Ilmiy-tadqiqot faoliyatini tashkil etish, boshqarish va moliyalashtirishni takomillashtirish chora-tadbirlarini amalga oshirish toʻgʻrisida (302-son)

19.05.2017

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Fanlar akademiyasi faoliyati, ilmiy-tadqiqot ishlarini tashkil etish, boshqarish va moliyalashtirishni yanada takomillashtirish chora-tadbirlari toʻgʻrisida” 2017-yil 17-fevraldagi PQ-2789-son qarorini bajarish yuzasidan Vazirlar Mahkamasi qaror qiladi:

1. Quyidagilar:

Fan va texnologiyalar boʻyicha Davlat komissiyasi toʻgʻrisidagi nizom 1-ilovaga muvofiq;

Oʻzbekiston Respublikasi Fan va texnologiyalar agentligi toʻgʻrisidagi nizom 2-ilovaga muvofiq;

Fan va texnologiyalar boʻyicha Davlat komissiyasi huzuridagi Ilmiy-texnik faoliyatni qoʻllab-quvvatlash va rivojlantirish jamgʻarmasi toʻgʻrisidagi nizom 3-ilovaga muvofiq tasdiqlansin.

2. Fan va texnologiyalar boʻyicha Davlat komissiyasi huzuridagi Ilmiy-texnik faoliyatni qoʻllab-quvvatlash va rivojlantirish jamgʻarmasining (keyingi oʻrinlarda Jamgʻarma deb ataladi) Ijro etuvchi direksiyasi tashkil etilsin.

3. Fan va texnologiyalar boʻyicha Davlat komissiyasi huzuridagi Ilmiy-texnik faoliyatni qoʻllab-quvvatlash va rivojlantirish jamgʻarmasi Ijro etuvchi direksiyasining tuzilmasi 4-ilovaga muvofiq tasdiqlansin.

4. Belgilab qoʻyilsinki:

Oʻzbekiston Respublikasi Fan va texnologiyalar agentligi (keyingi oʻrinlarda Agentlik deb ataladi) Oʻzbekiston Respublikasi Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasining majburiyatlari va shartnomalari, shu jumladan xalqaro shartnomalari boʻyicha huquqiy vorisi hisoblanadi;

Jamgʻarma Ijro etuvchi direksiyasini saqlab turish Fan va texnologiyalar boʻyicha Davlat komissiyasi tomonidan tasdiqlanadigan xarajatlar smetasi asosida Jamgʻarma mablagʻlari hisobiga amalga oshiriladi;

Jamgʻarmaning Ijro etuvchi direktori Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimdan ozod etiladi.

5. Agentlik Oʻzbekiston Respublikasi Moliya vazirligi, Iqtisodiyot vazirligi, Oliy va oʻrta maxsus taʼlim vazirligi hamda Fanlar akademiyasi bilan birgalikda:

ilmiy-texnik loyihalarni rejalashtirish, moliyalashtirish va xarajatlarni hisobga olish tartibi toʻgʻrisidagi nizomni bir oy muddatda ishlab chiqsin va tasdiqlasin;

ilgʻor xorijiy tajribani oʻrganish asosida fundamental, amaliy tadqiqotlar va innovatsion ishlar davlat ilmiy-texnik dasturlari doirasida grantlar boʻyicha amalga oshiriladigan ilmiy-texnik loyihalarning natijadorligini baholash metodikasini va indikatorlarini uch oy muddatda ishlab chiqsin va tasdiqlasin.

6. Oʻzbekiston Respublikasi Moliya vazirligi:

har yili Oʻzbekiston Respublikasi Davlat budjetini shakllantirishda Agentlikni saqlab turishga zarur mablagʻlarni nazarda tutsin;

Oʻzbekiston Respublikasi Fan va texnologiyalar agentligiga 3 ta avtotransport vositasiga, shu jumladan 2 ta biriktirilgan va 1 ta xizmat avtotransport vositasiga limit ajratsin.

7. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi Agentlik bilan birgalikda Agentlikni va Jamgʻarmaning Ijro etuvchi direksiyasini joylashtirish yuzasidan bir oy muddatda Oʻzbekiston Respublikasi Vazirlar Mahkamasiga takliflar kiritsin.

8. Agentlik manfaatdor vazirliklar va idoralar bilan birgalikda ular tomonidan qabul qilingan normativ-huquqiy hujjatlarni bir oy muddatda ushbu qarorga muvofiqlashtirsin.

9. Oʻzbekiston Respublikasi Hukumatining 5-ilovaga muvofiq ayrim qarorlariga oʻzgartirishlar kiritilsin.

10. Mazkur qarorning bajarilishini nazorat qilish Oʻzbekiston Respublikasi Fan va texnologiyalar agentligining bosh direktori M.R. Boltaboyev zimmasiga hamda Oʻzbekiston Respublikasi Vazirlar Mahkamasining Taʼlim va ilm-fan masalalari axborot-tahlil departamentiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 19-may,

302-son

Vazirlar Mahkamasining 2017-yil 19-maydagi 302-son qaroriga 1-ILOVA

Fan va texnologiyalar boʻyicha Davlat komissiyasi toʻgʻrisida

NIZOM

1-bob. Umumiy qoidalar

1. Ushbu Nizom Fan va texnologiyalar boʻyicha Davlat komissiyasining (keyingi oʻrinlarda Davlat komissiyasi deb ataladi) faoliyatini tashkil etishni, vazifalari, funksiyalari va huquqlarini belgilaydi.

2. Davlat komissiyasi Oʻzbekiston Respublikasi Vazirlar Mahkamasi huzuridagi kollegial organ hisoblanadi.

3. Davlat komissiyasi oʻz faoliyatini Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga va boshqa qonun hujjatlariga muvofiq amalga oshiradi.

4. Davlat komissiyasining oʻz vakolatlari doirasida qabul qilingan qarorlari davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar tomonidan bajarilishi majburiy hisoblanadi.

2-bob. Davlat komissiyasining asosiy vazifalari

5. Quyidagilar Davlat komissiyasining asosiy vazifalari hisoblanadi:

ilmiy-texnik faoliyat sohasida yagona davlat siyosatini ishlab chiqish va amalga oshirish;

davlat ilmiy-texnika siyosati va innovatsion siyosatining ustuvor yoʻnalishlarini va ushbu sohalarda davlat siyosatini amalga oshirishga yoʻnaltirilgan chora-tadbirlarni belgilash;

fundamental, amaliy va innovatsion tadqiqotlarning grant asosidagi davlat ilmiy-texnika dasturlarini tasdiqlash;

bajarilayotgan loyihalar va ularni joriy etish tadbirlarining amalga oshirilishi yuzasidan davlat organlari rahbarlari va mansabdor shaxslarning hisobotlarini eshitish va shaxsiy javobgarligi masalalarini koʻrib chiqish.

