻyicha oliy taʼlimdan keyingi taʼlim shakli;

mustaqil izlanuvchilik — falsafa doktori (Doctor of Philosophy (PhD) yoki fan doktori (Doctor of Science (DSc) ilmiy darajalariga daʼvogar izlanuvchilar uchun ishlab chiqarishdan ajralmagan holda tashkil etiladigan oliy malakali ilmiy va ilmiy-pedagog kadrlar ixtisosligi boʻyicha oliy taʼlimdan keyingi taʼlim shakli;

stajyor-tadqiqotchi — ilmiy tashkilot yoki taʼlim muassasalariga stajyor-tadqiqotchilikka belgilangan tartibda qabul qilingan shaxs;

doktorant — ilmiy tashkilot yoki taʼlim muassasalariga tayanch doktorantura yoki doktoranturaga belgilangan tartibda qabul qilingan shaxs;

mustaqil izlanuvchi — ilmiy tashkilot yoki taʼlim muassasalariga mustaqil izlanuvchilikka belgilangan tartibda qabul qilingan shaxs;

izlanuvchi — falsafa doktori (PhD) yoki fan doktori (DSc) ilmiy darajasini olish uchun doktorlik dissertatsiyasini tayyorlayotgan shaxs.

oliy taʼlimdan keyingi taʼlimni muvofiqlashtirishning yagona elektron tizimi (keyingi oʻrinlarda — Yagona elektron tizim) — oliy taʼlimdan keyingi taʼlim institutlariga qabul qilish, stajyor-tadqiqotchi va izlanuvchilarning yakka tartibdagi rejalari bajarilishi boʻyicha hisobotlarni shakllantirish boʻyicha hujjatlarning elektron almashinuvini tashkil etishga moʻljallangan axborot tizimi.

3. Oliy taʼlimdan keyingi taʼlim institutida taʼlim quyidagi shakllarda tashkil etiladi:

tayanch doktorantura;

doktorantura;

mustaqil izlanuvchilik;

Stajyor-tadqiqotchilik instituti oliy taʼlimdan keyingi taʼlim institutiga tayyorgarlik bosqichi hisoblanadi.

4. Oliy taʼlimdan keyingi taʼlim instituti ilmiy tashkilot va taʼlim muassasalari huzurida fan va texnikaning muhim tarmoqlarida oliy malakali ilmiy va ilmiy-pedagogik kadrlar tayyorlash, shuningdek fan va texnologiyalarning ustuvor yoʻnalishlarida fundamental tadqiqotlarni rivojlantirish, davlat ilmiy dasturlarini amalga oshirish maqsadida ochiladi.

5. Xorijiy fuqarolar va fuqaroligi boʻlmagan shaxslarni (Oʻzbekiston Respublikasi hududida istiqomat qilayotgan fuqaroligi boʻlmagan shaxslar bundan mustasno) oliy taʼlimdan keyingi taʼlim institutlariga oʻqishga qabul qilish Oʻzbekiston Respublikasi qonunchiligiga va/yoki xalqaro shartnomalarga muvofiq toʻlov-kontrakt asosida amalga oshiriladi.

Oʻzbekiston Respublikasi hududida istiqomat qilayotgan fuqaroligi boʻlmagan shaxslar oliy taʼlimdan keyingi taʼlim institutlariga oʻqishga fuqarolar bilan teng huquqlarda qabul qilinadi.

Oʻzbekiston Respublikasida investitsiya vizasiga ega boʻlgan xorijiy investorlar hamda ularning oila aʼzolari Oʻzbekiston Respublikasi fuqarolari uchun nazarda tutilgan shartlarda oliy taʼlimdan keyingi taʼlim institutlariga oʻqishga kirishga va taʼlim olishga haqli.

6. Oliy taʼlimdan keyingi taʼlim institutiga qabul qilinayotgan magistr yoxud klinik ordinaturaga (tibbiyot fanlari uchun) yoki mutaxassislik dasturlari boʻyicha (1997-yilgacha) olingan oliy maʼlumot toʻgʻrisidagi diplomga ega boʻlish, fan nomzodi, falsafa doktori (PhD) yoki unga tenglashtirilgan xorijiy mamlakatlarda ilmiy darajaga ega boʻlganlar mutaxassisligi oliy taʼlimdan keyingi taʼlim ixtisosligi tegishli boʻlgan fan sohasiga muvofiq boʻlishi shart. Fan sohalari mos kelmaganda yoki oliy taʼlimdan keyingi taʼlimda fanning turdosh sohalari boʻyicha olish rejalashtirilganda talabgorlar Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi (keyingi oʻrinlarda OAK deb ataladi) belgilagan fanlar boʻyicha qoʻshimcha imtihonlar topshirishi lozim.

Shu bilan birga, tibbiyot, farmatsevtika, veterinariya mutaxassisliklar boʻyicha oliy taʼlimdan keyingi taʼlim institutiga fanning turdosh sohalari boʻyicha qabul qilinishga yoʻl qoʻyilmaydi.

Bakalavriat taʼlimi yoʻnalishi va magistratura mutaxassisligi taʼlimning turli sohalariga tegishli boʻlganda, OAK tomonidan belgilangan fanlar boʻyicha qoʻshimcha imtihonlar topshirish sharti bilan, bakalavriat taʼlimining yoʻnalishiga tegishli boʻlgan taʼlim sohasiga muvofiq boʻlgan mutaxassislik boʻyicha falsafa doktori (PhD) ilmiy darajasini olish uchun doktorlik dissertatsiyasining belgilangan tartibda tayyorlanishiga va himoya qilinishiga yoʻl qoʻyiladi.

7. Oliy malakali ilmiy va ilmiy-pedagogik kadrlarni sifatli tayyorlashni taʼminlash, shuningdek dissertatsiya tadqiqotlarni oʻtkazishda ularga ilmiy va oʻquv-uslubiy yordam koʻrsatish maqsadida falsafa doktori (PhD) ilmiy darajasini olish istagidagi talabgorlar Kollegial organ qarori bilan ilmiy rahbarlarga, fan doktori (DSc) ilmiy darajasini olish istagidagi talabgorlar esa — ilmiy konsultantlarga biriktiriladi.

Fan doktori (DSc) ilmiy darajasini olish uchun tayyorlanadigan dissertatsiya tadqiqotlari ilmiy konsultantni tayinlanmasdan ham amalga oshirilishi mumkin.

8. Fan doktori bir vaqtning oʻzida toʻrttadan koʻp boʻlmagan izlanuvchilarga ilmiy rahbar va konsultant boʻlishi mumkin. Soʻnggi uch yilda izlanuvchilari oʻz vaqtida himoya qilgan ilmiy rahbar va ilmiy konsultantlarga ilmiy yoki taʼlim tashkilotlarining kollegial organi xulosasi asosida oltitadan koʻp boʻlmagan izlanuvchilar biriktirilishi mumkin.

Ilmiy unvoni boʻlgan fan nomzodi yoki falsafa doktori (PhD) bir vaqtning oʻzida ikkitadan koʻp boʻlmagan izlanuvchilarga ilmiy rahbarlik qilishi mumkin. Soʻnggi uch yilda izlanuvchilari oʻz vaqtida himoya qilgan ilmiy rahbarlarga taʼlim yoki ilmiy tashkilotning kollegial organi xulosasi asosida uchtadan koʻp boʻlmagan izlanuvchilar biriktirilishi mumkin.

Xorijiy fuqarolarga yoki fuqaroligi boʻlmagan izlanuvchilarga oʻrnatilgan meʼyordan ortiq ilmiy rahbar yoki konsultantlar tayinlanishi mumkin.

