Oʻzbekiston Respublikasi Moliya vazirligi huzuridagi Orolboʻyi mintaqasini rivojlantirish jamgʻarmasi faoliyatini tashkil etish toʻgʻrisida (159-son)

27.03.2017

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “2017 — 2021-yillarda Orolboʻyi mintaqasini rivojlantirish Davlat dasturi toʻgʻrisida” 2017-yil 18-yanvardagi PQ–2731-son qarorini bajarish yuzasidan hamda Orolboʻyi mintaqasida ekologik va ijtimoiy-iqtisodiy vaziyatni va aholining turmush sharoitlarini yaxshilashga va sifatini oshirishga yoʻnaltirilgan loyihalar, tadbirlar va dasturlarni shakllantirish va barqaror moliyalashtirish maqsadida Vazirlar Mahkamasi qaror qiladi:

1. Oʻzbekiston Respublikasi Moliya vazirligi huzuridagi Orolboʻyi mintaqasini rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizom 1-ilovaga muvofiq tasdiqlansin.

2. Oʻzbekiston Respublikasi Moliya vazirligi huzuridagi Orolboʻyi mintaqasini rivojlantirish jamgʻarmasi mablagʻlari hisobiga moliyalashtiriladigan manzilli dasturlarning oʻz vaqtida va sifatli amalga oshirilishini taʼminlashga doir ishlarni muvofiqlashtirish uchun 2-ilovaga* muvofiq tarkibda Komissiya tashkil etilsin.

* 2-ilova rus tilidagi matnda berilgan.

Komissiya (A.J. Ramatov):

Qoraqalpogʻiston Respublikasi Vazirlar Kengashi va Xorazm viloyati hokimligi, Oʻzbekiston Respublikasi Moliya vazirligi va Iqtisodiyot vazirligining takliflari boʻyicha 2017 — 2021-yillarda Orolboʻyi mintaqasini rivojlantirish Davlat dasturi doirasida, obyektlarning amaldagi holatini va mintaqani ijtimoiy-iqtisodiy rivojlantirishning ustuvor yoʻnalishlarini hisobga olgan holda har yili Orolboʻyi mintaqasini rivojlantirishning manzilli dasturlarini tasdiqlasin;

Qoraqalpogʻiston Respublikasi Vazirlar Kengashi va Xorazm viloyati hokimligi, Oʻzbekiston Respublikasi Moliya vazirligi va Iqtisodiyot vazirligining asoslangan takliflari boʻyicha moliyaviy yil uchun nazarda tutilgan mablagʻlar doirasida Orolboʻyi mintaqasini rivojlantirishning manzilli dasturlari parametrlariga oʻzgartirishlar kiritsin;

Orolboʻyi mintaqasini rivojlantirishning har yili tasdiqlanadigan manzilli dasturlarining bajarilishi yuzasidan tizimli monitoring olib borsin.

3. Qoraqalpogʻiston Respublikasi Vazirlar Kengashi va Xorazm viloyati hokimligi huzuridagi “Yagona buyurtmachi xizmati” injiniring kompaniyalari Oʻzbekiston Respublikasi Moliya vazirligi huzuridagi Orolboʻyi mintaqasini rivojlantirish jamgʻarmasi mablagʻlari hisobiga moliyalashtiriladigan 2017 — 2021-yillarda Orolboʻyi mintaqasini rivojlantirish Davlat dasturi tadbirlarini amalga oshirish yuzasidan buyurtmachilar etib belgilansin.

4. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov va Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 27-mart,

159-son

Vazirlar Mahkamasining 2017-yil 27-martdagi 159-son qaroriga 1-ILOVA

Oʻzbekiston Respublikasi Moliya vazirligi huzuridagi Orolboʻyi mintaqasini rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Moliya vazirligi huzuridagi Orolboʻyi mintaqasini rivojlantirish jamgʻarmasi (keyingi oʻrinlarda Jamgʻarma deb ataladi) mablagʻlarini boshqarish, shu jumladan mablagʻlarni shakllantirish tartibini, Jamgʻarma mablagʻlarini moliyalashtirish va ulardan foydalanilishini nazorat qilish tartibini belgilaydi.