3-bob. Davlat komissiyasining funksiyalari

6. Davlat komissiyasi oʻziga yuklangan vazifalarni bajarish uchun quyidagi funksiyalarni amalga oshiradi:

a) ilmiy-texnik faoliyat sohasida yagona davlat siyosatini ishlab chiqish va amalga oshirish borasida:

mamlakatni ijtimoiy-iqtisodiy rivojlantirish dasturlarini amalga oshirishga yoʻnaltirilgan yagona davlat ilmiy-texnika siyosatini amalga oshiradi;

jamiyat va davlatning taraqqiyotini taʼminlaydigan ilmiy tadqiqotlar va ilgʻor texnologiyalarning ustuvor va istiqbolli yoʻnalishlarini rivojlantirish strategiyasini belgilaydi;

ilmiy-texnik salohiyatni oqilona joylashtirishga va undan samarali foydalanishga, davlatning iqtisodiyoti rivojlanishiga fan va texnologiyalar ulushini koʻpaytirishga yoʻnaltirilgan fanni yanada rivojlantirish sohasidagi davlat dasturlari amalga oshirilishini taʼminlaydi;

fanning yutuqlaridan keng foydalanish uchun iqtisodiy va huquqiy shart-sharoitlarni shakllantiradi, mamlakat iqtisodiyoti uchun muhim ilmiy-texnik yangiliklarni ommalashtirish va joriy etishga koʻmaklashadi;

mamlakat rivojlanishining innovatsion yoʻlini taʼminlash, mahalliy ilmiy tadqiqotlar natijalarining raqobatbardoshligini oshirish, ulardan iqtisodiyotni rivojlantirish manfaatlari yoʻlida foydalanishni jadallashtirish tadbirlarini tasdiqlaydi;

b) davlat ilmiy-texnika va innovatsion siyosatning ustuvor yoʻnalishlarini va ushbu sohalarda davlat siyosatini amalga oshirishga yoʻnaltirilgan chora-tadbirlarni belgilash borasida:

Oʻzbekiston Respublikasi fani va texnologiyalarini rivojlantirishning ustuvor yoʻnalishlarini tasdiqlaydi;

ilmiy-tadqiqot va tajriba-konstruktorlik ishlarini amalga oshirishga davlat topshiriqlarini tasdiqlaydi;

fan va texnologiyalar rivojlanishining jahon tendensiyalarini hisobga olgan holda jadal rivojlanish sohalarida ilmiy tadqiqotlar va eksperimental ishlanmalarni qoʻllab-quvvatlash chora-tadbirlarini amalga oshiradi;

fan sohasidagi qoʻshma loyihalarni amalga oshirishda akademik va tarmoq fani hamda oliy taʼlim muassasalarining saʼy-harakatlarini muvofiqlashtirish maqsadida akademik va tarmoq fanining oliy taʼlim muassasalari bilan integratsiyasi va oʻzaro hamkorligini taʼminlash masalalari boʻyicha tadbirlarni tasdiqlaydi;

v) fundamental, amaliy va innovatsion tadqiqotlarning grant asosidagi davlat ilmiy-texnika dasturlarini tasdiqlash borasida;

fundamental, amaliy va innovatsion tadqiqotlarning davlat ilmiy-texnika dasturlarini shakllantirish jarayoniga rahbarlik qiladi;

fundamental, amaliy va innovatsion tadqiqotlarning grant asosidagi davlat ilmiy-texnika dasturlarini, ularni Oʻzbekiston Respublikasi Davlat budjeti mablagʻlari hisobiga moliyalashtirishning tegishli hajmlarini tasdiqlaydi;

buyurtmachilar — vazirliklar, idoralar, va boshqa tashkilotlar bilan birgalikda moliyalashtiriladigan amaliy va innovatsion tadqiqotlarning maqsadli davlat ilmiy-texnika dasturlarini tasdiqlaydi;

Jamgʻarmaning daromadlari va xarajatlarining prognoz parametrlarini, Jamgʻarmaga mablagʻlar tushishi va ulardan foydalanilishi toʻgʻrisidagi hisobotlarni tasdiqlaydi, shuningdek, zarurat boʻlganda, ularga tegishli oʻzgartirish va qoʻshimchalar kiritadi;

g) bajarilayotgan loyihalar va ularni joriy etish tadbirlarining amalga oshirilishi yuzasidan davlat organlari rahbarlari va mansabdor shaxslarning hisobotlarini eshitish va shaxsiy javobgarligi masalalarini koʻrib chiqish borasida:

davlat organlari rahbarlari va mansabdor shaxslarining, maqsadli davlat ilmiy-texnika dasturlari rahbarlarining tasdiqlangan tadbirlar bajarilishi toʻgʻrisidagi hisobotlarini eshitadi;

zarurat boʻlganda, tegishli davlat ilmiy-texnika dasturlariga oʻzgartirish va qoʻshimchalar kiritadi;

davlat organlarining rahbarlari, mansabdor shaxslarining, shuningdek yetakchi olimlarning fan, taʼlim, ishlab chiqarish integratsiyasi jarayonlarini yanada rivojlantirish va oʻzaro foydali tarmoqlararo ilmiy hamkorlik qilish masalalari boʻyicha tavsiyalari va takliflarini eshitadi.

4-bob. Davlat komissiyasining huquqlari

7. Davlat komissiyasi oʻziga yuklangan vazifalarni bajarish uchun quyidagi huquqlarga ega:

Oʻzbekiston Respublikasi Fan va texnologiyalar agentligi, Iqtisodiyot vazirligi, Oliy va oʻrta maxsus taʼlim vazirligi, Fanlar akademiyasi, idoraviy mansub ilmiy-tadqiqot va oliy taʼlim muassasalariga ega boʻlgan boshqa vazirliklar va idoralar rahbarlarining hisobotlarini eshitish;

Davlat komissiyasi aʼzolari, davlat va xoʻjalik boshqaruvi organlari, mahalliy davlat hokimiyati organlari mansabdor shaxslarining Davlat komissiyasiga yuklangan vazifalar bajarilishi yuzasidan shaxsiy hisobotlarini eshitish;

oʻz vakolatiga kiradigan masalalar boʻyicha zarur materiallar va hujjatlarni davlat va xoʻjalik boshqaruvi organlaridan, mahalliy davlat hokimiyati organlaridan belgilangan tartibda soʻrash va olish;

davlat ilmiy texnika va innovatsion siyosatini shakllantirish va amalga oshirish masalalari boʻyicha Oʻzbekiston Respublikasi Prezidentiga takliflar kiritish;

ilmiy va ilmiy-texnik siyosat masalalarini oʻrganish va ular boʻyicha takliflarni ishlab chiqish uchun ishchi guruhlar tashkil etish;

Oʻzbekiston Respublikasi Intellektual mulk agentligi, ilmiy tashkilotlar va oliy taʼlim muassasalarining davlat ilmiy-texnika dasturlari doirasida yaratilgan intellektual mulkka boʻlgan huquqlarni (patentlarni) chet elda roʻyxatdan oʻtkazish masalalari boʻyicha ishini nazorat qilish;

yetakchi elektron ilmiy maʼlumotlar bazasidan respublikaning ilmiy-tadqiqot va oliy taʼlim muassasalari erkin foydalanishini taʼminlash uchun ularning roʻyxatini tasdiqlash;

yosh olimlarni yetakchi xorijiy ilmiy tashkilotlarga qisqa muddatli ilmiy tajriba orttirishga yuborish, shu jumladan ilmiy laboratoriyalarni jihozlash uchun xarid qilinadigan yuqori texnologik asbob-uskunalarda ishlash metodikasini oʻzlashtirish uchun yuborish uchun ularni tanlov orqali tanlash tartibini belgilash;

Davlat komissiyasi tomonidan qabul qilinadigan qarorlar izchil amalga oshirilishini nazorat qilish.

5-bob. Davlat komissiyasi ishini tashkil etish

8. Davlat komissiyasiga rais boshchilik qiladi, uning vakolatiga quyidagilar kiradi:

Davlat komissiyasining samarali ishlashini taʼminlash;

yuklangan vazifalar bajarilishi boʻyicha Davlat komissiyasi aʼzolarining ishini muvofiqlashtirish;

Davlat komissiyasi ishi reglamentini tasdiqlash;

Davlat komissiyasi majlislari kun tartibini belgilash va ularni chaqirish;

Davlat komissiyasi tomonidan qabul qilingan qarorlar bajarilishi nazorat qilinishini tashkil etish.

Davlat komissiyasi raisi qonun hujjatlariga muvofiq boshqa vakolatlarni ham amalga oshiradi.

9. Oʻzbekiston Respublikasi Fan va texnologiyalar agentligi Davlat komissiyasining ishchi organi (keyingi oʻrinlarda ishchi organ deb ataladi) hisoblanadi.

