Oʻzbekiston Respublikasi Bosh vaziri oʻrinbosari B. Zokirovga “Oʻzbekiston Respublikasida avtomobil yoʻllarining – shaharlar va boshqa aholi punktlari koʻchalarining holati hamda ularni qurish, rekonstruksiya qilish, taʼmirlash va saqlash istiqbollari toʻgʻrisida”gi masala yuzasidan Oʻzbekiston Respublikasi Oliy Majlisi Qonunchilik palatasining parlament soʻrovi haqida (623-III-son)

08.11.2016

Oʻzbekiston Respublikasi Oliy Majlisi Qonunchilik palatasining

Qarori

Oʻzbekiston Respublikasi Oliy Majlisi Qonunchilik palatasi 2016-yil 12-oktabrdagi “Oʻzbekiston Respublikasida avtomobil yoʻllarining — shaharlar va boshqa aholi punktlari koʻchalarining holati hamda ularni qurish, rekonstruksiya qilish, taʼmirlash va saqlash istiqbollari toʻgʻrisida”gi parlament soʻroviga Oʻzbekiston Respublikasi Bosh vaziri oʻrinbosari B. Zokirovning yozma javobini koʻrib chiqib taʼkidlaydiki, soʻnggi yillarda mamlakatimizda yoʻl-transport infratuzilmasini yaxshilash boʻyicha keng koʻlamli ishlar amalga oshirilmoqda. Xususan, “Avtomobil yoʻllari toʻgʻrisida”gi Oʻzbekiston Respublikasi Qonuniga muvofiq avtomobil yoʻllarini rivojlantirish davlat dasturlarini ishlab chiqish va amalga oshirish, transport tarmogʻini rivojlantirish va takomillashtirish yuzasidan ishlar olib borilmoqda, umumiy foydalanishdagi avtomobil yoʻllarini loyihalashtirish sohasidagi normalar va standartlarga rioya etilishini taʼminlash choralari koʻrilmoqda.

Joriy yilning 8-sentabr kuni boʻlib oʻtgan parlament palatalarining qoʻshma majlisida belgilangan ustuvor vazifalardan kelib chiqib, shuningdek ularning ulkan ijtimoiy-iqtisodiy ahamiyatini inobatga olgan holda mamlakatimiz rahbariyati va Hukumati tomonidan avtomobil yoʻllarining — shaharlar va boshqa aholi punktlari koʻchalarining holatini yaxshilash boʻyicha muhim chora-tadbirlar koʻrilmoqda.

Masalan, kelgusi yillarda mahalliy ahamiyatga ega boʻlgan avtomobil yoʻllari holatiga alohida eʼtibor qaratish rejalashtirilmoqda. Xususan, 2017-yilda 2016-yilga nisbatan taqqoslanganda ularni oʻrtacha 2,7 baravardan koʻproq uzunlikda rekonstruksiya qilish nazarda tutilmoqda. Bundan tashqari, mazkur masala aholining turmush darajasi va sifatini oshirishga qaratilgan 15 ta oʻrtacha muddatli maqsadli dasturlardan biriga kiritilgan.

“Parlament nazorati toʻgʻrisida”gi Oʻzbekiston Respublikasi Qonunining 14-moddasiga muvofiq Oʻzbekiston Respublikasi Oliy Majlisining Qonunchilik palatasi qaror qiladi:

1. “Oʻzbekiston Respublikasida avtomobil yoʻllarining — shaharlar va boshqa aholi punktlari koʻchalarining holati hamda ularni qurish, rekonstruksiya qilish, taʼmirlash va saqlash istiqbollari toʻgʻrisida”gi parlament soʻroviga Oʻzbekiston Respublikasi Bosh vaziri oʻrinbosari B. Zokirovning yozma javobi maʼlumot uchun qabul qilinsin.

2. Oʻzbekiston Respublikasi Oliy Majlisi Qonunchilik palatasining Sanoat, qurilish va savdo masalalari qoʻmitasi:

Qoʻmitaning kelgusi yil uchun rejasini shakllantirishda avtomobil yoʻllari toʻgʻrisidagi qonun hujjatlari, shu jumladan “Avtomobil yoʻllari toʻgʻrisida”gi Oʻzbekiston Respublikasi Qonuni, Oʻzbekiston Respublikasi yoʻl-transport infratuzilmasini rivojlantirish dasturlari ijrosining oʻrganilishini nazarda tutsin;

oʻtkazilgan nazorat-tahlil tadbirlari yakunlari boʻyicha mazkur sohani tartibga soluvchi qonunlarni takomillashtirish yuzasidan takliflar kiritsin.

3. Ushbu qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2016-yil 8-noyabr,

623-III-son