“Davinkom” investitsiya firmasini tashkil etish toʻgʻrisida (303-son)

17.06.1999

Oʻzbekiston Respublikasi Vazirlar Mahkamasining

qarori

Xususiylashtirilgan korxonalarning davlatga tegishli qimmatli qogʻozlarini ichki va xalqaro fond bozorlarida tarqatish ishlarini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi huzurida davlat qoʻshma korxonasi shaklidagi, oʻz faoliyatini xoʻjalik hisobida yuritish huquqlari boʻyicha amalga oshiruvchi “Davinkom” investitsiya firmasi tashkil etilsin.

Belgilansinki, quyidagilar “Davinkom” investitsiya firmasining asosiy vazifalari va faoliyati yoʻnalishlari hisoblanadi:

bozor hajmini aniqlash va qimmatli qogʻozlarni sotishning eng samarali yoʻllari va shakllarini tanlash maqsadida qimmatli qogʻozlarning mamlakatimizdagi va xalqaro bozorlari ahvolini oʻrganish boʻyicha marketing tadqiqotlarini oʻtkazish;

xususiylashtirilgan korxonalar — emitentlar va ular tomonidan chiqarilayotgan qimmatli qogʻozlar toʻgʻrisidagi axborotlarni tarqatish, mamlakatimizdagi va xorijiy investorlarni jalb etish maqsadida reklama faoliyati bilan shugʻullanish;

xususiylashtirilgan korxonalarning davlatga tegishli qimmatli qogʻozlarini ichki va xalqaro bozorlarda, shu jumladan birja va birjadan tashqari savdolarda mustaqil ravishda yoki shartnoma asosida jalb etiladigan mamlakatimiz hamda chet el investitsiya muassasalari va banklari orqali belgilangan tartibda tarqatish;

qimmatli qogʻozlar olti-sotdisi boʻyicha oʻzi tuzgan bitishuvlarning oʻz vaqtida va toʻliq ijrosi monitoringini amalga oshirish;

Oʻzbekiston Respublikasi Davlat mulki qoʻmitasi tomonidan amalga oshirilayotgan xususiylashtirish dasturi boʻyicha, keyinchalik ularni Tender savdolari oʻtkazish boʻyicha davlat komissiyasiga kiritish uchun, xususiylashtirilayotgan korxonalar va aksiyalar narxlarini belgilash bilan bogʻliq sansalorlik, rasmiyatchilik, masalalarni hal etish muddatlarini choʻzib yuborish hollarini aniqlash;

korxonalarning investitsiya ehtiyojlariga muvofiq ularning biznes-rejalarini roʻyobga chiqarish uchun qimmatli qogʻozlarning ikkilamchi va undan keyingi emissiyalarini oʻtkazish sxemalarini shartnoma asosida ishlab chiqish.

2. “Davinkom” firmasi markaziy apparatining va mintaqalardagi filiallarining tuzilmasi 1 va 2-ilovalarga muvofiq tasdiqlansin.

“Davinkom” firmasi va uning Qoraqalpogʻiston Respublikasi va viloyatlardagi filiallari xodimlarining cheklangan soni 77 nafar, shu jumladan markaziy apparat xodimlari soni 25 nafar (xizmat koʻrsatuvchi xodimlardan tashqari) etib belgilansin.

Belgilansinki:

“Davinkom” firmasi bosh direktori, uning oʻrinbosari hamda filiallar direktorlari Oʻzbekiston Respublikasi Davlat mulki qoʻmitasi hayʼati qaroriga koʻra, Oʻzbekiston Respublikasi Vazirlar Mahkamasi bilan kelishgan holda tayinlanadilar;

“Davinkom” firmasi markaziy apparatini va uning mintaqalardagi filiallari faoliyatini mablagʻ bilan taʼminlash ustavga muvofiq xoʻjalik faoliyatini yuritishdan olingan daromadlar hisobiga amalga oshiriladi.

3. Belgilab qoʻyilsinki:

“Davinkom” firmasi xususiylashtirilgan korxonalarning davlatga tegishli qimmatli qogʻozlarini mamlakatimiz va xalqaro fond bozorlarida tarqatish boʻyicha Oʻzbekiston Respublikasi Davlat mulki qoʻmitasining vakolatli agenti hisoblanadi;

“Davinkom” firmasi xususiylashtirilayotgan korxonalarning qimmatli qogʻozlarini tarqatish (sotish) boʻyicha oʻzining barcha ishlarini faqat Oʻzbekiston Respublikasi Davlat mulki qoʻmitasi nomidan va uning topshirigʻiga binoan amalga oshiradi;

“Davinkom” firmasining daromadlari va xarajatlari smetasi, uning foydasini taqsimlash, filiallari va vakolatxonalarini ochish tartibi Oʻzbekiston Respublikasi Davlat mulki qoʻmitasi tomonidan tasdiqlanadi;

“Davinkom” firmasining faoliyati asosiy yoʻnalishlarini muvofiqlashtirib borish, ustav jamgʻarmasini koʻpaytirish toʻgʻrisida qarorlar qabul qilish va oʻtkaziladigan operatsiyalarini nazorat qilish Oʻzbekiston Respublikasi Davlat mulki qoʻmitasi tomonidan amalga oshiriladi.

