Shoshilinch tibbiy yordamni yanada takomillashtirish chora-tadbirlari toʻgʻrisida (PF-4985-son)

16.03.2017

Oʻzbekiston Respublikasi Prezidentining

Farmoni

Qayd etilsinki, sogʻliqni saqlash sohasini isloh qilish davlat dasturlarini amalga oshirish boʻyicha aniq maqsadga yoʻnaltirilgan va izchil chora-tadbirlar amalga oshirilishi natijasida aholiga davlat tomonidan kafolatli bepul tibbiy yordam berishni taʼminlaydigan shoshilinch kechiktirib boʻlmaydigan tibbiy yordam koʻrsatishning yaxlit tizimi tashkil etildi.

Respublika shoshilinch tibbiy yordam markazi, uning hududiy filiallari, shuningdek, markaziy tuman va shahar kasalxonalari huzurida shoshilinch tibbiy yordam boʻlimlari, shu jumladan, tez tibbiy yordam va sanitariya aviatsiyasi xizmati tashkil etildi va faoliyat koʻrsatmoqda. Shoshilinch tibbiy yordam tizimi muassasalarini yuqori texnologik tibbiyot uskunalari va ixtisoslashtirilgan avtotransport bilan jihozlash boʻyicha kompleks koʻlamli chora-tadbirlar amalga oshirildi.

Amalga oshirilgan chora-tadbirlar har yili 600 ming nafardan ortiq bemorni shoshilinch tibbiy yordam tizimi muassasalarida statsionarda davolashni, 1 million nafardan ortiq bemorga ambulatoriyada tibbiy yordam berishni taʼminlash, tez tibbiy yordam xizmati tomonidan bir yilda 7 milliondan ortiq chaqiriqni bajarish uchun zarur shart-sharoitlar yaratdi.

Shu bilan birga, shoshilinch tibbiy yordam koʻrsatishning samaradorligi hali zamonaviy talablarga javob bermaydi, tez tibbiy yordam xizmatlarining malakali kadrlar, dori vositalari, tibbiyot uskunasi, ixtisoslashtirilgan avtotransport va aloqa vositalari bilan taʼminlanganligi darajasi yetarli emasligicha qolmoqda. Kechiktirib boʻlmaydigan tibbiy yordam koʻrsatishni boshqarish, muvofiqlashtirish va nazorat qilishning zamonaviy mexanizmlarini, shuningdek, shoshilinch tibbiyot sohasida mahalliy ilmiy-amaliy ishlanmalarni joriy etishga yetarlicha eʼtibor berilmayapti.

Shoshilinch tibbiy yordamning tezkorligini, texnologikligi va samaradorligini tubdan kuchaytirishga, aholiga oʻz vaqtida malakali shoshilinch tibbiy yordam koʻrsatish boʻyicha davolash, ilmiy-metodik va taʼlim ishlarining butun kompleksini eng yuqori darajada tashkil etishga yoʻnaltirilgan aholiga shoshilinch tibbiy yordam berish tizimini tubdan takomillashtirish maqsadida:

1. Quyidagilar shoshilinch tibbiy yordam tizimini yanada takomillashtirishning muhim yoʻnalishlari etib belgilansin:

mamlakatda sogʻliqni saqlash tizimini yanada isloh qilishning muhim yoʻnalishlaridan biri sifatida zamonaviy asbob-uskunalar bilan jihozlangan va malakali kadrlar bilan butlangan shoshilinch tibbiy yordam berishning zamonaviy, yuqori texnologik va samarali tizimini shakllantirish;

shoshilinch tibbiyot sohasida ilmiy, metodologik va taʼlim salohiyatini har tomonlama rivojlantirish, ushbu maqsadlarda xalqaro hamkorlikni kengaytirish hamda tez tibbiy yordamning respublika xizmatlari faoliyatiga ilgʻor texnologiyalarni va ish uslublarini joriy etish;