10. Ishchi organ:

Davlat komissiyasi majlislariga zarur materiallar oʻz vaqtida tayyorlanishini tashkil etadi;

Davlat komissiyasi qarorlari bajarilishini nazorat qilishni va ular monitoringi olib borilishini tashkil etadi va ularning natijalarini koʻrib chiqish uchun Davlat komissiyasiga taqdim etadi;

Davlat komissiyasi bayonnomalarini rasmiylashtiradi va Davlat komissiyasi aʼzolariga tegishli qismi yuzasidan tasdiqlangan bayonnomalarni tegishli davlat va xoʻjalik boshqaruvi organlariga, mahalliy davlat hokimiyati organlariga va boshqa tashkilotlarga yuboradi;

oʻziga yuklangan vazifalarni bajarish uchun zarur boʻlgan axborot va materiallarni davlat va xoʻjalik boshqaruvi organlaridan, mahalliy davlat hokimiyati organlaridan belgilangan tartibda oladi;

Davlat komissiyasida ish yuritilishini taʼminlaydi;

Davlat komissiyasining qarorlariga muvofiq boshqa funksiyalarni amalga oshiradi.

11.Davlat komissiyasi oʻz faoliyatini doimiy asosda amalga oshiradi va oʻz majlislarini zaruriyatga koʻra, biroq yil choragida kamida bir marta oʻtkazadi.

Davlat komissiyasi majlisini rais, u boʻlmaganda — Davlat komissiyasi raisining oʻrinbosari olib boradi.

12. Davlat komissiyasi yigʻilishlarining kun tartibi ishchi organ tomonidan tuziladi va Oʻzbekiston Respublikasi Vazirlar Mahkamasiga yuboriladi.

13. Davlat komissiyasi navbatdagi yigʻilishining kun tartibi va materiallari ishchi organ tomonidan yigʻilish boshlanishidan kamida 3 kalendar kun oldin boʻlajak yigʻilish toʻgʻrisidagi bildirishnoma bilan birgalikda Davlat komissiyasi aʼzolariga yuboriladi.

14. Davlat komissiyasining qarorlari uning aʼzolarining oddiy koʻpchilik ovozi bilan qabul qilinadi. Ovozlar teng boʻlganda raisning ovozi hal qiluvchi ovoz hisoblanadi.

15. Istisno hollarda qarorlarni tezkor qabul qilish maqsadida rais ayrim masalalar boʻyicha Davlat komissiyasining qarorlarini soʻrov yoʻli bilan tasdiqlashga haqlidir.

16. Davlat komissiyasining qarorlari bayonnoma bilan rasmiylashtiriladi va rais tomonidan tasdiqlanadi. Davlat komissiyasi aʼzolari bayonnomani imzolashda oʻzlarining alohida fikrini bildirishga haqlidir.

Davlat komissiyasi bayonnomasining asl nusxasi va unga materiallar ishchi organda saqlanadi.

6-bob. Yakunlovchi qoida

17. Davlat komissiyasi Oʻzbekiston Respublikasi Prezidentining uning faoliyatini toʻxtatish toʻgʻrisidagi tegishli qarori qabul qilinguniga qadar oʻz faoliyatini amalga oshiradi.

Vazirlar Mahkamasining 2017-yil 19-maydagi 302-son qaroriga 2-ILOVA

Oʻzbekiston Respublikasi Fan va texnologiyalar agentligi toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Prezidentining “Fanlar akademiyasi faoliyati, ilmiy-tadqiqot ishlarini tashkil etish, boshqarish va moliyalashtirishni yanada takomillashtirish chora-tadbirlari toʻgʻrisida” 2017-yil 17-fevraldagi PQ-2789-son qaroriga muvofiq Oʻzbekiston Respublikasi Fan va texnologiyalar agentligining (keyingi oʻrinlarda Agentlik deb ataladi) vazifalari, funksiyalari, vakolatlari va faoliyatining tashkiliy asoslarini belgilaydi.

2. Agentlik ilmiy-texnik faoliyat sohasida yagona davlat siyosati amalga oshirilishini taʼminlaydigan davlat boshqaruvi organi hisoblanadi va oʻz faoliyatida Fan va texnologiyalar boʻyicha Davlat komissiyasiga (keyingi oʻrinlarda Davlat komissiyasi deb ataladi) hisobot beradi.

3. Agentlik oʻz faoliyatini Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga va boshqa qonun hujjatlariga muvofiq amalga oshiradi.

4. Agentlik oʻz faoliyatini boshqa davlat va xoʻjalik boshqaruvi organlari, mahalliy davlat hokimiyati organlari, nodavlat notijorat tashkilotlar va boshqa tashkilotlar bilan oʻzaro hamkorlikda amalga oshiradi, shuningdek fan va texnologiyalar sohasida xalqaro va mintaqaviy tashkilotlarda Oʻzbekiston Respublikasini ifodalaydi.

5. Agentlik yuridik shaxs hisoblanadi, mustaqil balansga, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan dumaloq muhrga, boshqa zarur muhrlar va shtamplarga, Oʻzbekiston Respublikasi Moliya vazirligining Gʻaznachiligida gʻazna shaxsiy hisob raqamlariga egadir.

6. Agentlik:

respublikaning ilmiy-tadqiqot, taʼlim tashkilotlari va boshqa tashkilotlari tomonidan amalga oshiriladigan davlat ilmiy-texnik dasturlari va loyihalarining yagona buyurtmachisi;

Davlat komissiyasining ishchi organi hisoblanadi.

2-bob. Agentlikning asosiy vazifalari va funksiyalari

7. Quyidagilar Agentlikning asosiy vazifalari hisoblanadi:

mamlakatni sotsial-iqtisodiy, ijtimoiy-siyosiy rivojlantirish vazifalarini va zamonaviy ilm-fan yutuqlarini inobatga olgan holda fan va texnologiyalarni rivojlantirishning ustuvor yoʻnalishlarini belgilash va amalga oshirish tadbirlarini amalga oshirish;

davlat ilmiy-texnika dasturlarini shakllantirish, amalga oshirish va ular ijrosining hamda mamlakatni ijtimoiy-iqtisodiy rivojlantirishda ilmiy-tadqiqot ishlari natijalaridan foydalanishning tizimli monitoringini olib borish;

muhim tarmoqlararo ilmiy-texnik dasturlar ijrosini taʼminlash;

iqtisodiyot tarmoqlari va ijtimoiy soha uchun fundamental, amaliy va innovatsion tadqiqotlarni bajarishi boʻyicha ilmiy-texnik xizmatlar koʻrsatishda davlat topshiriqlarini shakllantirish;

har yilgi Respublika innovatsion gʻoyalar, texnologiyalar va loyihalar yarmarkasi oʻtkazilishini tashkil etish hamda uning doirasida imzolangan shartnomalarning bajarilishi boʻyicha monitoring olib borish;

fan va texnologiyalar sohasida xalqaro hamkorlikni rivojlantirish, xorijiy investitsiyalar va grantlarni jalb etish, xorijiy hamkorlar bilan qoʻshma ilmiy loyihalar va innovatsion ishlanmalar bajarilishini tashkil etish;

oliy malakali ilmiy va ilmiy-pedagog kadrlar tayyorlash faoliyatini rejalashtirish va muvofiqlashtirish.

