Tadbirkorlik subyektlariga “yagona darcha” tamoyili boʻyicha davlat xizmatlari koʻrsatish yagona markazlari faoliyatini tashkil etish tartibi toʻgʻrisidagi nizomga oʻzgartirish kiritish haqida (357-son)
21.10.2016
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Oʻzbekiston Respublikasining 2016-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida” 2015-yil 22-dekabrdagi PQ-2455-son qaroriga oʻzgartirish kiritish toʻgʻrisida” 2016-yil 23-sentabrdagi PQ-2610-son qarorini bajarish yuzasidan hamda mahalliy budjetlar daromadlarini yanada optimallashtirish maqsadida Vazirlar Mahkamasi qaror qiladi:
1. Vazirlar Mahkamasining 2015-yil 14-dekabrdagi 358-son qarori (Oʻzbekiston Respublikasi QT, 2015-y., 12-son, 107-modda) bilan tasdiqlangan Tadbirkorlik subyektlariga “yagona darcha” tamoyili boʻyicha davlat xizmatlari koʻrsatish yagona markazlari faoliyatini tashkil etish tartibi toʻgʻrisidagi nizomning 13-bandi quyidagi tahrirda bayon qilinsin:
“13. Tumanlar (shaharlar) hokimliklari tomonidan koʻrsatilayotgan roʻyxatga kiritilgan davlat xizmatlari uchun tushadigan davlat bojlari, yigʻimlar va boshqa toʻlovlar mablagʻlari summasi, qonun hujjatlarida belgilangan holatlardan tashqari, “yagona darcha” markazlari daromadlariga tegishli gʻaznachilik boʻlimlari tomonidan maxsus ochilgan hisob raqamlariga oʻtkaziladi hamda faqat “yagona darcha” markazlarining moddiy-texnika bazasini mustahkamlashga, xodimlari mehnatiga haq toʻlashga va ularni ragʻbatlantirishga yoʻnaltiriladi.
“Yagona darcha” markazlari daromadlariga oʻtkaziladigan davlat bojlari, yigʻimlar va boshqa toʻlovlar mablagʻlari miqdori Oʻzbekiston Respublikasi Moliya vazirligi tomonidan belgilangan tartibda aniqlanadi”.
2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari, moliya vaziri R.S. Azimov zimmasiga yuklansin.
Oʻzbekiston Respublikasining Bosh vaziri Sh. MIRZIYOYEV
Toshkent sh.,
2016-yil 21-oktabr,
357-son