Diplomatik pasport egalarini viza rasmiylashtirishdan ozod qilish toʻgʻrisida

03.12.2015

Oʻzbekiston Respublikasi Hukumati bilan Estoniya Respublikasi Hukumati oʻrtasida

Bitim

Oʻzbekiston Respublikasi Hukumati va Estoniya Respublikasi Hukumati, bundan keyingi oʻrinlarda “Tomonlar” deb ataluvchilar,

ikki davlat oʻrtasida mavjud doʻstona munosabatlarni mustahkamlashga intilib,

amalda boʻlgan diplomatik pasportga ega ikki davlat fuqarolarining kirish, chiqish va safar qilishlarini soddalashtirish istagida,

quyidagilar toʻgʻrisida kelishib oldilar:

1-modda

Tomonlar davlatlaridan birining amalda boʻlgan diplomatik pasport egalari boshqa Tomon davlati hududiga viza rasmiylashtirmasdan toʻqson (90) kundan oshmagan muddatga birinchi kirish sanasidan eʼtiboran bir yuz sakson (180) kun mobaynida koʻp marotaba kirish, chiqish, tranzit oʻtish va u erda boʻlish huquqiga egadirlar, basharti ular haq toʻlanadigan yoki yakka tartibdagi mehnat faoliyati, shuningdek xususiy faoliyatning boshqa koʻrinishlari bilan shugʻullanmasalar.

2-modda

1. Boshqa Tomon davlati hududida joylashgan diplomatik vakolatxona, konsullik muassasasi yoki xalqaro tashkilotga ishga yuborilgan Tomonlar davlatlaridan birining amalda boʻlgan diplomatik pasport egalari viza rasmiylashtirmagan holda akkreditatsiya muddati davomida mazkur Tomon davlati hududiga kirish, chiqish va u erda boʻlish huquqiga egadirlar.

2. Mazkur moddaning 1-bandida koʻrsatilgan shaxslarning oila aʼzolariga ham xuddi shunday qoidalar qoʻllaniladi, basharti ular amalda boʻlgan diplomatik pasportga ega boʻlsalar.

3-modda

Tomonlar davlatlaridan birining mazkur Bitim 1 va 2-moddalariga muvofiq viza rasmiylashtirishdan ozod qilinayotgan fuqarolari boshqa Tomon davlati hududiga chegaradan oʻtkazish xalqaro punktlari orqali kirishlari, tranzit oʻtishlari yoki chiqib ketishlari mumkin, basharti ular boshqa Tomon davlati milliy qonunchiligiga, shu jumladan chet elliklarning roʻyxatga olinishi (akkreditatsiyasi), oʻtishi va boʻlishi qoidalariga rioya qilsalar.

4-modda

Tomonlar oʻzlarining chet elliklar kirishi, safar qilishi va hududida boʻlishini tartibga soluvchi qonunchiliklariga kiritilgan har qanday oʻzgarishlar haqida bir-birlarini darhol xabardor qiladilar.

5-modda

Mazkur Bitim Tomonlardan biri davlatining fuqarolarini boshqa Tomon davlati qonunchiligiga rioya qilish majburiyatidan ozod qilmaydi.

6-modda

Har bir Tomon jamoat tartibi yoki milliy xavfsizlik nuqtai nazaridan kelib chiqib, boshqa Tomon davlati amalda boʻlgan diplomatik pasport egalariga oʻz davlati hududiga kirishni rad qilish yoki ularning boʻlishini cheklash huquqini saqlab qoladilar.

7-modda

1. Har bir Tomon jamoat tartibi yoki milliy xavfsizlik nuqtai nazaridan kelib chiqib mazkur Bitimning amal qilishini butunlay yoki qisman toʻxtatib turishi mumkin.

2. Toʻxtatib turish haqidagi bunday qaror boshqa Tomonni diplomatik kanallar orqali yozma ravishda xabardor qilgandan soʻng oʻn besh (15) kun oʻtgach kuchga kiradi.

8-modda

1. Tomonlar mazkur Bitim kuchga kirishidan kamida oʻttiz (30) kun oldin diplomatik kanallar orqali amalda boʻlgan diplomatik pasportlar namunalari bilan almashadilar.

2. Tomonlar yangi nusxadagi va almashtirilayotgan diplomatik pasportlar namunalarini ular amal qilishni boshlashidan kamida oʻttiz (30) kundan oldin diplomatik kanallar orqali almashadilar.

9-modda

Mazkur Bitim qoidalarini talqin qilish yoki qoʻllash bilan bogʻliq ravishda yuzaga keladigan har qanday bahs muzokaralar va maslahatlashuvlar yoʻli bilan hal etiladi.

10-modda

1. Mazkur Bitim u kuchga kirishi uchun lozim boʻlgan davlat ichki protseduralarining bajarilganligi haqida Tomonlar yozma xabarnomasining oxirgisi olingan sanadan keyingi oltmishinchi (60) kunda kuchga kiradi.

2. Mazkur Bitim nomuayyan muddatga tuziladi va bir Tomon boshqa Tomonni uning amal qilishini tugatish haqidagi oʻzining istagi toʻgʻrisida toʻqson (90) kun oldin yozma shaklda xabardor qilgunga qadar amal qiladi.

3. Mazkur Bitimga Tomonlarning yozma kelishuviga muvofiq uning ajralmas qismi hisoblanadigan bayonnomalar bilan rasmiylashtiriladigan oʻzgartirish va qoʻshimchalar kiritilishi mumkin.

Tegishli tartibda oʻz Hukumatlari tomonidan vakolat berilgan quyida imzo chekuvchilar shunga guvohlik berib, mazkur Bitimni imzoladilar.

2015-yil 3-dekabr kuni Belgrad shahrida ikki nusxada, har biri oʻzbek, eston va ingliz tillarida tuzildi, bunda barcha matnlar bir xil kuchga ega. Bitim qoidalarini talqin qilishda ixtilof yuzaga kelgan taqdirda ingliz tilidagi matnga murojaat qilinadi.

(imzolar)