Oʻzbekiston Respublikasi Vazirlar Mahkamasining 1998-yil 19-yanvardagi 31-son qaroriga oʻzgartirishlar kiritish toʻgʻrisida (324-son)

18.09.2002

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Fan va texnika davlat qoʻmitasi tugatilganligi munosabati bilan Vazirlar Mahkamasi qaror qiladi:

1. Xalqaro va xorijiy tashkilotlar va jamgʻarmalarning grantlari hamda ilmiy-texnikaviy hamkorlik boʻyicha xalqaro bitimlar doirasida xorijdan keltirilayotgan pul mablagʻlari va asbob-uskunalar yuzasidan xulosalar berish funksiyasi Oʻzbekiston Respublikasi Vazirlar Mahkamasi huzuridagi Ilmiy-texnika taraqqiyotini Muvofiqlashtirish kengashi qoshidagi Fan va texnologiyalar markazi zimmasiga yuklansin.

2. Oʻzbekiston Respublikasi Vazirlar Mahkamasining “Xalqaro ilmiy-texnikaviy aloqalarni rivojlantirishni, xalqaro va xorijiy tashkilotlar va jamgʻarmalar grantlari boʻyicha ilmiy dasturlar va loyihalarni davlat tomonidan qoʻllab-quvvatlash toʻgʻrisida” 1998-yil 19-yanvardagi 31-son qarorining 1 va 2-bandlarida “Oʻzbekiston Respublikasi Fan va texnika davlat qoʻmitasi” soʻzlari “Oʻzbekiston Respublikasi Vazirlar Mahkamasi huzuridagi Ilmiy-texnika taraqqiyotini Muvofiqlashtirish kengashi qoshidagi Fan va texnologiyalar markazi” soʻzlari bilan almashtirilsin.

3. Ilmiy-texnika taraqqiyotini Muvofiqlashtirish kengashi qoshidagi Fan va texnologiyalar markazi, Oʻzbekiston Respublikasi Moliya vazirligi, Davlat soliq qoʻmitasi, Davlat bojxona qoʻmitasi va Adliya vazirligi ikki hafta muddatda Xalqaro va xorijiy tashkilotlar va jamgʻarmalarning grantlari hamda ilmiy-texnikaviy hamkorlik boʻyicha xalqaro bitimlar doirasida xorijdan keltirilayotgan pul mablagʻlari va asbob-uskunalar yuzasidan xulosalar berish tartibiga tegishli oʻzgartirishlar kiritsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H.S. Karomatov zimmasiga yuklansin.

Oʻzbekiston Respublikasining Bosh vaziri Oʻ. SULTONOV

Toshkent sh.,

2002-yil 18-sentabr,

324-son