8. Agentlik yuklangan vazifalarni bajarish uchun quyidagi funksiyalarni amalga oshiradi:

a) mamlakatni sotsial-iqtisodiy, ijtimoiy-siyosiy rivojlantirish vazifalarini va zamonaviy ilm-fan yutuqlarini inobatga olgan holda fan va texnologiyalarni rivojlantirishning ustuvor yoʻnalishlarini belgilash va amalga oshirish tadbirlarini amalga oshirish borasida:

mamlakatni ijtimoiy-iqtisodiy, ijtimoiy-siyosiy rivojlantirish vazifalarini va zamonaviy fan yutuqlarini hisobga olgan holda fan va texnologiyalarni rivojlantirishning ustuvor yoʻnalishlari boʻyicha takliflar ishlab chiqadi;

jamiyat va davlatning taraqqiyotini taʼminlaydigan ilmiy tadqiqotlar va ilgʻor texnologiyalarning ustuvor va istiqbolli yoʻnalishlarini rivojlantirish strategiyasini aniqlash boʻyicha Davlat komissiyasiga takliflar kiritadi;

ilmiy tadqiqotlar va ilmiy-innovatsion faoliyatni moliyalashtirish mexanizmlari samaradorligini oshirish boʻyicha takliflar ishlab chiqadi;

ilmiy-texnik salohiyatni oqilona joylashtirishga va undan samarali foydalanishga, fan va texnologiyalarning davlat iqtisodiyotini rivojlantirishga ulushini koʻpaytirishga yoʻnaltirilgan fanni yanada rivojlantirish sohasida Davlat komissiyasi tomonidan tasdiqlangan dasturlar amalga oshirilishini taʼminlaydi;

ilmiy-texnik, innovatsion faoliyat va intellektual mulk obyektlarini himoya qilish sohasida normativ-huquqiy hujjatlar ishlab chiqilishida qatnashadi;

b) davlat ilmiy-texnika dasturlarini shakllantirish, amalga oshirish va ular ijrosining hamda mamlakatni ijtimoiy-iqtisodiy rivojlantirishda ilmiy-tadqiqot ishlari natijalaridan foydalanishning tizimli monitoringini olib borish borasida:

ilmiy-tadqiqot va tajriba-konstruktorlik ishlarini amalga oshirishga Davlat komissiyasi tomonidan tasdiqlangan davlat topshiriqlari asosida fundamental amaliy va innovatsion tadqiqotlarning davlat ilmiy-texnik dasturlari loyihalarini shakllantiradi;

fundamental, amaliy tadqiqotlar va innovatsion ishlarning davlat ilmiy-texnik dasturlari doirasida ilmiy-texnik loyihalarni amalga oshirishga ilmiy-tadqiqot, taʼlim muassasalari va respublikaning boshqa muassasalari bilan shartnomalar tuzadi;

davlat ilmiy-texnika dasturlari amalga oshirilishining tizimli monitoringini olib boradi;

davlat ilmiy-texnik dasturlari monitoringi natijalarini tahlil qilish asosida Davlat komissiyasiga boʻshab qolgan mablagʻlarni eng natijali va dolzarb ilmiy-texnik loyihalarga qayta yoʻnaltirilgan holda samarasiz, dolzarbligini yoʻqotgan ilmiy-texnik loyihalarning davlat ilmiy-texnika dasturlaridan chiqarish boʻyicha takliflar kiritadi;

intellektual mulk obyektlari va ilmiy ishlanmalar natijalaridan foydalanish va ularni tijoratlashtirish mexanizmlari samaradorligini oshirish boʻyicha takliflar ishlab chiqadi;

v) muhim tarmoqlararo ilmiy-texnik dasturlar ijrosini taʼminlash borasida:

ilmiy-texnik faoliyat sohasida Oʻzbekiston Respublikasi Fanlar akademiyasi, davlat va xoʻjalik boshqaruvi organlari va boshqa tashkilotlar faoliyatini muvofiqlashtiradi;

fan sohasidagi qoʻshma loyihalarni amalga oshirish maqsadida akademik va tarmoq fanining oliy taʼlim muassasalari bilan integratsiyasi va oʻzaro hamkorligini taʼminlash masalalari boʻyicha tadbirlarni amalga oshiradi;

texnologiyalar transferi uchun fan, taʼlim va ishlab chiqarish sektorining integratsiyasiga koʻmaklashuvchi kompleks chora-tadbirlarni amalga oshiradi;

g) iqtisodiyot tarmoqlari va ijtimoiy soha uchun fundamental, amaliy va innovatsion tadqiqotlarni bajarishi boʻyicha ilmiy-texnik xizmatlar koʻrsatishda davlat topshiriqlarini shakllantirish borasida:

davlat va xoʻjalik boshqaruvi organlari, mahalliy davlat hokimiyati organlari, boshqa tashkilotlarning takliflari asosida ilmiy-tadqiqot, konstruktorlik-texnologik va innovatsion ishlanmalarga Davlat buyurtmasi loyihasini shakllantiradi;

davlat va xoʻjalik boshqaruvi organlari, mahalliy davlat hokimiyati organlari, boshqa tashkilotlarning takliflarini tahlil qilish va ekspertizadan oʻtkazishni tashkil etish uchun idoralararo ilmiy-texnik kengashlar tashkil etadi;

iqtisodiyot tarmoqlari va ijtimoiy soha uchun fundamental, amaliy va innovatsion tadqiqotlarni bajarish yuzasidan ilmiy-texnik xizmatlar koʻrsatishga davlat topshiriqlarini tasdiqlash boʻyicha Davlat komissiyasiga asoslangan takliflar kiritadi;

d) har yilgi Respublika innovatsion gʻoyalar, texnologiyalar va loyihalar yarmarkasi oʻtkazilishini tashkil etish hamda uning doirasida imzolangan shartnomalarning bajarilishi boʻyicha monitoring olib borish borasida:

Fanlar akademiyasi, idoraviy mansub oliy taʼlim muassasalari va ilmiy-tadqiqot muassasalariga, ilmiy va innovatsion markazlarga ega boʻlgan vazirliklar va idoralarning, alohida olimlar va ixtirochilarning Respublika innovatsion gʻoyalar, texnologiyalar va loyihalar yarmarkasida ishtirok etish uchun takliflarini tanlaydi;

Respublika innovatsion gʻoyalar, texnologiyalar va loyihalar yarmarkasida ishtirok etish uchun tavsiya etilgan innovatsion ishlanmalar va loyihalarning mintaqaviy va tarmoq taqdimotlarini tashkil etadi;

har yilgi Respublika innovatsion gʻoyalar, texnologiyalar va loyihalar yarmarkalarini tashkil etish va oʻtkazish tadbirlarini amalga oshiradi;

davlat ilmiy-texnik dasturlari natijalarini joriy etish, shuningdek ularning transferi va tijoratlashuvi tadbirlarini amalga oshiradi;

Respublika innovatsion gʻoyalar, texnologiyalar va loyihalar yarmarkalari doirasida tuzilgan shartnomalar bajarilishining tizimli monitoringini olib boradi;

Respublika innovatsion gʻoyalar, texnologiyalar va loyihalar yarmarkalari doirasida tuzilgan shartnomalar bajarilishi monitoringi yakunlari toʻgʻrisidagi axborotni, shuningdek mahalliy ilmiy ishlanmalar natijalarining raqobatbardoshligini oshirish va ulardan iqtisodiyotni rivojlantirish manfaatlari yoʻlida foydalanishni jadallashtirish boʻyicha takliflarni Davlat komissiyasiga kiritadi;

e) fan va texnologiyalar sohasida xalqaro hamkorlikni rivojlantirish, xorijiy investitsiyalar va grantlarni jalb etish, xorijiy hamkorlar bilan qoʻshma ilmiy loyihalar va innovatsion ishlanmalar bajarilishini tashkil etish borasida:

qoʻshma ilmiy tadqiqotlar olib borishga xorijiy investitsiyalar va grantlarni jalb etish maqsadida xorijiy mamlakatlar, xalqaro va xorijiy tashkilotlar, ilmiy jamgʻarmalar vakillari bilan muzokaralar olib boradi;

xorijiy hamkorlar bilan qoʻshma ilmiy-texnik loyihalarni va innovatsion ishlarni bajarish uchun xalqaro ilmiy-texnik hamkorlik qilish masalalari boʻyicha belgilangan tartibda shartnomalar tuzadi;

j) oliy malakali ilmiy va ilmiy-pedagog kadrlar tayyorlash faoliyatini rejalashtirish va muvofiqlashtirish borasida:

oliy malakali ilmiy va ilmiy-pedagog kadrlar tayyorlash boʻyicha respublikaning oliy taʼlim va ilmiy-tadqiqot muassasalari faoliyatini muvofiqlashtiradi;

oliy taʼlimdan keyingi taʼlim institutlariga oʻqishga qabul qilishning har yilgi rejasini tuzadi va tasdiqlaydi;

oliy malakali ilmiy va ilmiy-pedagog kadrlar tayyorlash sohasida oliy taʼlim va ilmiy-tadqiqot muassasalari faoliyati samaradorligini oshirish yuzasidan monitoring olib boradi va tadbirlarni amalga oshiradi.

