“Toshkent metropoliteni Yunusobod liniyasi ikkinchi bosqichini qurish” loyihasini amalga oshirishga doir chora-tadbirlar toʻgʻrisida (PQ-2653-son)

07.11.2016

Oʻzbekiston Respublikasi Prezidentining

Qarori

Toshkent shahrining transport infratuzilmasini yanada takomillashtirish, yoʻlovchilar oqimini koʻpaytirish, Toshkent metropolitenining Yunusobod liniyasida yoʻlovchilar tashish darajasi va sifatini oshirish, shahar yer usti jamoat transportiga yuklamalarni kamaytirish, shuningdek, ekologiya va atrof muhit muhofazasini yaxshilash maqsadida:

1. Toshkent shahar hokimligi va “Oʻzbekiston temir yoʻllari” AJning 2017 — 2019-yillarda Toshkent metropolitenining Yunusobod liniyasi ikkinchi bosqichi qurilishini yakunlash (keyingi oʻrinlarda — loyiha) toʻgʻrisidagi taklifiga rozilik berilsin.

2. Loyihani amalga oshirish doirasida qurilishi tugallanmagan obyektlarning qiymati 2016-yil 1-oktabrdagi holatiga qayta baholashni hisobga olgan holda 6,91 mlrd soʻmni tashkil qilganligi maʼlumot uchun qabul qilinsin.

3. Toshkent shahar hokimligi Oʻzbekiston Respublikasi Davlat arxitektura va qurilish qoʻmitasi, “Oʻzbekiston temir yoʻllari” AJ, “Toshkent metropoliteni” UK, “Toshmetroqurilish” MCHJ, “Toshkent metroloyiha” MCHJ bilan birgalikda:

bir oy muddatda Toshkent metropolitenining Yunusobod liniyasidagi qurilishi tugallanmagan obyektlar texnik koʻrikdan va xatlovdan oʻtkazilishini taʼminlasin;

xatlovdan oʻtkazish natijalariga koʻra kompleks chora-tadbirlar ishlab chiqsin, unda texnik vazifani sifatli tayyorlash va tasdiqlash, ilgʻor energiya va resurs tejovchi texnologiyalarni qoʻllagan holda loyiha-smeta hujjatlarini ishlab chiqish, loyihani amalga oshirish doirasida tiklash va qurilish-montaj ishlarini bosqichma-bosqich bajarishni nazarda tutsin.

4. Quyidagilar hisoblab chiqilgan qiymati ekvivalentda 124,8 mln AQSH dollari boʻlgan loyihani amalga oshirishni moliyalashtirish manbalari etib belgilansin:

Davlat budjeti mablagʻlari hisobiga Oʻzbekiston Respublikasi Investitsiya dasturi parametrlarida 2017 — 2019-yillar davomida har yili teng ulushlarda nazarda tutiladigan 72,0 mln. AQSH dollari ekvivalentidagi markazlashtirilgan investitsiyalar;

import asbob-uskunalari, materiallar va butlovchi buyumlarni xarid qilish, jalb etiladigan xorijiy mutaxassislarning loyiha hujjatlari ekspertizasini oʻtkazish, qurilishni kuzatib borish va texnik jihatdan nazorat qilish, zarur hollarda xorijiy pudrat tashkilotlari tomonidan amalga oshiriladigan maxsus qurilish-montaj ishlarini bajarish boʻyicha xizmatlarga haq toʻlash, shu jumladan loyihani amalga oshirish doirasidagi ularning boshqa valyuta xarajatlarini, shuningdek, qurilish-pudrat tashkilotlarini jihozlash uchun texnika xarid qilishni moliyalashtirish uchun 15 yil muddatga, shu jumladan 4 yillik imtiyozli davr bilan, jumladan qayta moliyalashtiruvchi bankning marjasi 0,25 foiz boʻlgan yillik 2,25 foiz stavkasida taqdim etiladigan, Oʻzbekiston Respublikasi Tashqi iqtisodiy faoliyat milliy banki tomonidan qayta moliyalashtiriladigan Oʻzbekiston Respublikasi Tiklanish va taraqqiyot jamgʻarmasining 52,8 mln. AQSH dollari miqdoridagi krediti.