2-bob. Oliy taʼlimdan keyingi taʼlim institutlarini ochish tartibi

9. Ilmiy tashkilot va taʼlim muassasalari oʻzlari tizimiga kiradigan tegishli vazirliklar, idoralar va tashkilotlarga tayanch doktorantura yoki doktoranturani ochishning maqsadga muvofiqligi toʻgʻrisida quyidagi hujjatlar bilan murojaat qiladi:

oliy taʼlimdan keyingi taʼlim institutini ochish boʻyicha muassasaning muvofiqlashtiruvchi-kollegial organining (keyingi oʻrinlarda Kollegial organ deb yuritiladi) (ilmiy kengash, kengash, ilmiy-texnik kengash, ilmiy-muvofiqlashtiruvchi kengash va h.k.) tegishli qarori;

Nizomning ilovasiga muvofiq tegishli mutaxassisliklar boʻyicha tadqiqot olib boruvchi fan nomzodi, falsafa doktori (PhD), fan doktorlari toʻgʻrisidagi kadrlar boʻlimi tomonidan tasdiqlangan maʼlumot;

shuningdek, oliy taʼlimdan keyingi taʼlim faoliyatini sifatli taʼminlashda moddiy-texnik baza mavjudligi toʻgʻrisidagi maʼlumotlar.

10. Tizimida ilmiy va taʼlim tashkilotlari boʻlgan vazirlik, idora va tashkilotlar murojaat tushgan va barcha zarur hujjatlar taqdim etilgan sanadan boshlab bir oy muddatda oliy taʼlimdan keyingi taʼlim institutini ochish yoki ochishni rad etish toʻgʻrisida kollegial organ qarorini qabul qiladilar. Kollegial organ majlisida ishtirok etayotgan Kollegial organ aʼzolarining kamida uchdan ikki qismi tomonidan mazkur Nizomning 9-bandida belgilangan talablar asosida oliy taʼlimdan keyingi taʼlim institutini ochish yoki rad etish boʻyicha ovoz berilganda, tegishli qaror qabul qilingan hisoblanadi. Qabul qilingan qaror oʻn kun muddatda tegishli ilmiy va taʼlim tashkilotlariga yuboriladi.

Oliy taʼlimdan keyingi taʼlim institutini ochish toʻgʻrisidagi qarorning nusxasi axborot uchun Oʻzbekiston Respublikasi Oliy taʼlim, fan va innovatsiyalar vazirligi hamda Oʻzbekiston Respublikasi Prezidenti Administratsiyasi huzuridagi Taʼlim sifatini taʼminlash milliy agentligiga yuboriladi.

Oʻzlarida oliy taʼlimdan keyingi taʼlim institutlari ochilgan ilmiy tashkilotlar va taʼlim muassasalari ham mustaqil izlanuvchilik tartibida oliy malakali ilmiy va ilmiy-pedagog kadrlar tayyorlashi mumkin.

Xorijiy yoki nodavlat ilmiy yoxud taʼlim tashkilotlarida oliy taʼlimdan keyingi taʼlim institutini ochish mazkur Nizomning 9 va 10-bandlarida belgilangan tartibda hamda nodavlat taʼlim xizmatlarini koʻrsatish sohasidagi faoliyatni litsenziyalash orqali amalga oshiriladi. Bunda mazkur tashkilotlarga qabul kvotasi Oʻzbekiston Respublikasi Prezidenti Administratsiyasi huzuridagi Taʼlim sifatini taʼminlash milliy agentligi tomonidan maxsus davlat akkreditatsiyasidan oʻtgan ixtisosliklar boʻyicha ushbu Nizomning 13 va 14-bandlariga muvofiq shakllantirilgan umumiy qabul kvotasi doirasida ajratiladi.

11. Ilmiy tashkilot yoki taʼlim muassasalaridagi oliy taʼlimdan keyingi taʼlim institutlarini davlat akkreditatsiyasidan oʻtkazish qonunchilikda belgilangan tartibda Oʻzbekiston Respublikasi Prezidenti Administratsiyasi huzuridagi Taʼlim sifatini taʼminlash milliy agentligi tomonidan amalga oshiriladi.

12. Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi oliy malakali ilmiy va ilmiy-pedagog kadrlar tayyorlash masalalarida tasarrufida ilmiy tashkilot va taʼlim muassasalariga ega vazirlik va idoralarning faoliyatini muvofiqlashtiradi.

3-bob. Oliy taʼlimdan keyingi taʼlimni tayanch doktorantura va doktorantura shaklida tashkil etish

13. Tayanch doktorantura va doktoranturaga Oʻzbekiston Respublikasi Davlat budjeti mablagʻlari hisobiga va toʻlov-kontrakt asosida oʻqitish uchun qabul kvotasi (keyingi oʻrinlarda qabul kvotasi deb ataladi), qoida tariqasida, tegishli oʻquv yili uchun tasdiqlangan oliy taʼlim muassasalariga davlat buyurtmasi asosida magistratura mutaxassisliklariga oʻqishga qabul qilish umumiy parametrlarining 30 foizidan kam boʻlmagan miqdorda belgilanadi.

Tizimida ilmiy tashkilot yoki taʼlim muassasalari boʻlgan vazirliklar, idoralar va tashkilotlar har yili 1-iyungacha boʻlgan muddatda Yagona elektron tizim orqali elektron shaklda Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligiga ilmiy darajali kadrlarga boʻlgan ehtiyojlar, amaldagi oliy taʼlimdan keyingi taʼlim institutlarining samaradorligi, taʼlim olayotgan stajyor-tadqiqotchilar, doktorantlar va mustaqil izlanuvchilar kontingenti, ilmiy rahbarlar va ilmiy konsultantlarning samarali ishlari, shuningdek, mazkur Nizomda belgilangan bitta ilmiy rahbar va bitta ilmiy konsultantga biriktiriladigan izlanuvchilar va stajyor tadqiqotchilar sonidan kelib chiqib, keyingi yildan boshlab davlat akkreditatsiyasidan oʻtgan yoʻnalishlar boʻyicha stajyor-tadqiqotchilikka, tayanch doktoranturaga, doktoranturaga qabul kvotasi boʻyicha asoslangan takliflar bilan murojaat qiladilar.

14. Tizimida ilmiy va taʼlim tashkilotlari boʻlgan vazirlik va idoralar tegishli ilmiy va taʼlim tashkilotlari tomonidan qabul kvotasi boʻyicha asoslangan takliflarni har yili 10-iyungacha Yagona elektron tizim orqali Oʻzbekiston Respublikasi Iqtisodiyot va moliya vazirligi bilan kelishish uchun Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligiga yuborilishini taʼminlaydi.

Oʻzbekiston Respublikasi Iqtisodiyot va moliya vazirligi qabul kvotasi boʻyicha asoslangan takliflarni budjet parametrlari asosida koʻrib chiqib har yili 1-avgustga qadar Oliy taʼlim, fan va innovatsiyalar vazirligi huzuridagi Innovatsion rivojlanish agentligiga Yagona elektron tizim orqali yuboriladi.

Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi tizimida ilmiy va taʼlim tashkilotlari boʻlgan vazirlik va idoralar bilan qatʼiy ravishda kelishgan holda har yili 20-avgustga qadar ilmiy va taʼlim tashkilotlari kesimida akkredetatsiyadan oʻtgan ixtisosliklar boʻyicha oliy taʼlimdan keyingi taʼlim institutlarining samaradorlik koʻrsatkichlariga asosan qabul kvotasini tasdiqlaydi.

Qabul kvotasi miqdorini ilmiy va taʼlim tashkilotlari kesimida taqsimlashda Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi va tizimida ilmiy va taʼlim tashkilotlari boʻlgan vazirlik va idoralar oʻrtasida kelishmovchilik yuzaga kelgan taqdirda tegishli vazirlik yoki idora tizimidagi ilmiy va taʼlim tashkilotlari uchun qabul kvotasi miqdorini belgilash Vazirlar Mahkamasining Ijtimoiy rivojlanish masalalari boʻlimining koʻrsatmasiga muvofiq amalga oshiriladi.