3-bob. Agentlikning huquqlari va javobgarligi

9. Agentlik unga yuklangan vazifalar va funksiyalarni bajarish uchun quyidagi huquqlarga ega:

koʻrib chiqiladigan masalalarni tahlil qilish va qayta ishlash, Davlat komissiyasi qarorlari loyihalarini tayyorlash uchun zarur boʻlgan materiallar va maʼlumotlarni davlat va xoʻjalik boshqaruvi organlaridan, mahalliy davlat hokimiyati organlaridan, boshqa organlar va tashkilotlardan soʻrash va olish;

ilmiy-texnik loyihalarni tashkil etish va ularni ekspertizadan oʻtkazish uchun fan va texnologiyalarni rivojlantirishning muhim yoʻnalishlari boʻyicha yetakchi olimlardan va Fanlar akademiyasi, davlat va xoʻjalik boshqaruvi organlari va boshqa tashkilotlarning yuqori malakali mutaxassislaridan iborat idoralararo ilmiy-texnik kengashlar, shuningdek ekspert guruhlari tashkil etish;

xorijiy davlatlar, xalqaro va xorijiy tashkilotlarning vakillari bilan muzokaralar olib borish, xalqaro ilmiy-texnik hamkorlik masalalari boʻyicha belgilangan tartibda shartnomalar tuzish;

oʻz vakolatlari doirasida davlat va xoʻjalik boshqaruvi organlari, mahalliy davlat hokimiyati organlari, ilmiy-tadqiqot va oliy taʼlim muassasalari hamda boshqa tashkilotlar uchun majburiy boʻlgan qarorlar qabul qilish.

Agentlik qonun hujjatlariga muvofiq boshqa huquqlarga ham ega boʻlishi mumkin.

10. Agentlik unga yuklangan vazifalar va funksiyalar samarali bajarilishi uchun javob beradi.

4-bob. Agentlik faoliyatini tashkil etish

11. Agentlikka Oʻzbekiston Respublikasi Vazirlar Mahkamasining taqdimnomasi boʻyicha Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan bosh direktor boshchilik qiladi.

Bosh direktor Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod etiladigan bir nafar birinchi oʻrinbosar va oʻrinbosarga ega boʻladi.

Bosh direktor moddiy, maishiy, transport va tibbiy xizmat koʻrsatish shartlari boʻyicha vazirning birinchi oʻrinbosariga, bosh direktorning oʻrinbosari esa — vazirning oʻrinbosariga tenglashtiriladi.

12. Bosh direktor:

Agentlik faoliyatiga umumiy rahbarlik qiladi va Agentlikka yuklangan vazifalar va funksiyalar bajarilishi uchun shaxsan javob beradi;

Agentlikning shtat jadvalini va xarajatlar smetasini tasdiqlaydi, umumiy belgilangan xodimlar doirasida Agentlik tuzilmasiga oʻzgartirishlar kiritadi;

Agentlikning tarkibiy boʻlinmalari toʻgʻrisidagi nizomni, shuningdek Agentlik xodimlarining lavozim majburiyatlarini tasdiqlaydi;

Agentlik xodimlarini belgilangan tartibda lavozimga tayinlaydi va lavozimdan ozod etadi;

oʻz vakolatlari doirasida Agentlikning xodimlari ijro etishi majburiy boʻlgan buyruqlar va farmoyishlar chiqaradi, koʻrsatmalar beradi.

Bosh direktor qonun hujjatlariga muvofiq boshqa vakolatlarni ham amalga oshirishi mumkin.

13. Quyidagilar Agentlik faoliyatini moliyalashtirishning asosiy manbalari hisoblanadi:

Oʻzbekiston Respublikasi Davlat budjeti mablagʻlari;

qonun hujjatlarida belgilangan tartibda shakllantiriladigan budjetdan tashqari mablagʻlar, shuningdek qonun hujjatlarida taqiqlanmagan boshqa manbalar.

5-bob. Yakunlovchi qoida

14. Agentlikni qayta tashkil etish va tugatish qonun hujjatlarida belgilangan tartibda amalga oshiriladi.

Vazirlar Mahkamasining 2017-yil 19-maydagi 302-son qaroriga 3-ILOVA

Fan va texnologiyalar boʻyicha Davlat komissiyasi huzuridagi Ilmiy-texnik faoliyatni qoʻllab-quvvatlash va rivojlantirish jamgʻarmasi toʻgʻrisida

NIZOM

1-bob. Umumiy qoidalar

1. Ushbu Nizom Fan va texnologiyalar boʻyicha Davlat komissiyasi huzuridagi Ilmiy-texnik faoliyatni qoʻllab-quvvatlash va rivojlantirish jamgʻarmasining (keyingi oʻrinlarda Jamgʻarma deb ataladi) mablagʻlarini shakllantirish, boshqarish va foydalanish tartibini belgilaydi.

2. Jamgʻarma davlat ilmiy-tadqiqot va oliy taʼlim muassasalarining ilmiy-texnik faoliyatini qoʻllab-quvvatlashga hamda rivojlantirishga yoʻnaltirilgan mablagʻlarni jamlaydi.

3. Jamgʻarma yuridik shaxs hisoblanadi, mustaqil balansga, Oʻzbekiston Respublikasi Moliya vazirligining Gʻaznachiligida gʻazna hisob raqamlariga, Oʻzbekiston Respublikasi tijorat banklarida talab qilib olinadigan xorijiy valyutadagi depozit hisob raqamlariga (gʻaznachilik ijrosi bilan qamrab olingandan soʻng — Oʻzbekiston Respublikasi Moliya vazirligining Gʻaznachiligida xorijiy valyutadagi hisob raqamlariga), shuningdek Oʻzbekiston Respublikasi Davlat gerbi tasviri tushirilgan va oʻz nomi Davlat tilida yozilgan muhrga ega.

2-bob. Jamgʻarma mablagʻlaridan foydalanishning asosiy yoʻnalishlari

4. Jamgʻarma mablagʻlaridan foydalanishning asosiy yoʻnalishlari quyidagilardan iborat:

Oʻzbekiston Respublikasi Fanlar akademiyasi, Oliy va oʻrta maxsus taʼlim vazirligi, Sogʻliqni saqlash vazirligi, Qishloq va suv xoʻjaligi vazirligi hamda boshqa vazirliklar va idoralarning ilmiy-tadqiqot va oliy taʼlim muassasalarida mamlakatda ilm-fan va texnologiyalarning jadal rivojlanishini taʼminlashga, raqobatbardosh ilmiy-hajmdor mahalliy mahsulotlar ishlab chiqarishni oʻzlashtirishga yoʻnaltirilgan ilgʻor ilmiy tadqiqotlar va izlanish ishlarini olib borish uchun tanlov asosidagi, mutlaqo yangi tipdagi va zamonaviy yuqori texnologik asbob-uskunalar bilan jihozlangan ilmiy laboratoriyalar tashkil etish boʻyicha tadbirlarni moliyalashtirish;

davlat ilmiy-texnika dasturlari doirasida yaratilgan intellektual mulk obyektlarini chet elda roʻyxatdan oʻtkazish (patentlash) xarajatlarini qoplash;

davlat ilmiy-texnika dasturlarini amalga oshirishda ishtirok etuvchi ilmiy-tadqiqot va oliy taʼlim muassasalarining ilmiy laboratoriyalari uchun qoʻshimcha zamonaviy ilmiy asbob-uskunalar, zarur sarflash materiallari va butlovchi qismlar bilan uzluksiz taʼminlash uchun mablagʻlar ajratish;

