Xalq deputatlari Buxoro va Qashqadaryo viloyat Kengashlarining 2005-2006-yillardagi faoliyati toʻgʻrisida (368-I-son)

23.08.2007

Oʻzbekicton Respublikasi Oliy Majlisi Senati Kengashining

qarori

Senatning xalq deputatlari mahalliy Kengashlari va ijro etuvchi hokimiyat organlari bilan hamkorligi, ularning mintaqaviy rivojlanish muammolarini hal etishdagi faoliyati muvofiqlashtirilishini taʼminlash masalalari boʻyicha guruh tomonidan xalq deputatlari Buxoro va Qashqadaryo viloyat Kengashlarining 2005-2006-yillardagi faoliyati toʻgʻrisidagi masala oʻrganib chiqildi.

Mazkur viloyatlarning Kengashlari oʻz faoliyatlarini Oʻzbekiston Respublikasining Konstitutsiyasi, “Mahalliy davlat hokimiyati toʻgʻrisida”gi Oʻzbekiston Respublikasi Qonuni va boshqa qonun hujjatlariga muvofiq ravishda olib bormoqda. Xususan, Oʻzbekiston Respublikasi Oliy Majlisi Senati Kengashining 2006-yil 8-iyundagi 173-I-sonli Qarori bilan tasdiqlangan va tavsiya qilingan Xalq deputatlari mahalliy Kengashining namunaviy reglamenti va Xalq deputatlari mahalliy Kengashlarining doimiy komissiyalari toʻgʻrisidagi namunaviy nizomga muvofiq ravishda, Oʻzbekiston Respublikasi Oliy Majlisi Senati Kengashining 2007-yil 9-martdagi 305-I-sonli Qarori bilan kiritilgan oʻzgartishlar va qoʻshimchalarni inobatga olgan holda xalq deputatlari viloyat Kengashlarining reglamentlari hamda mazkur Kengashlarning doimiy komissiyalari toʻgʻrisidagi nizomlar qabul qilindi.

Xalq deputatlari viloyat Kengashlarining sessiyalarida Oʻzbekiston Respublikasi Oliy Majlisi Senati Kengashining “Oʻzbekiston Respublikasi qonunlari, Senatning va Senat qoʻmitalarining qarorlari ijro etilishini taʼminlash maqsadida Oʻzbekiston Respublikasi Oliy Majlisi Senatining xalq deputatlari mahalliy Kengashlari va ijro etuvchi hokimiyat organlari bilan hamkorligi toʻgʻrisida”gi 2006-yil 29-iyunda qabul qilingan 200-I-sonli Qarori muhokamasi oʻtkazilgan. Xalq deputatlari Kengashlari faoliyatiga taalluqli hujjatlar hisobini yuritish va ularni tizimga solish ishlari amalga oshirilmoqda.

Xalq deputatlari Buxoro viloyat Kengashida ham, Qashqadaryo viloyat Kengashida ham Reglament va Nizomga muvofiq sakkiztadan doimiy komissiya faoliyat yuritib kelmoqda.

Oʻzbekiston Respublikasi qonunlarini, Prezident farmonlari va qarorlarini, Oliy Majlis Senati qarorlarini, Oʻzbekiston Respublikasi Vazirlar Mahkamasi qarorlarini hayotga tatbiq etish borasida izchil ish olib borish maqsadida viloyatlarning vakillari boʻlmish senatorlarga hamda xalq deputatlari mahalliy Kengashlarining doimiy komissiyalariga viloyatlarning muayyan hududiy birliklari biriktirib qoʻyilgan.

Buxoro viloyati xalq deputatlari Buxoro shahar va Vobkent tuman Kengashlarining, shuningdek Qashqadaryo viloyati xalq deputatlari Qarshi shahar, Yakkabogʻ, Chiroqchi, Shahrisabz, Kitob, Kasbi tuman Kengashlarining doimiy komissiyalari ishlarida ijobiy oʻzgarishlar boʻldi.

Shu bilan birga Buxoro va Qashqadaryo viloyatlarining xalq deputatlari mahalliy Kengashlari ishlarida kamchiliklar va foydalanilmagan rezervlar ham mavjud.

