Nizo xoʻjalik sudida koʻrish uchun tegishli boʻlmasa xoʻjalik sudi ish yuritishni tugatadi (23-1508/10354-son)

15.12.2015

Oʻzbekiston Respublikasi Oliy xoʻjalik sudi sudlov hayʼatining

Qarori

[Koʻchirma]

Ellikqalʼa tuman davlat soliq inspeksiyasi (bundan buyon matnda — daʼvogar) xoʻjalik sudiga ariza bilan murojaat qilib, “Yangiobod Azamati” fermer xoʻjaligining (bundan buyon matnda — javobgar) mol-mulki hisobidan 2 345 792 soʻm undirishni soʻragan.

Birinchi instansiya sudining hal qiluv qarori bilan daʼvo ariza qanoatlantirilgan.

Ish apellatsiya instansiyasi sudida koʻrilmagan.

Kassatsiya protestida daʼvogar sudga murojaat qilganda javobgarning qarzdorligi eng kam oylik ish haqining 20 barobaridan kam boʻlganligi bayon qilinib, sudning hal qiluv qarorini bekor qilib, daʼvo boʻyicha ish yuritishni tugatish soʻralgan.

Sudlov hayʼati protestda keltirilgan vajlarni ish hujjatlari bilan birga muhokama qilib, quyidagi asoslarga koʻra hal qiluv qarorini bekor qilib, ish yuritishni tugatishni lozim topadi.

Ish hujjatlaridan aniqlanishicha, daʼvogar xoʻjalik sudiga ariza bilan murojaat qilib, javobgarning mol-mulki xisobidan 2 345 792 soʻm undirishni soʻragan.

Birinchi instansiya sudi daʼvoni qanoatlantirishda quyidagilarga asosan barvaqt xulosaga kelgan.

Oʻzbekiston Respublikasi Prezidentining 2012-yil 25-dekabrdagi 1887-sonli Qarorining 4-bandi 3-xatboshida koʻrsatilgan 26-ilovaga muvofiq “Undirilishini soliq toʻlovchining mulkiga qaratish uchun soliq qarzdorligining eng kam miqdori, yuridik shaxslar va uning alohida boʻlimlari uchun eng kam oylik ish haqining 20 baravari, jismoniy shahslar uchun eng kam oylik ish haqining 5 baravari miqdorida” belgilangan.

Daʼvogar sudga murojaat qilgan davrda eng kam oylik ish haqi 118 400 soʻmni tashkil qilgan boʻlib, daʼvo qilingan summa 2 345 792 soʻm boʻlib, eng kam oylik ish haqining 20 barobaridan kamdir.

Oʻzbekiston Respublikasi Xoʻjalik protsessual kodeksining 86-moddasi 1-qismiga asosan nizo xoʻjalik sudida koʻrish uchun tegishli boʻlmasa xoʻjalik sudi ish yuritishni tugatadi.

Oʻzbekiston Respublikasi Oliy xoʻjalik sudi Plenumining 2007-yil 15-iyundagi “Sudning hal qiluv qarori haqida”gi 161-sonli qarorining 1-bandida sud tomonidan qabul qilingan qaror moddiy va protsessual qonunchilik normalari bilan toʻliq mos kelishi, ish hujjatlari va sud aniqlagan holatlarga muvofiq boʻlishi, qayd etilgan talablarga rioya etmaslik qarorning bekor qilinishi yoki oʻzgartirilishi uchun asos boʻlishi mumkinligi haqida tushuntirish berilgan.

Yuqoridagilarga asosan sudlov hayʼati hal qiluv qarorini bekor qilishni va ish yuritishni tugatishni, sud majlisini videokonferensaloqa rejimida oʻtkazish bilan bogʻliq 30 000 soʻm sud xarajatlarini daʼvogardan undirishni lozim topadi.

2015-yil 15-dekabr,

23-1508/10354-son