2. Jamgʻarma Oʻzbekiston Respublikasi Prezidentining 2017-yil 18-yanvardagi PQ-2731-son qarori bilan tasdiqlangan 2017 — 2021-yillarda Orolboʻyi mintaqasini rivojlantirish Davlat dasturi (keyingi oʻrinlarda Dastur deb ataladi) loyihalari va tadbirlarini amalga oshirishni moliyalashtirish uchun tashkil etilgan.

3. Jamgʻarma yuridik shaxs hisoblanmaydi.

2-bob. Jamgʻarma mablagʻlarini shakllantirish manbalari

4. Jamgʻarma mablagʻlari quyidagi manbalar hisobiga shakllantiriladi:

Oʻzbekiston Respublikasi Tiklanish va taraqqiyot jamgʻarmasiga oʻtkaziladigan mablagʻlarning oʻn foizi;

avtomobillarga gaz toʻldiradigan kompressor stansiyalari tomonidan realizatsiya qilinadigan tabiiy gazga maxsus investitsiya ustamalarining oʻn foizi;

Oʻzbekiston Respublikasi Davlat budjetining maqsadli mablagʻlari, shu jumladan markazlashtirilgan investitsiyalar;

xalqaro moliya institutlari va boshqa xorijiy donorlarning imtiyozli kreditlari (qarzlari);

jismoniy va yuridik shaxslarning, homiylik jamgʻarmalarining grantlari, ixtiyoriy badallari, xorijiy donorlarning mablagʻlari;

Jamgʻarmaning vaqtincha boʻsh mablagʻlarini joylashtirishdan tushgan daromadlar;

qonun hujjatlarida taqiqlanmagan boshqa moliyalashtirish manbalari.

5. Belgilab qoʻyilsinki:

Oʻzbekiston Respublikasi Tiklanish va taraqqiyot jamgʻarmasiga oʻtkaziladigan oʻn foiz miqdoridagi mablagʻlar Oʻzbekiston Respublikasi Tiklanish va taraqqiyot jamgʻarmasi tomonidan hisobot davridan keyingi oyning 5-kunidan kechikmay har oyda Jamgʻarmaga oʻtkaziladi;

avtomobillarga gaz toʻldiradigan kompressor stansiyalari tomonidan realizatsiya qilinadigan tabiiy gazga maxsus investitsiya ustamalari summasining oʻn foizi miqdoridagi mablagʻlar “Oʻzbekneftgaz” MXK tomonidan “Oʻztransgaz” AK va uning tashkilotlaridan mablagʻlar tushgan sanadan boshlab ikki ish kuni mobaynida Jamgʻarmaga oʻtkaziladi.

6. Xalqaro moliya institutlarining va boshqa xorijiy donorlarning imtiyozli kreditlari (qarzlari), jismoniy va yuridik shaxslarning, homiylik jamgʻarmalarining grantlari, ixtiyoriy badallari, xorijiy donorlarning, shu jumladan Oʻzbekiston Respublikasi norezidentlarining mablagʻlari qonun hujjatlarida belgilangan tartibda Jamgʻarmaning gʻaznachilik shaxsiy raqamlariga tushadi, xalqaro moliya institutlarining va boshqa xorijiy donorlarning tartibotlari yoki xorijiy kreditlar va grantlarni berishning shartlarida boshqacha tartib belgilangan holatlar bundan mustasno.

7. Jamgʻarma mablagʻlari Oʻzbekiston Respublikasi Moliya vazirligining Axborot tizimida ochiladigan gʻaznachilik shaxsiy raqamlarida jamlanadi.

