Sudlar faoliyati taʼminotini takomillashtirish chora-tadbirlari toʻgʻrisida (120-son)

10.03.2001

Oʻzbekiston Respublikasi Vazirlar Mahkamasining

qarori

“Sudlar toʻgʻrisida”gi Oʻzbekiston Respublikasining Qonuniga muvofiq hamda sudyalarning mustaqilligini yanada mustahkamlash, sudlar faoliyatini tashkiliy, moddiy-texnika jihatidan va moliyaviy taʼminlashni takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Adliya vazirligi huzurida maxsus vakolatli organ – Sudlar faoliyatini tashkiliy, moddiy-texnika jihatidan va moliyaviy taʼminlash departamenti (keyingi oʻrinlarda Departament deb ataladi) va uning joylardagi boʻlinmalari (boʻlimlari) tashkil etilsin.

Belgilab qoʻyilsinki:

Departament yuridik shaxs hisoblanadi va oʻz faoliyati toʻgʻrisida Oʻzbekiston Respublikasi Adliya vaziriga hisob beradi.

Departamentga Oʻzbekiston Respublikasi Vazirlar Mahkamasi tomonidan lavozimga tayinlanadigan Departament direktori – Adliya vazirining oʻrinbosari rahbarlik qiladi.

2. Quyidagilar Departamentning asosiy vazifalari etib belgilansin:

sudlarni tashkil etish masalalari yuzasidan takliflar ishlab chiqish va ularni Oʻzbekiston Respublikasi Prezidentining muhokamasiga kiritish;

tegishli Sudyalar malaka hayʼatlari tavsiyanomalari asosida kadrlarni tanlash va sudya lavozimlariga tavsiya etish masalalarini hal etish uchun zarur materiallarni tayyorlash hamda Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasiga taqdim etish, Komissiya topshirigʻiga binoan sudlarni tashkiliy-texnika jihatidan taʼminlash boʻyicha boshqa vazifalarni amalga oshirish;

qabul qilingan sud qarorlari, shuningdek boshqa organlar qarorlari soʻzsiz bajarilishini taʼminlash, sud ijrochisi, sud majlisi kotibi kadrlarini tanlash va joy-joyiga qoʻyish, ularning samarali faoliyatini tashkil etish yuzasidan tizimli ishlarni amalga oshirish;

sud amaliyoti va sud statistikasining tizimli tahlilini amalga oshirish;

sudlarni moddiy-texnika jihatidan va moliyaviy taʼminlash hamda ularning faoliyati uchun zarur sharoitlar yaratish ishlarini tashkil etish;

xalq maslahatchilari saylovlarini tayyorlash va oʻtkazish hamda ularni oʻqitish ishlarini tashkil etish va ularning samaradorligini oshirish;

sudyalar va sud protsesslarining xavfsizligini taʼminlash ishlarini tashkil etish.

3. Departament toʻgʻrisidagi Nizom, Departamentning shtatdagi xodimlari soni 31 nafardan iborat boʻlgan markaziy apparati tuzilmasi, xodimlari soni 109 nafardan iborat boʻlgan joylardagi boʻlimlari tuzilmasi 1—4-ilovalarga muvofiq tasdiqlansin.

Departamentning hududiy boʻlimlari bevosita Departamentga boʻysunishi, Departament tomonidan shakllantirilishi va mablagʻ bilan taʼminlanishi belgilab qoʻyilsin.

Belgilansinki, Departament va uning joylardagi boʻlimlari Oʻzbekiston Respublikasi Adliya vazirligining, Qoraqalpogʻiston Respublikasi Adliya vazirligining, viloyatlar va Toshkent shahar adliya boshqarmalarining mavjud shtatdagi xodimlari soni hisobiga tashkil etiladi.

Departament tashkil etilishi munosabati bilan Oʻzbekiston Respublikasi Adliya vazirligining Sudlar faoliyatini tashkiliy taʼminlash boshqarmasi, Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalarining tegishli boʻlimlari tugatilsin.

