Oʻzbekiston Respublikasi Markaziy bankining 2002-yil yuzasidan hisoboti toʻgʻrisida (497-II-son)

21.05.2003

Oʻzbekiston Respublikasi Oliy Majlisi Kengashining

qarori

Oʻzbekiston Respublikasi Markaziy banki raisining Oʻzbekiston Respublikasi Markaziy bankining 2002-yilgi faoliyati yakunlari yuzasidan hisobotini tinglab, Budjet, bank va moliya masalalari qoʻmitasining qarorini koʻrib chiqib hamda “Deloyt end Tush” xalqaro auditorlik kompaniyasining xulosasini maʼlumot uchun qabul qilib, Oʻzbekiston Respublikasi Oliy Majlsi Kengashi qaror qiladi:

1. Oʻzbekiston Respublikasi Markaziy bankining 2002-yil yuzasidan hisoboti tasdiqlansin.

2. Oʻzbekiston Respublikasi Markaziy banki:

qatʼiy pul-kredit siyosati yuritishni makroiqtisodiy budjet siyosati vazifalari bilan oʻzaro puxta muvofiqlashtira borib, pul summasi tarkiblarini tartibga solish hamda pul mablagʻlarining bankdan tashqari muomalasini qisqartirish yuzasidan qoʻshimcha chora-tadbirlar koʻrgan holda davom ettirsin:

tijorat banklarining likvidligini tartibga solish vositalaridan foydalanishni kengaytirsin, banklararo pul bozorinining yangi vositalarini — valyuta depozitlari, davlat qimmatli qogʻozlari va boshqa birinchi toifali aktivlar garovi operatsiyalarni qoʻllash chora-tadbirlarini koʻrsin;

“Fuqarolarning banklardagi omonatlarini himoyalash kafolatlari toʻgʻrisida”gi Oʻzbekiston Respublikasi Qonuni talablariga muvofiq fuqarolarning omonatlari himoyalanishini kafolatlash mexanizmini kuchaytirish yuzasidan fuqarolarning banklardagi omonatlarini kafolatlash fondi va tijorat banklari bilan birgalikda kompleks chora-tadbirlarni amalga oshirishni davom ettirsin;

“Kredit uyushmalari toʻgʻrisida”gi Oʻzbekiston Respublikasi Qonuni talablariga muvofiq kredit uyushmalarini tashkil etish kengayib borishiga koʻmaklashsin;

valyuta bozorini yanada erkinlashtirishga hamda joriy valyuta operatsiyalari boʻyicha milliy valyutaning toʻliq konvertaciya qilinishiga erishishga qaratilgan chora-tadbirlarni bosqichma-bosqich amalga oshirsin.

3. Qoraqalpogʻiston Respublikasi Vazirlar Kengashi viloyatlar, shaharlar va tumanlarning hokimliklari manfatdor vazirliklar, davlat qoʻmitalari va idoralar bilan birgalikda isteʼmol bozorlarini zarur tovarlar bilan toʻldirish, kichik va oʻrta biznesni, dehqon va fermer xoʻjaliklarini har tomonlama qoʻllab-quvvatlash va rivojlantirish asosida pullik xizmatlar koʻrsatish sohasini kengaytira borish hamda naqd pul tushumi tushishini, ish haqi, pensiya va nafaqalar hamda aholiga toʻlanadigan boshqa toʻlovlar oʻz vaqtida berilishini taʼminlash yuzasidan zarur chora-tadbirlar koʻrsinlar.

4. Ushbu qaror Oʻzbekiston Respublikasi Oliy Majlisining tasdigʻiga kiritilsin.

Oʻzbekiston Respublikasi Oliy Majlisining raisi E. XALILOV

Toshkent sh.,

2003-yil 21-may,

497-II-son