Markazlashtirilgan manbalar hisobiga qurilayotgan obyektlarni oʻz vaqtida mablagʻ bilan taʼminlashga doir qoʻshimcha chora-tadbirlar toʻgʻrisida (152-son)

27.03.2001

Oʻzbekiston Respublikasi Vazirlar Mahkamasining

qarori

Qurilayotgan obyektlarni kafolatli va oʻz vaqtida mablagʻ bilan taʼminlash, mablagʻ bilan taʼminlashning markazlashtirilgan manbalaridan samarali va maqsadli foydalanish, qurilish qiymatining asossiz ravishda oshib ketishiga yoʻl qoʻymaslik maqsadida Vazirlar Mahkamasi qaror qiladi:

1. 2001-yil 1-apreldan boshlab quyidagi tartib belgilansin, unga muvofiq mablagʻ bilan taʼminlashning markazlashtirilgan manbalari hisobiga qurilayotgan obyektlar boʻyicha:

obyektlar qurilishi yuzasidan pudrat shartnomalari (kontraktlar) keyinchalik oʻzgartirilmaydigan shartnomaviy narx boʻyicha tanlov (tender) savdolari natijalari boʻyicha tuziladi;

obyektlar qurilishida qatnashuvchi pudrat (bosh pudratchi va subpudratchi) tashkilotlariga avans berish uchun xizmat koʻrsatuvchi bankda ularga belgilangan tartibda maxsus maqsadli hisob raqamlari ochiladi;

pudrat tashkilotlariga moddiy-texnika resurslariga boʻlgan asosli ehtiyojlar hisobga olingan holda pudrat tashkilotining maxsus maqsadli hisob raqami orqali buyurtmachi tomonidan har oyda, boʻlgʻusi chorakda kutilayotgan qurilish-montaj ishlari hajmining 20 foizidan koʻp boʻlmagan miqdorda, avans beriladi;

maxsus hisob raqamlariga tushuvchi mablagʻlar pudrat tashkilotlari tomonidan faqat yetkazib berilayotgan moddiy-texnika resurslari uchun haq toʻlashga va obyektlar qurilishida qatnashayotgan subpudrat tashkilotlariga avans berishga sarflanadi;

ichki bozordan qurilish materiallari, buyumlar, konstruksiyalar va asbob-uskunalar asosan haq toʻlashning akkreditiv shaklini qoʻllash orqali sotib olinadi;

bajarilgan ishlar uchun, ishlarning amalda bajarilgan bosqichlari va turlarining foiz nisbati hisobga olingan holda, qatʼiy kontrakt narxlari asosida hisob-kitob qilinadi;

soliqlar bajarilgan ishlar hajmi uchun pudrat tashkilotlarining asosiy depozit (hisob-kitob) hisob raqamidan belgilangan tartibda toʻlanadi (maxsus hisob raqamlariga tushgan avans mablagʻlar hisobga olinmaydi);

budjet mablagʻlari va markazlashtirilgan kreditlar hisobiga qurilayotgan obyektlarda bajarilgan, biroq haq toʻlanmagan ishlar boʻyicha soliqlar toʻlanmaganligi uchun hisoblangan penya va jarimalarni undirish Oʻzbekiston Respublikasi Moliya vazirligi va Davlat soliq qoʻmitasi tomonidan belgilanadigan tartibda amalga oshiriladi;

buyurtmachi tashkilotlarning rahbarlari markazlashtirilgan kapital qoʻyilmalarni mablagʻ bilan taʼminlashga ajratilayotgan mablagʻlardan maqsadli va samarali foydalanilishi uchun shaxsan javob beradilar.

2. Oʻzbekiston Respublikasi Moliya vazirligi, Makroiqtisodiyot va statistika vazirligi, Davlat arxitektura va qurilish qoʻmitasi, Davlat soliq qoʻmitasi, Markaziy bank bir oy muddatda:

davlat budjeti mablagʻlari va markazlashtirilgan kreditlar hisobiga respublika investitsiya dasturiga kiritilgan obyektlar qurilishiga avans berish va hisob-kitob qilish tartibini;

obyektlar qurilishining ikkinchi yili va keyingi yillariga shartnomaviy narxlarni aniqlash tartibini ishlab chiqsinlar va tasdiqlasinlar.

3. Oʻzbekiston Respublikasi Davlat arxitektura va qurilish qoʻmitasi:

pudratchilarning tanlov (tender)da qatnashish toʻgʻrisidagi buyurtmanomasida qurilish-montaj ishlari hajmining kamida 50 foizi albatta pudratchilarning oʻz kuchlari bilan bajarilishi, shuningdek buyurtmachi va pudratchining keyinchalik oʻzgartirilmaydigan shartnomaviy narxlar boʻyicha oʻzaro hisob-kitob qilish toʻgʻrisidagi majburiyatlari mavjud boʻlishiga oid talabni joriy etsin;

buyurtmachilar pudrat shartnomalarini hamda qurilishlarning aniq roʻyxatlarini tuzishda foydalanishlari uchun, ichki va tashqi bozorlarda qurilish materiallari narxini tahlil qilish asosida, obyektlar qurilishining joriy narxlarda hisoblangan qiymatini aniqlash boʻyicha bir oy muddatda tavsiyalar tayyorlasin;

manfaatdor vazirliklar va idoralar bilan birgalikda ishga tushirilayotgan quvvatlar birligi qurilish qiymatining mintaqalarning oʻziga xos shart-sharoitlariga qarab tabaqalashtirilgan normativlarini uch oy muddatda ishlab chiqsin va belgilangan tartibda tasdiqlasin.

Oʻzbekiston Respublikasi Makroiqtisodiyot va statistika vazirligi, Moliya vazirligi qurilish qiymati normativlarini ishlab chiqishga doir ishlarni normativ hujjatlar ishlab chiqishga ajratiladigan budjet mablagʻlari hisobiga mablagʻ bilan taʼminlashni nazarda tutsinlar.

4. 2001-yil 1-apreldan boshlab, bir yil muddatga, mulkchilikning barcha shakllaridagi korxonalarning ilovaga muvofiq roʻyxat boʻyicha respublikada ishlab chiqarilayotgan qurilish materiallari, buyumlar, konstruksiyalar va asbob-uskunalarning asosiy turlariga narxlar oshishini Oʻzbekiston Respublikasi Moliya vazirligi organlarida majburiy asoslashi joriy etilsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S.Azimov va A.N.Isayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2001-yil 27-mart,

152-son

Vazirlar Mahkamasining 2001-yil 27-martdagi 152-son qaroriga ILOVA

Narxlari moliya organlarida asoslanadigan qurilish materiallari va asbob-uskunalar

ROʻYXATI

1. Suv-gaz oʻtkazish quvurlari

2. Barcha turdagi gʻishtlar, shlak bloklar

3. Keramik va plastmassa quvurlar

4. Oʻquv mebeli va asbob-uskunalar

5. Transformator kichik stansiyalari, elektr ishga tushirish apparatlari, elektr shchitlar, elektr javonlar

6. Keramzit

7. Yigʻma temir-beton buyumlar va konstruksiyalar

8. Tabiiy toshdan ishlangan qoplama plitkalar

9. Keramika bezak plitkalari

10. Plastmassa, alyuminiydan tayyorlangan deraza va eshik bloklari

11. Lok-boʻyoq mahsulotlari

12. Santexnika buyumlari va asbob-uskunalari

13. Ohak

14. Alebastr