shoshilinch tibbiy yordam tizimida aholi orasida oʻlim va nogironlikni pasaytirishga yoʻnaltirilgan zamonaviy tibbiyot asbob-uskunalarini, diagnostika vositalari va usullarini, birlamchi tibbiy-sanitariya yordamni va kechiktirib boʻlmaydigan holatlarni davolashni keng qoʻllash;

shoshilinch tibbiyot sohasida profilaktika, diagnostika va davolash usullari va texnologiyalarini kuchaytirish va samaradorligini oshirish boʻyicha ilmiy tadqiqotlar olib borish, tavsiyalarni ishlab chiqish va amalga oshirish;

zamonaviy axborot-kommunikatsiya texnologiyalarini keng qoʻllash asosida shoshilinch tibbiy yordam xizmatlarining boshqa vazirliklar va idoralarning shoshilinch xizmatlari bilan tezkor oʻzaro hamkorligining samarali mexanizmlarini joriy etish;

shoshilinch tibbiy yordam sohasida tibbiyot kadrlarini tayyorlash, qayta tayyorlash va ularning malakasini oshirish.

2. Oʻzbekiston Respublikasi Sogʻliqni saqlash vazirligi, Iqtisodiyot vazirligi va Moliya vazirligining:

shoshilinch tibbiy yordam koʻrsatish tizimining tezkorlikning zamonaviy jahon talablariga, yuqori texnologikligi va samaradorligiga muvofiq kechiktirib boʻlmaydigan va tez tibbiy yordam xizmatini oʻz ichiga oladigan yagona tashkiliy tuzilmasini tashkil etish;

tez tibbiy yordamning koʻchma brigadalari faoliyatini tezkorlik bilan muvofiqlashtirishni, shuningdek, Oʻzbekiston Respublikasi Ichki ishlar vazirligi, Favqulodda vaziyatlar vazirligi va “Oʻztransgaz” aksiyadorlik kompaniyasining shoshilinch xizmatlari bilan oʻzaro hamkorlikni taʼminlaydigan maʼlumotlar uzatishning yagona bazasini va tarmogʻini tashkil etgan holda shoshilinch tibbiy yordamni boshqarishning axborot tizimini joriy etish;

Respublika shoshilinch tibbiy yordam markazi va uning hududiy filiallarining maʼlumotlarni uzatishning yagona tarmogʻiga birlashtirilgan hamda respublikaning barcha hududi boʻyicha tez tibbiy yordam chaqiriqlarini qabul qilish va qayta ishlashni taʼminlaydigan muvofiqlashtiruvchi-dispetcherlik xizmatlarini tashkil etish;

2017 — 2020-yillarda 240 ta obyektni mukammal taʼmirlash va 369 ta obyektni joriy taʼmirlash yoʻli bilan tez tibbiy yordam xizmati binolari va xonalarining moddiy-texnika bazasini yanada mustahkamlash;

tez tibbiy yordam koʻchma brigadalarini tasdiqlangan normativlarga muvofiq dori vositalari, tibbiyot buyumlari va sarflash materiallari bilan bosqichma-bosqich taʼminlash, shu jumladan, ushbu maqsadlar uchun 2017-yilda moliyalashtirish hajmini kamida 2 baravar koʻpaytirish;

tuman (shahar) tibbiyot birlashmalarining tez tibbiy yordam koʻchma brigadalarini Respublika shoshilinch tibbiy yordam markazining hududiy filiallari orqali dori vositalari va tibbiyot buyumlari bilan markazlashtirilgan tartibda taʼminlash;

2017-yilda 1200 ta ixtisoslashtirilgan avtotransport vositalari sotib olish yoʻli bilan tez tibbiy yordam xizmati, shu jumladan, tuman (shahar) tibbiyot birlashmalarining avtoparkini yangilash;

2017-yil 1-apreldan boshlab tez tibbiy yordam xizmatining ixtisoslashtirilgan avtotransport vositalariga texnik va servis xizmati koʻrsatishni ularni tegishli hududiy ixtisoslashtirilgan avtobazaga berish yoʻli bilan hududiy darajada markazlashtirish toʻgʻrisidagi takliflari maʼqullansin.

