Oʻzbekiston Respublikasi Iqtisodiyot vazirligi hududiy boshqarmalari faoliyatini tashkil qilish chora-tadbirlari toʻgʻrisida (PQ-2840-son)

16.03.2017

Oʻzbekiston Respublikasi Prezidentining

Qarori

Oʻzbekiston Respublikasi Prezidentining “Mahalliy ijroiya hokimiyati organlari faoliyatini yanada takomillashtirish toʻgʻrisida” 2016-yil 22-dekabrdagi PQ-2691-sonli qaroriga muvofiq, shuningdek, hududlar iqtisodiy kompleksi faoliyatini tashkil etishni yanada takomillashtirish va uning samaradorligini oshirish maqsadida:

1. Oʻzbekiston Respublikasi Iqtisodiyot vazirligi tuzilmasida Qoraqalpogʻiston Respublikasi Iqtisodiyot vazirligi, viloyatlar va Toshkent shahar iqtisodiyot va hududlarni kompleks rivojlantirish bosh boshqarmalari, shuningdek tuman hamda shahar iqtisodiyot va hududlarni kompleks rivojlantirish boʻlimlari tashkil qilinsin.

2. Quyidagilar Qoraqalpogʻiston Respublikasi Iqtisodiyot vazirligining, viloyatlar hamda Toshkent shahar iqtisodiyot va hududlarni kompleks rivojlantirish bosh boshqarmalarining asosiy vazifalari etib belgilansin:

hududlarning iqtisodiy va ijtimoiy rivojlanish darajasini tizimli tahlil qilish, mavjud nomutanosibliklarni, hududlarning zaxiralarini hamda ishlab chiqarishga jalb qilinmagan mineral-xomashyo, mehnat va ishlab chiqarish salohiyatlarini aniqlash;

mamlakat va hududlarni istiqbolda ijtimoiy-iqtisodiy rivojlantirish strategik ustuvor yoʻnalishlaridan kelib chiqib, hududlarning sanoat potensialini jadal rivojlantirish borasida tarmoq tuzilmalari bilan birgalikda dasturiy chora-tadbirlarni, hududlarni kompleks rivojlantirish, hududning iqtisodiyotini diversifikatsiya qilish va tarkibiy oʻzgartirishlarni chuqurlashtirishning qisqa muddatli va oʻrta muddatli prognozlari hamda dasturlarini ishlab chiqish;

hududiy investitsiya dasturlari tayyorlanishini taʼminlash va uning amalga oshirilishini monitoring qilish, yangi ishlab chiqarishlarni qurish, ularni oʻz vaqtida ishga tushirish hamda amaldagilarini modernizatsiyalash, respublika iqtisodiyoti tarmoqlarini rivojlantirishning tasdiqlangan oʻrta muddatli va uzoq muddatli dasturlariga kiritilgan yirik investitsiyaviy loyihalarni amalga oshirishda koʻmaklashish;

muhandislik, yoʻl-transport va telekommunikatsiya infratuzilmasini ildam rivojlantirish, aholiga transport xizmati koʻrsatishni yanada yaxshilash, koʻrsatilayotgan uy-joy-kommunal xizmatlar darajasi va sifatini tubdan oshirish, sifatli ichimlik suvi va sanitar tozalash tizimi bilan taʼminlash boʻyicha dasturiy chora-tadbirlarni ishlab chiqish;

qishloq xoʻjaligini yanada rivojlantirish, qishloq xoʻjaligi ekinlarini oqilona joylashtirish, qishloq xoʻjaligi ishlab chiqarishidagi tarkibiy oʻzgartirishlar, qishloq xoʻjaligi xomashyosini chuqur qayta ishlash masalalarini teran tahlil qilish va takliflar ishlab chiqish;