5. Belgilansinki:

“Oʻzbekiston temir yoʻllari” AJ loyihani samarali amalga oshirish, Oʻzbekiston Respublikasi Tiklanish va taraqqiyot jamgʻarmasining jalb etiladigan kreditidan maqsadli va samarali foydalanish uchun masʼul boʻlgan ijro etuvchi organ hisoblanadi;

kredit boʻyicha asosiy qarzni uzish, foizlar va vositachilik haqini toʻlash tegishli operatsiya oʻtkazilgan sanadagi Oʻzbekiston Respublikasi Markaziy bankining kursi boʻyicha milliy valyutada Oʻzbekiston Respublikasi Davlat budjeti mablagʻlari hisobidan amalga oshiriladi.

6. Oʻzbekiston Respublikasi moliya vaziriga loyihani moliyalashtirish uchun jalb qilinadigan Oʻzbekiston Respublikasi Tiklanish va taraqqiyot jamgʻarmasining qayta moliyalashtiriladigan krediti boʻyicha Tashqi iqtisodiy faoliyat milliy banki oldidagi “Toshkent metropoliteni” DUKning majburiyatlari boʻyicha belgilangan tartibda Oʻzbekiston Respublikasining davlat kafolatini berish vakolati taqdim etilsin.

7. Loyihani amalga oshirish doirasida:

“Oʻzbekiston temir yoʻllari” AJ — buyurtmachi;

“Toshkent metroloyiha” MCHJ — bosh loyiha tashkiloti;

“Oʻzbekiston temir yoʻllari” AJning tarkibiy boʻlinmalari — bosh pudratchi tashkilot etib belgilansin.

8. Toshkent metropolitenining Yunusobod liniyasi ikkinchi bosqichini loyihalashtirish va qurilishini yakunlash masalalari boʻyicha ishchi guruhi ilovaga muvofiq tarkibda tuzilsin.

Ishchi guruh zimmasiga (B.I. Zakirov) loyihani amalga oshirish bilan bogʻliq barcha masalalarni oʻz vaqtida va tezkorlik bilan hal etish boʻyicha vazirliklar va idoralarning faoliyatini muvofiqlashtirish vazifasi yuklansin, bunda texnik vazifani ishlab chiqish, shuningdek, loyihaviy va qurilish-montaj ishlarini bajarish sifatiga alohida eʼtibor berilsin.

9. “Oʻzbekiston temir yoʻllari” AJ 2017-yil 1-iyulga qadar Toshkent metropolitenining Yunusobod liniyasi ikkinchi bosqichi qurilishi asosiy texnik-iqtisodiy parametrlarining tasdiqlanadigan qismi bilan birga ishchi loyihani Oʻzbekiston Respublikasi Vazirlar Mahkamasiga kelishish uchun kiritsin.

10. “Oʻzbekiston temir yoʻllari” AJga istisno tariqasida: 2017-yil 1-sentabrgacha loyihani loyiha-smeta hujjatlarini ishlab chiqish bilan bir vaqtda amalga oshirishga;

loyihani amalga oshirish doirasida Toshkent metropolitenining Yunusobod liniyasi qurilishidagi loyihaviy yechimlarning ishonchlilik va xavfsiz foydalanish boʻyicha zamonaviy talablarga muvofiqligini aniqlash, kuzatish va texnik nazorat olib borish uchun tanlov asosida yuqori malakali mustaqil xorijiy ekspertlarni, shuningdek, zarur hollarda ixtisoslashtirilgan xorijiy pudrat tashkilotlarini jalb qilishga;

import kontraktlar boʻyicha vakolatli organlarda ekspertiza va yuklashdan avvalgi inspeksiya oʻtkazgan holda tanlov savdolarini oʻtkazmasdan eng yaxshi takliflarni tanlab olish asosida ishlab chiqaruvchi zavodlar yoki ularning rasmiy dilerlari (distribyuterlar) bilan asbob-uskunalar va materiallar, ehtiyot qismlar, butlovchi buyumlar va uzellar yetkazib berish uchun shartnomalar tuzishga;

