Yuridik kadrlar tayyorlash tizimi takomillashtirilishi munosabati bilan Oʻzbekiston Respublikasi Hukumatining ayrim qarorlariga qoʻshimchalar va oʻzgartirish kiritish toʻgʻrisida (234-son)

15.07.2016

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Yuridik kadrlar tayyorlash tizimini yanada takomillashtirish chora-tadbirlari toʻgʻrisida” 2013-yil 28-iyundagi PQ-1990-son qarorini samarali amalga oshirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga qoʻshimchalar va oʻzgartirish kiritilsin.

2. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Oʻzbekiston Respublikasi Vazirlar Mahkamasining Yoshlar siyosati, taʼlim, madaniyat va sport masalalari kompleksi rahbari zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2016-yil 15-iyul,

234-son

Vazirlar Mahkamasining 2016-yil 15-iyuldagi 234-son qaroriga ILOVA

Oʻzbekiston Respublikasi Hukumatining ayrim qarorlariga kiritilayotgan qoʻshimchalar va oʻzgartirish

1. Vazirlar Mahkamasining “Respublika oliy taʼlim muassasalari xodimlari mehnatiga haq toʻlashning takomillashtirilgan tizimini tasdiqlash toʻgʻrisida” 2008-yil 1-avgustdagi 164-son qarorida (Oʻzbekiston Respublikasi QT, 2008-y., 8-son, 40-modda):

a) 2-ilovaga izohga quyidagi mazmundagi ikkinchi xatboshi qoʻshilsin:

“Bakalavriat darajasida fakultet dekanati nazarda tutilmaydigan oliy taʼlim muassasalarida Oʻquv-metodik boʻlim (boshqarma) boshligʻi va boshliq oʻrinbosarining bazaviy lavozim maoshlari, tegishli ravishda, dekan va dekan oʻrinbosarining bazaviy lavozim maoshlariga tenglashtiriladi”;

b) 4-ilovaning 7-bandiga quyidagi mazmundagi ikkinchi xatboshi qoʻshilsin:

“Bakalavriat darajasida fakultet dekanati nazarda tutilmaydigan oliy taʼlim muassasalarida Oʻquv-metodik boʻlim (boshqarma) boshligʻi va boshliqning oʻrinbosari lavozimini egallab turgan shaxslar ham rahbarlar tarkibiga kiradi”.