Toshkent shahridagi transport vositalarini 2016-yilda majburiy texnik koʻrikdan oʻtkazish haqida (182-son)

29.02.2016

Toshkent shahar hokimining

qarori

“Yoʻl harakati xavfsizligi toʻgʻrisida”gi Oʻzbekiston Respublikasi Qonunining 13-moddasi (Oʻzbekiston Respublikasi Oliy Majlisining Axborotnomasi, 1999-y., 9-son, 215-modda), Oʻzbekiston Respublikasi Vazirlar Mahkamasining 2003-yil 31-yanvardagi 54-son qarori bilan tasdiqlangan “Transport vositalarini majburiy texnik koʻrikdan oʻtkazish tartibi toʻgʻrisida”gi nizomga (Oʻzbekiston Respublikasi qonun hujjatlari toʻplami, 2003-y., 1-2-son, 17-modda) muvofiq, yuridik va jismoniy shaxslarga, shuningdek xorijiy yuridik va jismoniy shaxslarga tegishli boʻlgan va belgilangan tartibda Oʻzbekiston Respublikasi Ichki ishlar vazirligining Davlat yoʻl harakati xavfsizligi xizmati organlarida roʻyxatdan oʻtkazilgan transport vositalarining (keyingi oʻrinlarda matnda “transport vositalarining” deb yuritiladi) 2016-yilda majburiy texnik koʻrigini (keyingi oʻrinlarda matnda “texnik koʻrigi” deb yuritiladi) tashkil qilish maqsadida, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6-moddasiga (Oʻzbekiston Respublikasi Oliy Kengashining Axborotnomasi, 1993-y., 9-son, 320-modda) asosan, Toshkent shahar IIBB IHXBning murojaatini inobatga olib, qaror qilaman:

1. Toshkent shahridagi transport vositalari va ularga tirkamalar 2016-yilda belgilangan tartibda majburiy texnik koʻrikdan oʻtkazilsin.

2. Toshkent shahrida transport vositalarini majburiy texnik koʻrikdan oʻtkazish boʻyicha komissiya tarkibi 1-ilovaga, Toshkent shahrida roʻyxatga olingan yuridik shaxslarga tegishli transport vositalarini 2016-yil uchun majburiy texnik koʻrikdan oʻtkazish jadvali 2-ilovaga* muvofiq tasdiqlansin.

3. Toshkent shahrida transport vositalari joriy yilda quyidagi davriylikka muvofiq:

tijorat asosida yoʻlovchilar tashish uchun foydalaniladigan yengil avtomobillar, avtobuslar, tramvaylar va oʻtiriladigan joylar soni 8 ta va undan ortiq boʻlgan (haydovchining oʻrnidan tashqari), odamlarni muntazam tashish uchun jihozlangan yuk avtomobillari, yirik gabaritli, ogʻir vaznli va xavfli yuklarni tashish uchun maxsus transport vositalari hamda ularga tirkamalar — bir yilda ikki marta (birinchi marta — 1-martdan 30-iyungacha, ikkinchi marta — 1-sentabrdan 31-oktabrgacha);

ishlab chiqarilganligiga besh yildan koʻp boʻlmagan (ishlab chiqarilgan yili ham shu jumlaga kiradi) transport vositalari (tijorat asosida yoʻlovchilar tashish uchun foydalaniladigan yengil avtomobillar, avtobuslar, tramvaylar va oʻtiriladigan joylar soni 8 ta va undan ortiq boʻlgan (haydovchining oʻrnidan tashqari), odamlarni muntazam tashish uchun jihozlangan yuk avtomobillari, yirik gabaritli, ogʻir vaznli va xavfli yuklarni tashish uchun maxsus transport vositalari hamda ularga tirkamalardan tashqari) — ikki yilda bir marta;

ishlab chiqarilgan yilini hisobga olgan holda ishlab chiqarilganligiga besh yildan ortiq boʻlgan transport vositalari, shuningdek ishlab chiqarilgan vaqti aniqlanmagan transport vositalari (tijorat asosida yoʻlovchilar tashish uchun foydalaniladigan yengil avtomobillar, avtobuslar, tramvaylar va oʻtiriladigan joylar soni 8 ta va undan ortiq boʻlgan (haydovchining oʻrnidan tashqari), odamlarni muntazam tashish uchun jihozlangan yuk avtomobillari, yirik gabaritli, ogʻir vaznli va xavfli yuklarni tashish uchun maxsus transport vositalari va ularga tirkamalardan tashqari) — bir yilda bir marta;

tirkamalar koʻrikka shatakchi (transport vositasi shatakchi deb hisoblangan paytda) uchun belgilangan muddatlarda texnik koʻrikdan oʻtkaziladi.

4. Yuridik shaxslarga tegishli boʻlgan transport vositalarining texnik koʻrigi 1-martdan 30-iyungacha oʻtkaziladi.

Toshkent shahar IIBB YHXB 2014-yil 3-sentabrda tasdiqlangan xulosasiga muvofiq, mazkur qarorning 2-ilovasidagi* yuridik shaxslarga tegishli, odamlarni muntazam tashish uchun jihozlangan yuk avtomobillari, yirik gabaritli, ogʻir vaznli va xavfli yuklarni tashish uchun maxsus transport vositalari va ularga tirkamalarning texnik koʻrigi DYHXX xodimlari ishtirokida, tuzilgan shartnoma asosida “Texnik dizel servis” MChJ hududida oʻtkazilishi inobatga olinsin.

* 2-ilova berilmaydi.