4. Belgilab qoʻyilsinki:

sudlarning joriy faoliyatini moliyalashtirish va moddiy-texnika jihatidan taʼminlash, ularning binolarini qurish, xarajatlarini taʼminlash va qoʻriqlash Departament tomonidan respublika budjeti, shuningdek Oʻzbekiston Respublikasi Adliya muassasalari va sudlarni rivojlantirish jamgʻarmasi mablagʻlari hisobiga amalga oshiriladi;

Departament direktori sudlarni navbatdagi moliya yilida moliyalashtirish toʻgʻrisidagi takliflarni bevosita Oʻzbekiston Respublikasi Hukumatiga taqdim etadi;

Departament budjet moliyaviy mablagʻlari taqsimlanishini hamda ularning Oʻzbekiston Respublikasi Moliya vazirligi va Markaziy banki tomonidan belgilanadigan tartibda tegishli bank tuzilmalari orqali sudlarga yetkazilishini taʼminlaydi.

Oʻzbekiston Respublikasi Moliya vazirligi har yilgi budjetlarni shakllantirishda respublika budjetida Departament va sudlar faoliyatini moliyalashtirish uchun alohida satrda zarur budjet mablagʻlari ajratishni nazarda tutsin.

5. Oʻzbekiston Respublikasi Adliya vaziri:

bir oy muddatda Oʻzbekiston Respublikasi Adliya vazirligi markaziy apparatining, Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalarining yangi tashkiliy-shtat tuzilmasini, shuningdek Oʻzbekiston Respublikasi Adliya vazirligi toʻgʻrisidagi Nizomni tayyorlasin va koʻrib chiqish uchun Vazirlar Mahkamasiga kiritsin;

ikki hafta muddatda Oʻzbekiston Respublikasi Moliya vazirligi bilan birgalikda 2001-yil uchun tasdiqlangan xarajatlar smetalariga tegishli oʻzgartirishlar kiritsin;

bir oy muddatda Oʻzbekiston Respublikasi Ichki ishlar vazirligi bilan birgalikda sudyalarning hamda sud protsesslari qatnashchilarining xavfsizligini taʼminlash tartibini ishlab chiqsin;

ikki oy muddatda Toshkent shahar hokimligi bilan birgalikda Departamentning tegishli binoga joylashtirilishini taʼminlasin, beriladigan bino joylashgan yer uchastkasidan foydalanish huquqini belgilangan tartibda rasmiylashtirsin;

Departamentning qulay oʻrnashishini, kompyuter texnikasi va boshqa zarur moddiy-texnika vositalari bilan jihozlanishini taʼminlasin.

6. Sudlar faoliyatini tashkiliy, moddiy-texnika jihatidan va moliyaviy taʼminlash departamenti sudlar faoliyatini oʻrganish asosida bir oy muddatda sudyalar va sudlar apparati xodimlariga ilmiy asoslangan ish yuklamalari normativlarini, sud ijrochilari va sud majlisi kotiblari faoliyatini takomillashtirish, ish yuklamalarini va ular tomonidan bajarilayotgan ishlar hajmini hisobga olgan holda sudlarni toifalashtirish yuzasidan takliflarni ishlab chiqsin va koʻrib chiqish uchun kiritsin.

7. Oʻzbekiston Respublikasi Moliya vazirligi Departamentga ikkita yengil avtomobil taʼminoti uchun limit ajratsin.

8. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi T. Xudoybergenov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2001-yil 10-mart,

120-son

Vazirlar Mahkamasining 2001-yil 10-martdagi 120-son qaroriga 1-ILOVA

Oʻzbekiston Respublikasi Adliya vazirligi huzuridagi Sudlar faoliyatini tashkiliy, moddiy-texnika jihatidan va moliyaviy taʼminlash departamenti toʻgʻrisida

NIZOM

I. Umumiy qoidalar

1. Mazkur Nizom maxsus vakolatli organ — Oʻzbekiston Respublikasi Adliya vazirligi huzuridagi Sudlar faoliyatini tashkiliy, moddiy-texnika jihatidan va moliyaviy taʼminlash departamentining (keyingi oʻrinlarda Departament deb ataladi) asosiy vazifalari va vakolatlarini belgilaydi.