3-bob. Jamgʻarma mablagʻlaridan foydalanishning asosiy yoʻnalishlari

8. Jamgʻarma mablagʻlaridan Qoraqalpogʻiston Respublikasi va Xorazm viloyatida quyidagilarga yoʻnaltirilgan loyihalarni amalga oshirishni moliyalashtirish uchun foydalaniladi:

issiqlik taʼminoti tizimini, shu jumladan mahalliy bugʻ qozonlari qurish hamda koʻp kvartirali uylarga va ijtimoiy obyektlarga issiqlik energiyasi berish tizimlarini qurish yoʻli bilan yaxshilash;

drenaj tizimini, shu jumladan drenaj quduqlari va kollektorlarni mukammal taʼmirlash va qurish hamda sugʻorish tizimlarini mukammallashtirish yoʻli bilan yaxshilash;

Nukus va Urganch shaharlari uy-joy fondining koʻp kvartirali uylaridagi umumiy foydalaniladigan va uylar ichidagi muhandislik kommunikatsiyalarini taʼmirlash, shuningdek bolalar maydonchalari barpo etgan holda uylarga yondosh hududlarni obodonlashtirish;

aholi punktlarini, Nukus va Urganch shaharlarini, shuningdek tumanlar markazlarini zamonaviy arxitektura-obodonlashtirish standartlari talablarini hisobga olgan holda obodonlashtirish tadbirlarini amalga oshirish, shu jumladan mavzelar ichidagi koʻchalar, maydonlar va xiyobonlarni, kichik bogʻlarni taʼmirlash hamda tashqi yoritish tarmoqlarini takomillashtirish;

chekka va borish qiyin boʻlgan qishloq tumanlaridagi aholi uchun suvni shoʻrsizlantiradigan qurilmalar berish;

suv taʼminoti tizimini rivojlantirish va aholining toza ichimlik suvdan va kanalizatsiya xizmatlaridan foydalanish darajasini oshirish, shuningdek sanitariya va maishiy chiqindilarni utilizatsiya qilish tizimlarini yaxshilash;

madaniyat muassasalari, teatrlar, madaniyat va istirohat bogʻlari, bolalar maydonchalari va axborot-resurs markazlarining moddiy-texnika bazasini mustahkamlash;

suv resurslarini boshqarish tizimi yanada takomillashtirilishini hisobga olgan holda choʻlga aylanishga qarshi tadbirlarni amalga oshirish;

Dasturni amalga oshirish doirasida loyiha-qidiruv ishlarini amalga oshirish;

Dasturga kiritilgan loyihalarning tashabbuskorlariga tijorat banklari tomonidan kreditlar berishda Oʻzbekiston Respublikasi Markaziy bankining qayta moliyalashtirish stavkasidan koʻpi bilan 4 foizga oshadigan foizli xarajatlarni qoplashga tijorat banklari tomonidan subsidiyalar ajratish;

Qoraqalpogʻiston Respublikasi va Xorazm viloyati aholisining turmush sharoitlari va sifatini yaxshilash boʻyicha boshqa tadbirlar.

4-bob. Jamgʻarma mablagʻlarini boshqarish

9. Jamgʻarma mablagʻlarini boshqarish Oʻzbekiston Respublikasi Moliya vazirligining Investitsiyalar boshqarmasi tomonidan amalga oshiriladi.

10. Oʻzbekiston Respublikasi Moliya vazirligining Investitsiyalar boshqarmasi:

zarurat boʻlganda joyning oʻziga borib Orolboʻyi mintaqasini rivojlantirish boʻyicha manzilli dasturlarni shakllantirishda ishtirok etadi;

Orolboʻyi mintaqasini rivojlantirish boʻyicha manzilli dasturlarni amalga oshirish doirasida obyektlarni qurish, rekonstruksiya qilish, modernizatsiya qilish, jihozlash va taʼmirlashning manzilli roʻyxatlari bajarilishini tahlil qiladi va monitoringini olib boradi;

Oʻzbekiston Respublikasi Moliya vazirligi huzuridagi Orolboʻyi mintaqasini rivojlantirish jamgʻarmasi mablagʻlari hisobiga moliyalashtiriladigan manzilli dasturlarni amalga oshirish boʻyicha komissiyaga (keyingi oʻrinlarda Komissiya deb ataladi) taqdim etish uchun Jamgʻarma daromadlari va xarajatlarining prognozini hamda choraklar va oylarga taqsimlagan holda prognozning yillik bajarilishi toʻgʻrisidagi hisobotni tayyorlaydi;

moliyalashtirish manbalari bilan bogʻliq holda Orolboʻyi mintaqasini rivojlantirish boʻyicha manzilli dasturlarni bajarishning asosiy yoʻnalishlari yuzasidan Komissiyaga takliflar kiritadi;

