Davlat mulkini xorijiy investorlarga sotish boʻyicha tender savdolari oʻtkazuvchi davlat komissiyasi toʻgʻrisidagi yangi tahrirdagi nizomni tasdiqlash haqida (309-son)

22.06.1999

Oʻzbekiston Respublikasi Vazirlar Mahkamasining

qarori

Obyektlarni xususiylashtirish va davlat tasarrufidan chiqarish masalalarini tezlikda hal etishda tender savdolari oʻtkazuvchi Davlat Komissiyasining rolini oshirish, xususiylashtirish jarayonlariga xorijiy sarmoya jalb qilinishini faollashtirish maqsadida Vazirlar Mahkamasi qaror qiladi:

1. Davlat mulkini xorijiy investorlarga sotish boʻyicha tender savdolari oʻtkazuvchi Davlat komissiyasi toʻgʻrisidagi yangi tahrirdagi Nizom tasdiqlansin.

2. Birlamchi tender hujjatlarini bevosita ishlab chiquvchi hamda potensial xorijiy investorlarning investitsiya takliflarini ekspert baholovchi idoralararo ishchi guruhlarga rahbarlik qilish va ular faoliyati uchun javobgarlik Vazirlar Mahkamasi komplekslari rahbarlari zimmasiga yuklansin.

3. Vazirlar Mahkamasining 1998-yil 17-dekabrdagi 525-son qaroriga 1-ilova oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1999-yil 22-iyun,

309-son

Vazirlar Mahkamasining 1999-yil 22-iyundagi 309-son qaroriga ILOVA

Davlat mulkini xorijiy investorlarga sotish boʻyicha tender savdolari oʻtkazuvchi Davlat komissiyasi toʻgʻrisida

NIZOM

I. UMUMIY QOIDALAR

1.1. Mazkur Nizom Vazirlar Mahkamasining “Davlat mulkini xususiylashtirishda xorijiy sarmoyalarni jalb qilishni ragʻbatlantirish chora-tadbirlari toʻgʻrisida” 1998-yil 18-noyabrdagi 477-son, “1999-2000-yillarda xususiylashtirishni chuqurlashtirish va davlat mulkini sotishdan davlat budjetiga mablagʻlar tushishini koʻpaytirish chora-tadbirlari toʻgʻrisida” 1998-yil 17-dekabrdagi 525-son, “Oʻzbekiston Respublikasi Vazirlar Mahkamasining 1998-yil 18-noyabrdagi 477-son va 1998-yil 17-dekabrdagi 525-son qarorlarini bajarish yuzasidan javobgarlikni kuchaytirish chora-tadbirlari toʻgʻrisida” 1999-yil 20-maydagi 258-son qarorlariga muvofiq ishlab chiqilgan.

1.2. Nizom Oʻzbekiston Respublikasi Vazirlar Mahkamasi tomonidan belgilab beriladigan davlat korxonalari (mulk)ni, shuningdek, davlatga tegishli aksiyalar paketlarini xorijiy investorlarga sotish boʻyicha tender savdolari oʻtkazuvchi Davlat komissiyasining (keyingi oʻrinlarda Komissiya deb ataladi) vazifalari, huquqlari va majburiyatlarini belgilab beradi.

1.3. Komissiyaning oʻz vakolatlari doirasida qabul qilgan qarorlari davlat boshqaruv organlari hamda davlat hokimiyati va boshqaruvining mahalliy organlari, mulkchilik shakllaridan qatʼi nazar, xoʻjalik yurituvchi subyektlar va ularning birlashmalari (xoʻjalik uyushmalari), mansabdor shaxslar tomonidan bajarilishi majburiydir.

1.4. Savdolar Komissiya tomonidan Oʻzbekiston Respublikasi qonun hujjatlarida belgilangan tartibda oʻtkaziladi.

II. KOMISSIYANING VAZIFALARI

2.1. Quyidagilar Komissiyaning asosiy vazifalari hisoblanadi:

vakolatli davlat organlari, xususiylashtiriladigan korxonalar, yuridik shaxslar birlashmalari, hokimiyat va boshqaruv mahalliy organlari, shuningdek, jalb qilingan xorijiy ekspert kompaniyalar va vositachilarning sotishdan oldingi tayyorgarlik va tender obyektlarini xorijiy investorlarga sotish masalalari boʻyicha birgalikdagi faoliyatini tashkil etish;

sotishdan oldingi tayyorgarlik va xususiylashtirish obyektlarini sotish uchun xorijiy texnik, moliyaviy va boshqa maslahatchilar hamda ekspertlarni jalb qilish shartlarini belgilash;

xorijiy talabgorlarning korxonalar va aksiyalarning davlat paketlarini sotib olish toʻgʻrisidagi eng foydali takliflarini ekspertiza qilish va tanlab olish;

oshkoralik, baholashning xolisligi va talablarning yagonaligi asosida tender qatnashchilari uchun teng raqobat shart-sharoitlari yaratish.