2. Departament oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisining qarorlariga, Oʻzbekiston Respublikasi Prezidentining farmonlari, qarorlari, farmoyishlariga, Oʻzbekiston Respublikasi Vazirlar Mahkamasining qarorlariga, shuningdek mazkur Nizomga amal qiladi.

3. Departament yuridik shaxs hisoblanadi va oʻz faoliyati toʻgʻrisida Oʻzbekiston Respublikasi Adliya vaziriga hisob beradi.

4. Departament Qoraqalpogʻiston Respublikasi fuqarolik ishlari boʻyicha Oliy sudi, viloyatlar va Toshkent shahar, tumanlararo, tuman (shahar) fuqarolik ishlari boʻyicha sudlari, Qoraqalpogʻiston Respublikasi jinoyat ishlari boʻyicha Oliy sudi, viloyatlar, Toshkent shahar, tuman (shahar) jinoyat ishlari boʻyicha sudlari (keyingi oʻrinlarda Sudlar deb ataladi) faoliyatini, sudyalarning mustaqilligi va ularning faqat qonunga boʻysunishi prinsiplariga qatʼiy rioya qilingan holda, moddiy-texnika jihatidan va moliyaviy taʼminlashni amalga oshiradi.

Departament odil sudlovni amalga oshirish jarayoniga aralashishga haqli emas.

5. Sudlarni moliyalashtirish va moddiy-texnika jihatidan taʼminlash, ularning binolarini qoʻriqlash va xarajatlarini taʼminlash Departament tomonidan respublika budjeti hamda Oʻzbekiston Respublikasi Adliya muassasalari va sudlarni rivojlantirish jamgʻarmasi mablagʻlari hisobiga amalga oshiriladi. Departamentga davlat budjetidan ajratiladigan mablagʻlar budjetda alohida satrda koʻrsatiladi.

II. Departamentning vakolatlari

6. Departament quyidagi vakolatlarga ega:

sudlarni tashkil etish masalalari yuzasidan takliflar ishlab chiqadi va ularni Oʻzbekiston Respublikasi Prezidenti muhokamasiga kiritadi;

tegishli sudyalar malaka hayʼati tavsiyanomalari asosida Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasiga sudya lavozimiga kadrlarni tanlash va tavsiya etish masalalarini hal etish uchun zarur materiallarni (ariza, fikrnoma, xulosa, maʼlumotnoma va boshqa hujjatlarni) taqdim etadi;

Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasining topshirigʻiga binoan sudlarni tashkiliy-texnika jihatidan taʼminlash, shuningdek sudlarning kadrlari malakasini oshirish, bu sohadagi xalqaro tajribani oʻrganish va uni amaliy faoliyatga joriy etish masalalari bilan bogʻliq boshqa topshiriqlarni bajaradi;

sudlar kadrlarining statistika va shaxsiy hisobini yuritadi;

qabul qilingan sud qarorlari, shuningdek boshqa organlar qarorlari soʻzsiz bajarilishini taʼminlash boʻyicha tizimli ishlarni amalga oshiradi. Sud ijrochilari, sud majlisi kotiblari kadrlarini tanlash va joy-joyiga qoʻyishni amalga oshiradi va ularning malakasi oshirilishi uchun hamda ular tomonidan lavozim vazifalari bajarilishi uchun javob beradi;

sudyalar va sudlar apparati xodimlarining ilmiy asoslangan ish yuklamalari normativlarini ishlab chiqadi, sudlarning kadrlarga boʻlgan ehtiyojini oʻrganadi;

sudlarni normativ-huquqiy hujjatlar bilan taʼminlaydi;

xalq maslahatchilarini tanlash va ularni saylash ishlarini tashkil etadi, shuningdek ularni oʻqitadi;