Jamgʻarma daromadlari va xarajatlarining oylar boʻyicha roʻyxatini tasdiqlash uchun Oʻzbekiston Respublikasi Moliya vazirligi rahbariyatiga kiritadi;

Orolboʻyi mintaqasini rivojlantirish boʻyicha manzilli dasturlarni moliyalashtirish uchun nazarda tutilgan Jamgʻarma mablagʻlari hisobi yuritilishini taʼminlaydi.

har oyda tegishli oyning 1-sanasigacha boʻlgan muddatda navbatdagi oy uchun Oʻzbekiston Respublikasi Vazirlar Mahkamasi huzuridagi Rivojlanish davlat dasturlarini moliyalashtirish jamgʻarmasiga Rivojlanish davlat dasturlariga kiritilgan Orolboʻyi hududlarini rivojlantirish loyihalarini moliyalashtirishga ajratiladigan mablagʻlar doirasida mablagʻlar oʻtkazadi.

5-bob. Jamgʻarma daromadlari va xarajatlari prognozini tayyorlash, koʻrib chiqish va tasdiqlash

11. Jamgʻarma daromadlari va xarajatlari prognozini tayyorlash, koʻrib chiqish va tasdiqlash kelgusi yil uchun Oʻzbekiston Respublikasi rivojlanish davlat dasturlari va Davlat budjeti loyihalarini tayyorlash bilan bogʻliq holda ushbu Nizomga muvofiq amalga oshiriladi.

12. Oʻzbekiston Respublikasi Moliya vazirligi Iqtisodiyot vazirligi, Markaziy bank, “Oʻzbekneftgaz” MXK, Qoraqalpogʻiston Respublikasi Vazirlar Kengashi va Xorazm viloyati hokimligi bilan birgalikda har yili kelgusi yil uchun ushbu Nizomning 4-bandida koʻrsatilgan manbalardan Jamgʻarmaga mablagʻlar tushishi prognozlarini tayyorlaydi.

121. Moliya vazirligi:

har yili 15-yanvargacha Oʻzbekiston Respublikasi Vazirlar Mahkamasi huzuridagi Rivojlanish davlat dasturlarini moliyalashtirish jamgʻarmasi bilan birgalikda Rivojlanish davlat dasturlariga kiritilgan loyihalarni moliyalashtirishga moʻljallangan mablagʻlarni oʻtkazish jadvalini ishlab chiqadi va tasdiqlaydi;

Oʻzbekiston Respublikasi Vazirlar Mahkamasi huzuridagi Rivojlanish davlat dasturlarini moliyalashtirish jamgʻarmasiga Rivojlanish davlat dasturlariga kiritilgan loyihalarni shakllantirish va moliyalashtirish uchun uch yillik davrga mablagʻlar ajratish prognoz hajmlarini taqdim etadi.

13. Qoraqalpogʻiston Respublikasi Vazirlar Kengashi, Xorazm viloyati hokimligi Oʻzbekiston Respublikasi Iqtisodiyot vazirligi bilan birgalikda har yili 1-maygacha:

Orolboʻyi mintaqasini rivojlantirish boʻyicha manzilli dasturni shakllantirish uchun ishlab chiqilgan loyiha-smeta hujjatlari asosida xarajatlar prognozi bilan birgalikda obyektlarni qurish, rekonstruksiya qilish, modernizatsiya qilish, jihozlash va taʼmirlashning dastlabki manzilli roʻyxatlarini belgilangan tartibda tayyorlaydilar;

Orolboʻyi mintaqasini rivojlantirish boʻyicha manzilli dastur loyihasini hamda Orolboʻyi mintaqasini rivojlantirish boʻyicha manzilli dasturni amalga oshirish uchun keyingi yil uchun zarur boʻlgan xarajatlar prognozi loyihasini Oʻzbekiston Respublikasi Moliya vazirligiga taqdim etadilar.