Ilmiy va taʼlim tashkilotlari vazirlik va idora tomonidan budjet mablagʻlari hisobidan ajratilgan kvotalardan tashqari ehtiyoj boʻlgan yoʻnalishlariga izlanuvchining toʻlov-kontrakt mablagʻlari hisobidan qoʻshimcha qabul kvotasini davlat akkreditatsiyasi shartlari asosida shakllantirishi mumkin. Toʻlov-kontrakt summasi ilmiy va taʼlim tashkilotlari tegishli boʻysunuvidagi vazirlik, idora va tashkilot tomonidan belgilanadi.

Ilmiy va taʼlim tashkilotlari akkreditatsiyadan oʻtgan ixtisosliklar boʻyicha oliy taʼlimdan keyingi taʼlim institutlarining samaradorlik koʻrsatkichlariga asosan taqsimlangan qabul kvotalaridan ortib qolgan oʻrinlar har yili 5-dekabrga qadar Oliy taʼlim, fan va innovatsiyalar vazirligi huzuridagi Innovatsion rivojlanish agentligiga maʼlumot kiritadi.

Oliy taʼlim, fan va innovatsiyalar vazirligi huzuridagi Innovatsion rivojlanish agentligi har yili 10-dekabrga qadar ortib qolgan qabul kvotalarini ilmiy va taʼlim tashkilotlarining ilmiy darajali kadrlarga boʻlgan ehtiyojlarini hisobga olib qaytadan taqsimlaydi.

Ilmiy va taʼlim tashkilotlariga qayta taqsimlangan kvotalar kirish imtihonlarida qatnashib, kirish balidan past ball toʻplagan talabgorlarning ballari ketma-ketligida amalga oshiriladi va bu haqidagi maʼlumotlar har yili 15-dekabrga qadar Oliy taʼlim, fan va innovatsiyalar vazirligi huzuridagi Innovatsion rivojlanish agentligiga taqdim etiladi.

15. Ilmiy tashkilot va taʼlim muassasalar har yili 1-sentabrdan kechikmasdan ommaviy axborot vositalarida qabul kvotalariga muvofiq hujjatlarni qabul qilish muddatlarini, talab qilinadigan hujjatlar, topshiriladigan imtihonlar roʻyxatini va qabul kvotasi miqdorini koʻrsatgan holda tayanch doktorantura va doktoranturada oʻqish uchun talabgorlarning hujjatlarini qabul qilish toʻgʻrisida eʼlon beradi.

Hujjatlar ilmiy tashkilot va taʼlim muassasalari qabul komissiyasi tomonidan 15-sentabrdan 15-oktabrgacha boʻlgan davrda Yagona elektron tizim yoki Yagona interaktiv davlat xizmatlari portali orqali qabul qilinadi.

151. Stajyor-tadqiqotchilikka kiruvchi shaxslar magistr darajasi yoki klinik ordinatura (tibbiyot fanlari uchun), yoki oliy maʼlumot (mutaxassislik dasturlari boʻyicha 1997-yilgacha) toʻgʻrisidagi diplomga ega boʻlishi lozim.

16. Tayanch doktoranturaga quyidagilarga ega boʻlganlar qabul qilinadi:

magistr darajasiga yoxud klinik ordinaturani tugatgan (tibbiyot fanlari uchun), oliy maʼlumot toʻgʻrisidagi diplom (mutaxassislik dasturlari boʻyicha) ega boʻlganlar;

falsafa doktori (PhD) ilmiy darajasini olish uchun dissertatsiya tadqiqoti asosini tashkil qilishi mumkin boʻlgan ilmiy natijalar, shu jumladan ilmiy jurnallarda chop etilgan kamida bitta maqola hamda tegishli yoʻnalishlar boʻyicha ikkitadan kam boʻlmagan ilmiy ishlar toʻplamlariga kiritilgan maʼruza tezislariga ega boʻlganlar.

17. Ilmiy tashkilot va taʼlim muassasalarda rektor (direktor) raisligida qabul komissiyasi tuziladi. Qabul komissiyasi aʼzolari rektor (direktor) tomonidan tegishli ixtisoslik boʻyicha yetakchi olimlar orasidan tayinlanadi.

Ixtisoslik boʻyicha imtihonlarni topshirishda qabul komissiyasi tarkibida kamida bitta fan doktori yoki professor boʻlishi zarur, komissiyaning qolgan aʼzolari fan nomzodlari yoki falsafa doktorlari (PhD) boʻlishi mumkin.

18. Stajyor-tadqiqotchilik va tayanch doktoranturada oʻqish uchun talabgorlar ilmiy tashkilot yoki taʼlim muassasalariga quyidagi hujjatlarni taqdim etadilar:

ariza;

qisqacha biografik maʼlumotnoma;

klinik ordinaturani tugatganlik (tibbiyot fanlari uchun) toʻgʻrisidagi diplom nusxasi;

nashr etilgan ilmiy ishlar roʻyxati, shuningdek ularning nusxalari.

Oʻzbekiston Respublikasi Prezidenti davlat stipendiyasi sohiblari tegishli hujjat nusxasini taqdim etadilar.

Talabgorlarning mehnat daftarchasining belgilangan tartibda tasdiqlangan nusxasi (ishlayotgan talabgorlar uchun) oliy taʼlim muassasasi bakalavri va magistraturasi diplom maʼlumotlari “Raqamli hukumat” tizimining idoralararo integratsiyalashuv platformasi orqali mustaqil ravishda olinadi.

19. Doktoranturaga quyidagilarga ega boʻlganlar qabul qilinadi:

fan nomzodi yoki falsafa doktori (PhD) yoxud ularga tenglashtirilgan xorijiy davlatlarda olingan ilmiy darajalar;

fan nomzodi yoki falsafa doktori (PhD) ilmiy darajasi yoxud ularga tenglashtirilgan boshqa ilmiy darajalar olgandan soʻng muhim ilmiy yutuqlarga erishish, shu jumladan, fan doktori (DSc) ilmiy darajasini olish uchun dissertatsiya tadqiqoti asosini tashkil qilishi mumkin boʻlgan ilmiy jurnallarda chop etilgan kamida uchta ilmiy maqolaga hamda ilmiy-amaliy konferensiyalar, seminarlar va tegishli ilmiy yoʻnalishlar boʻyicha ilmiy ishlar toʻplamlarida kamida ikkita tezisga ega boʻlish.

20. Doktoranturada oʻqishga talabgorlar ilmiy tashkilot yoki taʼlim muassasalariga quyidagi hujjatlarni taqdim etadilar:

ariza;

qisqacha biografik maʼlumotnoma;

fan nomzodi yoxud falsafa doktori (PhD) yoki xorijiy davlatlarda unga tenglashtirilgan ilmiy darajaga ega boʻlganligi toʻgʻrisidagi diplom nusxasi;

tadqiqot mavzusi boʻyicha ilmiy maʼruza va fan doktori (DSc) ilmiy darajasini olish uchun tayyorlangan doktorlik dissertatsiyasi rejasining mufassal loyihasi;

nashr etilgan ilmiy ishlar roʻyxati, shuningdek ularning nusxalari.

Talabgorlarning mehnat daftarchasining nusxasi (ishlayotgan talabgorlar uchun) va oliy maʼlumot toʻgʻrisidagi diplom maʼlumotlari “Raqamli hukumat” tizimining idoralararo integratsiyalashuv platformasi orqali mustaqil ravishda olinadi.

22. Tayanch doktoranturada oʻqish uchun talabgorlar mutaxassislik va chet tili (taʼlimning oldingi darajalarida oʻrganilgan xorijiy til) boʻyicha kirish imtihonlari topshiradilar. Talabgorlarda IELTS (oʻrtacha balli kamida 5,5), TOEFL (RVT) (567 balldan kam boʻlmagan), TOEFL (iBT) (87 balldan kam boʻlmagan), CEFR (V2 darajadan past boʻlmagan) boʻyicha tasdiqlovchi amaldagi xalqaro malaka sertifikatlari mavjud boʻlganda chet tilidan topshiriladigan imtihonlardan ozod etiladi.

