Viloyatdagi qorakoʻlchilik shirkat xoʻjaliklari balansidagi yaylovlar, haydaladigan lalmi yerlar va bogʻ-toklardan foydalanganlik uchun toʻlov miqdorini belgilash toʻgʻrisida (X-223/05-son)

12.05.2016

Qashqadaryo viloyati hokimining

Qarori

Oʻzbekiston Respublikasi Vazirlar Mahkamasining 2014-yil 20-oktabrdagi 290-sonli qarori bilan tasdiqlangan “Oʻsimlik dunyosi obyektlaridan foydalanish va oʻsimlik dunyosi obyektlaridan foydalanish sohasida ruxsat berish tartib-taomillaridan oʻtish tartibi toʻgʻrisida”gi nizom (Oʻzbekiston Respublikasi qonun hujjatlari toʻplami, 2014-yil 43-son, 530-modda) talabiga muvofiq viloyatdagi qorakoʻlchilik shirkat xoʻjaliklari balansidagi yerlardan samarali foydalanishni yaxshilash maqsadida, Oʻzbekiston Respublikasi “Mahalliy davlat hokimiyati toʻgʻrisida”gi Qonunning (Oʻzbekiston Respublikasi Oliy Kengashining Axborotnomasi, 1993-yil 9-son, 320-modda) 6-moddasiga asosan qaror qilaman:

1. Viloyatdagi qorakoʻlchilik shirkat xoʻjaliklari balansida boʻlgan yaylovlar, haydaladigan lalmi yerlar, bogʻ-toklardan va boshqa obyektlardan foydalanganlik uchun toʻlov miqdori ilovaga muvofiq tasdiqlansin.

2. Yaylovlar, haydaladigan lalmi yerlar, bogʻ-toklardan foydalanish mavsumi yilning kelishiga qarab, yil yakunigacha belgilansin.

3. Qorakoʻlchilik shirkat xoʻjaliklari balansidagi yaylovlar, haydaladigan lalmi yerlar, bogʻ-toklardan undiriladigan toʻlovlar toʻliq shirkat xoʻjaliklarning joriy yil uchun budjet va budjetdan tashqari maqsadli jamgʻarmalarga hisoblanadigan soliq toʻlovlariga, budjet va davlat maqsadli jamgʻarmalar oldidagi kreditorlik qarzlarini soʻndirishga yoʻnaltirilsin.

4. Ushbu qaror “Qashqadaryo” gazetasida eʼlon qilinsin hamda hokimlikning qashqadaryo.uz rasmiy veb-saytiga joylashtirilsin.

5. Ushbu qaror rasmiy eʼlon qilingan kundan eʼtiboran kuchga kirishi belgilansin.

6. Mazkur qarorning ijrosini nazorat qilish viloyat hokimining qishloq va suv xoʻjaligi masalalari boʻyicha oʻrinbosari M. Hayitmurodov zimmasiga yuklatilsin.

Hokim Z. RUZIYEV

Qarshi sh.,

2016-yil 12-may,

X-223/05-son

Viloyat hokimining 2016-yil 12-maydagi X-223/05- sonli qaroriga ILOVA

Viloyatdagi qorakoʻlchilik shirkat xoʻjaliklari balansida boʻlgan yaylovlar va boshqa obyektlardan foydalanganlik uchun belgilangan toʻlov

MIQDORI

1. Qorakoʻlchilik shirkat xoʻjaliklari balansida boʻlgan yaylovlar, haydaladigan lalmi yerlar, bogʻ-toklardan tashkilotlar, korxonalar, fermer va yordamchi xoʻjaliklarining bir bosh chorvasi uchun mavsumda:

yirik shoxli mol uchun — eng kam ish haqining 20 foizi miqdorida;

qoʻy va echkilar uchun — eng kam ish haqining 10 foizi miqdorida;

ot va tuyalar uchun — eng kam ish haqining 20 foizi miqdorida;

2. Qorakoʻlchilik shirkat xoʻjaliklari balansida boʻlgan yaylovlar, haydaladigan lalmi yerlardan qoʻshimcha foydalanish uchun fuqarolardan bir mavsumda:

yirik shoxli mol uchun — eng kam ish haqining 15 foizi miqdorida;

qoʻy va echkilar uchun — eng kam ish haqining 8 foizi miqdorida;

ot va tuyalar uchun — eng kam ish haqining 15 foizi miqdorida;

3. Qorakoʻlchilik shirkat xoʻjaliklaridagi pichanzorlardan xashak tayyorlashda bir gektar maydon uchun eng kam ish haqining 50 foizi miqdorida;

4. Qorakoʻlchilik shirkat xoʻjaliklari balansidagi bogʻ va toklardan foydalanganligi uchun 1 yilga eng kam ish haqining 5 barobari miqdorida;

5. Qorakoʻlchilik shirkat xoʻjaliklari balansidagi qoʻra quton va suv inshootlaridan foydalanganligi uchun 1 yilga eng kam ish haqining 10 barobari miqdorida.

6. Bir gektar maydonga chorva mollarini joylashtirish meʼyori:

bir bosh mayda shoxli mollarni joylashtirish uchun 2 gektar maydon;

bir bosh yirik shoxli mol, ot, tuya joylashtirish uchun 3 gektar maydon belgilanadi.