3. Oʻzbekiston Respublikasi Sogʻliqni saqlash vazirligining Respublika shoshilinch tibbiy yordam markazi Oʻzbekiston Respublikasi Sogʻliqni saqlash vazirligining Respublika shoshilinch tibbiy yordam ilmiy markazi (keyingi oʻrinlarda Markaz deb ataladi) deb qayta nomlansin.

4. Quyidagilar Markazning asosiy vazifalari etib belgilansin:

aholiga bepul asosda yuqori malakali ixtisoslashtirilgan, yuqori texnologik shoshilinch, tez va kechiktirib boʻlmaydigan tibbiy yordamni tashkil etish va koʻrsatish;

tezkorlikning zamonaviy jahon talablariga, yuqori texnologik va samaradorlikka muvofiq boʻlgan shoshilinch va tez tibbiy yordam xizmati tizimi faoliyatiga tashkiliy-metodik va amaliy rahbarlik qilish;

shoshilinch tibbiy yordam koʻrsatish tizimini, uning birlamchi tibbiy yordam tizimi bilan oʻzaro hamkorligini yanada rivojlantirish va takomillashtirish, aholining nogironligi va oʻlimini pasaytirish boʻyicha dasturlarni ishlab chiqish va amalga oshirish;

yangi, samarali texnologiyalarni yaratish, kechiktirib boʻlmaydigan holatlar diagnostikasi va davolashning ustuvor yoʻnalishlarida ilmiy tadqiqotlar olib borish, shuningdek, ularni sogʻliqni saqlash amaliyotiga joriy etish;

shoshilinch tibbiy yordam koʻrsatish tizimining shifokorlarini va oʻrta tibbiyot xodimlarini qayta tayyorlash va ularning malakasini oshirish, ilmiy va ilmiy-pedagog kadrlar tayyorlash;

yetakchi xorijiy ixtisoslashgan tashkilotlar bilan mustahkam hamkorlik oʻrnatish, tajriba almashish, shoshilinch tibbiyot sohasida qoʻshma tadqiqotlar olib borish.

5. Oʻzbekiston Respublikasi Sogʻliqni saqlash vazirligi, Iqtisodiyot vazirligi va Moliya vazirligining Toshkent viloyati, Zangiota tumani, Xonobod shaharchasidagi 5-uy manzilida joylashgan Toshkent viloyati koʻp tarmoqli tibbiyot markazi negizida Respublika shoshilinch tibbiy yordam ilmiy markazining Toshkent viloyati filialini tashkil etish toʻgʻrisidagi taklifi qabul qilinsin.

Oʻzbekiston Respublikasi Sogʻliqni saqlash vazirligi bir oy muddatda Toshkent viloyati hokimligi bilan birgalikda Toshkent viloyati koʻp tarmoqli tibbiyot markazini Respublika shoshilinch tibbiy yordam ilmiy markazining Toshkent viloyati filialiga aylantirish boʻyicha tashkiliy chora-tadbirlarni belgilangan tartibda taʼminlasin.

6. Oʻzbekiston Respublikasi Vazirlar Mahkamasi:

ushbu Farmon bilan belgilangan vazifalardan kelib chiqib tez tibbiy yordam xizmati faoliyatini yanada takomillashtirish chora-tadbirlari dasturini va Respublika shoshilinch tibbiy yordam ilmiy markazi toʻgʻrisidagi nizomni bir hafta muddatda ishlab chiqsin va tasdiqlash uchun kiritsin;

2017-yil 1-iyulgacha boʻlgan muddatda Markazning va uning hududiy filiallarining muvofiqlashtiruvchi-dispetcherlik xizmatlari faoliyatini tashkil etish boʻyicha kompleks chora-tadbirlarni tasdiqlasin.

