Chet el tovarlarini tashish jarayonida bojxona toʻlovlari toʻlanishini taʼminlashni vakolatli shaxslar bilan real vaqt rejimida interaktiv shaklda oʻzaro hamkorlik asosida hisobga olish va nazorat qilish tartibi toʻgʻrisidagi nizomni tasdiqlash haqida (2823-son)

13.09.2016

Oʻzbekiston Respublikasi Davlat bojxona qoʻmitasining

Qarori

[Oʻzbekiston Respublikasi Adliya vazirligi tomonidan 2016-yil 13-sentabrda roʻyxatdan oʻtkazildi, roʻyxat raqami 2823]

Oʻzbekiston Respublikasining Bojxona kodeksi va Oʻzbekiston Respublikasi Vazirlar Mahkamasining 2004-yil 20-maydagi 239-son “Oʻzbekiston Respublikasi hududida tashilayotgan tovarlarni bojxona tomonidan nazorat qilishni kuchaytirish toʻgʻrisida”gi qaroriga muvofiq Oʻzbekiston Respublikasi Davlat bojxona qoʻmitasi qaror qiladi:

1. Chet el tovarlarini tashish jarayonida bojxona toʻlovlari toʻlanishini taʼminlashni vakolatli shaxslar bilan real vaqt rejimida interaktiv shaklda oʻzaro hamkorlik asosida hisobga olish va nazorat qilish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Rais Z. DUSANOV

Toshkent sh.,

2016-yil 19-avgust,

01-02/12-58-son

Oʻzbekiston Respublikasi Davlat bojxona qoʻmitasining 2016-yil 19-avgustdagi 01-02/12-58-son qaroriga ILOVA

Chet el tovarlarini tashish jarayonida bojxona toʻlovlari toʻlanishini taʼminlashni vakolatli shaxslar bilan real vaqt rejimida interaktiv shaklda oʻzaro hamkorlik asosida hisobga olish va nazorat qilish tartibi toʻgʻrisidagi

NIZOM

Mazkur Nizom Oʻzbekiston Respublikasining Bojxona kodeksi, Oʻzbekiston Respublikasi Vazirlar Mahkamasining 2004-yil 20-maydagi 239-son “Oʻzbekiston Respublikasi hududida tashilayotgan tovarlarni bojxona tomonidan nazorat qilishni kuchaytirish toʻgʻrisida”gi qaroriga muvofiq, chet el tovarlarini tashish jarayonida bojxona toʻlovlari toʻlanishini taʼminlashni vakolatli shaxslar bilan real vaqt rejimida interaktiv shaklda oʻzaro hamkorlik asosida hisobga olish va nazorat qilish tartibini belgilaydi.

1-bob. Umumiy qoidalar

1. Mazkur Nizomda quyidagi asosiy tushunchalar qoʻllaniladi:

Oʻzbekiston Respublikasi Davlat bojxona qoʻmitasining yagona avtomatlashtirilgan axborot tizimi (bundan buyon matnda DBQ YaAAT deb yuritiladi) — bojxona chegarasi orqali olib oʻtiladigan tovarlarning va transport vositalarining bojxona nazoratini amalga oshirish uchun ularga doir hujjatlar va maʼlumotlarning kiritilishini, hisobga olinishini hamda monitoring qilinishini nazarda tutuvchi Oʻzbekiston Respublikasi Davlat bojxona qoʻmitasining avtomatlashtirilgan tizimi;

joʻnatuvchi bojxona posti — tovarning toʻliq turkumi yoki uning qismini bojxona nazorati ostida tashish boshlangan bojxona posti;

manzil bojxona posti — tovarning toʻliq turkumi yoki uning qismini bojxona nazorati ostida tashish tugallanadigan bojxona posti;

bojxona toʻlovlari toʻlanishi taʼminlanganligini tasdiqlovchi hujjat — bojxona hududida bojxona nazorati ostida olib oʻtiladigan tovarlarga nisbatan Oʻzbekiston Respublikasi Bojxona kodeksining 47-bobiga muvofiq pul mablagʻlarini bojxona organining shaxsiy gʻazna hisobvaragʻiga kiritilganligini tasdiqlovchi hujjat, garov toʻgʻrisidagi shartnoma, bank kafolati, sugʻurta polisi yoxud kafillik hujjati;

vakolatli shaxs — chet el tovarlarini tashish jarayonida bojxona toʻlovlari toʻlanishi taʼminlanganligini tasdiqlovchi hujjatga ega hamda bojxona toʻlovlarini toʻlanishiga javobgar boʻlgan yuk joʻnatuvchi, yuk qabul qiluvchi, tashuvchi yoxud boshqa manfaatdor shaxs.