Oʻzbekiston Respublikasi Tiklanish va taraqqiyot jamgʻarmasi, Oʻzbekiston Respublikasi Tashqi iqtisodiy faoliyat milliy banki bilan birgalikda loyiha-smeta hujjatlari tasdiqlangunga qadar ekspertizadan oʻtkazilgan import kontraktlari, shuningdek, loyihani amalga oshirish doirasida mahalliy pudratchilar va yetkazib beruvchilar bilan tuzilgan shartnomalar boʻyicha moliyalashtirishni ochishga;

loyihani amalga oshirish va vakolatli organlarda ekspertizadan oʻtkazilgan holda tuzilgan shartnomalarning shartlariga muvofiq kafolat muddati davrida xorijiy kompaniyalar tomonidan olib kelinadigan maxsus transport vositalari, avtotransport vositalari, mashina va mexanizmlar, uskuna va asboblar, butlovchi buyumlar, uzellar va jihozlarni davriy bojxona toʻlovlarini toʻlamagan holda “vaqtincha olib kirish” bojxona rejimida joylashtirishga ruxsat etilsin.

11. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi, Toshkent shahar hokimligi, “Oʻzbekenergo” AJ, “Oʻzbekneftgaz” MXK oʻz shaxsiy mablagʻlari hisobiga loyiha doirasida mansubligiga qarab qurilish hududiga tushgan mavjud muhandislik kommunikatsiyalari koʻchirilishi va ulanishini, shuningdek, tashqi muhandislik kommunikatsiyalarining uzluksiz ishlashini hisobga olgan holda ulanishini taʼminlasin.

12. Oʻzbekiston Respublikasi Davlat arxitektura va qurilish qoʻmitasi belgilangan tartibda shaharsozlik hujjatlari davlat ekspertizasidan oʻtkazilishini taʼminlasin va qurilish-montaj ishlarining sifati ustidan davlat arxitektura-qurilish nazoratini oʻrnatsin.

13. Loyihani amalga oshirish doirasida uning barcha ishtirokchilari 2020-yilning 1-yanvarigacha:

respublikada ishlab chiqarilmaydigan maxsus transport vositalari, yoʻl-qurilish texnikasi, mashinalar, mexanizmlar, uskunalar, xomashyo, materiallar, ehtiyot qismlar, butlovchi buyumlar, uzellar, texnologik hujjatlar, jihozlar, shu jumladan Oʻzbekiston Respublikasi Vazirlar Mahkamasi tomonidan tasdiqlanadigan roʻyxat boʻyicha olib kelinadigan, loyihani amalga oshirishda ishtirok etayotgan pudrat qurilish tashkilotlarini jihozlashga moʻljallangan maxsus yoʻl-qurilish texnikasi va uskunalari uchun bojxona toʻlovlaridan (bojxona yigʻimlaridan tashqari);

tovar, ishlar (xizmatlar) uchun, shu jumladan Oʻzbekiston Respublikasi norezidentlari tomonidan bajarilgan ishlar (xizmatlar) uchun qoʻshimcha qiymat soligʻidan;

Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasiga va Moliya vazirligi huzuridagi budjetdan tashqari Taʼlim va tibbiyot muassasalarining moddiy-texnika bazasini rivojlantirish jamgʻarmasiga majburiy ajratmalar va yigʻimlarni toʻlashdan;

loyiha doirasida sotib olinadigan mol-mulk uchun mulk soligʻidan ozod etilsin.