III. KOMISSIYANING HUQUQ VA MAJBURIYATLARI

3.1. Komissiya quyidagi huquqlarga ega:

oʻz ishlari tartibini mustaqil ishlab chiqish va tasdiqlash;

tender qatnashchilarini malakali tanlash va tender takliflarini baholash maqsadida aksiyalarni xorijiy investorlarga sotish boʻyicha xalqaro tendyerlar oʻtkazish uchun idoralararo ishchi guruhlar tashkil etish;

tender hujjatlarini va tender obyektlarining sotilish bahosini, tender obyektlarini sotishga jalb qilinadigan xorijiy ekspert kompaniyalar va vositachilarni tanlash shartlari va mezonlarini tasdiqlash;

xususiylashtiriladigan obyektga (aksiyalar paketiga) talab konyunkturasiga koʻra hamda tegishli investitsiya majburiyatlari boʻlgan aniq strategik investorlar mavjud boʻlgan taqdirda Oʻzbekiston Respublikasi Vazirlar Mahkamasi tomonidan belgilanadigan tartibga muvofiq tender obyektlarining boshlangʻich narxini oʻzgartirish;

obyektlar va aksiyalarni ham erkin muomaladagi valyutada, ham milliy valyutada haq toʻlashning aralash shakllarida va xorijiy investor tomonidan erkin muomaladagi valyutada aniq investitsiya majburiyatlari qabul qilinishi sharti bilan zamonaviy texnologiya asbob-uskunalari yetkazib berish hisobiga sotish toʻgʻrisida qaror qabul qilish;

tenderga tayyorgarlik koʻrish va uni oʻtkazish uchun xorijiy texnik, moliyaviy, yuridik ekspertlar va vositachilarni, ular faoliyatiga institutsional oʻzgartirishlarni amalga oshirishga Jahon banki qarzi mablagʻlaridan, shuningdek, davlat mulkini xususiylashtirishdan tushgan umumiy mablagʻlardan haq toʻlagan holda, keyinchalik xarajatlarni tender boʻyicha obyektlar (aksiyalar)ni sotishdan olingan tushumdan qoplagan holda, tanlov asosida taklif etish;

davlat boshqaruv organlari, davlat hokimiyati va boshqaruvi mahalliy organlari, yuridik shaxslar birlashmalari va xususiylashtiriladigan korxonalardan Komissiyaga yuklangan vazifalarni taʼminlash uchun zarur axborotlarni olish;

obyektlarni xususiylashtirish bilan bogʻliq masalalarni hal etishdagi sansalorlik, toʻrachilik, muddatlarni choʻzish hollari hamda korxonalar va aksiyalarni xorijiy investorlarga sotishni jadallashtirish boʻyicha mustaqil qaror qabul qilish.

3.2. Komissiya:

Oʻzbekiston Respublikasi Hukumatining tender obyektlarini sotishni tashkil etish boʻyicha qarorlarini bajarishga;

Komissiya majlislarida qabul qilingan qarorlarning oʻz vaqtida bajarilishi ustidan nazoratni amalga oshirishga;

tender savdolarini oʻtkazish natijalari boʻyicha Komissiya qarorlari bajarilishi ustidan monitoringni amalga oshirishga majburdir.

IV. KOMISSIYA IShINI TAShKIL ETISh

4.1. Tender savdolarini, shu jumladan, investitsiya savdolarini tashkil etish va ularni oʻtkazish Oʻzbekiston Respublikasi Vazirlar Mahkamasining “Aksiyalar paketlarini joylashtirishni takomillashtirish hamda davlat mulki negizida tashkil etilgan aksiyadorlik jamiyatlarini boshqarishda aksiyadorlar rolini oshirish chora-tadbirlari toʻgʻrisida” 1997-yil 18-avgustdagi 404-son qaroriga 3-ilovada belgilangan tartibda amalga oshiriladi.

4.2. Komissiya majlislari uning aʼzolarining kamida toʻrtdan uch qismi qatnashgan holda zaruratga qarab vaqti-vaqti bilan oʻtkazib turiladi.

Komissiya qarorlari majlisda qatnashayotgan Komissiya aʼzolarining oddiy koʻpchilik ovozi bilan qabul qilinadi. Ovozlar teng boʻlib qolgan hollarda Komissiya raisining ovozi hal qiluvchi ovoz hisoblanadi.