2. Chet el tovarlarini tashish jarayonida bojxona toʻlovlari toʻlanishini taʼminlashni hisobga olish va nazorat qilish DBQ YaAAT orqali amalga oshiriladi.

2-bob. Chet el tovarlarini tashish jarayonida bojxona toʻlovlari toʻlanishini taʼminlashni hisobga olish

3. Chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilinishi uchun vakolatli shaxs Oʻzbekiston Respublikasi Bojxona kodeksining 47-bobiga muvofiq bojxona toʻlovlari toʻlanishi taʼminlangandan soʻng Yagona davlat interaktiv xizmatlari portali orqali Oʻzbekiston Respublikasi Davlat bojxona qoʻmitasining hududiy boshqarmasiga (bundan buyon matnda hududiy boshqarma deb yuritiladi) bojxona toʻlovlari toʻlanishi taʼminlanganligini tasdiqlovchi hujjatni elektron raqamli imzo bilan tasdiqlagan holda taqdim etadi.

4. Hududiy boshqarma oʻn kunlik muddat ichida bojxona toʻlovlari toʻlanishi taʼminlanganligini tasdiqlovchi hujjatni Oʻzbekiston Respublikasi Bojxona kodeksining 47-bobida oʻrnatilgan talablarga muvofiqligini oʻrganib chiqadi. Zarur hollarda hududiy boshqarma bojxona toʻlovlari toʻlanishi taʼminlanganligini tasdiqlovchi hujjatga aloqador boshqa hujjat va maʼlumotlarni tegishli tashkilotlardan mustaqil ravishda soʻrab olishi mumkin.

5. Bojxona toʻlovlari toʻlanishi taʼminlanganligini tasdiqlovchi hujjat Oʻzbekiston Respublikasi Bojxona kodeksining 47-bobida oʻrnatilgan talablarga muvofiq boʻlganda hududiy boshqarma mazkur Nizomning 4-bandida belgilangan oʻn kunlik muddat mobaynida bojxona toʻlovlari toʻlanishi taʼminlanganligi toʻgʻrisidagi maʼlumotlarni DBQ YaAATga kiritadi.

DBQ YaAATda vakolatli shaxsga avtomatik ravishda identifikatsion raqam biriktiriladi va Yagona davlat interaktiv xizmatlari portali orqali yuboriladi.

6. Bojxona toʻlovlari toʻlanishi taʼminlanganligini tasdiqlovchi hujjat Oʻzbekiston Respublikasi Bojxona kodeksining 47-bobida oʻrnatilgan talablarga muvofiq boʻlmaganda hududiy boshqarma mazkur Nizomning 4-bandida belgilangan oʻn kunlik muddat mobaynida vakolatli shaxsga Yagona davlat interaktiv xizmatlari portali orqali sabablarini koʻrsatgan holda chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilish rad etilganligini maʼlum qiladi.

7. Vakolatli shaxs hududiy boshqarmaning chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilish rad etilganligi toʻgʻrisidagi qarori ustidan boʻysunuv tartibida yuqori turuvchi organga yoxud bevosita sudga shikoyat qilishga haqli.

8. Chet el tovarlarini Oʻzbekiston Respublikasi hududi orqali tashishni boshlashdan oldin, vakolatli shaxs Yagona davlat interaktiv xizmatlari portalidagi “Chet el tovarlarining harakatiga bojxona toʻlovlari toʻlanishini taʼminlash” interaktiv xizmati orqali elektron raqamli imzo bilan tasdiqlangan, quyidagi maʼlumotlarni kiritadi:

mazkur Nizomning 5-bandiga muvofiq biriktirilgan identifikatsion raqam;

avtotransport vositasi toʻgʻrisida maʼlumot;

bojxona toʻlovlari toʻlanishini taʼminlash summasi.