sud amaliyoti va sud statistikasining tizimli tahlilini amalga oshiradi;

sudyalar va sudlar apparati xodimlarining mehnat, moddiy va ijtimoiy taʼminot sharoitlarini yaxshilash yuzasidan takliflar ishlab chiqadi va ularni tegishli organlarga kiritadi;

sudlarni moliyalashtirish toʻgʻrisida takliflar ishlab chiqadi va ularni Oʻzbekiston Respublikasi Vazirlar Mahkamasiga kiritadi;

sudlarga ajratilgan mablagʻlarni taqsimlaydi va ularning shtat jadvallarini tasdiqlaydi, ajratilayotgan mablagʻlarning maqsadli foydalanilishini nazorat qiladi;

sudlarni moddiy-texnika jihatidan taʼminlaydi va uni takomillashtirish yuzasidan takliflar tayyorlaydi, sudlarni texnika, jihozlar, avtotransport, mebel va boshqa zarur vositalar bilan taʼminlash choralarini koʻradi;

sudlar binolarini qurish va taʼmirlash uchun ajratilgan kapital mablagʻlar oʻzlashtirilishini taʼminlaydi, shuningdek ularning loyihalashtirilishi va qurilishini nazorat qiladi;

ichki ishlar organlari bilan birgalikda sudyalar va sud protsesslarining xavfsizligini taʼminlash uchun zarur boʻlgan shart-sharoitlarni yaratish yuzasidan tadbirlar ishlab chiqadi va ularni amalga oshiradi;

sudlar faoliyatini zarur darajada taʼminlash masalalari yuzasidan huquqni muhofaza qilish organlari va boshqa organlar bilan oʻzaro hamkorlik qiladi;

oʻz vakolatlari doirasida fuqarolarning shikoyatlari, arizalari va takliflarini koʻrib chiqadi;

qonun hujjatlarida nazarda tutilgan boshqa vakolatlarni amalga oshiradi.

Departament oʻz vakolatlari doirasida davlat organlari va boshqa organlardan, korxonalar, mussasalar, tashkilotlardan, mansabdor shaxslardan zarur hujjatlarni va axborotni soʻrashga haqli.

III. Sudyalar lavozimiga tavsiya etish uchun nomzodlar zaxirasini shakllantirish va ularni tanlash boʻyicha takliflar tayyorlash tartibi

7. Sudyalar lavozimiga tavsiya etish uchun nomzodlar zaxirasini shakllantirish va ularni tanlash boʻyicha takliflar tayyorlash ishlari sudyalarning malaka hayʼatlari, Departament va uning joylardagi boʻlimlari, Oʻzbekiston Respublikasi Prezidenti huzuridagi Sudyalar lavozimiga tanlash va tavsiya etish oliy malaka komissiyasi tomonidan amalga oshiriladi.

8. Sudya kadrlar zaxirasini shakllantirish, shaxslarni sudyalar lavozimiga tavsiya etish bilan bogʻliq barcha materiallarni dastlabki (birinchi daraja) koʻrib chiqish sudyalar malaka hayʼati tomonidan amalga oshiriladi. Sudyalar malaka hayʼatlari Departamentning joylardagi boʻlimlari bilan oʻzaro hamkorlikda sudlarning, huquqni muhofaza qilish organlari, muassasalar va tashkilotlarning, eng yaxshi tayyorgarlik koʻrgan, yuqori malakali huquqshunos xodimlaridan, sudyalar jamoat birlashmalari aʼzolaridan nomzodlar tanlaydilar, ularning malakasini, maʼnaviy va ishchanlik fazilatlarini oʻrganishni tashkil etadilar, malaka imtihonlari oʻtkazadilar.

Zaxiraga kiritish yoki sudyalarning aniq boʻsh lavozimlariga tavsiya qilinayotgan nomzodlar boʻyicha takliflar sudyalarning tegishli malaka hayʼatlari tomonidan Departamentning joylardagi boʻlimlariga yuboriladi. Sudyalarning har bir mavjud boʻsh lavozimiga kamida 2-3 nomzod taklif etiladi.

