Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita faoliyatini yanada takomillashtirish toʻgʻrisida (196-son)

23.04.2004

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Respublika davlat boshqaruvi organlari tizimini takomillashtirish toʻgʻrisida” 2003-yil 9-dekabrdagi PF–3358-son Farmonini bajarish yuzasidan hamda Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita faoliyatini takomillashtirish maqsadida Vazirlar Mahkamasi qaror qiladi:

2. Quyidagilar:

Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita toʻgʻrisidagi nizom 3-ilovaga muvofiq tasdiqlansin.

4. Vazirlar Mahkamasining “Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita faoliyatini tashkil etish masalalari” toʻgʻrisida 1992-yil 2-apreldagi 159-son qarori, “Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmitaning nizomi hamda uning tizimiga qoʻshimcha va oʻzgartirishlar kiritish toʻgʻrisida” 1995-yil 27-yanvardagi 23-son qarori, Vazirlar Mahkamasining 1999-yil 23-dekabrdagi 542-son qarorining 1-bandi oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A. A. Azizxoʻjayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 23-aprel,

196-son

Vazirlar Mahkamasining 2004-yil 23-apreldagi 196-son qaroriga 3-ILOVA

Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita toʻgʻrisida

NIZOM

I. Umumiy qoidalar

1. Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita (keyingi oʻrinlarda matnda Qoʻmita deb ataladi) har bir shaxsning vijdon va diniy eʼtiqod erkinligi huquqi, fuqarolarning dinga boʻlgan munosabatidan qatʼi nazar tengligini taʼminlash, shuningdek diniy tashkilotlar faoliyati bilan bogʻliq munosabatlarni tartibga solish sohasidagi vazifalarni hal etish vakolati berilgan davlat boshqaruvi organi hisoblanadi.

Qoʻmita oʻz faoliyatida Oʻzbekiston Respublikasi Vazirlar Mahkamasiga hisob beradi.

2. Qoʻmita oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, shuningdek mazkur Nizomga amal qiladi.

3. Qoʻmita oʻz faoliyatini davlat boshqaruvining boshqa organlari, mahalliy davlat hokimiyati organlari, jamoat birlashmalari va boshqa tashkilotlar bilan oʻzaro hamkorlikda amalga oshiradi.

4. Qoʻmita faoliyatini moliyalashtirish Qoʻmitaga budjetdan ajratiladigan mablagʻlar doirasida Oʻzbekiston Respublikasi Davlat budjeti mablagʻlari, shuningdek qonun hujjatlarida taqiqlanmagan boshqa manbalar hisobiga amalga oshiriladi.

5. Qoʻmita yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga ega boʻladi.

II. Qoʻmitaning vazifalari va funksiyalari

6. Quyidagilar Qoʻmitaning asosiy vazifalari hisoblanadi:

mahalliy davlat hokimiyati organlari bilan birgalikda vijdon erkinligi va diniy tashkilotlar toʻgʻrisidagi qonun hujjatlariga muvofiq diniy masalalarni hal qilishda yagona siyosatni amalga oshirish;

davlat organlarining respublika hududida joylashgan diniy tashkilotlar bilan oʻzaro aloqasi va hamkorligini taʼminlash;

davlat siyosatida qonun hujjatlarida belgilangan tartibda roʻyxatdan oʻtkazilgan diniy tashkilotlar manfaatlarini aks ettirish.

7. Qoʻmita unga yuklangan vazifalarni bajarish uchun quyidagi funksiyalarni amalga oshiradi:

davlat organlarining diniy tashkilotlar bilan oʻzaro munosabatlarini muvofiqlashtiradi hamda vijdon erkinligi va diniy tashkilotlar toʻgʻrisidagi qonun hujjatlarining ijrosi ustidan nazoratni amalga oshiradi;

diniy tashkilotlar, shuningdek xorijiy diniy tashkilotlar bilan oʻzaro munosabatlarga doir diniy masalalar boʻyicha ishlarni olib boradi;

diniy tashkilotlar iltimosiga koʻra ularning davlat organlari bilan oʻzaro aloqalariga koʻmaklashadi va hal etilishi talab qilinadigan masalalar boʻyicha zarur yordam koʻrsatadi;

diniy tashkilotlar va ularning aʼzolari oʻrtasida oʻzaro bir-birini tushunishni va sabr-toqatlilikni mustahkamlash siyosatini oʻtkazadi, ushbu borada tashkilotchilik ishlarini amalga oshiradi;