14. Oʻzbekiston Respublikasi Moliya vazirligi Iqtisodiyot vazirligi va Oʻzbekiston Respublikasi Investitsiyalar boʻyicha davlat qoʻmitasi bilan birgalikda har yili joriy yilning 1-avgustigacha:

keyingi yil uchun Jamgʻarmaga tushishi prognoz qilinayotgan mablagʻlar doirasida Orolboʻyi mintaqasini rivojlantirish boʻyicha manzilli dasturning yakuniy parametrlarini kelishadi;

keyingi yil uchun Jamgʻarma daromadlari va xarajatlari prognozini tayyorlaydi;

Orolboʻyi mintaqasini rivojlantirish boʻyicha manzilli dastur loyihasini, shuningdek Jamgʻarma daromadlari va xarajatlari prognozini keyinchalik ularni kelgusi yil uchun Oʻzbekiston Respublikasi rivojlanish davlat dasturi hamda Davlat budjeti loyihalariga kiritish uchun koʻrib chiqish va tasdiqlash uchun kiritadi.

Bunda Oʻzbekiston Respublikasi Markaziy bankining qayta moliyalashtirish stavkasidan oshadigan foizli xarajatlarni qoplashga ajratiladigan subsidiyalar summasi keyingi yil uchun Jamgʻarma daromadlari prognozining oʻn foizi miqdorida belgilanadi. Zarurat boʻlganda ajratiladigan subsidiyalar summasi Komissiya qaroriga muvofiq aniqlashtiriladi.

15. Jamgʻarma daromadlari va xarajatlarining yillik parametrlari tasdiqlangandan keyin Oʻzbekiston Respublikasi Moliya vazirligi 5 kun mobaynida keyingi yil uchun xarajatlarning belgilangan hajmlarini Qoraqalpogʻiston Respublikasi Vazirlar Kengashi va Xorazm viloyati hokimligiga yetkazadi.

Jamgʻarma mablagʻlari hisobiga moliyalashtiriladigan loyihalarni amalga oshirishning har yilgi manzilli dasturlarini shakllantirish ushbu Nizomga 1-ilovaga* muvofiq sxema boʻyicha amalga oshiriladi.

6-bob. Tijorat banklari tomonidan loyihalar tashabbuskorlariga kreditlar berishda Oʻzbekiston Respublikasi Markaziy bankining qayta moliyalashtirish stavkasidan oshadigan foizli xarajatlarni qoplash uchun tijorat banklariga subsidiyalar ajratish tartibi

16. Oʻzbekiston Respublikasi Markaziy bankining qayta moliyalashtirish stavkasidan koʻpi bilan 4 foizga oshadigan foizli xarajatlarni qoplashga subsidiyalar maqsadli hisoblanadi va tijorat banklari (keyingi oʻrinlarda banklar deb ataladi) tomonidan qatʼiyan quyidagi yoʻnalishlar boʻyicha amalga oshiriladigan loyihalarni moliyalashtirish maqsadlariga milliy valyutada kreditlar berishda ajratiladi:

qishloq xoʻjaligi mahsulotlarini, dorivor oʻtlar va oʻsimliklarni, mahalliy mineral-xomashyo tabiiy resurslarini qayta ishlash asosida sanoat mahsulotlari ishlab chiqarish, shuningdek isteʼmol tovarlari ishlab chiqarish loyihalarini amalga oshirish;

zamonaviy, suvni tejaydigan sugʻorish texnologiyalarini joriy etish, sovutish quvvatlari, zamonaviy chorvachilik, parrandachilik va baliqchilik xoʻjaliklari, goʻsht, sut, teri va moʻynani qayta ishlash korxonalari barpo etish asosida qishloq xoʻjaligi ekinlarini oʻstirish, intensiv bogʻlar va zamonaviy teplitsa xoʻjaliklari tashkil etishning yangi texnologiyalarini joriy etish.

