Yuridik xizmat xodimining ish joyini moddiy-texnika jihatidan jihozlashga doir minimal talablarni tasdiqlash haqida (2863-son)

28.02.2017

Oʻzbekiston Respublikasi Adliya vazirining

buyrugʻi

[Oʻzbekiston Respublikasi Adliya vazirligi tomonidan 2017-yil 28-fevralda roʻyxatdan oʻtkazildi, roʻyxat raqami 2863]

Oʻzbekiston Respublikasi Prezidentining 2017-yil 19-yanvardagi PQ-2733-sonli “Yuridik xizmat faoliyatini tubdan takomillashtirish chora-tadbirlari toʻgʻrisida”gi qarorining 7-bandiga muvofiq buyuraman:

1. Yuridik xizmat xodimining ish joyini moddiy-texnika jihatidan jihozlashga doir minimal talablar ilovaga muvofiq tasdiqlansin.

2. Mazkur buyruq davlat roʻyxatidan oʻtkazilsin va bu haqda Idoraviy normativ-huquqiy hujjatlarni davlat roʻyxatidan oʻtkazish boshqarmasi (B. Boliyev) Idoraviy normativ-huquqiy hujjatlarning davlat reyestriga tegishli yozuv kiritsin.

3. Huquqiy targʻibot va axborot boshqarmasi (A. Ochilov) mazkur idoraviy normativ-huquqiy hujjatni “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

4. Yuridik xizmatlarning faoliyatini muvofiqlashtirish va metodik taʼminlash boshqarmasi (Sh. Saidov) tegishli davlat organlari, xoʻjalik boshqaruvi organlari, davlat korxonalari, muassasalari va tashkilotlari vakillari ishtirokida bir oylik muddatda Yuridik xizmat xodimining ish joyini moddiy-texnika jihatidan jihozlashga doir minimal talablarni tushuntirish boʻyicha targʻibot ishlarini amalga oshirsin.

5. Mazkur buyruq rasmiy eʼlon qilingan kundan eʼtiboran kuchga kiradi.

Vazir M. IKRAMOV

Toshkent sh.,

2017-yil 28-fevral,

41-mh-son

Oʻzbekiston Respublikasi adliya vazirining 2017-yil 28-fevraldagi 41-mh-son buyrugʻiga ILOVA

Yuridik xizmat xodimining ish joyini moddiy-texnika jihatidan jihozlashga doir minimal talablar

Mazkur Minimal talablar Oʻzbekiston Respublikasi Prezidentining 2017-yil 19-yanvardagi PQ-2733-sonli “Yuridik xizmat faoliyatini tubdan takomillashtirish chora-tadbirlari toʻgʻrisida”gi qarorining 7-bandiga muvofiq davlat organlari, xoʻjalik boshqaruvi organlari, davlat korxonalari, muassasalari va tashkilotlarining yuridik xizmati (bundan buyon matnda davlat organlari va tashkilotlari yuridik xizmati deb yuritiladi) xodimlarining ish joyini moddiy-texnika jihatidan jihozlashga doir minimal talablarni belgilaydi.

1. Yuridik departament va yuridik boshqarma davlat organlari va tashkilotlari yuridik xizmati uchun quyidagi zarur shart-sharoitlar yaratilishi lozim:

2 yoki 3 ta alohida xizmat xonasi;

har bir xodim uchun alohida mebel jihozlari (stol, stullar va shkaf);

1 ta seyf yoki metall shkaf;

har bir xodim uchun alohida zamonaviy kompyuter texnikasi;

1 ta skaner, 1 ta nusxa koʻchiruvchi apparat, 2 ta printer yoki ushbu qurilmalar funksiyasini bajaruvchi 2 ta koʻp funksiyali printer;

har bir kompyuter uchun alohida UPS qurilmasi;

telefon aloqasi va har bir xodim uchun alohida telefon apparati;

internet tarmogʻi;

kanselyariya anjomlari (soni va miqdori zaruriyatga koʻra).