Oʻzbekiston Respublikasi Hukumatining topshirigʻiga koʻra vijdon erkinligiga va diniy tashkilotlar faoliyatiga taalluqli normativ-huquqiy hujjatlar loyihalarini ishlab chiqishda qatnashadi;

diniy taʼlim muassasalari faoliyati belgilangan tartibda litsenziyalanishi, litsenziatlar tomonidan litsenziya talablari va shartlariga rioya etilishi ustidan nazoratni tashkil qiladi, litsenziyalar reyestrini yuritadi;

respublika doirasida va chet ellarda diniy tashkilotlar oʻrtasida aloqalar oʻrnatilishini tashkil qiladi;

Oʻzbekiston Respublikasi fuqarolarining mamlakat tashqarisidagi muqaddas joylarga borishini, shu jumladan Haj va Umra ziyoratini amalga oshirishini, fuqarolarni diniy oʻquv yurtlarida taʼlim olish, malaka oshirish va tajriba almashish uchun chet ellarga yuborishni, xorijiy fuqarolarni oʻqishga qabul qilishni, xalqaro anjumanlar oʻtkazilishini tashkil qiladi;

diniy tashkilotlar va Oʻzbekiston Respublikasida diniy adabiyotlar nashr qiluvchi nashriyotlar toʻgʻrisidagi axborotlarni yigʻishni taʼminlaydi;

ekstremistik yoʻnalishdagi huquqqa zid harakat qilayotgan diniy guruhlarni aniqlaydi, ularni bartaraf etishga koʻmaklashadi;

terrorchilik va ekstremizmni targʻib qilishga, xorijdan shu maqsadda mamlakatga daʼvatchilarning qonunsiz kirib kelishiga qarshi huquqni muhofaza qiluvchi idoralar bilan hamkorlikda choralar koʻradi;

joylardagi ommaviy axborot vositalari, rasmiy diniy tashkilotlar bilan birgalikda noqonuniy diniy oqim va guruhlarning faoliyati, dinning terrorchilik, ekstremizm va boshqa jinoiy koʻrinishlarga zid ekanligi haqida aholi oʻrtasida keng tushuntirish ishlarini tashkil etadi;

respublikada chiqariladigan yoki chet ellardan keltiriladigan diniy tusdagi mahsulotlarni (matbuot va elektron nashrlarni, audio, video kassetalarni, SD, DVD va boshqa disklarni) ekspertizadan oʻtkazadi va mazkur faoliyatni muvofiqlashtiradi.

8. Qoʻmita oʻziga yuklangan vazifalar va funksiyalarni bevosita hal qiladi.

9. Respublikada joylashgan diniy tashkilotlar bilan mustahkam oʻzaro hamkorlik qilish, turli diniy konfessiyalar faoliyati amalga oshirilishida yordam koʻrsatish, jamiyatda dinlararo va millatlararo tinchlik va totuvlikni taʼminlash yuzasidan takliflar va chora-tadbirlarni birgalikda ishlab chiqish, konfessiyalararo muloqot madaniyatini rivojlantirish uchun Qoʻmita huzurida Konfessiyalar ishlari jamoatchilik kengashi tashkil etiladi, uning tarkibiga respublikadagi koʻp sonli diniy konfessiyalar yetakchilari kiradi.

Konfessiyalar ishlari kengashi faoliyati tashkil etilishini taʼminlash uchun 3 kishidan iborat doimiy ishlovchi Kengash kotibiyati tashkil etilgan.

III. Qoʻmitaning huquqlari va javobgarligi

10. Qoʻmita oʻziga yuklangan vazifalar va funksiyalarni bajarish uchun quyidagi huquqlarga ega:

vazirliklar, davlat qoʻmitalari, idoralardan, shuningdek mahalliy davlat hokimiyati organlaridan “Vijdon erkinligi va diniy tashkilotlar toʻgʻrisida”gi Qonunning hamda dinga taalluqli boshqa qonun hujjatlarining ijrosi masalalariga doir maʼlumotlar va materiallarini soʻrash va olish;

oʻz vakolatlari doirasida diniy tashkilotlarning, shu jumladan diniy oʻquv yurtlarining faoliyatini, ularning oʻquv jarayoni va dasturlarini, oʻquv-tarbiyaviy ishlarini, fanlar boʻyicha oʻquv rejalarini, diniy mavzudagi ilmiy-tadqiqot ishlarini muvofiqlashtirish, ularga ushbu faoliyatni amalga oshirishda tashkiliy, huquqiy, metodik yordam koʻrsatish;

diniy tashkilotlar rahbarlaridan zarur axborotlarni belgilangan tartibda talab qilish, shuningdek ular tomonidan oʻtkaziladigan ularning oʻz faoliyati bilan bogʻliq tadbirlarda qatnashish.

Qoʻmita Oʻzbekiston Respublikasi qonun hujjatlariga muvofiq boshqa huquqlarga ham ega boʻlishi mumkin.