7. Oʻzbekiston Respublikasi Sogʻliqni saqlash vazirligi:

Markazning va uning hududiy filiallarining muvofiqlashtiruvchi-dispetcherlik xizmatlari 2019-yil 1-yanvardan boshlab faoliyat koʻrsatishini, shuningdek, ularning Oʻzbekiston Respublikasi Ichki ishlar vazirligi, Favqulodda vaziyatlar vazirligi va “Oʻztransgaz” aksiyadorlik kompaniyasining shoshilinch xizmatlari bilan oʻzaro hamkorligi mexanizmlari joriy etilishini taʼminlasin;

2017-yil 1-apreldan boshlab Toshkent shahar Sogʻliqni saqlash bosh boshqarmasining tez tibbiy yordam stansiyasini uning tumanlardagi kichik stansiyalari bilan birgalikda yuridik shaxs maqomini saqlab qolgan holda tarkibiy boʻlinma sifatida Markazga bersin.

8. Belgilab qoʻyilsinki:

“Sogʻliqni saqlash” tarmogʻi boʻyicha Oʻzbekiston Respublikasi Sogʻliqni saqlash vazirligiga ajratiladigan Oʻzbekiston Respublikasi Davlat budjeti mablagʻlari va qonun hujjatlarida taqiqlanmagan boshqa manbalar Tez tibbiy yordam stansiyasi va uning tumanlardagi kichik stansiyalari faoliyatini moliyalashtirish manbalari hisoblanadi;

Markazning Tez tibbiy yordam stansiyasiga avtotransport xizmati koʻrsatish “Toshkent shahar sogʻliqni saqlash bosh boshqarmasining ixtisoslashtirilgan avtotransport korxonasi” davlat korxonasi tomonidan taʼminlanadi.

9. Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlar boʻyicha muvofiqlashtiruvchi-dispetcherlik xizmatlari ehtiyojlari uchun olib kelinadigan texnologik va telekommunikatsiya uskunasi, butlovchi buyumlar, ehtiyot qismlar va dasturiy taʼminlash 2020-yil 31-dekabrgacha boʻlgan davrda bojxona toʻlovlaridan ozod qilinsin (bojxona yigʻimlari bundan mustasno).

10. Oʻzbekiston Respublikasi Prezidentining ilovaga muvofiq ayrim hujjatlariga oʻzgartirish va qoʻshimchalar kiritilsin.

11. Ushbu Farmonning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidentining Davlat maslahatchisi A.N. Yunusxodjayev zimmalariga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 16-mart,

PF-4985-son

Oʻzbekiston Respublikasi Prezidentining 2017-yil 16-martdagi PF-4985-son Farmoniga ILOVA

Oʻzbekiston Respublikasi Prezidentining ayrim hujjatlariga kiritilayotgan

OʻZGARTIRISH VA QOʻSHIMCHALAR

1. Oʻzbekiston Respublikasi Prezidentining “Oʻzbekiston Respublikasi sogʻliqni saqlash tizimini isloh qilish davlat dasturi toʻgʻrisida” 1998-yil 10-noyabrdagi PF-2107-son Farmonining 2-bandi ikkinchi — toʻrtinchi xatboshilari, shuningdek Farmonga 8 va 9-ilovalar oʻz kuchini yoʻqotgan deb hisoblansin.

Oʻzbekiston Respublikasi Prezidentining “Shoshilinch tibbiy yordamni yanada takomillashtirish chora-tadbirlari toʻgʻrisida”gi Farmoniga