Komissiya qarorlari majlisda qatnashgan Komissiya aʼzolari tomonidan imzolanadigan va Komissiya raisi yoki uning oʻrinbosari tomonidan tasdiqlanadigan bayonnoma bilan rasmiylashtiriladi. Bayonnoma imzolanayotganda Komissiya aʼzolari oʻzlarining alohida fikrlarini bildirishga haqlidirlar.

4.3. Tender obyektlarini uning gʻoliblariga berish Komissiyaning tegishli qaroriga koʻra Oʻzbekiston Respublikasi Davlat mulki qoʻmitasi tomonidan amalga oshiriladi.

4.4. Tender takliflarini koʻrib chiqish va baholash toʻgʻrisidagi axborot baholash tartibotiga rasmiy ravishda aloqasi boʻlmagan shaxslarga bildirilmaydi.

Komissiya aʼzolari koʻrsatib oʻtilgan axborotni oshkor qilganliklari uchun qonun hujjatlarida belgilangan tartibda javob beradilar.

4.5. Komissiyaning tendyerlarni tashkil etish va ularni oʻtkazish, shuningdek, xorijiy ekspert kompaniyalarni va vositachilarni tender asosida tanlash xarajatlari hamda ularga toʻlanadigan pul mukofotlari:

institutsional oʻzgartirishlarni amalga oshirish uchun Jahon banki qarzi boʻyicha;

davlat mulki obyektlarini davlat tasarrufidan chiqarish va xususiylashtirishdan;

tender obyektini sotishdan tushadigan mablagʻlar hisobidan toʻlanadi.

4.6. Tenderga tayyorgarlik koʻrishga xorijiy ekspert kompaniyalar va vositachilar tender asosida taklif qilingan hollarda Komissiya Yakka tartibda xususiylashtirish byurosi bilan tuziladigan shartnomani koʻrib chiqadi, uning asosiy mazmuni quyidagilar hisoblanadi:

texnik topshiriq;

mukofot miqdori;

tomonlarning majburiyatlari va shartnomaning amal qilishini toʻxtatish shartlari.

Shartnoma Komissiya raisi yoki uning oʻrinbosari tomonidan maʼqullangandan soʻng kuchga kiradi.

V. IDORALARARO IShChI GURUHLARNING VAKOLATLARI

5.1. Idoralararo ishchi guruhlar (keyingi oʻrinlarda ishchi guruhlar deb ataladi) korxonalarning qaysi tarmoqqa qarashliligiga qarab Moliya vazirligi, Adliya vazirligi, Iqtisodiyot vazirligi, Davlat mulki qoʻmitasi, Tashqi iqtisodiy aloqalar, investitsiyalar va savdo vazirligi, Vazirlar Mahkamasining masʼul xodimlari hamda tegishli tarmoqlar va korxonalar vakillaridan iborat tarkibda tuziladi.

Ishchi guruhlarga Bosh vazir oʻrinbosarlari — Vazirlar Mahkamasining tegishli tarmoqlar komplekslari rahbarlari boshchilik qiladilar. Ishchi guruhlar aʼzolarining shaxsiy tarkibi Komissiya raisi yoki uning oʻrinbosari tomonidan tasdiqlanadi. Ishchi guruhlarning ish rejasi Bosh vazir oʻrinbosari — ishchi guruh raisi tomonidan tasdiqlanadi.

5.2. Ishchi guruhning asosiy funksiyalari quyidagilar hisoblanadi:

Vazirlar Mahkamasining 1998-yil 17-noyabrdagi 477-son qaroriga 1, 2 va 3-ilovalarga muvofiq obyektlar texnik-iqtisodiy koʻrsatgichlari, ularni rivojlantirish istiqbollari toʻgʻrisidagi barcha birlamchi axborotlarni Komissiya ishchi organiga taqdim etish uchun tayyorlash;

tendyerlarni tashkil etishga jalb qilinadigan vositachilar uchun texnik topshiriqlarni tuzishda qatnashish;

xususiylashtirish obyektlarini, aksiyalar paketlarini sotuvga qoʻyish shartlari, ularni sotish qiymati, investitsiya takliflarini baholash tartibi, gʻolibni tanlash mezonlari, toʻlovlar tartibi va shartlari boʻyicha Komissiya ishchi organiga takliflar kiritish;

potensial xorijiy investorlarni xususiylashtiriladigan korxonalar bilan tanishtirishni tashkil etish;

ekspert baholashni amalga oshirish va xorijiy investorlardan tushayotgan investitsiya takliflari boʻyicha xulosalar tayyorlash.