Kirish imtihonlari savollari ilmiy tashkilot yoki taʼlim muassasasining qabul komissiyasi tomonidan mutaxassislikning mohiyatidan kelib chiqib tuziladi va Kollegial organ tomonidan tasdiqlanadi.

Stajyor-tadqiqotchilik va doktoranturada oʻqish uchun kirayotgan talabgorlar Kollegial organ tomonidan ixtisoslik boʻyicha suhbatdan oʻtadilar.

Barcha sohalar shu jumladan, fizika-matematika va texnika fanlari boʻyicha oliy taʼlimdan keyingi taʼlim institutlariga qabul qilishda tegishli fan yoʻnalishlarida milliy sertifikatga ega boʻlgan talabgor mutaxassislik fani boʻyicha imtihondan ozod etiladi va unga mutaxassislik fani uchun belgilangan maksimal ball beriladi.

23. Tayanch doktoranturaga kirish imtihonlari va doktoranturaga kirish uchun suhbat har yili 1 — 25-noyabr davrida oʻtkaziladi.

24. Stajyor-tadqiqotchilik, tayanch doktoranturaga va doktoranturaga kiruvchi talabgorlarning kirish imtihonlari, suhbat natijalaridan va ajratilgan qabul kvotasidan kelib chiqib, qabul komissiyasi va (yoki) Kollegial organ tomonidan 30-noyabrgacha boʻlgan muddatda qabul qilinganlardan tanlanadi.

Oʻzbekiston Respublikasi Prezidentining Davlat stipendiyalari sohiblari tayanch doktoranturaga kirish imtihonlarisiz qabul qilinadi.

Bir necha talabgorlarning stajyor-tadqiqotchilikka, tayanch doktoranturaga va doktoranturaga kirish imtihonlari yoki suhbat natijalari boʻyicha ular tomonidan toʻplangan yakuniy ballari teng boʻlgan taqdirda quyidagi talabgorlarga ustunlik beriladi:

a) stajyor-tadqiqotchilik va tayanch doktoranturaga:

magistraturani aʼlo baholar bilan tamomlaganlar;

mualliflik guvohnomalari va patentga ega boʻlganlar;

jurnallarda, shu jumladan xorijiy jurnallarda ilmiy maqolalar chop etganlar;

b) doktoranturaga:

5 yildan ortiq ilmiy-pedagogik stajga ega boʻlganlar;

mualliflik guvohnomalari va patentga ega boʻlganlar;

monografiya (ijtimoiy-gumanitar fanlar uchun), talabgorning dissertatsiya mavzusi boʻyicha tegishli ilmiy jurnallarda, shu jumladan xorijiy jurnallarda chop etilgan soni boʻyicha (boshqa talabgorlarga nisbatan) koʻp miqdorda ilmiy maqolaga ega boʻlganlar;

dissertatsiya tadqiqoti hajmining 50 foizdan koʻp qismini bajarganlar.

25. Qabul komissiyasi tayanch doktoranturada taʼlim oluvchilarning kirish imtihonlari natijalarini majlis protokoli bilan rasmiylashtiradi va besh kun muddatda Kollegial organga tasdiqlash uchun kiritadi. Stajyor-tadqiqotchilik va doktoranturada taʼlim oluvchi talabgorlar boʻyicha oʻtkazilgan suhbat natijalari ham Kollegial organ qarori bilan tasdiqlanadi.

Shu bilan birga, Kollegial organ qarorida tayanch doktorantura va doktoranturaga qabul qilinganlarning doktorlik dissertatsiyasi mavzulari tasdiqlanadi.

Qabul komissiyasi doktoranturaga kirish imtihonlari va suhbat jarayonlarini video kuzatuv ostida (onlayn translyatsiya) oʻtkazish choralarini koʻradi.

Tayanch doktoranturaga kirish imtihonlari boʻyicha topshiriladigan birinchi fan (mutaxassislik yoki chet tili) umumiy balining 50 foizidan kam ball toʻplagan talabgorlar keyingi bosqichga oʻtkazilmaydi.

26. Stajyor-tadqiqotchilik, tayanch doktorantura va doktoranturaga oʻqishga qabul qilish ilmiy tashkilot yoki taʼlim muassasasi rahbari buyrugʻi bilan har yili 5-dekabrgacha amalga oshiriladi. Bunda stajyor-tadqiqotchilik, tayanch doktorantura va doktoranturada taʼlim olish keyingi yilning 1-yanvaridan boshlanadi.

Oʻqishga qabul qilish toʻgʻrisidagi buyruqda ilmiy rahbarlar va ilmiy konsultantlar (konsultant boʻlgan taqdirda) ham belgilanadi.

27. Stajyor-tadqiqotchilik, tayanch doktorantura va (yoki) doktoranturada oʻqishga qabul qilinganlar, ularning tasdiqlangan mavzulari, ilmiy rahbarlari va ilmiy konsultantlari (konsultantlar tayinlangan holatlarda) toʻgʻrisidagi maʼlumot:

Ilmiy tashkilot yoki taʼlim muassasasi tomonidan — yuqori vazirlik, idora va tashkilotlarga har yili 10-dekabrgacha;

vazirlik, idora va tashkilotlar tomonidan — har yili 15-dekabrigacha Yagona elektron tizimga kiritiladi.

28. Stajyor-tadqiqotchi va doktorant ilmiy rahbar va konsultant (konsultant tayinlangan holatlarda) bilan birgalikda yakka tartibdagi rejasini ishlab chiqadi. Yakka tartibdagi reja stajyor-tadqiqotchilik, tayanch doktoranturaga yoki doktoranturaga oʻqishga qabul qilingandan keyin bir oyda Kollegial organ qarori bilan tasdiqlanadi va Yagona elektron tizimga yuklanadi.

29. Ilmiy rahbar doktorant uchun ixtisoslik boʻyicha nazariy-metodologik dastur ishlab chiqadi. Nazariy-metodologik dastur tayanch doktoranturaga oʻqishga qabul qilingandan boshlab bir oy muddat ichida Kollegial organ tomonidan tasdiqlanadi.

Nazariy-metodologik dastur metodologiyaning umumiy konsepsiyasi va masalalarini, mazkur ixtisoslik boʻyicha nazariy asoslarni va ilmiy tadqiqot usullarini oʻz ichiga oladi. Nazariy-metodologik dastur tayanch doktorant tomonidan oʻqishning birinchi yili mobaynida ilmiy rahbarning yordamida oʻzlashtiriladi.

30. Oʻqishga qabul qilingan sanadan boshlab:

stajyor-tadqiqotchilikda — tahsil oluvchi shaxslarga stajyor-tadqiqotchi lavozim maoshining bazaviy miqdoriga tenglashtirilgan miqdorda stipendiya toʻlanadi;

tayanch doktoranturada — tahsil oluvchi shaxslarga ilmiy darajaga yoki ilmiy unvonga ega boʻlmagan (2 yilgacha ilmiy faoliyat tajribasiga ega boʻlgan) kichik ilmiy xodim lavozim maoshining bazaviy miqdoriga tenglashtirilgan miqdorda stipendiya toʻlanadi;

doktoranturada tahsil oluvchi shaxslarga fan nomzodi yoki falsafa doktori (PhD) ilmiy darajasiga yoki xorijiy davlatlarning unga tenglashtirilgan boshqa ilmiy darajalariga yoki ilmiy unvonga ega boʻlgan yetakchi ilmiy xodim lavozim maoshining bazaviy miqdoriga tenglashtirilgan miqdorda stipendiya toʻlanadi.