SHARH

Mamlakatimizda aholi salomatligini yanada mustahkamlash, jismonan sogʻlom va yetuk avlodni voyaga yetkazishni taʼminlash davlat siyosatining ustuvor yoʻnalishlaridan biri hisoblanadi. Bugungi kunda yurtimiz tibbiyot muassasalarida eng ilgʻor va zamonaviy shart-sharoitlar yaratish hamda tibbiy xizmat sifatini yanada oshirishga jiddiy eʼtibor qaratilmoqda. Prezidentimiz Shavkat Mirziyoyev har bir maʼruzasi va nutqida, turli uchrashuvlarda xalqimizni rozi qilish uchun, eng avvalo, uning sifatli tibbiy xizmatga boʻlgan talabini qondirish nihoyatda zarurligini doimo taʼkidlab kelmoqdalar. Davlatimiz rahbarining joriy yil 5-yanvar va 7-fevral kunlari sogʻliqni saqlash sohasi vakillari bilan oʻtkazgan uchrashuvlari ham tizimdagi mavjud holatni chuqur tanqidiy tahlil qilib, yigʻilib qolgan masalalarni samarali hal etish yoʻlida muhim qadam boʻldi. Bu borada, ayniqsa, mamlakatimizda qabul qilingan va bosqichma-bosqich amalga oshirilayotgan sogʻliqni saqlash tizimini isloh qilishga oid huquqiy hujjatlar alohida oʻrin tutmoqda. Hozirgi vaqtda bu tizim Respublika shoshilinch tibbiy yordam markazi va uning viloyatlardagi filiallari, tuman va shahar tibbiyot birlashmalari qoshidagi boʻlimlari, mamlakatimizning barcha hududlaridagi tez tibbiy yordam xizmati stansiyalari va sanitar aviatsiya xizmatini oʻz ichiga oladi. Eng asosiysi, soha rivoji yoʻlida amalga oshirilayotgan keng koʻlamli chora-tadbirlar natijasida shoshilinch tibbiy yordam tizimida yiliga 600 ming nafardan ziyod bemorga yuqori malakali statsionar va 1 million nafardan ortiq bemorga ambulator yordam hamda 7 milliondan ziyod chaqiriqlar boʻyicha xizmat koʻrsatilmoqda. Shu bilan birga, hozirgi vaqtda sohada zudlik bilan hal etishni talab qiladigan bir qator muammo va masalalar ham borki, u aniq chora-tadbirlar koʻrishni taqozo etmoqda. Avvalambor, shoshilinch tibbiyot sohasidagi meʼyoriy-huquqiy hujjatlarni takomillashtirish, moddiy-texnik bazani mustahkamlash, ilmiy ishlanmalarni rivojlantirish, malakali kadrlar, dori vositalari, tibbiy uskunalar, ixtisoslashtirilgan avtotransport va aloqa vositalari bilan taʼminlanish darajasini yaxshilash dolzarb masala boʻlib qolmoqda. Bu esa tez tibbiy yordam faoliyatini boshqarish va muvofiqlashtirishning amaldagi tizimini qayta koʻrib chiqish, shoshilinch tibbiy yordam sifatini tubdan yaxshilashga doir tezkor choralar koʻrish zaruratini yuzaga keltirmoqda. Shu maqsadda Oʻzbekiston Respublikasi Prezidentining “Shoshilinch tibbiy yordamni yanada takomillashtirish chora-tadbirlari toʻgʻrisida”gi Farmonida mazkur tizimni takomillashtirishning eng muhim yoʻnalishlarini belgilash, tez tibbiy yordam xizmatining sifat va samaradorligini oshirish, shoshilinch tibbiy yordam sohasidagi ilmiy tadqiqotlar koʻlamini kengaytirish hamda bu borada xalqaro hamkorlikni chuqurlashtirishga qaratilgan aniq vazifalar belgilab berildi. Farmonda, shuningdek, shoshilinch tibbiy yordam tizimida zamonaviy ilmiy-texnik yutuqlar va axborot-kommunikatsiya texnologiyalarini keng qoʻllash, shoshilinch tibbiy yordam koʻrsatish tizimining boshqa vazirliklar va idoralarning shoshilinch xizmatlari bilan tezkor hamkorligini