5.3. Ishchi guruh raisi tasarrufidagi tarmoqlarning sotiladigan obyektlari boʻyicha xorijiy investorlarning takliflari koʻrib chiqilayotganda Tender komissiyasi majlislarida, shuningdek, xususiylashtirishni oʻtkazish uchun jalb qilinayotgan xorijiy texnik, moliyaviy va boshqa maslahatchilar hamda ekspertlarni tanlashda qatnashishi shart.

5.4. Ishchi guruh majlisi uning aʼzolarining toʻrtdan uch qismi qatnashganda haqiqiy deb hisoblanadi.

Ishchi guruh majlislari qarorlari majlisda qatnashgan ishchi guruhining barcha aʼzolari tomonidan imzolanadigan bayonnoma bilan rasmiylashtiriladi va rais tomonidan tasdiqlanadi.

Qarorlar majlisda qatnashayotgan komissiya aʼzolarining oddiy koʻpchilik ovozi bilan qabul qilinadi. Ovozlar teng boʻlib qolgan taqdirda raisning ovozi hal qiluvchi ovoz hisoblanadi.

VI. KOMISSIYANING IShChI ORGANI

6.1. Oʻzbekiston Respublikasi Davlat mulki qoʻmitasi Komissiyaning tender savdolarini tayyorlash va oʻtkazishni amalda tashkil qilishni amalga oshiruvchi (tushayotgan takliflarni ekspert baholash, tender hujjatlarini va Komissiya hujjatlarini rasmiylashtirish, reklama ishlari, Komissiyada ish yuritish) ishchi organi hisoblanadi.

6.2. Komissiyaning ishchi organi quyidagi huquqlarga ega:

a) Komissiyaga:

yirik xorijiy texnik, moliyaviy, yuridik ekspertlarni va vositachilarni taklif qilish hamda tender savdolarini tayyorlash va oʻtkazish jarayonida ularning qatnashish shartlari boʻyicha;

tender savdolarini tayyorlash va oʻtkazishning moliyaviy va texnik shartlari, investitsiya takliflarini baholash tartibi, gʻolibni tanlash mezonlari, toʻlovlar tartibi va shartlari boʻyicha takliflar kiritish;

b) davlat boshqaruvi organlari, davlat hokimiyati va boshqaruvi mahalliy organlari, yuridik shaxslar birlashmalari va xususiylashtiriladigan korxonalardan unga yuklangan vazifalarni taʼminlash uchun zarur boʻlgan axborotlarni olish;

v) idoralararo ishchi guruhlar ishlari toʻgʻrisidagi hisobotlarni soʻrab olish;

g) Komissiya bilan kelishgan holda tender savdolarini oʻtkazish va ularning yakunlari toʻgʻrisida ommaviy axborot vositalarida oʻz nomidan eʼlonlar chiqarish.

6.3. Komissiyaning ishchi organi quyidagilarga majbur:

Komissiya tomonidan qabul qilingan qarorlarni oʻz vaqtida va toʻliq bajarish;

har bir xususiylashtirish obyekti toʻgʻrisidagi axborotlarni toʻplash, tartibga solish va ishlashni amalga oshirish;

potensial investorlarga obyektlar haqidagi umumiy majburiy axborotlar va ularning soʻrovlari boʻyicha qoʻshimcha axborot oʻz vaqtida joʻnatilishini taʼminlash;

bevosita yoxud sotish boʻyicha boshqa agentlar bilan birgalikda texnik topshiriq, kontrakt loyihalarini va Komissiya tasdigʻiga kiritiladigan boshqa tender hujjatlarini ishlab chiqish va rasmiylashtirish;

idoralararo guruhlarning loyihalarni ishlab chiqish va sotiladigan obyektlar boʻyicha tushayotgan takliflarni ekspert baholash yuzasidan ishlarini muvofiqlashtirish;

tendyerlarni oʻtkazish boʻyicha reklama-maʼrifiy ishlarni tashkil etish;

Komissiya majlislarini chaqirishning barcha tashkiliy masalalarini hal qilish;

Komissiyada aniq va toʻliq ish yuritish, Komissiya xat-xabarlarini hisobga olish va turkumlash, Komissiya va idoralararo guruhlar barcha majlislarining bayonnomalarini oʻz vaqtida va toʻliq rasmiylashtirish.

Davlat mulki qoʻmitasi aksiyalar paketlari va korxonalarni xorijiy investorlarga sotish boʻyicha tasdiqlangan chora-tadbirlarning soʻzsiz bajarilishi, xususiylashtirishdan valyuta resurslarining qoʻshimcha toʻldirilishi, shuningdek, Vazirlar Mahkamasining 1999-yil 20-maydagi 258-son qarori talablariga muvofiq davlat tasarrufidan chiqarishdan tushumlarni taqsimlash yuzasidan talablarga qatʼiy rioya qilinishi uchun toʻliq javob beradi.