Davlat ulushi ustuvor boʻlgan aksiyadorlik jamiyatlarida korporativ boshqaruvni yanada takomillashtirish chora-tadbirlari toʻgʻrisida (PQ-2635-son)

17.10.2016

Oʻzbekiston Respublikasi Prezidentining

Qarori

Iqtisodiyot raqobatbardoshligining yanada oʻsishini taʼminlash, davlat ulushiga ega aksiyadorlik jamiyatlarida korporativ boshqaruvning iqtisodiy samarali mexanizmlarini kengaytirish, ular faoliyatini tashkil etish va boshqarishning xalqaro standartlari asosida ularning shaffofligi va hisobdorligini taʼminlash maqsadida, shuningdek, respublikada amalga oshirilayotgan Iqtisodiyotni yanada isloh qilish, tarkibiy oʻzgartirish va diversifikatsiyalash dasturining asosiy yoʻnalishlaridan kelib chiqib:

1. Iqtisodiyot va infratuzilmani rivojlantirishda strategik oʻringa va ahamiyatga ega davlat ulushi ishtirokidagi korxonalar aksiyadorlik jamiyati shaklida saqlab qolinsin va ularning faoliyati korporativ boshqaruvning xalqaro standartlariga, shu jumladan faoliyatining shaffofligi, ijro organining qatʼiy hisobdorligi va boshqaruv tizimining samaradorligiga qoʻyiladigan talablarga qatʼiy muvofiq holda taʼminlansin.

2. Oʻzbekiston Respublikasi Xususiylashtirish, monopoliyaga qarshi kurash va raqobatni rivojlantirish davlat qoʻmitasi, Iqtisodiyot vazirligi va Moliya vazirligining:

oddiy aksiyalari toʻliq holda davlatga tegishli boʻlgan strategik aksiyadorlik jamiyatlari roʻyxatini 1-ilovaga muvofiq tasdiqlash;

“Navoiy kon-metallurgiya kombinati” davlat korxonasi va “Oʻzbekiston havo yoʻllari” milliy aviakompaniyasini 2016-2017-yillarda aksiyadorlik jamiyatlariga aylantirish toʻgʻrisidagi takliflari qabul qilinsin.

3. Quyidagilar davlat ulushi ustuvor boʻlgan aksiyadorlik jamiyatlarida korporativ boshqaruvning asosiy yoʻnalishlari etib belgilansin:

barcha jamiyatlarda Korporativ boshqaruv kodeksining meʼyorlari va qoidalarini, birinchi navbatda, faoliyatning shaffofligi va ijro organining hisobdorligi boʻyicha talablarni jamiyat faoliyatining oʻziga xosligi va sohaviy ixtisoslashuvini hisobga olgan holda joriy etish;

ishlab chiqarishni doimiy ravishda modernizatsiya qilish va yangilash, yuqori texnologiyali, tashqi bozorda raqobatbardosh, yuqori qoʻshilgan qiymatga ega tovarlar va xizmatlarni ishlab chiqarishga yoʻnaltirilgan zamonaviy texnologik va investitsiyaviy siyosatni ishlab chiqish va yuritish;

yillik moliyaviy, shu jumladan nufuzli xalqaro kompaniyalar tomonidan mustaqil tashqi auditdan majburiy tartibda oʻtkazilishi lozim boʻlgan jamlangan hisobotlarni moliyaviy hisobotlarning xalqaro standartlariga muvofiq tuzish;

xalqaro standartlarga muvofiq, ijro organi faoliyatining samaradorligi ustidan ichki va tashqi nazoratni, Kuzatuv kengashi va aksiyadorlar oldida uning hisobdorligini taʼminlash;

investitsiyalar, bozor samaradorligiga erishish, foydalilik va yuqori dividend daromadliligining aniq maqsadli moʻljallarini tasdiqlash;

yillik hisobotlarni, xalqaro amaliyotga muvofiq majburiy oshkor etilishi lozim boʻlgan muhim voqealar toʻgʻrisidagi va boshqa axborotlarni majburiy tartibda, shu jumladan Internet tarmogʻida eʼlon qilish, zarur hollarda, davlat sirlarini va belgilangan tartibda qonun bilan qoʻriqlanadigan boshqa sirlarning saqlanishini taʼminlash;

aksiyadorlik jamiyatlari rahbar va boshqaruv xodimlarining, kuzatuv kengashlari aʼzolarining, menejerlari va mutaxassislarning kasbiy darajasini doimiy oshirib borish.

4. “Navoiy kon-metallurgiya kombinati” davlat korxonasi va “Oʻzbekiston havo yoʻllari” milliy aviakompaniyasini aksiyadorlik jamiyatlariga aylantirish boʻyicha muvofiqlashtiruvchi komissiya 2-ilovaga muvofiq tarkibda tuzilsin.