Xalq deputatlari tuman va shahar Kengashlarining doimiy komissiyalari ishida baʼzan yuzaki yondashuv hollari qayd etilmoqda. Reja asosidagi qator masalalarni oʻrganishga mutaxassislar jalb etilmayotir, ishchi guruhlar tuzilmagan, oʻrganilayotgan muammolarni yanada chuqurroq tahlil etish uchun savolnomalar tayyorlanmayapti, oqibatda yoʻl qoʻyilgan kamchilik va nuqsonlarning sabablarini aniqlash yuzaki kechmoqda.

Xalq deputatlari mahalliy Kengashlarining doimiy komissiyalari tomonidan nazorat faoliyatlarini amalga oshirishda ham kamchiliklar bor. Doimiy komissiyalarning qarorlari ijrosi hamisha ham nazorat qilinmoqda deb boʻlmaydi, bu qarorlarda koʻpincha ijro muddati belgilanmaydi, doimiy komissiyalarning qarorlarini bajarish yuzasidan korxona va tashkilotlar rahbarlarining hisobot berishi amaliyoti qoʻllanilmayapti, doimiy komissiyalarning ishi koʻp hollarda masalani muhokama etish va qaror qabul qilish bilan cheklanib qolmoqda.

Xalq deputatlari viloyat, tuman va shahar Kengashlari deputatlariga ajratilgan maxsus xonalar zarur ijtimoiy-siyosiy adabiyotlar, shu jumladan Oʻzbekiston Respublikasi qonunlari, Prezident farmonlari va qarorlari, Oliy Majlis palatalari qarorlari, Oʻzbekiston Respublikasi Vazirlar Mahkamasi qarorlari hamda aholining huquqiy savodxonligini oshirishda foydalanish uchun kerakli boshqa normativ-huquqiy hujjatlar bilan yetarli darajada taʼminlanmagan.

Oʻzbekiston Respublikasi qonunlarini hayotga tatbiq etish hamda ularni aholi oʻrtasida targʻib qilish ishlarining ahvoli talab darajasida emas. Xususan, Buxoro viloyatining Qorakoʻl, Jondor, Olot tumanlarida, Qashqadaryo viloyatining Dehqonobod, Qamashi tumanlarida Oʻzbekiston Respublikasi Oliy Majlisi Senati tomonidan muhokama qilinib maʼqullangan qonunlarning mazmun-mohiyatini aholining keng qatlamlari eʼtiboriga yetkazish boʻyicha targʻibot guruhlari tuzilmagan.

Tuman va shahar Kengashlarining hamda ulardagi doimiy komissiyalarning yillik ish rejalari tuzilayotganda baʼzi hollarda tumanning, shaharning mavjud muhim muammolari oʻrniga har yili bir yoʻnalishdagi deyarli bir xil masalalarni oʻrganish belgilanmoqda.

Xalq deputatlari Buxoro va Qashqadaryo viloyat Kengashlarining 2005-2006-yillardagi faoliyati yuzasidan Senatning xalq deputatlari mahalliy Kengashlari va ijro etuvchi hokimiyat organlari bilan hamkorligi, ularning mintaqaviy rivojlanish muammolarini hal etishdagi faoliyati muvofiqlashtirilishini taʼminlash masalalari boʻyicha guruhning, shuningdek xalq deputatlari Buxoro va Qashqadaryo viloyat Kengashlarining axborotlarini tinglab va muhokama qilib, Oʻzbekiston Respublikasi Oliy Majlisi Senatining Kengashi qaror qiladi:

1. Xalq deputatlari Buxoro hamda Qashqadaryo viloyat Kengashlarining 2005-2006-yillardagi faoliyati yuzasidan Senatning xalq deputatlari mahalliy Kengashlari va ijro etuvchi hokimiyat organlari bilan hamkorligi, ularning mintaqaviy rivojlanish muammolarini hal etishdagi faoliyati muvofiqlashtirilishini taʼminlash masalalari boʻyicha guruhning, shuningdek xalq deputatlari Buxoro va Qashqadaryo viloyat Kengashlarining axborotlari maʼlumot uchun qabul qilinsin.