Oʻzbekiston Respublikasi Fanlar akademiyasi, Oliy va oʻrta maxsus taʼlim vazirligi, Sogʻliqni saqlash vazirligi, Qishloq va suv xoʻjaligi vazirligi hamda boshqa vazirliklar va idoralar tasarrufidagi ilmiy-tadqiqot va oliy taʼlim muassasalarining yetakchi ilmiy elektron maʼlumotlar bazasidan erkin foydalanishlari uchun talab etiladigan xarajatlarni qoplash;

yosh olimlarning yetakchi xorijiy ilmiy markazlarda, shu jumladan ilmiy laboratoriyalarni jihozlash uchun sotib olinadigan zamonaviy ilmiy va texnologik asbob-uskunalarda ishlashni oʻrganishlari uchun tashkil etiladigan qisqa muddatli ilmiy tajriba stajirovkalarini moliyalashtirish.

5. Mazkur Nizomning 4-bandida koʻrsatilmagan ilmiy-tadqiqot hamda oliy taʼlim muassasalarining ilmiy-texnik faoliyatini qoʻllab-quvvatlash va rivojlantirish boʻyicha chora-tadbirlarning Jamgʻarma tomonidan moliyalashtirilishi Fan va texnologiyalar boʻyicha Davlat komissiyasining qarori asosida amalga oshiriladi.

3-bob. Jamgʻarma mablagʻlarini shakllantirish tartibi va manbalari

6. Jamgʻarma mablagʻlari quyidagi asosiy manbalar hisobiga shakllantiriladi:

Oʻzbekiston Respublikasi Intellektual mulk agentligiga patent bojlari, yigʻimlar va boshqa soliq toifasiga kirmaydigan toʻlovlardan kelib tushgan valyuta mablagʻlarining 90 foizi;

xalqaro moliya tashkilotlari va institutlarining grantlari va kreditlari;

yuridik va jismoniy shaxslarning, shu jumladan xorijiy shaxslarning xayriya ehsonlari;

qonun hujjatlarida taqiqlanmagan boshqa tushumlar.

7. Mazkur Nizomning 6-bandida koʻrsatilgan Oʻzbekiston Respublikasi Intellektual mulk agentligining valyuta mablagʻlari Jamgʻarmaning hisob raqamiga har oyda hisobot oyidan keyingi oyning 10-kunigacha Oʻzbekiston Respublikasi Intellektual mulk agentligi tomonidan oʻtkaziladi (valyutaning har bir turi boʻyicha alohida).

Xalqaro moliya tashkilotlari va institutlarining grantlari hamda kreditlari, yuridik va jismoniy shaxslarning xayriya ehsonlari, shuningdek qonun hujjatlarida taqiqlanmagan boshqa tushumlar tegishli hisob raqamlarga, shu jumladan Jamgʻarmaning gʻazna hisob raqamlariga tushadi.

4-bob. Jamgʻarmani boshqarish

8. Fan va texnologiyalar boʻyicha Davlat komissiyasi Jamgʻarmani boshqarishning yuqori organi hisoblanadi.

9. Fan va texnologiyalar boʻyicha Davlat komissiyasi:

har yili Jamgʻarmaning daromadlari va xarajatlari prognozi parametrlarini, shuningdek Jamgʻarmaga tushgan va sarflangan mablagʻlar boʻyicha hisobotni tasdiqlaydi;

Jamgʻarma mablagʻlari hisobidan moliyalashtiriladigan ilmiy tadqiqotlarning tasdiqlangan ustuvor yoʻnalishlariga muvofiq ilmiy laboratoriyalarni barpo qilish boʻyicha loyihalar tanlovlarini oʻtkazish tartibini belgilaydi;

Oʻzbekiston Respublikasi Fan va texnologiyalar agentligining (keyingi oʻrinlarda Agentlik deb ataladi) takliflari asosida davlat ilmiy-texnika dasturlari doirasida yaratilgan intellektual mulk obyektlarini chet elda roʻyxatdan oʻtkazish (patentlash) roʻyxatini tasdiqlaydi;

davlat ilmiy-texnika dasturlarini amalga oshirishda ishtirok etuvchi ilmiy muassasalar va oliy taʼlim muassasalarining ilmiy laboratoriyalarini qoʻshimcha jihozlash, zamonaviy ilmiy asbob-uskunalar bilan yangilash, zarur sarflanuvchi materiallar va butlovchi qismlar bilan uzluksiz taʼminlash tartibini belgilaydi;

yetakchi xorijiy ilmiy elektron maʼlumotlar bazasidan erkin foydalanish uchun talab etiladigan xarajatlarni Jamgʻarma mablagʻlari hisobidan qoplashni nazarda tutgan holda Agentlik takliflari asosida ushbu maʼlumotlar bazasi roʻyxatini tasdiqlaydi;

qisqa muddatli ilmiy tajriba orttirishdan oʻtish, shu jumladan ilmiy laboratoriyalarni jihozlash uchun sotib olinadigan zamonaviy ilmiy va texnologik asbob-uskunalarda ishlashni oʻrganish maqsadida yosh olimlarni yetakchi xorijiy ilmiy tashkilotlarga yuborish uchun tanlovlar oʻtkazish tartibini belgilaydi;

Jamgʻarmaning Ijro etuvchi direksiyasining shtat jadvalini va uni saqlab turish xarajatlari smetasini tasdiqlaydi;

Jamgʻarmaga xorijiy investitsiyalar, grantlar hamda homiylik xayriyalarini jalb qilishda koʻmaklashadi;

Jamgʻarma oldiga qoʻyilgan vazifalar bilan bogʻliq masalalarni hal etishga manfaatdor vazirliklar, idoralar, nodavlat notijorat tashkilotlarni jalb qiladi;

Jamgʻarma daromadlarini toʻliq shakllantirish hamda mablagʻlaridan maqsadli foydalanish yuzasidan Agentlik va Jamgʻarma faoliyati ustidan nazorat qiladi;

Jamgʻarma mablagʻlarini shakllantirish hamda ulardan foydalanish bilan bogʻliq boshqa vakolatlarni amalga oshiradi.

10. Jamgʻarmaning Ijro etuvchi direksiyasi Jamgʻarmaning ijro etuvchi organi hisoblanadi va u joriy rahbarlikni amalga oshiradi va Jamgʻarma faoliyati uchun javob beradi.

Jamgʻarmaning Ijro etuvchi direktori Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimdan ozod etiladi.

11. Jamgʻarmaning Ijro etuvchi direktori:

Jamgʻarmaning joriy faoliyatini tashkil etadi hamda oʻziga yuklangan vazifalarni bajarish uchun javob beradi;

Jamgʻarmaga xodimlarni ishga qabul qiladi va lavozimlaridan ozod qiladi;

davlat va xoʻjalik boshqaruvi organlarida, boshqa tashkilotlarda, shu jumladan xorijiy davlatlarda hamda xalqaro tashkilotlarda Jamgʻarma nomidan vakillik qiladi va uning manfaatlarini ifodalaydi;

Jamgʻarma faoliyati boʻyicha yuridik va jismoniy shaxslar bilan shartnoma tuzadi, Jamgʻarma nomidan ishonchnomasiz ish koʻradi;

shtat jadvalini, Jamgʻarma mablagʻlari hisobidan Jamgʻarma apparati xodimlarini saqlab turish xarajatlari smetasini tuzadi va tasdiqlash uchun Davlat komissiyasiga taqdim qiladi;

Jamgʻarmaning lavozim yoʻriqnomalari va boshqa ichki hujjatlarini tasdiqlaydi;

Jamgʻarma nomidan daʼvolar taqdim etadi;

Jamgʻarma xodimlari bajarishi majburiy boʻlgan buyruq va farmoyishlar chiqaradi, koʻrsatmalar beradi;

ushbu Nizomga va qonun hujjatlariga muvofiq boshqa masalalar boʻyicha qarorlar qabul qiladi.

