Oʻzbekiston Respublikasi Uy-joy kommunal xizmat koʻrsatish vazirligi huzuridagi Ichimlik suvidan foydalanishni nazorat qilish inspeksiyasi faoliyatini tashkil etish toʻgʻrisida (PQ-2899-son)

18.04.2017

Oʻzbekiston Respublikasi Prezidentining

Qarori

Oʻzbekiston Respublikasi Prezidentining “Oʻzbekiston Respublikasi Vazirlar Mahkamasi huzurida Ichimlik suvdan foydalanishni nazorat qilish davlat inspeksiyasini tashkil etish toʻgʻrisida” 2017-yil 18-apreldagi PF-5018-sonli Farmoniga muvofiq va ichimlik suvdan foydalanishda samarali davlat nazoratini taʼminlash maqsadida:

1. Quyidagilar:

Oʻzbekiston Respublikasi Uy-joy kommunal xizmat koʻrsatish vazirligi huzuridagi Ichimlik suvidan foydalanishni nazorat qilish inspeksiyasining tashkiliy tuzilmasi 1-ilovaga muvofiq;

Oʻzbekiston Respublikasi Uy-joy kommunal xizmat koʻrsatish vazirligi huzuridagi Ichimlik suvidan foydalanishni nazorat qilish inspeksiyasining boshqaruv xodimlari cheklangan soni 17 nafardan iborat boʻlgan markaziy apparati tuzilmasi 2-ilovaga muvofiq;

ichimlik suvdan foydalanishni nazorat qilish hududiy inspeksiyalarining namunaviy tuzilmasi 3-ilovaga muvofiq tasdiqlansin;

2. 2017-yildan boshlab Oʻzbekiston Respublikasi Davlat budjeti mablagʻlari, shuningdek, qonun hujjatlarida taqiqlanmagan boshqa manbalar — Oʻzbekiston Respublikasi Uy-joy kommunal xizmat koʻrsatish vazirligi huzuridagi Ichimlik suvidan foydalanishni nazorat qilish inspeksiyasi va hududiy inspeksiyalar taʼminoti boʻyicha xarajatlarni moliyalashtirish manbalari etib belgilansin.

3. Oʻzbekiston Respublikasi Uy-joy kommunal xizmat koʻrsatish vazirligi huzuridagi Ichimlik suvidan foydalanishni nazorat qilish inspeksiyasi markaziy apparatini Oʻzbekiston Respublikasi Uy-joy kommunal xizmat koʻrsatish vazirligining maʼmuriy binosida joylashtirilsin.

4. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi bilan birgalikda bir oy muddatda hududiy inspeksiyalarni bepul foydalanish huquqi bilan tegishli binolar va xonalarga joylashtirsin.

5. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi “Davsuvinspeksiya”ni oʻrnatilgan tartibda telefon aloqasi, shu jumladan hukumat aloqasi bilan taʼminlasin.

6. Ichimlik suvdan foydalanishni nazorat qilish davlat inspeksiyasi Oʻzbekiston Respublikasi Adliya vazirligi hamda manfaatdor vazirliklar va idoralar bilan birgalikda ikki oy muddatda Oʻzbekiston Respublikasi Vazirlar Mahkamasiga:

suvdan foydalanish tartibini buzgan shaxslarning masʼuliyatini oshirishni nazarda tutuvchi Oʻzbekiston Respublikasining maʼmuriy javobgarlik toʻgʻrisidagi Kodeksiga oʻzgartish va qoʻshimchalar kiritish toʻgʻrisida;

qonun hujjatlariga ushbu qarordan kelib chiqadigan oʻzgartish va qoʻshimchalar haqida takliflar kiritsin.

7. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” aksiyadorlik jamiyati boshqaruvi raisi A.J. Ramatov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 18-aprel,

PQ-2899-son

Oʻzbekiston Respublikasi Prezidentining 2017-yil 18-apreldagi PQ-2899-son qaroriga 1-ILOVA

Oʻzbekiston Respublikasi Vazirlar Mahkamasi huzuridagi Ichimlik suvdan foydalanishni nazorat qilish davlat inspeksiyasining

TAShKILIY TUZILMASI

Oʻzbekiston Respublikasi Vazirlar Mahkamasi huzuridagi Ichimlik suvdan foydalanishni nazorat qilish davlat inspeksiyasi Qoraqalpogʻiston Respublikasi, viloyatlar va Toshkent shahrida ichimlik suvdan foydalanishni nazorat qilish inspeksiyalari

Boshqaruv xodimlarining jami cheklangan soni — 73 nafar, ulardan:

markaziy apparat boshqaruv xodimlari soni — 17 nafar;

Qoraqalpogʻiston Respublikasi, viloyatlar va Toshkent shahri inspeksiyalarining boshqaruv xodimlari soni — 56 nafar.

Oʻzbekiston Respublikasi Prezidentining 2017-yil 18-apreldagi PQ-2899-son qaroriga 2-ILOVA

Oʻzbekiston Respublikasi Vazirlar Mahkamasi huzuridagi Ichimlik suvdan foydalanishni nazorat qilish davlat inspeksiyasi markaziy apparati

TUZILMASI

Inspeksiya boshligʻi Ichimlik suvni ishlab chiqarish va tashishga qoʻyiladigan texnologik talablarga rioya etilishini nazorat qilish boʻlimi 3 Buxgalteriya 1 Ichimlik suvdan oqilona foydalanish va sotishni nazorat qilish boʻlimi 3 Yuriskonsult 1 Yer osti suvlaridan foydalanishni nazorat qilish boʻlimi 3 Kadrlar boʻyicha inspektor 1 Hududiy inspeksiyalar faoliyatini muvofiqlashtirish boʻlimi 3 Maxsus qism 1

Boshqaruv xodimlarining cheklangan soni — 17 nafar;

Xizmat koʻrsatuvchi va texnik xodimlar soni oʻrnatilgan normativlarga muvofiq belgilanadi.

Oʻzbekiston Respublikasi Prezidentining 2017-yil 18-apreldagi PQ-2899-son qaroriga 3-ILOVA

Ichimlik suvdan foydalanishni nazorat qilish hududiy inspeksiyalarining

NAMUNAVIY TUZILMASI

Bosh inspektor Ichimlik suv ishlab chiqarish samaradorligini nazorat qilish inspektori 1-2 Ichimlik suv va yer osti suvidan oqilona foydalanishni nazorat qilish inspektori 1 — 3

Boshqaruv xodimlarining cheklangan umumiy soni — 56 nafar, shu jumladan:

Toshkent, Fargʻona viloyatlari va Toshkent shahrida — 6 nafardan;

Qoraqalpogʻiston Respublikasi, Buxoro, Jizzax, Qashqadaryo, Samarqand viloyatlarida — 4 nafardan;

Andijon, Navoiy, Namangan, Sirdaryo, Surxondaryo, Xorazm viloyatlarida — 3 nafardan.

Xizmat koʻrsatuvchi va texnik xodimlar soni oʻrnatilgan normativlarga muvofiq belgilanadi.