2. Oʻzbekiston Respublikasi Prezidenti I.A. Karimovning Oʻzbekiston Respublikasi Oliy Majlisi Senatining beshinchi yalpi majlisida 2006-yil 24-fevraldagi “Mamlakatimiz taraqqiyotining qonuniy asoslarini mustahkamlash faoliyatimiz mezoni boʻlishi darkor” degan maʼruzasida, shuningdek Oʻzbekiston Respublikasi Vazirlar Mahkamasining 2007-yil 12-fevralda boʻlib oʻtgan, 2006-yilda mamlakatni ijtimoiy-iqtisodiy rivojlantirish yakunlari va 2007-yilda iqtisodiy islohotlarni chuqurlashtirishning eng muhim ustuvor yoʻnalishlariga bagʻishlangan majlisidagi maʼruzasida ilgari surilgan hamda “Ijtimoiy himoya yili” Davlat dasturida belgilangan vazifalar Buxoro va Qashqadaryo viloyatlarining xalq deputatlari viloyat, tuman va shahar Kengashlari faoliyatining ustuvor yoʻnalishlari etib belgilansin.

Mazkur vazifalarni amalga oshirish maqsadida xalq deputatlari Buxoro va Qashqadaryo viloyat, tuman va shahar Kengashlari:

Oʻzbekiston Respublikasi qonunlari, Prezident farmonlari va qarorlari, Oliy Majlis palatalari qarorlari, Oʻzbekiston Respublikasi Vazirlar Mahkamasi qarorlari ijro etilishini taʼminlash chora-tadbirlarini ishlab chiqsin, mintaqalarni rivojlantirishning ustuvor yoʻnalishlarini xalq deputatlari mahalliy Kengashlarining sessiyalarida va tegishli doimiy komissiyalarning majlislarida muhokama etsin, qabul qilingan qarorlar ijrosi ustidan nazorat oʻrnatsin;

mahalliy Kengashlar hamda ularning doimiy komissiyalarining yillik ish rejalarini mintaqaning eng dolzarb muammolarini inobatga olgan holda tuzsin;

mahalliy Kengashlarning majlislarida doimiy komissiyalarning hamda deputatlarning amalga oshirilgan ishlar haqidagi hisobotlarini tinglab borsin;

Oʻzbekiston Respublikasi Oliy Majlisi Senati qoʻmitalarining xalq deputatlari mahalliy Kengashlari va ularning doimiy komissiyalari bilan birgalikdagi majlislariga tayyorgarlik koʻrish hamda ularni oʻtkazish amaliyotini keng joriy etish chora-tadbirlarini nazarda tutsin.

3. Mintaqalardan saylangan senatorlar xalq deputatlari viloyat, tuman va shahar Kengashlari hamda ularning doimiy komissiyalari faoliyatini yanada jonlantirishga amaliy yordam bersinlar. Senatorlarning oʻzlari saylangan xalq deputatlari mahalliy Kengashlari oldida muntazam ravishda hisob berib borishi amaliyotga joriy etilsin.

4. Ushbu qaror Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlariga yuborilsin.

5. Ushbu qarorning bajarilishi jarayoni toʻgʻrisida Oʻzbekiston Respublikasi Oliy Majlisi Senatining Kengashiga 2007-yil 15-dekabrga qadar axborot taqdim etilsin.

6. Ushbu qarorning ijro etilishini nazorat qilish Senatning xalq deputatlari mahalliy Kengashlari va ijro etuvchi hokimiyat organlari bilan hamkorligi, ularning mintaqaviy rivojlanish muammolarini hal etishdagi faoliyati muvofiqlashtirilishini taʼminlash masalalari boʻyicha guruh rahbari Gʻ. Aliyevning zimmasiga yuklatilsin.

Oʻzbekiston Respublikasi Oliy Majlisi Senatining Raisi I. SOBIROV

Toshkent sh.,

2007-yil 23-avgust,

368-I-son