12. Jamgʻarma Ijro etuvchi direksiyasini saqlab turish qonun hujjatlarida belgilangan tartibda Davlat komissiyasi tomonidan tasdiqlanadigan xarajatlar smetasi asosida Jamgʻarma mablagʻlari hisobidan amalga oshiriladi.

Jamgʻarma Ijro etuvchi direksiyasi xodimlariga davlat boshqaruvi organlari xodimlari uchun belgilangan mehnatga haq toʻlash va ragʻbatlantirish shartlari tatbiq etiladi.

13. Jamgʻarma Ijro etuvchi direksiyasining asosiy funksiyalari quyidagilardan iborat:

Agentlik bilan birgalikda Jamgʻarma daromadlari va xarajatlarining har yillik prognoz parametrlarini, shuningdek ularning bajarilishi boʻyicha hisobotni Davlat komissiyasiga taqdim etish uchun tayyorlash;

Jamgʻarma Ijro etuvchi direksiyasi shtat jadvalini va uni saqlab turish uchun xarajatlar smetasini tuzish;

davlat ilmiy-texnika dasturlarini amalga oshirishda ishtirok etadigan ilmiy-tadqiqot va oliy taʼlim muassasalarining ilmiy laboratoriyalarni tashkil etish, ilmiy laboratoriyalarni jihozlash, zamonaviy ilmiy uskunalar bilan qoʻshimcha yangilash va zarur sarflash materiallari va butlovchi buyumlar bilan uzluksiz taʼminlash tadbirlarini moliyalashtirishni tashkil etish;

davlat ilmiy-texnika dasturlari doirasida yaratilgan intellektual mulk huquqlari (patentlari)ni chet elda roʻyxatga olish boʻyicha xarajatlarni qoplashni taʼminlash;

ilmiy-tadqiqot va oliy taʼlim muassasalarining yetakchi elektron maʼlumotlar bazalaridan erkin foydalanishini taʼminlash boʻyicha xarajatlarini toʻlashni taʼminlash;

yosh olimlarning yetakchi xorijiy ilmiy tashkilotlarda, shu jumladan ilmiy laboratoriyalarni jihozlash uchun sotib olinadigan yuqori texnologik uskunalarda ishlash usullarini oʻzlashtirishi uchun, qisqa muddatli ilmiy tajriba orttirishini moliyalashtirishni tashkil etish;

Jamgʻarma mablagʻlarini bank depozitlariga joylashtirish yoʻli bilan ularni boshqarish;

Jamgʻarma mablagʻlaridan maqsadli foydalanilishi ustidan tizimli monitoring olib borish.

14. Jamgʻarmaning Ijro etuvchi direksiyasi Agentlik bilan birgalikda har yili 1-dekabrgacha Jamgʻarmaning kelgusi kalendar yilga daromadlari va xarajatlarining prognoz parametrlarini ishlab chiqadi va Davlat komissiyasining koʻrib chiqishi uchun taqdim etadi.

15. Jamgʻarma daromadlari va xarajatlarining prognoz parametrlari Davlat komissiyasi tomonidan har yili 25-dekabrgacha tasdiqlanadi.

5-bob. Jamgʻarma mablagʻlaridan foydalanish tartibi

16. Jamgʻarma mablagʻlaridan Davlat komissiyasining:

ilmiy laboratoriyalar tashkil etish, ilmiy-tadqiqot va oliy taʼlim muassasalarining ilmiy laboratoriyalarini zamonaviy ilmiy uskunalar bilan qoʻshimcha jihozlash va zarur sarflash materiallari va butlovchi buyumlar bilan uzluksiz taʼminlash boʻyicha loyihalarni belgilangan tartibda oʻtkazilgan tanlov asosida saralash, shuningdek yosh olimlarni yetakchi xorijiy ilmiy tashkilotlariga, shu jumladan ilmiy laboratoriyalarni jihozlash uchun sotib olinadigan yuqori texnologik uskunalarda ishlash uslublarini oʻzlashtirish uchun, qisqa muddatli ilmiy tajriba orttirishdan oʻtishga tanlab olish yakunlari;

davlat ilmiy-texnika dasturlari doirasida yaratilgan intellektual mulk obyektlari (patentlari)ga huquqlarni chet elda roʻyxatga olish uchun ularning roʻyxatini, shuningdek erkin foydalanishni taʼminlash xarajatlari Jamgʻarma mablagʻlari hisobidan qoplanadigan yetakchi xorijiy elektron ilmiy maʼlumotlar bazalari roʻyxatini tasdiqlash;

belgilangan tartibda Jamgʻarma xarajatlar smetasini tasdiqlash boʻyicha qarorlari asosida foydalaniladi.

17. Prinsipial jihatdan yangi, zamonaviy yuqori texnologik uskunalar bilan jihozlangan ilmiy laboratoriyalarni sotib olish va davlat ilmiy-texnika dasturlarini amalga oshirishda ishtirok etadigan ilmiy-tadqiqot va oliy taʼlim muassasalarining ilmiy laboratoriyalarini zamonaviy ilmiy uskunalar bilan qoʻshimcha jihozlash va zarur sarflash materiallari va butlovchi buyumlar bilan taʼminlashni tashkil etish uchun:

Jamgʻarmaning Ijro etuvchi direksiyasi, “Oʻztadbirkoreksport” aksiyadorlik jamiyati va buyurtmanoma bergan ilmiy-tadqiqot muassasasi (oliy taʼlim muassasasi) oʻrtasida uch tomonlama shartnoma tuziladi;

“Oʻztadbirkoreksport” aksiyadorlik jamiyati belgilangan tartibda oʻtkazilgan xorijiy yetkazib beruvchilar va ishlab chiqaruvchilarni tanlash asosida ular bilan tovar yetkazib berishga (shu jumladan zaruriyat boʻlganida tovarni ilmiy-tadqiqot yoki oliy taʼlim muassasasiga yetkazib berish, ishga tushirish-sozlash va boshqa oʻziga xos ishlarni amalga oshirishga) tegishli kontraktlarni tuzadi, shuningdek xorijiy valyutada moliyalashtirishni ochish uchun Jamgʻarmaga buyurtmanoma beradi;

“Oʻztadbirkoreksport” aksiyadorlik jamiyatidan tovarni qabul qilib olish buyurtmanomani bergan tegishli ilmiy-tadqiqot yoki oliy taʼlim muassasasi tomonidan bepul asosda amalga oshiriladi.

Bunda tovar yetkazib berilganligini tasdiqlovchi hujjatlarning nusxalari Jamgʻarmaning Ijro etuvchi direksiyasiga “Oʻztadbirkoreksport” aksiyadorlik jamiyati tomonidan taqdim etiladi.

18. Bepul asosda olingan ilmiy uskuna, sarflash materiallari va butlovchi buyumlardan maqsadli va samarali foydalanish uchun masʼuliyat tegishli ilmiy-tadqiqot va oliy taʼlim muassasalari rahbarlari zimmasiga yuklanadi.