11. Qoʻmita oʻz vakolatlari doirasida belgilangan tartibda vazirliklar, idoralar, mahalliy davlat hokimiyati organlari bajarishi majburiy boʻlgan normativ-huquqiy hujjatlar qabul qilishga haqlidir.

Qoʻmita, zarur hollarda, boshqa vazirliklar, davlat qoʻmitalari va idoralar bilan birgalikda qoʻshma qarorlar hamda boshqa hujjatlar chiqarishga haqlidir.

12. Qoʻmita oʻziga yuklangan vazifalarning samarali bajarilishi uchun javob beradi.

IV. Qoʻmita faoliyatini tashkil etish

13. Qoʻmitaga Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan rais boshchilik qiladi.

Raisning bir nafar oʻrinbosari boʻladi belgilangan tartibda Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan.

Rais maqomiga koʻra Oʻzbekiston Respublikasi vazirining birinchi oʻrinbosariga, uning oʻrinbosari esa — tegishli ravishda vazir oʻrinbosariga tenglashtiriladi.

14. Rais:

Qoʻmita faoliyatiga umumiy rahbarlikni amalga oshiradi va Qoʻmitaga yuklangan vazifalar va funksiyalarning bajarilishi uchun shaxsan javob beradi;

oʻz oʻrinbosari vakolatlarini belgilaydi, Qoʻmita tizimining boshqa mansabdor shaxslari vakolatlarini belgilaydi;

Qoʻmita tuzilmasiga oʻzgartirishlar kiritadi, xodimlarning belgilangan cheklangan umumiy soni doirasida shtat jadvalini, shuningdek xarajatlar smetasini tasdiqlaydi;

Qoʻmita xodimlarini lavozimga tayinlaydi va lavozimdan ozod qiladi.

Rais qonun hujjatlariga muvofiq boshqa vakolatlarni amalga oshiradi.

15. Qoʻmitada rais (hayʼat raisi), uning oʻrinbosari (lavozimiga koʻra), shuningdek Qoʻmita faoliyatining asosiy yoʻnalishlarini muvofiqlashtiruvchi tarkibiy boʻlinmalari rahbarlaridan iborat tarkibda hayʼat tashkil etiladi.

Hayʼatning aʼzolari soni va shaxsiy tarkibi Qoʻmita raisining taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat quyidagilar bilan bogʻliq masalalarni koʻrib chiqadi:

Qoʻmita faoliyatining har bir kishining vijdon erkinligi va diniy eʼtiqodga boʻlgan huquqlarini, fuqarolarning dinga munosabatidan qatʼi nazar, tengligini taʼminlashni davom ettirish, shuningdek diniy tashkilotlar faoliyati bilan bogʻliq munosabatlarni tartibga solish boʻyicha ushbu Nizomda belgilangan asosiy yoʻnalishlarini tayyorlash va amalga oshirish;

Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita nomenklaturasiga kiradigan lavozimlarga kadrlarni tanlash, joy-joyiga qoʻyish, tayyorlash va qayta tayyorlash;

Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasi qarorlari va farmoyishlarida belgilangan vazifalarni amalga oshirish boʻyicha ijro intizomini mustahkamlash, ularning oʻz vaqtida va sifatli amalga oshirilishini taʼminlash uchun Qoʻmita rahbarlari va xodimlarining shaxsiy javobgarligini oshirish.

Hayʼat Qoʻmita vakolatiga taalluqli boshqa masalalarni ham koʻrib chiqish huquqiga ega.

Hayʼat majlisiga Qoʻmita vakolatiga kiradigan masalalar boʻyicha boshqa vazirliklar, davlat qoʻmitalari, idoralar, mahalliy davlat hokimiyati organlari, korxonalar, muassasalar, tashkilotlar rahbarlari taklif etilishi mumkin.

Hayʼat uning majlisida tarkibining yarmidan koʻpi qatnashgan taqdirda vakolatli boʻladi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi.

Hayʼat qarorlari Qoʻmita qarorlari va raisning buyruqlari bilan amalga oshiriladi. Rais va hayʼat aʼzolari oʻrtasida kelishmovchiliklar paydo boʻlgan taqdirda rais paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasiga axborot bergan holda mustaqil ravishda qaror qabul qiladi. Hayʼat aʼzolari ham oʻz fikr-mulohazalarini Oʻzbekiston Respublikasi Vazirlar Mahkamasiga xabar qilishlari mumkin.

Hayʼat faoliyati tartibi uning hayʼat tasdiqlaydigan reglamentida belgilanadi.

16. Qoʻmitani qayta tashkil etish va tugatish qonun hujjatlarida belgilangan tartibda amalga oshiriladi.