9. Yagona davlat interaktiv xizmatlari portalidagi “Chet el tovarlarining harakatiga bojxona toʻlovlari toʻlanishini taʼminlash” interaktiv xizmati orqali kiritilgan maʼlumotlar DBQ YaAATdagi formatli-mantiqiy nazoratdan ijobiy oʻtgandan soʻng avtomatik tarzda vakolatli shaxsga har bir avtotransport vositasi boʻyicha identifikatsion kod beriladi.

10. Identifikatsion kod chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilish maqsadida bojxona rasmiylashtiruvini amalga oshirish vaqtida joʻnatuvchi bojxona postiga taqdim qilinadi.

Identifikatsion kod Oʻzbekiston Respublikasi Vazirlar Mahkamasining 2015-yil 30-oktabrdagi 307-son “Avtomobil transportida Oʻzbekiston Respublikasining bojxona chegarasi orqali oʻtkaziladigan tovarlar va transport vositalari toʻgʻrisida davlat bojxona xizmati organlarining elektron tarzda oldindan xabardor qilinishini joriy etish toʻgʻrisida”gi qaroriga muvofiq elektron tarzda oldindan xabardor qilishda taqdim etilishi mumkin.

3-bob. Chet el tovarlarini tashish jarayonida bojxona toʻlovlari toʻlanishini taʼminlashni nazorat qilish

11. DBQ YaAATda chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilish bilan bogʻliq boʻlgan harakatlarni bajarishning har bir bosqichida formatli-mantiqiy nazorat amalga oshiriladi.

Formatli-mantiqiy nazoratni amalga oshirish natijasida xatoliklar aniqlangan taqdirda avtomatik tarzda vakolatli shaxsga tegishli maʼlumotlar ularni toʻgʻrilash uchun yuboriladi.

12. Bojxona rasmiylashtiruvini amalga oshirish vaqtida yoki elektron tarzda oldindan xabardor qilishda taqdim qilingan identifikatsion kod orqali bojxona posti xodimi tovarning kuzatuv hujjatlarida koʻrsatilgan maʼlumotlar bilan DBQ YaAATdagi maʼlumotlarni solishtiradi.

Solishtirish natijasi boʻyicha maʼlumotlar oʻrtasida nomuvofiqliklar aniqlanmagan taqdirda bojxona hamrohligida kuzatib borishdan ozod qilingan holda bojxona rasmiylashtiruvini amalga oshiradi.

13. Identifikatsion kod va bojxona toʻlovlari toʻlanishini taʼminlash summasi tovarni yetkazib berishning nazorat hujjatida koʻrsatiladi.

Bitta avtotransport vositasiga qoʻllanilgan bojxona toʻlovlari toʻlanishini taʼminlash summasidan ushbu avtotransport vositasiga nisbatan tovarlarni tashish majburiyatlari bajarilgunga qadar boshqa avtotransport vositasiga nisbatan bojxona toʻlovlari toʻlanishini taʼminlash maqsadida foydalanishga yoʻl qoʻyilmaydi.

31-bob. Bojxona organi ruxsatisiz tovarlar berib yuborilganda, yoʻqotilganda yoki manzil bojxona postiga belgilangan muddatda va oʻzgarmas holatda yetkazilmaganda bojxona toʻlovlarini hisoblash va undirish

131. Bojxona organi ruxsatisiz tovarlar berib yuborilganda, yoʻqotilganda yoki manzil bojxona postiga belgilangan muddatda oʻzgarmas holatda (tabiiy eskirish yoxud normal tashish va saqlash sharoitlarida kamayish oqibatidagi oʻzgarishlar bundan mustasno) yetkazilmaganligi holati aniqlanganda manzil bojxona posti mazkur holatlar aniqlangan sanadan boshlab 3 ish kuni ichida hududiy boshqarma rahbariyatiga yozma axborot beradi.

