Mamlakat mintaqalariga xorijiy investitsiyalarni jalb etish boʻyicha parlament eshituvlari toʻgʻrisida (245-II-son)

04.12.2011

Oʻzbekicton Respublikasi Oliy Majlisi Senati Kengashining

qarori

“Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonunining 12-moddasiga, “Oʻzbekiston Respublikasi Oliy Majlisi Senatining Reglamenti toʻgʻrisida”gi Oʻzbekiston Respublikasi Qonunining 31-moddasiga muvofiq hamda “Oʻzbekiston Respublikasi Konstitutsiyasining ayrim moddalariga oʻzgartish va qoʻshimchalar kiritish toʻgʻrisida (78, 80, 93, 96 va 98-moddalariga)”gi Oʻzbekiston Respublikasi Qonunidan kelib chiqadigan talablarni amalga oshirish boʻyicha Oʻzbekiston Respublikasi Oliy Majlisi Senatining chora-tadbirlar dasturi 1.1 — 1.4-bandlarini ijro etish yuzasidan Oʻzbekiston Respublikasi Oliy Majlisi Senatining Kengashi qaror qiladi:

1. Oʻzbekiston Respublikasining tashqi iqtisodiy aloqalar, investitsiyalar va savdo vaziri R. Gʻulomov mamlakat mintaqalariga xorijiy investitsiyalarni jalb etish boʻyicha olib borilayotgan ish haqida ushbu masalani parlament eshituvlariga kiritish uchun 2012-yil 15-yanvarga qadar Oʻzbekiston Respublikasi Oliy Majlisi Senatiga axborot taqdim etsin.

2. Oʻzbekiston Respublikasi Oliy Majlisi Senatining Tashqi siyosat masalalari qoʻmitasi (S. Safoyev) mamlakat mintaqalariga xorijiy investitsiyalarni jalb etish boʻyicha olib borilayotgan ish haqidagi axborot kelib tushgan vaqtdan boshlab parlament eshituvlariga tayyorgarlik koʻrish boʻyicha belgilangan tartibda ish olib borsin.

3. Ushbu qaror Oʻzbekiston Respublikasi Oliy Majlisi Senatining yettinchi yalpi majlisi tasdigʻiga kiritilsin.

4. Ushbu qarorning ijro etilishini nazorat qilish Oʻzbekiston Respublikasi Oliy Majlisi Senatining Raisi oʻrinbosari M. Radjabova zimmasiga yuklatilsin.

Oʻzbekiston Respublikasi Oliy Majlisi Senatining Raisi I. SOBIROV

Toshkent sh.,

2011-yil 4-dekabr,

245-II-son