17. Banklarning joylardagi filiallari ushbu Nizomning 16-bandida koʻrsatilgan yoʻnalishlar boʻyicha loyihalarni banklarning kredit siyosati doirasida belgilangan mezonlardan, shuningdek yangi ish oʻrinlari tashkil etishni, zamonaviy energiya va resurslarni tejaydigan texnologiyalarni joriy etishni, shu jumladan energiyaning tiklanadigan manbalarini (quyosh kollektorlari va boshqalarni) qoʻllanishni, ularni milliy valyutadagi kreditlarni jalb etish hisobiga amalga oshirishni moʻljallagan loyihalar tashabbuskorlari boʻlgan yuridik shaxslar tomonidan taqdim etilgan Orolboʻyi mintaqasidagi sanitariya-ekologiya vaziyatini yaxshilash chora-tadbirlarini nazarda tutadigan mezonlardan kelib chiqqan holda koʻrib chiqadilar.

18. Amalga oshirishga tavsiya etilgan loyihalar roʻyxati loyihalar tashabbuskorlariga kreditlar ajratish masalasini belgilangan tartibda koʻrib chiqish uchun tegishli kredit qoʻmitalariga yuboriladi.

19. Banklarning joylardagi filiallari har qaysi kredit oluvchi boʻyicha hujjatlar paketini tayyorlaydilar va ularni umumlashtirish uchun bosh banklarga yuboradilar.

20. Oʻzbekiston Respublikasi Markaziy bankining qayta moliyalashtirish stavkasidan oshadigan foizli xarajatlarni qoplashga subsidiyalar ajratish uchun bosh banklar kreditlar rasmiylashtirilishiga koʻra har oyda, har qaysi oyning 25-kunidan kechikmay Oʻzbekiston Respublikasi Moliya vazirligiga koʻrib chiqish uchun murojaatni quyidagilarni ilova qilgan holda taqdim etadilar:

loyihaning ushbu Nizomning 16-bandida koʻrsatilgan yoʻnalishlarga muvofiqligi toʻgʻrisida bosh bankning xulosasi;

bankning yoki uning filialining kredit qoʻmitasi qarori;

kreditni qoplashning tasdiqlangan jadvali (ajratilayotgan subsidiya summasini oylarga taqsimlagan holda).

21. Oʻzbekiston Respublikasi Markaziy bankining qayta moliyalashtirish stavkasi oʻzgargan taqdirda ajratilayotgan subsidiyalar summasi kredit rasmiylashtirilgan kunda qayd etilgan darajada oʻzgarishsiz qoladi.

22. Taqdim etilgan materiallar Oʻzbekiston Respublikasi Moliya vazirligi tomonidan ular tushgan kundan boshlab 10 ish kunidan koʻp boʻlmagan muddatda koʻrib chiqiladi.

Subsidiyalar ajratish uchun asoslar Oʻzbekiston Respublikasi Moliya vazirligi tomonidan yetarli emas deb eʼtirof etilgan taqdirda rad etishning sabablari izohlangan holda rad etish toʻgʻrisida yozma xabarnoma yuboriladi.

23. Oʻzbekiston Respublikasi Markaziy bankining qayta moliyalashtirish stavkasidan oshadigan foizli xarajatlarni qoplashga subsidiyalar ajratish bosh bank tomonidan har oyda hisobot davridan keyingi oyning 15-kunidan kechikmay, bosh banklarning buyurtmanomalari asosida, loyihalar tashabbuskorlari tomonidan amalda qoplangan kreditning foizli xarajatlari summasidan kelib chiqqan holda, subsidiyani chegirib amalga oshiriladi.

Loyiha tashabbuskori tomonidan Oʻzbekiston Respublikasi Markaziy bankining qayta moliyalashtirish stavkasidan oshadigan foizli xarajatlarni qoplashga ajratiladigan subsidiyalar summasi kechikib qoplangan taqdirda kechikib toʻlangan summa toʻlashning tasdiqlangan jadvalida qayd etilgan summadan ortiq boʻlmasligi kerak.

