Oliy taʼlim muassasalarining rahbar va pedagog kadrlarini qayta tayyorlash va ularning malakasini oshirish kurslari toʻgʻrisidagi Nizomga oʻzgartirish va qoʻshimchalar kiritish haqida (103-son)

27.02.2017

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oliy taʼlim muassasalarining rahbar va pedagog kadrlarini qayta tayyorlash va malakasini oshirish tizimini yanada takomillashtirish chora-tadbirlari toʻgʻrisida” 2015-yil 12-iyundagi PF-4732-son Farmoniga muvofiq oliy taʼlim muassasalari pedagog kadrlarini qayta tayyorlash va malakasini oshirish tizimining oʻqitish shakllari va usullarini, pedagog kadrlar tarkibining sifat darajasini zamonaviy talablardan kelib chiqqan holda takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasining 2015-yil 20-avgustdagi 242-son qarori (Oʻzbekiston Respublikasi QHT, 2015-y., 33-son, 442-modda) bilan tasdiqlangan Oliy taʼlim muassasalarining rahbar va pedagog kadrlarini qayta tayyorlash va ularning malakasini oshirish kurslari toʻgʻrisidagi Nizomga ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasi Oliy va oʻrta maxsus taʼlim vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Taʼlim va ilm-fan masalalari axborot-tahlil departamentiga va Oʻzbekiston Respublikasi Oliy va oʻrta maxsus taʼlim vaziri R.S. Kasimov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 27-fevral,

103-son

Vazirlar Mahkamasining 2017-yil 27-fevraldagi 103-son qaroriga ILOVA

Oliy taʼlim muassasalarining rahbar va pedagog kadrlarini qayta tayyorlash va ularning malakasini oshirish kurslari toʻgʻrisidagi Nizomga kiritilayotgan

oʻzgartirish va qoʻshimchalar

1. 12-band quyidagi tahrirda bayon qilinsin:

“12. Qayta tayyorlash va malaka oshirish kurslarida oʻqish yakunlari boʻyicha attestatsiyadan oʻtmagan oliy taʼlim muassasalarining rahbar va pedagog kadrlari bir yil mobaynida pulli asosda oʻqishning tegishli yoki turdosh yoʻnalishi (mutaxassisligi) boʻyicha keyingi qayta tayyorlash va malaka oshirish kursi yakunida attestatsiyadan oʻtishi shart.

Oliy taʼlim muassasalari rahbar va pedagog kadrlarini qayta tayyorlash va malaka oshirish kurslarini takroran oʻzlashtirishi asosiy ishdan ajralmagan holda kurslarning oʻquv dasturlarini mustaqil ravishda yoki masofadan oʻqitish usullari orqali oʻzlashtirish asosida amalga oshiriladi.

Mustaqil ravishda yoki masofadan oʻqitish usullari orqali qayta tayyorlash va malaka oshirish kurslari oʻquv dasturlari boʻyicha tayyorlanib kelgan tinglovchilar yakuniy attestatsiyaga kiritiladi. Yakuniy attestatsiya tegishli yoʻnalishlar boʻyicha tayanch oliy taʼlim muassasalari huzuridagi attestatsiya komissiyalari tomonidan amalga oshiriladi”.

2. Quyidagi mazmundagi 121-band qoʻshilsin:

“121. Qayta tayyorlash va malaka oshirish kurslarida uzrsiz sabablarga koʻra dars qoldirgani uchun tinglovchilar safidan chiqarilgan oliy taʼlim muassasalarining rahbar va pedagog kadrlari pulli asosda qayta tayyorlash va malaka oshirish kursidan takroran oʻtishi hamda oʻqishning tegishli yoʻnalishi (mutaxassisligi) boʻyicha keyingi qayta tayyorlash va malaka oshirish kursida attestatsiyadan oʻtishi shart.

Qayta tayyorlash va malaka oshirish kurslaridan takroran oʻtish 288 soat hajmida tashkil etiladi”.

3. 13-bandning ikkinchi xatboshidagi “3 yil” soʻzlari “bir yil” soʻzlari bilan almashtirilsin.

4. 16-bandni oʻzbek tilidagi matnining uchinchi xatboshidagi “bazaviy” soʻzi “tayanch” soʻzi bilan almashtirilsin.

5. 18-bandning uchinchi xatboshidagi va 35-bandning ikkinchi xatboshidagi “Nizom 12 va 13-bandlarining” soʻzlari “Nizom 121 va 13-bandlarining” soʻzlari bilan almashtirilsin.