4. Belgilansinki, “Davinkom” firmasi” daromadlari:

firma tomonidan qimmatli qogʻozlar birja va birjadan tashqari bozorlarda mustaqil ravishda sotilganda — Oʻzbekiston Respublikasi Davlat mulki qoʻmitasidan oldi-sotdi bitishuvi summasining 1 foizi miqdorida olinadigan vositachilik yigʻimlari va qimmatli qogʻozlar oldi-sotdisi bitishuvlari narxining taklif etilgan narxdan ortiq summasining 5 foizi miqdorida olinadigan mukofotlar hisobiga;

firma tomonidan qimmatli qogʻozlar birjadan tashqari bozorda birjadan tashqari savdolarning elektron tizimi orqali yoki vositachini — mamlakatimiz investitsiya muassasasini tender asosida jalb etgan holda sotilganda — Oʻzbekiston Respublikasi Davlat mulki qoʻmitasidan tuzilgan bitishuv summasining bir foizi miqdorida olinadigan vositachilik yigʻimi hisobiga, ularning 0,1 foizi esa “Davinkom” firmasi ixtiyorida qoladi, 0,9 foizi esa vositachiga yoki birjadan tashqari savdolarning elektron tizimini amalga oshiruvchi tashkilotga oʻtkaziladi;

firma tomonidan qimmatli qogʻozlar xorijiy vositachini jalb etgan holda sotilganda — Oʻzbekiston Respublikasi Davlat mulki qoʻmitasidan amalga oshirilgan bitishuv summasining bir foizi miqdorida olinadigan mukofot hisobiga;

firma ustaviga va amaldagi qonun hujjatlariga muvofiq “Davinkom” firmasi asosiy faoliyati bilan bogʻliq boshqa ishlarni bajarish va xizmatlar koʻrsatishdan tushumlar hisobiga shakllanadi.

5. Oʻzbekiston Respublikasi Davlat mulki qoʻmitasi bir oy muddatda:

“Davinkom” firmasi Ustavini ishlab chiqsin va belgilangan tartibda tasdiqlasin;

“Davinkom” firmasi ustav jamgʻarmasini xususiylashtirishdan olinadigan, investitsiya va bozor infratuzilmasini rivojlantirishga yoʻnaltiriladigan mablagʻlar hisobiga 5 mln. soʻm miqdorida shakllantirsin;

“Davinkom” firmasining markaziy apparati va filiallarini yuqori malakali mutaxassislar bilan butlasin;

“Davinkom” firmasi markaziy apparatini va filiallarini, ularning zimmalariga yuklangan vazifalarga muvofiq faoliyat koʻrsatishini taʼminlash uchun, moddiy-texnikaviy jihozlashda koʻmaklashsin;

“Davinkom” firmasining markaziy apparatini Respublika birja markazining Toshkent shahar, Buxoro koʻchasi, 10-uydagi binosining Respublika koʻchmas mulk birjasi tomonidan boʻshatiladigan xonalarga joylashtirsin;

Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda “Davinkom” firmasi filiallarini joylashtirish masalasini hal qilsin.

6. Toshkent shahar hokimligi Respublika koʻchmas mulk birjasini joylashtirishni ikki hafta muddatda taʼminlasin.

7. Oʻzbekiston pochta va telekommunikatsiyalar agentligi “Davinkom” firmasini va uning filiallarini belgilangan tartibda telefon va telegraf, shu jumladan Hukumat aloqa vositalari bilan taʼminlasin.