5. Jismoniy shaxslarga qarashli boʻlgan transport vositalarining texnik koʻrigi 1-yanvardan 31-avgustgacha oʻtkaziladi.

6. Transport vositalarini texnik koʻrikdan oʻtkazilganlik uchun qonun hujjatlarida belgilangan tartibda yigʻim undiriladi.

7. Toshkent shahar IIBB YHXB (B. Mamenov), tuman hokimliklari:

Oʻzbekiston Respublikasi Vazirlar Mahkamasining 2003-yil 31-yanvardagi “Transport vositalarini majburiy texnik koʻrikdan oʻtkazish tartibi toʻgʻrisidagi nizomni tasdiqlash haqida”gi 54-son qarorining 3-bandiga muvofiq, Oʻzbekiston Respublikasi Mudofaa vazirligi, Ichki ishlar vazirligining ichki va soqchilik qoʻshinlari, Milliy xavfsizlik xizmatining harbiy boʻlinmalari transport vositalarini koʻrsatib oʻtilgan idoralar tomonidan belgilangan tartibda majburiy texnik koʻrikdan oʻtkazilishi inobatga olinsin.

8. Toshkent shahar IIBB YHXB (B. Mamenov):

transport vositalarini texnik koʻrikdan oʻtkazish tartibi haqida ommaviy axborot vositalari orqali omma eʼtiboriga yetkazish ishlari tashkillashtirilsin;

yuridik shaxslarga tegishli transport vositalarini texnik koʻrikdan oʻtkazishda yuridik shaxsga, tegishli hujjatlarni ilova qilingan holda, texnik koʻrik oʻtkaziladigan muddatlar toʻgʻrisidagi bildirishnoma yuborilishi, texnik koʻrik boshlanishidan kamida oʻn kun oldin belgilangan tartibda yuridik shaxsdan tegishli hujjatlar talab qilinishi;

jismoniy shaxslarga tegishli transport vositalarini texnik koʻrikdan oʻtkazishda, texnik koʻrikdan oʻtkazish uchun qonun hujjatlarida belgilangan tartibda transport vositasi egasidan yoki unga vakolatli shaxsdan tegishli hujjatlar talab qilinishi;

texnik koʻrikka qoʻyilgan, biroq texnik nosozlik tufayli koʻrikdan oʻtmagan tramvaylar foydalanish uchun qoʻyilmasligi nazoratga olinsin;

texnik koʻrikdan oʻtkazilmagan transport vositalarini yoʻlga chiqargan komissiya tarkibidagi masʼul xodimlar qonun hujjatlarida belgilangan tartibda javobgarlikka tortilishi haqida ogohlantirilsin.

9. Majburiy texnik koʻrik davomida komissiya tarkibida ish olib borgan xodimlarning doimiy ish joylaridagi oylik ish haqlari saqlanib qolinishi inobatga olinsin.

10. “Toshkent oqshomi” va “Vecherniy Tashkent” tahririyati (A. Akromov), Axborot xizmati (X. Ermatov), “Kompyuterlashtirish markazi” DUK (M. Asamov):

mazkur qaror rasmiy eʼlon qilinishi hamda www.toshkent.uz veb-saytiga joylashtirilishi taʼminlansin.

11. Mazkur qaror rasmiy eʼlon qilingan kundan eʼtiboran kuchga kiradi.

12. Mazkur qarorning ijrosini nazorat qilish Toshkent shahar hokimining birinchi oʻrinbosari B. Raxmonov zimmasiga yuklansin.

Hokim R. USMONOV

Toshkent sh.,

2016-yil 29-fevral,

182-son

Shahar hokimining 2016-yil 29-fevraldagi 182-sonli qaroriga 1-ILOVA

Toshkent shahrida transport vositalarini majburiy texnik koʻrikdan oʻtkazish boʻyicha komissiya

tarkibi

Komissiya raisi: M. Odilov — Toshkent shahar IIBB YHXB texnika nazorati boʻlimi boshligʻi oʻrinbosari Komissiya raisi oʻrinbosarlari: N. Raximov — Toshkent shahar IIBB YHXB 1-sonli Diagnostika stansiyasi boshligʻi X. Sodiqov — Toshkent shahar IIBB YHXB 2-sonli Diagnostika stansiyasi boshligʻi A. Djalilov — Toshkent shahar IIBB 1GHXB 3-sonli Diagnostika stansiyasi boshligʻi. Komissiya aʼzolari: I. Jurayev — Toshkent shahar Mudofaa ishlari boshqarmasi texnika boʻlinmasi boshligʻi S. Shokosimov — Oʻzbekiston Avtomobil va daryo transporti agentligi Toshkent shahar hududiy boʻlimi boshligʻi F. Qodirov — “Toshshahartransxizmat” Aksionerlik kompaniyasi MPMQ va TQJB boshligʻi D. Fayzullayev — Toshkent shahar hokimligi yoʻlovchi transportining barcha turlari harakatini litsenziyalash va muvofiqlashtirish departamenti bosh mutaxassisi L. Xolbekov — Toshkent shahar hokimligi yoʻlovchi transportining barcha turlari harakatini litsenziyalash va muvofiqlashtirish departamenti bosh mutaxassisi M. Dexkonov — “Maxsustrans” DIChP Davlat korxonasi bosh muhandisining oʻrinbosari N. Giryanskiy — Toshkent shahar Tabiatni muhofaza qilish qoʻmitasi yetakchi mutaxassisi D. Kiyayev — “Meta Avtotransdiagnostik” MChJ rahbari.