14. Loyihani amalga oshirish doirasida:

“Oʻzbekiston temir yoʻllari” AJ, uning tarkibiy boʻlinmalari va loyiha ishtirokchilari oʻrtasida bepul taqdim etiladigan mol-mulk qoʻshimcha qiymat soligʻi, yuridik shaxslardan olinadigan foyda soligʻi, shuningdek, obodonlashtirish va ijtimoiy infratuzilmani rivojlantirish soligʻi boʻyicha soliq solish obyekti hisoblanmaydi;

xodimlar bepul ovqat bilan taʼminlangan taqdirda tegishli sarf-xarajatlar yuridik shaxslarning foyda soligʻi, qoʻshilgan qiymat soligʻi, yagona ijtimoiy toʻlov, jismoniy shaxslarning daromad soligʻi hamda fuqarolarning Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallarini hisoblashda soliqqa tortiladigan bazadan chiqarib tashlanadi.

15. Oʻzbekiston Respublikasi Iqtisodiyot vazirligi, “Oʻzbekneftgaz” MXK, “Oʻzmetkombinat” AJ va “Oʻzqurilishmateriallari” AJ ishchi hujjat parametrlarini hisobga olgan holda bosh buyurtmachi tomonidan taqdim etiladigan asoslangan hisob-kitoblarga koʻra, toʻgʻridan-toʻgʻri shartnomalar boʻyicha loyihani amalga oshirish uchun zarur boʻlgan sement, metall prokati va yoʻl bitumini — tartibga solinadigan narxlarda, yoqilgʻi-moylash materiallarini — kelishilgan narxlarda ajratilishi va yetkazib berilishini taʼminlasin.

16. Oʻzbekiston Respublikasi Iqtisodiyot vazirligi va Moliya vazirligi buyurtmachining asoslangan hisob-kitoblariga koʻra Oʻzbekiston Respublikasi Vazirlar Mahkamasi huzuridagi Xalqaro moliya institutlari, tashkilotlari va donor mamlakatlar bilan hamkorlik qilish, yirik va strategik muhim investitsiya loyihalarini amalga oshirish masalalari boʻyicha idoralararo kengashga 2016-yilda loyiha-qidiruv va tayyorgarlik ishlarini bajarish uchun kapital qoʻyilmalar ajratish toʻgʻrisida takliflarni kiritsin.

17. Oʻzbekiston Respublikasi Tashqi ishlar vazirligi “Toshkent metropoliteni” UK buyurtmanomalariga asosan loyihani amalga oshirishda ishtirok etayotgan xorijiy mutaxassislarga kirish vizalari konsullik va boshqa yigʻimlar undirilmasdan rasmiylashtirilishini taʼminlasin.

18. Oʻzbekiston Respublikasi Ichki ishlar vazirligi “Toshkent metropoliteni” UK buyurtmanomalariga binoan loyihani amalga oshirishda ishtirok etayotgan xorijiy mutaxassislarga koʻp martalik vizalar uzaytirilishini, shuningdek, ularning vaqtinchalik yashash joyi boʻyicha vaqtinchalik roʻyxatdan oʻtkazilishi va muddatini uzaytirilishini taʼminlasin.

19. Oʻzbekiston Respublikasi Mehnat vazirligi “Toshkent metropoliteni” UK buyurtmanomalariga binoan, loyihani amalga oshirishda ishtirok etayotgan yuqori malakali xorijiy mutaxassislarga (Oʻzbekiston Respublikasi fuqarolari orasida boʻlmagan taqdirda) Oʻzbekiston Respublikasiga jalb etishga ruxsatnomalar berilishi (muddati uzaytirilishi)ni, shuningdek, ushbu xorijiy fuqarolarga Oʻzbekiston Respublikasi hududida mehnat faoliyati bilan shugʻullanish huquqiga tasdiqnomalar berilishini (muddati uzaytirilishini) taʼminlasin.