31. Oʻzbekiston Respublikasi Iqtisodiyot va moliya vazirligi Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi tomonidan stajyor-tadqiqotchilik, tayanch doktorantura va doktoranturaga oʻqishga qabul qilish boʻyicha tasdiqlangan kvotalarini hisobga olgan holda tayyorlangan xarajatlar smetasiga muvofiq Oʻzbekiston Respublikasi Davlat budjeti xarajatlar parametrlarida belgilangan tartibda taʼlim muassasasi uchun — “Taʼlim” sohasi boʻyicha va ilmiy tashkilot uchun — “Fan” sohasi boʻyicha zarur mablagʻlar ajratishni nazarda tutadi.

Oliy harbiy taʼlim muassasalariga (keyingi oʻrinlarda “OHTM” deb yuritiladi) qabul qilingan tayanch doktorant va doktorantlarning moddiy taʼminoti harbiy xizmatchilar uchun qonunda belgilangan tartibda amalga oshiriladi.

32. Tegishli hujjatlar mavjud boʻlgan taqdirda, stajyor-tadqiqotchilik, tayanch doktorantura va doktoranturada oʻqish muddati Tibbiy-mehnat ekspert komissiyasi xulosasiga koʻra tegishli kasalliklar boʻyicha vaqtincha mehnatga layoqatsizlik davri uzluksiz 4 oy va undan ortiq vaqtda kasal boʻlish, homiladorlik va tugʻish taʼtilida boʻlish davriga, shuningdek harbiy yigʻinlarga chaqirilish munosabati bilan uzaytirilishi mumkin.

Stajyor-tadqiqotchi va izlanuvchilarni bir ilmiy yoki taʼlim tashkilotidan boshqasiga koʻchirishga yoʻl qoʻyilmaydi.

Qonunchilikda belgilangan tartibda tugatilgan ilmiy va taʼlim tashkilotlarida taʼlim olgan stajyor-tadqiqotchi va izlanuvchilar tugatilgan ilmiy va taʼlim tashkilotlarning huquqiy vorisi etib belgilangan ilmiy va taʼlim tashkilotlarga oʻqishni davom ettirishlari uchun oʻtkaziladi.

33. Falsafa doktori (PhD) ilmiy darajasiga izlanuvchilar doktorlik dissertatsiyalarini Oliy taʼlimdan keyingi taʼlimga qoʻyiladigan davlat taʼlim talablariga muvofiq malakaviy imtihonlarni topshirganlaridan keyin himoya qilishga qoʻyiladilar.

35. Taʼlim muassasasida ilmiy rahbarlar va konsultantlar tomonidan doktorant bilan olib borilgan ish umumiy oʻquv yuklamasiga kiritiladi va qonunchilikda belgilangan tartibda har bir stajyor-tadqiqotchi uchun 75 soat va doktorant uchun bir yilda 100 soat hajmida har oyda toʻlanadi.

OHTMda ilmiy rahbarlar va konsultantlarga ish haqi toʻlovi tizimida OHTM mavjud boʻlgan vazirlik va idoralar tomonidan belgilangan tartibda Oʻzbekiston Respublikasi Iqtisodiyot va moliya vazirligi bilan kelishgan holda amalga oshiriladi.

Ilmiy tashkilotda ilmiy rahbarlar va konsultantlarning doktorantlar bilan mehnatiga haq toʻlash har oyda oʻquv mashgʻulotlari oʻtkazganlik uchun mehnatga soatbay haq toʻlashning qonunchilikda belgilangan tartibida har bir stajyor-tadqiqotchi uchun 75 soat va doktorant uchun bir yilda 100 soat hisobida Oʻzbekiston Respublikasi Davlat budjetidan “Fan” sohasiga ajratilgan mablagʻlar hisobidan amalga oshiriladi.

Xorijiy fuqarolar yoki fuqaroligi boʻlmagan, shuningdek, toʻlov-kontrakt asosida qabul qilingan doktorantlarning ilmiy rahbarlari va konsultantlarning mehnatiga haq toʻlash oʻqitish uchun kelib tushadigan mablagʻlar hisobidan amalga oshiriladi.

36. Stajyor-tadqiqotchilik, tayanch doktorantura va doktoranturada oʻqish muddati doktorantlarning umumiy ish stajiga qoʻshiladi.

37. Oliy taʼlimdan keyingi taʼlimni tugatganlar tayanch doktorantura yoki doktoranturaga qayta qabul qilinmaydi.

4-bob. Oliy taʼlimdan keyingi taʼlimni mustaqil izlanuvchilik shaklida tashkil etish

38. Falsafa doktori (PhD) ilmiy darajasi uchun mustaqil izlanuvchilikka quyidagilar rasmiylashtiriladi:

magistr yoki klinik ordinatura (tibbiyot fanlari uchun) diplomi yoki oliy maʼlumot toʻgʻrisidagi (ixtisoslik boʻyicha) diplomga ega boʻlganlar;

belgilangan ilmiy maqolalariga ega boʻlganlar;

39. Fan doktori (DSc) ilmiy darajasi uchun mustaqil izlanuvchilikka fan nomzodi yoki falsafa doktori (PhD) yoki ularga tenglashtirilgan xorijiy mamlakatlarda olingan diplomga ega boʻlgan, belgilangan tartibda talablarga muvofiq ilmiy daraja olganidan soʻng salmoqli ilmiy yutuqlarga erishgan shaxslar rasmiylashtiriladi.

40. Ilmiy tashkilot va taʼlim muassasalari talabgorlarning mustaqil izlanuvchilikka hujjatlarini qabul qilish yil davomida amalga oshiriladi.

41. Mustaqil izlanuvchilikka talabgor quyidagi hujjatlarni ilova qilgan holda ariza bilan ilmiy tashkilot yoki taʼlim muassasasiga Yagona elektron tizim yoki Yagona interaktiv davlat xizmatlari portali orqali murojaat qiladi:

qisqacha biografik maʼlumotnoma;

falsafa doktori (PhD) ilmiy darajasini olish uchun mustaqil izlanuvchi sifatida rasmiylashtirish uchun magistrlik yoki klinik ordinatura (tibbiyot fanlari uchun) yoki oliy maʼlumot (mutaxassislik dasturi boʻyicha) toʻgʻrisidagi diplom nusxasi;

mehnat daftarchasining belgilangan tartibda tasdiqlangan nusxasi;

ilmiy ishlar roʻyxati va ularning nusxasi;

fan doktori (DSc) ilmiy darajasini olish uchun mustaqil izlanuvchi sifatida rasmiylashtirish uchun fan nomzodi yoki falsafa doktori (PhD) diplomi yoki xorijda olingan unga tenglashtirilgan boshqa ilmiy darajalar diplomi nusxasi;

ish joyidan tavsifnoma.

42. Tibbiyot fanlari boʻyicha mustaqil izlanuvchi sifatida rasmiylashtirishda ilmiy tashkilot yoki taʼlim muassasasining Kollegial organi qarori bilan talabgordan klinik ordinaturani (magistraturani) tugatgandan soʻng yoki ilmiy darajani olganidan soʻng ilmiy, ilmiy-pedagogik yoki amaliy ish stajiga (ikki yildan toʻrt yilgacha boʻlgan muddatda) ega boʻlishi talab etilishi mumkin.

43. Mustaqil izlanuvchilikka talabgorlarni tanlab olish har chorakning uchinchi oyigacha boʻlgan muddatda ixtisoslik boʻyicha suhbat natijalari va ilmiy tashkilot yoki taʼlim muassasasidagi qabul komissiyasining tegishli xulosasi boʻyicha amalga oshiriladi.

Mustaqil izlanuvchilikka talabgorlar bilan oʻtkazilgan suhbat natijalari Kollegial organ qarorlari bilan tasdiqlanadi. Shu bilan birga, Kollegial organ qarorida mustaqil izlanuvchilarning dissertatsiya mavzulari tasdiqlanadi va ilmiy rahbar yoki ilmiy konsultant mehnatiga haq toʻlash shartlari belgilanadi.

