Toshqinga qarshi favqulodda komissiya faoliyati masalalari toʻgʻrisida (128-son)

04.04.2000

Oʻzbekiston Respublikasi Vazirlar Mahkamasining

qarori

Toshqin va seldan koʻrilishi mumkin boʻlgan zararning oldini olish, aholi punktlari, gidrotexnika inshootlari, kanallar, temir yoʻllar va shosse yoʻllar, koʻpriklar va qishloq xoʻjaligi ekinlari saqlanishini taʼminlash ishlarini muvofiqlashtirish maqsadida Vazirlar Mahkamasi qaror qiladi:

1. Toshqinga qarshi favqulodda komissiya tarkibi ilovaga* muvofiq tasdiqlansin.

* Ilova berilmaydi.

2. Joylarda toshqinlardan koʻrilishi mumkin boʻlgan zararning oldini olish va bartaraf etish ishlarini tashkil etish uchun shaxsiy javobgarlik Qoraqalpogʻiston Respublikasi Vazirlar Kengashi Raisi va viloyatlar, shaharlar, tumanlar hokimlari, vazirliklar, idoralar, korxonalar va tashkilotlarning rahbarlari zimmasiga yuklansin.

3. “Boshgidromet” boshqarmasi, Oʻzbekiston Respublikasi Davlat geologiya qoʻmitasi, Favqulodda vaziyatlar vazirligi toshqin suvlari, sel oqimlari oʻtadigan va koʻchki hodisalari yuz beradigan zonalarda xavfli uchastkalarni aniqlasinlar hamda ushbu zonalarda obyektlarni himoya qilish boʻyicha vazirliklar, idoralar va tashkilotlarga tegishli koʻrsatmalar bersinlar.

4. Oʻzbekiston Respublikasi Qishloq va suv xoʻjaligi vazirligi, “Davsuvxoʻjaliknazorat” inspeksiyasi bir oy muddatda toshqin boʻlishi mumkin boʻlgan zonalarda joylashgan suv omborlarining texnik holatini oʻrganib chiqsinlar va ularni toshqin suvlari toʻplanishini hisobga olgan holda toʻldirish yuzasidan tavsiyalar bersinlar.

5. “Boshgidromet” boshqarmasi, Oʻzbekiston Respublikasi Favqulodda vaziyatlar vazirligi, Qoraqalpogʻiston Respublikasi Vazirlar Kengashi hamda viloyatlar, shaharlar va tumanlar hokimliklari toshqin va sel boʻlishi mumkinligi toʻgʻrisida aholi oʻz vaqtida xabardor qilinishini taʼminlasinlar, zaruriyat boʻlsa aholi va mollarni xavfsiz zonalarga vaqtincha evakuatsiya qilish chora-tadbirlarini koʻrsinlar.

6. Vazirlar Mahkamasining 1992-yil 28-apreldagi 209-son qarorining komissiya tarkibiga oid qismi oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.R. Yunusov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2000-yil 4-aprel,

128-son