taʼminlash boʻyicha zamonaviy mexanizmlarni tatbiq qilish, kadrlarni tayyorlash borasida ilgʻor usullarni joriy etish koʻzda tutilgan. Farmon bilan Oʻzbekiston Respublikasi Sogʻliqni saqlash vazirligining Respublika shoshilinch tibbiy yordam markazi Oʻzbekiston Respublikasi Sogʻliqni saqlash vazirligining Respublika shoshilinch tibbiy yordam ilmiy markazi, deb qayta nomlandi va Markazning asosiy vazifalari belgilandi. Xususan, aholiga bepul asosda malakali ixtisoslashtirilgan, yuqori texnologiyali shoshilinch, tez va kechiktirib boʻlmaydigan tibbiy xizmat koʻrsatish, samaradorligi boʻyicha jahon talablariga mos keladigan shoshilinch tibbiy yordam tizimining faoliyatiga tashkiliy-uslubiy rahbarlik qilish, kechiktirib boʻlmaydigan holatlarning profilaktikasi, diagnostikasi va ularni davolash boʻyicha yangi, samarali texnologiyalarni yaratish, xorijiy turdosh tashkilotlar bilan yaqin hamkorlik oʻrnatish kabi yoʻnalishlar Markazning asosiy vazifalari sifatida qayd etildi. Bundan tashqari, Markaz shoshilinch tibbiy yordam koʻrsatish sohasida fan va ilmiy tadqiqotlar rivojlanishining ustuvor yoʻnalishlarini shakllantirish, shoshilinch tibbiy yordam koʻrsatish tizimini yanada takomillashtirish va ilgʻor texnologiyalarni yaratish yuzasidan ilmiy tadqiqotlar olib borishni, shifokorlar va oʻrta tibbiyot xodimlarini qayta tayyorlash va malakasini oshirish, shoshilinch tibbiy yordam koʻrsatish tizimi uchun ilmiy va ilmiy-pedagog kadrlar tayyorlashni ham muvofiqlashtirib boradi. Farmonda taʼkidlanganidek, 2017-yilning 1-iyuligacha yagona maʼlumotlar bazasi va maʼlumotlarni uzatish tarmogʻini yaratgan holda, tez tibbiy yordam brigadalarining faoliyatini tezkor boshqarish va muvofiqlashtirilishini taʼminlovchi Markaz va uning hududiy filiallarining muvofiqlashtiruvchi-dispetcherlik xizmatlari faoliyatini tashkil qilish boʻyicha chora-tadbirlar majmuasi ishlab chiqiladi. Chunki, tez tibbiy yordam faoliyatida dispetcherlik xizmatlarini yaxshilash, uning kechayu kunduz samarali ishlashini taʼminlash bugungi kun talabidir. Shu munosabat bilan 2019-yilning 1-yanvaridan boshlab Ichki ishlar vazirligi, Oʻzbekiston Respublikasi Favqulodda vaziyatlar vazirligi va “Oʻztransgaz” aksiyadorlik kompaniyasi bilan oʻzaro hamkorlikda faoliyat yurituvchi muvofiqlashtiruvchi-dispetcherlik xizmatlari joriy qilinadi. Ushbu xizmat faoliyatida kuzatilayotgan kamchiliklarga tizimda avtotransport vositalari bilan bogʻliq masalalar ham sabab boʻlayotgani koʻpchilikka maʼlum. Endilikda Markazning Tez tibbiy yordam stansiyalariga avtotransport xizmatini koʻrsatish “Toshkent shahar sogʻliqni saqlash bosh boshqarmasining ixtisoslashtirilgan avtotransport korxonasi” davlat korxonasi tomonidan amalga oshiriladi. Bu esa avtotransport vositalarining har doim soz holatda boʻlishini va kerakli manzilga oʻz vaqtida yetib borishini taʼminlashga xizmat qiladi. Ayni vaqtda kechiktirib boʻlmaydigan vaziyatlarda koʻplab insonlarning hayotini saqlab qolish maqsadida shoshilinch tibbiy yordam xizmati muassasalarining moddiy-texnik bazasini mustahkamlash, tizimning transport parkini boyitish uchun davlat budjeti va boshqa mablagʻlar hisobidan 