44. Talabgorlar ilmiy tashkilot yoki taʼlim muassasasi rahbarining har chorakda 5-mart, 5-iyun, 5-sentabr va 5-dekabrgacha eʼlon qilinadigan buyrugʻi bilan mustaqil izlanuvchilikka rasmiylashtiriladilar. Buyruqda, shuningdek, mustaqil izlanuvchilarning ilmiy rahbarlari va ilmiy konsultantlari (konsultant boʻlgan taqdirda) belgilanadi.

45. Mustaqil izlanuvchilikka qabul qilish toʻgʻrisidagi buyruq tegishli ilmiy tashkilot va taʼlim muassasa tomonidan buyruq qabul qilinganidan soʻng 5 kun davomida Yagona elektron tizimga kiritiladi.

46. Mustaqil izlanuvchilar rasmiylashtirilganlaridan soʻng bir oy muddatda ilmiy rahbar yoki konsultant (konsultant boʻlgan taqdirda) bilan kelishgan holda yakka tartibdagi rejalarini Kollegial organda koʻrib chiqish va tasdiqlash uchun taqdim etadilar.

Mustaqil izlanuvchining yakka tartibdagi rejasi tegishli ilmiy tashkilot yoki taʼlim muassasasi tomonidan Yagona elektron tizimga yuklanadi.

47. Amaldagi barcha talablarni bajargan va dissertatsiyasini OAK talablariga muvofiq ravishda rasmiylashtirgan mustaqil izlanuvchilar dissertatsiya himoyasiga qoʻyiladi.

48. Ilmiy tashkilot yoki taʼlim muassasasida ilmiy rahbarlar va konsultantlarning mustaqil izlanuvchilar bilan olib boradigan ishi uchun haq mehnatga soatbay haq toʻlash boʻyicha qonunchilikda belgilangan tartibda oʻquv mashgʻulotlari olib borilgani uchun har bir izlanuvchi hisobiga bir yilda 50 soat hisobidan har oyda toʻlanadi.

Taʼlim muassasasida ilmiy rahbar yoki konsultant muassasaning budjetdan tashqari mablagʻlari hisobdan oylik maosh olayotgan boʻlsa, mustaqil izlanuvchilar bilan ishlash uning umumiy oʻquv yuklamasi hajmiga kiritilishi mumkin.

Ilmiy rahbarlar va konsultantlarning xorijiy fuqarolar yoki fuqaroligi boʻlmagan mustaqil izlanuvchilar bilan mehnatiga haq toʻlash oʻqish boʻyicha tuzilgan shartnomalarga muvofiq amalga oshiriladi.

49. Bir necha ilmiy tashkilot yoki taʼlim muassasasida bir vaqtning oʻzida mustaqil izlanuvchilikka yoʻl qoʻyilmaydi.

5-bob. Oliy taʼlimdan keyingi taʼlimni toʻlov-kontrakt asosida tashkil etish

50. Xorijiy fuqarolarni va fuqaroligi boʻlmagan shaxslarni oliy taʼlimdan keyingi taʼlim institutlariga qabul qilish va oʻqitish qonunchilik va (yoki) Oʻzbekiston Respublikasining xalqaro shartnomalariga muvofiq oliy taʼlimdan keyingi taʼlimga qabul kvotalaridan tashqari toʻlov-kontrakt asosida amalga oshiriladi.

Oʻzbekiston Respublikasida investitsiya vizasiga ega boʻlgan xorijiy investorlar hamda ularning oila aʼzolari Oʻzbekiston Respublikasi fuqarolari uchun nazarda tutilgan shartlarda oliy taʼlimdan keyingi taʼlim institutlariga oʻqishga kirishga va taʼlim olishga haqlidir.

51. Toʻlov-kontrakt asosida oliy taʼlimdan keyingi taʼlimni amalga oshirishda oʻqitish uchun, jumladan ilmiy rahbarlar va konsultantlar mehnatiga haq toʻlash, tadqiqotlar va eksperimentlar oʻtkazish bilan bogʻliq xarajatlarni hisobga oladigan haq miqdori, shuningdek uni toʻlash tartibi qonunchilikda belgilangan tartibda manfaatdor tomonlar oʻrtasida tuziladigan shartnoma bilan belgilanadi.

6-bob. Izlanuvchilar faoliyati samaradorligining monitoringi

52. Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi, tizimda oliy taʼlimdan keyingi taʼlimni amalga oshiruvchi ilmiy tashkilotlar va taʼlim muassasalariga ega vazirliklar, idoralar va tashkilotlar bilan birgalikda izlanuvchilar faoliyatining samaradorligi boʻyicha har yili kamida 1-marta monitoring olib boradilar.

Joylarga chiqqan holda monitoringni olib borish uchun ishchi guruh tuziladi, uning tarkibi tizimida ilmiy tashkilot va taʼlim muassasalari mavjud boʻlgan tegishli vazirlik, idora va tashkilotlar xodimlari tarkibidan shakllantiriladi.

Oliy taʼlimdan keyingi taʼlim institutlari mavjud boʻlgan ilmiy va taʼlim tashkilotlari har yili 2-marta (iyun va dekabr oylarida) izlanuvchilar faoliyatini ichki monitoring qiladi. Ichki monitoring mazkur Nizomning 53 — 55-bandlariga muvofiq oʻtkaziladi.

53. Falsafa doktori (PhD) ilmiy darajasi uchun izlanuvchilar faoliyati samaradorligining monitoringi quyidagi mezonlar boʻyicha amalga oshiriladi:

a) oʻqishning birinchi yilida:

dissertatsiya mavzusi boʻyicha tasdiqlangan yakka tartibdagi rejaning mavjudligi va uning bajarilishi;

ixtisoslik boʻyicha tasdiqlangan nazariy-metodologik dasturning mavjudligi va uning bajarilishi;

tegishli jurnallarida dissertatsiya mavzusi boʻyicha kamida bitta ilmiy maqolaning chop etilganligi;

ilmiy konferensiyada dissertatsiya mavzusi boʻyicha maʼruza bilan ishtirok etganligi;

dissertatsiya mavzusi boʻyicha tahliliy umumlashtiruvchi qisqacha maʼlumotning mavjudligi;

ilmiy tashkilot yoki taʼlim muassasasi seminarida dissertatsiya mavzusiga doir tahliliy umumlashtiruvchi qisqacha maʼlumot natijalari boʻyicha (ilmiy rahbar bilan birgalikda) maʼruza qilganligi;

b) oʻqishning ikkinchi yilida:

tegishli jurnallarida dissertatsiya mavzusi boʻyicha hisobot davrida chop etilgan kamida bitta ilmiy maqolaning mavjudligi;

dissertatsiya mavzusi boʻyicha hisobot davrida ilmiy konferensiya materiallarida kamida bitta chop etilgan maʼruza tezisining mavjudligi;

tegishli xorijiy jurnalda dissertatsiya mavzusi boʻyicha kamida bitta chop etilgan ilmiy maqola mavjudligi;

ilmiy tashkilot yoki taʼlim muassasasi ilmiy-tashkiliy boʻlinmasi (kafedra, laboratoriya, boʻlim, sektor) ilmiy seminarida dissertatsiya ishining dastlabki natijalari boʻyicha (mustaqil) maʼruza bilan ishtirok etish;

dissertatsiya mavzusi boʻyicha yakka tartibdagi rejasining bajarilishi boʻyicha hisobot berish;

v) oʻqishning uchinchi yilida:

jurnallarda, shu jumladan xorijiy jurnallarda soni belgilangan talablarga muvofiq chop etilgan ilmiy maqolalari mavjudligi;

OAK talablariga muvofiq tayyorlangan tugallangan dissertatsiya ishi, avtoreferatining mavjudligi;

ilmiy tashkilot yoki taʼlim muassasasi ilmiy-tashkiliy boʻlinmalari majlislarida dissertatsiya va avtoreferatining koʻrib chiqilganligi va muhokama qilinganligi.