6. 23-band quyidagi tahrirda bayon qilinsin:

“23. Oʻzbekiston Respublikasi Oliy va oʻrta maxsus taʼlim vazirligi:

umumiy rahbarlikni amalga oshiradi, qayta tayyorlash va malaka oshirish kurslarining oʻquv jarayonini takomillashtirish mexanizmlari va uslublarini belgilaydi, tegishli normativ-huquqiy hujjatlarni (masofadan oʻqitish taʼlim usullarini tashkil etish va oʻtkazish, tinglovchilarining bitiruv (loyiha) ishini tayyorlash va himoyaga taqdim etish, pedagogik (malakaviy) amaliyotni tashkil etish va oʻtkazish tartiblarini) tasdiqlaydi, shuningdek qayta tayyorlash va malaka oshirish yoʻnalishlarining oliy taʼlim yoʻnalishlari va mutaxassisliklar klassifikatori bilan mutanosibligini taʼminlaydi;

qayta tayyorlash va malaka oshirish kurslaridan, shuningdek masofadan oʻqitish usullari orqali kurslardan oʻtishi kerak boʻlgan tinglovchilarning prognoz qilinayotgan kontingentini belgilaydi;

oliy taʼlim muassasalari rahbar va pedagog kadrlarining talab qilinadigan malakasini taʼminlash boʻyicha maqsadli topshiriqlarni tasdiqlaydi”.

7. 24-bandda:

a) oʻzbek tilidagi matnning toʻrtinchi xatboshidagi “bazaviy” soʻzi “tayanch” soʻzi bilan almashtirilsin;

b) quyidagi mazmundagi oltinchi xatboshi qoʻshilsin:

“kurslar yakunidagi attestatsiyadan oʻtmagan tinglovchilar uchun tayanch oliy taʼlim muassasalari tomonidan tegishli yoʻnalishlarning oʻquv dasturiga mos holda ishlab chiqilgan oʻquv-metodik resurslar asosida masofadan oʻqitishning onlayn va offlayn shakllarida takroriy qayta tayyorlash va malaka oshirish kurslarini tashkil etadi”;

v) oltinchi — oʻn ikkinchi xatboshilar tegishli ravishda yettinchi — oʻn uchinchi xatboshilar deb hisoblansin.

8. 25-bandda:

a) quyidagi mazmundagi toʻrtinchi xatboshi qoʻshilsin:

“masofadan oʻqitish usullari asosida oliy taʼlim muassasalari pedagog kadrlari uchun tashkil etiladigan qayta tayyorlash va malaka oshirish kurslarining tegishli oʻquv-metodik resurslarini ishlab chiqadi”;

b) toʻrtinchi — sakkizinchi xatboshilar tegishli ravishda beshinchi — toʻqqizinchi xatboshilar deb hisoblansin.

9. 30-bandga quyidagi mazmundagi xatboshi qoʻshilsin:

“Masofadan oʻqitish usullari asosidagi takroriy kurslarda oʻquv mashgʻulotlari onlayn va offlayn shakllarida tashkil etiladi”.

10. 32-bandga quyidagi mazmundagi xatboshilar qoʻshilsin:

“Istisno tariqasida:

tinglovchilar kontingenti yetarli boʻlmagan yoʻnalishlarda, jumladan rus yoki qoraqalpoq tilida dars olib boriladigan guruhlarda, tinglovchilar kontingenti bir guruh meʼyorida yigʻilmaydigan kam sonli alohida taʼlim yoʻnalishlarida oʻquv jarayonini tashkillashtirishda bir guruhdagi tinglovchilar soni kamida 5 nafar etib belgilanishi mumkin;

yil davomida 5 nafargacha pedagog kadrlar yigʻilmaydigan alohida taʼlim yoʻnalishlarida malaka oshirish guruhi mavjud holatdan kelib chiqib, Oʻzbekiston Respublikasi Oliy va oʻrta maxsus taʼlim vazirligi bilan kelishgan holda, qayta tayyorlash va malaka oshirish boʻyicha tayanch oliy taʼlim muassasasining buyrugʻi bilan tinglovchilar soni 5 nafardan kam guruh shakllantirilishi yoki ular uchun malaka oshirish masofadan oʻqitish usullari orqali amalga oshirilishi mumkin”.

11. 34-bandga quyidagi mazmundagi xatboshi qoʻshilsin:

“Masofadan oʻqitish usullari asosidagi takroriy kurslarda tinglovchilarning assisment topshiriqlari (joriy nazorat) onlayn shaklida tashkillashtiriladi”.

12. Nizomga ilovaning (Oliy taʼlim muassasalarining rahbar va pedagog kadrlarini qayta tayyorlash va ularning malakasini oshirish kurslarini tashkil etish sxemasining) 5-bosqichidagi “pulli asosda kurslardan takroran oʻtishi va oʻqishning tegishli yoʻnalishi” soʻzlari “pulli asosda oʻqishning tegishli yoʻnalishi” soʻzlari bilan almashtirilsin.