hududdagi demografik jarayonlarni hamda jins va yoshiga oid tarkibini, aholi bandligi darajasi va tarkibini tizimli tahlil qilish, shu asosda ishsiz aholini, ayniqsa yoshlarni ishlab chiqaruvchi kuchlarni optimal joylashtirish va yangi ish oʻrinlari yaratish hisobiga ish bilan taʼminlash yuzasidan takliflar tayyorlash, aholining turmush darajasi va sifatini yanada oshirish, ijtimoiy infratuzilmani rivojlantirish, uy-joy sharoitlarini yaxshilash, ularga tibbiy, taʼlim va ijtimoiy-madaniy xizmat koʻrsatishni yanada takomillashtirish;

hududlarni kompleks rivojlantirishning qisqa muddatli va oʻrta muddatli dasturlarini ishlab chiqishda vazirliklar va idoralar, xoʻjalik boshqaruvi organlari barcha hududiy boʻlinmalarining faoliyati va oʻzaro hamkorligini muvofiqlashtirish.

3. Oʻzbekiston Respublikasi Iqtisodiyot vazirligi hududiy boʻlinmalari faoliyatini muvofiqlashtirish hamda hududlarni kompleks rivojlantirish boʻyicha hududiy dasturlarni ishlab chiqish va monitoring qilish masalalari yuzasidan ishlar samaradorligini oshirishni taʼminlash maqsadida Oʻzbekiston Respublikasi Iqtisodiyot vazirligi markaziy apparatining Ishlab chiqaruvchi kuchlarni joylashtirish va hududlarni kompleks rivojlantirish bosh boshqarmasiga qoʻshimcha 12 ta shtat birligi ajratilsin va ushbu bosh boshqarma Oʻzbekiston Respublikasi iqtisodiyot vazirining birinchi oʻrinbosariga boʻysundirilsin.

4. Belgilansinki:

Qoraqalpogʻiston Respublikasi iqtisodiyot vazirini lavozimga tayinlash va undan ozod etish Oʻzbekiston Respublikasi Iqtisodiyot vaziri bilan kelishilgan holda Qoraqalpogʻiston Respublikasi Joʻqorgʻi Kengesi tomonidan amalga oshiriladi;

viloyatlar hamda Toshkent shahar iqtisodiyot va hududlarni kompleks rivojlantirish bosh boshqarmalari boshliqlarini lavozimga tayinlash va undan ozod qilish tegishli viloyatlar va Toshkent shahar hokimlari bilan kelishilgan holda Oʻzbekiston Respublikasi iqtisodiyot vaziri tomonidan amalga oshiriladi;

tuman hamda shahar iqtisodiyot va hududlarni kompleks rivojlantirish boʻlimlari boshliqlarini lavozimga tayinlash va undan ozod qilish tegishli tuman va shaharlar hokimlarining taqdimnomasiga binoan, shuningdek Oʻzbekiston Respublikasi iqtisodiyot vaziri bilan kelishilgan holda Qoraqalpogʻiston Respublikasi iqtisodiyot vaziri, iqtisodiyot va hududlarni kompleks rivojlantirish bosh boshqarmalarining boshliqlari tomonidan amalga oshiriladi.

5. Quyidagilar:

Qoraqalpogʻiston Respublikasi Iqtisodiyot vazirligining tuzilmasi, viloyatlar iqtisodiyot va hududlarni kompleks rivojlantirish bosh boshqarmalarining namunaviy tuzilmalari hamda Toshkent shahar Iqtisodiyot va kompleks rivojlantirish bosh boshqarmasining tuzilmasi 1-, 1a va 1b-ilovalariga* muvofiq;

Qoraqalpogʻiston Respublikasi Iqtisodiyot vazirligi, viloyatlar hamda Toshkent shahar iqtisodiyot va hududlarni kompleks rivojlantirish bosh boshqarmalari, shuningdek tumanlar hamda shaharlar iqtisodiyot va hududlarni kompleks rivojlantirish boʻlimlari xodimlarining cheklangan soni 2- va 2a-ilovalariga* muvofiq;

Qoraqalpogʻiston Respublikasi Iqtisodiyot vazirligi, viloyatlar hamda Toshkent shahar iqtisodiyot va hududlarni kompleks rivojlantirish bosh boshqarmalari xodimlarining mehnatiga haq toʻlash razryadlari 3-ilovaga* muvofiq tasdiqlansin.