54. Fan doktori (DSc) ilmiy darajasi uchun izlanuvchilar faoliyatining samaradorligi monitoringi quyidagi mezonlar boʻyicha amalga oshiriladi:

a) oʻqishning birinchi yilida:

dissertatsiya mavzusi boʻyicha yakka tartibdagi rejaning mavjudligi va uning bajarilishi;

dissertatsiyaning birinchi va ikkinchi boblari tayyorligi;

dissertatsiya mavzusi boʻyicha tegishli jurnallarda kamida uchta ilmiy maqola chop etilganligi;

dissertatsiya mavzusi boʻyicha respublika va xalqaro ilmiy konferensiyalar materiallarida kamida bitta maʼruza tezisi chop etilganligi;

dissertatsiya mavzusi boʻyicha ilmiy konferensiya yoki seminarda maʼruza qilish;

dissertatsiya mavzusi boʻyicha tahliliy sharh;

dissertatsiya mavzusi boʻyicha tahliliy sharh natijalari boʻyicha seminarda soʻzga chiqish;

b) oʻqishning ikkinchi yilida:

dissertatsiyaning uchinchi va toʻrtinchi boblari tayyorligi;

tegishli jurnallarda dissertatsiya mavzusi boʻyicha hisobot davrida chop etilgan kamida toʻrtta ilmiy maqola eʼlon qilinganligi (jumladan bittasi xorijda);

dissertatsiya mavzusi boʻyicha xalqaro va respublika ilmiy konferensiyalar materiallarida chop etilgan kamida bitta maʼruza tezisining mavjudligi;

dissertatsiya ishining dastlabki natijalari boʻyicha seminar oʻtkazish;

konferensiya yoki seminarda maʼruza bilan qatnashish (kamida bir marta);

dissertatsiya mavzusi boʻyicha yakka tartibdagi rejaning bajarilishi toʻgʻrisidagi hisobot;

v) oʻqishning uchinchi yilida:

tegishli jurnallarda dissertatsiya mavzusi boʻyicha hisobot davrida chop etilgan kamida uchta ilmiy maqola eʼlon qilinganligi;

dissertatsiya natijalari boʻyicha (ijtimoiy-gumanitar fanlar boʻyicha) chop etilgan monografiyaning mavjudligi;

OAK talablariga muvofiq tayyorlangan tugallangan dissertatsiya ishi va avtoreferatning mavjudligi;

dissertatsiya yoki avtoreferatni ilmiy tashkilot yoki taʼlim muassasasi ilmiy-tashkiliy boʻlinmalarida koʻrib chiqilganligi va muhokama etilganligi.

55. Monitoring natijalari Kollegial organ tomonidan koʻrib chiqiladi va tasdiqlanadi.

Quyidagi asoslarga koʻra doktorantlar tayanch doktorantura yoki doktoranturadan chetlatilishi mumkin:

oʻz arizasiga muvofiq;

salomatligi tufayli (tibbiy komissiya maʼlumotnomasi asosida);

yakka tartibdagi rejalarini bajarmaganda;

ilmiy yoki taʼlim tashkilotining ichki tartib-qoidalarini tizimli (uch yoki undan ortiq) ravishda buzganda;

sudning hukmi bilan ozodlikdan mahrum qilinganda;

hisobotlarni belgilangan muddatda taqdim etmaganda;

dissertatsiyani tayyorlash va himoya qilish talabini buzganda.

Yakka tartibdagi rejalarini bajarmagan doktorantlar Kollegial organ qarori bilan tayanch doktorantura yoki doktoranturadan chetlatiladi va oʻqishga qayta tiklanmaydi.

Doktoranturadan monitoring natijalari boʻyicha chetlatilgan yoki dissertatsiyasini muddatida himoya qilmagan shaxslar dissertatsiyasini tugatish va himoya qilish davrida mustaqil izlanuvchi sifatida rasmiylashtirilishi mumkin. Ilmiy yoki taʼlim tashkilotining ichki tartib-qoidalarini buzgani uchun oʻqishdan chetlatilgan shaxslar oʻqishga qayta tiklanmaydi.

Yakka tartibdagi rejalarini bajarmagan doktorantlar va mustaqil izlanuvchilarning ilmiy rahbarlari va konsultantlariga Kollegial organ qarori bilan rahbarlik va maslahat uchun toʻlanadigan haq toʻxtatiladi. Bunda doktorantlar va mustaqil izlanuvchilarning rahbarlari hamda konsultantlari bir yil muddatga ilmiy rahbarlik qilishdan chetlashtiriladi.

56. Muntazam ravishda (qatorasiga ikki marta va undan koʻp) izlanuvchilarning dissertatsiyalarini oʻz vaqtida himoya qilishni taʼminlamagan ilmiy rahbarlar va konsultantlar Kollegial organ qarori bilan uch yilgacha boʻlgan davrga ilmiy rahbarlik yoki konsultantlikdan chetlatilishi mumkin.

57. Kollegial organ tavsiyasi boʻyicha izlanuvchilarning yakka tartibdagi rejalariga oʻzgartirishlar kiritilishi mumkin.

Ilmiy rahbarlar va ilmiy konsultantlar faoliyatining samaradorligini nazorat qilish Kollegial organ tomonidan amalga oshiriladi.

Monitoring natijalariga koʻra tegishli ixtisoslik boʻyicha dissertatsiyalarni belgilangan muddatlarda himoya qilmagan izlanuvchilar (ketma-ket uch nafar va undan ortiq) aniqlangan taqdirda, ushbu ixtisoslik boʻyicha oliy taʼlimdan keyingi taʼlim institutining faoliyati Oliy taʼlim, fan va innovatsiyalar vazirligining qaroriga muvofiq har yili mart oyida toʻxtatiladi.

Bunda oliy taʼlimdan keyingi taʼlim institutining faoliyati uch yil oʻtgandan soʻng mazkur Nizomning 2-bobiga muvofiq qayta tiklanishi mumkin.

7-bob. Oliy taʼlimdan keyingi taʼlim toʻgʻrisidagi hujjatlar

58. Qonunchilikda nazarda tutilgan oliy taʼlimdan keyingi taʼlim talablarini bajargan va belgilangan tartibda dissertatsiya himoya qilgan shaxslarga oʻrnatilgan tartibda davlat namunasidagi tegishli falsafa doktori (PhD) va fan doktori (DSc) diplomi beriladi.

Oliy oʻquv yurtidan keyingi taʼlim toʻgʻrisidagi nizomga ILOVA

Tegishli ixtisosliklar boʻyicha tadqiqotlar olib borayotgan fan nomzodlari, falsafa doktorlari (PhD) va fan doktorlari toʻgʻrisida

MAʼLUMOTLAR

F.I.O. Tugʻilgan yili Ixtisoslik shifri va nomi, dissertatsiya mavzuyi Ilmiy darajasi, ilmiy unvoni Ish joyi va lavozimi Keyingi 5 yilda ixtisoslik boʻyicha asosiy ilmiy ishlari (monografiya, maqolalar) roʻyxati Rahbar (imzo) (F.I.O.) M.Oʻ. Sana “____” ________ ____yil

Vazirlar Mahkamasining 2017-yil 22-maydagi 304-son qaroriga 3-ILOVA

(3-ilova Oʻzbekiston Respublikasi Vazirlar Mahkamasining 2025-yil 6-avgustdagi 498-sonli qarori tahririda — Qonunchilik maʼlumotlari milliy bazasi, 06.08.2025-y., 09/25/498/0698-son. Kuchga kirish sanasi — 2025-yil 7-noyabr)

Vazirlar Mahkamasining 2017-yil 22-maydagi 304-son qaroriga 4-ILOVA

(4-ilova Oʻzbekiston Respublikasi Vazirlar Mahkamasining 2025-yil 6-avgustdagi 498-sonli qarori tahririda — Qonunchilik maʼlumotlari milliy bazasi, 06.08.2025-y., 09/25/498/0698-son. Kuchga kirish sanasi — 2025-yil 7-noyabr)