9. Departament va uning joylardagi boʻlimlarining sudyalar malaka hayʼatlari takliflarini umumlashtirishga doir faoliyati sudya xodimlar zaxirasini shakllantirish va boʻsh sudya lavozimlariga tayinlash uchun takliflar tayyorlash ishining ikkinchi bosqichini tashkil etadi.

Departamentning joylardagi boʻlimlari sudyalar malaka hayʼatlaridan tushgan takliflar va materiallarni umumlashtiradilar, oʻrganadilar hamda sudyalar kadrlari zaxirasiga kiritish yoxud aniq lavozimga tavsiya etilgan har bir nomzod boʻyicha oʻz xulosalari bilan birga koʻrsatib oʻtilgan materiallarni Departamentga yuboradilar.

Departament sudyalar malaka hayʼatlarining takliflari va tavsiyalarini oʻzida toʻplaydi, ularni bundan keyingi oʻrganishni tashkil etadi, sudyalar lavozimiga nomzodlarning statistika va shaxsiy hisobini yuritadi. Sudya lavozimiga kadrlar tanlash va tavsiya etish masalasini hal etish uchun zarur materiallarni tayyorlaydi hamda Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasiga taqdim etadi. Boʻsh lavozimlarni egallashga nomzodlar muqobil asosda koʻrsatiladi – boʻsh lavozimga kamida 2-3 nomzod taklif etiladi.

Sudyalar malaka hayʼatlarining materiallari, takliflari, tavsiyanomalari, Departamentning tavsiyanomalari sudyalarni xolis va samarali tanlash, ularni oʻrganish hamda keyinchalik Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasida koʻrib chiqish uchun zarur boʻlgan kadrlar toʻgʻrisidagi axborotlar majmuini tashkil etadi.

10. Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasi qonunga muvofiq kadrlarni sudyalar lavozimiga tayinlash uchun tavsiyanomalar tayyorlaydigan oxirgi instansiya hisoblanadi.

Departament nomzodlarga materiallar bilan birgalikda Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasiga sudya lavozimlariga boʻsh joylar borligi va vakolatlari muddati tugayotgan sudyalar toʻgʻrisidagi maʼlumotlarni, zaxiraga kiritish uchun yoki boʻsh lavozimlarga taklif qilingan, biroq komissiyaning koʻrib chiqishi uchun kiritilmagan nomzodlar toʻgʻrisidagi maʼlumotlarni tegishli sabablari koʻrsatilgan va tushuntirishlar berilgan holda taqdim etadi.

11. Vakolatlari muddatlari tugayotgan tumanlararo, tuman (shahar) sudlariga, shuningdek fuqarolik va jinoyat ishlari boʻyicha Qoraqalpogʻiston Respublikasi oliy sudlari sudyalariga, fuqarolik va jinoyat ishlari boʻyicha viloyat va Toshkent shahar sudlariga, harbiy sudlarga nisbatan ularni yangi muddatga koʻrsatish toʻgʻrisidagi masala sudyalarning tegishli malaka hayʼatlari tomonidan koʻrib chiqiladi. Sudyalar malaka hayʼatlarining ushbu shaxslarning lavozimga muvofiqligi yoki muvofiq emasligi hamda ularni yangi muddatga tayinlash mumkinligi toʻgʻrisidagi xulosalari Departamentga yuboriladi. Departament taqdim etilgan materiallarni oʻrganib chiqqandan keyin ularni oʻz xulosalari bilan birga Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasiga yuboradi.

12. Departament boʻsh sudyalar lavozimlari oʻz vaqtida toʻldirilishi, Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasiga taqdim etiladigan sudyalar kadrlari boʻyicha materiallarning toʻliqligi va sifati uchun javob beradi.

Zaxirani shakllantirishga doir takliflar tayyorlash va sudyalar lavozimiga tavsiya etish uchun nomzodlarni tanlash ishlarini tashkil etish tartibi Departament Ish tartibi bilan belgilanadi.