Foizli xarajatlarni hisoblashga hamda Oʻzbekiston Respublikasi Markaziy bankining qayta moliyalashtirish stavkasidan oshadigan foizli xarajatlarni qoplashga subsidiyalar ajratishga shartli misollar ushbu Nizomga 2-ilovada* keltirilgan.

* 1-2-ilovalar rus tilidagi matnda berilgan.

24. Banklar tanlangan loyihalarning ushbu Nizomning 16-bandida koʻrsatilgan yoʻnalishlarga muvofiqligi va ajratiladigan subsidiyalar summasi hisob-kitobining ishonchliligi uchun javob beradilar.

7-bob. Jamgʻarma mablagʻlarini sarflash tartibi

25. Jamgʻarma mablagʻlari Jamgʻarmaning Oʻzbekiston Respublikasi Moliya vazirligi Axborot tizimida ochiladigan gʻaznachilik shaxsiy raqamidan sarflanadi.

26. Jamgʻarma mablagʻlaridan foydalanish Oʻzbekiston Respublikasi Moliya vazirligida roʻyxatdan oʻtkazilgan:

obyektlarni qurish, rekonstruksiya qilish, modernizatsiya qilish, jihozlash va taʼmirlash boʻyicha qonun hujjatlarida belgilangan tartibda oʻtkazilgan tender (tanlov) savdolari natijalarini hisobga olgan holda — Qoraqalpogʻiston Respublikasi Vazirlar Kengashi va Xorazm viloyati hokimligi;

Dasturga kiritilgan loyihalar tashabbuskorlariga beriladigan kreditlar boʻyicha Oʻzbekiston Respublikasi Markaziy bankining qayta moliyalashtirish stavkasidan oshadigan foizli xarajatlarni qoplashga subsidiyalar ajratishni hisobga olgan holda, kreditni qoplashning tasdiqlangan jadvallari asosida tegishli banklar xarajatlarining tegishli smetalari asosida amalga oshiriladi.

27. Oʻzbekiston Respublikasi Moliya vazirligining Gʻaznachiligi obyektlarni qurish, rekonstruksiya qilish, modernizatsiya qilish, jihozlash va taʼmirlash, shuningdek subsidiyalar ajratish yuzasidan majburiyatlar boʻyicha shartnomalarni belgilangan tartibda roʻyxatdan oʻtkazadi hamda ular boʻyicha qatʼiyan xarajatlar smetalarida nazarda tutilgan mablagʻlar doirasida xarajatlar toʻlovini obyektlarni qurish, rekonstruksiya qilish, modernizatsiya qilish, jihozlash va taʼmirlashning tasdiqlangan manzilli roʻyxatlariga muvofiq amalga oshiradi.

28. Orolboʻyi mintaqasini rivojlantirish boʻyicha manzilli dasturlarni amalga oshirish doirasida obyektlarni qurish, rekonstruksiya qilish, modernizatsiya qilish, jihozlash va taʼmirlash boʻyicha xarajatlarni toʻlash Gʻaznachilikning hududiy boshqarmalari tomonidan toʻlov topshiriqnomalari hamda buyurtmachilarning bajarilgan ishlar va koʻrsatilgan xizmatlar toʻgʻrisida taqdim etilgan hisobot maʼlumotlari asosida quyidagi tartibda amalga oshiriladi:

a) obyektlarni qurish, rekonstruksiya qilish, modernizatsiya qilish, jihozlash va taʼmirlashni bajarish:

obyektlarni qurish, rekonstruksiya qilish, modernizatsiya qilish, jihozlash va taʼmirlash dastlabki ikki oy mobaynida prognoz qilinayotgan yil uchun tender (tanlov) savdolari natijalari boʻyicha aniqlangan ishlar qiymatining 30 foizigacha miqdorda teng ulushlarda avans toʻlovlarini amalga oshirish;

har oyda, ajratilgan avansni mutanosib tarzda ushlab qolishni hisobga olgan holda, bajarilgan ishlar qiymatining 95 foizigacha miqdorida joriy moliyalashtirish;

shartnomada koʻrsatilgan kafolat muddati oʻtgach — qolgan 5 foizni pudratchiga toʻlash;

b) asbob-uskunalar (shoʻrsizlantirish qurilmalari va boshqalarni) sotib olish:

shartnoma umumiy summasining 30 foizi miqdorida avans toʻlovini amalga oshirish;

ajratilgan avans toʻlovlarini ushlab qolgan holda, yetkazib berishlarning amaldagi hajmidan kelib chiqib har oyda joriy moliyalashtirishni amalga oshirish.