19. Xarajatlarni toʻlash:

ilmiy-tadqiqot va oliy taʼlim muassasalarining yetakchi elektron maʼlumotlar ilmiy bazalaridan erkin foydalanishini taʼminlash boʻyicha xarajatlar Jamgʻarmaning Ijro etuvchi direksiyasi va maʼlumotlar bazasining egasi boʻlgan muassasa oʻrtasida tegishli maʼlumotlar bazasiga obuna boʻlish toʻgʻrisida tuziladigan shartnoma asosida amalga oshiriladi;

yosh olimlarning yetakchi xorijiy ilmiy tashkilotlarda qisqa muddatli ilmiy tajriba orttirishlari boʻyicha xarajatlar Jamgʻarmaning Ijro etuvchi direksiyasi, Agentlik, xodimi yosh olim hisoblanadigan ilmiy-tadqiqot muassasasi (oliy taʼlim muassasasi) hamda yetakchi xorijiy ilmiy tashkilot oʻrtasidagi shartnoma asosida ilmiy tajriba orttirish shartlari, talablari va muddatlariga muvofiq amalga oshiriladi;

davlat ilmiy-texnika dasturlari doirasida yaratilgan intellektual mulk huquqlari (patentlar)ni chet elda roʻyxatga olish xarajatlari Jamgʻarmaning Ijro etuvchi direksiyasi, tegishli buyurtmanomani bergan ilmiy-tadqiqot yoki oliy taʼlim muassasasi va xorijiy patent idorasi oʻrtasida tuziladigan uch tomonlama shartnoma asosida amalga oshiriladi.

20. Jamgʻarmaning joriy yil yakunlari boʻyicha qolgan mablagʻlari olib qoʻyilmaydi va keyingi yilga koʻchiriladi.

6-bob. Jamgʻarma mablagʻlaridan foydalanishni hisobga olish va nazorat qilish

21. Jamgʻarma mablagʻlarining tushishi va undan foydalanishning buxgalteriya hisobini yuritish, shuningdek hisobotlarni tuzish qonun hujjatlarida belgilangan tartibda Jamgʻarmaning Ijro etuvchi direksiyasi tomonidan amalga oshiriladi.

22.Jamgʻarmaning Ijrochi direktori qonun hujjatlariga muvofiq har yili Jamgʻarma faoliyatining auditorlik tekshiruvini oʻtkazadi va ommaviy axborot vositalarida hisobot eʼlon qiladi.

23. Jamgʻarma mablagʻlaridan maqsadli foydalanilishi ustidan nazorat Oʻzbekiston Respublikasi Moliya vazirligining Nazorat-taftish bosh boshqarmasi tomonidan amalga oshiriladi.

24.Jamgʻarma mablagʻlaridan Davlat komissiyasi tomonidan tasdiqlangan xarajatlar smetasiga muvofiq maqsadli foydalanish uchun masʼuliyat Jamgʻarmaning Ijrochi direktori zimmasiga yuklanadi.

7-bob. Yakunlovchi qoida

25. Jamgʻarmani tugatish va qayta tashkil etish qonun hujjatlariga muvofiq amalga oshiriladi.

Vazirlar Mahkamasining 2017-yil 19-maydagi 302-son qaroriga 4-ILOVA

Fan va texnologiyalar boʻyicha Davlat komissiyasi huzuridagi Ilmiy-texnik faoliyatni qoʻllab-quvvatlash va rivojlantirish jamgʻarmasi Ijro etuvchi direksiyasining

TUZILMASI

Vazirlar Mahkamasining 2017-yil 19-maydagi 302-son qaroriga 5-ILOVA

Oʻzbekiston Respublikasi Hukumatining ayrim qarorlariga kiritilayotgan

oʻzgartirishlar

1. Vazirlar Mahkamasining “Patent bojlari va toʻlovlari toʻgʻrisidagi Nizomni hamda Patent bojlari va toʻlovlari stavkalarini tasdiqlash haqida” 2006-yil 20-apreldagi 65-son qarori (Oʻzbekiston Respublikasi QT, 2006-y., 4-son, 26-modda) 2-bandining ikkinchi xatboshi quyidagi tahrirda bayon qilinsin:

“xorijiy valyutadagi mablagʻlarning 90 foizi — Fan va texnologiyalar boʻyicha Davlat komissiyasi huzuridagi Ilmiy-texnik faoliyatni qoʻllab-quvvatlash va rivojlantirish jamgʻarmasi hisob raqamiga, xorijiy valyutadagi mablagʻlarning 2 foizi — Davlat budjetining tegishli hisob raqamiga hamda milliy valyutadagi mablagʻlarning 20 foizi — Davlat budjeti daromadiga oʻtkaziladi”.

2. Vazirlar Mahkamasining “Madrid Bitimiga doir Bayonnomaga (Madrid, 1989-yil 27-iyun) muvofiq belgilarni xalqaro roʻyxatdan oʻtkazishda undiriladigan yakka tartibdagi bojlarning stavkalarini belgilash toʻgʻrisida” 2006-yil 21-dekabrdagi 263-son qarorining 2-bandi (Oʻzbekiston Respublikasi QHT, 2006-y., 51-52-son, 515-modda) quyidagi tahrirda bayon qilinsin:

“2. Belgilansinki, Oʻzbekiston Respublikasi Intellektual mulk agentligining valyuta hisob raqamiga tushadigan yakka tartibdagi boj mablagʻlari quyidagi tartibda taqsimlanadi:

90 foizi — Fan va texnologiyalar boʻyicha Davlat komissiyasi huzuridagi Ilmiy-texnik faoliyatni qoʻllab-quvvatlash va rivojlantirish jamgʻarmasi hisob raqamiga;

2 foizi — Oʻzbekiston Respublikasi Davlat budjetining tegishli hisob raqamiga;

8 foizi — Agentlikning moddiy-texnika bazasini mustahkamlashda hamda sanoat obyektlarini va intellektual mulkning boshqa turlarini huquqiy muhofaza qilish sohasida xalqaro tashkilotlarda qatnashganlik uchun aʼzolik badallarini toʻlashda ulardan foydalanish uchun (kamida 50 foizi), shuningdek xodimlarni moddiy ragʻbatlantirish uchun Oʻzbekiston Respublikasi Intellektual mulk agentligining budjetdan tashqari hisob raqamiga oʻtkaziladi”.

3. Vazirlar Mahkamasining 2013-yil 7-dekabrdagi 322-son qarori (Oʻzbekiston Respublikasi QT, 2013-y., 12-son, 87-modda) bilan tasdiqlangan Oʻzbekiston Respublikasi Intellektual mulk agentligining budjetdan tashqari mablagʻlarini shakllantirish va ulardan foydalanish tartibi toʻgʻrisidagi nizomning 5-bandi quyidagi tahrirda bayon qilinsin:

“5. Hisobot davrida yuridik ahamiyatga ega boʻlgan harakatlarni amalga oshirganlik uchun tushgan valyuta mablagʻlari hisobot davridan keyingi oyning 3-kunigacha valyuta blok-hisob raqamlaridan (xorijiy valyutaning har bir turi boʻyicha):

agar Oʻzbekiston Respublikasi Hukumati qarorlarida boshqacha tartib belgilanmagan boʻlsa, xorijiy valyutada tushgan mablagʻlar umumiy hajmining 90 foizi miqdorida — Fan va texnologiyalar boʻyicha Davlat komissiyasi huzuridagi Ilmiy-texnik faoliyatni qoʻllab-quvvatlash va rivojlantirish jamgʻarmasi hisob raqamiga;

xorijiy valyutada tushgan mablagʻlar umumiy hajmining 2 foizi miqdorida — belgilangan tartibda konvertatsiya qilingandan keyin Oʻzbekiston Respublikasi Davlat budjetining tegishli hisob raqamiga;

xorijiy valyutada tushgan mablagʻlar umumiy hajmining 8 foizi miqdorida — Agentlikning xorijiy valyutaning har bir turi boʻyicha ochilgan xorijiy valyutadagi hisob raqamlariga oʻtkaziladi”.