Mazkur bandning birinchi xatboshisida koʻrsatilgan holatlar boʻyicha manzil bojxona posti tomonidan axborot kelganda hududiy boshqarma rahbariyati 2 ish kuni ichida tovarlarga bojxona toʻlovlarini hisoblash boʻyicha zarur choralarni koʻradi.

Taqdim qilingan hamda DBQ YaAATdan olingan maʼlumotlar asosida 3 ish kuni ichida mazkur Nizomning ilovasida koʻrsatilgan shaklda dalolatnoma toʻldiriladi, ushbu dalolatnoma bojxona toʻlovlari va penyalarni soʻzsiz undirib olish haqidagi talabnoma bilan birga DBQ YaAAT yoki qonun hujjatlariga muvofiq boshqa yoʻl bilan:

vakolatli shaxsga;

kafilga (kafillik bilan taʼminlanganda);

bankka (bank kafolati bilan taʼminlanganda);

sugʻurtalovchi tashkilotga (sugʻurta bilan taʼminlanganda) yuboriladi.

132. Bojxona nazorati ostida tashilayotgan tovarlarni toʻliq manzil bojxona postiga yetkazish choralari koʻrilishi yoki dalolatnoma asosida bojxona toʻlovlari toʻlash muddati talabnoma toʻlovchiga topshirilgan yoki u toʻlovchi tomonidan olingan kunning ertasidan eʼtiboran oʻn ish kunini tashkil etadi.

133. Vakolatli shaxs, kafil, kafolat beruvchi bank yoki sugʻurtalovchi tashkilot tomonidan talabnomadagi talablar bajarilmaganda Oʻzbekiston Respublikasi Bojxona kodeksining 47-bobiga muvofiq choralar koʻriladi, shu jumladan talabnoma yuborgan hududiy boshqarma tomonidan sudga vakolatli shaxsga chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilish boʻyicha identifikatsion kod berishni vaqtincha toʻxtatib turish toʻgʻrisida daʼvo arizasi kiritiladi.

134. Identifikatsion kod berishni vaqtincha toʻxtatib turish haqidagi daʼvo arizasi sud tomonidan qanoatlantirilganda, toʻlanishi lozim boʻlgan bojxona toʻlovlari va penyalar toʻliq undirilgunga qadar vakolatli shaxsga chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilish boʻyicha identifikatsion kod berilishi toʻxtatiladi. Bu toʻgʻrisida bojxona organi tomonidan DBQ YaAATga tegishli formatli-mantiqiy nazorat oʻrnatiladi.

135. Tovarlarni bojxona organi ruxsatisiz berib yuborish, yoʻqotish yoki manzil bojxona postiga belgilangan muddatda oʻzgarmas holatda yetkazmaslik oqibatida hisoblangan bojxona toʻlovlari undirib olinganidan soʻng tovarni yetkazib berishning nazorat hujjati nazoratdan yechiladi.

4-bob. Yakuniy qoidalar

14. Mazkur Nizom talablarining buzilishida aybdor boʻlgan shaxslar qonun hujjatlarida belgilangan tartibda javobgarlikka tortiladi.

15. Mazkur Nizom Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan kelishilgan.

Axborot texnologiyalari va kommunikatsiyalarini rivojlantirish vaziri X. MIRZAXIDOV

2016-yil 19-avgust

Chet el tovarlarini tashish jarayonida bojxona toʻlovlari toʻlanishini taʼminlashni vakolatli shaxslar bilan real vaqt rejimida interaktiv shaklda oʻzaro hamkorlik asosida hisobga olish va nazorat qilish tartibi toʻgʻrisidagi nizomga ILOVA

‎‎Bojxona toʻlovlari va penyalarni vakolatli shaxsdan soʻzsiz undirish toʻgʻrisida

‎DALOLATNOMA‎‎

(ilova Oʻzbekiston Respublikasi Davlat bojxona qoʻmitasining 2018-yil 31-avgustdagi 01-02/12-59-sonli qaroriga (roʻyxat raqami 2823-1, 08.10.2018-y.) asosan kiritilgan — Qonun hujjatlari maʼlumotlari milliy bazasi, 09.10.2018-y., 10/18/2823-1/2009-son — 2019-yil 10-yanvardan kuchga kiradi)