Investitsiya loyihalari oʻz vaqtida va sifatli amalga oshirilishi uchun loyihalar tashabbuskorlari boʻlgan tashkilotlarning masʼuliyatini oshirish chora-tadbirlari toʻgʻrisida (285-son)

15.05.2017

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Investitsiya loyihalarining loyiha oldi hujjatlarini ishlab chiqish sifatini oshirish toʻgʻrisida” 2017-yil 15-martdagi PQ–2836-son qaroriga muvofiq Vazirlar Mahkamasi qaror qiladi:

1. Quyidagilar:

Tarmoq ilmiy-texnik kengashlarini va ularning faoliyatini tashkil qilish tartibi toʻgʻrisidagi nizom 1-ilovaga* muvofiq;

huzurida tarmoq ilmiy-texnik kengashlari faoliyat koʻrsatuvchi investitsiya loyihalari tashabbuskorlari boʻlgan davlat va xoʻjalik boshqaruvi organlari, mahalliy ijro etuvchi organlar, tashkilotlar roʻyxati 2-ilovaga* muvofiq tasdiqlansin.

* 1— 2-ilovalar rus tilidagi matnda berilgan.

2. Davlat va xoʻjalik boshqaruvi organlari, mahalliy ijro etuvchi organlar oʻn kun muddatda ilmiy-texnik kengashlarini (keyingi oʻrinlarda Kengashlar deb ataladi) tashkil etsinlar va belgilangan tartibda tasdiqlasinlar, shuningdek ularni yuqori malakali, shu jumladan tajribali amaliyotchilar, ilmiy-tadqiqot institutlari, oliy taʼlim muassasalari, mustaqil kompaniyalar va boshqa tashkilotlar mutaxassislari orasidan mutaxassislar bilan butlasinlar.

Loyihalar tashabbuskorlari boʻlgan tashkilotlar — davlat va xoʻjalik boshqaruvi organlari, mahalliy ijro etuvchi organlar rahbarlari zimmasiga Kengashlar tomonidan investitsiya loyihalari boʻyicha xulosalar oʻz vaqtida koʻrib chiqilishi va berilishi yuzasidan shaxsiy masʼuliyat yuklansin.

3. Belgilansinki, investitsiya loyihalarining Vazirlar Mahkamasining 2007-yil 7-iyundagi 110-son qarori bilan tasdiqlangan Investitsiya loyihalari hujjatlarini ishlab chiqish, ekspertizadan oʻtkazish va tasdiqlash tartibi toʻgʻrisidagi Nizomga muvofiq reglamentlanadigan hujjatlari Kengashlar tomonidan koʻrib chiqilishi majburiy hisoblanadi.

4. Belgilab qoʻyilsinki, loyihalar tashabbuskorlari boʻlgan tashkilotlar — davlat va xoʻjalik boshqaruvi organlari, mahalliy ijro etuvchi organlar:

a) quyidagilar uchun javob beradilar:

zamonaviy texnologiyalarni, yuqori texnologiyali va energiya samarali asbob-uskunalarni ustuvor qoʻllashni nazarda tutuvchi investitsiya loyihalarining loyiha oldi hujjatlarini ishlab chiqish yuzasidan topshiriqlarning sifatli tuzilishi;

loyiha oldi hujjatlarini, shu jumladan “foydalanishga tayyor holda qurish” loyihalarini ishlab chiqish uchun jalb qilinadigan malakali injiniring kompaniyalarining va/yoki loyihalash tashkilotlarining belgilanishi;

loyiha oldi va loyiha hujjatlarining, ishchi hujjatlarning va ishchi loyihaning taklif etilayotgan texnologiya va asbob-uskunalar boʻyicha narxlarning shakllanishi yuzasidan ixtisoslashtirilgan ekspert kengashlari yoki mustaqil kompaniya tomonidan koʻrilishini taʼminlash;

tanlov (tender) hujjatlarining sifatli tayyorlanishi hamda taqdim etilayotgan maʼlumotlarning ishonchliligi;

investitsiya loyihalarining tasdiqlangan asosiy texnik-texnologik va iqtisodiy parametrlari bajarilishi;

b) investitsiya loyihalarining loyiha oldi hujjatlarini ekspertizadan oʻtkazish uchun vakolatli organlarga faqat Kengashlarning ijobiy xulosasi mavjud boʻlganda yuboradilar, Oʻzbekiston Respublikasi Hukumatining alohida qarorida boshqacha hol nazarda tutilmagan boʻlsa.

5. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov hamda Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 15-may,

285-son