5. Belgilansinki:

davlat boshqaruvi organlari, mahalliy davlat hokimiyati organlari, davlat unitar korxonalari va davlat muassasalari, Oʻzbekiston Respublikasi Markaziy banki, Tiklanish va taraqqiyot jamgʻarmasiga tegishli boʻlgan aksiyalar aksiyadorlik jamiyatlari ustav kapitalidagi davlat ulushi hisoblanadi;

xoʻjalik boshqaruvi organlariga mulk huquqi asosida tegishli boʻlgan aksiyalar aksiyadorlik jamiyatlari ustav kapitalidagi davlat ulushi hisoblanmaydi, shuningdek, qonunchilik bilan ularni tasarruf etish va boshqa shaxsga oʻtkazish mexanizmi boʻyicha qoʻshimcha talablar oʻrnatilishi mumkin.

1-ilovada koʻrsatilgan aksiyadorlik jamiyatlariga davlatga tegishli boʻlmagan oddiy aksiyalarni imtiyozli aksiyalarga aylantirishga ruxsat berilsin.

6. Oʻzbekiston Respublikasi Xususiylashtirish, monopoliyaga qarshi kurash va raqobatni rivojlantirish davlat qoʻmitasi, Adliya vazirligi:

davlat unitar korxonalari faqat Vazirlar Mahkamasining tegishli qarori asosida tashkil etilishi boʻyicha talablarga qatʼiy rioya etilishini taʼminlasin;

boshqa manfaatdor vazirlik va idoralar bilan birgalikda ikki oy muddatda qonun hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

7. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari, moliya vaziri R.S. Azimov zimmasiga yuklansin.

Oʻzbekiston Respublikasi Prezidenti vazifasini bajaruvchi Sh. MIRZIYOYEV

Toshkent sh.,

2016-yil 17-oktabr,

PQ-2635-son

Oʻzbekiston Respublikasi Prezidentining 2016-yil 17-oktabrdagi PQ-2635-son qaroriga 1-ILOVA

Oddiy aksiyalari toʻliq holda davlatga tegishli boʻlgan

STRATEGIK AKSIYADORLIK JAMIYATLARI ROʻYXATI

1. “Oʻzbekneftgaz” MXK

2. “Oʻzbekenergo” AJ

3. “Oʻzbekiston temir yoʻllari” AJ

4. “Oʻzbekiston havo yoʻllari” AJ

6. “Oʻzbektelekom” AJ

7. “Navoiy kon-metallurgiya kombinati” AJ

8. “Olmaliq kon metallurgiya kombinati” AJ

9. “Xalq banki” ATB

Oʻzbekiston Respublikasi Prezidentining 2016-yil 17-oktabrdagi PQ-2635-son qaroriga 2-ILOVA

“Navoiy kon-metallurgiya kombinati” davlat korxonasi va “Oʻzbekiston havo yoʻllari” milliy aviakompaniyasini aksiyadorlik jamiyatlariga aylantirish boʻyicha muvofiqlashtiruvchi komissiya

TARKIBI

R.S. Azimov — Oʻzbekiston Respublikasi Bosh vazirining birinchi oʻrinbosari, moliya vaziri, Komissiya rahbari G.K. Saidova — iqtisodiyot vaziri, Komissiya rahbarining oʻrinbosari D.A. Xidoyatov — Davlat raqobat qoʻmitasi raisi, Komissiya rahbarining oʻrinbosari U.J. Sunnatov — Bosh prokuror oʻrinbosari kelishuv boʻyicha — Milliy xavfsizlik xizmati raisining oʻrinbosari F.X. Bakiyev — Vazirlar Mahkamasining Makroiqtisodiy rivojlantirish, tarkibiy oʻzgartirishlar, xorijiy investitsiyalarni jalb qilish va hududlarni kompleks rivojlantirish masalalari yigʻma ATD mudiri N.E. Maksumov — Vazirlar Mahkamasining Kommunal soha, transport, kapital qurilish va qurilish industriyasi masalalari ATD mudiri R.M. Mamadaliyev — Vazirlar Mahkamasining Geologiya, yoqilgʻi-energetika kompleksi, kimyo, neft-kimyo va metallurgiya sanoati masalalari ATD mudiri M.M. Ikramov — adliya vaziri S.A. Arabov — “Davergeodezkadastr” qoʻmitasi raisi I.B. Turamuratov — Davlat geologiya qoʻmitasi raisi M.M. Mirzayev — moliya vazirining oʻrinbosari A.A. Yuldashev — Davlat soliq qoʻmitasi raisining birinchi oʻrinbosari A.R. Toxtayev — Davlat arxitektura va qurilish qoʻmitasi raisining birinchi oʻrinbosari S.S. Xodjayev — Markaziy bank raisining birinchi oʻrinbosari K.S. Sanakulov — “Navoiy kon-metallurgiya kombinati” bosh direktori V.N. Tyan — “Oʻzbekiston havo yoʻllari” MAK bosh direktori S.X. Gafarov — Davlat raqobat qoʻmitasi raisining birinchi oʻrinbosari, Komissiya raisi.