1200 ta tez tibbiy yordam avtomobili xarid qilinadigan boʻldi. Tajribadan maʼlumki, zamonaviy texnologiyalarni amaliyotga joriy etish tibbiy xizmat sifatini bir necha barobar yaxshilash imkonini yaratadi. Farmonda ushbu yoʻnalishda imtiyozlar yaratishga alohida eʼtibor qaratilgan. Shu maqsadda 2020-yilning 31-dekabrigacha Oʻzbekiston Respublikasi Vazirlar Mahkamasi tomonidan tasdiqlangan roʻyxatlar boʻyicha Muvofiqlashtiruvchi-dispetcherlik xizmatlari ehtiyojlarini taʼminlash uchun olib kirilayotgan yuqori texnologiyali va telekommunikatsiya jihozlari, butlovchi qismlar, ehtiyot qismlar va dasturiy taʼminotni bojxona toʻlovlaridan ozod etish belgilandi. Yana bir eʼtiborli jihati shundaki, Farmonga koʻra, Toshkent viloyati koʻp tarmoqli tibbiyot markazi bazasida Respublika shoshilinch tibbiy yordam ilmiy markazining Toshkent viloyati filiali tashkil etiladi. Agar shu vaqtgacha ushbu hududda bunday tibbiy muassasa mavjud boʻlmaganini nazarda tutadigan boʻlsak, bu yangilik viloyat aholisi salomatligini saqlash borasida qanday katta ahamiyat kasb etishini tasavvur qilish qiyin emas, albatta. Yana bir yangilik — shu yilning 1-aprelidan boshlab Toshkent shahar sogʻliqni saqlash bosh boshqarmasi tez tibbiy yordam stansiyasi uning tumanlardagi kichik stansiyalari bilan birga, yuridik shaxs maqomini saqlagan holda, tarkibiy boʻlinma sifatida Markazga berilishi koʻzda tutilgan. Prezidentimizning mazkur Farmonida koʻzda tutilgan eʼtibor va berilayotgan imtiyozlar, soha uchun ajratilayotgan zamonaviy tibbiy asbob-uskunalar hamda ularning noyob texnologik imkoniyatlari tizim mutaxassislari olib borayotgan ilmiy izlanishlarning saviyasini yuksak darajada oshirish, shoshilinch holatlarda diagnostika va davolashning yangi istiqbolli usullarini ishlab chiqish, rivojlantirish va amaliyotga tatbiq qilish imkoniyatlarini yanada kengaytirishda muhim omil boʻlib xizmat qiladi. Bu esa, oʻz navbatida, davolash jarayonining samarasini oshiribgina qolmay, statsionar davolash muddatlarini va buning natijasida sarf-xarajatlarni ham keskin kamaytirishi shubhasiz. Bundan tashqari, ushbu Farmon Markazning barcha filiallarini eng yuksak mezonlarga javob beradigan tibbiy apparatlar, xususan, yurak va qon-tomirlarning ultratovush doplerografiyasi, zamonaviy angiografik tuzilmasi, multispiral kompyuter tomografiya va magnit-rezonans tomograf apparatlari bilan toʻliq taʼminlashi uchun imkoniyat yaratadi. Xulosa qilib aytganda, mazkur Farmon hamda u bilan tasdiqlangan huquqiy hujjatlar shoshilinch va tez tibbiy yordam tizimini yanada takomillashtirish, koʻrsatilayotgan tibbiy xizmatlar sifatini yangi bosqichga koʻtarish, sohada ilmiy-tadqiqot faoliyati koʻlamini kengaytirish hamda ilgʻor xorijiy tajribalarni amaliyotga joriy etishda dasturilamal boʻlib xizmat qiladi. Mamlakatimizda aholi salomatligi, inson manfaatlari, xalqimiz farovonligi haqida soʻz borar ekan, bu masalalar doimo davlatimizning eʼtibor markazida boʻlib qoladi. Ana shu ezgu maqsadlarning mamlakatimiz Prezidenti Shavkat Mirziyoyev tomonidan eʼlon qilingan Xalq bilan muloqot va inson manfaatlari yilida roʻyobga chiqarilishi esa yanada ahamiyatlidir.