Andijon viloyatining Asaka shahri va Asaka tumani hududlarini birlashtirish hamda Asaka shahrini tuman boʻysunuvidagi shaharlar turkumiga kiritish toʻgʻrisida (135-II-son)

04.12.2010

Oʻzbekiston Respublikasi Oliy Majlisi Senatining

Qarori

“Oʻzbekiston Respublikasida maʼmuriy-hududiy tuzilish, toponimik obyektlarga nom berish va ularning nomlarini oʻzgartirish masalalarini hal etish tartibi toʻgʻrisida”gi Oʻzbekiston Respublikasi Qonunining 2, 5, 9 va 11-moddalariga muvofiq Oʻzbekiston Respublikasi Oliy Majlisining Senati qaror qiladi:

1. Oʻzbekiston Respublikasi Oliy Majlisi Qonunchilik palatasining “Andijon viloyatining Asaka shahri va Asaka tumani hududlarini birlashtirish hamda Asaka shahrini tuman boʻysunuvidagi shaharlar turkumiga kiritish toʻgʻrisida”gi 2010-yil 19-noyabrdagi 200-II-sonli qarori maʼlumot uchun qabul qilinsin.

2. Oʻzbekiston Respublikasi Vazirlar Mahkamasining taklifi maʼqullansin — Andijon viloyatining Asaka shahri va Asaka tumani hududlari birlashtirilsin hamda Asaka shahri tuman boʻysunuvidagi shaharlar turkumiga kiritilsin.

3. Andijon viloyati tarkibida Asaka shahri va Asaka tumani negizida umumiy maydoni 26 881 gektar boʻlgan Asaka tumani tuzilsin hamda uning tarkibiga Asaka shahri, “Zarbdor”, “Ilgʻor”, “Kujgan”, “Mustahkam”, Niyozbotir nomli, “Oʻzbekiston”, “Qadim” va “Qoratepa” qishloq fuqarolar yigʻinlari kiritilsin.

Asaka shahri Asaka tumanining maʼmuriy markazi etib belgilansin.

4. Andijon viloyati Asaka tumanining chegarasi Oʻzbekiston Respublikasi Vazirlar Mahkamasi tomonidan taqdim etilgan chizma shaklga muvofiq tasdiqlansin.

5. Belgilab qoʻyilsinki, Asaka shahridagi saylov okruglaridan saylangan xalq deputatlari Asaka shahar Kengashining deputatlari xalq deputatlari Asaka tuman Kengashi deputatlari hisoblanadi.

6. Oʻzbekiston Respublikasi Vazirlar Mahkamasi ushbu qarorni bajarishga doir kompleks chora-tadbirlarning amalga oshirilishini taʼminlasin.

7. Ushbu qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Senatining Raisi I. SOBIROV

Toshkent sh.,

2010-yil 4-dekabr,

135-II-son