Vazirlar Mahkamasining 2017-yil 22-maydagi 304-son qaroriga 5-ILOVA

(5-ilova Oʻzbekiston Respublikasi Vazirlar Mahkamasining 2025-yil 6-avgustdagi 498-sonli qarori tahririda — Qonunchilik maʼlumotlari milliy bazasi, 06.08.2025-y., 09/25/498/0698-son. Kuchga kirish sanasi — 2025-yil 7-noyabr)

Vazirlar Mahkamasining 2017-yil 22-maydagi 304-son qaroriga 6-ILOVA

(6-ilova Oʻzbekiston Respublikasi Vazirlar Mahkamasining 2025-yil 6-avgustdagi 498-sonli qarori tahririda — Qonunchilik maʼlumotlari milliy bazasi, 06.08.2025-y., 09/25/498/0698-son. Kuchga kirish sanasi — 2025-yil 7-noyabr)

Vazirlar Mahkamasining 2017-yil 22-maydagi 304-son qaroriga 7-ILOVA

(7-ilova Oʻzbekiston Respublikasi Vazirlar Mahkamasining 2025-yil 6-avgustdagi 498-sonli qarori tahririda — Qonunchilik maʼlumotlari milliy bazasi, 06.08.2025-y., 09/25/498/0698-son. Kuchga kirish sanasi — 2025-yil 7-noyabr)

Vazirlar Mahkamasining 2017-yil 22-maydagi 304-son qaroriga 8-ILOVA

Vazirlar Mahkamasining “Oliy oʻquv yurtidan keyingi taʼlim hamda oliy malakali ilmiy va ilmiy-pedagog kadrlarni attestatsiyadan oʻtkazish tizimini takomillashtirish chora-tadbirlari toʻgʻrisida” 2012-yil 28-dekabrdagi 365-son qaroriga kiritilayotgan

OʻZGARTIRISHLAR

1. 1-bandning ikkinchi, uchinchi va oltinchi xatboshilari, shuningdek 1, 2 va 5-ilovalar oʻz kuchini yoʻqotgan deb hisoblansin.

2. 4-ilovada:

a) 6-bandda:

toʻrtinchi xatboshidagi “doktorlik dissertatsiyasi ishlariga hamda fan doktori ilmiy darajasi” soʻzlari “dissertatsiya ishlariga hamda falsafa doktori (Doctor of Philosophy, bundan buyon — PhD), fan doktori (Doctor of Sciences, bundan buyon — DSc) ilmiy darajalari” soʻzlari bilan almashtirilsin;

toʻqqizinchi xatboshidagi “fan doktori ilmiy darajasi” soʻzlari “falsafa doktori (PhD), fan doktori (DSc) ilmiy darajalari” soʻzlari bilan almashtirilsin;

b) 7-bandda:

ikkinchi xatboshidagi “ilmiy tashkilotlari” soʻzlari “oliy taʼlim va ilmiy-tadqiqot muassasalari” soʻzlari bilan almashtirilsin;

uchinchi xatboshi quyidagi tahrirda bayon etilsin:

“falsafa doktori (PhD) va fan doktori (DSc) ilmiy darajalarini olish uchun dissertatsiya tadqiqotlari mavzulari monitoringini olib boradi, shuningdek ularni roʻyxatdan oʻtkazadi”;

toʻrtinchi xatboshidagi “katta ilmiy xodimlar-izlanuvchilar va mustaqil izlanuvchi” soʻzlari “tayanch doktorantura va doktorantura hamda mustaqil izlanuvchi” soʻzlari bilan almashtirilsin;

beshinchi xatboshidagi “fan doktori ilmiy unvonini” soʻzlari “ilmiy darajalarni” soʻzlari bilan almashtirilsin;

oltinchi, yettinchi xatboshidagi “fan doktori ilmiy darajasini” soʻzlari “ilmiy darajalarni” soʻzlari bilan almashtirilsin;

sakkizinchi xatboshidagi “doktorlik dissertatsiyalarining” soʻzlari “falsafa doktori (PhD) va fan doktori (DSc) ilmiy darajalarini olish uchun dissertatsiyalarning”” soʻzlari bilan almashtirilsin;

oʻninchi, oʻn birinchi xatboshidagi “fan doktori ilmiy darajasini” soʻzlari “falsafa doktori (PhD) va fan doktori (DSc) ilmiy darajalarini” soʻzlari bilan almashtirilsin;

oʻn ikkinchi xatboshidagi “fan doktori” soʻzlari “ilmiy daraja” soʻzlari bilan almashtirilsin;

oʻn uchinchi xatboshidagi “fan doktori” soʻzlari “falsafa doktori (PhD) va fan doktori (DSc)” soʻzlari bilan almashtirilsin;

oʻn beshinchi xatboshidagi “doktorlik dissertatsiyasi” soʻzlari “dissertatsiya” soʻzlari bilan almashtirilsin;

v) 8-bandda:

toʻrtinchi xatboshidagi “fan doktori” soʻzlari “falsafa doktori (PhD) va fan doktori (DSc)” soʻzlari bilan almashtirilsin;

beshinchi, oltinchi, sakkizinchi, oʻn birinchi xatboshlardagi “fan doktori ilmiy darajasini berish boʻyicha” soʻzlari “ilmiy darajalar beruvchi” soʻzlari bilan almashtirilsin;

g) 14-bandda toʻrtinchi xatboshidagi “ilmiy daraja” soʻzlari “ilmiy darajalar” soʻzlari bilan almashtirilsin;

d) 15-bandda:

beshinchi xatboshidagi “fan doktori ilmiy darajasi berish boʻyicha ilmiy kengashlar” soʻzlari “ilmiy darajalar beruvchi ilmiy kengashlar” soʻzlari bilan almashtirilsin;

yettinchi xatboshidagi “ilmiy daraja” soʻzlari “ilmiy darajalar” soʻzlari bilan almashtirilsin;

sakkizinchi xatboshidagi “fan doktori ilmiy darajasi berish boʻyicha” soʻzlari “ilmiy darajalar beruvchi” soʻzlari bilan almashtirilsin;

toʻqqizinchi xatboshidagi “doktorlik dissertatsiyalari” soʻzlari “dissertatsiyalar” soʻzlari bilan almashtirilsin;

e) 16-bandning birinchi va sakkizinchi xatboshilaridagi “doktorlik dissertatsiyalarining” soʻzlari “dissertatsiyalarning” soʻzi bilan almashtirilsin;

j) 17-banddagi “fan doktori ilmiy darajasini berish boʻyicha” soʻzlari “ilmiy darajalar beruvchi” soʻzlari bilan almashtirilsin;

z) 26-bandning birinchi xatboshi quyidagi tahrirda bayon etilsin:

“26. Taqdim etilgan dissertatsiyalarni, ularning ilmiy va amaliy ahamiyatini ilmiy ekspertizadan oʻtkazish, ilmiy darajalar beruvchi ilmiy kengashlar ishini va attestatsiya oʻtkazishda talablarning yagonaligi taʼminlanishini nazorat qilish, ilmiy darajalar va ilmiy unvonlar berish toʻgʻrisidagi taqdimnomalarni koʻrib chiqish, shuningdek OAK Rayosatiga tavsiyalar tayyorlash uchun fan, texnika, taʼlim va madaniyat sohalaridagi yetakchi olimlar va mutaxassislardan fan yoʻnalishlari boʻyicha ekspert kengashlari tashkil etiladi.”;

i) 28-banddagi “fan doktori ilmiy darajasi” soʻzlari “ilmiy darajalar” soʻzlari bilan almashtirilsin;

k) 29-bandning ikkinchi xatboshidagi “fan doktori ilmiy darajasi” soʻzlari “ilmiy darajalar” soʻzlari bilan almashtirilsin;

l) 30-banddagi “Fan doktori ilmiy darajasini” soʻzlari “ilmiy darajalar” soʻzlari bilan almashtirilsin.