6. Qoraqalpogʻiston Respublikasi Iqtisodiyot vazirligi, viloyatlar hamda Toshkent shahar iqtisodiyot va hududlarni kompleks rivojlantirish bosh boshqarmalari, shuningdek tumanlar hamda shaharlar iqtisodiyot va hududlarni kompleks rivojlantirish boʻlimlari xodimlarining mehnatiga haq toʻlash shartlari Oʻzbekiston Respublikasi Prezidentining “Davlat boshqaruvi hududiy organlari faoliyatini yanada takomillashtirish va xodimlarini moddiy ragʻbatlantirishni kuchaytirish chora-tadbirlari toʻgʻrisida” 2017-yil 9-yanvardagi PQ-2722-sonli qarorining 1-bandida oʻrnatilgan tartibda joriy etilsin.

7. Oʻzbekiston Respublikasi Iqtisodiyot vazirligi bir oy muddatda Qoraqalpogʻiston Respublikasi Iqtisodiyot vazirligi toʻgʻrisidagi nizomni, viloyatlar hamda Toshkent shahar iqtisodiyot va hududlarni kompleks rivojlantirish bosh boshqarmalari, tuman hamda shaharlar iqtisodiyot va hududlarni kompleks rivojlantirish boʻlimlari toʻgʻrisidagi namunaviy nizomlarni belgilangan tartibda tasdiqlasin.

8. Viloyatlar, Toshkent shahri, tumanlar va shaharlar hokimliklari bir hafta muddatda:

Oʻzbekiston Respublikasi Iqtisodiyot vazirligi tomonidan avval Toshkent shahri va viloyatlar hokimliklariga berilgan zarur uskunalar, avtotransport vositalari va mebellar viloyatlar hamda Toshkent shahar iqtisodiyot va hududlarni kompleks rivojlantirish bosh boshqarmalariga, tumanlar hamda shaharlar iqtisodiyot va hududlarni kompleks rivojlantirish boʻlimlariga topshirilishini;

viloyatlar hamda Toshkent shahar iqtisodiyot va hududlarni kompleks rivojlantirish bosh boshqarmalari, tumanlar hamda shaharlar iqtisodiyot va hududlarni kompleks rivojlantirish boʻlimlari joylashtirilishini, ular zarur uskunalar, kompyuter texnikasi, mebel, aloqa vositalari bilan jihozlanishini taʼminlasin.

9. Belgilansinki, Qoraqalpogʻiston Respublikasi Iqtisodiyot vazirligi, viloyatlar hamda Toshkent shahar iqtisodiyot va hududlarni kompleks rivojlantirish bosh boshqarmalari, tumanlar hamda shaharlar iqtisodiyot va hududlarni kompleks rivojlantirish boʻlimlarining joriy taʼminoti va ular faoliyatini moliyalashtirish Qoraqalpogʻiston Respublikasining respublika budjeti, viloyatlarning viloyat budjetlari va Toshkent shahrining shahar budjeti hisobidan amalga oshiriladi.

10. Oʻzbekiston Respublikasi Prezidentining hamda Oʻzbekiston Respublikasi Hukumatining baʼzi qarorlari 4-ilovaga* muvofiq oʻz kuchini yoʻqotgan deb hisoblansin.

* 1 — 4-ilovalar rus tilidagi matnda berilgan.

11. Oʻzbekiston Respublikasi Iqtisodiyot vazirligi manfaatdor vazirliklar va idoralar bilan birgalikda ikki oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

12. Mazkur qarorning ijrosini nazorat qilish Oʻzbekiston Respublikasining Bosh vaziri A. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 16-mart,

PQ-2840-son