2. Yuridik boʻlim shaklidagi davlat organlari va tashkilotlari yuridik xizmati uchun quyidagi zarur shart-sharoitlar yaratilishi lozim:

1 yoki 2 ta alohida xizmat xonasi;

har bir xodim uchun alohida mebel jihozlari (stol, stullar va shkaf);

1 ta seyf yoki metall shkaf;

har bir xodim uchun alohida zamonaviy kompyuter texnikasi;

1 ta skaner, 1 ta nusxa koʻchiruvchi apparat, 1 ta printer yoki ushbu qurilmalar funksiyasini bajaruvchi 1 ta koʻp funksiyali printer;

har bir kompyuter uchun alohida UPS qurilmasi;

telefon aloqasi va har bir xodim uchun alohida telefon apparati;

internet tarmogʻi;

kanselyariya anjomlari (soni va miqdori zaruriyatga koʻra).

3. Yuridik byuro shaklidagi davlat organlari va tashkilotlari yuridik xizmati uchun quyidagi zarur shart-sharoitlar yaratilishi lozim:

1 ta alohida xizmat xonasi;

har bir xodim uchun alohida mebel jihozlari (stol, stullar va shkaf);

1 ta seyf yoki metall shkaf;

har bir xodim uchun alohida zamonaviy kompyuter texnikasi;

1 ta skaner, 1 ta nusxa koʻchiruvchi apparat, 1 ta printer yoki ushbu qurilmalar funksiyasini bajaruvchi 1 ta koʻp funksiyali printer;

har bir kompyuter uchun alohida UPS qurilmasi;

telefon aloqasi va har bir xodim uchun alohida telefon apparati;

internet tarmogʻi;

kanselyariya anjomlari (soni va miqdori zaruriyatga koʻra).

4. Bitta shtatdan iborat bosh yuriskonsult, yetakchi yuriskonsult, katta yuriskonsult yoki yuriskonsult shaklidagi davlat organlari va tashkilotlari yuridik xizmati uchun quyidagi zarur shart-sharoitlar yaratilishi lozim:

1 ta alohida xizmat xonasi;

mebel jihozlari (stol, stullar va shkaf);

1 ta seyf yoki metall shkaf;

zamonaviy kompyuter texnikasi;

1 ta skaner, 1 ta nusxa koʻchiruvchi apparat, 1 ta printer yoki ushbu qurilmalar funksiyasini bajaruvchi 1 ta koʻp funksiyali printer;

UPS qurilmasi;

telefon aloqasi va telefon apparati;

internet tarmogʻi;

kanselyariya anjomlari (soni va miqdori zaruriyatga koʻra).

5. Davlat organlari va tashkilotlari yuridik xizmati uchun quyidagilarni oʻzida mujassam etgan qonunchilik hujjatlari va normativ-huquqiy hujjatlar fondi yaratilishi lozim:

Oʻzbekiston Respublikasi qonunchilik hujjatlari maʼlumotlari milliy bazasi tizimidan uzluksiz foydalanish imkoniyati;

huquqiy nashrlar va boshqa yuridik adabiyotlar (soni va miqdori zaruriyatga koʻra).

6. Davlat organlari, xoʻjalik boshqaruvi organlari, davlat korxonalari, muassasalari va tashkilotlarining rahbarlari yuridik xizmat faoliyati uchun zarur shart-sharoitlar yaratilishi uchun shaxsan javobgar boʻladi.

7. Davlat organlari, xoʻjalik boshqaruvi organlari, davlat korxonalari, muassasalari va tashkilotlar oʻz mablagʻlari hisobidan yuridik xizmat xodimlari uchun qulay shart-sharoitlar yaratish boʻyicha mazkur Minimal talablarda nazarda tutilmagan boshqa shart-sharoitlarni ham yaratishi mumkin.

8. Mazkur Minimal talablar Oʻzbekiston Respublikasi Mehnat vazirligi bilan kelishilgan.

Mehnat vaziri A. ABDUXAKIMOV

2017-yil 28-fevral