20. Toshkent shahar hokimligi loyihani amalga oshirish doirasida mahalliy budjet mablagʻlari hisobiga:

bir oy muddatda loyiha-smeta hujjatlari taqdim etilishiga qarab zarur bino va inshootlar qurilishi uchun yer uchastkalari ajratilishini;

“Toshkent metropoliteni” UK buyurtmanomalari boʻyicha koʻchalarni yopish, aylanib oʻtuvchi avtomobil yoʻllari va boshqa zarur inshootlar qurish orqali qurilish maydonlari boʻshatilishini;

loyihada nazarda tutilgan muddatlarda — inshootlar buzilishini, ishlar olib borilayotgan hududda yashovchi fuqarolar koʻchirilishini;

yer uchastkalari ajratilishi va fuqarolar koʻchirilishi uchun qonun hujjatlarida taqiqlanmagan moliyalashtirish manbalarini jalb etishni nazarda tutgan holda kompensatsiya berishni;

sugʻorish quvurlari, irrigatsiya tarnovlari va tashqi tomondan yoritishni hisobga olgan holda tutash hududlar obodonlashtirilishini va koʻkalamzorlashtirilishini taʼminlasin.

21. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.

Oʻzbekiston Respublikasi Prezidenti vazifasini bajaruvchi Sh. MIRZIYOYEV

Toshkent sh.,

2016-yil 7-noyabr,

PQ-2653-son

Oʻzbekiston Respublikasi Prezidentining 2016-yil 7-noyabrdagi PQ-2653-son qaroriga ILOVA

Toshkent metropolitenining Yunusobod liniyasi ikkinchi bosqichini loyihalashtirish va qurilishini yakunlash masalalari boʻyicha ishchi guruh

TARKIBI

B.I. Zakirov — Oʻzbekiston Respublikasi Bosh vazirining oʻrinbosari, Ishchi guruh rahbari A.J. Ramatov — “Oʻzbekiston temir yoʻllari” AJ boshqaruvi raisi, Ishchi guruh rahbari oʻrinbosari B.A. Xodjayev — iqtisodiyot vazirining birinchi oʻrinbosari R.A. Gulyamov — Tiklanish va taraqqiyot jamgʻarmasining ijrochi direktori R.J. Usmanov — Toshkent shahar hokimi M.M. Mirzayev — moliya vaziri oʻrinbosari D.M. Nizomov — mehnat vaziri oʻrinbosari B.Ya. Raimov — Davlat bojxona qoʻmitasi raisining birinchi oʻrinbosari A.Ya. Haydarov — Tashqi iqtisodiy faoliyat milliy bank boshqaruv raisining birinchi oʻrinbosari M.I. Shodiyev — “Davarxitektqurilish” qoʻmitasi raisi oʻrinbosari A.S. Nurudinov — “Oʻzmetkombinat” AJ bosh direktori A.S. Sultanov — “Oʻzbekneftgaz” MXK raisi B.K. Zaripov — “Oʻzqurilishmateriallari” AJ raisi X.N. Xasilov — Oʻzbekiston temir yoʻllari” AJ bosh muhandisi — bosh menejeri O.N. Xudoykulov — “Oʻzbekiston temir yoʻllari” AJ boshqaruvi raisining oʻrinbosari — “Toshkent metropoliteni” UK boshligʻi Yu.D. Magrupov — “OʻzGASHKLITI” DUK direktori R.V. Roʻziyev — “Boshtransloyixa” AJ direktori Sh.T. Solixodjayev — “Toshmetroqurilish” MCHJ direktori A.A. Zakirov — “Toshkent metroloyiha” MCHJ direktori N.E. Maqsumov — Vazirlar Mahkamasining Kommunal soha, transport, kapital qurilish va qurilish industriyasi masalalari ATD mudiri, Ishchi guruh kotibi

Izoh. Ishchi guruh aʼzolari boshqa ishga oʻtgan taqdirda uning tarkibiga ushbu lavozimlarga yangidan tayinlangan yoki zimmasiga tegishli funksiyalarni bajarish yuklangan shaxslar kiritiladi.