29. Jamgʻarma mablagʻlarini Orolboʻyi mintaqasini rivojlantirish boʻyicha manzilli dasturlarda nazarda tutilmagan maqsadlar uchun sarflash taqiqlanadi.

30. Jamgʻarma mablagʻlarining joriy moliya yili yakunlari boʻyicha qoldiqlari olib qoʻyilmaydi va keyingi yilga oʻtkaziladi.

8-bob. Jamgʻarma mablagʻlaridan foydalanilishini hisobga olish, hisobot topshirish va nazorat qilish

31. Jamgʻarma mablagʻlarining tushishi va sarflanishi boʻyicha hisobga olish va hisobot tuzish Oʻzbekiston Respublikasi Moliya vazirligi tomonidan qonun hujjatlarida belgilangan tartibda amalga oshiriladi.

32. Qoraqalpogʻiston Respublikasi Vazirlar Kengashi, Xorazm viloyati hokimligi va tegishli banklar har oyda, hisobot davridan keyingi oyning 5-kunidan kechikmay Oʻzbekiston Respublikasi Moliya vazirligiga obyektlarni qurish, rekonstruksiya qilish, modernizatsiya qilish, jihozlash va taʼmirlashga, shuningdek Oʻzbekiston Respublikasi Markaziy bankining qayta moliyalashtirish stavkasidan oshadigan foizli xarajatlarni Orolboʻyi mintaqasini rivojlantirish boʻyicha manzilli dasturlarni amalga oshirish doirasidagi subsidiyalar tarzida qoplashga ajratilgan Jamgʻarma mablagʻlaridan foydalanish toʻgʻrisidagi hisobotlarni Oʻzbekiston Respublikasi Moliya vazirligi tomonidan ishlab chiqilgan shakl boʻyicha taqdim etadilar.

33. Oʻzbekiston Respublikasi Moliya vazirligi har chorakda hisobot davridan keyingi oyning 10-kunidan kechikmay Komissiyaga Jamgʻarmaning Orolboʻyi mintaqasini rivojlantirish boʻyicha manzilli dasturni bajarishga ajratilgan mablagʻlaridan foydalanish boʻyicha hisobotlarni taqdim etadi.

34. Jamgʻarma mablagʻlaridan maqsadli foydalanilishini nazorat qilish Oʻzbekiston Respublikasi Moliya vazirligining Nazorat-taftish bosh boshqarmasi va uning hududiy boʻlinmalari tomonidan amalga oshiriladi.

35. Oʻzbekiston Respublikasi Moliya vazirligi Orolboʻyi mintaqasini rivojlantirish boʻyicha manzilli dastur doirasida bajarilgan ishlar va koʻrsatilgan xizmatlar toʻgʻrisida, shuningdek ularning birlamchi hujjatlarga (schyot-fakturalarga) hamda amalda bajarilgan ishlar (xizmatlar) hajmlariga muvofiqligi toʻgʻrisida Qoraqalpogʻiston Respublikasi Vazirlar Kengashi va Xorazm viloyati hokimligining taqdim etilgan hisobot maʼlumotlari asosida Jamgʻarma mablagʻlaridan maqsadli foydalanilishi monitoringini olib boradi.

36. Jamgʻarma mablagʻlaridan Orolboʻyi mintaqasini rivojlantirish boʻyicha tasdiqlangan manzilli dasturlarga muvofiq maqsadli foydalanish yuzasidan javobgarlik Qoraqalpogʻiston Respublikasi Vazirlar Kengashiga, Xorazm viloyati hokimligiga va tegishli banklarga yuklanadi.