“Madaniyat” qishloq fuqarolar yigʻini tarkibidan chiqarilib, yangi “Koʻkgumbaz” mahalla fuqarolar yigʻini tuzish toʻgʻrisida (48/145-son)

08.07.2016

Jizzax viloyati xalq deputatlari Gʻallaorol tumani kengashining

Qarori

Oʻzbekiston Respublikasining “Oʻzbekiston Respublikasida maʼmuriy-hududiy tuzilish masalalarini hal etish tartibi toʻgʻrisida”gi Qonuni (Oʻzbekiston Respublikasi Oliy Majlisining Axborotnomasi 1996-y., 9-son, 139-modda, Oʻzbekiston Respublikasi qonun hujjatlari toʻplami 2011-y., 41-son, 449-modda) va Oʻzbekiston Respublikasi Vazirlar Mahkamasining 2014-yil 4-martdagi 48-sonli bilan tasdiqlangan “Shaharlar, posyolkalar, qishloqlar va ovullarning mahallalarini tuzish, birlashtirish, boʻlish va tugatish, shuningdek ularning chegaralarini belgilash va oʻzgartirish, ularga nom berish va ularning nomini oʻzgartirish tartibi toʻgʻrisida”gi nizom (Oʻzbekiston Respublikasi qonun hujjatlari toʻplami, 2014-y., 10-son, 107-modda) ijrosini taʼminlash hamda Gʻallaorol tumani Madaniyat qishloq fuqarolar yigʻini Kengashining 2016-yil 15-fevraldagi 02/01-sonli bayonini, hududdagi aholi punktlarida yashayotgan aholining talab va istaklarini inobatga olib, Oʻzbekiston Respublikasining “Mahalliy davlat hokimiyati toʻgʻrisida”gi Qonuni 6-moddasiga muvofiq xalq deputatlari tuman Kengashi qaror qiladi:

1. Madaniyat qishloq fuqarolar yigʻini tarkibidan chiqarilib — markazi Koʻkgumbaz aholi punkti boʻlgan Koʻkgumbaz mahalla fuqarolar yigʻini tuzilsin.

Madaniyat qishloq fuqarolar yigʻini markazi — Qangliobod shaharchasi;

Koʻkgumbaz mahalla fuqarolar yigʻini markazi — Koʻkgumbaz aholi punkti hisoblansin.

2. Yangi tuzilayotgan Koʻkgumbaz mahalla fuqarolar yigʻini tarkibiga Koʻkgumbaz, Zargar, Qorongʻul va Baxmalsoy aholi punktlari berilsin;

Madaniyat qishloq fuqarolar yigʻini tarkibida Madaniyat, Tutli, Qangli qishloqlari va Qangliobod shaharchasi aholi punktlari qoldirilsin.

3. Tuman moliya boʻlimi (M. Turdimuratov) Koʻkgumbaz mahalla fuqarolar yigʻinini belgilangan tartibda shtat birliklari bilan taʼminlash boʻyicha tegishli takliflar ishlab chiqsin.

4. Madaniyat qishloq va Koʻkgumbaz mahalla fuqarolar yigʻinlari:

manfaatdor tashkilotlar bilan birgalikda aholi punktlari toifalarining oʻzgartirilishi bilan bogʻliq ijtimoiy, iqtisodiy va huquqiy tadbirlarning amalga oshirilishini taʼminlasinlar;

mahalla toifasiga kiritilgan aholi punktlari nomlarini “Oʻzbekiston Respublikasida maʼmuriy-hududiy tuzilish masalalarini hal etish tartibi toʻgʻrisida”gi Qonun talablariga muvofiqlashtirish boʻyicha bir oy muddatda chora-tadbirlar belgilasinlar.

5. Tuman statistika boʻlimi (O. Oʻrolov) ushbu qarorga muvofiq aholi punktlarining statistik koʻrsatkichlariga ikki hafta muddatda zarur oʻzgartirishlar kiritsin.

6. Tuman hokimligi “Yagona darcha” markaziga (I. Qarshiboyev) yangi tashkil etilayotgan Koʻkgumbaz mahalla fuqarolar yigʻinini belgilangan tartibda hisobga olish hamda mahallaning muhr va shtamp eskizlarini tasdiqlash vazifasi topshirilsin.

7. Ushbu qarordan nusxa geografik obyektlarga nom berish va ularning nomlarini oʻzgartirish masalalari boʻyicha viloyat komissiyasiga maʼlumot uchun yuborilsin.

8. Mazkur qarorning ijrosini nazorat qilish geografik obyektlarga nom berish va ularning nomlarini oʻzgartirish masalalari boʻyicha tuman komissiyasi zimmasiga yuklatilsin.

9. Ushbu qarorning rasmiy eʼlon qilingan kundan eʼtiboran kuchga kiradi.

Xalq deputatlari tuman Kengashining raisi A. TILABOV

Gʻallaorol t.,

2016-yil 8-iyul,

48/145-son