8. Oʻzbekiston Respublikasi Vazirlar Mahkamasining “Aksiyalar paketlarini joylashtirishni takomillashtirish hamda davlat mulki negizida tashkil etilgan aksiyadorlik jamiyatlarini boshqarishda aksiyadorlar rolini oshirish chora-tadbirlari toʻgʻrisida” 1997-yil 18-avgustdagi 404-son qaroriga 2-ilovaga 3-ilovaga muvofiq oʻzgartirish va qoʻshimchalar kiritilsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari V.A. Chjen zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1999-yil 17-iyun,

303-son

Vazirlar Mahkamasining 1999-yil 17-iyundagi 303-son qaroriga 1-ILOVA

“Davinkom” investitsiya firmasi markaziy apparati

TUZILMASI

Vazirlar Mahkamasining 1999-yil 17-iyundagi 303-son qaroriga 2-ILOVA

“Davinkom” investitsiya firmasi filialining

NAMUNAVIY TUZILMASI

Vazirlar Mahkamasining 1999-yil 17-iyundagi 303-son qaroriga 3-ILOVA

Oʻzbekiston Respublikasi Vazirlar Mahkamasining 1997-yil 18-avgustdagi 404-son qarori bilan tasdiqlangan “Xususiylashtirilayotgan korxonalar aksiyalari bilan birja va birjadan tashqari bozorlarda bitishuvlarni amalga oshirish tartibi”ga kiritiladigan oʻzgartirish va qoʻshimchalar

1. 1.2-bandda:

oʻninchi xatboshi quyidagi tahrirda bayon qilinsin:

“Davlat mulki qoʻmitasining xususiylashtirilayotgan korxonalar aksiyalarini savdoga qoʻyish boʻyicha vakil qilingan agenti (vakil qilingan agent) — “Davinkom” investitsiya firmasi;

oʻn birinchi xatboshi chiqarib tashlansin.

2. 2.1-band quyidagi tahrirda bayon qilinsin:

“Oʻzbekiston Respublikasi Davlat mulki qoʻmitasining korxonalarni davlat tasarrufidan chiqarish va xususiylashtirish hamda aksiyalar emissiyasi prospektini tasdiqlash toʻgʻrisidagi qarori (buyrugʻi) xususiylashtirilayotgan korxonalar aksiyalarini birja va birjadan tashqari savdolarga qoʻyish uchun asos hisoblanadi. Aksiyalarni tarqatishga mamlakatimiz va xorijiy vositachilar jalb etilgan taqdirda, shuningdek oʻtkazilgan, gʻolibni aniqlab bergan tegishli tenderning bayoni ham uning uchun asos hisoblanadi”.

3. 4.1-bandning “b” kichik bandida:

uchinchi xatboshi quyidagi tahrirda bayon qilinsin:

“vakil qilingan agent xususiylashtirilayotgan korxonalar aksiyalari paketlarini toʻgʻridan toʻgʻribirja savdolariga ular sotilgungacha boʻlgan muddatga qoʻyadi”;

toʻrtinchi, beshinchi, yettinchi xatboshilar chiqarib tashlansin.

4. 4.3-band chiqarib tashlansin.

5. 5.1-band quyidagi mazmundagi xatboshi bilan toʻldirilsin:

“Vakil qilingan agent aksiyalarni tarqatishni mustaqil ravishda yoki tender asosida jalb etiladigan vositachilar — investitsiya muassasalari orqali amalga oshiradi”.

6. 5.2-band quyidagi tahrirda bayon qilinsin:

“Vakil qilingan agent aksiyalarni sotish va vositachilar — investitsiya muassasalarini jalb etish boʻyicha tenderlarning tashkilotchisi hisoblanadi, u Oʻzbekiston Respublikasi Davlat mulki qoʻmitasi bilan kelishgan holda tenderni oʻtkazish shartlari va muddatlarini belgilaydi”.

7. 6.1-banddagi “Markaz yoki Davlat mulki qoʻmitasi vakil qilgan boshqa organ” soʻzlari “Davinkom” investitsiya firmasi” soʻzlari bilan almashtirilsin.

8. 6.2-bandning uchinchi xatboshidagi “birja va birjadan tashqari bozorlarda” soʻzlari “birjadan tashqari bozorda” soʻzlari bilan almashtirilsin.

9. 6.4-banddagi birinchi gap quyidagi tahrirda bayon qilinsin:

“Birja va birjadan tashqari bozorlarda aksiyalarning taklif etiladigan narxi Oʻzbekiston Respublikasi Davlat mulki qoʻmitasi yoki uning topshirigʻiga koʻra, vakil qilingan agent tomonidan belgilanadi”.

10. 9.1-bandning toʻrtinchi xatboshi quyidagi tahrirda bayon qilinsin:

“xususiylashtirilayotgan korxonalarning vakil qilingan agent topshirigʻiga asosan sotishga qoʻyiladigan aksiyalarini zaxiraga qoʻyishni amalga oshirish”.

11. “Xususiylashtirilayotgan korxonalar aksiyalari bilan birja va birjadan tashqari bozorlarda bitishuvlarni amalga oshirish tartibi”ga 1, 2 va 3-ilovalar chiqarib tashlansin.