2017-yilgi Navroʻz umumxalq bayramiga tayyorgarlik koʻrish va uni oʻtkazish toʻgʻrisida (PQ-2801-son)
28.02.2017
Oʻzbekiston Respublikasi Prezidentining
Qarori
Azal-azaldan xalqimizning ezgu va goʻzal qadriyatlarini, uning oliyjanob orzu-intilishlarini oʻzida mujassam etib, qadim ajdodlarimizdan bizga oʻlmas meros sifatida bezavol oʻtib kelayotgan Navroʻzi olam mustaqillik yillarida mamlakatimizda yashayotgan millati, tili va dinidan qatʼi nazar, barcha vatandoshlarimiz orziqib kutadigan, tom maʼnodagi umumxalq bayramiga aylanib qoldi.
Sharqona yangi yilning boshlanishi, tabiat uygʻonishining ramzi, asl milliy, eng ardoqli bayram boʻlmish Navroʻzning yurtimizda mehr-oqibat, hamjihatlik, insoniylik, bagʻrikenglik va bunyodkorlik, xayr-saxovat muhitini yanada mustahkamlash, yosh avlodni milliy anʼanalarimizga sadoqat va umuminsoniy qadriyatlarga hurmat ruhida kamol toptirishdagi oʻrni va taʼsiri tobora ortib borayotganini inobatga olib hamda bu qutlugʻ ayyomni yuksak saviyada nishonlash maqsadida:
1. 2017-yilgi Navroʻz umumxalq bayramiga tayyorgarlik koʻrish va uni oʻtkazish boʻyicha tashkiliy qoʻmita tarkibi ilovaga* muvofiq tasdiqlansin.
* Ilova berilmaydi.
Tashkiliy qoʻmita Navroʻz bayramini poytaxtimiz Toshkent shahrida, Qoraqalpogʻiston Respublikasi va viloyatlar markazlarida, barcha shahar, tuman va qishloqlarda umumxalq sayillari shaklida yuqori darajada oʻtkazishga qaratilgan tashkiliy-amaliy, madaniy-maʼnaviy tadbirlar rejasini oʻn kun muddatda ishlab chiqsin va amalga oshirsin.
2. Tadbirlar rejasini tayyorlashda quyidagi masalalarga alohida eʼtibor qaratilsin:
Navroʻz kunlarida insonning tabiat bilan uzviyligini, oʻzini uning ajralmas bir qismi sifatida his etishini ifoda etadigan, atrof-muhitni, ona zaminni ardoqlab, uning neʼmatlarini, bugungi tinch hayotni qadrlab, shukronalik tuygʻusi bilan yashashga daʼvat qiladigan maʼnaviy-maʼrifiy tadbirlarni uyushtirish;
barcha shahar va qishloqlarda boʻlib oʻtadigan tadbirlarda, ommaviy axborot vositalarida Navroʻz bayramining tarixi, uni nishonlash bilan bogʻliq urf-odatlar, anʼanalar va qadriyatlarimizning mohiyati va ahamiyatini keng yoritish;
Navroʻzning ruhi va falsafasida oʻz aksini topgan mehr-muruvvat, ahillik va totuvlik, yoshi ulugʻ insonlar, tabarruk otaxon va onaxonlarni har tomonlama eʼzozlash, koʻmakka muhtoj insonlarga begʻaraz yordam berish bilan bogʻliq xayriya tadbirlarini amalga oshirish;
yangi dehqonchilik mavsumining boshlanishi, yasharish va yangilanish, qut-baraka, obodlik va farovonlik ramzi boʻlmish Navroʻz faslida mahallalarda, shahar va qishloqlarda hasharlar, keng koʻlamdagi obodonchilik va koʻkalamzorlashtirish ishlarini tashkil etish;
Qoraqalpogʻiston Respublikasi, viloyatlar va Toshkent shahrida boʻlib oʻtadigan sayillarga folklor guruhlari, badiiy havaskorlik jamoalari, dorbozlar, sirk artistlari, oilaviy ansambllar, baxshilar, shoirlar, shuningdek, professional ijrochilar va isteʼdodli estrada artistlarini keng jalb etish;
sayil dasturlarini tayyorlashda xalq oʻyinlari, folklor sanʼatining eng yaxshi namunalarini, elu yurtning dilidan chuqur joy olgan, qadimiy urf-odatlar, ezgu insoniy tuygʻularni tarannum etadigan kuy va qoʻshiqlar, oʻlan va laparlarga keng oʻrin berish.
3. Belgilab qoʻyilsinki, oʻtkaziladigan bayram tadbirlari:
Qoraqalpogʻiston Respublikasi budjeti va viloyatlarda mahalliy budjetlar hamda joylardagi homiylik xayriyalari hisobidan;
Toshkent shahrida respublika budjeti va Toshkent shahar mahalliy budjeti mablagʻlari hisobidan teng ulushlarda qoplanadi.
4. Oʻzbekiston Milliy axborot agentligi, Oʻzbekiston Milliy teleradiokompaniyasi, “Jahon” axborot agentligi va boshqa ommaviy axborot vositalariga Navroʻz umumxalq bayramiga tayyorgarlik koʻrish va uni oʻtkazish boʻyicha amalga oshirilayotgan ishlarni atroflicha yoritib borish tavsiya etilsin.
5. Mazkur qarorning ijrosini taʼminlash Oʻzbekiston Respublikasining Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2017-yil 28-fevral,
PQ-2801-son