IV. Departament faoliyatini tashkil etish

13. Departamentga Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan Departament direktori – Adliya vazirining oʻrinbosari rahbarlik qiladi.

14. Departament direktori Oʻzbekiston Respublikasi Adliya vaziri tomonidan lavozimga tayinlanadigan va lavozimdan ozod qilinadigan oʻrinbosarlarga ega boʻladi.

Departament tarkibiga boʻlim boshliqlari, bosh, yetakchi, katta inspektorlar va mutaxassislar kiradi.

Departamentning shtat jadvali Departament direktori tomonidan tasdiqlanadi.

15. Departament joylarda (Qoraqalpogʻiston Respublikasi, viloyatlar va Toshkent shahrida) hududiy boʻlimlarga ega, ular sud qarorlarini va boshqa organlar qarorlarini bajarish ishlarini tashkil etadilar, sudlar faoliyatini moddiy-texnika jihatidan va moliyaviy taʼminlash, shuningdek sud amaliyoti va sud statistikasini tizimli tahlil qilish ishlarini amalga oshiradilar.

Departamentning hududiy boʻlimlari yuridik shaxs hisoblanadi, bevosita Departament tomonidan shakllantiriladi va moliyalashtiriladi hamda oʻz faoliyati toʻgʻrisida Departament direktoriga hisob beradi.

16. Departament tarkibiy boʻlinmalarining, shuningdek hududiy boʻlimlar boshliqlari Adliya vaziri bilan kelishilgan holda Departament direktori tomonidan lavozimga tayinlanadi va lavozimdan ozod qilinadi.

17. Departament direktori:

Departament va uning hududiy boʻlinmalari faoliyatiga rahbarlik qiladi;

Departament Ish tartibini tasdiqlaydi;

Departament apparati xodimlarini, shu jumladan joylardagi boʻlimlar xodimlarini belgilangan tartibda lavozimga tayinlaydi va lavozimdan ozod qiladi;

Departament tarkibiy boʻlinmalari va joylardagi boʻlimlar boshliqlari hisobotlarini eshitadi;

qonun hujjatlariga muvofiq boshqa vakolatlarni amalga oshiradi;

Departament direktori Departamentga yuklangan vazifalarning bajarilishi uchun shaxsan javob beradi.

18. Departament direktori joyida boʻlmagan taqdirda uning vakolatlarini oʻrinbosarlardan biri amalga oshiradi.

19. Departament direktorining oʻrinbosarlari, boʻlim boshliqlari, bosh, yetakchi, katta inspektorlar va mutaxassislar oʻz faoliyatini Departament direktori tomonidan tasdiqlanadigan funksional vazifalarga muvofiq amalga oshiradilar.

20. Departament respublika mulki hisoblanadigan, tezkor boshqariladigan alohida mulkka ega.

21. Departamentni qayta tashkil etish va tugatish Oʻzbekiston Respublikasi Vazirlar Mahkamasining qarori bilan amalga oshiriladi.

Vazirlar Mahkamasining 2001-yil 10-martdagi 120-son qaroriga 2-ILOVA

Oʻzbekiston Respublikasi Adliya vazirligi huzuridagi Sudlar faoliyatini tashkiliy, moddiy-texnika jihatidan va moliyaviy taʼminlash departamentining tuzilmasi

Vazirlar Mahkamasining 2001-yil 10-martdagi 120-son qaroriga 3-ILOVA

Departament hududiy boʻlimining namunaviy tuzilmasi (shtatdagi xodimlar soni 7—10 kishi)

Vazirlar Mahkamasining 2001-yil 10-martdagi 120-son qaroriga 4-ILOVA

Oʻzbekiston Respublikasi Adliya vazirligi huzuridagi Sudlar faoliyatini tashkiliy, moddiy-texnika jihatidan va moliyaviy taʼminlash departamentining shtatdagi xodimlari soni

(Oʻzbekiston Respublikasi Qonun hujjatlari toʻplami, 2001-y., 5-son, 27-modda)